Yitso 98

Naataomɔ Ba Kaselɔi lɛ Ateŋ Beni Yesu Gbele Bɛŋkɛɔ Lɛ

YESU kɛ ekaselɔi lɛ yɛ Yordan Faa lɛ masɛi gbɛ, yɛ he ni amɛfo faa lɛ yɛ kɛjɛ Perea kɛtee Yudea lɛ. Mɛi babaoo kɛ amɛ miifa gbɛ lɛ kɛyaye afi 33 Ŋ.B Hehoo lɛ, ni eshwɛ aaafee otsi ko pɛ ni abaaye lɛ.

Yesu nyiɛ ekaselɔi lɛ ahiɛ kɛmiiya, ni bɔ ni ejieɔ ekaa kpo yɛ efaishitswaa lɛ mli lɛ ha amɛnaa kpɛ amɛhe. Kaimɔ akɛ otsii fioo ko ni tsɔ hiɛ lɛ mli beni Lazaro gbo ni Yesu saa ehe koni eshi Perea kɛya Yudea lɛ, Toma wo mɛi krokomɛi lɛ hewalɛ akɛ: “Nyɛhaa wɔ hu wɔyaa, ni wɔkɛ lɛ ayagbo.” Kaimɔ hu akɛ beni Yesu tee Lazaro shi sɛɛ lɛ, Sanhedrin lɛ tao gbɛi ni amɛaatsɔ nɔ amɛgbe Yesu. Ŋwanejee ko bɛ he akɛ gbeyei mɔmɔ kaselɔi lɛ yɛ be mli ni amɛboteɔ Yudea lɛ.

Ni Yesu tsɛ mɛi 12 lɛ kɛtee afa, bɔni afee ni esaa amɛ eto nɔ ni ka amɛhiɛ ni baa lɛ, ni ekɛɛ amɛ akɛ: “Naa, wɔmiiya Yerusalem, ni aaaŋɔ gbɔmɔ Bi lɛ awo osɔfonukpai lɛ kɛ woloŋmalɔi lɛ adɛŋ, ni amɛaabu lɛ gbele fɔ. Ni amɛaaŋɔ lɛ amɛha wɔŋjalɔi lɛ, ni amɛaaye ehe fɛo ni amɛaafɛ̃ lajɔ amɛshwie ehe, ni amɛkɛ kplebii aaayi lɛ ni amɛaagbe lɛ; ni enɔ gbii etɛ lɛ eeete shi ekoŋŋ.”

Enɛ ji shii etɛ nɔ ni Yesu kɛ ekaselɔi lɛ wieɔ egbele kɛ eshitee lɛ he yɛ nyɔji fioo ni eho lɛ amli. Ni eyɛ mli akɛ amɛboɔ lɛ toi moŋ, shi amɛnuuu lɛ shishi. Ekolɛ ejɛ bɔ ni amɛheɔ amɛyeɔ akɛ abaasaa ato Israel maŋtsɛyeli lɛ ama shi ekoŋŋ yɛ shikpɔŋ nɔ lɛ hewɔ, ni amɛhiɛ ka nɔ akɛ amɛkɛ Kristo baana anunyam kɛ hiɛnyamwoo mli ŋɔɔmɔ yɛ shikpɔŋ nɔ maŋtsɛyeli mli.

Mɛi ni faa gbɛ kɛyaa Hehoo lɛ yeli lɛ ateŋ mɔ kome ji Salome, ni ji bɔfo Yakobo kɛ bɔfo Yohane nyɛ. Yesu tsɛ nɛkɛ hii nɛɛ akɛ “Nyɔŋmɔshiimɔ Bii,” ni ŋwanejee ko bɛ he akɛ enɛ jɛ bɔ ni amɛhiɛ dɔɔ yɛ amɛnifeemɔi amli lɛ hewɔ. Be fioo ni tsɔ hiɛ lɛ mli lɛ, nɛkɛ mɛi enyɔ nɛɛ miitao ni amɛfee mɛi ni nɔ kwɔlɔ fe fɛɛ yɛ Kristo Maŋtsɛyeli lɛ mli, ni amɛha amɛnyɛ le nɔ ni amɛtao ni amɛna nɛɛ. No hewɔ lɛ amɛnyɛ ba koni ebana Yesu yɛ amɛhewɔ, ni eho ekula shi yɛ ehiɛ, ni ebi ni efee enɛ eha lɛ.

Yesu bi lɛ akɛ: “Mɛni otaoɔ?”

Ni yoo lɛ ha lɛ hetoo akɛ: “Kɛɛmɔ ni mibii enyɔ nɛɛ ateŋ mɔ kome ata oninejurɔ nɔ, ni mɔ kome hu ata obɛku nɔ yɛ omaŋtsɛyeli lɛ mli.”

Ni Yesu na he ni nibimɔ lɛ jɛ lɛ, ekɛɛ Yakobo kɛ Yohane akɛ: “Nyɛleee nɔ ni nyɛbiɔ lɛ. Ani nyɛaanyɛ kpulu ni mibanu lɛ nyɛnu?”

Amɛha hetoo akɛ: “Wɔɔnyɛ.” Eyɛ mli akɛ etsɛko tsɔ ni Yesu kɛɛ amɛ akɛ yiwaa kpele kɛ naagbee lɛ, gbele, ka ehiɛ moŋ, shi etamɔ nɔ ni amɛnuuu nɔ ni ewie akɛ enɛ ji “kpulu” ni ebaanu lɛ shishi akɛ no etsɔɔ lɛ.

Shi kɛlɛ, Yesu kɛɛ amɛ akɛ: “Mikpulu lɛ nyɛaanu moŋ, shi mininejurɔ kɛ mibɛku nɔ taramɔ lɛ, ejeee minɔ ni mikɛhaa, shi moŋ mɛi ni mi-Tsɛ esaa eto amɛ lɛ anɔŋ.”

Yɛ sɛɛ mli lɛ, bɔfoi nyɔŋma ni eshwɛ lɛ na amɛle nɔ ni Yakobo kɛ Yohane yabi nɛɛ, ni enɛ ha amɛmli fu waa. Ekolɛ Yakobo kɛ Yohane wie waa yɛ naataomɔ ni tsɔ hiɛ yɛ kaselɔi lɛ ateŋ yɛ mɔ ni ji amɛteŋ onukpa fe fɛɛ lɛ mli. Nii ni amɛbiɔ yɛ nɛkɛ be nɛɛ mli lɛ tsɔɔ akɛ amɛkɛ Yesu ŋaawoo ni ekɛha yɛ sane lɛ he lɛ tsuuu nii. Ni nɔ ni yɔɔ mɔbɔ ji, bɔ ni amɛtaoɔ ni amɛfee onukpai lɛ mli wa lolo.

No hewɔ lɛ Yesu tsɛ mɛi 12 lɛ fɛɛ kɛba bɔni afee ni etsu naataomɔ nɛɛ kɛ mlifu ni eyatee lɛ shi kɛba lɛ he nii. Ni ekɛ suɔmɔ wo amɛ ŋaa ni ekɛɛ: “Nyɛle akɛ maji lɛ anɔ lumɛi lɛ yeɔ amɛnɔ, ni amɛteŋ gbɔmɛi agboi lɛ hu yɛ hewalɛ yɛ amɛnɔ. Akafee nakai yɛ nyɛteŋ; shi mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ. Ni mɔ fɛɛ mɔ ni sumɔɔ ni etsɔ onukpa yɛ nyɛteŋ lɛ, lɛ moŋ etsɔ nyɛtsulɔ.”

Yesu efee nɔkwɛmɔ nɔ lɛ efɔ shi ni esa akɛ amɛnyiɛ esɛɛ, taakɛ etsɔɔ mli lɛ: “Tamɔ bɔ ni gbɔmɔ Bi lɛ baaa ni asɔmɔ lɛ, shi eba sɔɔmɔ moŋ, ni eŋɔ esusuma lɛ eha yɛ mɛi pii akpɔmɔ hewɔ lɛ.” Jeee akɛ Yesu sɔmɔ yɛ mɛi krokomɛi ahewɔ kɛkɛ, shi moŋ ebaafee nakai aahu kɛyashi be mli ni eeegbo eha adesai! Ehe miihia ni kaselɔi lɛ ana nakai su ni Kristo hiɛ akɛ esumɔɔ ni esɔmɔ moŋ fe ni aaasɔmɔ lɛ lɛ eko koni amɛba amɛhe shi ni amɛtsɔmɔ sɔɔlɔi moŋ fe mɛi ni yɔɔ onukpai agbɛhei amli. Mateo 20:17-28; Marko 3:17; 9:33-37; 10:32-45; Luka 18:31-34; Yohane 11:16.

▪ Mɛni hewɔ ni agbɛnɛ gbeyei emɔmɔ kaselɔi lɛ?

▪ Mɛɛ gbɛ nɔ Yesu saa ekaselɔi lɛ kɛha nɔ ni ka amɛhiɛ ni baa lɛ yɛ?

▪ Mɛni mɛi komɛi babi Yesu ni efee eha amɛ, ni mɛɛ gbɛ nɔ esa bɔfoi krokomɛi lɛ ahe yɛ?

▪ Mɛɛ gbɛ nɔ Yesu tsu naagba ni te shi yɛ bɔfoi lɛ ateŋ lɛ he nii yɛ?