Yitso 99

Yesu Tsɔɔ Nii yɛ Yeriko

ETSƐƐƐ ni Yesu kɛ mɛi babaoo ni kɛ lɛ faa gbɛ lɛ bashɛ Yeriko, ni ji maŋ ni jɛkɛmɔ aaafee gbi kome gbɛfaa kɛjɛ Yerusalem lɛ. Etamɔ nɔ ni Yeriko ji maji enyɔ ni efee ekome, Yudafoi amaŋ momo lɛ aaafee shitoo kome jɛkɛmɔ kɛjɛ Romabii amaŋ hee lɛ mli. Yɛ be mli ni mɛi babaoo lɛ jeɔ kpo kɛjɛɔ maŋ momo lɛ mli ni amɛbɛŋkɛɔ maŋ hee lɛ, shwilafoi enyɔ ni baa nii lɛ nu amɛhoofeemɔ lɛ. Atsɛɔ amɛteŋ mɔ kome Bartimeo.

Beni amɛna amɛle akɛ Yesu ji mɔ ni hoɔ lɛ, Bartimeo kɛ ehefatalɔ lɛ bɔi bolɔmɔ akɛ: “Naa wɔ mɔbɔ, Nuŋtsɔ, David Bi!” Beni asafo babaoo lɛ famɔ amɛyi ni amɛfee dioo lɛ, amɛbolɔ waa moŋ fe tsutsu lɛ, amɛkɛɛ: “Naa wɔ mɔbɔ, Nuŋtsɔ, David Bi!”

Ni Yesu nu amɛbolɔmɔ lɛ, ewa edamɔ shi. Ekɛɛ mɛi ni fata ehe lɛ ni amɛtsɛ mɛi ni bolɔɔ lɛ kɛba. Ni amɛtee nibalɔi shwilafoi lɛ aŋɔɔ ni amɛyakɛɛ amɛteŋ mɔ kome akɛ: “Na tsui, tee shi, eetsɛo!” Kɛkɛ ni nibalɔ shwilafo nɛɛ kɛ miishɛɛ kpele shɛ etade lɛ efɔ, ni huru edamɔ enaji anɔ, ni etee Yesu ŋɔɔ.

Yesu bi lɛ akɛ: “Mɛni otaoɔ akɛ mifee mihao?”

Ni hii shwilafoi enyɔ lɛ kpa lɛ fai akɛ: “Nuŋtsɔ, akɛ agbele wɔhiŋmɛii lɛ.”

Ni Yesu musuŋ tsɔ lɛ yɛ amɛhe, ni eta amɛhiŋmɛii ahe. Taakɛ nɔ ni Marko ŋma lɛ tsɔɔ lɛ, Yesu kɛɛ amɛteŋ mɔ kome akɛ: “Yaa, ohemɔkɛyeli lɛ etsao.” Amrɔ nɔŋŋ kɛkɛ ni nibalɔi shwilafoi lɛ na nii ekoŋŋ, ni ŋwanejee ko bɛ he akɛ amɛyi enyɔ lɛ fɛɛ amɛjie Nyɔŋmɔ yi. Beni gbɔmɛi lɛ fɛɛ na nɔ ni tee nɔ lɛ, amɛ hu amɛkɛ yijiemɔ ha Nyɔŋmɔ. Ni Bartimeo kɛ mɔ ni fata ehe lɛ bɔi Yesu sɛɛ nyiɛmɔ amrɔ nɔŋŋ.

Beni Yesu tsɔɔ Yeriko maŋ lɛ mli kɛhoɔ lɛ, mɛi lɛ ayi bafa babaoo diɛŋtsɛ. Mɔ fɛɛ mɔ miitao ena mɔ ni tsa hii shwilafoi lɛ. Gbɔmɛi lɛ ebɔle Yesu he fɛɛ kɛkpe ni amɛbɛŋkɛ lɛ kpaakpa, no hewɔ lɛ, mɛi komɛi enaaa lɛ kɛ amɛhiŋmɛi tete po. Amɛteŋ mɔ ko ji Zakeo, ni ji toohelɔi ni yɔɔ Yeriko kɛ ehewɔ maji lɛ amli lɛ anɔ onukpa lɛ. Eyɛ kpitioo tsɔ, no hewɔ lɛ enaaa nɔ ni yaa nɔ.

No hewɔ lɛ, Zakeo jo foi kɛtsɔ hiɛ ni eyakwɔ sikamore tso ko ni ma gbɛ ni Yesu nyiɛ nɔ lɛ masɛi lɛ. Agbɛnɛ lɛ ebaanyɛ ena nɔ fɛɛ nɔ ni yaa nɔ, kɛjɛ nɛkɛ he ni kwɔ nɛɛ. Beni asafoi babaoo lɛ bɛŋkɛ jɛmɛ lɛ, Yesu tsɛ mɔ ni yɔɔ tso lɛ nɔ lɛ akɛ: “Zakeo, ohe afee oya ni okpeleke shi, shi owe lɛ mibato ŋmɛnɛ.” Ni Zakeo kpeleke shi kɛ miishɛɛ ni etee shia oya koni eyasaa he ko eha egbɔ ni ebuɔ lɛ waa nɛɛ.

Shi kɛlɛ, beni gbɔmɛi lɛ na nɔ ni yaa nɔ lɛ, amɛ fɛɛ amɛbɔi huhuuhu wiemɔ. Amɛsusuɔ akɛ ejaaa akɛ Yesu aaayato nuu ni tamɔ mɔ nɛ gbɔ. Ole sane ko, Zakeo ena nii babaoo kɛtsɔ shika ni eheɔ yɛ mɛi adɛŋ yɛ gbɛ fɔŋ nɔ yɛ toohemɔ mli lɛ nɔ.

Mɛi pii nyiɛ amɛsɛɛ, ni beni Yesu bote Zakeo shia lɛ mli lɛ, amɛwie amɛshi lɛ akɛ: “Eyato nuu eshafeelɔ ŋɔɔ.” Shi kɛlɛ Yesu na akɛ Zakeo ji mɔ ko ni baanyɛ atsake etsui. Ni Yesu nijiaŋ ejeee wui, ejaakɛ Zakeo te shi damɔ shi ni etswa adafi akɛ: “Nuŋtsɔ, naa, miiŋɔ minii fã miike ohiafoi, ni kɛji mikɛ yaka naafolɔmɔ eshɔ mɔ ko nɔ ko yɛ edɛŋ lɛ, miiku miibɔ he toi ejwɛ maha lɛ.”

Zakeo ma nɔ mi akɛ etsuitsakemɔ lɛ ji anɔkwale nɔ kɛtsɔ enibii lɛ fa ni ekɛhaa ohiafoi kɛ fa kroko ni ekɛwoɔ mɛi ni eshishiu amɛ lɛ nyɔmɔ lɛ nɔ. Eka shi faŋŋ akɛ ebaanyɛ ebu akɔntaa kɛjɛ etoohemɔ woji lɛ amli ni ena nyɔmɔ ni ehiɛ nɛkɛ gbɔmɛi nɛɛ. No hewɔ lɛ eka kita akɛ ebaawo nyɔmɔ lɛ toi ejwɛ, koni ekɛye Nyɔŋmɔ mla ni kɛɔ akɛ: ‘Kɛji mɔ ko yaju too lɛ, eŋɔ tooi ejwɛ eto ekome najiaŋ’ lɛ nɔ.

Yesu na gbɛ ni Zakeo tsɔ nɔ etsɔɔ akɛ ebaajara enibii lɛ amli lɛ he miishɛɛ, ejaakɛ E-kɛɛ: “Ŋmɛnɛ, walaheremɔ eba nɛkɛ shia nɛɛ, akɛ nɔ ni lɛ hu Abraham bi ji lɛ lɛ. Ejaakɛ gbɔmɔ Bi lɛ ba nɔ ni elaaje lɛ taomɔ kɛ yiwalaheremɔ.”

Etsɛko tsɔ, ni Yesu kɛ bi nyenyeŋtswi lɛ he abɛbua lɛ fee shihilɛ ni ‘mɛi ni elaaje’ lɛ yɔɔ mli lɛ he mfoniri. Amrɔ nɛɛ wɔna shihilɛ diɛŋtsɛ mli nɔ ko ni tsɔɔ mɔ ko ni laaje ni ana lɛ ekoŋŋ. Eyɛ mli akɛ jamɔ mli hiɛnyiɛlɔi lɛ kɛ mɛi ni nyiɛɔ amɛsɛɛ lɛ wie huhuuhu amɛshi Yesu jwɛŋmɔ ni egbala kɛba gbɔmɛi tamɔ Zakeo anɔ lɛ moŋ, shi Yesu tee nɔ etao nɛkɛ gbɔmɛi nɛɛ bɔni afee ni esaa ekɛ Abraham bii nɛɛ aba ekoŋŋ. Mateo 20:29-34; Marko 10:46-52; Luka 18:35–19:10; 2 Mose 22:1.

▪ Eka shi faŋŋ akɛ, nɛgbɛ ji he ni Yesu kɛ nibalɔi shwilafoi lɛ kpe yɛ, ni mɛni efee eha amɛ?

▪ Namɔ ji Zakeo, ni mɛni hewɔ ekwɔ tso lɛ?

▪ Mɛɛ gbɛ nɔ Zakeo tsɔ ema nɔ mi yɛ akɛ etsake etsui?

▪ Mɛni wɔbaanyɛ wɔkase kɛjɛ gbɛ ni Yesu tsɔ nɔ ekɛ Zakeo ye ha lɛ mli?