Bɔ Ní Anaa Nɔ Ko Ahaa lɛ Baanyɛ Alaka Mɔ
IRISH lalafolɔ kɛ shwɛmɔi ahe woji aŋmalalɔ, Richard Sheridan kɛɛ, “Anyɛɛɛ akɛ he afɔ nibii ni anaa lɛ anɔ.” Enɛ ji anɔkwale yɛ tsei kɛ gbɔmɛi hu he.
Gbi ko, kɛmiiya March naagbee mli, yɛ afii 33 Ŋ.B., ni Yesu Kristo na agbami tso ko beni ekɛ ekaselɔi lɛ jɛ Betania kɛyaa Yerusalem lɛ. Baai eyi tso lɛ nɔ obɔ, shi beni ebɛŋkɛ ni ekwɛ lɛ jogbaŋŋ lɛ, ena akɛ yibii ko kwraa bɛ nɔ. No hewɔ lɛ Yesu kɛɛ tso lɛ akɛ: “Mɔ ko yeŋ onɔ yibii dɔŋŋ kɛaatee naanɔ!”—Marko 11:12-14.
Mɛni hewɔ Yesu lomɔ nakai tso lɛ, akɛni, taakɛ Marko tsɔɔ mli lɛ, “agbamiwoo be shɛko” lɛ? (Marko 11:13) Ojogbaŋŋ, kɛ agbami tso fu baai lɛ, nɔ ni baa nɔ ji mra yibii ni ewoɔ. Efɔɔɔ kaa akɛ agbami tso aaabu kusuu nɛkɛ yɛ be ni tamɔ nɛkɛ mli yɛ afi lɛ mli. Shi akɛni baai yɔɔ nɔ hewɔ lɛ, Yesu kpa gbɛ yɛ gbɛ ni ja nɔ akɛ eeena agbamii komɛi yɛ nɔ. (Kwɛmɔ mfoniri ni yɔɔ ŋwɛi gbɛ lɛ.) Anɔkwale ni eji akɛ baai pɛ yɔɔ tso lɛ nɔ lɛ tsɔɔ akɛ ewoŋ yibii. Bɔ ni anaa lɛ ahaa lɛ lakaa mɔ. Akɛni aheɔ too yɛ tsei ni woɔ yibii ahe hewɔ lɛ, tso ni wooo yibii lɛ bɔɔ mɔ nyɔmɔ ni ehe hiaa ni afo afɔ shi.
Yesu kɛ nakai agbami tso ni wooo yibii lɛ fee okadi ekɛtsɔɔ nikasemɔ ko ni he hiaa yɛ hemɔkɛyeli he. Enɔ jetsremɔ lɛ, ekaselɔi lɛ anaa kpɛ amɛhe beni amɛna akɛ tso lɛ egbi momo lɛ. Yesu tsɔɔ mli akɛ: “Nyɛhea Nyɔŋmɔ nyɛyea! . . . Nii abɔ fɛɛ ni nyɛkpaa he fai yɛ nyɛsɔlemɔ mli lɛ, nyɛhea nyɛyɛa akɛ nyɛaanã, ni aaaŋɔha nyɛ.” (Marko 11:22-24) Kɛfata nɔkwɛmɔ nɔ ni efee ni kɔɔ bɔ ni ehe hiaa ni asɔle yɛ hemɔkɛyeli mli lɛ he lɛ, agbami tso ni gbi lɛ tsɔɔ nɔ ni baaba maŋ ni bɛ hemɔkɛyeli lɛ nɔ.
No mli lɛ Yesu etsɔ hiɛ yɛ nyɔji komɛi amli ekɛ Yudafoi amaŋ lɛ eto agbami tso ni wooo yibii afii etɛ ni abaafo ashɛ afɔ kɛ ehi shi nakai lɛ he. (Luka 13:6-9) Akɛni elomɔ agbami tso lɛ gbii ejwɛ pɛ dani egbo hewɔ lɛ, Yesu tsɔɔ bɔ ni akɛni Yudafoi amaŋ lɛ woko yibii ni sa tsuitsakemɔ hewɔ lɛ nɔ ni baa enɔ ji hiɛkpatamɔ lɛ. Eyɛ mli akɛ nakai maŋ lɛ—ni tamɔ agbami tso lɛ—tamɔ nɔ ni yɔɔ hewalɛ yɛ hiɛaŋhiɛaŋ moŋ, shi beni abɛŋkɛ lɛ ni akwɛ lɛ jogbaŋŋ lɛ, ejie hemɔkɛyeli ni bɛ ni yagbe naa yɛ Mesia lɛ ni ekpoo lɛ lɛ mli lɛ kpo.—Luka 3:8, 9.
Yesu bɔ kɔkɔ yɛ e-Gɔŋ nɔ Shiɛmɔ lɛ mli eshi “amale gbalɔi,” ni ekɛɛ: “Amɛyibii nyɛkɛaale amɛ. Ani atseɔ wein yibii yɛ ŋmei tsei anɔ, aloo atsɛɔ agbamii yɛ aklatei anɔ? Nakai nɔŋŋ tso fɛɛ tso ni ji ekpakpa lɛ woɔ yibii kpakpai; shi tso fɔŋ woɔ yibii fɔji. Tso kpakpa nyɛɛɛ awo yibii fɔji, ni asaŋ tso fɔŋ nyɛɛɛ awo yibii kpakpai. Tso fɛɛ tso ni wooo yibii kpakpai lɛ, aaatoo lɛ, ni aŋɔ lɛ awo la mli. No hewɔ lɛ, amɛyibii lɛ nyɛkɛaale amɛ.” (Mateo 7:15-20) Yesu wiemɔi nɛɛ kɛ agbami tso ni alomɔ lɛ lɛ he sane lɛ tsɔɔ faŋŋ akɛ ehe miihia ni wɔhiɛ ahi wɔhe nɔ yɛ mumɔŋ, ejaakɛ bɔ ni mɔ ko pueɔ yɛ jamɔ mli lɛ baanyɛ alaka mɔ.