Yitso 28

Abibii lɛ Saji yɛ Ŋmaahilɛ He

NƆ NI miihe ashɛ afi eho kɛjɛ be mli ni Yesu yaye Hehoo lɛ yɛ afi 30 Ŋ.B. lɛ. Yɛ nɛkɛ be nɛɛ mli lɛ, no mli lɛ awo Yohane Baptisilɔ lɛ tsuŋ nyɔji pii. Eyɛ mli akɛ eetao ni ekaselɔi lɛ atsɔmɔ Kristo sɛɛnyiɛlɔi moŋ, shi jeee amɛ fɛɛ amɛtsɔmɔ nakai.

Agbɛnɛ Yohane ni awo lɛ tsuŋ nɛɛ kaselɔi lɛ ekomɛi ba Yesu ŋɔɔ ni amɛbabi lɛ akɛ: “Mɛɛ hewɔ wɔ kɛ Farisifoi lɛ fɔɔ ŋmaahilɛ, ni okaselɔi lɛ ehiii ŋmaa lɛ?” Farisifoi lɛ hiɔ ŋmaa shii enyɔ yɛ otsi mli akɛ amɛjamɔ lɛ mli nifeemɔ. Ni ekolɛ Yohane kaselɔi lɛ hu feɔ nakai nɔŋŋ. Ekolɛ eeenyɛ ebalɛ hu akɛ amɛmiihi ŋmaa lɛ ni amɛkɛye Yohane tsuŋwoo lɛ he awerɛho, ni no hewɔ lɛ efee amɛ naakpɛɛ yɛ nɔ hewɔ ni Yesu kaselɔi lɛ fataaa amɛhe kɛyeee nɛkɛ awerɛho nɛɛ.

Ni Yesu ha amɛ hetoo ni etsɔɔ mli akɛ: “Ani yookpeemɔ lɛ he bialɔi lɛ aaanyɛ aye ŋkɔmɔ gbii abɔ ni ayemforowu lɛ kɛ amɛ yɔɔ lɛ? Shi gbii aaaba momo, ni aaaŋɔ ayemforowu lɛ kɛaajɛ nyɛteŋ kɛaatee, ni no dani amɛaahi ŋmaa.”

Esa akɛ Yohane kaselɔi lɛ akai akɛ Yohane diɛŋtsɛ wie Yesu he akɛ Ayemforowu lɛ. No hewɔ lɛ, beni Yesu yɔɔ lɛ, Yohane ebuŋ lɛ akɛ be ni sa akɛ ehi ŋmaa, ni nakai nɔŋŋ Yesu kaselɔi lɛ hu baafee. Yɛ sɛɛ mli, beni Yesu gbo lɛ, ekaselɔi lɛ ye awerɛho ni amɛhi ŋmaa. Shi beni atee lɛ shi kɛjɛ gbohii ateŋ ni ekwɔ kɛtee ŋwɛi lɛ, amɛbɛ nɔ ni amɛaadamɔ nɔ amɛhi ŋmaa kɛ ŋkɔmɔyeli dɔŋŋ.

Ni Yesu tee nɔ ekɛ abɛbuai nɛɛ ha akɛ: “Shi mɔ ko eŋɔɔɔ mamanaa hee etaaa atade momo; ejaakɛ nɔ ni aŋɔta ni kulɛ aŋɔtsi fɔlɔ lɛ yeɔ atade lɛ, ni fɔlɔ lɛ lɛɛɔ moŋ fe tsutsu lɛ. Asaŋ aŋɔɔɔ wein hee awoo wolotɔi memeji amli; no lɛ wolotɔi lɛ aaafɛlɛ, ni wein lɛ aaashwie shi, ni wolotɔi lɛ aaafite; shi wein hee lɛ, wolotɔi heei amli moŋ akɛwoɔ.” Mɛni nɛkɛ abɛbuai nɛɛ kɔɔ yɛ ŋmaahilɛ he?

Yesu miiye kɛmiibua Yohane Baptisilɔ lɛ kaselɔi lɛ ni amɛna akɛ esaaa akɛ mɔ ko kpaa esɛɛnyiɛlɔi lɛ agbɛ akɛ amɛaanyiɛ Yuda jamɔ mli blema nifeemɔ, tamɔ ŋmaahilɛ ni afeɔ yɛ kusum naa lɛ asɛɛ. Ebaaa ni ebata blema jamɔ gbɛjianɔtoi ni egbala ni be eshɛ ni abaashɛrɛ ashwie lɛ aloo ni ebatsa nɔ ni eha esɛɛ ajɛkɛ ekoŋŋ. Ahaŋ Kristo jamɔ kɛ Yuda jamɔ ni yɔɔ yɛ nakai beaŋ ni gbɔmɛi ablema saji eyi lɛ obɔ lɛ akpa gbee. Dabi, efeŋ tamɔ mamanaa hee ni akɛta mama shwɛ mli, aloo wein hee yɛ wolotɔ momo mli. Mateo 9:14-17; Marko 2:18-22; Luka 5:33-39; Yohane 3:27-29.

▪ Namɛi hiɔ ŋmaa, ni mɛɛ yiŋtoo hewɔ amɛfeɔ nakai lɛ?

▪ Mɛni hewɔ ni Yesu kaselɔi lɛ ehiii ŋmaa beni ekɛ amɛ yɔɔ lɛ, ni yɛ sɛɛ mli lɛ te aaafee tɛŋŋ ni nɔ ni haa amɛhiɔ ŋmaa lɛ aaalaaje kwraa lɛ?

▪ Mɛɛ abɛbuai Yesu gba amɛ, ni mɛni ji amɛshishinumɔ?