“Mɔ Ni Kaneɔ Lɛ, Hã Ni Eyoo Sɛɛ”
“Kɛ́ nyɛna amaŋfɔ nihii nii lɛ . . . akɛ ema hé krɔŋkrɔŋ lɛ . . . no lɛ mɛi ni yɔɔ Yudea lɛ ajo foi aya gɔji lɛ anɔ.”—MATEO 24:15, 16.
1. Kɔkɔbɔɔ ní Yesu kɛha, taakɛ anaa yɛ Luka 19:43, 44 lɛ ná mɛɛ mlibaa?
WƆHIƐ ni aaahi wɔhe nɔ yɛ amanehulu ko ni miiba he lɛ baanyɛ aha wɔnyɛ wɔjo naa foi. (Abɛi 22:3) No hewɔ lɛ, feemɔ shihilɛ ni Kristofoi ni hi Yerusalem lɛ yɔɔ mli yɛ Romabii atutuamɔ ní ba yɛ afi 66 Ŋ.B. sɛɛ lɛ he mfoniri okwɛ. Yesu ebɔ kɔkɔ momo akɛ abaawo maŋtiase lɛ he ká ni abaakpata hiɛ. (Luka 19:43, 44) Yudafoi lɛ ateŋ mɛi pii ebuuu ewiemɔ nɛɛ. Shi ekaselɔi lɛ bo ekɔkɔbɔɔ lɛ toi. No hewɔ lɛ, ahere amɛyiwala kɛjɛ amanehulu ni ba yɛ afi 70 Ŋ.B. lɛ mli.
2, 3. Mɛni hewɔ esa akɛ wɔná Yesu gbalɛ ni aŋma yɛ Mateo 24:15-21 lɛ he miishɛɛ?
2 Yesu tsɔɔ okadi ni nibii pii yɔɔ mli, tamɔ tai, hɔji, shikpɔŋhosomɔi, tsɛŋemɔ helai, kɛ yiwaa ni akɛaaba Kristofoi ni shiɛɔ Nyɔŋmɔ Maŋtsɛyeli lɛ amɛtsɔɔ lɛ anɔ, yɛ gbalɛ ko ni hiɛ shishinumɔi kɛha wɔ ŋmɛnɛ lɛ mli. (Mateo 24:4-14; Luka 21:10-19) Yesu kɛ kadimɔ nii ko ní baaye abua ekaselɔi lɛ ní amɛle akɛ naagbee lɛ ebɛŋkɛ lɛ hu ha—no ji ‘amaŋfɔ nihii nii ní ma hé krɔŋkrɔŋ lɛ.’ (Mateo 24:15) Nyɛhaa wɔsáa wɔpɛia nakai wiemɔi ni shishinumɔ yɔɔ mli lɛ amli ekoŋŋ, ní wɔkwɛ bɔ ni amɛbaanyɛ amɛsa wɔshihilɛ he bianɛ kɛ wɔsɛɛ hu.
3 Beni etsɔɔ okadi lɛ egbe naa lɛ, Yesu kɛɛ akɛ: “Kɛ́ nyɛna amaŋfɔ nihii nii lɛ ni gbalɔ Daniel wie he lɛ akɛ ema hé krɔŋkrɔŋ lɛ (mɔ ni kaneɔ lɛ, ha ni eyoo sɛɛ!): no lɛ mɛi ni yɔɔ Yudea lɛ ajo foi aya gɔji lɛ anɔ; mɔ ni yɔɔ tsũ yiteŋ lɛ, ekakpeleke shi eyakɔ nɔ ko kɛjɛ eshia; ni mɔ ni yɔɔ ŋmɔshi lɛ, ekaku esɛɛ eyakɔlɔ etadei. Shi miiha mɛi ni hiɛ hɔ kɛ mɛi ni hãa fufɔ yɛ no gbii lɛ amli lɛ, kpoo! Shi nyɛsɔlea, koni nyɛ foijee lɛ akaba yɛ fɛ̃i be lɛ mli aloo yɛ hejɔɔmɔ gbi lɛ nɔ. Ejaakɛ no be lɛ mli lɛ amanehulu babaoo aaaba, ni anako nɔ dã kɛjɛ je lɛŋ shishijee mli.”—Mateo 24:15-21.
4. Mɛni tsɔɔ akɛ Mateo 24:15 lɛ ná emlibaa yɛ klɛŋklɛŋ afii oha lɛ mli?
4 Saji ni Marko kɛ Luka ŋmala lɛ kɛ otii krokomɛi fataa he. Hé ni Mateo kɛ wiemɔ “ema hé krɔŋkrɔŋ lɛ” tsu nii yɛ lɛ, Marko 13:14 lɛ kɛɔ akɛ “ema hé ni esaaa akɛ emaa.” Luka 21:20 kɛ Yesu wiemɔi nɛɛ fataa he akɛ: “Kɛ́ nyɛna akɛ abɔ nsara awo Yerusalem he lɛ, belɛ nyɛnáa nyɛlea akɛ efitemɔ lɛ eshɛ.” Enɛ yeɔ ebuaa wɔ ni wɔnaa akɛ klɛŋklɛŋ mlibaa lɛ kɔɔ tutuamɔ ní Romabii lɛ kɛba Yerusalem kɛ esɔlemɔtsu—hé ní yɔɔ krɔŋkrɔŋ kɛha Yudafoi lɛ, shi ejeee hé ní yɔɔ krɔŋkrɔŋ dɔŋŋ kɛha Yehowa—lɛ nɔ, ní je shishi yɛ afi 66 Ŋ.B. lɛ he. Amaŋfɔfeemɔ kwraa ba beni Romabii lɛ kpata maŋtiase lɛ kɛ sɔlemɔtsu lɛ fɛɛ hiɛ yɛ afi 70 Ŋ.B. lɛ. Mɛni ji “nihii nii lɛ” yɛ nakai beaŋ? Ni ‘ebama hé krɔŋkrɔŋ lɛ’ yɛ mɛɛ gbɛ nɔ? Sanebimɔi nɛɛ ahetooi baaye abua ní eha ŋmɛnɛŋmɛnɛ beaŋ mlibaa lɛ mli afee faŋŋ.
5, 6. (a) Mɛni hewɔ sɛɛyoomɔ he baahia mɛi ni kaneɔ Daniel yitso 9 lɛ? (b) Yesu gbalɛ ní kɔɔ “nihii nii lɛ” he lɛ ba mli yɛ mɛɛ gbɛ nɔ?
5 Yesu wo mɛi ní kaneɔ lɛ hewalɛ ní amɛyoo sɛɛ. Mɛi ni kaneɔ mɛni? Eeenyɛ efee akɛ Daniel yitso 9 lɛ. Wɔnaa gbalɛ ni tsɔɔ be ni Mesia lɛ baapue lɛ yɛ jɛmɛ, ni egbaa efɔ̃ɔ shi hu akɛ yɛ afii etɛ kɛ fã sɛɛ lɛ, ‘aaafo lɛ ashɛ afɔ̃.’ Gbalɛ lɛ kɛɔ akɛ: “Fine nɔ amaŋfɔ nihii nii lɛ aaahi, kɛyashi beyinɔ ní aaafɔse nyɔmɔwoo kɛ kojomɔ ashwie fitelɔ lɛ nɔ.”—Daniel 9:26, 27; wɔma efã ko nɔ mi; kwɛmɔ Daniel 11:31; 12:11 hu.
6 Yudafoi lɛ susu akɛ enɛ kɔɔ bulemɔ ni Antiochus IV bule sɔlemɔtsu lɛ aaafee afii 200 ni eho lɛ he. Shi kɛlɛ, Yesu miitsɔɔ nɔ kroko kwraa, ni ewo hewalɛ ní akɛ sɛɛyoomɔ atsu nii ejaakɛ kpaako “amaŋfɔ nihii nii lɛ” baapue, ní ebama “hé krɔŋkrɔŋ lɛ.” Anaa faŋŋ akɛ Yesu miiwie Roma asraafoi ní baaba yɛ afi 66 Ŋ.B. kɛ amɛ aflaŋai krɛdɛɛi lɛ ahe. Nɛkɛ aflaŋai, ní akɛtsuɔ nii kɛjɛ jeeŋmɔ beebe nɛɛ tamɔ amagai pɛpɛɛpɛ, ni eji nihii nii kɛha Yudafoi lɛ.a Shi, mɛɛ be ‘amɛbaama hé krɔŋkrɔŋ lɛ’? Enɛ ba mli beni Roma asraafoi, ní hiɛ amɛ aflaŋai lɛ tutua Yerusalem kɛ esɔlemɔtsu ní Yudafoi lɛ buɔ lɛ krɔŋkrɔŋ lɛ. Romabii lɛ bɔi gbogbo lɛ fã ni yɔɔ sɔlemɔtsu lɛ masɛi lɛ po shishitsaa. Lɛɛlɛŋ, nɔ ni abuɔ lɛ nihii nii kɛjɛ jeeŋmɔ beebe lɛ ebadamɔ hé krɔŋkrɔŋ lɛ agbɛnɛ!—Yesaia 52:1; Mateo 4:5; 27:53; Bɔfoi lɛ Asaji 6:13.
Ŋmɛnɛŋmɛnɛ Beaŋ “Nihii Nii”
7. Mɛɛ Yesu gbalɛ baa mli yɛ wɔbe nɛɛ mli?
7 Kɛjɛ Jeŋ Ta I mli kɛbaa nɛɛ, wɔna Yesu okadi ni aŋma afɔ̃ shi yɛ Mateo yitso 24 lɛ mlibaa ní da. Shi kɛlɛ, kaimɔ ewiemɔi nɛɛ, akɛ: “Kɛ́ nyɛna amaŋfɔ nihii nii lɛ . . . akɛ ema hé krɔŋkrɔŋ lɛ . . . no lɛ mɛi ni yɔɔ Yudea lɛ ajo foi aya gɔji lɛ anɔ.” (Mateo 24:15, 16) Esa akɛ gbalɛ lɛ fã nɛɛ aná emlibaa yɛ wɔbe nɛɛ hu mli.
8. Yehowa Odasefoi kɛ afii babaoo etsɔɔ nɔ ni ji “nihii nii lɛ” yɛ ŋmɛnɛŋmɛnɛ beaŋ yɛ mɛɛ gbɛ nɔ?
8 Beni ejieɔ hekɛnɔfɔɔ ni Yehowa tsuji yɔɔ akɛ gbalɛ nɛɛ baaba mli lɛ kpo lɛ, The Watchtower ní je kpo yɛ January 1, 1921 lɛ, gbala jwɛŋmɔ kɛtee enɛ nɔ, ni ekɛto nibii ni yaa nɔ yɛ Boka Teŋgbɛ lɛ he. Enɛ hewɔ lɛ, The Watchtower lɛ kɛ nɔmimaa diɛŋtsɛ wie, yɛ nɔ ni je kpo yɛ December 15, 1929 lɛ, baafa 374 lɛ akɛ: “Oti kwraa ní ma Jeŋmaji Akpaŋmɔ lɛ hiɛ ji ní egbala gbɔmɛi lɛ kɛjɛ Nyɔŋmɔ kɛ Kristo he kwraa, ni no hewɔ lɛ eji amaŋfɔfeemɔ nii, Satan ninenaa nitsumɔ, kɛ nihii nii yɛ Nyɔŋmɔ hiɛ.” No hewɔ lɛ, “nihii nii lɛ” pue yɛ afi 1919. Yɛ be ko sɛɛ lɛ, Kpaŋmɔ lɛ je jɛmɛ ni Jeŋmaji Ekomefeemɔ lɛ baye enajiaŋ. Yehowa Odasefoi ejɛ jeeŋmɔ beebe amɛkpá adesai atoiŋjɔlɛ gbɛjianɔtoi nɛɛ ahe mama ákɛ amɛji nihii nii yɛ Nyɔŋmɔ hiɛ.
9, 10. Shishinumɔ ní wɔná be ko yɛ amanehulu kpeteŋkpele lɛ he lɛ sa bɔ ni wɔsusuɔ be ni “nihii nii lɛ” baama hé krɔŋkrɔŋ lɛ he wɔhaa lɛ he yɛ mɛɛ gbɛ nɔ?
9 Nikasemɔ ní tsɔ enɛ hiɛ lɛ mua Mateo yitsei 24 kɛ 25 lɛ mli saji babaoo ahesusumɔ ni mli kã shi faŋŋ naa. Ani esa akɛ akɛ ‘nihii nii ni ma hé krɔŋkrɔŋ lɛ’ mlitsɔɔmɔ ni yɔɔ faŋŋ ahã? Eka shi faŋŋ akɛ esa nakai. Yesu gbalɛ lɛ kɛ ‘hé krɔŋkrɔŋ ní emaa’ lɛ kɛ “amanehulu” ní egba yɛ he efɔ̃ shi lɛ fɛmɔ tsáa kpaakpa. No hewɔ lɛ, eyɛ mli akɛ “nihii nii lɛ” ehi shi aahu yɛ be kakadaŋŋ mli moŋ, shi esa akɛ tsakpãa ni yɔɔ ‘ma ní emaa hé krɔŋkrɔŋ lɛ’ kɛ amanehulu kpeteŋkpele lɛ teŋ lɛ asa bɔ ni wɔsusuɔ nii ahe wɔhaa lɛ he. Yɛ mɛɛ gbɛ nɔ?
10 Be ko lɛ, Nyɔŋmɔ webii nu shishi akɛ amanehulu kpeteŋkpele lɛ klɛŋklɛŋ fã lɛ je shishi yɛ afi 1914, ni ákɛ naagbee fã lɛ baaba yɛ Harmagedon ta lɛ mli. (Kpojiemɔ 16:14, 16; okɛto The Watchtower ni je kpo yɛ April 1, 1939 lɛ, baafa 110 he.) No hewɔ lɛ wɔbaanyɛ wɔnu nɔ hewɔ ní be ko lɛ, asusu akɛ naagbee gbii lɛ amli “nihii nii lɛ” bama hé krɔŋkrɔŋ lɛ yɛ Jeŋ Ta I sɛɛ nɔŋŋ lɛ shishi.
11, 12. Mɛɛ shishinumɔ hee ní kɔɔ amanehulu kpeteŋkpele lɛ he akɛha yɛ afi 1969 mli?
11 Shi kɛlɛ, wɔbanu nibii ashishi yɛ gbɛ ni yɔɔ srɔto nɔ, yɛ sɛɛ mli afii lɛ amli. Yɛ Soo, July 10, 1969 lɛ, F. W. Franz, ní no mli lɛ, lɛ ji Buu Mɔɔ Biblia kɛ Woji Bibii Asafo lɛ sɛinɔtalɔ sɛɛkwɛlɔ lɛ, ha maŋshiɛmɔ ko ni yɔɔ miishɛɛ waa, yɛ “Toiŋjɔlɛ yɛ Shikpɔŋ Nɔ” Majimaji Ateŋ Kpee ní afee yɛ New York City lɛ shishi. Beni etsɔɔ tsutsu shishinumɔ ní ayɔɔ yɛ Yesu gbalɛ lɛ he lɛ mli yɛ gbɛ kroko nɔ lɛ, Nyɛminuu Franz wie akɛ: “Akɛ naatsɔɔmɔ ha akɛ ‘amanehulu kpeteŋkpele’ lɛ je shishi yɛ afi 1914 Ŋ.B., ni ákɛ aŋmɛɛɛ gbɛ ní etsa nɔ aahu kɛyagbe naa yɛ nakai beaŋ, shi moŋ Nyɔŋmɔ tsĩ Jeŋ Ta I lɛ naa yɛ afi 1918 November mli. Kɛjɛ nakai beaŋ kɛbaa nɛɛ, Nyɔŋmɔ miiha be kplaŋŋ ko kɛha eshwɛɛnii ní afɔ amɛ mu, ni ji Kristofoi ní ahala amɛ lɛ anitsumɔ dani eha ‘amanehulu kpeteŋkpele’ lɛ naagbee fã lɛ aje shishi yɛ Harmagedon ta lɛ mli.”[5]
12 Kɛkɛ ni akɛ naatsɔɔmɔ hee ní sa kadimɔ waa ha, akɛ: “Bɔni afee ni ekɛ klɛŋklɛŋ afii oha lɛ mli nibii ni ba lɛ akpã gbee lɛ, . . . nɔ ni akɛ ‘amanehulu kpeteŋkpele’ lɛ fee he mfoniri lɛ ejeee shishi yɛ afi 1914 Ŋ.B. Shi moŋ, nɔ ni ba ŋmɛnɛŋmɛnɛ beaŋ mfonirifeemɔŋ Yerusalem nɔ yɛ afi 1914-1918 lɛ ji ‘kɔɔmɔi lɛ abɔimɔ’ kɛkɛ . . . ‘Amanehulu kpeteŋkpele’ lɛ ní eko baŋ nakai dɔŋŋ lɛ yɛ kɛ̃ ni ebaaba, ejaakɛ no baatsɔɔ jeŋ apasa jamɔ maŋtsɛyeli (ní Kristendom fata he) lɛ hiɛkpatamɔ, ni nɔ ni baanyiɛ sɛɛ ji ‘Nyɔŋmɔ Ofe lɛ gbi wulu lɛ nɔ ta lɛ’ yɛ Harmagedon.” Enɛ tsɔɔ akɛ amanehulu kpeteŋkpele muu lɛ fɛɛ kã wɔhiɛ ní kpaako ebaaba.[5a]
13. Mɛni hewɔ nilee yɔɔ mli akɛ wɔɔkɛɛ akɛ akɛ “nihii nii lɛ” ‘baama hé krɔŋkrɔŋ lɛ’ yɛ wɔsɛɛ be ko mli lɛ?
13 Enɛ kɔɔ yoomɔ ní aaayoo be mli ni “nihii nii lɛ” baama hé krɔŋkrɔŋ lɛ he tɛ̃ɛ. Kaimɔ nɔ ni ba yɛ klɛŋklɛŋ afii oha lɛ mli lɛ. Romabii lɛ batutua Yerusalem yɛ afi 66 Ŋ.B., shi amɛgbala amɛhe shi trukaa, ni enɛ ha ahere “heloo” ni ji Kristofoi lɛ ayiwala. (Mateo 24:22) Yɛ enɛ kɛ gbeekpãmɔ naa lɛ, wɔmiikpa gbɛ akɛ etsɛŋ ni amanehulu kpeteŋkpele lɛ baaje shishi, shi abaafo nɔ kpitioo yɛ Nyɔŋmɔ halamɔbii lɛ ahewɔ. Kadimɔ oti ni he hiaa waa nɛɛ: Yɛ blema nɔkwɛmɔnɔ lɛ naa lɛ, akɛ ‘nihii nii ni ma hé krɔŋkrɔŋ lɛ’ to tutuamɔ ní Romabii lɛ kɛba, yɛ Tatsɛ Gallus hiɛnyiɛmɔ shishi yɛ afi 66 Ŋ.B. lɛ he. Ŋmɛnɛŋmɛnɛ beaŋ nɔ̃ ni tamɔ nakai tutuamɔ lɛ pɛpɛɛpɛ—ni ji amanehulu kpeteŋkpele lɛ fɛmɔ lɛ—kã wɔhiɛ lolo. No hewɔ lɛ, eka shi faŋŋ akɛ kpaako dani “amaŋfɔ nihii nii lɛ,” ní ehi shi aahu kɛjɛ afi 1919 tɔ̃ɔ kɛbaa lɛ, baaba ebama hé krɔŋkrɔŋ lɛ.b Te enɛ baaba lɛ eha tɛŋŋ? Ni te ebaanyɛ esa wɔhe eha tɛŋŋ?
Wɔsɛɛ Be Mli Tutuamɔ
14, 15. Kpojiemɔ yitso 17 lɛ yeɔ ebuaa wɔ ni wɔnuɔ nibii ni baatsɔ Harmagedon hiɛ lɛ ashishi yɛ mɛɛ gbɛ nɔ?
14 Kpojiemɔ wolo lɛ tsɔɔ bɔ ni wɔsɛɛ be mli hiɛkpatamɔ tutuamɔ ni akɛbaaba apasa jamɔ nɔ lɛ baaba lɛ aha. Yitso 17 lɛ tsɔɔ Nyɔŋmɔ kojomɔ ní ekɛbaa ‘Babilon Kpeteŋkpele lɛ, ajwamaŋi lɛ anyɛ’—ni ji jeŋ apasa jamɔ maŋtsɛyeli lɛ nɔ. Kristendom ji efã titri fe fɛɛ, ni ekɛɔ akɛ ekɛ Nyɔŋmɔ yɛ kpaŋmɔ wekukpãa mli. (Okɛto Yeremia 7:4 he.) Apasa jamɔi, ní Kristendom fata he lɛ, kɛ “shikpɔŋ lɛ nɔ maŋtsɛmɛi lɛ” ená sharamɔ yɛ gbɛ fɔŋ nɔ, shi enɛ baaba naagbee yɛ nakai jamɔi lɛ ahiɛkpatamɔ mli. (Kpojiemɔ 17:2, 5) Yɛ namɔ dɛŋ?
15 Kpojiemɔ lɛ feɔ “kooloo ni tsuɔ tamɔ muneele,” ní yɔɔ yɛ be ko mli, ní elaaje, ní no sɛɛ lɛ, eba ekoŋŋ lɛ he mfoniri. (Kpojiemɔ 17:3, 8) Je lɛŋ nɔyelɔi lɛ fiɔ kooloo nɛɛ sɛɛ. Ehe saji fitsofitso ní akɛha yɛ gbalɛ lɛ mli lɛ yeɔ ebuaa wɔ ni wɔyɔseɔ mfonirifeemɔŋ kooloo nɛɛ akɛ toiŋjɔlɛ gbɛjianɔtoo ní ba shihilɛ mli yɛ afi 1919 akɛ Jeŋmaji Akpaŋmɔ lɛ (“nihii nii”) ní amrɔ nɛɛ etsɔ Jeŋmaji Ekomefeemɔ lɛ. Kpojiemɔ 17:16, 17 lɛ tsɔɔ akɛ wɔsɛɛ lɛ, Nyɔŋmɔ kɛbaawo adesai nɔyelɔi komɛi ní ehe gbɛi waa yɛ “kooloo” nɛɛ mli lɛ atsuii amli ní amɛfee jeŋ apasa jamɔ maŋtsɛyeli lɛ amaŋfɔ. Nakai tutuamɔ lɛ kadiɔ amanehulu kpeteŋkpele lɛ fɛmɔ.
16. Mɛɛ nibii ni sa kadimɔ yaa nɔ yɛ jamɔ gbɛfaŋ?
16 Akɛni amanehulu kpeteŋkpele lɛ shishijee yɛ wɔsɛɛ be mli lolo hewɔ lɛ, ani ‘ma ní eeema hé krɔŋkrɔŋ lɛ’ kã wɔhiɛ lolo? Eka shi faŋŋ akɛ nakai eji. Eyɛ mli akɛ “nihii nii lɛ” pue mra yɛ afii oha nɛɛ shishijee gbɛ, ni no hewɔ lɛ, ehi shi afii nyɔŋmai abɔ moŋ, shi ebaaba gbɛhe ko mli yɛ gbɛ krɛdɛɛ nɔ ‘yɛ hé krɔŋkrɔŋ lɛ’ yɛ wɔsɛɛ be ni ebɛŋkɛ kpaakpa mli. Taakɛ bɔ ni Kristo sɛɛnyiɛlɔi ni hi shi yɛ klɛŋklɛŋ afii oha lɛ mli lɛ kwɛ jogbaŋŋ akɛ amɛaana bɔ ni ‘ma ní eeema hé krɔŋkrɔŋ lɛ’ baaba lɛ aha lɛ, nakai nɔŋŋ ŋmɛnɛŋmɛnɛ beaŋ Kristofoi lɛ hu feɔ. Wɔkpɛlɛɔ nɔ akɛ, ebaabi ní wɔmɛ emlibaa diɛŋtsɛ dani wɔle emli saji fɛɛ fitsofitso. Ni kɛlɛ, esa kadimɔ waa akɛ, nyɛɛ ní anaa faŋŋ, ní miiya hiɛ, ní ajieɔ lɛ kpo yɛ jamɔ he lɛ yɛ shikpɔji komɛi anɔ momo. Maŋkwramɔŋ kui komɛi, ní kɛ tsutsu Kristofoi ní egbá afã kɛjɛ anɔkwa hemɔkɛyeli lɛ he lɛ eyafee ekome lɛ, miitée basabasafeemɔ shi amɛmiishi jamɔi fɛɛ, titri lɛ, anɔkwa Kristofoi. (Lala 94:20, 21; 1 Timoteo 6:20, 21) Enɛ hewɔ lɛ, maŋkwramɔŋ hewalɛi lɛ ‘kɛ Toobi lɛ miiwu’ amrɔ nɛɛ po, ni taakɛ Kpojiemɔ 17:14 lɛ tsɔɔ lɛ, ta nɛɛ mli baawa. Eyɛ mli akɛ amɛnine nyɛŋ ashɛ Nyɔŋmɔ Toobi—Yesu Kristo ní yɔɔ egbɛhe ní awo nɔ, ní yɔɔ nyam mli lɛ—nɔ diɛŋtsɛ moŋ, shi amɛbaaya nɔ amɛjie amɛ shitee-kɛ-woo kpo amɛshi Nyɔŋmɔ anɔkwa jálɔi, ni ji ‘emɛi krɔŋkrɔŋi lɛ’ titri. (Daniel 7:25; okɛto Romabii 8:27; Kolosebii 1:2; Kpojiemɔ 12:17 he.) Wɔyɛ ŋwɛi nɔmimaa akɛ Toobi lɛ kɛ mɛi ni fata ehe lɛ baaye kunim.—Kpojiemɔ 19:11-21.
17. Mɛni wɔbaanyɛ wɔkɛɛ yɛ bɔ ni “nihii nii lɛ” baama hé krɔŋkrɔŋ lɛ eha lɛ he, ní kɛlɛ, wɔfeee keketee yɛ wɔsusumɔi amli?
17 Wɔle akɛ hiɛkpatamɔ miimɛ apasa jamɔ. ‘Krɔŋkrɔŋbii lɛ alá etɔ’ Babilon Kpeteŋkpele lɛ “dãa,” ni efeɔ enii tamɔ maŋnyɛ, shi bɔ fɛɛ bɔ ni fee lɛ, abaakpata ehiɛ. Hewalɛ fɔŋ ni ená yɛ shikpɔŋ nɔ maŋtsɛmɛi lɛ anɔ lɛ baatsake yɛ naakpɛɛ gbɛ nɔ, beni nakai wekukpãa lɛ tsakeɔ kɛbatsɔɔ hetsɛ̃ ni naa wa, ni jɛɔ ‘akolontoi nyɔŋma lɛ kɛ kooloo lɛ’ ŋɔɔ kɛbaa enɔ lɛ. (Kpojiemɔ 17:6, 16; 18:7, 8) Be mli ni “kooloo ni tsuɔ tamɔ muneele” lɛ aaatutua jamɔ mli ajwamaŋ lɛ, no mli lɛ “nihii nii lɛ” ma nɔ ni Kristendom tsɛɔ lɛ ehé krɔŋkrɔŋ lɛ yɛ gbɛ ni yɔɔ gbeyei nɔ.c No hewɔ lɛ, hiɛkpatamɔ lɛ baaje shishi yɛ Kristendom ní bɛ hemɔkɛyeli, ní kɛ ehe tsɔɔ akɛ eyɛ krɔŋkrɔŋ lɛ nɔ.
“Ajo Foi”—Yɛ Mɛɛ Gbɛ Nɔ?
18, 19. Mɛɛ yiŋtoi akɛhaa ní tsɔɔ akɛ ‘foijee kɛ gɔji lɛ anɔ yaa’ lɛ etsɔŋ jamɔ tsakemɔ?
18 Beni egba ‘ma ni nihii nii lɛ baama hé krɔŋkrɔŋ lɛ’ efɔ̃ shi sɛɛ lɛ, Yesu bɔ mɛi ni yɔɔ sɛɛyoomɔ lɛ kɔkɔ ní amɛtsu he nii. Ani eetsɔɔ akɛ nakai be ni ekpe sɛɛ lɛ mli—beni “nihii nii lɛ” ‘ma hé krɔŋkrɔŋ lɛ’—gbɔmɛi babaoo baajo foi kɛshi apasa jamɔ mli ní amɛkɛ amɛhe awo anɔkwa jamɔ mli? Eka shi faŋŋ akɛ dabi. Susumɔ klɛŋklɛŋ mlibaa lɛ he okwɛ. Yesu kɛɛ akɛ: “Mɛi ni yɔɔ Yudea lɛ ajo foi aya gɔji lɛ anɔ; ni mɔ ni yɔɔ tsũ yiteŋ lɛ akakpeleke shi eba shia, aloo ní ebote shia eyakɔ nɔ ko; ni mɔ ni yɔɔ ŋmɔshi lɛ ekaku esɛɛ eyakɔ etade. Shi miiha mɛi ni hiɛ musu kɛ mɛi ni haa fufɔ yɛ nakai gbii lɛ amli lɛ, kpoo! Shi nyɛsɔlea koni nyɛ foijee lɛ akaba yɛ fɛ̃i be mli!”—Marko 13:14-18; wɔma efã ko nɔ mi.
19 Yesu ekɛɛɛ akɛ mɛi ni yɔɔ Yerusalem lɛ pɛ esa akɛ amɛjo foi, tamɔ nɔ ni nɔ̃ pɛ ni etsɔɔ ji akɛ, esa akɛ amɛjo foi kɛshi Yudafoi ajamɔ shikwɛ̃ɛhe lɛ; nakai nɔŋŋ ekɔkɔbɔɔ lɛ etsĩii jamɔ tsakemɔ hu tã—ní aaajo foi kɛjɛ apasa jamɔ mli ní akɛ he awo anɔkwa jamɔ mli. Eka shi faŋŋ akɛ foijee kɛmiijɛ jamɔ kome mli kɛmiiya ekroko mli he kɔkɔbɔɔ he ehiaaa Yesu kaselɔi lɛ; amɛtsɔmɔ anɔkwa Kristofoi momo. Ni tutuamɔ ni ba yɛ afi 66 Ŋ.B. lɛ kanyaaa mɛi ni diɔ Yuda jamɔ sɛɛ yɛ Yerusalem kɛ Yudea fɛɛ lɛ ní amɛkpoo nakai jamɔ lɛ ní amɛkpɛlɛ Kristojamɔ nɔ. Nilelɔ Heinrich Graetz kɛɔ akɛ mɛi ni tiu Romabii ni jo foi lɛ, ku amɛsɛɛ amɛba maŋtiase lɛ mli ekoŋŋ: “Hiɛdɔlɔi lɛ, ní miila ta mli kunimyeli lalai kɛ bolɔmɔ lɛ, ku amɛsɛɛ kɛba Yerusalem (yɛ October 8), ní amɛtsuii miitswa kɛ kpɔmɔ kɛ heyeli he hiɛnɔkamɔ ni yɔɔ miishɛɛ. . . . Ani Nyɔŋmɔ kɛ mɔbɔnalɛ yeko ebuako amɛ tamɔ bɔ ni E-ye ebua amɛblematsɛmɛi lɛ? Hiɛdɔlɔi lɛ atsuii sheee nɔ ko ni baanyɛ aba wɔsɛɛ ko gbeyei.”[6]
20. Te mra be mli kaselɔi lɛ tsu Yesu kɔkɔbɔɔ akɛ amɛjo foi kɛya gɔji lɛ anɔ lɛ he nii amɛha tɛŋŋ?
20 Belɛ, te halamɔbii ní amɛyi faaa kwraa yɛ nakai beaŋ lɛ tsu Yesu ŋaawoo lɛ he nii amɛha tɛŋŋ? Amɛtsɔ Yudea ní amɛshi, ní amɛjo foi kɛtee gɔji lɛ anɔ yɛ Yordan sɛɛ lɛ nɔ amɛtsɔɔ akɛ amɛjeee Yudafoi anibii agbɛjianɔtoo lɛ fã, yɛ maŋkwramɔ loo jamɔ mli. Amɛshi ŋmɔji kɛ shiai, ni amɛlooo amɛnibii kɛjɛɛɛ amɛshiai amli po kɛyaaa. Akɛni amɛyɛ hekɛnɔfɔɔ yɛ Yehowa dɛŋ hebuu kɛ sɛɛfimɔ mli hewɔ lɛ, amɛkɛ ejamɔ ye nɔ fɛɛ nɔ ni ekolɛ amɛbuɔ akɛ ehe hiaa lɛ hiɛ.—Marko 10:29, 30; Luka 9:57-62.
21. Mɛni ehe ehiaaa ní wɔkpaa gbɛ kɛ́ “nihii nii lɛ” kɛ tutuamɔ lɛ ba?
21 Agbɛnɛ, susumɔ emlibaa ní da lɛ he okwɛ. Wɔkɛ afii nyɔŋmai abɔ etee nɔ ewo gbɔmɛi hewalɛ aahu ní amɛshi apasa jamɔ ní amɛkɛ amɛhe awo anɔkwa jamɔ mli. (Kpojiemɔ 18:4, 5) Akpekpei abɔ efee nakai. Yesu gbalɛ lɛ etsɔɔɔ akɛ kɛ́ amanehulu kpeteŋkpele lɛ je shishi nɔŋŋ lɛ, gbɔmɛi babaoo baatsɔ amɛhe kɛba jamɔ krɔŋŋ he; eka shi faŋŋ akɛ, Yudafoi babaoo tsakeee yɛ nɛkɛ gbɛ nɔ yɛ afi 66 Ŋ.B. Ni kɛlɛ, anɔkwa Kristofoi baaná nɔ kpele ní baakanya amɛ ní amɛkɛ Yesu kɔkɔbɔɔ lɛ atsu nii ní amɛjo foi.
22. Ekolɛ Yesu ŋaawoo ní tsɔɔ foijee kɛ gɔji lɛ anɔ yaa lɛ baanyɛ akɔ mɛni he?
22 Wɔnyɛŋ wɔle amanehulu kpeteŋkpele lɛ he saji fɛɛ fitsofitso amrɔ nɛɛ, shi wɔbaanyɛ wɔkɛ nilee amu saji anaa akɛ yɛ wɔgbɛfaŋ lɛ, foijee ní Yesu wie he lɛ efeeŋ foijee kɛmiiya shikpɔŋ nɛɛ nɔ hé ko pɔtɛɛ. Nyɔŋmɔ webii yɛ je lɛŋ fɛɛ momo, amɛyɛ ekoŋ fɛɛ koŋ. Shi kɛlɛ, wɔbaanyɛ wɔná nɔmimaa akɛ kɛ́ foijee he miihia lɛ, ehe baahia ní Kristofoi aya nɔ amɛha srɔtofeemɔ ni anaa faŋŋ yɛ amɛkɛ apasa jamɔ gbɛjianɔtoi ateŋ lɛ ahi shi nakai daa. Esa kadimɔ waa hu akɛ Yesu bɔ kɔkɔ akɛ mɔ ko akaku esɛɛ kɛmiiya eshia ákɛ eyaakɔlɔ etadei loo enibii krokomɛi. (Mateo 24:17, 18) No hewɔ lɛ, ekolɛ bɔ ni wɔbuɔ heloonaa nibii wɔhaa lɛ he kaai kã wɔhiɛ; ani amɛji nibii ni he hiaa fe fɛɛ, aloo ani yiwalaheremɔ ní mɛi fɛɛ ni yɔɔ Nyɔŋmɔ masɛi lɛ baaná lɛ he miihia fe no? Hɛɛ, ekolɛ wɔfoijee lɛ kɛ fimɔ kɛ ohia shihilɛi komɛi baaba. Ebaabi ní wɔfee klalo akɛ wɔbaafee nɔ fɛɛ nɔ ni ehe hiaa ní wɔfee, tamɔ bɔ ni wɔnyɛmimɛi ni hi shi yɛ klɛŋklɛŋ afii oha lɛ mli, ní jo foi kɛjɛ Yudea kɛtee Perea, yɛ Yordan sɛɛ lɛ fee lɛ.
23, 24. (a) Nɛgbɛ pɛ wɔbaanyɛ wɔná hebuu yɛ? (b) Mɛɛ hewalɛ esa akɛ Yesu kɔkɔbɔɔ ni kɔɔ ‘nihii nii ni ma hé krɔŋkrɔŋ lɛ’ he lɛ aná yɛ wɔnɔ?
23 Esa akɛ wɔná nɔmimaa akɛ wɔbobaahe baaya nɔ afee Yehowa kɛ egbɛjianɔtoo ní tamɔ gɔŋ lɛ be fɛɛ be. (2 Samuel 22:2, 3; Lala 18:3; Daniel 2:35, 44) Jɛmɛ ji he ni wɔbaaná hebuu yɛ! Wɔkaseŋ adesai babaoo ní baajo foi kɛya “bui amli” ní amɛyatee “gɔji atɛsai amli”—ni ji adesai agbɛjianɔtoi kɛ kui ní ato ní ekolɛ amɛbaahi shi be kukuoo ko yɛ Babilon Kpeteŋkpele lɛ hiɛkpatamɔ sɛɛ lɛ. (Kpojiemɔ 6:15; 18:9-11) Lɛɛlɛŋ, ekolɛ nibii amli baawa waa—taakɛ bɔ ni ekolɛ emli wa yɛ afi 66 Ŋ.B. kɛha yei ní hiɛ musu ní jo foɔ kɛshi Yudea lɛ, loo kɛha mɛi fɛɛ ní esa akɛ amɛfã gbɛ lɛ yɛ fɛ̃i kɛ nugbɔnɛmɔ be mli lɛ. Shi wɔbaanyɛ wɔná nɔmimaa akɛ Nyɔŋmɔ baaha wɔná yibaamɔ. Nyɛhaa wɔwajea hekɛnɔfɔɔ ní wɔyɔɔ yɛ Yehowa kɛ e-Bi ní yeɔ nɔ amrɔ nɛɛ ákɛ Maŋtsɛyeli lɛ nɔ Maŋtsɛ lɛ mli lɛ bianɛ.
24 Yiŋtoo ko bɛ ní wɔɔdamɔ nɔ wɔhi shi yɛ nɔ ni baaba lɛ he gbeyeishemɔ mli. Yesu sumɔɔɔ ní ekaselɔi ni hi shi yɛ nakai beaŋ lɛ ashe gbeyei, ni esumɔɔɔ ni wɔshe gbeyei amrɔ nɛɛ loo yɛ gbii ni baaba lɛ amli. Ehɛle wɔ shi koni wɔnyɛ wɔfee wɔtsuii kɛ wɔjwɛŋmɔi klalo. Ejaakɛ bɔ fɛɛ bɔ ni eji lɛ, agbalaŋ Kristofoi ni feɔ toiboo lɛ atoi beni hiɛkpatamɔ baa apasa jamɔ kɛ gbɛjianɔtoo fɔŋ nɛɛ fã ní eshwɛ lɛ nɔ lɛ. Amɛbaaná sɛɛyoomɔ, ni amɛbaabo kɔkɔbɔɔ ni kɔɔ ‘nihii nii ni ma hé krɔŋkrɔŋ lɛ’ he lɛ toi. Ni amɛkɛ yiŋkpɛɛ diɛŋtsɛ baatsu amɛhemɔkɛyeli ni ma shi shiŋŋ lɛ he nii. Eba akɛ wɔhiɛ kpaŋ shiwoo ni Yesu kɛha nɛɛ nɔ kɔkɔɔkɔ, akɛ: “Mɔ ni hiɛɔ mli kɛwulaa shi lɛ, aaahere eyiwala.”—Marko 13:13.
[Shishigbɛ niŋmai]
a “Akɛ jamɔ mli nifeemɔ kɛ bulɛ buɔ Roma aflaŋai lɛ ahe yɛ sɔlemɔtsui ni yɔɔ Roma lɛ amli; ni bulɛ ní gbɔmɛi nɛɛ yɔɔ kɛha amɛ aflaŋai lɛ kɛ bɔ ni amɛhe wa kwraa fe jeŋmaji krokomɛi lɛ yeɔ egbɔ pɛpɛɛpɛ . . . [Kɛha asraafoi lɛ] ekolɛ no ji nii ni yɔɔ krɔŋkrɔŋ fe fɛɛ yɛ shikpɔŋ lɛ nɔ. Roma asraafonyo kɛ eflaŋaa kãa kita.”—The Encyclopædia Britannica, 11th Edition.[1]
b Esa akɛ wɔkadi akɛ eyɛ mli akɛ Yesu wiemɔi lɛ amlibaa yɛ afi 66-70 Ŋ.B. lɛ baanyɛ aye abua wɔ ní wɔnu bɔ ni ebaaba mli eha yɛ amanehulu kpeteŋkpele lɛ mli lɛ shishi moŋ, shi mlibaai enyɔ lɛ kɛ amɛhe kpãŋ gbee pɛpɛɛpɛ yɛ nibii fɛɛ mli ejaakɛ mlibaai lɛ baaba yɛ shihilɛi srɔtoi amli.
c Kwɛmɔ The Watchtower ni je kpo December 15, 1975 lɛ, baafai 741-4.
Ani Okaiɔ?
◻ “Amaŋfɔ nihii nii lɛ” jie ehe kpo yɛ klɛŋklɛŋ afii oha lɛ mli yɛ mɛɛ gbɛ nɔ?
◻ Mɛni hewɔ nilee yɔɔ mli akɛ aaasusu akɛ akɛ ŋmɛnɛŋmɛnɛ beaŋ “nihii nii lɛ” baama hé krɔŋkrɔŋ lɛ yɛ wɔsɛɛ be ko mli lɛ?
◻ Mɛɛ tutuamɔ agba afɔ̃ shi yɛ Kpojiemɔ lɛ mli akɛ “nihii nii lɛ” kɛbaaba?
◻ Mɛɛ ‘foijee’ ekolɛ ehe baahia yɛ wɔgbɛfaŋ wɔsɛɛ?
[Caption on page 16]
Atsɛɔ Babilon Kpeteŋkpele lɛ akɛ ‘ajwamaŋi lɛ anyɛ’
[Caption on page 17]
Kooloo ni tsuɔ tamɔ muneele, ni yɔɔ Kpojiemɔ yitso 17 lɛ ji “nihii nii” ní Yesu wie he lɛ
[Caption on page 18]
Kooloo ni tsuɔ tamɔ muneele lɛ baanyiɛ hiɛkpatamɔ tutuamɔ ni akɛaaba jamɔ nɔ lɛ hiɛ