Mɛni Esa akɛ Wɔfee ni Ahere Wɔyiwala?

NUU ko babi Yesu be ko akɛ: “Nuntsɔ, ani mɛi fioo kɛkɛ yiwala abaahere?” Te Yesu ha hetoo eha tɛŋŋ? Ani ekɛɛ akɛ: ‘Kpɛlɛmɔ minɔ akɛ o-Nuntsɔ kɛ Yiwalaherelɔ kɛkɛ, ni abaahere oyiwala’? Dabi! Yesu kɛɛ: “Nyɛpelea agbó fintɔ̃ɔ lɛ mlibotemɔ he, ejaakɛ miikɛɛ nyɛ akɛ, mɛi pii aaatao mli abote, shi amɛnyɛŋ.”—Luka 13:23, 24.

Ani Yesu haaa nuu lɛ sanebimɔ lɛ hetoo? Dabi, nuu lɛ biii bɔ ni eeewa dani ahere mɔ ko yiwala lɛ he sane; ebi akɛ ani amɛyifalɛ baafee mɛi fioo lo. No hewɔ lɛ Yesu tsɔɔ kɛkɛ akɛ mɛi fioo ko pɛ ni shɛɛɛ bɔ ni mɔ ko aaakpa gbɛ ji mɛi ni baapele amɛhe waa koni amɛnine ashɛ nɛkɛ jɔɔmɔ ni yɔɔ nyam nɛɛ nɔ.

‘Jeee nakai ji bɔ ni akɛɛ mi,’ taakɛ kanelɔi komɛi baawie ashi lɛ. Ekolɛ amɛbaatsɛ Yohane 3:16 sɛɛ, he ni kɛɔ akɛ: “Ejaakɛ nɛkɛ Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (King James Version) Shi, wɔhaa hetoo akɛ: ‘Belɛ, mɛni esa akɛ wɔhe wɔye lɛ mɔ? Ákɛ Yesu hi shihilɛ mli diɛŋtsɛ? Hɛɛ, nakai. Ákɛ Nyɔŋmɔ Bi ji lɛ? Eka shi faŋŋ akɛ hɛɛ! Ni akɛni Biblia lɛ tsɛɔ Yesu akɛ “Tsɔɔlɔ” kɛ “Nuntsɔ” hewɔ lɛ, ani esaaa ni wɔhe nɔ ni etsɔɔ lɛ hu wɔye, ni wɔbo lɛ toi, ni wɔnyiɛ esɛɛ?’—Yohane 13:13; Mateo 16:16.

Yesu Sɛɛnyiɛmɔ

Ah, biɛ ji he ni naagba lɛ teɔ shi yɛ! Etamɔ nɔ ni mɛi babaoo ni akɛɛ amɛ akɛ ‘ahere amɛyiwala’ lɛ hiɛ yiŋtoo bibioo pɛ yɛ Yesu sɛɛ ni amɛaanyiɛ loo amɛaabo lɛ toi lɛ he. Yɛ anɔkwale mli lɛ, Protestant osɔfo ko ŋma akɛ: “Yɛ anɔkwale mli lɛ, esa akɛ Kristo mli hemɔkɛyeli ni wɔyɔɔ lɛ atsa nɔ. Shi wiemɔ ni awieɔ akɛ esa akɛ efee nakai doo, loo ehe miihia waa ni efee nakai lɛ, bɛ sɛɛfimɔ ko kwraa yɛ Biblia lɛ mli.”

Nɔ ni tamɔɔɔ nakai lɛ, Biblia lɛ tsĩɔ jeŋba shara mli nifeemɔi ni fa babaoo yɛ mɛi ni susuɔ akɛ ‘ahere amɛyiwala’ lɛ ateŋ mɛi komɛi ahe lɛ tã. Efã Kristofoi yɛ mɔ ko ni tee nɔ yɛ gbɛi ni tamɔ nɛkɛ nɔ lɛ he akɛ: “Nyɛjiea mɔ fɔŋ lɛ yɛ nyɛteŋ.” Eka shi faŋŋ akɛ Nyɔŋmɔ sumɔŋ ni gbɔmɛi fɔji awo e-Kristofoi asafo lɛ he muji!—1 Korintobii 5:11-13.

Belɛ, mɛni Yesu sɛɛ ni aaanyiɛ lɛ tsɔɔ, ni mɛɛ gbɛ nɔ wɔɔfee enɛ yɛ? Ojogbaŋŋ, mɛni ji nɔ ni Yesu fee? Ani ahoshwibɔlɔ? ajwamaŋbɔlɔ? daatɔlɔ? kɛ amalelɔ ji lɛ? Ani eyeee anɔkwa yɛ nitsumɔ mli? Eka shi faŋŋ akɛ dabi! ‘Shi,’ ekolɛ obaabi akɛ, ‘ani esa akɛ majie nɛkɛ nibii nɛɛ fɛɛ kɛjɛ mishihilɛ mli?’ Kɛ ootao hetoo lɛ, susumɔ Efesobii 4:17 kɛyashi 5:5 he. Ekɛɛɛ akɛ Nyɔŋmɔ baakpɛlɛ wɔ nɔ, ni nɔ ni wɔfeɔ kɔɔɔ he eko. Shi moŋ, ekɛɔ wɔ ni wɔha esoro wɔ yɛ jeŋmaji ni ebɔle wɔ lɛ amli bii ahe, mɛi ni “nɔ ko nɔ ko efeee amɛ hiɛgbele [lɛ], . . . Shi nyɛ lɛ jeee nakai nyɛkase Kristo lɛ . . . Nyɛshɛ́ nyɛsá jeŋba lɛ naa gbɔmɔ momo ni efite yɛ shishiumɔ sɛɛdii lɛ naa lɛ nyɛfɔ̃ . . . Julɔ lɛ ekaju dɔŋŋ . . . Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ akatsĩ tã tete yɛ nyɛteŋ, taakɛ bɔ ni sa mɛi krɔŋkrɔŋi . . . Ejaakɛ nyɛle enɛ momo akɛ, ajwamaŋbɔlɔ ko ajwamaŋbɔlɔ ko aloo nyaŋemɔ nitsulɔ ko aloo hiɛjoolɔ ko, ni ji wɔŋjalɔ, bɛ gbɛnaa yɛ Kristo kɛ Nyɔŋmɔ maŋtsɛyeli lɛ mli.”

Ani wɔmiinyiɛ Yesu sɛɛ, kɛji kɛ hoo lɛ, wɔbɔɔɔ mɔdɛŋ ni wɔhi shi yɛ enɔkwɛmɔ nɔ lɛ kɛ gbeekpamɔ naa? Ani ehe ehiaaa ni wɔtsu nii ni wɔha wɔshihilɛi atamɔ Kristo nɔ lɛ babaoo? Gbɔmɛi ni kɛɔ, taakɛ jamɔ he dɛhiɛmɔ wolo ko kɛɛ lɛ, akɛ: “Ba Kristo ŋɔɔ amrɔ nɛɛ—ba bɔ ni oyɔɔ lɛ nɔŋŋ” lɛ, efɔɔɔ sanebimɔ nɛɛ hesusumɔ, kɛji amɛsusuɔ he kwraa po.

Yesu kaselɔi lɛ ateŋ mɔ kome bɔ kɔkɔ akɛ gbɔmɛi ni sheee Nyɔŋmɔ gbeyei lɛ “ŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi, ni amɛkwa Nyɔŋmɔ ni ji nɔyelɔ kome pɛ lɛ kɛ wɔ-Nuntsɔ Yesu Kristo lɛ.” (Yuda 4) Yɛ anɔkwale mli lɛ, mɛɛ gbɛ nɔ wɔɔŋɔ Nyɔŋmɔ duromɔ lɛ ‘wɔbɔ nyenyentswi’ yɛ? Wɔbaanyɛ wɔfee nakai kɛtsɔ susumɔ ni wɔɔsusu akɛ Kristo afɔleshaa lɛ tsimɔɔ eshai ni wɔjeɔ gbɛ wɔfeɔ ni wɔkpɛ wɔyiŋ akɛ wɔbaaya nɔ wɔfee daa, moŋ fe eshai ni jɛ emuu ni wɔyeee akɛ adesai, ni wɔmiibɔ mɔdɛŋ ni wɔkpa feemɔ lɛ nɔ. Eka shi faŋŋ akɛ wɔsumɔŋ ni wɔkɛ Amerika sanekpakpa shiɛlɔi ni ale jogbaŋŋ lɛ ekome ko, ni wie akɛ ehe ehiaaa ni “otsake oshihilɛi, ni oŋmɛɛ osui gbohii lɛ ahe, ni otsake kɛba sui kpakpai amli lɛ” akpa gbee.—Okɛ Bɔfoi lɛ Asaji 17:30; Romabii 3:25; Yakobo 5:19, 20 ato he.

Hemɔkɛyeli Kanyaa Nifeemɔ

Akɛɛ mɛi pii akɛ “Yesu mli hemɔkɛyeli namɔ” ji nifeemɔ koome pɛ, ni ákɛ ehe ehiaaa ni wɔ hemɔkɛyeli mli awa bɔ ni sa ni eeekanya toiboo. Shi Biblia lɛ kɛ enɛ kpaaa gbee. Yesu ekɛɛɛ akɛ ahere gbɔmɛi ni jeɔ Kristofoi agbɛ lɛ nɔ nyiɛmɔ shishi lɛ ayiwala. Shi moŋ, ewie akɛ: “Mɔ ni hiɛɔ mli kɛyawulaa shi lɛ, lɛ lɛ aaahere eyiwala.” (Mateo 10:22) Biblia lɛ kɛ wɔ Kristofoi agbɛ lɛ toɔ foidamɔ he, ni yiwalaheremɔ ji jweremɔ nɔ ni ahaa yɛ enaagbee. Ni ewoɔ hewalɛ akɛ: “Nyɛdaa foi lɛ nakai, koni nyɛnine ashɛ nɔ.”—1 Korintobii 9:24.

Enɛ hewɔ lɛ, “Kristo nɔkpɛlɛmɔ” biɔ nibii babaoo fe kpɛlɛmɔ ni wɔɔkpɛlɛ jɔɔmɔi ni Yesu afɔleshaa ni nɔ kwɔ waa lɛ kɛhaa wɔ lɛ nɔ kɛkɛ. Toiboo he miihia. Bɔfo Petro wie akɛ kojomɔ jeɔ shishi “kɛjɛ Nyɔŋmɔ we lɛ,” ni ekɛfata he akɛ: “Shi kɛ wɔ nɔ tsutsu ejɛ lɛ, mɛi ni booo Nyɔŋmɔ sanekpakpa lɛ toi lɛ, te amɛ naagbee aaafee tɛŋŋ?” (1 Petro 4:17) No hewɔ lɛ esa akɛ wɔfee babaoo fe ni wɔɔnu ni wɔhe wɔye kɛkɛ. Biblia lɛ kɛɔ akɛ esa akɛ “[wɔtsɔmɔ] wiemɔ lɛ nɔyelɔi, ni jeee wiemɔ lɛ nulɔi kɛkɛ, ni [wɔkɛmiishishiu wɔ diɛŋtsɛ wɔhe].”—Yakobo 1:22.

Yesu Diɛŋtsɛ Shɛɛ Sane

Biblia mli wolo ni ji Kpojiemɔ lɛ hiɛ shɛɛ saji ni jɛ Yesu ŋɔɔ, ni akɛha kɛtsɔ Yohane nɔ kɛyaha mra be mli Kristofoi asafoi kpawo lɛ. (Kpojiemɔ 1:1, 4) Ani Yesu kɛɛ akɛ akɛni gbɔmɛi ni yɔɔ asafoi nɛɛ amli lɛ “ekpɛlɛ” enɔ momo hewɔ lɛ, no nɔŋŋ kɛkɛ fa? Dabi. Ejie amɛ yi yɛ amɛ nifeemɔi, amɛ deŋmegbomɔi kɛ amɛ tsuishiŋmɛɛ lɛ he, ni ewie amɛ suɔmɔ, hemɔkɛyeli, kɛ sɔɔmɔ lɛ hu he. Shi ewie akɛ Abonsam baaka amɛ, ni ákɛ abaawo amɛ nyɔmɔ “bɔ ni [amɛ] nitsumɔi lɛ yɔɔ.”—Kpojiemɔ 2:2, 10, 19, 23.

Enɛ hewɔ lɛ, Yesu tsɔɔ nitsumɔ kpele diɛŋtsɛ fe bɔ ni mɛi babaoo nu shishi beni akɛɛ amɛ akɛ amɛyiwalaheremɔ ji “nitsumɔ ni agbe naa” yɛ be mli ni “amɛkpɛlɛ” enɔ nɔŋŋ yɛ amɛ jamɔ kpee shishi lɛ. Yesu kɛɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewo esɛŋmɔtso lɛ ni enyiɛ misɛɛ. Ejaakɛ mɔ fɛɛ mɔ ni taoɔ akɛ ebaa esusuma yi lɛ, eeelaaje lɛ; shi mɔ fɛɛ mɔ ni laajeɔ esusuma yɛ mihewɔ lɛ, enine aaashɛ nɔ.”—Mateo 16:24, 25.

Ni wɔkwa wɔhe? Ni wɔnyiɛ Yesu sɛɛ daa? Nakai feemɔ baabi mɔdɛŋbɔɔ. Ebaatsake wɔ shihilɛi. Shi, ani Yesu wie lɛlɛŋ akɛ ekolɛ ehe baahia ni wɔteŋ mɛi komɛi ‘alaaje wɔ susumai’—ni wɔgboi wɔha lɛ? Hɛɛ, hemɔkɛyeli ni tamɔ nakai baa kɛjɛɔ nibii ni yɔɔ nyam ni wɔbaanyɛ wɔkase kɛjɛ Nyɔŋmɔ Wiemɔ lɛ he susumɔ mli lɛ pɛ mli. Ana ehe odaseyeli yɛ gbi ni mɛi ni eye jamɔ he sɛkɛ, “shi amɛnyɛɛɛ nilee kɛ mumɔ ni ekɛwieɔ lɛ naa amɛdamɔ” lɛ tswia Stefano tɛi lɛ nɔ. (Bɔfoi lɛ Asaji 6:8-12; 7:57-60) Ni Yehowa Odasefoi ohai abɔ ni gboi yɛ Nazi gbokɛlɛfoi aŋsarai amli moŋ fe ni amɛaaku amɛ henileei ni Biblia etsɔse lɛ lɛ mli lɛ ejie hemɔkɛyeli ni tamɔ nɛkɛ kpo yɛ wɔbe nɛɛ mli.a

Kristofoia Ekaa

Esa akɛ wɔhiɛ wɔ Kristofoi ahemɔkɛyeli lɛ mli kpɛŋŋ ejaakɛ, akɛ nɔ ni tamɔɔɔ nɔ ni ekolɛ onuɔ yɛ sɔlemɔi komɛi amli loo yɛ jamɔ mli nibii ni ajieɔ yɛ tɛlivishin nɔ lɛ, Biblia lɛ kɛɔ akɛ wɔbaanyɛ wɔgbee shi. Ewieɔ Kristofoi ni shi “gbɛ ni ja lɛ” ahe. (2 Petro 2:1, 15) Enɛ hewɔ lɛ, ehe miihia ni ‘wɔkɛ gbeyeishemɔ kɛ hekpokpomɔ atsu wɔ diɛŋtsɛ wɔ yiwalaheremɔ he nii.’—Filipibii 2:12; 2 Petro 2:20.

Ani nɛkɛ ji bɔ ni klɛŋklɛŋ afii oha lɛ mli Kristofoi, ni ji gbɔmɛi ni nu Yesu kɛ ebɔfoi lɛ anitsɔɔmɔi diɛŋtsɛ lɛ, nu sane lɛ shishi amɛha? Hɛɛ. Amɛle akɛ esa akɛ amɛfee nɔ ko. Yesu wie akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.”—Mateo 28:19, 20.

Beni Yesu wie nakai lɛ sɛɛ nyɔji enyɔ lɛ, abaptisi mɛi 3,000 yɛ gbi kome pɛ mli. Heyelilɔi lɛ ayifalɛ tee hiɛ oyayaayai kɛyashɛ mɛi 5,000. Mɛi ni he ye lɛ tsɔɔ mɛi krokomɛi. Beni yiwaa gbɛ amɛ eshwa lɛ, ebaha amɛ shɛɛ sane lɛ gbɛ eshwa waa moŋ. Biblia lɛ kɛɔ akɛ jeee hiɛnyiɛlɔi fioo kɛkɛ, shi moŋ “mɛi ni egbɛ eshwa lɛ yakpa shi, ni amɛjaje sanekpakpa lɛ.” No hewɔ lɛ, aaafee afii 30 sɛɛ lɛ, bɔfo Paulo nyɛ eŋma akɛ ‘ashiɛ sanekpakpa lɛ atsɔɔ bɔɔnii fɛɛ ni yɔɔ ŋwɛi shishi lɛ.’—Bɔfoi lɛ Asaji 2:41; 4:4; 8:4; Kolosebii 1:23.

Paulo tsakeee mɛi, taakɛ TV nɔ sanekpakpa shiɛlɔi komɛi feɔ lɛ, mɛi ni kɛɔ akɛ: ‘Kpɛlɛmɔ Yesu nɔ amrɔ nɛɛ nɔŋŋ, ni abaahere oyiwala kɛya naanɔ’ lɛ. Ni nakai nɔŋŋ enaaa hekɛnɔfɔɔ tamɔ Amerika osɔfo ni ŋma akɛ: “Beni miji gbekɛ nuu ni yeko afii nyɔŋmai enyɔ po lɛ, . . . no mli lɛ ahere miyiwala momo.” Nɔ ni fe afii 20, yɛ be mli ni Yesu diɛŋtsɛ hala Paulo akɛ ekɛ Kristofoi ashɛɛ sane lɛ ayaha gbɔmɛi ni jɛ jeŋmaji lɛ amli lɛ sɛɛ lɛ, nɛkɛ bɔfo ni tsuɔ nii waa nɛɛ ŋma akɛ: “Migbalaa mi diɛŋtsɛ migbɔmɔtso lɛ mai ni miyeɔ lɛ nyɔŋ, koni mi ni mishiɛɔ mitsɔɔ mɛi krokomɛi lɛ, mi diɛŋtsɛ lɛ akashɛ mi afɔ̃.”—1 Korintobii 9:27; Bɔfoi lɛ Asaji 9:5, 6, 15.

Yiwalaheremɔ ji nikeenii ni Nyɔŋmɔ kɛhaa wɔ yaka. Anyɛŋ ana akɛ nyɔmɔwoo. Kɛlɛ, ebiɔ mɔdɛŋbɔɔ yɛ wɔ gbɛfaŋ. Kɛ mɔ ko kɛ nikeenii ko ni jara wa waa miiha bo ni ojieee hiɛsɔɔ ni sa kpo yɛ he, ní ooohe nii lɛ ni oha ehi odɛŋ lɛ, ekolɛ hiɛsɔɔ ni ojieee lɛ kpo nɛɛ baanyɛ atsirɛ nihalɔ lɛ ni ekɛ nii lɛ aha mɔ kroko. Ojogbaŋŋ, te Yesu Kristo la ni ji ewala lɛ jara wa ha tɛŋŋ? Eji nikeenii ni akɛha wɔ yaka, shi esa akɛ wɔjie hiɛsɔɔ ni mli kwɔ kpo yɛ he.

Anɔkwa Kristofoi yɛ yiwalaheremɔ shihilɛ ko mli, kɛ shishinumɔ akɛ amɛyɛ gbɛhe ni akpɛlɛɔ nɔ mli yɛ Nyɔŋmɔ hiɛ. Akɛ kuu lɛ, ama amɛyiwalaheremɔ nɔ mi. Akɛ aŋkroaŋkroi lɛ, esa akɛ amɛshɛ Nyɔŋmɔ taomɔ nii ahe. Shi, ebaanyɛ eba akɛ wɔnyɛŋ wɔshɛ he, ejaakɛ Yesu wie akɛ: “Kɛji mɔ ko ehiii mimli lɛ, atsɛɔ lɛ afɔ̃ɔ tamɔ tso nine, ni egbiɔ.”—Yohane 15:6.

‘Nyɔŋmɔ Wiemɔ lɛ Hiɛ Kã’

Sanegbaa ni atsĩ ta yɛ sane ni aŋma kɛtsɔ enɛ hiɛ lɛ shishijee gbɛ lɛ ba aaafee afii 60 ni eho nɛ. Johnny heɔ eyeɔ lolo akɛ yiwalaheremɔ baa kɛtsɔɔ Yesu Kristo pɛ nɔ, shi eyooɔ hu akɛ esa akɛ wɔmia wɔhiɛ waa ni wɔnine ashɛ nɔ. Eka he eyɛ nɔmimaa waa lolo akɛ Biblia lɛ gbalaa jwɛŋmɔ kɛyaa hiɛnɔkamɔ jɛɛhe koome pɛ ni yɔɔ kɛha adesai lɛ nɔ, ni ákɛ esa akɛ wɔkase nakai wolo ni yɔɔ nyam waa lɛ, ni etsirɛ wɔ, ni wɔha ekanya wɔ kɛya suɔmɔ, hemɔkɛyeli, mlijɔlɛ, toiboo, kɛ tsuishiŋmɛɛ nifeemɔi amli. Etsɔse ebii ni amɛ hu amɛheɔ nibii nɛɛ amɛyeɔ nakai nɔŋŋ, ni amrɔ nɛɛ emii shɛɔ ehe waa akɛ eeena akɛ amɛ hu amɛmiitsɔse amɛbii yɛ nakai gbɛ nɔŋŋ nɔ. Ená ni kulɛ mɔ fɛɛ mɔ yɛ nakai hemɔkɛyeli lɛ eko, ni efeɔ nɔ fɛɛ nɔ ni eeenyɛ ni ekɛdũ ewo mɛi krokomɛi atsuii kɛ amɛjwɛŋmɔi amli.

Akɛ mumɔ tsirɛ bɔfo Paulo ni eŋma akɛ “Nyɔŋmɔ wiemɔ hiɛ kã ni eyɛ hewalɛ.” (Hebribii 4:12) Ebaanyɛ etsake shihilɛi. Ebaanyɛ ekanya bo kɛha suɔmɔ, hemɔkɛyeli, kɛ toiboo nifeemɔi ni jɛ tsuiŋ. Shi esa akɛ ofee babaoo fe ni “oookpɛlɛ” nɔ ni Biblia lɛ kɛɔ lɛ “nɔ” yɛ ojwɛŋmɔŋ kɛkɛ. Kasemɔ ni oha ekanya otsui. Ha ni enilee lɛ akudɔ bo. Yehowa Odasefoi aaashɛ 5,000,000 ni kɛ amɛhe eha yɛ shikpɔji fe 230 nɔ kɛ shia Biblia mli nikasemɔ ni aheee nɔ ko he hegbɛ haa. Kɛ ootao ona nɔ ni obaanyɛ ole kɛjɛ nikasemɔ ni tamɔ nɛkɛ mli lɛ, ŋmaa wolo obaha mɛi ni fee wolo tɛtrɛɛ nɛɛ. Hemɔkɛyeli kɛ mumɔŋ hewalɛ ni obaana lɛ baaha omii ashɛ ohe waa!

[Shishigbɛ niŋmaa]

[Akrabatsa ni yɔɔ baafa 7]

Mɛni Hewɔ Esa akɛ ‘Wɔpele Hemɔkɛyeli lɛ He’?

Aŋma Biblia mli wolo ni ji Yuda lɛ ayaha “mɛi ni atsɛ amɛ . . . , ni aŋɔ amɛ ato aha Yesu Kristo lɛ.” Ani ekɛɔ akɛ akɛni ‘amɛkpɛlɛ Yesu nɔ’ hewɔ lɛ, ama amɛ yiwalaheremɔ nɔ mi? Dabi, Yuda kɛɛ nakai Kristofoi lɛ ni ‘amɛpele hemɔkɛyeli lɛ he.’ Eha amɛ yiŋtoi etɛ ni amɛaadamɔ nɔ amɛfee nakai. Klɛŋklɛŋ lɛ, Nyɔŋmɔ “jie maŋ [ko] kɛjɛ Mizraim,” shi sɛɛ mli lɛ amɛteŋ mɛi babaoo gbee shi yɛ afã. Nɔ ni ji enyɔ lɛ, ŋwɛibɔfoi po tse atua ni amɛtsɔmɔ daimonioi. Nɔ ni ji etɛ lɛ, Nyɔŋmɔ kpata Sodoma kɛ Gomora hiɛ yɛ bɔlɛnamɔ mli jeŋba shara ni tee nɔ yɛ nakai maji lɛ amli lɛ hewɔ. Yuda kɛ Biblia mli nɔkwɛmɔ nii nɛɛ haa wɔ ‘akɛ kɔkɔbɔɔ he okadi’ kɛha wɔ. Hɛɛ, esa akɛ heyelilɔi ni “aŋɔ amɛ ato aha Yesu Kristo” lɛ po akwɛ jogbaŋŋ ni amɛkagbee shi kɛmiijɛ anɔkwale hemɔkɛyeli lɛ he.—Yuda 1-7.

[Akrabatsa ni yɔɔ baafa 8]

Te Emli Nɔ ni Ja?

Biblia lɛ kɛɔ akɛ: “Hemɔkɛyeli nɔ atsɔɔ abuɔ gbɔmɔ bem, shi jeee mla nitsumɔi amli.” Ekɛɔ hu akɛ: “Nitsumɔi amli ajɛɔ abuɔ gbɔmɔ bem, shi jeee hemɔkɛyeli kɛkɛ ni.” Te emli nɔ ni ja? Ani abuɔ wɔ bem kɛtsɔɔ hemɔkɛyeli nɔ loo nitsumɔi anɔ?—Romabii 3:28; Yakobo 2:24.

Hetoo ni kɛ ehe kpaa gbee ni jɛ Biblia lɛ mli ji akɛ enyɔ lɛ fɛɛ ja.

Afii ohai abɔ ho ni Mla ni Nyɔŋmɔ kɛha kɛtsɔ Mose nɔ lɛ bi ni Yudafoi ni ji jálɔi lɛ ashã afɔlei pɔtɛɛi komɛi ni amɛkɛ nikeenii komɛi hu aha, ni amɛye gbijuji, ni amɛha amɛniyenii kɛ taomɔ nii krokomɛi kɛ mla lɛ akpa gbee. Nɛkɛ “mla nitsumɔi,” loo yɛ kukufoo mli lɛ, “nitsumɔi” nɛɛ ahe ehiaaa dɔŋŋ yɛ be mli ni Yesu kɛ afɔleshaa ni eye emuu lɛ ha lɛ sɛɛ.—Romabii 10:4.

Shi anɔkwale ni eji akɛ akɛ Yesu afɔleshaa ni hi kɛmɔ shi lɛ ye nɛkɛ nitsumɔi ni atsuɔ yɛ Mose Mla lɛ shishi nɛɛ najiaŋ lɛ etsɔɔɔ akɛ wɔbaanyɛ wɔku wɔhiɛ wɔshwie Biblia mli famɔi anɔ. Ekɛɔ akɛ: “Enyiɛ nɔŋŋ ni Kristo . . . la lɛ tsumɔŋ wɔhenilee lɛ he kɛjɛŋ [blema] nitsumɔi gbohii lɛ amli, koni wɔsɔmɔ Nyɔŋmɔ hiɛkalɔ lɛ?”—Hebribii 9:14.

Mɛɛ gbɛ nɔ wɔtsɔɔ “[wɔsɔmɔɔ] Nyɔŋmɔ hiɛkalɔ lɛ”? Kɛfata nibii krokomɛi ahe lɛ, Biblia lɛ kɛɔ wɔ ni wɔwuu wɔshi heloo lɛ nitsumɔi lɛ, ni wɔte shi wɔshi je lɛ jeŋba shara lɛ, ni wɔtsi wɔhe kɛjɛ etsɔnei lɛ ahe. Ekɛɔ akɛ: “Wuu hemɔkɛyeli he ta kpakpa lɛ,” jiemɔ “esha ni ebɔle wɔhe kpula lɛ,” ni “wɔkɛ tsuishitoo ada foi ni ka wɔhiɛ lɛ, ni wɔkwɛ wɔ hemɔkɛyeli shishijelɔ kɛ naagbelɔ ni ji Yesu lɛ.” Ni Biblia lɛ woɔ wɔ hewalɛ ni ‘wɔkaha eetɔ wɔ ni wɔsusumai anijiaŋ miije wui.’—1 Timoteo 6:12; Hebribii 12:1-3; Galatabii 5:19-21.

Wɔnaaa yiwalaheremɔ akɛ nyɔmɔwoo kɛtsɔ nibii nɛɛ afeemɔ nɔ, ejaakɛ adesa ko bɛ ni baanyɛ afee babaoo ni esa jɔɔmɔ ni sa kadimɔ waa tamɔ nɛkɛ. Shi kɛlɛ, nikeenii ni yɔɔ nyam waa nɛɛ esaaa wɔ, kɛji wɔjieee wɔ suɔmɔ kɛ toiboo kpo kɛtsɔ nibii ni Biblia lɛ kɛɔ akɛ Nyɔŋmɔ kɛ Kristo taoɔ ni wɔfee lɛ afeemɔ nɔ. Kɛ nitsumɔi bɛ ni wɔkɛbaaye wɔ hemɔkɛyeli lɛ he odase lɛ, no lɛ wiemɔ ni wɔwieɔ akɛ wɔnyiɛ Yesu sɛɛ lɛ yeee emuu, ejaakɛ Biblia lɛ jajeɔ faŋŋ akɛ: “Hemɔkɛyeli hu, kɛ nitsumɔi bɛ he lɛ, eji hemɔkɛyeli gbonyo.”—Yakobo 2:17.

[Mfoniri ni yɔɔ baafa 7]

Kasemɔ Biblia lɛ, ni oha ekanya bo