“Nyɛmiaa Nyɛhiɛ Waa”
“Nyɛmia nyɛhiɛ waa nyɛbotea agbo fintɔŋŋ lɛ mli, ejaakɛ miikɛɛnyɛ akɛ mɛi pii baatao mli abote, shi amɛnyɛŋ.”—LUKA 13:24, NW.
1. Mɛni ji nɔ ni mɛi pii shweɔ akɛ amɛnine aaashɛ nɔ?
ABI Robbie ni eye afii ekpaa lɛ sane akɛ mɛni hewɔ esumɔɔ ni eya Maŋtsɛyeli Asa lɛ nɔ lɛ, ni ebaha hetoo akɛ: “Mikaseɔ Yehowa kɛ Paradeiso, he ni manyɛ mikɛ kooloi kpakpai ahi shi yɛ be kakadaŋŋ mli lɛ he nii yɛ jɛmɛ.” Enyɛkwɛ bi Dustin, ni eye afii etɛ lɛ le efɔlɔi anifeemɔi babaoo akɛ eleɔ be mli ni eeebolɔ akɛ: “Miisumɔ ni maya Maŋtsɛyeli Asa lɛ nɔ!” Nɔ ni Robbie kɛɔ kɛ nɔ ni Dustin kaseɔ akɛ eeewie lɛ baaŋɔɔ mɛi pii anaa—wala, naanɔ wala. Gbɔmɛi miisumɔ ni “ahere amɛyiwala.” Shi yɛ mɛɛ gbɛ nɔ? Nɔ ji ni aaaya sɔlemɔi komɛi kɛkɛ?
2. (a) Mɛni hewɔ yiwalaheremɔ nyɛŋ afee nɔ ni anaa kɛkɛ lɛ? (b) Yɛ mɛɛ gbɛ nɔ Yesu wiemɔi ni yɔɔ Luka 13:24 lɛ tsɔɔ nɔ ni ataoɔ dani yiwalaheremɔ aba?
2 Anyɛŋ ana yiwalaheremɔ kɛtsɔ kpee ni aaaya aloo gbɛ kroko nɔ kɛkɛ. Eji nii ni akɛhaa yaka, nikeenii ni jɛ Nyɔŋmɔ ŋɔɔ. Ni kɛlɛ, Yehowa Nyɔŋmɔ biɔ mɔdɛŋbɔɔ yɛ wɔgbɛfaŋ kɛ́ wɔnine aaanyɛ ashɛ enikeenii ni ji naanɔ wala lɛ nɔ. (Romabii 6:23) Mɛni ji enɛɛmɛi? Ekome ji, hiɛmiamɔ waa yɛ esɔɔmɔ lɛ mli! Esa akɛ hiɛsɔɔ diɛŋtsɛ akanya nɛkɛ nifeemɔ nɛɛ. Gbi ko lɛ, nuu ko bi Nyɔŋmɔ Bi, Yesu Kristo, akɛ: “Nuŋtsɔ, ani mɛi fioo kɛkɛ yiwala abaahere?” Yesu hetoo lɛ jeee nɔ ni kɔɔ sanebilɔ lɛ pɛ he, shi moŋ, mɛi krokomɛi fɛɛ ni yɔɔ yiwalaheremɔ he miishɛɛ, ni wɔ hu wɔfata he lɛ he. Eba hetoo kɛ: “Nyɛmiaa nyɛhiɛ waa nyɛbotea agbo fintɔŋŋ lɛ mli, ejaakɛ miikɛɛnyɛ akɛ, mɛi pii baatao mli abote, shi amɛnyɛŋ.”—Luka 13:23, 24, NW.
3. (a) Mɛni hewɔ nuu lɛ sanebimɔ lɛ ekaaa lɛ? (b) Yesu kɛwɔ woɔ ehetoo lɛ mli yɛ mɛɛ gbɛ nɔ?
3 Sane ni nuu ni atsiii egbɛi ata nɛɛ bi lɛ yɛ sɔrɔto. Ebi akɛ: “Ani mɛi fioo pɛ yiwala abaahere?” jeee “Ani mafata mɛi fioo ni abaahere amɛyiwala lɛ ahe?” aloo, “Te mafee tɛŋŋ ni ahere miyiwala lɛ?” Ekolɛ Yudafoi ajeŋnilee akɛ mɛi fioo ko pɛ ji mɛi ni baafee mɛi ni sa yiwalaheremɔ lɛ tee nɛkɛ sane ni akɛtaoɔ nibii amli nɛɛ shi.a Yɛ nɔ ni etaoɔ ele lɛ fɛɛ sɛɛ lɛ, Yesu kɛ oyaiyeli jie sanebimɔ lɛ kɛjɛ yiŋ ko kɛkɛ ni aaasusu yɛ enɛ he lɛ he kɛtee bɔ ni abaanyɛ akɛtsu nii diɛŋtsɛ lɛ mli—nɔ ni kɔɔ mɔ diɛŋtsɛ he. Enyɛ sanebilɔ lɛ nɔ koni esusu nɔ ni he hiaa ni afee ni ahere eyiwala lɛ he. Shi nɔ ni he hiaa fe nakai lɛ, akɛni Yesu wiemɔi, “nyɛmiaa nyɛhiɛ waa” lɛ damɔ shi kɛha mɛi babaoo hewɔ lɛ, esa akɛ enɛ akanya wɔ ni wɔjwɛŋ wɔjamɔŋ gbɛ lɛ he waa.
4. Mɛni esa akɛ wɔfee ni wɔna naanɔ wala?
4 No hewɔ lɛ, naanɔ wala ni aaana lɛ jeee nɔ ko ni yɔɔ mlɛo taakɛ mɛi komɛi susuɔ he lɛ. Yesu ma nitsumɔ waa, deŋmegbomɔ kɛ mɔdɛŋbɔɔ yɛ be fɛɛ mli nɔ mi akɛ gbɛ ni abaatsɔ nɔ akɛbote “agbo fintɔŋŋ lɛ mli.” Hemɔkɛyeli ni hiɔ shi daa, nɔ ni atswa ama Kristo tsɔɔmɔi atoiboo nɔ ji nɔ ni woɔ hiɛmiamɔ ni etɔɔɔ mɔ lɛ hewalɛ. No hewɔ lɛ, dani wɔɔna yiwalaheremɔ lɛ, ebiɔ ni wɔfee babaoo fe ‘ewiemɔi lɛ atoiboo kɛkɛ’; esa akɛ wɔya nɔ wɔkã ‘amɛfeemɔ’ he.—Luka 6:46-49; Yakobo 1:22-25.
Esa Akɛ “Nyɛpelea He” Bianɛ
5. (a) Mɛni ji nɔ ni Yesu wiemɔi, “Nyɛmiaa, nyɛhiɛ waa lɛ tsɔɔ? (b) Mɛɛ gbɛ nɔ nakai wiemɔi lɛ kɛ shishiumɔ babaoo haa bɔ ni osusuɔ sɔɔmɔ krɔŋkrɔŋ he ohaa lɛ?
5 Mɛni ji nɔ ni wiemɔ kuku “nyɛmiaa nyɛhiɛ waa” lɛ tsɔɔ? Yɛ shishijee Hela lɛ, wiemɔ lɛ ji a·go·ni’ze·sthe, ni ana kɛjɛ wiemɔ (a·gon’) ni eshishi ji “mpleshii he” mli. The Kingdom Interlinear Translation tsɔɔ shishi akɛ, “Pelemɔ.” Nɔ ni yɔɔ miishɛɛ ji akɛ wɔnaa Ŋleshi wiemɔ “agonize” (piŋmɔ) kɛjɛɔ nɛkɛ Hela feemɔ wiemɔ nɛɛ nɔŋŋ mli. No hewɔ lɛ, feemɔ blema shwɛmɔ he ko kɛ foidalɔ ni miipiŋ aloo eemia ehiɛ waa kɛ ehewalɛ fɛɛ ni eyɔɔ koni enine ashɛ jweremɔ nɔ lɛ nɔ lɛ he mfoniri yɛ ojwɛŋmɔ mli. No hewɔ lɛ, eyɛ mli akɛ Hela feemɔ wiemɔ ni awieɔ he yɛ biɛ nɛɛ lɛ kɔɔ Hela shwɛmɔi kɛ akaŋshii ahe moŋ, shi etsɔɔ Yesu ŋaawoo akɛ ajɛ susuma muu fɛɛ mli afee nii lɛ mli. Tsui ŋta kɛ nitsumɔ ehiŋ.—Luka 10:27; Okɛto 1 Korintobii 9:26, 27 he.
6. Mɛni hewɔ esa akɛ wɔmia wɔhiɛ waa bianɛ lɛ?
6 Mɛɛ be, ni be sɛɛjɛkɛmɔ enyiɛ esa akɛ “wɔpele ni wɔkɛbote agbo fintɔŋŋ lɛ mli”? (Luka 13:24, The New English Bible) Kwɛmɔ Yesu wiemɔi ni yɔɔ Luka 13:24 lɛ jogbaŋŋ ni okadi bɔ ni ekɛ sɔrɔtofeemɔ ba ŋmɛnɛŋmɛnɛ, “nyɛmiaa nyɛhiɛ waa nyɛbotea agbo fintɔŋŋ lɛ mli” lɛ kɛ wɔsɛɛ be nɔ ni ji, “baatao mli abote” lɛ mli lɛ. No hewɔ lɛ, amrɔ nɛɛ ji be ni esa akɛ akɛpele lɛ. Eka shi faŋŋ akɛ, mɛi ni sumɔɔɔ ni amɛboteɔ mli lɛ baatao ni amɛfee nakai yɛ be ni aaahi aha amɛ pɛ lɛ mli. Shi ebaafee be ni ekpe sɛɛ tsɔ; aŋa hegbɛ shinaa lɛ ni ala sɛɛ. Yesu tee nɔ ekɛɛ yɛ Luka 13:25 akɛ kɛ́ shiatsɛ lɛ ŋa shinaa lɛ pɛ lɛ, gbɔmɛi baaje shishi ashi ni amɛkpa fai akɛ: “‘Nuŋtsɔ, Nuŋtsɔ, gbelemɔ wɔ!’ Ni eeehere nɔ ekɛɛnyɛ akɛ, ‘Mileee heni nyɛjɛ.’” Mɛɛ shihilɛ ni yɔɔ mɔbɔ mɛɔ mɛi ni kɛ Yehowa jamɔ lɛ efeee amɛyiŋtoo titri yɛ shihilɛ mli bianɛ lɛ nɛkɛ!—Mateo 6:33.
7. Yɛ mɛɛ gbɛ nɔ Filipibii 3:12-14 tsɔɔ hiɛmiamɔ yɛ be fɛɛ mli, ni mɛni hewɔ enɛ he hiaa lɛ?
7 Wɔpelemɔ lɛ ji nii ni yaa nɔ yɛ be fɛɛ mli. Wɔteŋ mɔ ko bɛ ni egbe “agbo fintɔŋŋ” lɛ mlibotemɔ lɛ naa. Paulo yoo enɛ. Wala he foi ni edaa lɛ ji mɔdɛŋbɔɔ kɛ deŋmegbomɔ ni yaa nɔ gbi fɛɛ gbi. Eŋma akɛ: “Jeee akɛ minine eshɛ nɔ momo aloo mihi kɛwula shi momo, shi miitiu ni minine ashɛ nɔ, gbii abɔ ni Kristo Yesu nine eshɛ mihu minɔ lɛ. Anyɛmimɛi, mibuuu mihe akɛ minine eshɛ nɔ shi nɔ kome kɛkɛ: Nii ni yɔɔ sɛɛgbɛ lɛ miije mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he jweremɔ nɔ lɛ he.” (Nɔ ni atsɔmɔ lɛ ji wɔ nɔ.)—Filipibii 3:12-14, New International Version.
8. (a) Mɛni tsiɔ “mɛi pii” lɛ agbɛ kɛjɛɔ naanɔ wala he lɛ? (b) Mɛɛ kɔkɔbɔɔ enɛ kɛhaa wɔ?
8 Namɛi ji “mɛi pii” lɛ, ni mɛni hewɔ amɛnyɛɛɛ mli amɛbote lɛ? “Mɛi pii” lɛ jɛ Kristendom mli, titri lɛ osɔfoi akuu lɛ, amɛkwaa amɛkɛɔ akɛ amɛle Yesu jogbaŋŋ, amɛfata eweku lɛ he, ejaakɛ amɛkɛɔ akɛ ‘amɛkɛ lɛ eye nii ni amɛkɛ lɛ enu nii.’ Shi akɛni amɛmiitao yiwalaheremɔ yɛ amɛ diɛŋtsɛ amɛgbɛ nɔ shi jeee yɛ Nyɔŋmɔ gbɛ nɔ hewɔ lɛ, Yesu kɛɛ yɛ faŋŋ mli akɛ eleee amɛ, ni ebuɔ amɛ akɛ mɛi ni “tsuɔ nii ni ejaaa gbɛ.” (Luka 13:26, 27) Mɛi ni baanyɛ afata aŋkroaŋkroi ni atsi amɛ gbɛ koni amɛkabote naanɔ wala mli nɛɛ ahe ji mɛi ni amɛŋmɛɛ sɔɔmɔ krɔŋkrɔŋ ni amɛkɛhaa Yehowa lɛ he aloo amɛgbɔjɔ nijiaŋ yɛ he ni agbɛnɛ amɛbuɔ anɔkwale jamɔ akɛ nɔ ko ni ehe ehiaaa akɛ agbaa he naa tsɔ yɛ he lɛ. Ekãa ni amɛyɔɔ kɛha Maŋtsɛyeli lɛ he nibii lɛ efee kulɔkulɔ. (Kpojiemɔ 3:15, 16) Eji anɔkwale akɛ amɛyɛ ‘Nyɔŋmɔjamɔ su’ ko moŋ—ejaakɛ amɛkɛ amɛhe woɔ sɔɔmɔ nitsumɔ mli kɛ kpee baa mli fioo ko—shi amɛbɛ hemɔkɛyeli ni ji odaseyeli ni tsɔɔ akɛ no ji nɔ ni tsirɛɔ amɛ aloo no ji hewalɛ ni hɔ jamɔ krɔŋŋ sɛɛ lɛ eko. (Okɛto 2 Timoteo 3:5 he.) Amɛyooo akɛ ni amɛaatao akɛ amɛaabote “agbo fintɔŋŋ” lɛ mli pɛ kɛkɛ lɛ faaa. Esa akɛ mɔ apele emlibotemɔ lɛ he.
Nɔ Hewɔ Ni Esa Akɛ Atsɔ “Agbo Fiŋtɔŋŋ” Lɛ Mli
9. Mɛni hewɔ agbo fintɔŋŋ lɛ mlibotemɔ lɛ biɔ hiɛmiamɔ waa lɛ?
9 Agbo fintɔŋŋ ni kɛ mɔ yaa yiwalaheremɔ mli lɛ naa ka kɛha mɛi fɛɛ. Shi “mɛi pii” lɛ sumɔɔɔ ni amɛpeleɔ emlibotemɔ he. Mɛni ji nibii ni kɔɔ agbo fintɔŋŋ lɛ mlibotemɔ he ni biɔ ni amia hiɛ waa yɛ mli lɛ? Klɛŋklɛŋ lɛ ebiɔ akɛ mɔ lɛ ana Biblia mli anɔkwale lɛ he anɔkwale nilee, ni ele Yehowa Nyɔŋmɔ kɛ Kristo Yesu. (Yohane 17:3) Enɛ tsɔɔ akɛ abaashɛrɛ je lɛŋ jamɔi ablemasaji kɛ nifeemɔi ashwie, ni Kristendom nɔ fata he. Ebiɔ ni afee Nyɔŋmɔ suɔmɔnaa nii, taakɛ Yesu fee yɛ be mli ni eyɔɔ shikpɔŋ nɔ lɛ. (1 Petro 2:21) Ákɛ Kristofonyo ni ejɔɔ ehe nɔ ni abaptisi lɛ lɛ, esa akɛ mɔ lɛ akpoo heloo gbɛfaŋ nibii asɛɛdii, ajwamaŋbɔɔ, kɛ je lɛŋ muji nitsumɔi lɛ. (1 Yohane 2:15-17; Efesobii 5:3-5) Esa akɛ mɔ lɛ ashɛrɛ enɛɛmɛi fɛɛ kɛjɛ ehe eshwie ni ekɛ subaŋi ni tamɔ Kristo nɔ lɛ ato najiaŋ.—Kolosebii 3:9, 10, 12.
10. Henɔyeli kɔɔ naanɔ wala ni wɔɔna lɛ he yɛ mɛɛ gbɛ nɔ?
10 “Mɛi fioo” pɛ le bɔ ni ekãa ni afeɔ yɛ sɔɔmɔ nitsumɔ lɛ mli, kɛ mumɔ lɛ yibii ni aaajie lɛ kpo ni henɔyeli fata he lɛ jara wa ha. (Galatabii 5:23) Akɛni Yehowa mumɔ krɔŋkrɔŋ lɛ yeɔ buaa amɛ hewɔ lɛ, amɛpeleɔ koni amɛye amɛgbɔmɔtso lɛ nɔ koni amɛkudɔ lɛ amɛha naanɔ wala oti lɛ.—1 Korintobii 9:24-27.
Yesu Wiemɔi Lɛ Tsɔɔ Mɛni Kɛha Bo?
11. (a) Mɛɛ shihilɛ mli nibii komɛi amli ehe baahia ni mɛi komɛi amia amɛhiɛ waa yɛ mli lɛ, ni mɛni hewɔ? (b) Mɛɛ nitsumɔ nɛkɛ wɔ fɛɛ wɔbaanyɛ wɔmia wɔhiɛ waa yɛ mli lɛ?
11 Kɛji akɛ wɔji mɛi heei ni abaptisi wɔ aloo wɔkɛ wɔhe ebɔ Yehowa gbɛjianɔtoo lɛ he afii nyɔŋmai abɔ hu lɛ, wɔnyɛŋ wɔgbɔjɔ wɔnijiaŋ yɛ mɔdɛŋ ni wɔbɔɔ akɛ wɔɔsa ehiɛ lɛ mli. Taakɛ Yesu wiemɔ lɛ tsɔɔ yɛ faŋŋ mli lɛ, esa akɛ wɔjɛ wɔsusuma muu lɛ fɛɛ mli wɔtuu wɔhe wɔha Yehowa ni wɔsumɔ akɛ wɔɔbote agbo fintɔŋŋ lɛ mli ni nɔ fɛɛ nɔ ni baaba lɛ kɔɔɔ he eko. Eyɛ mli akɛ jeee nɔyaa kɛ shweremɔ ni aaaba yɛ sɔɔmɔ ni wɔkɛhaa Nyɔŋmɔ lɛ mli lɛ kɛkɛ he Yesu wieɔ moŋ, shi hiɛmiamɔ waa he miihia wɔteŋ mɛi komɛi koni wɔkɛjaje wɔjeŋba koni wɔye sui gbohii lɛ anɔ kunim koni ‘wɔkato mɔ ko pampi yɛ nɔ ko nɔ ko mli.’ (2 Korintobii 6:1-4) Wɔteŋ mɛi komɛi yɛ ni ehe miihia ni wɔto wɔteemɔŋ nikasemɔ he gbɛjianɔ jogbaŋŋ koni ‘wɔsuɔmɔ lɛ afa ni eteke nɔ kɛ anɔkwale nilee kɛ sɛɛyoomɔ fɛɛ gbɛfaŋ.’ (Filipibii 1:9-11) Ehe miihia ni mɛi krokomɛi hu abɔ mɔdɛŋ waa ni amɛkɛ amɛhe awo asafoŋ kpeei kɛ Asafo woloŋ Nikasemɔi amli daa. (Hebribii 10:23-25) Shi wɔteŋ mɔ fɛɛ mɔ baanyɛ akwɛ lɛ diɛŋtsɛ esɔɔmɔ nitsumɔ lɛ akɛ wɔmiimia wɔhiɛ waa yɛ ‘sanekpakpa jajelɔ nitsumɔ’ lɛ ni wɔtsuɔ lɛ mli lo?—2 Timoteo 4:5.
12. Bɔni afee ni aka wɔ hiɛmiamɔ yɛ mumɔŋ akwɛ lɛ, mɛɛ saji abaanyɛ abi?
12 Mɛi babaoo diɛŋtsɛ yɛ ni akɛni amɛtee hiɛ amɛmia amɛhiɛ waa koni amɛsa Yehowa hiɛ hewɔ lɛ, enɛ eha amɛfee mɛi ni he esa kɛha gbɛgbalɔi awamɔ, daa gbɛgbamɔ, aloo Betel sɔɔmɔ lɛ. Shi bo hu? Kɛ oji Maŋtsɛyeli shiɛlɔ lɛ, ani obaanyɛ okɛ ohe awo gbɛgbalɔi awamɔ sɔɔmɔ lɛ mli shii abɔ daa afi aloo ni oootsɔ daa gbɛgbalɔ po? Kɛ oji gbɛgbalɔi awalɔ lɛ ani oobɔ mɔdɛŋ ni okɛ ohe awo daa gbɛgbamɔ sɔɔmɔ lɛ mli? Kɛ́ jeee nakai lɛ, mɛni hewɔ osusuuu nakai feemɔ he? Abaajɔɔ bo yɛ nɛkɛ gbɛ nɔ koni oná okɛ Yehowa Nyɔŋmɔ kɛ Yesu Kristo teŋ wekukpaa ni bɛŋkɛ kpaakpa.—Lala 25:14.
Ani Obaanyɛ Omia Ohiɛ Ni Okɛ Ohe Awo Gbɛgbamɔ Mli?
13. (a) Kɛ̀ oosumɔ ni otsɔ gbɛgbalɔ lɛ, mɛɛ nibii enyɔ he hiaa? (b) Bɔni afee ni ofee gbɛgbalɔ lɛ, mɛɛ shihilɛ mli nibii nɛkɛ ehe baahia ni ofee tsakemɔi yɛ mli?
13 Kɛ́ obaanyɛ ofee daa gbɛgbalɔ shi ofeko nakai lɛ, ani obaanyɛ ‘opele he’ koni ofee tsakemɔi yɛ oshihilɛ mli bɔni afee ni okɛ ohe awo gbɛgbamɔ mli? Nibii enyɔ he hiaa. Klɛŋklɛŋ lɛ, esa akɛ osumɔ nakai feemɔ. Nɔ ni ji enyɔ lɛ, esa akɛ ofee mɔ ni shihilɛ ŋmɛɔ gbɛ. Kɛ́ obɛ suɔmɔ kɛha enɛ lɛ, sɔlemɔ yɛ he. Okɛ gbɛgbalɔi lɛ ewie he. Ha onitsumɔi ákɛ asafoŋ shiɛlɔ lɛ afa. Okɛ ohe awo gbɛgbalɔi awamɔ sɔɔmɔ mli be fɛɛ be ni hegbɛ lɛ aaaba. Kɛji akɛ shihilɛ mli ni oyɔɔ lɛ eŋmɛɛɛ sɔɔmɔ nɛɛ gbɛ bianɛ lɛ, kwɛmɔ akɛ ooofee tsakemɔi komɛi lo. Ekolɛ ehe ehiaaa ni ŋa ko ni tsuɔ nii atsu nii. Ehe ehiaaa ni mɔ ni afii ni eye hewɔ lɛ esa akɛ ekpa nitsumɔ ni eba hejɔɔmɔ lɛ aya nɔ atsu nii. Shihilɛ ni nɔ kwɔ gojoo, gbɛhamɔ ni ayaa ni afiteɔ shika babaoo yɛ mli, kɛ kar hee ni eba kɛ nibii krokomɛi ni tamɔ nakai lɛ jeee nɔ ni he hiaa wala aloo shihilɛ.—Luka 12:15; 1 Yohane 2:15-17.
14. (a) Mɛni hewɔ ni gbalashihilɛ mli hefatalɔi komɛi atsui enyɔɔɔ amɛmli akɛ amɛaahi shi akɛ asafoŋ shiɛlɔi kɛkɛ lɛ? (b) Mɛni ji oti ni amɛkɛma amɛbii ahiɛ?
14 Tsɛ ko ni hiɛ bihii etɛ ni amɛteŋ mɛi enyɔ yeko afii nyɔŋma lɛ je gbɛgbamɔ shishi afii ekpaa ni eho nɛ. Mɛni hewɔ efee enɛ? Etsɔɔ mli akɛ: “Miisumɔ ni mafee babaoo. Kɛ́ manyɛ mafee daa gbɛgbalɔ ni mifeee nakai lɛ, belɛ mihiii shi yɛ mihenɔjɔɔmɔ lɛ naa.” Eŋa hu je daa gbɛgbamɔ lɛ shishi. Mɛni hewɔ efee nakai? Ekɛɛ akɛ, “Mitee nɔ mifee gbɛgbalɔi awalɔ aahu afii ejwɛ ni yɛ naagbee lɛ miyoo akɛ ebaafee mlɛo kɛha mi. Miisumɔ ni mana nitsumɔ ni atsuŋ eko dɔŋŋ nɛɛ mli gbɛfaŋnɔ bɔ ni sa koni mato okadi kpakpa maha mibihii lɛ.” Wu kɛ ŋa lɛ fɛɛ kase anɔkwale lɛ yɛ be mli ni ámɛtee universiti amɛgbe naa. Tsɛ lɛ jaje akɛ: “Wɔfɔlɔi bi ni wɔya kɔlegi afii ejwɛ.” No hewɔ lɛ mɛni ji otii ni amɛkɛmamɔ shi amɛha amɛbii lɛ? “Mihaa mibihii lɛ leɔ akɛ wɔbaasumɔ ni amɛtsɔmɔ gbɛgbalɔi ni kɛ hoo lɛ, amɛsɔmɔ yɛ Betel afii ejwɛ.”
15. (a) Mɛɛ yiŋtoi ahewɔ mɛi komɛi mia amɛhiɛ waa koni amɛsɔmɔ akɛ daa gbɛgbalɔi lɛ? (b) Mɛɛ yiŋtoo hewɔ obaasumɔ ni okɛ ohe awo be fɛɛ sɔɔmɔ lɛ mli lɛ?
15 Nɔ ni nyiɛ sɛɛ nɛɛ ji yiŋtoi ahewɔ ni mɛi krokomɛi kpɛ amɛyiŋ akɛ amɛbaatsɔmɔ daa gbɛgbalɔi lɛ:
“Minyɛɛɛ maya mihiɛ yɛ mumɔŋ, ni enɛ gbaa minaa.” (Robert H.)
“Mitsui enyɔɔɔ mimli yɛ daa shiɛlɔ kɛkɛ ni miji lɛ he.” (Rhea H.)
“Gbɛgbamɔ haa minaa gbɛtsɔɔmɔ kɛ yiŋtoo yɛ mishihilɛ mli.” (Hans K.)
“Miisumɔ ni masɔmɔ Yehowa kwraa, ni gbɛgbamɔ ji gbɛ ni matsɔ nɔ mafee nakai.” (Charanjit K.)
“Kɛ́ mikɛ mihewalɛ, minyɛmɔ kɛ mibalahiiaŋ tsuuu nii ni mikɛna nitsumɔ kpeteŋkpele nɛɛ mli gbɛfaŋnɔ lɛ, mashwa mihe.” (Gregory T.)
“Yehowa jɔɔ mɔdɛŋbɔi anɔ. Ehe miihia ni maha lɛ nɔ ko ni ebaajɔɔ nɔ.” (Graceann T.)
“Gbɛgbamɔ yeɔ buaa mi ni minyɛɔ mitsɔɔ bɔ ni minuɔ Yehowa he mihaa.” (Marco P.)
“Nii ni mikɛ mibe fɛɛ tsuɔ lɛ kɛ miishɛɛ ni minaa yɛ gbɛgbalɔi lɛ ahe lɛ bahaa mi.” (Nancy P.)
Mɛɛ yiŋtoi krokomɛi yɔɔ ni okɛbaafata nɔ ni ato naa nɛɛ ahe?
Ani Oofee Fɛɛ Ni Ooonyɛ?
16. Ani gbɛgbalɔi pɛ ji mɛi ni miaa amɛhiɛ waa? Tsɔɔmɔ mli.
16 Yehowa Odasefoi lɛ ateŋ mɛi komɛi kɛ anɔkwayeli kɛ sɔlemɔ epɛi amɛ diɛŋtsɛ amɛshihilɛ mli ni amɛna akɛ amɛmiifee fɛɛ ni amɛbaanyɛ yɛ ŋmɛnɛŋmɛnɛ shihilɛ nɛɛ shishi. Ekolɛ oji amɛteŋ mɔ kome. Kɛji nakai ni lɛ, na tsui. Yehowa kɛ e-Bi lɛ jwɛŋɔ ohe ni amɛhiɛ sɔɔ osusuma muu fɛɛ sɔɔmɔ lɛ. (Okɛto Luka 21:1-4 he.) Akɛ nɔkwɛmɔ nɔ lɛ, yɛ maŋkwramɔŋ kɛ shika helɛtemɔ mli shihilɛi komɛi ni ehiii hewɔ lɛ, wɔnyɛmimɛi komɛi kɛ ŋmlɛtswai nɛɛhu tsuɔ nii daa gbi, gbii enumɔ loo ekpaa daa otsi bɔni afee ni amɛkɛna heloo gbɛfaŋ nibii ni he hiaa amɛ yɛ maji komɛi amli. Yɛ maŋ ko ni nɔyeli lɛ etsi Yehowa Odasefoi anitsumɔ lɛ naa kwraa mli lɛ, mɛi ni kɛ amɛhe woɔ gbɛgbamɔ sɔɔmɔ lɛ mli lɛ—ni mɛi pii hu kɛ amɛhe miiwo gbɛgbamɔ sɔɔmɔ lɛ mli yɛ nɛkɛ maji nɛɛ amli—ji mɛi ni amɛkpa nitsumɔ yɛ gbɔlɛ hewɔ, obalaŋtai ni tsuɔ nii gbɛkɛ kɛ yei (ni yɔɔ bii) ni Nɔyeli lɛ eŋmɛ amɛ gbɛ akɛ amɛkatsu heloo gbɛfaŋ nitsumɔ.
17. Yɛ mɛɛ gbɛ nɔ Epafrodito sane lɛ tsɔɔ akɛ Yehowa damɔɔɔ nitsumɔi abɔ ni wɔtsuɔ yɛ sɔɔmɔ lɛ mli lɛ nɔ ekɛsusuu wɔhiɛmiamɔ lɛ?
17 Shi ekolɛ obaakɛɛ akɛ ‘Mina ni kulɛ miyɛ gbɔmɔtsoŋ hewalɛ babaoo. Eji matsɔ obalanyo ekoŋŋ kulɛ!’ Shi, kaaha onijiaŋ mijie wui. Abuuu nitsumɔi abɔ ni wɔtsɔɔ hiɛmiamɔ nɔ wɔtsuɔ lɛ he akɔntaa keketee. Ani okaiɔ Epafrodito? Ani abaanyɛ akɛ nɔ ni etsu yɛ be mli ni eyɔɔ hewalɛ lɛ ato bɔ ni emia ehiɛ babaoo yɛ ‘Nuŋtsɔ lɛ nitsumɔ lɛ mli’ yɛ be mli ni ehe yeɔ lɛ he. Shi Paul jie eyi akɛ eji mɔ ni miaa ehiɛ waa. Yɛ anɔkwale mli lɛ taakɛ Paulo tsɔɔ lɛ, esa akɛ ‘wɔbu hii kɛ yei ni tamɔ nɛkɛ lɛ akɛ mɛi ni sa woo.’—Filipibii 2:25-30.
18. (a) Te mɛi ni hegbɛi baaa haaa amɛ lɛ aaafee tɛŋŋ ni amɛwo be fɛɛ sɔɔmɔ he hewalɛ yɛ asafo lɛ mli? (b) Mɛni obaanyɛ ofee ni okɛwo gbɛgbamɔ mumɔ he hewalɛ yɛ asafo lɛ mli?
18 Shi, nɔ ko yɛ ni obaanyɛ otsu ni oha be fɛɛ sɔɔmɔ lɛ ashwere yɛ asafo lɛ mli. Mɛni ji no? Miamɔ ohiɛ waa yɛ gbɛgbamɔ mumɔ lɛ kpojiemɔ mli. Akɛ nɔkwɛmɔ nɔ lɛ, kɛji akɛ onyɛŋ otsɔ gbɛgbalɔ amrɔ nɛɛ yɛ weku mli gbɛnaa nii komɛi ahewɔ lɛ, ani obaanyɛ oŋmɛɛ mɛi krokomɛi ni yɔɔ oweku lɛ mli lɛ ahe—Oŋa, obii, onyɛminuu aloo onyɛmiyoo—ni amɛtsɔmɔ gbɛgbalɔi? Mɛi ni ekolɛ amɛbɛ gbɔmɔtsoŋ hewalɛ tsɔ aloo gbɔmɔtsoŋ gbɔjɔmɔi komɛi etsi amɛnaa lɛ baanyɛ anya mɛi ni kɛ amɛhe woɔ gbɛgbamɔ mli lɛ ahe waa, amɛbaanyɛ ni amɛkɛ amɛ aya shiɛmɔ kɛ́ amɛshihilɛi aaaŋmɛ amɛ gbɛ. (Okɛto 1 Korintobii 12:19-26 he.) Yɛ nɛkɛ gbɛ nɔ lɛ, mɛi fɛɛ ni yɔɔ asafo lɛ mli lɛ baanyɛ amia amɛhiɛ waa ni amɛkɛma be fɛɛ sɔɔmɔ lɛ nɔ mi. Nɔ ni baajɛ mli aba lɛ baafee nɔ ni woɔ mɔ fɛɛ mɔ hewalɛ!
19. Mɛni esa akɛ efee wɔfaishitswaa?
19 Akɛ ooomia ohiɛ waa lɛ tsɔɔ mɛni kɛha bo? Ani no tsɔɔ akɛ oooya ohiɛ kɛyashɛ baptisimɔ he? Oobɔ mɔdɛŋ oye subaŋ fɔŋ ko nɔ kunim? Oowaje wekukpaa ni ka okɛ Yehowa teŋ lɛ yɛ gbɛ ko nɔ? Ani no baanyɛ atsɔɔ gbɛgbalɔi awamɔ sɔɔmɔ? Daa gbɛgbamɔ sɔɔmɔ? Betel sɔɔmɔ? Nɔ fɛɛ nɔ ni ataoɔ yɛ odɛŋ koni oya ohiɛ oshwere yɛ mumɔŋ lɛ sa hiɛmiamɔ waa bianɛ. No hewɔ lɛ nyɛhaa wɔ fɛɛ wɔyaa nɔ wɔpelea koni wɔtsɔ agbo fintɔŋŋ ni kɛ mɔ yaa naanɔ wala mli lɛ mli!b
[Shishigbɛ niŋmai]
a Mɛi ni ahereɔ amɛyiwala lɛ ayibɔ lɛ batsɔ jamɔ mli naagba ni rabifoi lɛ jeɔ he ŋwane waa. Biblia he wolo ko kɛɛ akɛ: “Rabifoi lɛ ateemɔŋ nifeemɔi lɛ ateŋ ekome ji ni amɛbɔ mɔdɛŋ ni amɛtsɔɔ mɛi ni ahereɔ amɛyiwala lɛ ayibɔ lɛ yɛ ŋmalɛ nɛɛ loo ekroko lɛ mli niŋmai ayibɔ okadi lɛ falɛ loo sɛɛnamɔ naa.
b Ajie kɛjɛ January 15, 1986 Watchtower lɛ mli
Saji Otii Ni Esa Akɛ Asusu He
◻ Mɛni Yesu tsɔɔ beni ewo ŋaa akɛ, “Nyɛmiaa nyɛhiɛ waa” lɛ?
◻ Mɛɛ be ni mɛɛ gbɛ nɔ Yesu wiemɔi lɛ kɔɔ ohe yɛ?
◻ Mɛni hewɔ “mɛi pii” lɛ nyɛɛɛ abote agbo fintɔŋŋ lɛ mli lɛ?
◻ Te mɛi ni hegbɛi baaa haaa amɛ lɛ aaafee tɛŋŋ amia amɛhiɛ?
◻ Esa akɛ wɔya nɔ wɔpele agbo fintɔŋŋ lɛ mli botemɔ he kɛyashi mɛɛ be?