Yitso 82

Yesu Yi Mli Ekoŋŋ Kɛmiiya Yerusalem

ETSƐƐƐ kɛkɛ ni Yesu nyiɛ gbɛ nɔ ekoŋŋ, ni eetsɔɔ nii kɛjɛ maŋ kome mli kɛmiiya ekroko mli kɛ akrowa kome mli kɛmiiya akrowa kroko mli. Eka shi faŋŋ akɛ eyɛ Perea kpokpaa lɛ nɔ, yɛ Yordan Faa lɛ sɛɛ kɛjɛ Yudea gbɛ. Shi Yerusalem ji he ni eyaa.

Ekolɛ Yudafoi ajeŋ nilee akɛ mɛi fioo pɛ sa yiwalaheremɔ lɛ tsirɛ nuu ko ni ebabi akɛ: “Nuŋtsɔ, ani mɛi fioo kɛkɛ yiwala abaahere?” Yesu kɛ ehetoo lɛ nyɛ mɛi lɛ anɔ koni amɛsusu nɔ ni he hiaa kɛha yiwalaheremɔ lɛ he: “Nyɛpelea agbo fintɔŋŋ lɛ mli botemɔ he, [ni ji akɛ, kɛ hiɛmiamɔ, aloo piŋmɔ].”

Yesu tee nɔ akɛ, nɛkɛ hiɛmiamɔ kɛ ekaa nɛɛ he miihia, “ejaakɛ miikɛɛ nyɛ akɛ, mɛi pii aaatao mli abote, shi amɛnyɛŋ.” Mɛni hewɔ ni amɛnyɛŋ lɛ? Etsɔɔ mli akɛ ‘be mli ni shiatsɛ lɛ ete shi ni eyaŋa shinaa lɛ, ni gbɔmɛi aaabɔi sɛɛ daamɔ kɛ shinaa lɛ shimɔ ni amɛaakɛɛ akɛ: “Nuŋtsɔ, Nuŋtsɔ, gbelemɔ wɔ” lɛ, eeehere nɔ ekɛɛ amɛ akɛ: “Mileee he ni nyɛjɛ; nyɛjea minɔ nyɛyaa, nyɛ mɛi fɛɛ ni nyɛtsuɔ nii ni ejaaa gbɛ lɛ!”

Etamɔ nɔ ni mɛi ni aŋa amɛyi lɛ ba mli yɛ be ni hi kɛha amɛ diɛŋtsɛ pɛ mli. Shi no mli lɛ aŋa hegbɛ shinaa lɛ ni ala sɛɛ. Eyɛ mli akɛ ekolɛ nakai be lɛ ehiŋ kɛhaŋ amɛ moŋ, shi kɛlɛ kulɛ esa akɛ amɛba mra bɔni afee ni amɛbote mli. Lɛlɛŋ, awerɛho sane ji nɔ ni baajɛ mli aba aha mɛi ni kɛ Yehowa jamɔ ni amɛaaha eye klɛŋklɛŋ gbɛhe lɛ toɔ sɛɛ yɛ amɛshihilɛ mli lɛ!

Yudafoi lɛ ni atsu Yesu ni ebasɔmɔ amɛ lɛ, eku amɛhiɛ amɛfɔ hegbɛ ni yɔɔ nyam ni ji Nyɔŋmɔ gbɛjianɔtoo kɛha yiwalaheremɔ ni amɛaakpɛlɛ nɔ lɛ nɔ yɛ bei babaoo mli. No hewɔ lɛ Yesu kɛɛ akɛ kɛ ashɛrɛ amɛ ashwie agbo lɛ naa lɛ, amɛbaafo ni amɛbaakpe amɛnyanyɔji ashishi. Shi yɛ gbɛ kroko nɔ lɛ, gbɔmɛi ni jɛ “boka kɛ anai kɛ kooyi kɛ wuoyigbɛ,” hɛɛ, kɛjɛ jeŋmaji fɛɛ mli “aaaba ni amɛbatara okpɔlɔ he yɛ Nyɔŋmɔ maŋtsɛyeli lɛ mli.”

Yesu tee nɔ akɛ: “Ni naa, sɛɛkpeebii [mɛi ni jeee Yudafoi ni abuuu amɛ lɛ kɛ Yudafoi ni anaanaa amɛnɔ] yɛ ni baatsɔmɔ klɛŋklɛŋbii, ni klɛŋklɛŋbii [Yudafoi ni ajɔɔ amɛ yɛ heloonaa kɛ jamɔ mli fɛɛ lɛ] hu yɛ ni baatsɔmɔ sɛɛkpeebii.” Sɛɛkpeebii ni amɛaatsɔmɔ nɛɛ tsɔɔ akɛ nɛkɛ anihaolɔi ni hiɛ esɔɔɔ nii nɛɛ boteŋ Nyɔŋmɔ Maŋtsɛyeli lɛ mli kwraa.

Agbɛnɛ Farisifoi lɛ ba Yesu ŋɔɔ ni amɛbakɛɛ lɛ akɛ: “Jee biɛ nɛɛ ni oya; ejaakɛ Herode [Antipa] miitaoo agbe.” Ekolɛ eeenyɛ efee akɛ Herode diɛŋtsɛ ji mɔ ni je asɛmsro nɛɛ shishi koni ekɛha Yesu ashi nakai kpokpaa lɛ nɔ. Ekolɛ Herode miishe gbeyei akɛ ekɛ ehe aaawo Nyɔŋmɔ gbalɔ kroko hu gbele mli taakɛ efee yɛ Yohane Baptisilɔ lɛ gbɛfaŋ lɛ. Shi Yesu kɛɛ Farisifoi lɛ akɛ: “Nyɛyaa ni nyɛyakɛa nakai osɔ lɛ akɛ: Naa, miifamɔ daimonioi ni miitsa mɛi ŋmɛnɛ kɛ wɔ, ni gbi ni ji gbi etɛ lɛ magbe naa.”

Ni Yesu gbe nitsumɔ lɛ naa yɛ jɛmɛ lɛ, etsa egbɛfaa lɛ nɔ kɛtee Yerusalem, ejaakɛ, taakɛ etsɔɔ mli lɛ, “ebaŋ mli akɛ aaagbe gbalɔ ko yɛ he ko akɛ ja Yerusalem.” Mɛni hewɔ ni esa akɛ akpa gbɛ akɛ abaagbe Yesu yɛ Yerusalem lɛ? Ejaakɛ Yerusalem ji maŋtiase, he ni Sanhedrin kojomɔ he wulu ni mlibii feɔ 71 lɛ yɔɔ, ni jɛmɛ akɛ kooloi afɔleshaai lɛ haa yɛ. No hewɔ lɛ ebaŋ mli akɛ aaagbe “Nyɔŋmɔ Toobi lɛ” yɛ he ko akɛ ja Yerusalem.

Kɛkɛ ni Yesu bo akɛ: “Yerusalem, Yerusalem, bo mɔ ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi, shii enyiɛ mitao akɛ mibuaa obii lɛ anaa, taakɛ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ! Naa, ashi nyɛwe lɛ amaŋfɔ aha nyɛ.” Alomɔ maŋ lɛ yɛ Nyɔŋmɔ Bi lɛ ni amɛkpoo lɛ lɛ hewɔ!

Yɛ be mli ni Yesu nyiɛɔ kɛyaa Yerusalem lɛ, afɔ lɛ nine kɛtee Farisifoi lɛ anɔyelɔ ko shia. Hejɔɔmɔ Gbi ni, ni akɛni nuu ko yɛ jɛmɛ ni eeye fuumɔ hela, ni ji hela ni eha ekolɛ enijiaŋ kɛ enajiaŋ ewo nu hewɔ lɛ, gbɔmɛi lɛ miikwɛ lɛ waa. Kɛkɛ ni Yesu kɛ Farisifoi lɛ kɛ mɛi ni le Mla lɛ jogbaŋŋ ni yɔɔ jɛmɛ lɛ wie, ni ebi amɛ akɛ: “Ani eja gbɛ akɛ atsaa mɔ yɛ hejɔɔmɔ gbi lɛ nɔ lo?”

Mɔ ko mɔ ko etswaaa esɛŋ. No hewɔ lɛ Yesu tsa nuu lɛ ni eha etee. Kɛkɛ ni ebi amɛ akɛ: “Nyɛteŋ namɔ ni, kɛ eteji loo etsina yagbee nu bu mli lɛ, eyajieŋ lɛ amrɔ lɛ nɔŋŋ yɛ hejɔɔmɔ gbi lɛ nɔ?” Shikome ekoŋŋ lɛ, amɛteŋ mɔ ko mɔ ko ewieee nɔ ko akɛ eeha lɛ hetoo. Luka 13:22–14:6; Yohane 1:29.

▪ Mɛni Yesu tsɔɔ akɛ ehe hiaa kɛha yiwalaheremɔ, ni mɛni hewɔ ni aŋa mɛi pii ayi yɛ sɛɛ lɛ?

▪ Namɛi ji “sɛɛkpeebii” ni batsɔmɔ klɛŋklɛŋbii, kɛ “klɛŋklɛŋbii” ni batsɔmɔ sɛɛkpeebii lɛ?

▪ Mɛni eeenyɛ efee akɛ no hewɔ ni akɛɔ akɛ Herode tao ni egbe Yesu lɛ?

▪ Mɛni hewɔ ni ebaŋ mli akɛ aaagbe gbalɔ ko yɛ he ko akɛ ja yɛ Yerusalem lɛ?