Yitso 86

Binuu ni Laaje lɛ He Sane Lɛ

AKƐNI egbe abɛbuai ni egba Farisifoi lɛ ni kɔɔ too ni laaje ni ana lɛ lɛ kɛ jwiɛtɛi kuku lɛ he lɛ naa hewɔ lɛ, agbɛnɛ Yesu tee nɔ egba amɛ abɛbua kroko. Enɛ kɔɔ tsɛ ko ni yɔɔ suɔmɔ kɛ gbɛ nɔ ni ekɛ ebihii enyɔ, ni amɛ fɛɛ amɛyɔɔ tɔmɔi ni hiɛdɔɔ yɔɔ he lɛ ye ha lɛ he.

Klɛŋklɛŋ lɛ, mɔ titri yɛ abɛbua lɛ mli, ni ji binuu fioo lɛ yɛ. Ehe egboshinii lɛ, ni etsɛ lɛ kɛha lɛ ni shishashaomɔ ko bɛ mli. Kɛkɛ ni eshi shia ni ekɛ ehe yawo jeŋba shara shihilɛ mli. Shi bo toi yɛ be mli ni Yesu gbaa sane lɛ, koni okwɛ akɛ ani ooonyɛ otsɔɔ mɛi ni abɛbua lɛ mlibii lɛ damɔ shi kɛha lɛ lo.

Yesu je shishi akɛ: “Nuu ko yɛ bihii enyɔ. Ni amɛteŋ gbekɛ lɛ kɛɛ etsɛ akɛ: ‘Ataa, ha mi onii lɛ amli nɔ ni ji migbɛfaŋnɔ.’ Ni [tsɛ lɛ] eja enii lɛ amli eha amɛ.” Mɛni gbekɛ nɛɛ kɛ nɔ ni enine shɛ nɔ lɛ yafee?

Yesu tsɔɔ mli akɛ: “No sɛɛ lɛ, yeee gbi ko kɛkɛ ni gbekɛ lɛ bua fɛɛ naa, ni edom etee maŋsɛɛ shɔŋŋ he ko, ni jɛi ekɛ nyenyeŋtswibɔɔ yakpata enii lɛ ahiɛ yɛ.” Yɛ anɔkwale mli lɛ, ekɛ yei ajwamaŋi yaye eshika lɛ. Yɛ sɛɛ mli lɛ, nibii amli bawa, taakɛ Yesu tee nɔ egba lɛ:

“Shi beni efite fiaa lɛ, hɔmɔ ni naa wa ko bate shi yɛ nakai shikpɔŋ lɛ nɔ fɛɛ, ni ebɔi lɛ fimɔ. Ni eyiŋ etee ekɛ ehe yakpɛtɛ nakai shikpɔŋ lɛ nɔ bii lɛ eko he; ni eha etee ebɔɔi lɛ amli, eyalɛ kpolotoi. Ni eba etsine akɛ kulɛ ena yɔɔ ni kpolotoi lɛ yeɔ lɛ eko eye ni etɔ, ni mɔ ko haaa lɛ.”

Kwɛ bɔ ni eyɔɔ hiɛgbele akɛ aaanyɛ mɔ ko nɔ ni eyalɛ kpolotoi, akɛni nɛkɛ kooloi nɛɛ ahe tseee yɛ Mla lɛ naa lɛ hewɔ! Shi nɔ ni wa ha binuu nɛɛ fe fɛɛ ji hɔmɔ ni yeɔ lɛ waa ni ha eyasumɔ po ni eye niyenii ni akɛlɛɔ kpolotoi lɛ eko lɛ. Yɛ nɛkɛ amanehulu kpele nɛɛ hewɔ lɛ, Yesu kɛɛ akɛ “ehiɛ tserɛ lɛ.”

Beni etsaa esane lɛ nɔ lɛ, Yesu tsɔɔ mli akɛ: “Ekɛɛ [lɛ diɛŋtsɛ ehe]: ‘Yaakwɛ mitsɛ apaafoi abɔ sɔŋŋ ni yɔɔ niyenii aahu ni amɛkɛkumaa; ni mi lɛ hɔmɔ gbeɔ mi yɛ biɛ nɛɛ. Mate shi matee mitsɛ ŋɔɔ ni mayakɛɛ lɛ akɛ: “Ataa, mifee Nyɔŋmɔ shishi esha ni mifee esha yɛ bo hu ohiɛ, ni misaaa akɛ atsɛɔ mi obi dɔŋŋ; ŋɔɔ mi ofee tamɔ apaafoi lɛ eko.” ’ Ni ete shi ni eyiŋ etee etsɛ lɛ ŋɔɔ.”

Naa nɔ ko ni esa akɛ asusu he: Eji etsɛ tsɔ ehiɛ ewo lɛ ni ekɛ mlifu bolɔ ewo lɛ yɛ be mli ni eshi shia lɛ kulɛ, binuu nɛɛ naŋ jwɛŋmɔ kome pɛ ni ba eyiŋ yɛ nɔ ni sa akɛ efee lɛ he. Kulɛ ekolɛ ebaakpɛ eyiŋ akɛ ebaaku esɛɛ ni eyatao nitsumɔ yɛ he kroko yɛ emaŋ koni ekaba akɛ ekɛ etsɛ lɛ aaakpe. Shi kɛlɛ, jwɛŋmɔ ko ni tamɔ nɛkɛ baaa eyiŋ. Shia ji he ni etaoɔ ni ehi!

Eka shi faŋŋ akɛ, tsɛ ni yɔɔ Yesu abɛbua lɛ mli lɛ damɔ shi kɛha wɔ ŋwɛi Tsɛ, Yehowa Nyɔŋmɔ, mɔ ni yɔɔ suɔmɔ kɛ musuŋtsɔlɛ lɛ. Ni ekolɛ bo hu oyoo akɛ binuu ni laaje loo bi nyenyeŋtswi lɛ damɔ shi kɛha mɛi ni ale amɛ akɛ eshafeelɔi lɛ. Ni Farisifoi ni Yesu kɛ amɛ wieɔ lɛ ewie eshi Yesu yɛ tsutsu ko akɛ ekɛ mɛnɛɛmɛi yeɔ nii. Shi namɔ bi nukpa lɛ damɔ shi kɛha?

Beni Ana Binuu ni Laaje Lɛ

Beni binuu, loo bi nyenyeŋtswi ni yɔɔ Yesu abɛbua lɛ mli lɛ ku esɛɛ eba etsɛ shia lɛ, te ahere lɛ aha tɛŋŋ? Bo toi yɛ be mli ni Yesu tsɔɔ mli lɛ:

“Shi beni enyiɛ shɔŋŋ kɛbaa beebe lɛ, etsɛ na lɛ, ni emusuŋ tsɔ lɛ, ni esha foi eho eyagbee ekuɛ nɔ, ni eshɔshɔɔ enaa.” Mɛɛ tsɛ ni yɔɔ mɔbɔnalɛ kɛ tsuijurɔ, ni damɔ shi jogbaŋŋ kɛha wɔ ŋwɛi Tsɛ, Yehowa, eji nɛkɛ!

Ekolɛ etamɔ nɔ ni tsɛ lɛ enu ebi lɛ nyenyeŋtswibɔɔ shihilɛ lɛ he. Shi kɛlɛ ehere lɛ kɛba shia ni emɛɛɛ ni etsɔɔ lɛ nɔ hewɔ. Yesu hu na mumɔ ni akɛhereɔ mɛi kɛbaa nɛɛ eko, ni eŋɔɔ hegbɛ lɛ ni ekɛbɛŋkɛɔ eshafeelɔi kɛ toohelɔi, ni bi nyenyeŋtswi lɛ feɔ amɛhe mfoniri yɛ abɛbua lɛ mli lɛ.

Eji anɔkwale, ŋwanejee ko bɛ he akɛ tsɛ ni yooɔ nii waa ni yɔɔ Yesu abɛbua lɛ mli lɛ na akɛ ebinuu lɛ eshwa ehe yɛ ehiɛ ni efee mɔbɔmɔbɔ, kɛ hiɛgbele yɛ be mli ni ekuɔ esɛɛ lɛ hewɔ. Shi hegbɛ ni tsɛ lɛ ŋɔ ekɛhere lɛ lɛ ha efee mlɛo kɛha binuu lɛ akɛ ekpɛlɛ ehe eshai lɛ anɔ, taakɛ Yesu gba lɛ: “Ni bi lɛ kɛɛ lɛ akɛ: ‘Ataa, mifee Nyɔŋmɔ shishi esha ni mifee esha yɛ bo hu ohiɛ, ni misaaa akɛ atsɛɔ mi obi dɔŋŋ. Ŋɔɔ mi ofee tamɔ opaafoi lɛ eko.’ ”

Ni kɛlɛ, binuu lɛ egbeee ewiemɔ lɛ naa po kɛkɛ ni etsɛ fa etsuji lɛ akɛ: “Nyɛyajiea atade ni yɔɔ fɛo fe fɛɛ lɛ kɛbaa mramra, ni nyɛkɛbawoa lɛ, ni nyɛwo enine kpotia kɛ enaji hu tokotai; ni nyɛkɛ tsinabi ni ewo fɔ lɛ abaa nyɛbagbea, ni nyɛhaa wɔyea nii ni wɔnaa tsuijurɔ; ejaakɛ mibi nɛɛ gbo, ni ehiɛ etsɛ ekoŋŋ; elaaje, ni ana lɛ.” Kɛkɛ ni “amɛna tsuijurɔ.”

Yɛ nakai beaŋ lɛ, tsɛ lɛ “bi nukpa lɛ yɛ ŋmɔshi.” No hewɔ lɛ bo abɛbua lɛ fa ni eshwɛ lɛ toi ni okwɛ akɛ ani ooonyɛ ona mɔ ni edamɔ shi kɛha lo. Yesu wie bi nukpa lɛ he akɛ: “Ni beni ebaa ni ebabɛŋkɛ shia lɛ, enu saŋkui kɛ jooi ahe; ni etsɛ tsuji lɛ ekome kɛba, ni ebi lɛ akɛ: Mɛni afeɔ nɛɛ? Ni ekɛɛ lɛ akɛ: ‘Onyɛmi lɛ eba, ni otsɛ egbe tsinabi ni ewo fɔ lɛ, ejaakɛ eshɛ edɛŋ kpintiŋŋ.’ Ni emli fu ni ekpɛlɛɛɛ shia lɛ yaa. No hewɔ lɛ etsɛ je kpo eba ebakpa lɛ fai. Shi ehere nɔ ni ekɛɛ etsɛ lɛ akɛ: ‘Kwɛ afii abɔ sɔŋŋ ni misɔmɔo, ni mitɔko okita ko nɔ dã, ni mi lɛ, ohako mi too kpakpo ko tete da, koni mikɛ mishieŋtsɛmɛi ana tsuijurɔ; shi ŋmɛnɛ ni nɛkɛ obi nɛɛ ni kɛ ajwamaŋi eyaye onii lɛ ba lɛ, ogbe tsinabi ni ewo fɔ lɛ oha lɛ.’ ”

Namɛi ewie eshi mɔbɔnalɛ ni ajie kpo atsɔɔ eshafeelɔi kɛ amɛhe ni asusuɔ lɛ tamɔ bi nukpa lɛ fee lɛ? Ani jeee woloŋmalɔi lɛ kɛ Farisifoi lɛ? Akɛni wiemɔi ni amɛwie amɛshi Yesu akɛ ehereɔ eshafeelɔi hiɛmɛɛ lɛ ha egba abɛbua nɛɛ hewɔ lɛ, eka shi faŋŋ akɛ amɛji mɛi ni bi nukpa lɛ damɔ shi kɛha.

Yesu mu esane lɛ naa kɛ tsɛ lɛ wiemɔi ni ekɛ ebi nukpa lɛ wie nɛɛ: “Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔŋ; shi esa akɛ wɔnya ni wɔmii ashɛ wɔhe; ejaakɛ onyɛmi nɛɛ gbo, ni ehiɛ etsɛ ekoŋŋ, elaaje ni ana lɛ.”

No hewɔ lɛ Yesu shi nɔ ni bi nukpa lɛ fee yɛ naagbee lɛ ni etsɔɔɔ mli. Lɛlɛŋ, yɛ sɛɛ mli, yɛ Yesu gbele kɛ eshitee lɛ sɛɛ lɛ, “osɔfoi lɛ tete ateŋ mɛi pii boɔ hemɔkɛyeli lɛ toi,” ni ekolɛ nɛkɛ “bi nukpa” kuu ni Yesu kɛ amɛ wieɔ yɛ biɛ lɛ ateŋ mɛi komɛi fata he.

Shi namɛi bihii enyɔ nɛɛ damɔ shi kɛha yɛ ŋmɛnɛŋmɛnɛ beaŋ? Esa akɛ efee mɛi ni ebale nibii babaoo yɛ Yehowa yiŋtoi ahe akɛ enɛ eha amɛna nɔdaamɔ nɔ ni amɛaatsɔ nɔ amɛna amɛkɛ lɛ teŋ wekukpaa. Bi nukpa lɛ damɔ shi kɛha “asafoku bibioo” lɛ mlibii, aloo “kromɔbii ni aŋma amɛgbɛii yɛ ŋwɛi lɛ anaabuamɔ kɛ asafo lɛ” ateŋ mɛi komɛi. Mɛnɛɛmɛi kɔ su ni tamɔ bi nukpa lɛ nɔ lɛ nɔŋŋ. Amɛbɛ he miishɛɛ akɛ amɛaahere shikpɔŋ nɔ kuu, ni ji “tooi krokomɛi,” ni amɛsusuɔ akɛ aagbala jwɛŋmɔ kɛmiiya amɛnɔ fe nine lɛ ahiɛmɛɛ.

Shi yɛ gbɛ kroko nɔ lɛ, bi nyenyeŋtswi lɛ damɔ shi kɛha Nyɔŋmɔ webii lɛ ateŋ mɛi ni shiɔ koni amɛyana miishɛɛ ni je lɛ kɛhaa lɛ eko lɛ. Shi kɛlɛ, yɛ be ni sa mli lɛ, mɛnɛɛmɛi kuɔ amɛsɛɛ kɛ tsuitsakemɔ ni amɛbatsɔmɔɔ Nyɔŋmɔ sɔɔlɔi ni yɔɔ ekaa ekoŋŋ. Lɛlɛŋ, kwɛ bɔ ni Tsɛ lɛ yɔɔ suɔmɔ kɛ mlihilɛ kɛha mɛi ni nuɔ he akɛ eshaifaa he miihia amɛ ni amɛkuɔ amɛsɛɛ kɛbaa eŋɔɔ ekoŋŋ lɛ! Luka 15:11-32; 3 Mose 11:7, 8; Bɔfoi lɛ Asaji 6:7; Luka 12:32; Hebribii 12:23; Yohane 10:16.

▪ Namɛi Yesu gba amɛ abɛbua nɛɛ, loo sane nɛɛ, ni mɛni hewɔ?

▪ Namɔ ji mɔ titri ni sane lɛ kɔɔ ehe, ni mɛni ba enɔ?

▪ Namɛi tsɛ lɛ kɛ gbekɛ nuu lɛ damɔ shi kɛha yɛ Yesu gbii lɛ amli?

▪ Mɛɛ gbɛ nɔ Yesu kase tsɛ ni musuŋ tsɔɔ lɛ ni yɔɔ ebɛbua lɛ mli lɛ nɔkwɛmɔ nɔ lɛ yɛ?

▪ Mɛni bi nukpa lɛ susuɔ yɛ gbɛ ni atsɔ nɔ ahere enyɛmi lɛ hiɛmɛɛ lɛ hewɔ, ni mɛɛ gbɛ nɔ Farisifoi lɛ feɔ amɛnii tamɔ bi nukpa lɛ yɛ?

▪ Te Yesu abɛbua lɛ kɔɔ wɔgbii nɛɛ ahe ehaa tɛŋŋ?