Yitso 87

Okɛ Nilee Ni Anyɛɔ Atsuɔ He Nii Ato Gbɛjianɔ Oha Wɔsɛɛ

YESU egbe abɛbua ni kɔɔ bi nyenyeŋtswi lɛ he ni egbaa mɛi babaoo ni ekaselɔi lɛ, kɛ toohelɔi ni yeee anɔkwa, kɛ eshafeelɔi krokomɛi ni ale amɛ, kɛ woloŋmalɔi kɛ Farisifoi lɛ fɛɛ fata he lɛ naa. Agbɛnɛ, yɛ be mli ni ekɛ ekaselɔi lɛ wieɔ lɛ, egba amɛ abɛbua ko ni kɔɔ nuu niiatsɛ ko ni nu sane fɔŋ ko yɛ eshia nɔkwɛlɔ, loo etsulɔ nukpa he lɛ he sane.

Bɔ ni Yesu tsɔɔ lɛ, nuu niiatsɛ lɛ tsɛ etsulɔ nukpa lɛ ni ekɛɛ lɛ akɛ ebaashwie lɛ. Ni tsulɔ nukpa lɛ susu eyiŋ akɛ: “Ni minuŋtsɔ shɔɔ onukpayeli lɛ yɛ midɛŋ nɛɛ, te mafee tɛŋŋ? Minyɛŋ shi matsa, ni sisɛmɔ hu miifee mi hiɛgbele. Mina bɔni mibafee, ni kɛ akpa mi onukpayeli lɛ, ni amɛhere mi yɛ amɛshiai.”

Mɛni tsulɔ nukpa lɛ eto ni ebaafee? Etsɛ mɛi ni hiɛ enuŋtsɔ nyɔmɔ lɛ fɛɛ kɛba. Ebi amɛ akɛ: “Nyɔmɔ enyiɛ ohiɛ?”

Klɛŋklɛŋ mɔ lɛ ha hetoo akɛ: ‘Mu galɔŋ 580.’

Ni ekɛɛ lɛ akɛ: ‘Hemɔ owolo lɛ ni ota shi mramra ni oŋma 290.’

Ebi mɔ kroko hu akɛ: ‘Agbɛnɛ, bo hu nyɔmɔ enyiɛ ohiɛ?’

Ekɛɛ: ‘Ŋmaa susumɔ nii 630.’

‘Hemɔ owolo lɛ ni oŋma 504.’

Tsulɔ nukpa lɛ yɛ hewalɛ ni ekɛaatse nyɔji ni ahiɛ enuŋtsɔ lɛ nɔ, akɛni eka he eekwɛ enuŋtsɔ lɛ nibii anɔ lolo lɛ hewɔ. Eetsɔ nyɔji ni etseɔ nɔ lɛ anɔ ekɛ mɛi ni baanyɛ ake lɛ nii kɛji ashwie lɛ yɛ nitsumɔ lɛ mli lɛ miibɔ naanyo.

Beni nuŋtsɔ lɛ nu nɔ ni eba lɛ, ena he miishɛɛ waa. Yɛ anɔkwale mli lɛ, ‘ejie tsulɔ nukpa kutumpɔfo lɛ yi akɛ eye sane kɛ nilee ni atsuɔ he nii.’ Lɛlɛŋ, Yesu kɛfata he akɛ: “Ejaakɛ je nɛŋ bii lɛ le amɛnɔ lɛ mli ŋaa fe la bii lɛ.”

Agbɛnɛ, yɛ be mli ni etsɔɔ ekaselɔi lɛ nikasemɔ ni yɔɔ mli lɛ, Yesu wo amɛ hewalɛ akɛ: “Nyɛŋɔa kutumpɔo mamona lɛ eko nyɛfea shieŋtsɛmɛi nyɛhaa nyɛhe, koni, beni nyɛbɛ nɔ ko dɔŋŋ lɛ, ni amɛhere nyɛ yɛ naanɔ buui lɛ amli.”

Yesu ejieee tsulɔ nukpa lɛ yi yɛ ekutumpɔo lɛ hewɔ, shi moŋ yɛ nii ni ekwɛɔ kɛyaa shɔŋŋ, enilee ni anyɛɔ atsuɔ he nii lɛ hewɔ. Bei pii lɛ “je nɛŋ bii lɛ” kɛ amɛshika loo hegbɛ lɛ tsuɔ nii yɛ nilee mli ni amɛkɛ mɛi ni baanyɛ ake amɛ nii yɛ sɛɛ mli lɛ feɔ nanemɛi. No hewɔ lɛ ehe miihia ni Nyɔŋmɔ tsuji, ni ji “la bii lɛ,” hu kɛ heloonaa nibii ni amɛyɔɔ, amɛ “kutumpɔo mamona” lɛ atsu nii yɛ nilee mli koni ehe aba sɛɛnamɔ aha amɛ.

Shi taakɛ Yesu kɛɛ lɛ, esa akɛ amɛtsɔ nɛkɛ ninamɔ ni amɛyɔɔ nɛɛ nɔ amɛkɛ mɛi ni baahere amɛ “yɛ naanɔ buui amli” lɛ abɔ naanyo. Yɛ asafoku bibioo lɛ gbɛfaŋ lɛ, nɛkɛ naanɔ buui nɛɛ yɛ ŋwɛi; kɛha “tooi krokomɛi” lɛ, amɛyɛ Paradeiso shikpɔŋ lɛ nɔ. Akɛni Yehowa Nyɔŋmɔ kɛ e-Bi lɛ pɛ baanyɛ ahere mɛi kɛya nɛkɛ hei nɛɛ hewɔ lɛ, esa akɛ wɔkɛ ekaa babaoo atsu nii ni wɔkɛ amɛ abɔ naanyo kɛtsɔ nii ni wɔkɛ “kutumpɔo mamona” ni wɔyɔɔ lɛ aaatsu ni wɔkɛfi Maŋtsɛyeli lɛ nibii asɛɛ lɛ nɔ. Kɛkɛ lɛ, kɛji heloonaa nibii lɛ bɛ dɔŋŋ loo amɛhiɛ kpata, tamɔ bɔ ni amɛbaafee hu lɛ, abaama wɔ naanɔ shihilɛ nɔ mi aha wɔ.

Yesu tee nɔ ewie akɛ gbɔmɛi ni yeɔ anɔkwa ni amɛkwɛɔ heloonaa nibii, loo nii fioo nɔ lɛ baaye anɔkwa yɛ be mli ni amɛkwɛɔ nibii ni he hiaa waa anɔ lɛ. Etee nɔ akɛ: “No hewɔ lɛ, kɛ nyɛyeko kutumpɔo mamona lɛ po mli anɔkwa lɛ, nɔ ni ji anɔkwa [ni ji mumɔ mli loo Maŋtsɛyeli lɛ he nibii] lɛ, namɔ aaatuu awo nyɛdɛŋ? Ni kɛ nyɛyeko mɔ kroko nɔ [Maŋtsɛyeli lɛ he nibii ni Nyɔŋmɔ etuu ewo etsuji adɛŋ lɛ] mli anɔkwa lɛ, nyɛ diɛŋtsɛ nyɛnɔ [ni ji naanɔ wala yɛ naanɔ buui amli] lɛ, namɔ aaaŋɔha nyɛ?”

Wɔnyɛŋ wɔfee Nyɔŋmɔ anɔkwa tsuji ni yɛ nakai beaŋ nɔŋŋ lɛ wɔfee nyɔji wɔha kutumpɔo mamona, heloonaa ninamɔ, taakɛ Yesu mu sane lɛ naa lɛ: “Wenuu ko nyɛŋ nuŋtsɔmɛi enyɔ asɔmɔ; ejaakɛ ekolɛ eeenyɛ ekome ni eeesumɔ mɔ kroko lɛ, aloo eeekpɛtɛ mɔ kome he, ni eeegbe mɔ kroko lɛ he guɔ. Nyɛnyɛŋ Nyɔŋmɔ kɛ mamona nyɛsɔmɔ.” Luka 15:1, 2; 16:1-13; Yohane 10:16.

▪ Mɛɛ gbɛ nɔ tsulɔ nukpa ni yɔɔ Yesu abɛbua lɛ mli lɛ kɛ mɛi ni baanyɛ aye abua lɛ yɛ sɛɛ mli lɛ bɔ naanyo yɛ?

▪ Mɛni ji “kutumpɔo mamona” lɛ, ni mɛɛ gbɛ nɔ wɔɔtsɔ wɔfee nanemɛi yɛ kɛtsɔ nomɛi anɔ?

▪ Namɛi baanyɛ ahere wɔ kɛya “naanɔ buui lɛ amli,” ni nɛgbɛ ji nɛkɛ hei nɛɛ?