Yitso 92

Atsa Kpitiyelɔi Nyɔŋma yɛ Yesu Naagbee Gbɛfaa Kɛmiiya Yerusalem lɛ Mli

YESU shi Yerusalem ni etee Efraim maŋtiase, ni ekolɛ ekɛ Yerusalem jɛkɛmɔ aaafee shitoi 15 loo nɔ yɛ ekooyi-bokagbɛ lɛ mli, koni ekɛfite mɔdɛŋ ni Sanhedrin lɛ bɔɔ ni amɛgbe lɛ lɛ. Ekɛ ekaselɔi lɛ hi jɛmɛ, ni amɛshi ehenyɛlɔi lɛ ateŋ.

Shi kɛlɛ, afi 33 Ŋ.B. Hehoo lɛ miibɛŋkɛ, no hewɔ lɛ etsɛɛɛ ni Yesu shi jɛmɛ ekoŋŋ. Efa gbɛ kɛtsɔ Samaria ni etsa nɔ kɛtee Galilea. Nɛkɛ be nɛɛ ji enaagbee be ni efa gbɛ kɛtee nɛkɛ kpokpaa nɛɛ nɔ dani egbo. Beni eyɔɔ Galilea lɛ, ekolɛ ekɛ ekaselɔi lɛ fata mɛi krokomɛi ni faa gbɛ kɛyaa Yerusalem kɛha Hehoo lɛ yeli lɛ ahe. Amɛtsɔ gbɛ ni tsɔɔ Perea kpokpaa nɔ, yɛ Yordan Faa lɛ boka gbɛ lɛ nɔ.

Mra mli yɛ gbɛfaa lɛ mli, beni Yesu boteɔ akrowa ko mli yɛ Samaria loo Galilea lɛ, hii nyɔŋma ni miiye kpiti kɛ lɛ bakpe. Nɛkɛ hela ni yɔɔ gbeyei nɛɛ yeɔ mɔ lɛ gbɔmɔtso lɛ fai komɛi—enine waobii, enane waobii, etoii, egugɔ, kɛ enaabu. Bɔni afee ni abu mɛi krokomɛi ahe koni hela nɛɛ akatsɛŋe amɛ lɛ, Nyɔŋmɔ Mla lɛ wieɔ kpitiyelɔi ahe akɛ: “Eha enaabui anɔ ni ebolɔ akɛ: ‘Mihe tseee! Mihe tseee!’ Gbii abɔ ni hela lɛ yɔɔ ehe lɛ, ehe tseee kwraa; . . . eshihilɛ he lɛ ahi ŋsra lɛ sɛɛ.”

Kpitiyelɔi nyɔŋma lɛ yeɔ naatsii ni Mla lɛ kɛfɔɔ kpitiyelɔi anɔ lɛ nɔ, no hewɔ lɛ amɛtsi amɛhe yɛ Yesu he kɛtee shɔŋŋ. Shi kɛlɛ, amɛbolɔ kɛ gbee waa amɛkɛɛ: “Nuŋtsɔ Yesu, naa wɔ mɔbɔ!”

Beni Yesu na amɛ yɛ shɔŋŋ lɛ, efa amɛ akɛ: “Nyɛyaa nyɛkɛ nyɛhe ayatsɔa osɔfoi lɛ.” Yesu kɛɛ amɛ enɛ ejaakɛ Nyɔŋmɔ Mla lɛ kɛ hegbɛ haa osɔfoi lɛ ni amɛtswa adafi akɛ atsa kpitiyelɔi komɛi kɛjɛ amɛhela nɛɛ mli. Yɛ nɛkɛ gbɛ nɔ lɛ amɛkpɛlɛɔ mɔ lɛ nɔ koni ebahi mɛi ni he yeee lɛ ateŋ.

Kpitiyelɔi nyɔŋma lɛ yɛ hekɛnɔfɔɔ yɛ Yesu hewalɛ ni yɔɔ naakpɛɛ lɛ mli. No hewɔ lɛ amɛhe fee oya koni amɛyana osɔfoi lɛ, eyɛ mli akɛ atsako amɛ po. Beni amɛnyiɛ gbɛ kɛyaa lɛ, awo hemɔkɛyeli ni amɛyɔɔ yɛ Yesu mli lɛ he nyɔmɔ. Amɛje shishi amɛna ni amɛnu he akɛ amɛna hewalɛ ekoŋŋ!

Kpitiyelɔi ni aha amɛhe etse lɛ ateŋ mɛi nɛɛhu tsa nɔ amɛtee, shi kpitiyelɔ kroko lɛ, ni eji Samarianyo lɛ ku esɛɛ ni ebatao Yesu. Mɛni hewɔ? Ejaakɛ ehiɛ esɔ nɔ ni eba enɔ lɛ waa diɛŋtsɛ. Ekɛ gbee ni wa jie Nyɔŋmɔ yi, ni beni ena Yesu lɛ, eho egbee enaji anaa, ni eda lɛ shi.

Yesu kɛɛ lɛ yɛ hetoohamɔ mli akɛ: “Ani jeee mɛi nyɔŋma he ta lɛ? Shi mɛi nɛɛhu lɛ, nɛgbɛ amɛyɔɔ? Aso anaaa amɛteŋ mɔ kome ni kuɔ esɛɛ ekɛ anunyam bahaa Nyɔŋmɔ, akɛ ja maŋsɛɛnyo nɛɛ?”

Kɛkɛ ni ekɛɛ nuu ni ji Samarianyo nɛɛ akɛ: “Tee shi ni oya; ohemɔkɛyeli etsao!”

Kɛ wɔkane bɔ ni Yesu tsa kpitiyelɔi nyɔŋma lɛ he sane lɛ, esa akɛ wɔha nikasemɔ ni yɔɔ esanebimɔ lɛ mli lɛ ahi wɔtsui mli: “Shi mɛi nɛɛhu lɛ, nɛgbɛ amɛyɔɔ?” Hiɛsɔɔ ni mɛi nɛɛhu lɛ ejieee lɛ kpo lɛ ji tɔmɔ ni hiɛdɔɔ yɔɔ mli. Ani wɔɔtsɔɔ hiɛsɔɔ yɛ nibii ni wɔnine shɛɔ nɔ kɛjɛɔ Nyɔŋmɔ ŋɔɔ, ni naanɔ wala he shiwoo ni baaba mli lɛlɛŋ yɛ Nyɔŋmɔ jeŋ hee lɛ mli lɛ fata he lɛ he, tamɔ bɔ ni Samarianyo lɛ fee lɛ? Yohane 11:54, 55; Luka 17:11-19; 3 Mose 13:16, 17, 45, 46; Kpojiemɔ 21:3, 4.

▪ Mɛɛ gbɛ nɔ Yesu fite mɔdɛŋ ni mɛi bɔ ni amɛgbe lɛ lɛ?

▪ Nɛgbɛ Yesu fa gbɛ kɛtee agbɛnɛ, ni nɛgbɛ eyaa?

▪ Mɛni hewɔ kpitiyelɔi lɛ damɔ sɛɛ shɔŋŋ lɛ, ni mɛni hewɔ Yesu kɛɛ amɛya osɔfoi lɛ aŋɔɔ lɛ?

▪ Mɛni esa akɛ wɔkase kɛjɛ niiashikpamɔ nɛɛ mli?