Yitso 93

Beni Aaajie Gbɔmɔ Bi lɛ Kpo Lɛ

BENI Yesu yɔɔ kooyigbɛ lolo (yɛ Samaria loo Galilea) lɛ, Farisifoi lɛ bi lɛ beni Maŋtsɛyeli lɛ baaba lɛ he sane. Amɛheɔ amɛyeɔ akɛ ebaaba kɛ agbojee yɛ gbɛ ni yɔɔ fɛo nɔ, shi Yesu kɛɛ: “Nyɔŋmɔ maŋtsɛyeli lɛ baaa tamɔ nɔ ko ni anaa; ni asaŋ amɛkɛŋ akɛ: ‘Naa, eyɛ biɛ!’ aloo: ‘Naa, eyɛ jɛi!’ Ejaakɛ naa, Nyɔŋmɔ maŋtsɛyeli lɛ yɛ nyɛteŋ.”

Yɛ bei komɛi amli lɛ atsɔɔ Yesu wiemɔi ni ewie akɛ “eyɛ nyɛteŋ” lɛ shishi akɛ “nyɛmli eyɔɔ.” No hewɔ lɛ mɛi komɛi susuɔ akɛ Yesu miitsɔɔ akɛ Nyɔŋmɔ Maŋtsɛyeli lɛ miiye nɔ yɛ Nyɔŋmɔ tsuji lɛ atsuii amli. Shi, eka shi faŋŋ akɛ, Nyɔŋmɔ Maŋtsɛyeli lɛ bɛ Farisifoi ni heee yeee ni Yesu kɛ amɛ wieɔ lɛ atsuii amli. Shi kɛlɛ, akɛni Nyɔŋmɔ Maŋtsɛyeli lɛ nɔ Maŋtsɛ ni awo lɛ, Yesu Kristo yɛ amɛteŋ diɛŋtsɛ hewɔ lɛ, eyɛ amɛteŋ.

Ekolɛ ni Farisifoi lɛ shi jɛmɛ lɛ sɛɛ ni Yesu kɛ ekaselɔi lɛ wie Maŋtsɛyeli lɛ baa lɛ he babaoo. Nɔ ni yɔɔ ejwɛŋmɔ mli titri ji ba ni eeeba wɔsɛɛ yɛ Maŋtsɛyeli hewalɛ mli lɛ, hewɔ lɛ ebɔ kɔkɔ akɛ: “Ni amɛaakɛɛ nyɛ akɛ: ‘Naa, eyɛ biɛ!’ aloo: ‘Naa, eyɛ jɛi!’ nyɛkayaa ni nyɛkanyiɛa [nɛkɛ amale Mesiai nɛɛ] sɛɛ. Ejaakɛ taakɛ bɔ ni sarawa gbaa ni ehaa ŋwɛi shishi afa kome tseɔ kɛyaa ŋwɛi afa kroko lɛ, nakai gbɔmɔ Bi lɛ baatamɔ yɛ egbi lɛ nɔ.” No hewɔ lɛ, Yesu miitsɔɔ akɛ, mɛi fɛɛ ni taoɔ ni amɛna ba ni eba yɛ Maŋtsɛyeli hewalɛ mli lɛ he odaseyeli lɛ baana faŋŋ tamɔ bɔ ni anaa sarawa gbamɔ kɛyaa shɔŋŋ lɛ.

Kɛkɛ ni agbɛnɛ Yesu kɛ nibii ni ba yɛ blema lɛ to he ni etsɔɔ bɔ ni gbɔmɛi baafee amɛnii yɛ be mli ni eba yɛ wɔsɛɛ lɛ. Etsɔɔ mli akɛ: “Ni bɔ ni ba mli yɛ Noa gbii lɛ amli lɛ, nakai nɔŋŋ baaba yɛ gbɔmɔ Bi lɛ gbii lɛ amli hu; . . . Asaŋ bɔ ni ba mli yɛ Lot gbii lɛ amli hu lɛ; amɛmiiyeyee nii, amɛmiinunui dãi, amɛmiihehei, amɛmiihɔɔhɔi nii, amɛmiitɛo tsei ni amɛmiimamɔ tsui; shi gbi nɔ ni Lot je Sodom lɛ, Nyɔŋmɔ nɛ la kɛ swɔɔ kɛjɛ ŋwɛi, ni ekpata amɛ fɛɛ kwa amɛhiɛ. Nakai nɔŋŋ kɛ̃ baaba gbi ni aaajie gbɔmɔ Bi lɛ kpo lɛ.”

Yesu ekɛɛɛ akɛ akpata gbɔmɛi ni hi shi yɛ Noa kɛ Lot gbii lɛ amli lɛ ahiɛ yɛ amɛhe ni amɛkɛwo daa gbi shihilɛ mli nifeemɔi tamɔ, niyeli, ninumɔ, nihemɔ, nihɔɔmɔ, nidumɔ kɛ tsumaa mli lɛ hewɔ. Noa kɛ Lot kɛ amɛwekui lɛ po fee nibii nɛɛ fɛɛ eko. Shi mɛi ni eshwɛ lɛ kɛ amɛhe wo daa gbi shihilɛ mli nifeemɔi nɛɛ amli ni amɛjwɛŋmɔ bɛ Nyɔŋmɔ suɔmɔnaa nifeemɔ nɔ, ni enɛ hewɔ ni akpata amɛhiɛ lɛ. Ni abaakpata gbɔmɛi lɛ ahiɛ yɛ amanehulu kpeteŋkpele ni baaba nibii agbɛjianɔtoo nɛɛ nɔ lɛ mli yɛ be mli ni aaajie Kristo kpo lɛ, yɛ yiŋtoo ni tamɔ enɛ nɔŋŋ hewɔ.

Yɛ be mli ni emaa bɔ ni ehe hiaa ni atsu odaseyeli ni tsɔɔ ba ni eba yɛ Maŋtsɛyeli hewalɛ mli lɛ he nii oya lɛ nɔ mi lɛ, Yesu kɛfata he akɛ: “Nakai gbi lɛ nɔ lɛ, mɔ ni yɔɔ tsu yiteŋ ni enii yɔɔ shia lɛ, ekakpeleke shi ebakɔlɔ, ni mɔ ni yɔɔ ŋmɔshi hu ekaku esɛɛ kɛmiiba shia. Nyɛkaia Lot ŋa lɛ.”

Beni ba ni Kristo eba lɛ he odaseyeli aaaje kpo lɛ, gbɔmɛi nyɛŋ amɛha bɔ ni amɛkɛ amɛhe ekpɛtɛ amɛheloonaa nii ahe lɛ atsi amɛnaa ni amɛkatsu he nii oya. Beni Lot ŋa lɛ shi Sodom kɛyaa lɛ, ekwɛ esɛɛ yɛ bɔ ni esumɔɔ nibii ni eshi yɛ sɛɛ lɛ hewɔ, ni etsɔ ŋoo kpɔ.

Yɛ be mli ni eyaa nɔ etsɔɔ shihilɛ ni baaba yɛ be mli ni eeeba yɛ wɔsɛɛ lɛ, Yesu kɛɛ ekaselɔi lɛ akɛ: “Nakai nyɔɔŋ lɛŋ lɛ, mɛi enyɔ aaakamɔ saa kome nɔ: aaaŋɔ mɔ kome, ni aaashi mɔ kome. Yei enyɔ aaawiɛ yɛ he kome: aaaŋɔ mɔ kome, ni aaashi mɔ kome.”

Ni aaaŋɔ mɔ ko lɛ kɛ bɔ ni Noa kɛ eweku lɛ fɛɛ bote adeka lɛ mli ni bɔfoi lɛ kɛ Lot kɛ eweku lɛ shi Sodom lɛ kpaa gbee pɛpɛɛpɛ. Etsɔɔ yiwalaheremɔ. Shi yɛ gbɛ kroko nɔ lɛ, ni aaashi mɔ ko lɛ tsɔɔ hiɛkpatamɔ.

Yɛ enɛ hewɔ lɛ, kaselɔi lɛ bi akɛ: “Nuŋtsɔ, nɛgbɛ?”

Yesu ha hetoo akɛ: “He ni gbonyo ka lɛ, jɛi okropɔŋi buaa amɛhe naa yɛ.” Mɛi ni “aaaŋɔ” amɛ lɛ tamɔ okropɔŋi ni naa nii kɛshɛɔ shɔŋŋ ejaakɛ amɛbuaa amɛhe naa yɛ “gbonyo” lɛ he. Gbɔmɔtso ni awieɔ he lɛ kɔɔ be mli ni anɔkwa Kristo lɛ eba yɛ Maŋtsɛyeli hewalɛ mli ni anaaa lɛ lɛ kɛ mumɔŋ okpɔlɔŋmɛɛ ni Yehowa kɛhaa lɛ he. Luka 17:20-37; 1 Mose 19:26.

▪ Mɛɛ gbɛ nɔ Maŋtsɛyeli lɛ yɔɔ Farisifoi lɛ ateŋ yɛ?

▪ Mɛɛ gbɛ nɔ ba ni Kristo eba lɛ tamɔ sarawa gbamɔ yɛ?

▪ Mɛni hewɔ abaakpata gbɔmɛi lɛ ahiɛ yɛ nibii ni amɛfeɔ yɛ be mli ni Kristo eba lɛ hewɔ lɛ?

▪ Ni aaaŋɔ mɔ ko kɛya kɛ ni aaashi mɔ ko yɛ sɛɛ lɛ tsɔɔ mɛni.