Yitso 100

Benai lɛ Ahe Abɛbua Lɛ

EKOLƐ Yesu yɛ Zakeo shia lɛ lolo, yɛ he ni ewa yɛ beni enyiɛ gbɛ kɛyaa Yerusalem lɛ. Ekaselɔi lɛ heɔ yeɔ akɛ kɛji amɛshɛ Yerusalem lɛ, ebaajaje akɛ lɛ ji Mesia lɛ ni ebaato e-Maŋtsɛyeli lɛ shishi. No hewɔ lɛ Yesu kɛ abɛbua nɛɛ ha koni ekɛjaje nɛkɛ jwɛŋmɔ nɛɛ ni ekɛtsɔɔ hu akɛ Maŋtsɛyeli lɛ baa lɛ yɛ sɛɛ shɔŋŋ.

Egba amɛ akɛ: “Ablade ko dom etee maŋsɛɛ shɔŋŋ, ni eyaŋɔ emaŋtsɛyeli, ni eku esɛɛ eba.” Yesu ji “ablade” lɛ, ni ŋwɛi ji “maŋsɛɛ shɔŋŋ” lɛ. Kɛ Yesu yashɛ jɛmɛ lɛ, e-Tsɛ kɛ maŋtsɛyeli hewalɛ baaha lɛ.

Shi kɛlɛ, dani ablade lɛ baashi kɛya lɛ, etsɛ etsuji nyɔŋma kɛba ni eha amɛteŋ mɔ fɛɛ mɔ jwiɛtɛi bena, ni ekɛɛ amɛ akɛ: “Nyɛtsɔmɔa he kɛyashi maba.” Kɛjɛ eshishijee mlibaa mli lɛ, tsuji nyɔŋma lɛ damɔ shi kɛha Yesu mra be mli kaselɔi lɛ. Shi kɛ alɛɛ eshishinumɔ lɛ mli lɛ, efeɔ mɛi fɛɛ ni kɛ lɛ baafee gboshiniyelɔi wɔsɛɛ yɛ eŋwɛi Maŋtsɛyeli lɛ mli lɛ ahe mfoniri.

Jwiɛtɛi benai ji shika ni jara wa waa, ni eko fɛɛ eko shɛɔ mɔ ko ni tsuɔ okwaayeli nitsumɔ lɛ nyɔji etɛ nyɔmɔwoo. Shi mɛni benai lɛ damɔ shi kɛha? Ni mɛɛ nitsumɔ esa akɛ tsuji lɛ kɛtsu?

Benai lɛ damɔ shi kɛha nibii ni jara wawai ni kaselɔi ni akɛ mumɔ efɔ amɛ lɛ baanyɛ amɛkɛtsu nii bɔni afee ni amɛkɛna ŋwɛi Maŋtsɛyeli lɛ niyelɔi babaoo kɛyashi beyinɔ ni Yesu aaaba akɛ Maŋtsɛ yɛ Maŋtsɛyeli ni awo shi yɛ he lɛ mli. Beni atee lɛ shi kɛjɛ gbohii ateŋ ni ejie ehe kpo etsɔɔ kaselɔi lɛ sɛɛ lɛ, ekɛ mfonirifeemɔŋ benai lɛ ha amɛ koni amɛkɛfee mɛi pii kaselɔi koni amɛtsɔ no nɔ amɛkɛ mɛi pii abafata ŋwɛi Maŋtsɛyeli kuu lɛ mlibii lɛ ahe.

Yesu tee nɔ akɛ: “Shi emaŋbii lɛ nyɛ [ablade] lɛ, ni amɛtsu bɔfoi kɛtiu lɛ akɛ: ‘Wɔsumɔɔɔ ni mɔ nɛ abaye wɔnɔ maŋtsɛ.’ ” Maŋbii lɛ ji Israelbii lɛ, aloo Yudafoi lɛ, shi kaselɔi lɛ fataaa he. Beni Yesu etee ŋwɛi sɛɛ lɛ, nɛkɛ Yudafoi nɛɛ wa ekaselɔi lɛ ayi ni amɛkɛtsɔɔ akɛ amɛsumɔɔɔ ni ebaye amɛnɔ maŋtsɛ. Yɛ nɛkɛ gbɛ nɔ lɛ amɛmiifee amɛnii tamɔ maŋbii ni tsu bɔfoi lɛ kɛtee lɛ.

Te tsuji nyɔŋma lɛ tsu amɛbenai lɛ ahe nii amɛha tɛŋŋ? Yesu tsɔɔ mli akɛ: “Ni eba mli akɛ, beni enine eyashɛ maŋtsɛyeli lɛ nɔ ni eku esɛɛ eba lɛ, efa akɛ atsɛ nakai tsuji lɛ ni eŋɔ shika lɛ eha amɛ lɛ kɛba, koni ena mɔ ni ena nɔ ko yɛ hetsɔmɔ lɛ mli. Ni klɛŋklɛŋ mɔ lɛ ba ni ebakɛɛ: ‘Nuŋtsɔ, obena lɛ efɔ benai nyɔŋma ewoŋ.’ Ni lɛ hu ekɛɛ lɛ akɛ: ‘Aekoo! tsulɔ kpakpa, akɛni oye anɔkwa yɛ nɔ ko bibioo kwraa mli hewɔ lɛ, ye maji nyɔŋma nɔ.’ Ni mɔ ni ji enyɔ lɛ ba ebakɛɛ: ‘Nuŋtsɔ, obena lɛ efɔ benai enumɔ ewoŋ.’ Ni lɛ hu ekɛɛ lɛ akɛ: ‘Bo hu ye maji enumɔ nɔ.’ ”

Tsulɔ ni na benai nyɔŋma lɛ feɔ kuu, aloo kaselɔi akuu ni je shishi kɛjɛ Pentekoste yɛ afi 33 Ŋ.B. kɛbashi amrɔ nɛɛ ni bɔfoi lɛ hu fata he lɛ ahe mfoniri. Tsulɔ ni na benai enumɔ lɛ hu damɔ shi kɛha kuu ko ni hi shi yɛ nakai be lɛ nɔŋŋ mli, ni amɛha maŋtsɛ lɛ nibii lɛ fa babaoo yɛ shikpɔŋ nɔ yɛ bɔ ni amɛ hegbɛi kɛ nyɛmɔi lɛ yɔɔ lɛ naa lɛ. Kui enyɔ lɛ fɛɛ kɛ ekaa shiɛɔ sanekpakpa lɛ, ni nɔ ni jɛɔ mli baa ji, mɛi babaoo ni hiɛ tsui krɔŋŋ lɛ batsɔmɔɔ Kristofoi. Tsuji lɛ ateŋ mɛi nɛɛhu kɛyatsu nitsumɔ kpakpa ni amɛha amɛnibii lɛ fa babaoo.

Yesu tee nɔ akɛ: “Ni mɔ kroko hu ba ebakɛɛ: ‘Nuŋtsɔ, naa, obena lɛ ni mifi miwo papam mli lɛ nɛ; miyasheo gbeyei, ejaakɛ yiwalɔ jio, okɔɔ nɔ ni oŋɔfɔko shi, ni okpaa nɔ ni oduko.’ Shi ekɛɛ lɛ akɛ: ‘Tsulɔ fɔŋ, bo diɛŋtsɛ odaaŋ wiemɔ maŋɔkojoo! Aso ni ole akɛ yiwalɔ ji mi: mikɔɔ nɔ ni miŋɔfɔko shi, ni mikpaa nɔ ni miduko lɛ, mɛɛ hewɔ mɔ ni okɛ mishika lɛ eyahaaa tsakelɔi lɛ, koni, kɛ miba lɛ, mi mibahe minii kɛ hekpa?’ Ni ekɛɛ mɛi ni damɔ emasɛi lɛ akɛ: ‘Nyɛshɔa bena lɛ yɛ edɛŋ, ni nyɛŋɔhaa mɔ ni yɔɔ benai nyɔŋma lɛ.’ ”

Kɛha tsulɔ fɔŋ lɛ, mfonirifeemɔŋ bena ni je edɛŋ lɛ tsɔɔ akɛ enaŋ hegbɛ yɛ ŋwɛi Maŋtsɛyeli lɛ mli. Hɛɛ, elaajeɔ emaŋtsɛyeli hegbɛ lɛ, taakɛ eji lɛ, yɛ maji nyɔŋma loo maji enumɔ nɔ. Kadimɔ hu akɛ, jeee efɔŋ ko ni efee hewɔ ni atsɛ tsulɔ lɛ akɛ tsulɔ fɔŋ lɛ, shi moŋ akɛni etsuuu nii koni enuŋtsɔ lɛ maŋtsɛyeli lɛ he nibii lɛ afa lɛ hewɔ.

Beni akɛ tsulɔ fɔŋ lɛ bena lɛ ha klɛŋklɛŋ tsulɔ lɛ, mɛi lɛ wie amɛshi akɛ: “Nuŋtsɔ, eyɛ benai nyɔŋma!” Shi kɛlɛ, Yesu ha amɛ hetoo akɛ: “Shi miikɛɛ nyɛ akɛ, mɔ fɛɛ mɔ ni yɔɔ nɔ ko lɛ, lɛ nɔŋŋ aaaha; shi mɔ ni bɛ nɔ ko lɛ, nɔ ni eyɔɔ lɛ tete aaashɔ yɛ edɛŋ. Shi nakai mihenyɛlɔi lɛ ni sumɔɔɔ akɛ miye amɛnɔ maŋtsɛ lɛ, nyɛkɛ amɛ abaa biɛ ni nyɛbagbea amɛ yɛ mihiɛ nɛɛ.” Luka 19:11-27; Mateo 28:19, 20.

▪ Mɛni ha Yesu kɛ benai lɛ he abɛbua lɛ ha lɛ?

▪ Namɔ ji ablade lɛ, ni nɛgbɛ ji maŋsɛɛ he ni efa gbɛ kɛtee lɛ?

▪ Namɛi ji tsuji lɛ, ni benai lɛ damɔ shi kɛha mɛni?

▪ Namɛi ji maŋbii lɛ, ni mɛɛ gbɛ nɔ amɛtsɔɔ yɛ akɛ amɛnyɛɔ lɛ?

▪ Mɛni hewɔ ni tsuji lɛ ateŋ mɔ kome ji tsulɔ fɔŋ lɛ, ni bena ni je edɛŋ lɛ tsɔɔ mɛni?