Yitso 102

Yerusalem ni Kristo Bote yɛ Kunimyeli Mli

ENƆ jetsɛremɔ Hɔgbaa, ni ji Nisan 9 lɛ, Yesu kɛ ekaselɔi lɛ shi Betania ni amɛyi mli kɛtsɔ Mu Gɔŋ lɛ nɔ gbɛ kɛmiiya Yerusalem. Be fioo sɛɛ lɛ, amɛbɛŋkɛ Betfage, yɛ Mu Gɔŋ lɛ nɔ. Ni Yesu fa ekaselɔi lɛ ateŋ mɛi enyɔ akɛ:

“Nyɛyaa akrowa ni yɔɔ nyɛhiɛ lɛ mli, ni amrɔ lɛ nyɛaana tejiyoo ni aŋmɔ lɛ kɛ ebi; nyɛfɛnea amɛ nyɛbahaa mi. Ni kɛ mɔ ko bi nyɛ sane ko lɛ, nyɛkɛa lɛ akɛ: ‘Amɛhe miihia Nuŋtsɔ lɛ;’ ni amrɔ lɛ eeha nyɛkɛ amɛ aba.”

Eyɛ mli akɛ kɛjɛ shishijee lɛ kaselɔi lɛ yooo akɛ nɛkɛ famɔi nɛɛ kɛ Biblia gbalɛi amlibaa kpaa gbee moŋ, shi yɛ sɛɛ mli lɛ amɛna akɛ nakai eji. Gbalɔ Zakaria gba efɔ shi akɛ Nyɔŋmɔ Maŋtsɛ ni ewo shi yɛ ehe lɛ baata teji nɔ kɛbote Yerusalem hɛɛ, “teji obalanyo ni ji tejiyoo bi ko nɔ.” Nakai nɔŋŋ hu Maŋtsɛ Salomo ta teji nɔ yɛ be mli ni ayaafɔ lɛ mu lɛ.

Beni kaselɔi lɛ bote Betfage ni amɛyafɛne teji bi lɛ kɛ enyɛ lɛ, mɛi ni damɔ shi amɛkwɛɔ lɛ ateŋ mɛi komɛi kɛɛ: “Mɛni nyɛfɛneɔ tejibi lɛ nyɛyafee?” Shi beni amɛkɛɛ amɛ akɛ amɛkɛ kooloi lɛ yaaha Nuŋtsɔ lɛ, mɛi lɛ ŋmɛ kaselɔi lɛ agbɛ ni amɛkɛyaha Yesu. Ni kaselɔi lɛ kɛ amɛ atadei lɛ ha tejiyoo lɛ kɛ ebi lɛ nɔ, shi Yesu ta teji bi lɛ nɔ.

Beni Yesu ta enɔ kɛboteɔ Yerusalem lɛ, mɛi lɛ ayi bafa babaoo. Mɛi pii kɛ amɛmamai ha shikpɔŋ yɛ gbɛ lɛ nɔ, ni mɛi krokomɛi hu kumɔ tsei aniji ni amɛkɛshwie gbɛ lɛ nɔ. Amɛbolɔ akɛ: “Ajɔɔ Maŋtsɛ ni baa yɛ Nuŋtsɔ [Yehowa] lɛ gbɛi anɔ lɛ! Hejɔlɛ yɛ ŋwɛi, ni anunyam yɛ ŋwɛi flooflo!”

Farisifoi komɛi ni yɔɔ mɛi lɛ ateŋ lɛ amli fu yɛ wiemɔi nɛɛ ahewɔ ni amɛkɛɛ Yesu akɛ: “Tsɔɔlɔ, ka okaselɔi lɛ.” Shi Yesu ha amɛ hetoo akɛ: “Miikɛɛ nyɛ akɛ, kɛji mɛnɛɛmɛi aaabu amɛnaa lɛ, tɛi aaabolɔ.”

Beni Yesu bɛŋkɛɔ Yerusalem lɛ, ena maŋ lɛ ni efo eshwie enɔ ni ekɛɛ: “Eji yɛ ogbi nɛɛ nɔ lɛ, ona ole nii ni hi ha ohejɔlɛ lɛ, kulɛ saŋŋ! Shi agbɛnɛ aŋɔteeo.” Akɛni Yerusalem je gbɛ egbo toi hewɔ lɛ, esa akɛ ewo enɛ he nyɔmɔ, taakɛ Yesu gba lɛ:

“Ni ohenyɛlɔi [Romabii ni yɔɔ Tatsɛ Tito shishi] lɛ aaatsa bu awo ohe, ni amɛaabɔleo kpula ni amɛaasa oyi yɛ he fɛɛ he, ni amɛaaŋɔo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli.” Nɛkɛ Yerusalem hiɛkpatamɔ ni Yesu gba he sane efɔ shi nɛɛ ba mli lɛlɛŋ yɛ afii 37 sɛɛ, yɛ afi 70 Ŋ.B. mli.

Otsii fioo pɛ ni etsɔ hiɛ lɛ mli lɛ, mɛi pii ni fata asafoi pii lɛ ahe lɛ na beni Yesu tee Lazaro shi kɛjɛ gbohii ateŋ lɛ. Agbɛnɛ amɛmiigba mɛi krokomɛi naakpɛɛ nii nɛɛ lolo. No hewɔ lɛ beni Yesu bote Yerusalem lɛ, no mli lɛ maŋ muu lɛŋ fɛɛ efee hoo. Mɛi komɛi miitao ni amɛle akɛ: “Namɔ nɛ?” Ni asafoi babaoo lɛ tee nɔ amɛhere nɔ akɛ: “Mɔ nɛ ji Yesu, gbalɔ lɛ ni jɛ Nazaret yɛ Galilea lɛ.” Ni Farisifoi lɛ na nɔ ni yaa nɔ lɛ, amɛye ŋkɔmɔ waa akɛ amɛyeee omanye ko kwraa, ejaakɛ taakɛ bɔ ni amɛkɛɛ lɛ: “Je lɛ efa kɛnyiɛ esɛɛ lɛ.”

Taakɛ efɔɔ feemɔ be fɛɛ be ni eyaa Yerusalem lɛ, Yesu tee sɔlemɔ we lɛ koni eyaatsɔɔ nii. Jɛmɛ ji he ni shwilafoi lɛ kɛ akpakei lɛ baa eŋɔɔ yɛ, ni etsaa amɛ! Beni osɔfonukpai lɛ kɛ woloŋmalɔi lɛ na naakpɛɛ nii ni Yesu feɔ ni amɛnu ni gbekɛbii ni yɔɔ sɔlemɔ we lɛ miibolɔ akɛ: “Hosiana, David bi lɛ!” amɛmli wo la waa. Amɛwie amɛshi lɛ akɛ: “Oonu nɔ ni mɛnɛɛmɛi kɛɔ nɛɛ lo?”

Yesu ha hetoo akɛ: “Hɛɛ, ani nyɛkaneko dã akɛ: ‘Abifabii kɛ fufɔbii anaa ni osaa yijiemɔ oto yɛ?’ ”

Yesu tee nɔ ni etsɔɔ nii lolo, ni ekwɛ nibii fɛɛ ni yɔɔ sɔlemɔ we lɛ mli lɛ kɛkpe. Etsɛɛɛ ni je na. No hewɔ lɛ, ekɛ mɛi 12 lɛ shi jɛmɛ, ni amɛku amɛsɛɛ amɛfa gbɛ aaafee shitoi enyɔ loo nɔ ekoŋŋ kɛtee Betania. Jɛmɛ eyaye Hɔgbaa gbɛkɛ lɛ yɛ, ekolɛ yɛ enaanyo Lazaro shia lɛ. Mateo 21:1-11, 14-17; Marko 11:1-11; Luka 19:29-44; Yohane 12:12-19; Zakaria 9:9.

▪ Mɛɛ be ni yɛ mɛɛ gbɛ nɔ Yesu bote Yerusalem akɛ Maŋtsɛ lɛ?

▪ Te bɔ ni gbɔmɛi asafoi babaoo lɛ jie Yesu yi amɛha lɛ he hiaa ha tɛŋŋ?

▪ Te Yesu nu he eha tɛŋŋ beni ena Yerusalem lɛ, ni mɛɛ gbalɛ egba efɔ shi?

▪ Mɛni ba yɛ be mli ni Yesu tee sɔlemɔ we lɛ?