Nyɔŋmɔ kɛ Kaisare

“Belɛ nyɛŋɔa Kaisare nii nyɛhaa Kaisare; shi Nyɔŋmɔ nii lɛ nyɛŋɔhaa Nyɔŋmɔ.”—LUKA 20:25.

 1. (a) Mɛni ji Yehowa gbɛhe ni awo nɔ gojoo lɛ? (b) Mɛni esa akɛ wɔkɛha Yehowa ni wɔnyɛŋ wɔkɛha Kaisare kɔkɔɔkɔ?

BENI Yesu Kristo kɛ nakai famɔ lɛ ha lɛ, no mli lɛ ŋwanejee ko bɛ ejwɛŋmɔ mli yɛ Nyɔŋmɔ taomɔ nii kɛha E-tsuji ni baa klɛŋklɛŋ kɛtsɔɔ nɔ ni ekolɛ Kaisare, loo Maŋ lɛ baabi yɛ amɛdɛŋ lɛ hiɛ lɛ he. Yesu nuɔ bɔ ni lalatsɛ lɛ sɔlemɔ ni esɔle eha Yehowa nɛɛ ji anɔkwale ha lɛ shishi jogbaŋŋ fe mɔ fɛɛ mɔ, akɛ: “Omaŋtsɛyeli lɛ, naanɔ maŋtsɛyeli ni, ni olumɔyeli [nɔyeli]a lɛ hiɔ shi kɛyaa yinɔi fɛɛ nɔ.” (Lala 145:13) Beni Abonsam kɛɛ ekɛ shikpɔŋ ni ayɔɔ nɔ nɛɛ fɛɛ nɔ maŋtsɛyelii lɛ anɔ hewalɛ baaha Yesu lɛ, Yesu ha lɛ hetoo akɛ: “Aŋma akɛ: ‘Nuntsɔ [Yehowa] o-Nyɔŋmɔ lɛ oja, ni lɛ kɛkɛ osɔmɔ!’ ” (Luka 4:5-8) Anyɛŋ akɛ jamɔ aha “Kaisare” kɔkɔɔkɔ, ekɔɔɔ he eko akɛ Kaisare ji Roma maŋtsɛ wulu lɛ, loo adesa nɔyelɔ kroko, loo Maŋ lɛ diɛŋtsɛ.

 2. (a) Mɛni ji Satan gbɛhe kɛji akɛ lɛ miito je nɛɛ he? (b) Namɔ gbɛŋmɛɛ naa Satan kɛyɔɔ nɛkɛ gbɛhe nɛɛ mli?

² Yesu ejeee he ŋwane akɛ je lɛŋ maŋtsɛyelii lɛ, Satan nɔ ni. Sɛɛ mli lɛ, etsɛ Satan akɛ “je nɛŋ lumɔ lɛ.” (Yohane 12:31; 16:11) Kɛbaa Ŋ.B. klɛŋklɛŋ afii oha lɛ naagbee gbɛ lɛ, bɔfo Yohane ŋma akɛ: “Wɔle akɛ wɔjɛ Nyɔŋmɔ mli, ni jeŋ muu lɛ fɛ kã mɔ fɔŋ lɛ mli.” (1 Yohane 5:19) Enɛ etsɔɔɔ akɛ Yehowa eŋmɛɛ emaŋtsɛ ni eyeɔ yɛ shikpɔŋ lɛ fɛɛ nɔ lɛ he. Kaimɔ akɛ, beni Satan kɛ maŋkwramɔŋ maŋtsɛyelii lɛ anɔyeli hegbɛ haa Yesu lɛ, ekɛɛ lɛ akɛ: “Bo maŋɔ nɛkɛ hegbɛ nɛɛ fɛɛ . . . maha; ejaakɛ mi aŋɔha.” (Luka 4:6) Satan yeɔ je lɛŋ maŋtsɛyelii lɛ anɔ, yɛ Nyɔŋmɔ gbɛŋmɛɛ pɛ hewɔ.

 3. (a) Mɛɛ gbɛhe jeŋmaji lɛ anɔyelii lɛ hiɛ yɛ Yehowa hiɛ? (b) Wɔbaanyɛ wɔkɛɛ akɛ wɔhe shi ni wɔɔba wɔha je nɛŋ nɔyelii lɛ etsɔɔɔ akɛ wɔmiiba wɔhe shi wɔmiiha Satan, mɔ ni ji je nɛŋ nyɔŋmɔ lɛ yɛ mɛɛ gbɛ nɔ?

³ Nakai nɔŋŋ hu Maŋ lɛ kɛ enɔyeli hewalɛ lɛ tsuɔ nii, yɛ gbɛ ni Nyɔŋmɔ ni ji Nɔyelɔ kɛ Maŋtsɛ lɛ eŋmɛ lɛ lɛ pɛ hewɔ. (Yohane 19:11) Enɛ hewɔ lɛ, abaanyɛ awie akɛ “hegbɛi ni yeɔ nɔ lɛ, Nyɔŋmɔ to.” Kɛ akɛmiito Yehowa maŋtsɛyeli hegbɛ ni nɔ kwɔ fe fɛɛ lɛ he lɛ, amɛnɔ lɛ feɔ nɔyeli hegbɛ ni baa shi kwraa. Shi kɛlɛ, “Nyɔŋmɔ sɔɔlɔ” ji amɛ, “Nyɔŋmɔ tsuji,” ejaakɛ amɛkɛ sɔɔmɔ ni he hiaa haa, amɛhaa mla kɛ gbɛjianɔtoo kpakpa hiɔ shi, ni amɛgbalaa efɔŋ feelɔi atoi. (Romabii 13:1, 4, 6) No hewɔ lɛ, ehe miihia ni Kristofoi anu shishi akɛ, eyɛ mli akɛ Satan ji jeŋ, loo gbɛjianɔtoo nɛɛ nɔyelɔ ni anaaa lɛ moŋ, shi kɛji amɛkpɛlɛ amɛhe shi ni amɛaaba amɛha Maŋ lɛ kɛyashi he ko lɛ nɔ lɛ, no etsɔɔɔ akɛ amɛmiiba amɛhe shi amɛmiiha lɛ. Amɛmiifee toiboo amɛmiiha Nyɔŋmɔ. Yɛ afi 1996 nɛɛ mli lɛ, maŋkwramɔ Maŋ lɛ kã he eji “Nyɔŋmɔ gbɛjianɔtoo,” ni ji be kukuoo mli gbɛjianɔtoo ni Nyɔŋmɔ eŋmɛ gbɛ akɛ ehi shi lɛ fã, ni esa akɛ Yehowa tsuji ni yɔɔ shikpɔŋ nɔ lɛ akpɛlɛ nɔ nakai.—Romabii 13:2.

Yehowa Tsuji ni Hi Shi Blema lɛ kɛ Maŋ Lɛ

 4. Mɛni hewɔ Yehowa ŋmɛ gbɛ ni Yosef batsɔ mɔ ni hiɛ gbɛhe ni nɔ kwɔ yɛ Mizraim nɔyeli lɛ mli lɛ?

⁴ Yehowa ŋmɛ etsuji ni hi shi kɛtsɔ Kristofoi abe lɛ hiɛ lɛ ateŋ mɛi komɛi agbɛ ni amɛhi gbɛhei ni nɔ kwɔlɔ mli yɛ Maŋ nɔyelii amli. Akɛ nɔkwɛmɔ nɔ lɛ, yɛ afii ohai 18 D.Ŋ.B. lɛ, Yosef batsɔ Mizraim maŋsɔɔlɔ nukpa, ni Farao ni yeɔ nɔ yɛ nakai beaŋ lɛ pɛ ji mɔ ni nɔ kwɔ fe lɛ. (1 Mose 41:39-43) Nibii ni nyiɛ sɛɛ kɛba lɛ ha eje kpo faŋŋ akɛ, Yehowa ha enɛ ba lɛ nakai bɔni afee ni Yosef anyɛ atsu nii akɛ dɛŋdade kɛha ‘Abraham seshi,’ ni ji eshwiei ayibaamɔ, kɛha E-yiŋtoi ahe nitsumɔ. Shi kɛlɛ, esa akɛ wɔha ehi wɔjwɛŋmɔ mli akɛ, ahɔ̃ɔ Yosef kɛtee nyɔŋyeli mli yɛ Mizraim, ni ehi shi yɛ be mli ni Nyɔŋmɔ tsuji bɛ Mose Mla lɛ loo “Kristo mla lɛ.”—1 Mose 15:5-7; 50:19-21; Galatabii 6:2.

 5. Mɛni hewɔ afã Yudafoi nomii lɛ akɛ ‘amɛtao toiŋjɔlɛ’ amɛha Babilon lɛ?

⁵ Afii ohai abɔ sɛɛ lɛ, Yehowa kɛ mumɔ tsirɛ gbalɔ anɔkwafo Yeremia koni ekɛɛ Yudafoi nomii lɛ ni amɛba amɛhe shi amɛha nɔyelɔi lɛ beni amɛyɔɔ nomŋɔɔ mli yɛ Babilon lɛ, ni amɛsɔle kɛha nakai maŋtiase lɛ toiŋjɔlɛ namɔ po. Eŋma yɛ wolo ni eŋma emaje amɛ lɛ mli akɛ: “Bɔ ni Yehowa Zebaot, Israel Nyɔŋmɔ lɛ, kɛɔ nomii lɛ fiaa [nɛ]; . . . ‘Nyɛtaoa hejɔlɛ nyɛhaa maŋ lɛ ni miha aŋɔ nyɛ nom kɛtee mli lɛ, ni nyɛkpaa Yehowa fai nyɛhaa lɛ; ejaakɛ kɛ ehe jɔ lɛ lɛ, no nyɛ hu nyɛhe aaajɔ nyɛ!’ ” (Yeremia 29:4, 7) Yehowa webii yɛ yiŋtoo ni amɛaadamɔ nɔ be fɛɛ be ni ‘amɛtao toiŋjɔlɛ’ amɛha amɛhe kɛ maŋ ni amɛyɔɔ mli lɛ, koni amɛna toiŋjɔlɛ ni amɛkɛja Yehowa.—1 Petro 3:11.

 6. Eyɛ mli akɛ aha amɛ nɔyeli gbɛhei ni nɔ kwɔlɔ moŋ, shi Daniel kɛ enanemɛi etɛ lɛ ekpɛlɛɛɛ akɛ amɛaaŋmɛɛ saji ahe ni amɛkɛsaa, yɛ Yehowa Mla lɛ gbɛfaŋ yɛ mɛɛ gbɛ nɔ?

⁶ Babilonbii anomŋɔɔ be lɛ mli lɛ, Daniel kɛ Yudafoi anɔkwafoi etɛ krokomɛi, ni amɛji nomii yɛ Babilon nyɔŋyeli mli lɛ ba amɛhe shi amɛha Maŋ tsɔsemɔ, ni amɛbatsɔmɔ maŋ sɔɔlɔi ni hiɛ gbɛhei ni nɔ kwɔlɔ yɛ Babilon. (Daniel 1:3-7; 2:48, 49) Shi, yɛ amɛtsɔsemɔ be lɛ mli po lɛ, amɛkɔ shidaamɔ ni yɔɔ shiŋŋ yɛ niyenii he saji ni kulɛ ebaanyɛ eha amɛku Mla ni amɛ-Nyɔŋmɔ, Yehowa kɛha kɛtsɔ Mose nɔ lɛ mli lɛ gbɛfaŋ. Ajɔɔ amɛ babaoo yɛ enɛ hewɔ. (Daniel 1:8-17) Beni Maŋtsɛ Nebukadnezar kɛ Maŋ amaga ko ma shi lɛ, eyɛ faŋŋ akɛ mla nyɛɔ Daniel nanemɛi Hebribii etɛ lɛ anɔ akɛ amɛfata amɛnanemɛi Maŋ nitsumɔ nɔkwɛlɔi lɛ ahe kɛya nifeemɔ lɛ shishi. Shi kɛlɛ, amɛkpɛlɛɛɛ akɛ ‘amɛaakula shi ni amɛja’ Maŋ amaga lɛ. Shikome ekoŋŋ lɛ, Yehowa wo amɛ emuuyeli lɛ he nyɔmɔ. (Daniel 3:1-6, 13-28) Nakai nɔŋŋ hu ŋmɛnɛ, Yehowa Odasefoi buɔ maŋ ni amɛyɔɔ mli lɛ aflaŋaa, shi amɛfeŋ jamɔ nifeemɔ ko amɛhaŋ lɛ.—2 Mose 20:4, 5; 1 Yohane 5:21.

 7. (a) Mɛɛ shidaamɔ ni nɔ bɛ Daniel kɔ, yɛ gbɛhe ni awo nɔ gojoo ni eyɔɔ yɛ Babilon nɔyeli gbɛjianɔtoo mli lɛ fɛɛ sɛɛ? (b) Mɛɛ tsakemɔi komɛi ba yɛ Kristofoi abe lɛ mli?

⁷ Yɛ Babilon maŋtsɛmɛi aweku hee lɛ shigbeemɔ lɛ sɛɛ lɛ, aha Daniel maŋ nɔyeli hegbɛ ni nɔ kwɔ waa yɛ Mediabii kɛ Persiabii anɔyeli hee ni baye enajiaŋ lɛ mli, yɛ Babilon. (Daniel 5:30, 31; 6:1-3) Shi eŋmɛɛɛ gbɛ ni egbɛhe ni nɔ kwɔ nɛɛ aha eŋmɛɛ emuuyeli mlihiɛmɔ he ni ekɛsaa. Beni Maŋ mla ko bi ni eja Maŋtsɛ Dario moŋ fe ni eeeja Yehowa lɛ, eyeee nɔ. Enɛ ha akɛ lɛ yaha jatai lɛ, shi Yehowa jie lɛ kɛjɛ amɛdɛŋ. (Daniel 6:4-24) Shi, enɛ ba mli yɛ be ni tsɔ̃ Kristofoi abe lɛ hiɛ lɛ mli. Ni aná ato Kristofoi asafo lɛ shishi lɛ, agbɛnɛ Nyɔŋmɔ tsuji baje “Kristo mla shishi.” Esa akɛ akwɛ nibii pii ni aŋmɛɔ gbɛ yɛ Yudafoi agbɛjianɔtoo lɛ shishi lɛ yɛ gbɛ kroko nɔ, ni enɛ damɔ bɔ ni agbɛnɛ Yehowa kɛ ewebii yeɔ ehaa lɛ nɔ.—1 Korintobii 9:21; Mateo 5:31, 32; 19:3-9.

Yesu Subaŋ yɛ Maŋ lɛ He

 8. Mɛɛ nifeemɔ ko ni ba tsɔɔ akɛ Yesu tswa efai shi akɛ ebaatsi ehe kwraa kɛjɛ maŋkwramɔ saji ahe?

⁸ Beni Yesu Kristo yɔɔ shikpɔŋ nɔ lɛ, ekɛ tɛi ni nɔ kwɔlɔ mamɔ shi eha esɛɛnyiɛlɔi, ni ekpɛlɛɛɛ ni ekɛ ehe woɔ maŋkwramɔ loo asraafoi asaji ko kwraa mli. Beni Yesu tsɔ̃ naakpɛɛ gbɛ nɔ ekɛ abolooi akwaabɔi enumɔ kɛ looi bibii enyɔ lɛ gbɔmɛi akpei abɔ sɛɛ lɛ, kulɛ Yudafoi hii komɛi miitao amɛmɔ lɛ ni amɛwo lɛ maŋkwramɔŋ maŋtsɛ. Shi Yesu gbala ehe shi kɛtee gɔji lɛ anɔ oya ni ekɛtsi ehe kɛjɛ amɛhe. (Yohane 6:5-15) The New International Commentary on the New Testament wolo lɛ wie yɛ nii ni ba nɛɛ he akɛ: “Maŋhedɔɔ gbɛkpamɔi ni mli wa waa yɛ Yudafoi ni hi shi yɛ nakai beaŋ lɛ ateŋ, ni ŋwanejee ko bɛ he akɛ mɛi ni na naakpɛɛ nii lɛ ateŋ mɛi pii nu he akɛ naa hiɛnyiɛlɔ ni yɔɔ ŋwɛi nɔkpɛlɛmɔ lɛlɛŋ, ni ji mɔ pɛpɛɛpɛ ni amɛtaoɔ ni enyiɛ amɛhiɛ ni amɛkɛte shi amɛwo Romabii lɛ. No hewɔ lɛ amɛtswa amɛfai shi akɛ amɛbaawo lɛ maŋtsɛ.” Wolo lɛ kɛfataa he akɛ Yesu “je gbɛ ekpoo” nɛkɛ maŋkwramɔŋ hiɛnyiɛlɔ hegbɛ ni amɛkɛhaa lɛ nɛɛ. Kristo fiii Yudafoi atuatsemɔ ni amɛkɛteɔ shi amɛwoɔ Roma nɔyeli lɛ eko kwraa sɛɛ. Yɛ anɔkwale mli lɛ, egba nɔ ni baajɛ atuatsemɔ ni baaba yɛ egbele sɛɛ lɛ mli aba lɛ efɔ shi—amanehulu ni anako eko dã kɛha Yerusalem maŋ lɛ mli bii, kɛ nakai maŋtiase lɛ hiɛkpatamɔ.—Luka 21:20-24.

 9. (a) Te Yesu tsɔɔ wekukpaa ni yɔɔ e-Maŋtsɛyeli lɛ kɛ je lɛ teŋ lɛ mli eha tɛŋŋ? (b) Mɛɛ gbɛtsɔɔmɔ Yesu kɛha esɛɛnyiɛlɔi lɛ yɛ bɔ ni esa akɛ amɛkɛ je lɛŋ nɔyelii aye aha lɛ gbɛfaŋ?

⁹ Beni eshwɛ fioo ni ebaagbo lɛ, Yesu kɛɛ Roma maŋtsɛ wulu lɛ najiaŋdamɔlɔ krɛdɛɛ ni yɔɔ Yudea lɛ akɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.” (Yohane 18:36) Kɛyashi be mli ni e-Maŋtsɛyeli lɛ kɛ maŋkwramɔŋ nɔyelii fɛɛ baaba naagbee lɛ, Kristo kaselɔi lɛ nyiɛɔ enɔkwɛmɔ nɔ lɛ sɛɛ. Amɛfeɔ toiboo amɛhaa nakai hegbɛi ni ato lɛ moŋ, shi amɛkɛ amɛhe wooo amɛ maŋkwramɔŋ nifeemɔi amli. (Daniel 2:44; Mateo 4:8-10) Yesu shi gbɛtsɔɔmɔ efɔ̃ shi eha ekaselɔi lɛ, beni ejaje akɛ: “Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ.” (Mateo 22:21) Yesu ekɛɛ mra mli kɛtsɔ hiɛ momo, yɛ e-Gɔŋ nɔ Shiɛmɔ lɛ mli akɛ: “Kɛji mɔ ko aaanyɛ onɔ akɛ okɛ lɛ anyiɛ ŋmɛlɛtswaa kome lɛ, okɛ lɛ aya enyɔ.” (Mateo 5:41) Yɛ shiɛmɔ nɛɛ mli wiemɔi lɛ anaa lɛ, Yesu kɛ shishitoo mla ni ji heshibaa ni ajɛɔ suɔmɔ mli afeɔ ahaa taomɔ nii ni ja, yɛ adesai ashihilɛ mli loo yɛ nɔyelii ataomɔ nii ni kɛ Nyɔŋmɔ mla kpaa gbee lɛ agbɛfaŋ lɛ he nɔkwɛmɔ nɔ miihã.—Luka 6:27-31; Yohane 17:14, 15.

Kristofoi kɛ Kaisare

10. Taakɛ yinɔsane ŋmalɔ ko tsɔɔ lɛ, mɛɛ shidaamɔ ni damɔ henilee kpakpa nɔ mra be Kristofoi lɛ kɔ yɛ Kaisare gbɛfaŋ?

¹⁰ Esa akɛ nɛkɛ gbɛtsɔɔmɔi kuku nɛɛ akudɔ wekukpaa ni kã Kristofoi kɛ Maŋ lɛ teŋ lɛ. Yinɔsane ŋmalɔ E. W. Barnes ŋma yɛ ewolo ni gbɛi ji The Rise of Christianity lɛ mli akɛ: “Be fɛɛ be ní, yɛ afii ohai abɔ ni baaba lɛ amli fɛɛ lɛ, Kristofonyo ko yiŋ baafee lɛ kɔshikɔshi yɛ gbɛnaa nii ni jwere enɔ yɛ Maŋ lɛ gbɛfaŋ lɛ he lɛ, ekuɔ sɛɛ eyakwɛɔ Kristo nitsɔɔmɔ ni akpɛlɛɔ nɔ lɛ mli ekoŋŋ. Ebaawo tooi sɔrɔtoi: ekolɛ oniai ni atsuɔ lɛ fa tsɔ̃ fe bɔ ni amɛaanyɛ—eshɛ he ni agbɛnɛ anyɛɛɛ awo dɔŋŋ, dani Anaigbɛ Maŋtsɛyeli lɛ butu—shi Kristofonyo baawo kɛ̃, yɛ jaramɔ shihilɛ ni ekɛbaa lɛ fɛɛ sɛɛ. Nakai nɔŋŋ ebaakpɛlɛ Maŋ gbɛnaa nii krokomɛi fɛɛ nɔ, shi ebaafee enɛ kɛji abiii ni ekɛ nibii ni ji Nyɔŋmɔ nɔ lɛ aha Kaisare.”

11. Te Paulo wo Kristofoi aŋaa akɛ amɛkɛ je lɛŋ nɔyelɔi aye aha tɛŋŋ?

¹¹ Shishitoo mla nɛɛ kɛ gbeekpamɔ naa hewɔ ni, yɛ nɔ ni fa fioo fe afii 20 yɛ Kristo gbele sɛɛ lɛ, bɔfo Paulo kɛɛ Kristofoi ni yɔɔ Roma lɛ akɛ: “Mɔ fɛɛ mɔ aba ehe aha hegbɛi ni yeɔ nɔ lɛ.” (Romabii 13:1) Aaafee afii nyɔŋma sɛɛ, beni eshwɛ fioo ni etsuŋwoo ni ji enyɔ kɛ egbele yɛ Roma lɛ baaba lɛ, Paulo ŋma wolo eyaha Tito akɛ: “Kaimɔ amɛ [Kreta Kristofoi lɛ] ni amɛba amɛhe shi amɛha onukpai kɛ nɔyelɔi lɛ, amɛbo amɛ toi, amɛsaa amɛhe amɛha nitsumɔ kpakpa fɛɛ nitsumɔ kpakpa, amɛkawie mɔ ko he efɔŋ, amɛkabé; shi moŋ amɛfee kpoo, ni amɛkɛ amɛhe atsɔɔ mɔ fɛɛ mɔ akɛ amɛhe jɔ.”—Tito 3:1, 2.

“Hegbɛi ni Yeɔ nɔ lɛ” Ahe Shishinumɔ ni Tee Hiɛ

12. (a) Mɛni Charles Taze Russell na akɛ no ji gbɛhe ni sa kɛha Kristofonyo, kɛ akɛ lɛ miito nɔyeli hegbɛi ni yɔɔ lɛ ahe? (b) Yɛ asraafoi anitsumɔ gbɛfaŋ lɛ, mɛɛ shidaamɔi ni yɔɔ sɔrɔtoi Kristofoi ni afɔ amɛ mu lɛ kɔ yɛ Jeŋ Ta I mli?

¹² Mra mli yɛ afi 1886 tɔ̃ɔ lɛ, Charles Taze Russell ŋma yɛ The Plan of the Ages wolo lɛ mli akɛ: “Yesu loo Bɔfoi lɛ ateŋ mɔ ko ekuuu shikpɔŋ nɛɛ nɔ nɔyelɔi lɛ anaa yɛ gbɛ ko kwraa nɔ. . . . Amɛtsɔɔ Sɔlemɔ lɛ ni amɛbo mlai lɛ atoi, ni amɛbu mɛi ni hiɛ nɔyeli hegbɛi lɛ, yɛ gbɛhe ni amɛhiɛ lɛ hewɔ, . . . ni amɛwo tooi sɔrɔtoi ni ato aha amɛ akɛ amɛwo lɛ, ni kɛji mlai lɛ eteee shi ewooo Nyɔŋmɔ mlai lɛ (Bɔf. 4:19; 5:29) amɛkate shi amɛwo mla ko kwraa ni awo. (Rom. 13:1-7; Mat. 22:21) Yesu kɛ Bɔfoi lɛ kɛ mra be mli sɔlemɔ lɛ fɛɛ yeɔ mla nɔ jogbaŋŋ, eyɛ mli akɛ amɛtsi amɛhe kɛjɛ je nɛŋ nɔyelii lɛ ahe ni amɛnaaa nɔyelii nɛɛ amli gbɛfaŋnɔ hu.” Nɛkɛ wolo nɛɛ tsɔɔ mɛi ni ji “hewalɛi ni nɔ kwɔlɔ,” loo “hegbɛi ni yeɔ nɔ,” ni bɔfo Paulo tsĩ amɛ tã lɛ akɛ amɛji adesai anɔyeli hegbɛi ni yɔɔ lɛ. (Romabii 13:1, King James Version) Yɛ 1904 mli lɛ, The New Creation wolo lɛ jaje akɛ esa akɛ anɔkwa Kristofoi “afata gbɔmɛi ni yeɔ mla nɔ fe fɛɛ ni yɔɔ ŋmɛnɛŋmɛnɛ beaŋ lɛ ahe—jeee basabasa feelɔi, jeee beilɔi, jeee mɛi ni taoɔ mɛi krokomɛi atɔmɔi.” Mɛi komɛi banu enɛ shishi akɛ etsɔɔ heshibaa kwraa ni aaafee aha hewalɛi ni yeɔ nɔ lɛ, aahu po kɛyashɛɔ he ni aaakpɛlɛ asraafoi anitsumɔ nɔ beni awuɔ Jeŋ Ta I lɛ. Shi, mɛi krokomɛi hu bu asraafoi asɔɔmɔ akɛ eteɔ shi ewoɔ Yesu wiemɔ ni ewie akɛ: “Mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ” lɛ. (Mateo 26:52) Eyɛ faŋŋ akɛ, ehe miihia ni ana Kristofoi aheshibaa kɛha hegbɛi ni yeɔ nɔ lɛ he shishinumɔ ni mli kã shi faŋŋ.

13. Mɛɛ tsakemɔ yɛ shishinumɔ ni kɔɔ mɛi ni hegbɛi ni nɔ kwɔlɔ lɛ ji lɛ he akɛha yɛ afi 1929 mli, ni enɛ he ba sɛɛnamɔ yɛ mɛɛ gbɛ nɔ?

¹³ Yɛ 1929, ni ji be mli ni nɔyelii sɔrɔtoi amlai bɔi nibii ni Nyɔŋmɔ efã akɛ afee lɛ anaatsii, loo amɛbi ni afee nibii ni Nyɔŋmɔ ekpɛlɛɛɛ nɔ lɛ, abahe aye akɛ enɛ tsɔɔ akɛ hewalɛi ni nɔ kwɔlɔ lɛ ji Yehowa Nyɔŋmɔ kɛ Yesu Kristo.b Enɛ ji shishinumɔ ni Yehowa tsuji hiɛ yɛ jaramɔ be ni tsɔ Jeŋ Ta II hiɛ kɛ be mli ni awuɔ ta lɛ, aahu kɛyabote Jeŋ Hewalɛi lɛ Ateŋ Akaŋshii Be lɛ mli, kɛ egbeyeishemɔ ni mɔnɛ yɔɔ kɛha mɔnɛ, kɛ asraafoi agbɛfaŋ klalo ni amɛfee lɛ mli. Kɛ wɔsusu be ni eho nɛɛ he lɛ, wɔnaa faŋŋ akɛ nɛkɛ nibii ahe susumɔ ni amɛyɔɔ, ni wóɔ bɔ ni Yehowa kɛ e-Kristo lɛ anɔ kwɔlɔ ha lɛ nɔ gojoo lɛ, ye ebua Nyɔŋmɔ webii, ni amɛhiɛ amɛhe ni amɛkɛwooo maŋ saji amli lɛ mli yɛ nɛkɛ jaramɔ be nɛɛ mli fɛɛ, ni amɛŋmɛɛɛ saji ahe ni akɛsaa.

Heshibaa ni Husu Yɔɔ He

14. Akɛ mlitsɔɔmɔ ni yaa hiɛ yɛ Romabii 13:1, 2 kɛ ŋmalɛi krokomɛi ni tamɔ nakai lɛ ahe hã yɛ 1962 mli yɛ mɛɛ gbɛ nɔ?

¹⁴ Yɛ 1961 mli lɛ, agbe New World Translation of the Holy Scriptures lɛ he nitsumɔ naa. Ehe nitsumɔ bi ní aje gbɛ akase wiemɔ mli ni aŋmala Ŋmalɛi lɛ yɛ lɛ he saji jogbaŋŋ diɛŋtsɛ. Wiemɔi ni akɛtsu nii, jeee yɛ Romabii yitso 13 lɛ pɛ mli, shi moŋ yɛ ŋmalɛi kukuji tamɔ Tito 3:1, 2 kɛ 1 Petro 2:13, 17 hu mli lɛ ashishitsɔɔmɔ ni ja kɛmɔ shi ha ana faŋŋ akɛ wiemɔ “hegbɛi ni yeɔ nɔ” lɛ miiwie, jeee Hegbɛ ni Nɔ Kwɔ Fe Fɛɛ, Yehowa, kɛ e-Bi, Yesu he, shi moŋ adesai anɔyeli hegbɛi ni yɔɔ lɛ ahe. Yɛ afi 1962 naagbee gbɛ lɛ, aŋmala saji komɛi yɛ Buu-Mɔɔ lɛ mli, ni ekɛ Romabii yitso 13 lɛ mlitsɔɔmɔ ni ja jogbaŋŋ ha, ni eha aná shishinumɔ ni mli kã shi faŋŋ fe nɔ ni yɔɔ yɛ C. T. Russell beaŋ lɛ. Nɛkɛ saji ni aŋmala nɛɛ fee lɛ faŋŋ akɛ Kristofoi aheshibaa kɛha hegbɛi ni yeɔ nɔ lɛ nyɛŋ afee nɔ ni husu bɛ he. Esa akɛ efee nɔ ni yawaa he ko, ni damɔ hã ni ehaŋ Nyɔŋmɔ tsuji ate shi awo Nyɔŋmɔ mlai lɛ nɔ. Saji krokomɛi ni aŋmala yɛ Buu-Mɔɔ lɛ mli lɛ ema nɛkɛ oti ni he hiaa nɛɛ nɔ mi.c

15, 16. (a) Mɛɛ susumɔ ni ŋmɛɔ pɛpɛɛpɛ shishinumɔ hee ni ana yɛ Romabii yitso 13 lɛ he lɛ kɛba? (b) Mɛɛ sanebimɔi eshwɛ lolo ni abaaha hetoo?

¹⁵ Nɛkɛ gbɛ titri ni atsɔɔ nɔ anuɔ Romabii yitso 13 lɛ shishi yɛ gbɛ ni ja nɔ nɛɛ eye ebua Yehowa webii ni amɛnyɛ amɛha bulɛ ni aaaná aha maŋkwramɔŋ hegbɛi lɛ kɛ shidaamɔ ni yɔɔ shiŋŋ yɛ Ŋmalɛ mli shishitoo mlai ni he hiaa ahe lɛ eŋmɛ pɛpɛɛpɛ. (Lala 97:11; Yeremia 3:15) Eha amɛna shishinumɔ ni ja yɛ amɛkɛ Nyɔŋmɔ teŋ wekukpaa, kɛ bɔ ni amɛkɛ Maŋ lɛ hu yeɔ haa lɛ he. Ema nɔ mi faŋŋ eha amɛ akɛ yɛ be mli ni amɛkɛ Kaisare nii haa lɛ lɛ, amɛkuuu amɛhiɛ amɛfɔ̃ɔɔ Nyɔŋmɔ nii ni amɛkɛaaha Nyɔŋmɔ lɛ nɔ.

¹⁶ Shi mɛni pɔtɛɛ ji Kaisare nii? Mɛɛ nibii ni ja yɛ mla naa Maŋ lɛ baanyɛ abi kɛjɛ Kristofonyo dɛŋ? Abaasusu sanebimɔi nɛɛ ahe yɛ nikasemɔ ni nyiɛ enɛ sɛɛ lɛ mli.

[Shishigbɛ niŋmai]

Nɔ ni yɔɔ miishɛɛ ji akɛ, Univɛsiti Tsɔɔlɔ Nukpa F. F. Bruce ŋma yɛ shishitsɔɔmɔ ni eŋma yɛ Romabii yitso 13 lɛ he lɛ mli akɛ: “Eyɛ faŋŋ yɛ nɔ ni emli shishijee wiemɔi lɛ tsɔɔ lɛ amli, taakɛ anaa kɛjɛɔ nɔ ni bɔfoi lɛ abeaŋ niŋmaa lɛ fɛɛ tsɔɔ lɛ mli lɛ, akɛ maŋ lɛ baanyɛ afã toiboo ni aaafee aha lɛ yɛ gbɛ ni ja nɔ, shi moŋ yɛ husui ni ji yiŋtoi ahewɔ ni ajɛ ŋwɛi ato shishi lɛ amli pɛ—ni titri lɛ, jeee akɛ ekolɛ abaanyɛ ate shi awo maŋ lɛ, shi moŋ esa akɛ ate shi awo lɛ kɛji eebi ni akɛ anɔkwayeli kɛ bulɛ ni esa akɛ akɛha Nyɔŋmɔ pɛ lɛ aha lɛ.”

Ani Obaanyɛ Otsɔɔ Mli?

◻ Mɛni hewɔ heshibaa kɛha hegbɛi ni yeɔ nɔ lɛ etsɔɔɔ heshibaa kɛha Satan lɛ?

◻ Mɛni ji Yesu subaŋ yɛ egbii lɛ amli maŋkwramɔ saji ahe?

◻ Mɛɛ ŋaawoo Yesu kɛha esɛɛnyiɛlɔi yɛ bɔ ni esa akɛ amɛkɛ Kaisare aye aha lɛ he?

◻ Te Paulo wo Kristofoi aŋaa akɛ amɛkɛ je lɛŋ nɔyelɔi lɛ aye aha tɛŋŋ?

◻ Shishinumɔ ni ayɔɔ yɛ mɛi ni hegbɛi ni yeɔ nɔ lɛ ji he lɛ baje kpo fiofio yɛ afii lɛ amli yɛ mɛɛ gbɛ nɔ?

[Mfoniri ni yɔɔ baafa 10]

Beni Satan kɛ maŋkwramɔ hewalɛ haa Yesu lɛ, ekpoo

[Mfoniri ni yɔɔ baafa 13]

Russell ŋma akɛ esa akɛ anɔkwa Kristofoi “afata gbɔmɛi ni yeɔ mla nɔ fe fɛɛ ni yɔɔ ŋmɛnɛŋmɛnɛ beaŋ lɛ ahe”