Gbekɛ ni Aaaye Abua lɛ ni Eda yɛ Nyɔŋmɔ he Nilee Mli

JEŊMAJI pii amli nilelɔi ni jɛ shihilɛi sɔrɔtoi amli ekpɛlɛ nɔ akɛ Yesu ji tsɔɔlɔ kpele kɛ mɔ ni tsɔɔ jeŋba kpakpa he nii. Shi, ani nibii komɛi ni ba yɛ egbekɛbiiashi tsɔsemɔ mli lɛ ye bua enɛ? Mɛni nibii fɔlɔi ni yɔɔ ŋmɛnɛ lɛ baanyɛ akase yɛ eweku shihilɛ kɛ etsɔsemɔ he?

Biblia lɛ kɛɔ wɔ fioo pɛ yɛ Yesu gbekɛbiiashi shihilɛ he. Kukuji enyɔ pɛ wie eklɛŋklɛŋ afii 12 lɛ he: “Ni beni [Yosef kɛ Maria] amɛgbe nii lɛ fɛɛ naa yɛ Nuŋtsɔ lɛ mla lɛ naa lɛ, amɛku amɛsɛɛ kɛtee Nazaret, amɛ diɛŋtsɛ amɛma lɛŋ yɛ Galilea Ní gbekɛ lɛ bada, ni ehe wa yɛ mumɔ mli, ni eyi obɔ kɛ nilee, ni Nyɔŋmɔ duromɔ yɛ enɔ.” (Luka 2: 39, 40) Shi nikasemɔ nii yɛ biɛ kɛha fɔlɔi ni amɛkase.

Ní gbekɛ lɛ “bada, ni ehe wa.” No hewɔ lɛ, efɔlɔi lɛ kwɛ enɔ jogbaŋŋ yɛ gbɔmɔtso gbɛfaŋ Asaŋ, amɛha eyi “obɔ kɛ nilee.’” Namɔ gbɛnaa nii ji akɛ etsɔɔ lɛ ŋaalee kɛ saneshishinumɔ ni baaha ena nakai nilee lɛ?

Yɛ Mose Mla lɛ naa lɛ, efɔlɔi anitsumɔ ji no. Mla lɛ kɛɔ fɔlɔi ni ji Israelbii lɛ akɛ: “Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ, ni ojwɛŋ nɔ otsɔɔ obii, ni ewie he, beni ota shi yɛ oshia lɛ kɛ beni onyiɛ gbɛ teŋ kɛ beni oka shi kɛ beni ote shi.” (5 Mose 6:​6, 7) Anɔkwale ni eji akɛ Yesu tee ehiɛ “eyi obɔ kɛ nilee, ni Nyɔŋmɔ duromɔ yɛ enɔ” lɛ tsɔɔ akɛ Yosef kɛ Maria bo nakai famɔ Iɛ toi.

Ekolɛ mɛi komɛi baanu he akɛ, akɛni Yesu ji gbekɛ ni yeɔ emuu hewɔ lɛ, etsɔsemɔ lɛ nyɛŋ afee nɔkwɛmɔ nɔ diɛŋtsɛ aha gbekɛbii krokomɛi akwɛmɔ. Shi, Yosef kɛ Maria yeee emuu. Shi kɛlɛ, amɛtee nɔ amɛha lɛ emumɔŋ kɛ heloo gbɛfaŋ hiamɔ nii ni amɛfee enɛ yɛ nɔnyɛɛ ni weku ni da kɛbaa lɛ fɛɛ sɛɛ. (Mateo 13:​55, 56) Asaŋ, eyɛ mli akɛ Yesu ye emuu moŋ, shi ebi ni eda kɛjɛ abifabiiashi kɛtsɔ gbekɛbiiashi kɛ ebalahiiaŋ kɛyashi beni eeetsɔ onukpa. Edalɛ nɛɛ he nitsumɔi pii yɛ ni esa akɛ efɔlɔi atsu, ni eka shi faŋŋ akɛ amɛtsu enɛ jogbaŋŋ.

Beni Yesu Eye Mli 12

“Daa afi lɛ efɔlɔi lɛ yaa Yerusalem, amɛyayeɔ hehoo gbijurɔ.” (Luka 2:41) Taakɛ bɔ ni Nyɔŋmɔ Mla lɛ tsɔɔ lɛ, esa akɛ nuu fɛɛ nuu aba Yerusalem kɛha nɛkɛ gbii juji nɛɛ. (5 Mose 18:16) Shi nɔ ni aŋma afɔ shi lɛ kɛɔ akɛ “efɔlɔi lɛ yaa.” Yosef kɛ Maria kɛ amɛbii krokomɛi lɛ faa gbɛ kakadaŋŋ ni fe shitoi 60 kɛyaa Yerusalem kɛha nakai gbijurɔ ni‘yɔɔ miishɛɛ lɛ. (5 Mose 16:​6, 11) Enɛ ji nɔ ko ni amɛfɔɔ feemɔ​—amɛdaa gbi shihilɛ lɛ fa. Asaŋ, amɛjieee amɛhiɛ yɛ jɛmɛ shikome ko kɛkɛ; amɛhiɔ jɛmɛ gbii fɛɛ ni akɛyeɔ gbijurɔ lɛ.​—Luka 2:​42, 43.

Enɛ bafeɔ nikasemɔ ni hi kɛha fɔlɔi ŋmɛnɛ. Nɛkɛ gbii juji ni ayeɔ daa afi yɛ Yerusalem nɛɛ ji be kɛha henaabuamɔ yɛ toiŋjɔlɛ mli kɛ nyamɔ be. (3 Mose 23:4, 36) Amɛji mumɔŋ nifeemɔi ni wajeɔ mɔ kɛha Yosef, Maria kɛ gbekɛ Yesu. Ŋmɛnɛ, fɔlɔi aaafee jogbaŋŋ akɛ amɛaatao nifeemɔi ni tamɔ nɛkɛ amɛha amɛbii bɔni afee ni amɛna miishɛjemɔ kɛ mumɔŋ hewalɛwoo. Fɔlɔi ni ji Yehowa Odasefoi lɛ feɔ enɛ kɛtsɔɔ amɛgbekɛbii lɛ ni amɛkɛ amɛ yaa kpeei kɛ kpeei wuji ni afeɔ yɛ be kɛ bei amli yɛ afi lɛ mli lɛ nɔ. Yɛ enɛ hewɔ lɛ, gbekɛbii lɛ naa miishɛɛ kɛ amɛfa gbɛ kɛ beni amɛkɛ nanemɛi heyelilɔi akpei ohai abɔ efutu gbii fioo lɛ. Tsɛ ko ni nyɛ etsɔse gbekɛbii nyɔŋma yɛ omanyeyeli mli lɛ tsɔɔ nɔ ni ha enyɛ eye omanye Iɛ akɛ kɛjɛ ebaptisimɔ akɛ Kristofonyo afii 45 ni eho nɛ lɛ, gbi kome folo bako ni eyaaa kpee. Ní ewo eweku lɛ ŋaa akɛ amɛkaha enɛ eko bɔ amɛ.

Amɛhiɛ Kpa Enɔ

Beni Yesu ji gbekɛ lɛ, ŋwanejee ko bɛ he akɛ etaa efɔlɔi amasɛi yɛ nɛkɛ gbɛ ni afaa kɛyaa Yerusalem maŋtiase lɛ mli daa afi lɛ mli. Shi, beni edaa lɛ, ekolɛ amɛha lɛ heyeli fiofio. Beni eye afii 12 lɛ, no mli lɛ, eshɛ he ko ni Yudafoi le akɛ be pɔtɛɛ kɛha dalɛ ni akɛshɛɔ nuu he. Ekolɛ nɛkɛ tsakemɔ ni fɔɔ kaa nɛɛ ji nɔ ni ha amɛhiɛ je amɛhe nɔ beni be lɛ shɛ kɛha Yosef kɛ eweku lɛ akɛ amɛshi Yerusalem kɛya amɛshihilɛ he lɛ. Nɔ ni aŋma afɔ shi lɛ kaneɔ akɛ: “Ni beni amɛgbe gbii lɛ anaa ni amɛkuɔ amɛsɛɛ ekoŋŋ lɛ, gbekɛ Yesu lɛ kpe sɛɛ yɛ Yerusalem, ni efɔlɔi lɛ leee. Shi amɛsusuɔ akɛ efutu asafo lɛ kɛtee, ni amɛnyiɛ gbi kome gbɛ amɛtaoɔ lɛ yɛ amɛwekui kɛ amɛnanemɛi lɛ ateŋ.”​—Luka 2:​43, 44.

Nibii komɛi yɛ sane ni eba nɛɛ mli ni fɔlɔi kɛ gbekɛbii fɛɛ baanyɛ ayɔse. Shi, sɔrɔto kome yɛ mli: Yesu ye emuu. Akɛni ebo Yosef kɛ Maria toi ni eba ehe shi eha amɛ hewɔ lɛ, wɔnyɛŋ wɔsusu akɛ efeee toiboo ehaaa gbɛjianɔ ni amɛkɛ lɛ eto lɛ. (Luka 2:52) Etamɔ nɔ ni amɛkɛ Iɛ egbaaa sane. Efɔlɔi lɛ susu akɛ Yesu efutu amɛwekumɛi kɛ amɛnanemɛi ateŋ. (Luka 2:44) Ewaaa akɛ wɔɔsusu akɛ, yɛ amɛhe ni amɛsaa koni amɛshi Yerusalem mli lɛ, amɛbaajwɛŋ gbekɛbii bibii kwraa lɛ ahe titri, ni amɛsusu akɛ amɛbi nukpa Yesu hu nyiɛ amɛsɛɛ nɔŋŋ kɛmiiya.

Shi, Yesu susu akɛ efɔlɔi lɛ baale he ni eyɔɔ. Hetoo ni eha amɛ yɛ sɛɛ mli lɛ tsɔɔ nakai: “Mɛɛba ni nyɛtaoɔ mi? Ani nyɛleee akɛ esa mi akɛ mihiɔ shi yɛ nii ni ji mitsɛ nɔ lɛ mli?” Jeee toigbele efeɔ nɛɛ. Ewiemɔ lɛ tsɔɔ bɔ ni efee lɛ naakpɛɛ ha akɛ efɔlɔi lɛ leee he ni esa akɛ amɛtao Iɛ yɛ. Enɛ ji shishinumɔ ni yabaaa yɛ amɛteŋ ni fɔlɔi pii ni hiɛ gbekɛbii lɛ baanyɛ ale enɛ.​—Luka 2:⁠49.

Susumɔ bɔ ni Yosef kɛ Maria hao amɛha yɛ nakai gbi lɛ naagbee beni amɛna akɛ Yesu elaaje lɛ he okwɛ. Ni kwɛmɔ bɔ ni amɛtsui ye babaoo ha yɛ nakai gbii enyɔ lɛ nɔ beni amɛtaoɔ lɛ yɛ Yerusalem Iɛ. Shi, tsɔsemɔ ni amɛkɛha Yesu lɛ he ba sɛɛnamɔ yɛ sane nɛɛ mli. Yesu kɛ ehe eyabɔɔɔ kobɔlɔi. Eshwieee efɔlɔi nɛɛ ahiɛ shi. Beni amɛna Yesu lɛ, no mli lɛ, “eyɛ sɔlemɔwe lɛ, eta shi yɛ tsɔɔlɔi ateŋ, eebo amɛ toi ni eebibii amɛ nii. Ni mɛi fɛɛ ni boɔ lɛ toi lɛ anaa kpɛ amɛhe yɛ enilee kɛ hetoi ni ehaa lɛ ahewɔ.”​—Luka 2:​46, 47.

Anɔkwale ni eji akɛ ekɛ ebe tsu nii yɛ nɛkɛ gbɛ nɔ kɛ bɔ ni ana akɛ eyɛ Ŋmalɛ mli shishitoo mlai ahe nilee fɛfɛo lɛ wie Yosef kɛ Maria tsɔsemɔ ni amɛkɛha lɛ kɛbashi nakai be mli lɛ he jogbaŋŋ. Shi, Maria nifeemɔ Iɛ tamɔ yoofɔyoo ni ehao: ewo etsui akɛ ebi lɛ yɛ shweshweeshwe; kɛkɛ ni ejie bɔ ni ehao Iɛ kpo akɛ: “Mibi, mɛɛba ofee wɔ nɛkɛ? Naa, mikɛ otsɛ etao bo kɛ awerɛho.” (Luka 2:48) Ejeee nɔ ni akpaaa gbɛ akɛ Maria baawie enɛ yɛ Yosef hiɛ yɛ bɔ ni amɛyi enyɔ lɛ fɛɛ ehao lɛ hewɔ. Ekolɛ gbekɛbii pii ni kaneɔ sane nɛɛ baakɛɛ akɛ: “Nakai nɔŋŋ minyɛ hu feɔ!”

Nibii Ni Wɔkase

Mɛni nibii wɔbaanyɛ wɔkase kɛjɛ niiashikpamɔ nɛɛ mli? Ewaaa akɛ gbekɛbii baasusu akɛ amɛfɔlɔi le nɔ ni amɛsusuɔ. Anuɔ ni amɛfɔɔ wiemɔ akɛ: “Shi misusuɔ akɛ ole enɛ.” Fɔlɔi, kɛ nyɛbii lɛ kɛɛ nakai beni shishinumɔ bɛ nyɛteŋ lɛ, belɛ, jeee nyɛ pɛ nyɛyɔɔ nakai naagba lɛ.

Beni gbekɛbii shɛɔ obalaŋtaiaŋ lɛ, amɛnaa heyeli fiofio kɛjɛɔ amɛfɔlɔi adɛŋ. Tsakemɔ nɛɛ fɔɔ kaa, ni esa akɛ fɔlɔi afee tsakemɔ ni sa bɔni afee ni amɛha enɛ gbɛ. Shi, yɛ tsɔsemɔ ni sa jogbaŋŋ ni akɛha lɛ po sɛɛ lɛ, shishinumɔ ni bɛ baanyɛ ate shi ni enɛ baanyɛ aha fɔlɔi ahao. Shi, kɛ amɛnyiɛ Yosef kɛ Maria nɔkwɛmɔ nɔ kpakpa nɛɛ sɛɛ ni saji ni mli wawai te shi lɛ, tsɔsemɔ ni atsɔ hiɛ akɛha lɛ baaha amɛbii lɛ anyɛ adamɔ shi shiŋŋ.

Eka shi faŋŋ akɛ Yesu fɔlɔi lɛ tee nɔ amɛkɛ lɛ tsu nii yɛ egbekɛbiiashi afii lɛ fɛɛ mli. Beni sane ni wɔsusu he bianɛ lɛ ba sɛɛ lɛ, ebo amɛ toi ni “ekɛ amɛ yiŋ kɛtee” emaŋ “ni eba ehe shi eha amɛ.” Mɛni jɛ mli ba? “Ni Yesu tee ehiɛ yɛ nilee kɛ dalɛ kɛ duromɔ mli yɛ Nyɔŋmɔ kɛ gbɔmɛi ahiɛ.” No hewɔ lɛ, sane nɛɛ ba naagbee kɛ miishɛɛ. (Luka 2: 51, 52) Fɔlɔi ni nyiɛɔ Yosef kɛ Maria nɔkwɛmɔ nɔ lɛ sɛɛ ni amɛyeɔ amɛbuaa amɛbii koni amɛdara yɛ ŋwɛi nilee mli, fɔlɔi ni haa gbekɛbii ahiɛ mɛɔ shia ni amɛshwɛɔ Nyɔŋmɔ webii ahenaabuamɔ lɛ haa shihilɛ ni tamɔ nɛkɛ bafeɔ nɔ ni kaa amɛbii kɛ amɛnabii ahe. Gbekɛbii ni tamɔ nɛkɛ lɛ nɛɛ shihilɛ kpakpa mli ŋɔɔmɔ beni amɛdaraa kɛshɛɔ Kristofonyo onukpa ni nyɛɔ etsuɔ gbɛnaa nii ahe nii lɛ he lɛ.

[Shishigbɛ niŋmai]

Shishijee Hela lɛ hiɛ jwɛŋmɔ ni ji akɛ Yesu ni “eyi obɔ kɛ nilee” lɛ ji nifeemɔ ko ni yaa nɔ yɛ be fɛɛ mli.

[Wiemɔ ni akɔ ni akɛmiitsu nii ni yɔɔ baafa 7]

“Nyɛbii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja. “Wo otsɛ kɛ onyɛ,” ni ji klɛŋklɛŋ kita ni hiɛ shiwoo akɛ: “Koni ahi ahao, ni otsɛ yɛ shikpɔŋ lɛ nɔ.” Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ lɛ tsɔsemɔ lɛ ŋaawoo lɛ mli.”​—Efesobii 6:​1-4