Foijee Kɛmiiya He ni Yɔɔ Shweshweeshwe Dani “Amanehulu Kpeteŋkpele” lɛ Aba
“Kɛ nyɛna akɛ abɔ ŋsara awo Yerusalem he lɛ, . . . mɛi ni yɔɔ Yudea lɛ ajo foi kɛya gɔji lɛ anɔ.”—LUKA 21:20, 21.
1. Mɛni hewɔ ehe hiaa ni mɛi ni ji je lɛ fã lolo lɛ ajo foi oya kɛjɛ mli lɛ?
EHE miihia ni mɛi fɛɛ ni ji Satan je lɛ fã lɛ ajo foi oya kɛjɛ mli. Kɛji abaahere amɛyiwala yɛ be mli ni akpataa amrɔ nɛɛ nibii agbɛjianɔtoo nɛɛ hiɛ kɛjɛɔ shikpɔŋ nɛɛ nɔ lɛ, no lɛ esa akɛ amɛha ana odaseyeli ni tsɔɔ faŋŋ akɛ amɛdamɔ shi shiŋŋ yɛ Yehowa masɛi, ni amɛjeee jeŋ ni Satan ji enɔyelɔ nɛɛ fã dɔŋŋ.—Yakobo 4:4; 1 Yohane 2:17.
2, 3. Mɛɛ sanebimɔi ni kɔɔ Yesu wiemɔi ni aŋmala yɛ Mateo 24:15-22 lɛ he wɔbaasusu he?
2 Yesu ma bɔ ni nɛkɛ foijee nɛɛ he hiaa waa lɛ nɔ mi yɛ egbalɛ kpele ni kɔɔ nibii agbɛjianɔtoo lɛ naagbee lɛ he lɛ mli. Wɔfɔɔ nɔ ni aŋma afɔ̃ shi yɛ Mateo 24:4-14 lɛ he sanegbaa yɛ be kɛ bei amli; shi, nɔ ni nyiɛ no sɛɛ lɛ hu he miihia waa nakai nɔŋŋ. Wɔmiiwo bo hewalɛ ni ogbele o-Biblia lɛ bianɛ nɔŋŋ ni okane kuku 15 kɛyashi 22.
3 Mɛni nakai gbalɛ lɛ tsɔɔ? Mɛni ji “amaŋfɔ nihii nii lɛ,” yɛ klɛŋklɛŋ afii oha lɛ mli? Mɛni ji nɔ ni “he krɔŋkrɔŋ” lɛ ni etee lɛ fee he mfoniri? Mɛni nakai nii ni ba lɛ tsɔɔ kɛhaa wɔ?
“Mɔ ni Kaneɔ lɛ, Ha ni Eyoo Sɛɛ”
4. (a) Mɛni Daniel 9:27 kɛɛ ebaanyiɛ kpoomɔ ni Yudafoi lɛ kpoo Mesia lɛ sɛɛ kɛba? (b) Beni ewieɔ enɛ he lɛ, mɛni hewɔ ni Yesu wie akɛ, “Mɔ ni kaneɔ lɛ, ha ni eyoo sɛɛ” lɛ?
4 Kadimɔ yɛ Mateo 24:15 akɛ Yesu tsɛ nɔ ni aŋma yɛ Daniel wolo lɛ mli lɛ yisɛɛ. Gbalɛ ko yɛ nakai wolo lɛ yitso 9 lɛ ni gba Mesia lɛ baa, kɛ kojomɔ ni akɛbaaba Yudafoi amaŋ lɛ nɔ yɛ kpoomɔ ni amɛkpoo lɛ lɛ hewɔ lɛ efɔ shi. Kuku 27 lɛ naagbee fã lɛ kɛɔ akɛ: “Ni fine nɔ amaŋfɔ nihii nii lɛ aaahi.” Yudafoi ablema saji ni etsɔ hiɛ lɛ kɛ nakai Daniel gbalɛ lɛ fã lɛ to bulemɔ ni Antiochus IV bule Yehowa sɔlemɔ we ni yɔɔ Yerusalem lɛ yɛ afii ohai enyɔ D.Ŋ.B. lɛ he. Shi Yesu bɔ kɔkɔ akɛ: “Mɔ ni kaneɔ lɛ, ha ni eyoo sɛɛ.” Eyɛ mli akɛ eka shi faŋŋ akɛ, bulemɔ ni Antiochus IV bule sɔlemɔ we lɛ ji nihii nii moŋ, shi ekɛ emaŋfɔfeemɔ baaa—Yerusalem, kɛ sɔlemɔ we lɛ, loo Yudafoi amaŋ lɛ nɔ. No hewɔ lɛ, eka shi faŋŋ akɛ Yesu miibɔ etoibolɔi lɛ kɔkɔ ni amɛyoo akɛ gbalɛ nɛɛ mlibaa hoko, shi moŋ eyɛ wɔsɛɛ be mli.
5. (a) Sanekpakpai lɛ amli saji ni wɔkɛaato he lɛ baaye abua wɔ ni wɔna klɛŋklɛŋ afii oha lɛ mli “nihii nii” lɛ yɛ mɛɛ gbɛ nɔ? (b) Mɛni hewɔ Cestius Gallus loo Roma asraafoi kɛtee Jerusalem oya yɛ afi 66 Ŋ.B. lɛ?
5 Mɛni ji “nihii nii” ni esa akɛ amɛhiɛ ahi amɛhe nɔ yɛ he nɛɛ? Esa kadimɔ jogbaŋŋ akɛ Mateo sane lɛ kɛɔ akɛ: “Kɛ nyɛna amaŋfɔ nihii nii . . . lɛ akɛ ema he krɔŋkrɔŋ lɛ.” Shi, ehe sane ni kɛ enɛ nyiɛɔ pɛpɛɛpɛ ni aŋma yɛ Luka 21:20 lɛ kaneɔ akɛ: “Kɛ nyɛna akɛ abɔ ŋsara awo Yerusalem he lɛ, belɛ nyɛnaa nyɛlea akɛ efitemɔ lɛ eshɛ.” Yɛ afi 66 Ŋ.B. lɛ, Kristofoi ni yɔɔ Yerusalem lɛ na nɔ ni Yesu gba efɔ shi lɛ. Nibii komɛi ni tsara nɔ kɛba ni kɔɔ béi ni tee nɔ yɛ Yudafoi lɛ kɛ Roma nɔyelɔi lɛ ateŋ lɛ he lɛ ha Yerusalem batsɔ he ko ni atseɔ Roma hiɛ atua waa yɛ. Nɔ ni enɛ kɛba ji akɛ, basabasa-feemɔi te shi yɛ Yudea, Samaria, Galilea, Dekapolis, kɛ Foenika, kɛ agbɛnɛ kooyigbɛ kɛtee Syria, kɛ wuoyigbɛ hu kɛba Mizraim. Bɔni afee ni aha toiŋjɔlɛ aba nɛkɛ Roma Maŋtsɛyeli lɛ fã nɛɛ mli lɛ, Cestius Gallus kɛ asraafoi atai sha foi oya kɛjɛ Syria kɛtee Yerusalem, he ni Yudafoi lɛ tsɛɔ lɛ amɛ “maŋ krɔŋkrɔŋ” lɛ.—Nehemia 11:1; Yesaia 52:1.
6. Eji anɔkwale akɛ “nihii nii” ni baanyɛ ekɛ amaŋfɔfeemɔ aba ‘badamɔ he krɔŋkrɔŋ lɛ’ yɛ mɛɛ gbɛ nɔ?
6 Eji nɔ ko ni Roma asraafoi fɔɔ feemɔ akɛ amɛaahiɛ aflaŋai, ni amɛbuɔ akɛ eyɛ krɔŋkrɔŋ, shi Yudafoi lɛ buɔ akɛ eji wɔŋjamɔ lɛ. Nɔ ni yɔɔ miishɛɛ ji akɛ, akɛ Hebri wiemɔ ni atsɔɔ shishi akɛ “nihii nii” yɛ Daniel wolo lɛ mli lɛ tsuɔ nii titri kɛhaa amagai kɛ amaga jamɔ.a (5 Mose 29:17) Yɛ Yudafoi lɛ ashitee-kɛ-woo lɛ fɛɛ sɛɛ lɛ, Roma asraafoi ni hiɛ amɛ wɔŋjamɔ aflaŋai nɛɛ, gbu kɛbote Yerusalem yɛ afi 66 Ŋ.B. November mli, kɛkɛ ni amɛbɔi sɔlemɔtsu lɛ gbogboi ni yɔɔ kooyigbɛ lɛ shishi tsaa. Ŋwanejee ko kwraa bɛ he—“nihii nii” ni baanyɛ ekɛ amaŋfɔ-feemɔ kwraa aba Yerusalem nɔ lɛ “damɔ he krɔŋkrɔŋ lɛ”! Shi te mɔ ko baafee tɛŋŋ ejo foi hu?
Ehe Miihia ni Ajo Foi Oya!
7. Mɛni Roma asraafoi lɛ fee trukaa ni akpaaa gbɛ?
7 Trukaa, ni aleee yiŋtoo hewɔ, yɛ adesa shishinumɔ naa, beni ebafee faŋŋ akɛ abaanyɛ aye Yerusalem nɔ kunim yɛ gbɛ ni waaa kwraa nɔ lɛ, kɛkɛ ni Roma asraafoi lɛ gbala amɛhe shi. Yudafoi shitee-kɛ-wolɔi lɛ nyiɛ Roma asraafoi ni egbala amɛhe shi lɛ asɛɛ kɛyashɛ Antipatri pɛ, aaafee kilomitai 50 kɛjɛ Yerusalem. Kɛkɛ ni amɛku amɛsɛɛ kɛba. Beni amɛbashɛ Yerusalem lɛ, amɛbabua amɛhe naa yɛ sɔlemɔ we lɛ koni amɛto amɛ tawuu lɛ he ŋaa. Abua obalahii anaa kɛha amɛ mɔɔi lɛ awajemɔ kɛ agbɛnɛ kɛha asraafoi anitsumɔ hu. Ani Kristofoi kɛ amɛhe baawo nifeemɔi nɛɛ amli? Kɛ amɛtsi amɛhe kɛjɛ nifeemɔi nɛɛ ahe po lɛ, ani amɛbaakã he amɛhi kpokpaa ni oshara eba he nɛɛ mli beni Roma asraafoi lɛ baaku amɛsɛɛ lɛ?
8. Mɛɛ nifeemɔ ni he hiaa Kristofoi lɛ tsu he nii yɛ Yesu gbalɛ wiemɔi lɛ atoiboo mli?
8 Etsɛɛɛ kɛkɛ ni Kristofoi ni yɔɔ Yerusalem kɛ Yudea fɛɛ lɛ tsu gbalɛ mli kɔkɔbɔɔ ni Yesu Kristo kɛha amɛ lɛ he nii, ni amɛjo foi kɛjɛ kpokpaa ni he eba oshara lɛ nɔ kwraa. Ehe miihia ni amɛjo foi oya! Yɛ be ni sa mli lɛ, amɛfã gbɛ kɛtee gɔji lɛ anɔ, ni ekolɛ amɛteŋ mɛi komɛi po yahi Pela yɛ Perea niiaŋ. Mɛi ni bo Yesu kɔkɔbɔɔ lɛ toi lɛ kɛ buulu-feemɔ ekuuu amɛsɛɛ kɛyaaa maŋ lɛ mli akɛ amɛyaabɔ mɔdɛŋ ni amɛbaa amɛ heloonaa nibii ayi. (Okɛto Luka 14:33 he.) Yɛ shihilɛ nɛɛ mli lɛ, eka shi faŋŋ akɛ ewa waa kɛha yei ni hiɛ musu kɛ yei ni miiha fufɔ lɛ akɛ amɛaanyiɛ kɛfa nɛkɛ gbɛ nɛɛ. Hejɔɔmɔ gbi mlai lɛ eko etsiii amɛfoijee naa, ni eyɛ mli akɛ fɛ̃i be ebɛŋkɛ moŋ, shi no mli lɛ eshɛko. Etsɛɛɛ ni mɛi ni bo Yesu kɔkɔbɔɔ lɛ toi akɛ amɛjo foi oya lɛ bafee shweshweeshwe yɛ Yerusalem kɛ Yudea sɛɛ. Amɛwala damɔ enɛ feemɔ nɔ.—Okɛto Yakobo 3:17 he.
9. Be enyiɛ eye ni Roma asraafoi lɛ ku amɛsɛɛ, ni mɛni jɛ mli ba?
9 Enɔ afi nɔŋŋ, ni ji afi 67 Ŋ.B. lɛ, Romabii lɛ je amɛ ta nifeemɔi ni amɛkɛteɔ shi amɛwoɔ Yudafoi lɛ shishi ekoŋŋ. Klɛŋklɛŋ lɛ, amɛye Galilea nɔ kunim kwraa. Kɛkɛ ni afi ni nyiɛ sɛɛ lɛ, amɛfite Yudea hu kwraa. Beni shɛɔ afi 70 Ŋ.B. lɛ, Roma asraafoi lɛ ebawo Yerusalem diɛŋtsɛ he ka kɛkpe. (Luka 19:43) Hɔmɔ ba, ni enaa bawa waa diɛŋtsɛ. Mɛi ni asa amɛnaa awo maŋtiase lɛ mli lɛ bɔi amɛhe gbee. Ni mɔ fɛɛ mɔ ni kaa akɛ eeejo foi lɛ, agbeɔ lɛ. Taakɛ Yesu kɛɛ lɛ, nɔ ni amɛna nɛɛ fee “amanehulu babaoo” diɛŋtsɛ.—Mateo 24:21.
10. Kɛ wɔkane nii kɛ sɛɛyoomɔ lɛ, mɛni hu wɔbaakadi?
10 Ani enɛ ha nɔ ni Yesu gba efɔ shi lɛ fɛɛ ba mli kɛmɔ shi? Dabi, babaoo yɛ lolo ni baaba. Kɛji, taakɛ Yesu wo ŋaa lɛ, wɔkane Ŋmalɛi lɛ kɛ sɛɛyoomɔ lɛ, no lɛ ebaaha wɔjwɛŋmɔ ahi nibii ni baaba yɛ wɔsɛɛ be mli lɛ anɔ. Ni wɔbaasusu nɔ ni etsɔɔ yɛ wɔ diɛŋtsɛ wɔshihilɛ mli lɛ hu he kɛ hiɛdɔɔ.
Ŋmɛnɛŋmɛnɛ Beaŋ “Nihii Nii”
11. Mɛɛ ŋmalɛi krokomɛi enyɔ mli Daniel wie “nihii nii” lɛ he yɛ, ni mɛɛ be kpalaŋŋ ko awieɔ he yɛ jɛmɛ lɛ?
11 Kadimɔ akɛ, kɛfata nɔ ni wɔna yɛ Daniel 9:27 lɛ he lɛ, atsĩ “amaŋfɔfeemɔ nihii nii” tã ekoŋŋ yɛ Daniel 11:31 kɛ 12:11 hu. Shi awieee Yerusalem hiɛkpatamɔ he yɛ nɛkɛ hei krokomɛi ni wɔtsɔɔ sɛɛkpee nɛɛ. Yɛ anɔkwale mli lɛ, nɔ ni awie yɛ Daniel 12:11 lɛ baa yɛ kukuji enyɔ ni nyiɛ “naagbee be lɛ” he wiemɔ sɛɛ lɛ mli. (Daniel 12:9) Wɔhi nɛkɛ be nɛɛ mli aahu kɛjɛ afi 1914 kɛbaa. No hewɔ lɛ ehe miihia ni wɔhiɛ ahi wɔhe nɔ koni wɔyoo ŋmɛnɛŋmɛnɛ beaŋ “amaŋfɔfeemɔ nihii nii” lɛ, koni wɔkwɛ hu ni wɔjo foi kɛshi he ni ebaje oshara mli nɛɛ kwraa.
12, 13. Mɛni hewɔ eja gbɛ akɛ aaatsɛ Jeŋmaji Akpaŋmɔ lɛ akɛ ŋmɛnɛŋmɛnɛ beaŋ “nihii nii” lɛ?
12 Mɛni ji nakai ŋmɛnɛŋmɛnɛ beaŋ “nihii nii” lɛ? Odaseyeli lɛ tsɔɔ akɛ no ji Jeŋmaji Akpaŋmɔ, ni akɛbɔi nitsumɔ yɛ afi 1920 mli, beni je lɛ bote enaagbee be lɛ mli lɛ sɛɛ nɔŋŋ lɛ. Shi no aaanyɛ afee “amaŋfɔfeemɔ nihii nii” yɛ mɛɛ gbɛ nɔ?
13 Kaimɔ akɛ, akɛ Hebri wiemɔ kɛha “nihii nii” lɛ tsuɔ nii yɛ Biblia lɛ mli kɛkɔɔ amagai kɛ amaga jamɔ nifeemɔi ahe titri. Ani aja Kpaŋmɔ lɛ tamɔ amaga ko? Hɛɛ, afee nakai! Osɔfoi lɛ kɛma “he krɔŋkrɔŋ” lɛ, ni amɛ sɛɛnyiɛlɔi lɛ kɛ hetuu-kɛhamɔ ni mli wa waa bɔi lɛ hamɔ. Federal Council of the Churches of Christ ni yɔɔ Amerika lɛ jaje akɛ Kpaŋmɔ lɛ baafee “Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɛɛ nɔ.” U.S. Mlawoo Gwabɔɔ lɛ nine shɛ woji babaoo nɔ kɛjɛ jamɔ kui aŋɔɔ ni miiwo amɛ hewalɛ ni amɛkpɛlɛ Jeŋmaji Akpaŋmɔ lɛ Kpaŋmɔ lɛ nɔ. Baptistbii, Congregationalistbii, kɛ Presbyterianbii Akuu ni yɔɔ Britain lɛ jie yi akɛ “dɛŋdade kome pɛ ni yɔɔ kɛha [toiŋjɔlɛ namɔ yɛ shikpɔŋ nɛɛ nɔ].”—Kwɛmɔ Kpojiemɔ 13:14, 15.
14, 15. Mɛɛ gbɛ nɔ Jeŋmaji Akpaŋmɔ lɛ kɛ sɛɛ mli lɛ, Jeŋmaji Ekomefeemɔ lɛ badamɔ “he krɔŋkrɔŋ” lɛ yɛ?
14 Áto Nyɔŋmɔ Mesia Maŋtsɛyeli lɛ ama shi yɛ ŋwɛi yɛ 1914, shi jeŋmaji lɛ je shishi amɛkɛ amɛhe wuu ta koni amɛkɛto amɛ diɛŋtsɛ amɛ maŋtsɛyelii amɛmamɔ shi. (Lala 2:1-6) Beni akɛ susumɔ ba kɛha Jeŋmaji Akpaŋmɔ lɛ feemɔ lɛ, no mli lɛ jeŋmaji ni kɛ amɛhe ewuu ta yɛ klɛŋklɛŋ jeŋ ta lɛ mli, kɛ osɔfoi hu ni jɔɔ amɛ asraafoi lɛ, etsɔ hiɛ amɛha ana faŋŋ momo akɛ amɛkwa Nyɔŋmɔ mla lɛ kwraa. Amɛkpɛlɛɛɛ Kristo nɔ akɛ Maŋtsɛ. Enɛ hewɔ lɛ, amɛkɛ gbɛhe ni ji Nyɔŋmɔ Maŋtsɛyeli lɛ nɔ lɛ ha adesai agbɛjianɔtoo; amɛkɛ Jeŋmaji Akpaŋmɔ lɛ ma “he krɔŋkrɔŋ” lɛ, he ni ebɛ gbɛhe ko kwraa yɛ lɛ.
15 Ákɛ Kpaŋmɔ lɛ sɛɛyelɔ lɛ, Jeŋmaji Ekomefeemɔ lɛ hu ba shihilɛ mli yɛ October 24, 1945. Sɛɛ mli lɛ, Roma paapai lɛ jie Jeŋmaji Ekomefeemɔ lɛ yi akɛ “naagbee hiɛnɔkamɔ kɛha gbeekpamɔ kɛ toiŋjɔlɛ” kɛ “toiŋjɔlɛ kɛ jalɛsaneyeli kpee hé ni fe fɛɛ.” Hɛɛ, Jeŋmaji Akpaŋmɔ lɛ, kɛ esɛɛyelɔ, ni ji Jeŋmaji Ekomefeemɔ lɛ, batsɔ amaga lɛlɛŋ, ni ji “nihii nii” yɛ Nyɔŋmɔ, kɛ ewebii hu ahiɛ.
Ajo Foi Kɛjɛ Mɛni Mli?
16. Ehe miihia ni mɛi ni sumɔɔ jalɛ nifeemɔ lɛ ajo foi kɛjɛ mɛni mli ŋmɛnɛ?
16 Kɛ mɛi ni sumɔɔ jalɛ nifeemɔ lɛ ‘na’ enɛ, ni amɛyoo nɔ ni nakai majimaji ateŋ gbɛjianɔtoo lɛ ji kɛ bɔ ni ajaa lɛ tamɔ amaga lɛ, esa akɛ amɛjo foi kɛya he ni yɔɔ shweshweeshwe. Amɛjo foi kɛjɛ mɛni mli? Kɛjɛ nɔ ni feɔ ŋmɛnɛŋmɛnɛ Yerusalem ni yeee anɔkwale lɛ he mfoniri, ni ji, Kristendom, kɛ agbɛnɛ hu Babilon Kpeteŋkpele lɛ, ni ji jeŋ apasa jamɔ gbɛjianɔtoo lɛ fɛɛ mli.—Kpojiemɔ 18:4.
17, 18. Mɛɛ amaŋfɔfeemɔ ŋmɛnɛŋmɛnɛ beaŋ “nihii nii” lɛ kɛbaaba?
17 Kaimɔ hu akɛ, yɛ klɛŋklɛŋ afii oha lɛ mli beni Roma asraafoi lɛ kɛ amɛ wɔŋjamɔ aflaŋai, ni ji “nihii nii” lɛ bote Yudafoi amaŋtiase krɔŋkrɔŋ lɛ mli lɛ, amɛtee jɛmɛ koni amɛkɛ amaŋfɔfeemɔ aba Yerusalem kɛ ejamɔ gbɛjianɔtoo lɛ nɔ. Yɛ wɔgbii nɛɛ amli lɛ, amaŋfɔfeemɔ lɛ baaba, jeee maŋtiase kome nɔ, loo yɛ Kristendom pɛ nɔ, shi moŋ ebaaba jeŋ muu fɛɛ apasa jamɔ gbɛjianɔtoo lɛ nɔ.—Kpojiemɔ 18:5-8.
18 Agba afɔ̃ shi yɛ Kpojiemɔ 17:16 akɛ mfoniri-feemɔŋ kooloo ko ni tsuɔ tamɔ muneele, ni ebafee Jeŋmaji Ekomefeemɔ lɛ, baatsɔ ehiɛ ewo Babilon Kpeteŋkpele ni tamɔ ajwamaŋ lɛ ni ekɛ yiwalɛ baakpata ehiɛ kwraa. Ekɛ wiemɔ ni mli kã shi faŋŋ tsu nii ni ekɛɛ: “Ni akolontoi nyɔŋma lɛ ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ.” Nɔ ni enɛ baatsɔɔ lɛ yɛ gbeyei waa kɛji aaasusu he. Nɔ ni ekɛbaaba ji apasa jamɔi sɔrɔtoi fɛɛ anaagbee yɛ shikpɔŋ nɛɛ nɔ he fɛɛ he. Enɛ baatsɔɔ lɛlɛŋ akɛ amanehulu kpeteŋkpele lɛ eje shishi.
19. Mɛɛ kui komɛi etee nɔ efee Jeŋmaji Ekomefeemɔ lɛ fã kɛjɛ be mli ni ato shishi nɛɛ, ni mɛni hewɔ enɛ he hiaa waa lɛ?
19 Esa kadimɔ jogbaŋŋ akɛ kɛjɛ be mli ni Jeŋmaji Ekomefeemɔ lɛ bɔi nitsumɔ yɛ 1945 mli kɛbaa nɛɛ, kui ni heee Nyɔŋmɔ nɔ amɛyeee, ni amɛteɔ shi amɛwoɔ jamɔ lɛ ayi efa babaoo yɛ emli bii lɛ ateŋ. Nɛkɛ maŋkwramɔ hegbɛi ni kɛ basabasa-feemɔi baa nɛɛ ena gbɛfaŋnɔ titri yɛ jamɔ mli nifeemɔi ni awoɔ mlai ashiɔ loo atsiɔ naa kwraa lɛ mli, yɛ bei sɔrɔtoi amli yɛ je lɛŋ he fɛɛ he. Ni kɛlɛ, yɛ afii fioo ni eho lɛ amli lɛ, nɔnyɛɛ ni nɔyelii kɛbaa jamɔ kui anɔ lɛ naa eba shi kwraa yɛ hei babaoo. Kɛha mɛi komɛi lɛ, ekolɛ ebaafee tamɔ nɔ ni oshara ni yɔɔ jamɔ he lɛ bɛ dɔŋŋ.
20. Mɛɛ gbɛi nɛkɛ je lɛŋ jamɔi lɛ ena amɛha amɛhe?
20 Babilon Kpeteŋkpele lɛ mli jamɔi lɛ kã he amɛji hewalɛ ni kɛ ekaa fiteɔ nii yɛ je lɛ mli. Adafitswaa woji amli saji fɔɔ kui ni kɛ amɛhe wuɔ ta kɛ kui ni feɔ nibii fɔji lɛ ahe wiemɔ kɛtsɔɔ jamɔ ni amɛyɔɔ mli loo amɛfiɔ sɛɛ lɛ tãtsii nɔ. Polisifoi ni tsiɔ basabasa-feemɔ naa kɛ asraafoi eyatutua sɔlemɔ tsui koni amɛkɛtsi basabasa-feemɔi ni yaa nɔ yɛ jamɔ kui ni kɛ amɛhe kpaaa gbee lɛ ateŋ lɛ naa. Jamɔ kui eha shika kɛfi maŋ hiɛ atuatsemɔ nifeemɔi asɛɛ. Jamɔ mli hetsɛ eha mɔdɛŋ ni Jeŋmaji Ekomefeemɔ lɛ bɔɔ koni eha shihilɛ kpakpa ahi wekui sɔrɔtoi ateŋ lɛ efee efolo. Yɛ toiŋjɔlɛ kɛ shweshweeshwe shihilɛ oti lɛ sɛɛtiumɔ mli lɛ, kui komɛi ni yɔɔ Jeŋmaji Ekomefeemɔ lɛ mli lɛ baasumɔ ni amɛna akɛ akpata jamɔ mli hewalɛi ni tsĩɔ amɛnaa lɛ fɛɛ ahiɛ kwraa.
21. (a) Namɔ baatsɔɔ be mli ni esa akɛ akpata Babilon Kpeteŋkpele lɛ hiɛ? (b) Mɛni ehe hiaa ni afee dani nakai be lɛ ashɛ?
21 Oti kroko hu ni he hiaa yɛ ni esa akɛ asusu he. Eyɛ mli akɛ, akɛ “akolontoi” ni kɛ asraafoi ewula ehe, ni jɛ Jeŋmaji Ekomefeemɔ lɛ mli lɛ baatsu nii ni akɛkpata Babilon Kpeteŋkpele lɛ hiɛ moŋ, shi nakai hiɛkpatamɔ lɛ baafee ŋwɛi kojomɔ kpojiemɔ diɛŋtsɛ. Abaatsu kojomɔ nɛɛ he nii yɛ Nyɔŋmɔ be ni eto lɛ mli. (Kpojiemɔ 17:17) Mɛni esa akɛ wɔfee yɛ be nɛɛ mli? “Nyɛjea emli”—nyɛjea Babilon Kpeteŋkpele lɛ mli—taakɛ Biblia lɛ haa hetoo lɛ.—Kpojiemɔ 18:4.
22, 23. Mɛni foijee ni tamɔ nakai biɔ?
22 Nɛkɛ foijee kɛha shweshweeshwe feemɔ nɛɛ jeee kɛmiiya shikpɔŋ nɔ he ko pɔtɛɛ, tamɔ bɔ ni Yudafoi Kristofoi lɛ fee beni amɛshiɔ Yerusalem lɛ. Eji foijee kɛmiijɛ Kristendom jamɔi lɛ amli, hɛɛ, kɛmiijɛ Babilon Kpeteŋkpele lɛ fãi sɔrɔtoi lɛ fɛɛ mli. Etsɔɔ mɔ he ni ebaatsi kwraa, jeee kɛmiijɛ apasa jamɔ gbɛjianɔtoi ahe pɛ kɛkɛ, shi moŋ kɛmiijɛ amɛ kusumii kɛ mumɔ ni amɛwoɔ he hewalɛ lɛ hu he. Eji foijee kɛmiiya he ni yɔɔ shweshweeshwe yɛ Yehowa teokrase gbɛjianɔtoo lɛ mli.—Efesobii 5:7-11.
23 Beni Yehowa tsuji ni afɔ amɛ mu lɛ wie ŋmɛnɛŋmɛnɛ beaŋ nihii nii, ni ji Jeŋmaji Akpaŋmɔ lɛ he klɛŋklɛŋ, yɛ Jeŋ Ta I sɛɛ lɛ, te Odasefoi lɛ fee amɛnii yɛ he amɛha tɛŋŋ? No mli lɛ amɛfo Kristendom sɔlemɔi lɛ amli bii ni amɛji tsutsu lɛ mli momo. Shi amɛyoo fiofio akɛ amɛkã he amɛkɛ amɛhe miikpɛtɛ Kristendom kusumii kɛ enifeemɔi, tamɔ sɛŋmɔtso ni akɛtsuɔ nii kɛ Blonya kɛ wɔŋjalɔi agbijuji krokomɛi ayeli he lolo. Beni amɛbale anɔkwale ni kɔɔ nibii nɛɛ ahe lɛ, amɛtsu he nii oya nɔŋŋ. Amɛtsu ŋaawoo ni yɔɔ Yesaia 52:11 lɛ he nii, akɛ: “Nyɛtsia nyɛhe, nyɛtsia nyɛhe, nyɛjea kpo kɛjɛa jɛi! Nyɛkataa nɔ ko ni he tseee he! Nyɛjea kpo kɛjɛa emli! Nyɛ mɛi ni nyɛtereɔ Yehowa nibii lɛ, nyɛtsua nyɛhe!”
24. Kɛjɛ 1935 titri kɛbaa nɛɛ, namɛi ebafata he yɛ foijee lɛ mli?
24 Titri lɛ kɛjɛ 1935 kɛbaa nɛɛ, mɛi krokomɛi babaoo ni amɛyi miifa, ni ji gbɔmɛi ni miikase gbɛkpamɔ ni ji naanɔ wala yɛ shikpɔŋ nɔ lɛ he nii lɛ, hu bɔi gbɛ ni tamɔ nakai nɔŋŋ kɔmɔ. Amɛ hu ‘amɛna nihii nii lɛ akɛ edamɔ he krɔŋkrɔŋ lɛ,’ ni amɛyooɔ nɔ ni enɛ tsɔɔ. Yɛ amɛ yiŋkpɛɛ akɛ amɛaajo foi lɛ feemɔ sɛɛ lɛ, amɛha ajie amɛgbɛi kwraa kɛjɛ gbɛjianɔtoi ni feɔ Babilon Kpeteŋkpele lɛ fã lɛ amli bii ateŋ.—2 Korintobii 6:14-17.
25. Mɛni abiɔ kɛfata tako mli ni mɔ ko kɛ apasa jamɔ baafo kwraa lɛ he?
25 Shi kɛlɛ, foijee kɛmiijɛ Babilon Kpeteŋkpele lɛ mli lɛ biɔ babaoo fe apasa jamɔ shimɔ kɛkɛ. Ebiɔ babaoo hu fe kpeei fioo komɛi ni aaaya yɛ Maŋtsɛyeli Asa lɛ nɔ, aloo kpo ni aaaje ni ayashiɛ sanekpakpa lɛ shikome loo shii enyɔ ko yɛ nyɔŋ kome mli. Ekolɛ mɔ ko eshi Babilon Kpeteŋkpele lɛ mli yɛ heloo gbɛfaŋ, shi ani eshi lɛ kwraa lɛlɛŋ? Ani etsi ehe kɛjɛ jeŋ ni Babilon Kpeteŋkpele lɛ ji efã titri lɛ he? Ani ekɛ ehe kpɛtɛɔ nibii ni jieɔ emumɔ lɛ kpo—ni ji mumɔ ni kuɔ Nyɔŋmɔ jalɛ shishitoo mlai amli lɛ he lolo? Ani ebuɔ bɔlɛnamɔ mli jeŋba kpakpa kɛ gbalashihilɛ mli anɔkwayeli akɛ nɔ ni he ehiaaa? Ani emaa lɛ diɛŋtsɛ kɛ heloonaa nibii anɔ mi titri fe mumɔŋ nibii? Esaaa ni eŋmɛɔ gbɛ ni nibii agbɛjianɔtoo nɛɛ naa eshihilɛ kɛ ejeŋba nɔ hewalɛ.—Mateo 6:24; 1 Petro 4:3, 4.
Kaaha Nɔ ko Miitsĩ Ofoijee Naa!
26. Mɛni baaye abua wɔ, jeee ni wɔje foijee lɛ shishi kɛkɛ, shi ni wɔgbe naa yɛ omanyeyeli mli hu?
26 Be mli ni wɔjoɔ foi kɛyaa he ni yɔɔ shweshweeshwe lɛ, ehe miihia ni wɔkakwɛ nibii ni wɔshi yɛ wɔsɛɛ lɛ ni efee wɔ akɔnɔ. (Luka 9:62) Ehe miihia ni wɔha wɔjwɛŋmɔi kɛ wɔtsuii ahi Nyɔŋmɔ Maŋtsɛyeli lɛ kɛ ejalɛ lɛ nɔ waa diɛŋtsɛ. Ani wɔtswa wɔfai shi akɛ wɔɔjie wɔ hemɔkɛyeli kpo yɛ enɛɛmɛi ataomɔ klɛŋklɛŋ mli, kɛ hekɛnɔfɔɔ akɛ Yehowa baajɔɔ nɛkɛ toiboo gbɛ ni wɔkɔ nɛɛ nɔ? (Mateo 6:31-33) Esa akɛ wɔ Ŋmalɛ naa nɔmimaa lɛ akanya wɔ ni wɔkɔ gbɛ ni tamɔ nɛkɛ, beni wɔkɛ gbɛkpamɔ ni mli wa mɛɔ nibii ni he hiaa ni baaba yɛ je lɛŋ lɛ.
27. Mɛni hewɔ ehe hiaa ni wɔsusu saji ni abi yɛ biɛ lɛ ahe kɛ hiɛdɔɔ lɛ?
27 Ŋwɛi kojomɔ he nii ni abaatsu lɛ baaje shishi kɛ Babilon Kpeteŋkpele lɛ hiɛkpatamɔ. Abaakpata nakai apasa jamɔ maŋtsɛyeli ni tamɔ yoo ajwamaŋ lɛ hiɛ kwraa kɛjɛ shihilɛ mli kɛya naanɔ. Nakai be lɛ ebɛŋkɛ kpaakpa diɛŋtsɛ! Mɛni baafee wɔ shidaamɔ akɛ aŋkroaŋkroi kɛji nakai be ni yɔɔ gbeyei lɛ shɛ? Ni yɛ amanehulu kpeteŋkpele lɛ naagbee, beni akpataa Satan nibii agbɛjianɔtoo fɔŋ lɛ fã ni eshwɛ lɛ hu fɛɛ hiɛ lɛ, nɛgbɛ abaana wɔ akɛ wɔdamɔ? Kɛ wɔfee nɔ ni he hiaa bianɛ lɛ, no lɛ abaama wɔ shweshweeshwe feemɔ nɔ mi. Yehowa kɛɔ wɔ akɛ: “Mɔ ni boɔ mi toi lɛ aaahi shi shweshweeshwe.” (Abɛi 1:33) Eba akɛ wɔɔfee mɛi ni sa akɛ amɛaasɔmɔ Yehowa kɛya naanɔ, kɛtsɔ Yehowa ni wɔɔya nɔ wɔsɔmɔ lɛ yɛ anɔkwayeli kɛ miishɛɛ mli yɛ nibii agbɛjianɔtoo nɛɛ naagbee be nɛɛ mli lɛ nɔ.
[Shishigbɛ niŋmaa]
a Kwɛmɔ Insight on the Scriptures, ni Watchtower Bible and Tract Society of New York, Inc. fee lɛ, Kpo 1, baafai 634-5.
Ani Okaiɔ?
◻ Mɛni ji ŋmɛnɛŋmɛnɛ beaŋ “nihii nii” lɛ?
◻ “Nihii nii lɛ . . . [ma] he krɔŋkrɔŋ lɛ” yɛ mɛɛ shishinumɔ naa?
◻ Mɛni he hiaa yɛ foijee kɛha shweshweeshwe feemɔ lɛ mli bianɛ?
◻ Mɛni hewɔ nifeemɔ ni tamɔ nɛkɛ biɔ oyaiyeli lɛ?
[Mfoniri ni yɔɔ baafa 16]
Esa akɛ Yesu sɛɛnyiɛlɔi lɛ ajo foi oya ni amɛna yibaamɔ