Yitso 111

Naagbee Gbii lɛ Ahe Okadi

YƐ NƐKƐ be nɛɛ mli lɛ eshɛ Jufɔ shwane. Beni Yesu ta Mu Gɔŋ lɛ nɔ, ni ekwɛɔ sɔlemɔ tsu lɛ yɛ jɔɔ mli gbɛ lɛ, Petro, Andrea, Yakobo kɛ Yohane ba eŋɔɔ yɛ afa gbɛ. Akɛni Yesu egba yɛ be fioo ko ni tsɔ hiɛ lɛ mli akɛ ashiŋ tɛ kome yɛ tɛ kroko nɔ yɛ mli hewɔ lɛ, amɛmiisusu sɔlemɔ tsu lɛ he waa.

Shi kɛlɛ etamɔ nɔ ni nibii babaoo yɛ amɛjwɛŋmɔ mli yɛ be mli ni amɛbɛŋkɛɔ Yesu lɛ. Otsii fioo ni tsɔ hiɛ lɛ, ewie ‘ebaa,’ ni ji be mli ni “aaajie gbɔmɔ Bi lɛ kpo” lɛ he. Ni yɛ mra be ko mli lɛ, ekɛ amɛ ewie “nibii agbɛjianɔtoo lɛ naagbee” lɛ he. No hewɔ lɛ bɔfoi lɛ miitao amɛle nibii pii lolo.

Amɛkɛɛ: “Tsɔɔmɔ beyinɔ ni aaafee nii nɛɛ [ni kɛ Yerusalem kɛ esɔlemɔ tsu lɛ hiɛkpatamɔ aaaba lɛ], ni mɛni ji obaa lɛ kɛ je nɛŋ naagbee lɛ he okadi?” Yɛ faŋŋ mli lɛ, amɛsanebimɔ lɛ hiɛ fai sɔrɔtoi etɛ. Klɛŋklɛŋ lɛ, amɛmiitao ni amɛle Yerusalem kɛ esɔlemɔ tsu lɛ hiɛkpatamɔ lɛ he sane, ni nɔ ni nyiɛ sɛɛ lɛ kɔɔ ba ni Yesu baaba yɛ Maŋtsɛyeli hewalɛ mli lɛ he, ni naagbee lɛ amɛmiitao amɛle nibii agbɛjianɔtoo muu lɛ fɛɛ naagbee.

Yesu ha sanebimɔ lɛ fai sɔrɔtoi etɛ lɛ fɛɛ hetoo yɛ ehetoohamɔ kakadaŋŋ lɛ mli. Eha amɛ okadi ko ni baakadi be mli ni Yudafoi anibii agbɛjianɔtoo lɛ baaba naagbee; shi ekɛ babaoo hu fata he. Ekɛ okadi ko hu ha ni no baahɛle mɛi ni baatsɔmɔ ekaselɔi yɛ wɔsɛɛ lɛ ashi koni amɛtsɔ nɔ amɛle akɛ amɛyɛ be mli ni eba lɛ mli ni akɛ amɛbɛŋkɛ nibii agbɛjianɔtoo muu lɛ fɛɛ naagbee lɛ he kpaakpa.

Beni afii lɛ hoɔ kɛyaa lɛ, bɔfoi lɛ na Yesu gbalɛ lɛ mlibaa. Hɛɛ, nibii pɔtɛɛ ni egba efɔ shi yɛ he lɛ bɔi baa yɛ amɛgbii lɛ amli. No hewɔ lɛ, Yudafoi anibii agbɛjianɔtoo lɛ kɛ esɔlemɔ we lɛ hiɛkpatamɔ lɛ ebatiii Kristofoi ni yɔɔ wala mli lolo yɛ no sɛɛ afi 37, yɛ afi 70 Ŋ.B. lɛ shi trukaa.

Shi kɛlɛ, Kristo baa lɛ kɛ nibii agbɛjianɔtoo lɛ naagbee lɛ baaa yɛ afi 70 Ŋ.B. lɛ mli. Ba ni eba yɛ Maŋtsɛyeli hewalɛ mli lɛ ba yɛ sɛɛ mli be ko kwraa mli. Shi mɛɛ be? Yesu gbalɛ lɛ he susumɔ jie enɛ kpo yɛ faŋŋ mli.

Yesu gba efɔ shi akɛ abaanu “tai kɛ tai asaji ahe.” Ekɛɛ akɛ “maŋ aaate shi awo,” ni hɔ̃ji, shikpɔŋhosomɔi, kɛ tsɛ̃ŋemɔ helai baaba. Abaanyɛ ekaselɔi lɛ ni abaagbe amɛ. Amale gbalɔi baate shi ni amɛbaalaka mɛi babaoo. Mlakwamɔ hu baafa, ni mɛi pii asuɔmɔ lɛ he baajɔ. Yɛ nakai beaŋ nɔŋŋ lɛ, abaashiɛ Nyɔŋmɔ Maŋtsɛyeli lɛ he sanekpakpa lɛ ni akɛye jeŋmaji lɛ fɛɛ odase.

Eyɛ mli akɛ Yesu gbalɛ lɛ na emlibaa bibioo ko pɛ yɛ be ni tsɔ Yerusalem hiɛkpatamɔ yɛ afi 70 Ŋ.B. hiɛ lɛ mli moŋ, shi emlibaa ni mli lɛɛ baa mli yɛ ebaa be lɛ kɛ nibii agbɛjianɔtoo lɛ naagbee be lɛ mli. Kɛ wɔsusu nibii ni etee nɔ yɛ je lɛŋ fɛɛ kɛjɛ 1914 lɛ he lɛ, ejieɔ lɛ kpo faŋŋ akɛ Yesu gbalɛ ni he hiaa lɛ miina emlibaa ni mli lɛɛ kɛjɛ nakai afi lɛ mli kɛbaa.

Okadi ni Yesu kɛha lɛ fa kroko ji “amaŋfɔ nihiinii lɛ” puemɔ. Yɛ afi 66 Ŋ.B. mli lɛ, nɛkɛ amaŋfɔ nihiinii nɛɛ pue akɛ Roma asraafoi ni “bɔ ŋsra” amɛwo Yerusalem he ni amɛtsa sɔlemɔ tsu lɛ gbogboi lɛ ashishi lɛ. “Nihiinii” lɛ damɔ he ni esaaa ni edamɔɔ.

Yɛ nɛkɛ okadi nɛɛ mlibaa ni mli lɛɛ mli lɛ, nihiinii lɛ ji Jeŋmaji Akpaŋmɔ lɛ kɛ esɛɛyelɔ, ni ji Jeŋmaji Ekomefeemɔ lɛ. Kristendom buɔ gbɛjianɔtoo ni ayɔɔ kɛha jeŋ toiŋjɔlɛnamɔ nɛɛ akɛ nɔ ni yeɔ Nyɔŋmɔ Maŋtsɛyeli lɛ najiaŋ. Mɛɛ nihiinii nɛ! No hewɔ lɛ, yɛ be ni sa mli lɛ, maŋkwramɔŋ hewalɛi ni kɛ amɛhe bɔɔ Jeŋmaji Ekomefeemɔ lɛ he lɛ baatsɔ amɛhiɛ amɛwo Kristendom (ni feɔ Yerusalem he mfoniri lɛ) ni amɛaafee lɛ amaŋfɔ.

No hewɔ lɛ Yesu gba efɔ shi akɛ: “Amanehulu babaoo aaaba, ni anako nɔ da kɛjɛ je lɛŋ shishijee kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” Eyɛ mli akɛ Yerusalem hiɛkpatamɔ ni ba yɛ afi 70 Ŋ.B. lɛ ji amanehulu babaoo, ni abɔ he amaniɛ akɛ mɛi ni fe akpeiakpe kome gboi moŋ, shi ejeee amanehulu ni da fe Nu Afua ni ba jeŋ fɛɛ yɛ Noa gbii lɛ amli lɛ. No hewɔ lɛ Yesu gbalɛ lɛ fa nɛɛ mlibaa ni mli lɛɛ ka wɔhiɛ lolo ni ebaaba mli.

Hekɛnɔfɔɔ yɛ Naagbee Gbii lɛ Amli

Beni Jufɔ, Nisan 11 baa naagbee lɛ, Yesu kɛ ebɔfoi lɛ tee nɔ yɛ amɛsanegbaa ni kɔɔ ba ni eba yɛ Maŋtsɛyeli hewalɛ mli kɛ nibii agbɛjianɔtoo lɛ naagbee lɛ he lɛ mli. Ebɔ amɛ kɔkɔ yɛ nyiɛmɔ ni amɛaanyiɛ amale Kristoi asɛɛ lɛ he. Ekɛɛ akɛ, abaabɔ mɔdɛŋ, “ni aaaho kulɛ, alaka mɛi ni ahala lɛ tete.” Shi nɛkɛ mɛi ni ahala amɛ nɛɛ baabua amɛhe naa yɛ he ni amɛbaana anɔkwa mumɔŋ niyenii yɛ, ni ji, yɛ anɔkwa Kristo lɛ ŋɔɔ yɛ be mli ni eba ni anaaa lɛ lɛ, tamɔ okropɔŋi ni naa nii kɛyaa shɔŋŋ. Alakaŋ amɛ ni amɛyabuaŋ amɛhe naa hu yɛ amale Kristo ko he.

Amale Kristoi lɛ baanyɛ ajie amɛhe kpo ni ana amɛ pɛ. Shi yɛ gbɛ kroko nɔ lɛ, ba ni Yesu baaba lɛ, anaŋ lɛ. Ebaaba mli yɛ adesai ayinɔsane mli be ko ni yɔɔ gbeyei mli, taakɛ Yesu kɛɛ lɛ: “Hulu aaawo duŋ, ni nyɔŋtsere hu kpɛŋ dɔŋŋ.” Hɛɛ, nɛkɛ be nɛɛ bafee be ni adesai kɛhi shihilɛ mli lɛ mli duŋ be fe fɛɛ. Ebaafee tamɔ nɔ ni hulu ewo duŋ yɛ shwane fintiŋŋ, kɛ agbɛnɛ tamɔ nɔ ni nyɔŋtsere hu kpɛɛɛ yɛ jenamɔ mli.

Yesu tee nɔ akɛ: “Ni ŋwɛi hewalɛi lɛ aaahoso.” Ekɛ enɛ miitsɔɔ akɛ ŋwɛi ni wɔnaa kɛ wɔhiŋmɛi nɛɛ baatsake afee kɔkɔbɔɔ nɔ ko ni yɔɔ gbeyei. Ŋwɛii lɛ ebafeŋ loofɔji ashihilɛ he pɛ kɛkɛ dɔŋŋ, shi moŋ ebaayi kɛ tawuu kɔɔyɔɔŋ lɛji, okpɛlɛmii, kɛ tsɔnei ni akɛfaa gbɛ kɛyaa ŋwɛiniiaŋ. Gbeyeishemɔ kɛ yiwalɛ ni baaba lɛ baafa fe eko fɛɛ eko ni ana yɛ adesai ayinɔsane be mli.

Yesu kɛɛ akɛ, nɔ ni baajɛ mli aba ji “jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye yɛ ŋshɔ kɛ ŋshɔkei agbɛɛmɔ hewɔ; ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ.” Lɛlɛŋ, adesai ashihilɛ be mli duŋ be fe fɛɛ nɛɛ kɛ be ni, taakɛ Yesu wie yɛ he lɛ, “gbɔmɔ Bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara” lɛ aaaba.

Shi jeee mɛi fɛɛ baawo yara yɛ be mli ni ‘gbɔmɔ Bi lɛ kɛ hewalɛ aaaba’ ni ekɛbakpata nibii agbɛjianɔtoo fɔŋ nɛɛ hiɛ lɛ. “Mɛi ni ahala,” ni ji 144,000 lɛ ni kɛ Kristo baana gbɛfaŋnɔ yɛ eŋwɛi Maŋtsɛyeli lɛ mli lɛ woŋ yara, ni nakai nɔŋŋ amɛhefatalɔi, ni ji mɛi ni Yesu tsɛ amɛ yɛ mra be ko mli akɛ “tooi krokomɛi” lɛ hu woŋ yara. Eyɛ mli akɛ amɛyɛ adesai ashihilɛ be mli duŋ be fe fɛɛ lɛ mli moŋ, shi mɛnɛɛmɛi hereɔ Yesu ekaawoo wiemɔi lɛ anɔ: “Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.”

Bɔni afee ni ekaselɔi ni baahi shi yɛ naagbee gbii lɛ amli lɛ anyɛ ayoo bɔ ni naagbee lɛ ebɛŋkɛ kwraa eha lɛ, Yesu kɛ nɛkɛ abɛbua nɛɛ ha: “Nyɛkwɛa agbami tso lɛ kɛ tsei fɛɛ; be mli beebe ni amɛfuɔ baai lɛ, kɛ nyɛna lɛ, nyɛ diɛŋtsɛ nyɛle akɛ latsaa be eshɛ eta. Nakai nɔŋŋ hu, beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ eta. Lɛlɛŋ, miikɛɛ nyɛ akɛ: Nɛkɛ yinɔ nɛɛ hoŋ, ja fɛɛ eba mli da.”

No hewɔ lɛ, kɛ ekaselɔi lɛ na akɛ okadi lɛ fai sɔrɔtoi lɛ fɛɛ miiba mli lɛ, no lɛ esa akɛ amɛyoo akɛ nibii agbɛjianɔtoo lɛ naagbee ebɛŋkɛ ni akɛ etsɛŋ ni Nyɔŋmɔ Maŋtsɛyeli lɛ baajie efɔŋfeemɔ kɛya kwraa. Yɛ anɔkwale mli lɛ, naagbee lɛ baaba yɛ mɛi ni naa nɛkɛ nibii nɛɛ fɛɛ ni Yesu gba efɔ shi lɛ amlibaa lɛ awala be mli! Yɛ be mli ni Yesu woɔ ekaselɔi ni baahi wala mli yɛ nɛkɛ naagbee gbii ni jaraa nɛɛ amli lɛ ŋaa lɛ, ekɛɛ:

“Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne. No hewɔ lɛ nyɛsaraa be fɛɛ be ni nyɛsɔlea, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ gbɔmɔ Bi lɛ hiɛ nyɛdamɔ.”

Obalayei Nilelɔi lɛ kɛ Kwashiai Lɛ

Yesu miiha sane ni ebɔfoi lɛ bi lɛ ni ji okadi ni tsɔɔ ba ni eba yɛ Maŋtsɛyeli hewalɛ mli lɛ hetoo. Agbɛnɛ ekɛ okadi lɛ fai krokomɛi hu ha yɛ abɛbuai, loo sane naatsɔɔmɔi sɔrɔtoi etɛ mli.

Mɛi ni yɔɔ wala mli yɛ be mli ni eba lɛ baana abɛbuai lɛ eko fɛɛ eko mlibaa. Ekɛ nɛkɛ wiemɔi nɛɛ kpa klɛŋklɛŋ nɔ lɛ hiɛ akɛ: “No mli lɛ ŋwɛi maŋtsɛyeli lɛ aaatamɔ obalayei nyɔŋma ni kɔlɔ amɛkanei akɛ amɛyaakpee ayemforowu. Shi amɛteŋ mɛi enumɔ lɛ, nilelɔi ni, ni mɛi enumɔ lɛ kwashiai ni.”

Wiemɔ ni Yesu wie akɛ “no mli lɛ ŋwɛi maŋtsɛyeli lɛ aaatamɔ obalayei nyɔŋma” lɛ etsɔɔɔ akɛ mɛi ni baana ŋwɛi Maŋtsɛyeli lɛ mli gbɛfaŋnɔ lɛ ateŋ mɛi fa ji kwashiai ni fa hu lɛ nilelɔi ni! Dabi, shi moŋ eetsɔɔ akɛ yɛ nɔ ni kɔɔ ŋwɛi Maŋtsɛyeli lɛ he lɛ mli lɛ, ehe sane ko yɛ ni tamɔ nɛkɛ loo nɛkɛ, aloo akɛ saji ni kɔɔ Maŋtsɛyeli lɛ he lɛ baatamɔ enɛ loo enɛ.

Obalayei nyɔŋma lɛ feɔ Kristofoi fɛɛ ni yɔɔ hegbɛ, aloo mɛi fɛɛ hu ni kɛɔ akɛ amɛyɛ hegbɛ kɛha ŋwɛi Maŋtsɛyeli lɛ ahe mfoniri. Pentekoste yɛ afi 33 Ŋ.B. ji be mli ni awo Kristofoi asafo lɛ shi akɛ ekɛ ayemforowu ni awo ehiɛ nyam, Yesu Kristo baabote gbalashihilɛ mli. Shi yookpeemɔ lɛ baaba nɔ yɛ ŋwɛi yɛ wɔsɛɛ be ko ni atsɔko amɛ lɛ mli.

Yɛ abɛbua lɛ mli lɛ, obalayei nyɔŋma lɛ je kpo kɛ yiŋtoo akɛ amɛyaakpa ayemforowu lɛ gbɛ koni amɛfata mɛi krokomɛi lɛ ahe kɛha yookpeemɔ lɛ. Kɛ ebashɛ shi lɛ, amɛbaasu amɛkanei lɛ koni eha gbɛ ni abaanyiɛ nɔ lɛ nɔ akpɛ, koni amɛtsɔ no nɔ amɛwo ehiɛ nyam yɛ be mli ni ekɛ eyemforo lɛ baa shia ni asaa ato lɛ lɛ. Shi kɛlɛ, Yesu tsɔɔ mli akɛ: “Mɛi ni ji kwashiai lɛ hole amɛkanei lɛ, shi amɛŋɔɔɔ mu amɛfataaa he. Shi nilelɔi lɛ ŋɔ mu wo amɛtɔi amli amɛfata amɛkanei lɛ ahe. Ni beni ayemforowu lɛ tsɛ lɛ, wɔ ye amɛ fɛɛ ni amɛwɔwɔi.”

Ayemforowu lɛ sɛɛ ni tsɛ lɛ tsɔɔ akɛ ba ni Kristo eba akɛ Maŋtsɛ ni miiye nɔ lɛ baaba mli yɛ wɔsɛɛ be kplaŋŋ ko mli. Yɛ naagbee lɛ ebata emaŋtsɛsɛi lɛ nɔ yɛ afi 1914. Yɛ nakai nyɔɔŋ be kakadaŋŋ ni tsɔ nɛkɛ be nɛɛ hiɛ lɛ mli lɛ, obalayei lɛ fɛɛ wɔwɔi. Shi abuuu amɛ fɔ yɛ enɛ hewɔ. Abu obalayei kwashiai lɛ fɔ yɛ mu ni amɛŋɔɔɔ amɛwooo amɛ mu tɔi lɛ amli lɛ hewɔ. Yesu tsɔɔ bɔ ni ebalɛ ni obalayei lɛ ahiɛ tsɛ̃ dani ayemforowu lɛ bashɛ shi lɛ mli akɛ: “Shi nyɔɔŋteŋ lɛ, anu bolɔmɔ akɛ: ‘Naa, ayemforowu lɛ miibaa ee ei! Nyɛjea kpo nyɛyakpeea lɛ.’ Kɛkɛ ni nakai obalayei lɛ fɛɛ te shi ni amɛsaa amɛkanei lɛ. Ni kwashiai lɛ kɛɛ nilelɔi lɛ akɛ: ‘Nyɛhaa wɔ nyɛmu lɛ eko, ejaakɛ wɔkanei lɛ miigboi.’ Shi nilelɔi lɛ here nɔ amɛkɛɛ: ‘Ekolɛ ebashɛŋ wɔkɛ nyɛ fɛɛ; shi moŋ nyɛyaa mɛi ni hɔ̃ɔ lɛ aŋɔɔ nyɛyahea eko nyɛhaa nyɛhe.’ ”

Mu lɛ feɔ nɔ ni haa anɔkwa Kristofoi yaa nɔ amɛkpɛɔ tamɔ kanei lɛ he mfoniri. No ji Nyɔŋmɔ Wiemɔ lɛ ni jɛ mumɔŋ, ni Kristofoi mɔɔ mli waa lɛ, kɛ agbɛnɛ mumɔ krɔŋkrɔŋ lɛ ni yeɔ ebuaa amɛ bɔni afee ni amɛnu nakai Wiemɔ lɛ shishi lɛ hu. Mumɔŋ mu lɛ yeɔ ebuaa obalayei nilelɔi lɛ bɔni afee ni amɛla lɛ akpɛ ni amɛkɛkpa ayemforowu lɛ gbɛ yɛ be mli ni amɛyaa yookpeemɔ okpɔlɔŋmɛɛ lɛ shishi lɛ. Shi obalayei kwashiai akuu lɛ bɛ mumɔŋ mu ni he hiaa lɛ eko yɛ amɛ diɛŋtsɛ amɛmli, ni ji amɛ mu tɔi lɛ amli. No hewɔ lɛ Yesu tsɔɔ nɔ ni jɛ mli ba lɛ mli akɛ:

“Shi beni amɛ [obalayei kwashiai lɛ] tee [mu] hemɔ lɛ, ayemforowu lɛ ba, ni mɛi ni esaa amɛhe eto lɛ kɛ lɛ tee yookpeemɔ he lɛ, ni aŋa shinaa lɛ. No sɛɛ lɛ obalayei krokomɛi lɛ hu ba ni amɛbakɛɛ: ‘Nuŋtsɔ, Nuŋtsɔ, gbelemɔ wɔ!’ Shi ehere nɔ ekɛɛ: ‘Lɛlɛŋ, miikɛɛ nyɛ akɛ mileee nyɛ.’ ”

Beni Kristo yashɛ eŋwɛi Maŋtsɛyeli lɛ mli lɛ sɛɛ lɛ, obalayei nilelɔi akuu ni ji anɔkwa Kristofoi ni afɔ amɛ lɛ ahiɛ tsɛ̃ koni amɛtsu hegbɛ ni amɛna akɛ amɛha la akpɛ yɛ nɛkɛ jeŋ ni ewo duŋ kpii nɛɛ mli lɛ he nii koni amɛkɛjie Ayemforowu ni eku esɛɛ eba lɛ yi. Shi mɛi ni obalayei kwashiai lɛ feɔ amɛhe mfoniri lɛ esako amɛhe akɛ amɛkɛ yijiemɔ aaakpa lɛ gbɛ. No hewɔ lɛ beni be lɛ shɛ lɛ, Kristo gbeleee yookpeemɔ okpɔlɔŋmɛɛ he ni yɔɔ ŋwɛi lɛ naa shinaa lɛ ehaaa amɛ. Eshi amɛ yɛ agbo lɛ sɛɛ yɛ je lɛŋ nyɔɔŋteŋ duŋ kpii lɛ mli, koni amɛkɛ mɛi krokomɛi fɛɛ ni tsuɔ mlakwamɔ nitsumɔi lɛ ahiɛ akpata yɛ jɛmɛ. Ni Yesu mu naa akɛ: “No hewɔ lɛ, nyɛsaraa, ejaakɛ nyɛleee nɔ gbi loo nɔ ŋmɛlɛtswaa nɔ [ni gbɔmɔ Bi lɛ baa.]”

Talentai lɛ Ahe Abɛbua Lɛ

Yesu tee nɔ yɛ sane ni ekɛ ebɔfoi lɛ gbaa yɛ Mu Gɔŋ lɛ nɔ lɛ mli ni egba abɛbua kroko hu, nɔ ni ji enyɔ nɔ yɛ abɛbuai sɔrɔtoi etɛ lɛ ateŋ. Gbii fioo ko ni etsɔ hiɛ lɛ mli, beni eyɔɔ Yeriko lɛ, ebu amɛ benai lɛ ahe abɛbua lɛ koni ekɛtsɔɔ amɛ akɛ Maŋtsɛyeli lɛ baaba yɛ wɔsɛɛ be shɔŋŋ ko mli. Agbɛnɛ eyɛ mli akɛ abɛbua ni egbaa amɛ amrɔ nɛɛ yɛ nibii pii ni je klɛŋklɛŋ nɔ lɛ moŋ, shi emlibaa tsɔɔ nibii ni baaba yɛ be mli ni Kristo eba yɛ Maŋtsɛyeli hewalɛ mli lɛ. Efeɔ he mfoniri akɛ esa akɛ ekaselɔi lɛ atsu nii yɛ be mli ni amɛyɔɔ shikpɔŋ nɔ lolo lɛ bɔni afee ni amɛha “enibii” lɛ afa.

Yesu je shishi akɛ: “Shi [shihilɛi ni kɔɔ Maŋtsɛyeli lɛ he lɛ] tamɔ nuu ko ni beni ebaadom lɛ, etsɛ etsuji, ni etuu enibii ewo amɛdɛŋ.” Yesu ji nuu ni, dani ebaadom kɛya ŋwɛi lɛ, etsɛ etsuji—ni ji kaselɔi ni yɔɔ hegbɛ kɛha ŋwɛi Maŋtsɛyeli lɛ—ni etuu enibii ewo amɛdɛŋ lɛ. Nɛkɛ nibii nɛɛ jeee heloonaa nibii, shi moŋ amɛdamɔ shi kɛha ŋmɔ ko ni ahu mli ni ekɛ hewalɛ ewo mli koni enyɛ eha ewo yibii ni ji kaselɔi babaoo.

Yesu tuu enibii lɛ ewo etsuji lɛ adɛŋ etsɛɛɛ kɛkɛ ni ekwɔ kɛtee ŋwɛi. Mɛɛ gbɛ nɔ etsɔ efee enɛ? Kɛtsɔ famɔ ni ekɛha amɛ akɛ amɛya nɔ amɛtsu nii yɛ ŋmɔ ni ahu mli lɛ mli, kɛtsɔ Maŋtsɛyeli shɛɛ sane lɛ ni amɛaashiɛ kɛyashɛ shikpɔŋ lɛ naagbee hei fɛɛ lɛ nɔ. Taakɛ Yesu kɛɛ lɛ: “Ni eha mɔ kome talentai enumɔ, mɔ kome hu enyɔ, ni mɔ kome hu ekome, bɔ ni mɔ fɛɛ mɔ aaanyɛ akwɛ; ni amrɔ lɛ edom.”

No hewɔ lɛ aja talentai kpaanyɔ—ni ji Kristo nibii lɛ—yɛ bɔ ni tsuji lɛ anyɛmɔ ji, aloo bɔ ni amɛaanyɛ amɛtsu yɛ mumɔŋ lɛ naa. Tsuji lɛ damɔ shi kɛha kaselɔi akui sɔrɔtoi lɛ. Yɛ klɛŋklɛŋ afii oha lɛ mli lɛ, ŋwanejee ko bɛ he akɛ bɔfoi lɛ fata kuu ni na talentai enumɔ lɛ ahe. Yesu tee nɔ egba akɛ tsuji ni nine shɛ talentai enumɔ lɛ kɛ talentai enyɔ lɛ anɔ lɛ fɛɛ ha eku ebɔ he toi enyɔ kɛtsɔ amɛ Maŋtsɛyeli shiɛmɔ kɛ kaselɔi afeemɔ nitsumɔ lɛ nɔ. Shi kɛlɛ, tsulɔ ni nine shɛ talenta kome nɔ lɛ yatsa shikpɔŋ ni ekɛto.

Yesu tee nɔ akɛ: “Shi yɛ mli aahu lɛ, tsuji lɛ anuŋtsɔ lɛ ba, ni ekɛ amɛ babu akɔntaa.” Ebaaa aahu kɛbashi afii ohai 20 lɛ mli, ni ji aaafee afii 1,900 sɛɛ, dani Kristo ku esɛɛ eba koni ekɛ amɛ ababu akɔntaa, no hewɔ lɛ, yɛ anɔkwale mli lɛ, “yɛ mli aahu” dani eba. Kɛkɛ ni Yesu tsɔɔ mli akɛ:

“Ni mɔ ni na talentai enumɔ lɛ ba, ni ekɛ talentai enumɔ kroko hu babɔ he ekɛɛ: ‘Nuŋtsɔ, oŋɔ talentai enumɔ oha mi, naa mikɛ talentai enumɔ hu miifata he.’ Enuŋtsɔ lɛ kɛɛ lɛ akɛ: ‘Ahekoo, tsulɔ kpakpa kɛ anɔkwafo, oye anɔkwa yɛ nii fioo he, maha oye nii pii atsɛ. Botemɔ onuŋtsɔ miishɛɛ lɛ mli.’ ” Ni nakai nɔŋŋ hu tsulɔ ni nine shɛ talentai enyɔ nɔ lɛ hu ha etalentai lɛ ku ebɔ he enyɔ, ni lɛ hu ena nakai yijiemɔ kɛ nyɔmɔwoo lɛ nɔŋŋ eko.

Shi kɛlɛ, mɛɛ gbɛ nɔ nɛkɛ tsuji anɔkwafoi nɛɛ boteɔ amɛ-Nuŋtsɔ lɛ miishɛɛ lɛ mli yɛ? Ojogbaŋŋ, amɛ-Nuŋtsɔ, Yesu Kristo miishɛɛ lɛ ji Maŋtsɛyeli ni enine shɛ nɔ beni edom kɛtee e-Tsɛ ŋɔɔ yɛ ŋwɛi lɛ. Ni yɛ tsuji anɔkwafoi ni yɔɔ ŋmɛnɛŋmɛnɛ beaŋ lɛ agbɛfaŋ lɛ, amɛnaa miishɛɛ kpele akɛ akɛ Maŋtsɛyeli lɛ he gbɛnaa nibii pii ewo amɛdɛŋ lolo, ni yɛ be mli ni amɛgbeɔ amɛ shikpɔŋ nɔ nitsumɔ lɛ naa lɛ, amɛbaana miishɛɛ ni jɛɔ mli baa ni ji gbohiiashitee ni amɛaana kɛaaya ŋwɛi Maŋtsɛyeli lɛ mli lɛ hu. Shi tsulɔ ni ji etɛ lɛ hu?

Nɛkɛ tsulɔ nɛɛ bajie enaa akɛ: “Nuŋtsɔ, mileo akɛ yiwalɔ jio; . . . ni no ha mishe gbeyei, ni mitee mikɛ otalenta lɛ yatee shikpɔŋ; naa onii.” Tsulɔ lɛ je gbɛ ekpoo akɛ etsuuu nii yɛ ŋmɔ ni ahu mli lɛ mli kɛtsɔ shiɛmɔ kɛ kaselɔi ni eeefee lɛ nɔ. No hewɔ lɛ nuŋtsɔ lɛ tsɛ lɛ “tsulɔ fɔŋ kɛ anihaolɔ” ni ejaje nɛkɛ fɔbuu kojomɔ nɛɛ eshwie enɔ: “Nyɛhea talenta lɛ yɛ edɛŋ . . . Nyɛtsia lɛ nyɛwoa gbɛ sɛɛ duŋ lɛ mli; jɛi yaafo kɛ nyanyɔji ashishikpemɔ aaahi!” Akɛni ashɛrɛ mɛi ni yɔɔ nɛkɛ tsulɔ fɔŋ kuu nɛɛ mli lɛ ashwie hewɔ lɛ, ahaaa amɛnine ashɛ mumɔŋ miishɛɛ ko nɔ.

Enɛ kɛ nikasemɔ ko ni esa akɛ asusu he waa haa mɛi fɛɛ ni kɛɔ akɛ amɛji Kristo sɛɛnyiɛlɔi lɛ. Kɛji amɛbaana eyijiemɔ kɛ nyɔmɔwoo ni eeeha lɛ mli miishɛɛ, koni amɛkaha ashɛrɛ amɛ ashwie gbɛ sɛɛ duŋ kɛ hiɛkpatamɔ ni ekɛaaba lɛ mli lɛ, belɛ esa akɛ amɛtsu nii koni amɛkɛha amɛ ŋwɛi Nuŋtsɔ lɛ nibii lɛ afa kɛtsɔ gbɛfaŋnɔ ni mɔɔ shi ni amɛaana yɛ shiɛmɔ nitsumɔ lɛ mli lɛ nɔ. Ani ohiɛ dɔɔ waa yɛ enɛ gbɛfaŋ?

Beni Kristo Baaba yɛ Maŋtsɛyeli Hewalɛ Mli Lɛ

Yesu kɛ ebɔfoi lɛ yɛ Mu Gɔŋ lɛ nɔ lolo. Yɛ be mli ni ehaa sane ni amɛbi lɛ akɛ eha amɛ ba ni eba kɛ nibii agbɛjianɔtoo lɛ naagbee lɛ he okadi lɛ hetoo lɛ, agbɛnɛ egba amɛ abɛbuai etɛ ni tsara nɔ lɛ amli naagbee nɔ lɛ. Yesu je shishi akɛ: “Shi beni gbɔmɔ Bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛ̃i lɛ nɔ.”

Adesai nyɛɛɛ ana ŋwɛi bɔfoi yɛ amɛ ŋwɛi anunyam mli. No hewɔ lɛ ba ni gbɔmɔ Bi lɛ, Yesu Kristo, aaaba kɛ ŋwɛibɔfoi lɛ baafee nɔ ni akɛ adesai ahiŋmɛii enaŋ. Ba ni eba lɛ ba mli yɛ afi 1914 mli. Shi yɛ mɛɛ yiŋtoo hewɔ? Yesu tsɔɔ mli akɛ: “Ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.”

Yɛ be mli ni etsɔɔ nɔ ni baaba mɛi ni aha amɛdamɔ afa ni aduro amɛ lɛ anɔ lɛ, Yesu kɛɛ: “Kɛkɛ lɛ maŋtsɛ lɛ aaakɛɛ mɛi ni yɔɔ eninejurɔ nɔ lɛ akɛ: ‘Nyɛbaa, nyɛ mɛi ni mi-Tsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ.’ ” Nɛkɛ abɛbua nɛɛ mli gwantɛŋi lɛ kɛ Kristo yeŋ maŋtsɛ yɛ ŋwɛi, shi moŋ amɛnine baashɛ Maŋtsɛyeli lɛ nɔ kɛ shishinumɔ akɛ amɛbaafee eshishibii ni yɔɔ shikpɔŋ nɔ. “Jeŋ shishijee lɛ” ba kɛjɛ be mli ni Adam kɛ Hawa je shishi amɛfɔ bii ni baanyɛ ana gbɛjianɔ ni Nyɔŋmɔ eto koni akɛkpɔ adesai lɛ he sɛɛ lɛ.

Shi mɛni hewɔ ni agbala amɛmli ni aha gwantɛŋi lɛ yadamɔ Maŋtsɛ lɛ ninejurɔ nɔ yɛ he ni aduro amɛ yɛ lɛ? Maŋtsɛ lɛ haa hetoo akɛ: “Ejaakɛ hɔmɔ ye mi, ni nyɛha mi nii miye; kumai ye mi, ni nyɛha mi nu minu; gbɔ ji mi, ni nyɛha mibato nyɛŋɔɔ; minyiɛ yayai, ni nyɛwo mi atade; mihe ye, ni nyɛbasara mi; awo mi tsuŋ, ni nyɛba miŋɔɔ.”

Akɛni gwantɛŋi lɛ yɛ shikpɔŋ nɔ hewɔ lɛ, amɛmiitao amɛle bɔ ni fee ni amɛnyɛ amɛfee nibii kpakpai tamɔ nɛkɛ amɛha amɛ ŋwɛi Maŋtsɛ lɛ. Amɛbi akɛ: “Nuŋtsɔ, te gbi ni wɔnao akɛ hɔmɔ miiyeo, ni wɔhao nii oye hu? Aloo akɛ kumai miiyeo, ni wɔhao nɔ ko onu hu? Ni te gbi ni wɔna akɛ gbɔ jio, ni wɔha obato wɔŋɔɔ? Aloo akɛ onyiɛ yayai ni wɔwoo atade hu? Asaŋ te gbi ni wɔnao akɛ ohe miiye aloo awoo tsuŋ, ni wɔba oŋɔɔ?”

Ni Maŋtsɛ lɛ here nɔ akɛ: “Gbii abɔ kɛ̃ ni nyɛfee nyɛha minyɛmimɛi nɛɛ ateŋ bibioo kome lɛ, mi nɔŋŋ nyɛfee nyɛha lɛ.” Kristo nyɛmimɛi lɛ ji mɛi 144,000 ni kɛ lɛ baaye maŋtsɛ yɛ ŋwɛi lɛ ateŋ mɛi ni eshwɛ yɛ shikpɔŋ nɔ lolo lɛ. Ni Yesu kɛɛ akɛ ejurɔ ni afee amɛ lɛ tamɔ nɔ ni lɛ afee nakai ejurɔ lɛ nɔŋŋ aha.

No sɛɛ lɛ, Maŋtsɛ lɛ kɛ abotiai lɛ wie. “Nyɛjea minɔ, nyɛ mɛi ni alomɔ nyɛ, nyɛyaa naanɔ la lɛ ni asaa ato Abonsam kɛ ebɔfoi lɛ mli! Ejaakɛ hɔmɔ ye mi, ni nyɛhaaa mi nii maye; kumai ye mi, ni nyɛhaaa mi nu manu; gbɔ ji mi, ni nyɛhaaa mabato nyɛŋɔɔ; minyiɛ yayai, ni nyɛwooo mi atade; mihe ye ni asaŋ awo mi tsuŋ, ni nyɛbasaraaa mi.”

Shi abotiai lɛ jie amɛnaa akɛ: “Nuŋtsɔ, te gbi ni wɔnao akɛ hɔmɔ miiyeo aloo kumai miiyeo aloo gbɔ jio aloo onyiɛ yayai aloo ohe miiye aloo awoo tsuŋ, ni wɔbasɔmɔɔɔ bo hu?” Adamɔ nɔ ni akɛkojo gwantɛŋi lɛ ni aduro amɛ lɛ nɔŋŋ nɔ akojo abotiai lɛ hu ni abu amɛ fɔ. Yesu ha amɛ hetoo akɛ: “Gbii abɔ kɛ̃ ni nyɛfeee nyɛhaaa mɛi bibii kwraa [ni ji minyɛmimɛi] nɛɛ ateŋ mɔ kome lɛ, nyɛfeee nyɛhaaa mi hu!”

No hewɔ lɛ ba ni Kristo eba yɛ Maŋtsɛyeli hewalɛ mli, ni tsɔɔ yiwalɛ nibii agbɛjianɔtoo nɛɛ hiɛkpatamɔ yɛ amanehulu kpeteŋkpele lɛ mli lɛ hiɛ lɛ baafee kojomɔ be. Abotiai lɛ, “amɛaatee naanɔ hejaramɔ mli; shi jalɔi lɛ [gwantɛŋi lɛ] aaatee naanɔ wala mli.” Mateo 24:2–25:46; 13:40, 49; Marko 13:3-37; Luka 21:7-36; 19:43, 44; 17:20-30; 2 Timoteo 3:1-5; Yohane 10:16; Kpojiemɔ 14:1-3.

▪ Mɛni ha bɔfoi lɛ bi sane lɛ, shi mɛɛ nɔ kroko hu eeenyɛ efee akɛ no yɔɔ amɛjwɛŋmɔ mli?

▪ Mɛɛ Yesu gbalɛ lɛ mli fa ko ba mli yɛ afi 70 Ŋ.B. lɛ mli, shi mɛni hu baaa mli yɛ nakai be lɛ mli?

▪ Mɛɛ be mli Yesu gbalɛ lɛ na eklɛŋklɛŋ mlibaa, shi mɛɛ be mli ena emlibaa ni da fe fɛɛ?

▪ Mɛni ji nihiinii lɛ yɛ eklɛŋklɛŋ kɛ enaagbee mlibaa lɛ fɛɛ mli?

▪ Mɛni hewɔ ni amanehulu kpeteŋkpele lɛ naaa enaagbee mlibaa kɛ Yerusalem hiɛkpatamɔ lɛ?

▪ Mɛɛ je lɛŋ shihilɛi kadiɔ ba ni Kristo eba lɛ?

▪ Mɛɛ be ‘shikpɔŋ lɛ nɔ akutsei lɛ fɛɛ aaawo yara’ lɛ, shi mɛni Kristo sɛɛnyiɛlɔi lɛ baafee?

▪ Mɛɛ abɛbua Yesu kɛha koni eye ebua ekaselɔi ni baaba yɛ wɔsɛɛ be mli lɛ ni amɛyoo be mli ni naagbee lɛ ebɛŋkɛ lɛ?

▪ Mɛɛ ŋaawoo Yesu kɛha ekaselɔi lɛ ateŋ mɛi ni baahi shi yɛ naagbee gbii lɛ amli lɛ?

▪ Namɛi obalayei nyɔŋma lɛ feɔ amɛhe mfoniri?

▪ Mɛɛ be mli awo Kristofoi asafo lɛ shi akɛ ekɛ ayemforowu lɛ baabote gbalashihilɛ mli lɛ, shi mɛɛ be ayemforowu lɛ ba koni ebaŋɔ eyemforo lɛ kɛya yookpeemɔ okpɔlɔŋmɛɛ lɛ shishi?

▪ Mɛni mu lɛ damɔ shi kɛha, ni eko ni obalayei nilelɔi lɛ yɔɔ lɛ ye ebua amɛ koni amɛfee mɛni?

▪ Nɛgbɛ yookpeemɔ okpɔlɔŋmɛɛ lɛ ba nɔ yɛ?

▪ Mɛɛ nyɔmɔwoo ni yɔɔ nyam obalayei kwashiai lɛ anine shɛɛɛ nɔ, ni mɛni ji nɔ ni baaba amɛnɔ?

▪ Mɛɛ nikasemɔ talentai lɛ ahe abɛbua lɛ tsɔɔ wɔ?

▪ Namɛi ji tsuji lɛ, ni mɛni ji nibii ni atuu awo amɛdɛŋ lɛ?

▪ Mɛɛ be mli nuŋtsɔ lɛ ba koni ekɛ amɛ ababu akɔntaa lɛ, ni mɛni ebanina?

▪ Mɛni ji miishɛɛ ni tsuji anɔkwafoi lɛ bote mli lɛ, ni mɛni ba tsulɔ ni ji etɛ, ni ji tsulɔ fɔŋ lɛ nɔ?

▪ Mɛni hewɔ ni esa akɛ ba ni Kristo eba lɛ afee nɔ ni anaaa kɛ hiŋmɛi lɛ, ni mɛɛ nitsumɔ ebatsu yɛ nakai be lɛ mli?

▪ Gwantɛŋi lɛ anine shɛɔ Maŋtsɛyeli lɛ nɔ yɛ mɛɛ shishinumɔ naa?

▪ Mɛɛ be mli “jeŋ shishijee lɛ” ba mli?

▪ Mɛni nɔ adamɔɔ ni akojoɔ gbɔmɛi akɛ gwantɛŋi loo abotiai lɛ?