Nyɛshia Kpe Yɛ “Naagbee Be Lɛ” Mli
“Nyɛkwɛa jogbaŋŋ, nyɛshia kpe ni nyɛsɔlea, ejaakɛ nyɛleee beyinɔ ni be lɛ shɛɔ.”—MARKO 13:33.
1. Te esa akɛ wɔfee wɔnii wɔha tɛŋŋ beni nibii ni yɔɔ hiɛdɔɔ jeɔ kpo yɛ nɛkɛ “naagbee be” nɛɛ mli lɛ?
TE ESA akɛ Kristofoi afee amɛnii amɛha tɛŋŋ yɛ be mli ni nibii ni hiɛdɔɔ yɔɔ he baa yɛ “naagbee be” nɛɛ mli lɛ? (Daniel 12:4) Ashiii amɛ ni amɛyiŋ afee amɛ enyɔnyɔ. Yesu Kristo kɛ gbalɛ ni hiɛ okadi ni nibii pii yɔɔ mli, ni miiná emlibaa yɛ afii ohai 20 nɛɛ mli lɛ ha. Egba yɛ nibii babaoo ni ekadi nɛkɛ be nɛɛ, kɛjɛ 1914 kɛbaa lɛ he efɔ shi akɛ be krɛdɛɛ ko. Akɛni Yesu le Daniel gbalɛ ni kɔɔ “naagbee be lɛ” he lɛ jogbaŋŋ hewɔ lɛ, etsa lɛ diɛŋtsɛ egbalɛ kpeteŋkpele lɛ nɔ kɛ hewalɛwoo ni ekɛha ekaselɔi lɛ akɛ “nyɛsaraa be fɛɛ be.”—Luka 21:36.
2. Mɛni hewɔ ehe hiaa waa ni wɔhiɛ akamɔ ni wɔsara yɛ mumɔŋ lɛ?
2 Mɛni hewɔ esa akɛ wɔsara? Ejaakɛ nɛkɛ be nɛɛ ji jaramɔ be ni fe fɛɛ yɛ adesai ayinɔsane mli. Kɛji Kristofoi ŋmɛɛ amɛhe amɛha mumɔŋ wɔdɔ̃iwɔɔ yɛ nɛkɛ be nɛɛ mli lɛ, ebaafee oshara waa diɛŋtsɛ. Kɛji wɔfee mɛi ni nɔ ko kɔɔɔ wɔhe aloo wɔŋmɛ gbɛ ni shihilɛ mli yeyeeye-feemɔi he wɔtsuii lɛ, no lɛ wɔbaabote oshara mli. Yesu Kristo bɔ wɔ kɔkɔ yɛ Luka 21:34, 35 akɛ: “Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne.”
3, 4. (a) Mɛni Yesu tsɔɔ beni ewie akɛ Nyɔŋmɔ mlifu gbi lɛ baaba gbɔmɛi anɔ trukaa “tamɔ tsɔne”? (b) Akɛni Nyɔŋmɔ etsɔɔɔ mɔ tsɔne hewɔ lɛ, mɛni hewɔ nakai gbi lɛ baati gbɔmɛi pii ashi trukaa lɛ?
3 Yiŋtoo kpakpa hewɔ ni Yesu wie akɛ Yehowa gbi lɛ ‘baaba wɔnɔ trukaa tamɔ tsɔne’ lɛ. Bei pii lɛ, kɛji atsɔ tsɔne lɛ, awoɔ he aflã, ni akɛtsuɔ nii ni akɛduɔ loofɔji kɛ kooloi krokomɛi. Tsɔne lɛ yɛ tso loo dade ko ni hiɛɔ aflã lɛ, ni nɔ fɛɛ nɔ ni nyiɛɔ kɛyaboteɔ mli lɛ náa tso loo dade lɛ nɔ kɛkɛ lɛ efɛ. No sɛɛ kɛji efɛ lɛ, tsɔne lɛ gbalaa aflã lɛ, kɛkɛ lɛ edu nɔ ni ji lɛ. Enɛɛmɛi fɛɛ baa trukaa nɔŋŋ. Yesu wie akɛ, nakai nɔŋŋ hu mɛi ni egbɔjɔ yɛ mumɔŋ lɛ anaa baakpɛ amɛhe, ni nibii baati amɛ shi trukaa hu yɛ Nyɔŋmɔ “mlifu gbi lɛ nɔ.”—Abɛi 11:4.
4 Ani Yehowa Nyɔŋmɔ ji mɔ ni tsɔɔ mɛi atsɔne lɛ? Dabi, emɛɛɛ ni emɔmɔ gbɔmɛi ni hiɛ bɛ amɛhe nɔ ni ekpata amɛhiɛ. Shi nakai gbi lɛ baati gbɔmɛi babaoo shi trukaa ejaakɛ amɛsusuuu Nyɔŋmɔ Maŋtsɛyeli lɛ he akɛ nɔ titri ni ka amɛjwɛŋmɔ nɔ. Amɛkɔɔ gbɛ ni amɛ diɛŋtsɛ amɛsumɔɔ yɛ shihilɛ mli nibii asɛɛdii mli, ni amɛkuɔ amɛhiɛ amɛshwieɔ nibii ni yaa nɔ lɛ ashishinumɔ nɔ. Shi kɛlɛ, enɛ tsakeee Nyɔŋmɔ gbɛjianɔtoo. Eyɛ be ni lɛ diɛŋtsɛ eto ni akɛbaabu akɔntaa. Ni yɛ emɔbɔnalɛ naa lɛ, eshiii adesai efolo ni ehaaa amɛle ekojomɔ ni baa lɛ he saji.—Marko 13:10.
5, 6. (a) Mɛɛ gbɛjianɔ Bɔlɔ lɛ ejɛ suɔmɔ mli eto eha bɔɔ nii ni ji adesai, yɛ kojomɔ ni baa lɛ hewɔ, shi mɛni baajɛ mli aba aha mɛi pii? (b) Mɛni wɔbaasusu he ni eye ebua wɔ ni wɔhiɛ atsɛ̃?
5 Nɛkɛ kɔkɔbɔɔ ni etsɔ hiɛ ekɛha nɛɛ ji gbɛjianɔ ni Bɔlɔ kpeteŋkpele lɛ, ni yɔɔ adesai bɔɔ nii ni yɔɔ biɛ yɛ mfoniri-feemɔŋ naneshi maaŋoo lɛ nɔ lɛ ashihilɛ kpakpa he miishɛɛ lɛ ejɛ suɔmɔ mli eto. (Yesaia 66:1) Enaa mɛi ni yɔɔ he ni awieɔ akɛ ekɛ enaji mamɔɔ nɛɛ ahe miishɛɛ waa diɛŋtsɛ. No hewɔ lɛ etsɔɔ eshikpɔŋ nɔ tsuji kɛ najiaŋdamɔlɔi lɛ anɔ ebɔɔ amɛ kɔkɔ yɛ nibii ni jwere amɛhiɛ ni baaba lɛ ahe. (2 Korintobii 5:20) Ni kɛlɛ, yɛ kɔkɔbɔɔ ni akɛhaa nɛɛ fɛɛ sɛɛ lɛ, nakai nibii lɛ baaba adesai aweku lɛ nɔ trukaa ni amɛkpaaa gbɛ, tamɔ nɔ ni amɛnyiɛ kɛyabote tsɔne ko mli. Mɛni hewɔ? Ejaakɛ mɛi babaoo miiwɔ yɛ mumɔŋ. (1 Tesalonikabii 5:6) Kɛji akɛto he lɛ, yibɔ fioo ko pɛ boɔ kɔkɔbɔɔ lɛ toi ni amɛbaana yibaamɔ kɛya Nyɔŋmɔ jeŋ hee lɛ mli.—Mateo 7:13, 14.
6 Belɛ, te wɔɔfee tɛŋŋ ni wɔsara yɛ nɛkɛ naagbee be nɛɛ mli, koni akane wɔ afata mɛi ni abaahere amɛyiwala lɛ ahe lɛ? Yehowa kɛ yelikɛbuamɔ ni he hiaa lɛ haa. Nyɛhaa wɔkadia nibii kpawo ni wɔbaanyɛ wɔfee.
Wuu Oshi Nibii ni Gbalaa Mɔ Jwɛŋmɔ
7. Mɛɛ kɔkɔbɔɔ ni kɔɔ nibii ni gbalaa mɔ jwɛŋmɔ he Yesu kɛha?
7 Klɛŋklɛŋ lɛ, esa akɛ wɔwuu wɔshi nibii ni gbalaa mɔ jwɛŋmɔ. Yesu wie yɛ Mateo 24:42, 44 akɛ: “No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-Nuŋtsɔ lɛ baa. No hewɔ lɛ nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu lɛ nɔ gbɔmɔ Bi lɛ baa.” Wiemɔ ni Yesu kɛtsu nii yɛ biɛ lɛ tsɔɔ akɛ nibii ni gbalaa mɛi ajwɛŋmɔ baafa babaoo yɛ nɛkɛ jaramɔ be nɛɛ mli, ni nɛkɛ nibii ni gbalaa mɔ jwɛŋmɔ nɛɛ baanyɛ ekɛ mɔ aya hiɛkpatamɔ mli. Nibii pii he gbɔmɛi ajwɛŋmɔ waa yɛ Noa gbii lɛ amli. Nɔ ni jɛ mli ba ji akɛ, gbɔmɛi ni nibii ehe amɛjwɛŋmɔ nɛɛ “hiɛ bɛ amɛhe nɔ” yɛ nɔ ni yaa nɔ lɛ he, ni Nu Afua lɛ baloo amɛ fɛɛ kɛtee. Yesu bɔ kɔkɔ yɛ nakai gbɛ nɔ nɔŋŋ akɛ: “Nakai nɔŋŋ gbɔmɔ Bi lɛ baa lɛ aaatamɔ.”—Mateo 24:37-39.
8, 9. (a) Daa gbi shihilɛ mli nibii asɛɛdii baanyɛ agbala wɔjwɛŋmɔ kwraa ni efee oshara yɛ mɛɛ gbɛ nɔ? (b) Mɛɛ kɔkɔbɔi Paulo kɛ Yesu kɛhaa wɔ?
8 Ha ahi ojwɛŋmɔ mli hu akɛ, Yesu miiwie daa gbi shihilɛ mli nibii ni mɔ fɛɛ mɔ feɔ, tamɔ niyeli, ninumɔ, kɛ daaŋ ŋmaa taomɔ he yeyeeye-feemɔi ahe yɛ ekɔkɔbɔɔ ni yɔɔ Luka 21:34, 35 lɛ mli. Nibii ni gbɔmɛi fɛɛ feɔ ni, ni Nuŋtsɔ Yesu kaselɔi lɛ hu fata he. (Okɛto Marko 6:31 he.) Nibii nɛɛ baanyɛ afee nibii ni yeee mɔ awui diɛŋtsɛ, shi kɛji aŋmɛ gbɛ lɛ, amɛbaanyɛ amɛgbala wɔjwɛŋmɔ kwraa, ni amɛbaahe wɔbe fɛɛ, ni amɛbaatsɔ nakai gbɛ nɔ amɛha wɔbote mumɔŋ wɔdɔiwɔɔ shihilɛ mli.
9 No hewɔ lɛ, nyɛkahaa wɔkua wɔhiɛ wɔshwiea nii ni he hiaa fe fɛɛ lɛ nɔ—Nyɔŋmɔ nɔkpɛlɛmɔ ni wɔɔna. Nɔ najiaŋ ni wɔɔha daa gbi shihilɛ mli nibii ahe wɔjwɛŋmɔ fɛɛ lɛ, nyɛhaa wɔkɛtsua nii ni wɔkɛwa he ko, bɔ ni he hiaa ni baaha wɔhi wala mli kɛkɛ. (Filipibii 3:8) Esaaa akɛ amɛjieɔ Maŋtsɛyeli lɛ he nibii kɛjɛɔ wɔjwɛŋmɔ mli. Taakɛ Romabii 14:17 kɛɔ lɛ, “Nyɔŋmɔ maŋtsɛyeli lɛ, jeee niyeli kɛ ninumɔ ni, shi moŋ jalɛ kɛ hejɔlɛ kɛ mumɔ krɔŋkrɔŋ mli miishɛɛ ni.” Kaimɔ Yesu wiemɔi lɛ beni ekɛɛ akɛ: “Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mateo 6:33) Kɛfata he lɛ, Yesu jaje yɛ Luka 9:62 akɛ: “Mɔ ni kɛ enine yamɔɔ tsina kɔi mli ni ekuɔ ekuɛ ekwɛɔ esɛɛ lɛ, esaaa Nyɔŋmɔ maŋtsɛyeli lɛ.”
10. Mɛɛ oshara yɔɔ he kɛji wɔhaaa wɔhiŋmɛii akwɛ oti lɛ yɛ wɔhiɛ trɔmɔɔ?
10 Kɛji wɔɔwie yɛ mfoniri-feemɔŋ lɛ, kɛ wɔkɛ tsina kɔi lɛ bɔi humɔ pɛ, esa akɛ wɔya wɔhiɛ trɔmɔɔ. Hulɔ ni kwɛɔ esɛɛ lɛ etsaŋ tsina kɔi naa bui ni yɔɔ trɔmɔɔ yɛ eŋmɔ lɛ mli. Nɔ ko egbala ejwɛŋmɔ, ni no hewɔ lɛ gbɛtsii nii ko baanyɛ atsi lɛ kɛya afa loo etsi enaa kwraa po. Nyɛkahaa wɔtamɔa Lot ŋa lɛ, mɔ ni kwɛ esɛɛ ni no hewɔ lɛ eyashɛɛɛ he ni eyaa lɛ shweshweeshwe lɛ. Ehe miihia ni wɔha wɔhiŋmɛii aya nɔ akwɛ oti lɛ yɛ wɔhiɛ trɔmɔɔ. Kɛji wɔɔnyɛ wɔfee nakai lɛ, no lɛ esa akɛ wɔwuu wɔshi nibii ni gbalaa wɔjwɛŋmɔ lɛ.—1 Mose 19:17, 26; Luka 17:32.
Sɔlemɔ kɛ Ekaa Babaoo
11. Mɛni hu Yesu ma nɔ mi beni ebɔ wɔ kɔkɔ yɛ oshara ni nibii ni baahe wɔjwɛŋmɔ lɛ baanyɛ ekɛba lɛ he lɛ?
11 Shi, nibii babaoo yɛ lolo ni wɔbaanyɛ wɔfee ni wɔya nɔ wɔsara. Nɔ ni ji enyɔ ni he hiaa ji: Sɔlemɔ kɛ ekaa babaoo. Yɛ be mli ni ebɔ wɔ kɔkɔ yɛ daa gbi shihilɛ mli nibii ni baanyɛ ahe wɔjwɛŋmɔ fɛɛ lɛ he sɛɛ lɛ, Yesu kɛ ŋaawoo nɛɛ ha akɛ: “No hewɔ lɛ nyɛsaraa be fɛɛ be ni nyɛsɔlea, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ gbɔmɔ Bi lɛ hiɛ nyɛdamɔ.”—Luka 21:36.
12. Mɛɛ sɔlemɔ he hiaa, ni mɛni baajɛ mli aba?
12 Enɛ hewɔ lɛ, esa akɛ wɔkpa fai be fɛɛ be yɛ bɔ ni shihilɛ ni wɔyɔɔ mli lɛ yɔɔ oshara ha kɛ bɔ ni ehe hiaa ni wɔhiɛ ahi wɔhe nɔ lɛ he. No hewɔ lɛ nyɛhaa wɔyaa Nyɔŋmɔ ŋɔɔ kɛ sɔlemɔ kɛ faikpamɔi ni ekaa yɔɔ mli. Paulo kɛɔ yɛ Romabii 12:12 akɛ: “Nyɛhiɛa sɔlemɔ mli daa.” Ni wɔkaneɔ yɛ Efesobii 6:18 akɛ: “Ni nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli, ni enɛ nɔŋŋ hewɔ lɛ nyɛsaraa, ni nyɛkaa he daa nyɛkpaa fai.” Enɛ jeee shihilɛ ko ni tsɔɔ sɔlemɔ ni asɔleɔ tamɔ nɔ ni oookɛɛ eji sane ko ni baa trukaa ni he ehiaaa tsɔ ko. Shihilɛ mli ni wɔɔhi lɛ ebaje oshara diɛŋtsɛ mli. No hewɔ lɛ ehe miihia waa ni wɔkpa Nyɔŋmɔ fai kɛha eyelikɛbuamɔ. (Okɛto Hebribii 5:7 he.) Nakai gbɛ pɛ nɔ wɔɔtsɔ wɔhiɛ wɔgbɛhe mli yɛ Yehowa masɛi. Nɔ ko bɛ ni he baaba sɛɛnamɔ yɛ wɔ yelikɛbuamɔ mli, bɔni afee ni wɔnyɛ wɔtsu enɛ fe ni ‘wɔɔsɔle wɔkpa fai be fɛɛ be.’ Kɛkɛ lɛ Yehowa baaha wɔya nɔ ni wɔhiɛ aka ni wɔsara be fɛɛ be. Belɛ, kwɛ bɔ ni ehe hiaa waa akɛ wɔɔya nɔ yɛ sɔlemɔ mli daa!
Okɛ Ohe Akpɛtɛ Nyɔŋmɔ Gbɛjianɔtoo lɛ kɛ e-Nitsumɔ lɛ He Gbagbalii
13. Mɛɛ gbɛjianɔtoo ehe hiaa ni wɔkɛbɔ koni wɔhiɛ aya nɔ atsɛ̃ ni wɔsara?
13 Wɔmiisumɔ ni wɔje nibii ni baaba je lɛ nɔ nɛɛ fɛɛ mli shweshweeshwe. Wɔmiisumɔ ni wɔdamɔ gbɔmɔ Bi lɛ hiɛ, akɛ mɛi ni yɔɔ enɔkpɛlɛmɔ. Yɛ enɛ hewɔ lɛ, nɔ kroko ni ji etɛ yɛ ni wɔbaanyɛ wɔfee: Okɛ ohe akpɛtɛ Yehowa teokrase gbɛjianɔtoo lɛ he gbagbalii. Ehe miihia ni wɔkɛ wɔhe akpɛtɛ nakai gbɛjianɔtoo lɛ he kwraa ni wɔna enitsumɔi fɛɛ amli gbɛfaŋnɔ. Yɛ nɛkɛ gbɛ nɔ lɛ, wɔbaajie wɔhe kpo akɛ Kristofoi ni saraa be fɛɛ be, bɔ ni tɔmɔ ko kwraa bɛ be.
14, 15. (a) Mɛɛ nitsumɔ ni wɔkɛ wɔhe aaawo mli baaye abua wɔ ni wɔhiɛ atsɛ̃? (b) Namɔ baatsɔɔ akɛ agbe shiɛmɔ nitsumɔ lɛ naa, ni te esa akɛ wɔnu he wɔha tɛŋŋ? (d) Yɛ amanehulu kpeteŋkpele lɛ sɛɛ lɛ, mɛni wɔbaayoo kɛji wɔku wɔsɛɛ wɔkwɛ Maŋtsɛyeli shiɛmɔ nitsumɔ ni atsu lɛ?
14 Nɔ ni kɛ enɛ tsaa kpaakpa ji nɔ ni ji ejwɛ ni baanyɛ aye abua wɔ ni wɔsara. Esa akɛ wɔfata mɛi ni bɔɔ gbɔmɛi akɔkɔ yɛ nibii agbɛjianɔtoo nɛɛ naagbee ni baa lɛ he lɛ ahe. Nibii agbɛjianɔtoo momo nɛɛ naagbee kwraa ni baa lɛ baŋ ja ashiɛ “maŋtsɛyeli lɛ he sanekpakpa nɛɛ” kɛyashɛ he ni Nyɔŋmɔ Ofe lɛ ekpɛ eyiŋ yɛ he lɛ da. (Mateo 24:14) Jeee Yehowa Odasefoi ji mɛi ni baatsɔɔ akɛ atsu shiɛmɔ nitsumɔ lɛ agbe naa. Yehowa koome pɛ yɔɔ nakai hegbɛ lɛ. (Marko 13:32, 33) Shi wɔ lɛ, wɔtswa wɔfai shi akɛ wɔbaatsu nii waa bɔ ni wɔɔnyɛ ni wɔkɛshiɛ nɔyeli ni hi fe fɛɛ ni adesai baanyɛ ana, Nyɔŋmɔ Maŋtsɛyeli lɛ he sane lɛ wɔtsɔɔ, bei abɔ ni ehe hiaa lɛ. “Amanehulu kpeteŋkpele” lɛ shishijee baaba yɛ be mli ni wɔka he wɔmiitsu nitsumɔ nɛɛ lolo. (Mateo 24:21) Yɛ wɔsɛɛ be fɛɛ mli lɛ, mɛi ni ahere amɛ yiwala lɛ baanyɛ akwɛ shihilɛ ni eho lɛ ni amɛkɛ mlifilimɔ baama nɔ mi akɛ, lɛlɛŋ Yesu Kristo jeee amale gbalɔ. (Kpojiemɔ 19:11) No mli lɛ atsu shiɛmɔ nitsumɔ lɛ kɛtee hiɛ babaoo kwraa fe bɔ ni mɛi ni kɛ amɛhe woɔ mli lɛ kpaa gbɛ akɛ amɛaatsu.
15 Yɛ nakai gbɛ nɔ nɔŋŋ lɛ, beni be ni sa kadimɔ nɛɛ aaashɛ ni eeeba akɛ atsu nitsumɔ nɛɛ agbe naa bɔ ni sa Nyɔŋmɔ diɛŋtsɛ hiɛ lɛ, no mli lɛ eka shi faŋŋ akɛ mɛi babaoo diɛŋtsɛ kɛ amɛhe miiwo mli fe bɔ ni eji yɛ bei fɛɛ ni eho lɛ amli. Kwɛ bɔ ni wɔɔda shi waa wɔha akɛ wɔna gbɛfaŋnɔ yɛ nɛkɛ nitsumɔ kpeteŋkpele nɛɛ mli! Bɔfo Petro maa nɔ mi ehaa wɔ akɛ Yehowa “sumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Enɛ hewɔ lɛ, Nyɔŋmɔ Ofe lɛ nitsumɔ hewalɛ lɛ miitsu nii waa fe bei fɛɛ ni eho, ni Yehowa Odasefoi yɛ he miishɛɛ waa ekɛ amɛaaya nɔ yɛ nɛkɛ nitsumɔ ni mumɔ kanyaa etsumɔ nɛɛ mli. No hewɔ lɛ okɛ ohe akpɛtɛ Yehowa gbɛjianɔtoo lɛ he gbagbalii, ni okɛ odekã fɛɛ atsu nii yɛ emaŋ shiɛmɔ nitsumɔ lɛ mli. Enɛ baafee yelikɛbuamɔ nɔ yɛ saramɔ ni oooya nɔ osara lɛ mli.
Kaa Bo Diɛŋtsɛ Ohe Okwɛ
16. Mɛni hewɔ esa akɛ wɔka wɔ diɛŋtsɛ wɔhe wɔkwɛ yɛ mumɔŋ shihilɛ ni wɔyɔɔ mli amrɔ nɛɛ he lɛ.
16 Nɔ ni ji enumɔ hu yɛ ni wɔbaanyɛ wɔfee koni wɔha wɔhiɛ atsɛ ni wɔsara. Esa akɛ wɔka wɔ diɛŋtsɛ wɔhe wɔkwɛ yɛ shihilɛ ni wɔyɔɔ mli amrɔ nɛɛ gbɛfaŋ, aŋkroaŋkro. Enɛ sa jogbaŋŋ amrɔ nɛɛ fe bei fɛɛ ni eho. Ehe miihia ni wɔkɛ nɔmimaa ni mli wa atsɔɔ mɔ masɛi ni wɔdamɔ. Paulo kɛɛ yɛ Galatabii 6:4 akɛ: “Shi mɔ fɛɛ mɔ aka lɛ diɛŋtsɛ enitsumɔ ekwɛ.” Kaa bo diɛŋtsɛ ohe okwɛ yɛ Paulo wiemɔi ni yɔɔ 1 Tesalonikabii 5:6-8 lɛ kɛ gbeekpamɔ naa: “Nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akãa shi. Ejaakɛ mɛi ni wɔɔ lɛ, nyɔɔŋ amɛwɔɔ, ni mɛi ni tɔrɔɔ daa lɛ, nyɔɔŋ amɛtɔrɔɔ. Shi wɔ lɛ, akɛni shwane bii ji wɔ hewɔ lɛ, nyɛhaa wɔhiɛ akãa shi, ni wɔwo hemɔkɛyeli kɛ suɔmɔ dama lɛ, ni wɔbumɔ dade fai ni ji yiwalaheremɔ nɔhiɛkamɔ lɛ.”
17. Kɛji wɔmiika wɔ diɛŋtsɛ wɔhe wɔkwɛ lɛ, mɛɛ saji esa akɛ wɔbi wɔ diɛŋtsɛ wɔhe?
17 Ni wɔ hu? Kɛji wɔka wɔ diɛŋtsɛ wɔhe yɛ Ŋmalɛi lɛ anaa lɛ, ani wɔnaa akɛ wɔhiɛ kamɔ ni wɔmiisara, ni wɔbumɔ yiwalaheremɔ he hiɛnɔkamɔ dade fai lɛ? Ani wɔji gbɔmɛi ni wɔje gbɛ wɔtsi wɔhe kwraa kɛjɛ nibii agbɛjianɔtoo momo nɛɛ he ni wɔnaaa esusumɔi lɛ eko kwraa he miishɛɛ dɔŋŋ? Ani wɔyɛ Nyɔŋmɔ jeŋ hee lɛ mumɔ lɛ lɛlɛŋ? Ani wɔhiɛ yɛ wɔhe nɔ jogbaŋŋ yɛ he ni nibii agbɛjianɔtoo nɛɛ ema eyi shi kɛyaa lɛ he? Kɛji nakai lɛ, no lɛ Yehowa gbi lɛ ebatiŋ wɔ shi trukaa tamɔ oookɛɛ julɔi ji wɔ.—1 Tesalonikabii 5:4.
18. Mɛɛ sanebimɔi krokomɛi yɔɔ lolo ni ehe baahia ni wɔbi wɔhe, ni mɛni baajɛ mli aba?
18 Shi, kɛji wɔ diɛŋtsɛ wɔhe ni wɔka lɛ jieɔ lɛ kpo faŋŋ akɛ wɔmiibɔ mɔdɛŋ ni wɔto shihilɛ fɛfɛo, nɔ ni ŋɔɔ, ni hejɔlɛ yɔɔ mli, ni eyɛ ogbɔjɔ shishi hu? Mɛni kɛji wɔyoo akɛ wɔ mumɔŋ hiŋmɛii etsii kɛ wɔdɔiwɔɔ kɛ wɔɔ diɛŋtsɛ hu? Ani wɔyɛ shihilɛ ni tamɔ lamɔ mli, ni wɔmiitiu je lɛŋ fɛo nɔ ko sɛɛ waa? Kɛji nakai lɛ, no lɛ nyɛhaa wɔhiɛ atsɛ̃a ni wɔsaraa!—1 Korintobii 15:34.
Jwɛŋmɔ Gbalɛi ni Eba Mli lɛ Anɔ
19. Mɛni ji gbalɛi ni wɔna akɛ amɛba mli lɛ ekomɛi?
19 Agbɛnɛ wɔshɛ nɔ ni ji ekpaa ni baaye abua wɔ ni wɔhiɛ atsɛ̃ ni wɔya nɔ wɔsara lɛ nɔ: Jwɛŋmɔ gbalɛi babaoo ni eba mli yɛ nɛkɛ naagbee be nɛɛ mli lɛ anɔ jogbaŋŋ. Afii 77 ebaho wɔsɛɛ momo kɛjɛ be mli ni jeŋmaji abei ni ato lɛ ba naagbee yɛ 1914 lɛ. Kɛji wɔku wɔsɛɛ wɔkwɛ afii nyɔŋmai kpawo kɛ enumɔ ni eho lɛ, wɔnaa bɔ ni gbalɛi lɛ fɛɛ eba mli anɔkwale eha kɛtsara nɔ—anɔkwa jamɔ ni aaato ama shi ekoŋŋ; shwɛɛnii ni afɔ amɛ mu lɛ, kɛ amɛnanemɛi lɛ akpɔmɔ kɛmiibote mumɔŋ paradeiso shihilɛ mli; Maŋtsɛyeli lɛ he sanekpakpa lɛ shiɛmɔ yɛ jeŋ fɛɛ; asafo kuu babaoo lɛ anaabuamɔ. (Yesaia 2:2, 8; yitso 35; Zakaria 8:23; Mateo 24:14; Kpojiemɔ 7:9) Áwo Yehowa gbɛi kpeteŋkpele lɛ kɛ ejeŋ muu fɛɛ maŋtsɛyeli lɛ nɔ gojoo, ni nakai nɔŋŋ hu mɔ bibioo etsɔ mɛi akpe, ni mɔ fioo hu ebatsɔ maŋ ni he wa, ejaakɛ Yehowa diɛŋtsɛ eha efee oya yɛ lɛ diɛŋtsɛ ebe mli. (Yesaia 60:22; Ezekiel 38:23) Ni bɔfo Yohane ninaai ni yɔɔ Kpojiemɔ wolo lɛ mli lɛ miibɛŋkɛ amɛ naagbee he kwraa agbɛnɛ.
20. Mɛɛ nɔmimaa ni mli wa Yehowa Odasefoi yɔɔ, ni amɛbatsɔmɔ mɛni yɛ faŋŋ mli?
20 No hewɔ lɛ, Yehowa Odasefoi yɛ nɔmimaa ni mli wa waa yɛ bɔ ni amɛshishinumɔ ja ha yɛ nɔ ni nibii ni yaa nɔ yɛ je lɛŋ kɛjɛ 1914 kɛbaa nɛɛ tsɔɔ lɛ he lɛ he fe bei fɛɛ ni eho. Akɛni amɛyɛ nɛkɛ nɔmimaa nɛɛ hewɔ lɛ, amɛbatsɔmɔ dɛŋdadei yɛ Ŋwɛi Flooflo Nyɔŋmɔ lɛ dɛŋ. Amɛji mɛi ni akɛ nitsumɔ ewo amɛdɛŋ akɛ amɛkɛ ŋwɛi shɛɛ sane lɛ ayaha yɛ nɛkɛ be ni he jaraa waa nɛɛ mli. (Romabii 10:15, 18) Hɛɛ, Yehowa wiemɔi ni ewie yɛ naagbee be lɛ he lɛ eba mli anɔkwale. (Yesaia 55:11) Esa akɛ enɛ hu akanya wɔ ni wɔya nɔ aahu kɛyashi be mli ni wɔɔna akɛ Nyɔŋmɔ shiwoo lɛ fɛɛ eba mli kwraa kɛtsɔ Yesu Kristo nɔ.
Yiwalaheremɔ Ebɛŋkɛ Fe Beni Wɔbatsɔmɔ Heyelilɔi Lɛ
21. Mɛɛ yelikɛbuamɔ nɔ ni ji kpawo wɔyɔɔ ni baaha wɔya nɔ wɔhiɛ atsɛ̃ ni wɔsara?
21 Yɛ naagbee lɛ, nɔ ni ji kpawo ni yeɔ buaa wɔ ni wɔhiɛ atsɛ̃ lɛ nɛ: Ha ahi ojwɛŋmɔ mli daa akɛ wɔ yiwalaheremɔ lɛ ebɛŋkɛ kwraa fe be mli ni wɔtsɔmɔ heyelilɔi lɛ. Nɔ ni he hiaa fe fɛɛ lɛ, jeŋ muu fɛɛ maŋtsɛ ni Yehowa ji lɛ bembuu kɛ egbɛi lɛ hetsemɔ lɛ hu ebɛŋkɛ waa diɛŋtsɛ. No hewɔ lɛ ehe miihia waa ni wɔhiɛ atsɛ̃ ni wɔsara fe bei fɛɛ ni eho. Bɔfo Paulo ŋma akɛ: “Ni enɛ hu, akɛ nɔ ni wɔle be lɛ akɛ agbɛnɛ ŋmɛlɛtswaa ni wɔkɛaate shi kɛaajɛ wɔ mli lɛ eshɛ, ejaakɛ agbɛnɛ wɔ yiwalaheremɔ lɛ ebɛŋkɛ fe tsutsu beni wɔhe wɔye lɛ. Nyɔɔŋ lɛ eho eta, ni jetsɛremɔ lɛ ebɛŋkɛ.”—Romabii 13:11, 12.
22. Esa akɛ bɔ ni wɔ yiwalaheremɔ ebɛŋkɛ eha lɛ asa wɔhe yɛ mɛɛ gbɛ nɔ?
22 Akɛni wɔ yiwalaheremɔ lɛ ebɛŋkɛ kwraa hewɔ lɛ, esa akɛ wɔhiɛ atsɛ̃! Esaaa ni wɔhaa wɔ diɛŋtsɛ loo je lɛŋ nibii ahe miishɛɛ ni wɔɔna lɛ yaa hiɛ fe hiɛsɔɔ ni wɔɔna wɔha nɔ ni Yehowa feɔ haa ewebii yɛ nɛkɛ naagbee be nɛɛ mli lɛ. (Daniel 12:3) Ehe miihia ni wɔkã he daa nɛɛ fe bei fɛɛ ni eho bɔni afee ni nɔ ko akaha wɔgba afa kɛjɛ gbɛ ni Nyɔŋmɔ Wiemɔ lɛ etsɔɔ faŋŋ akɛ wɔnyiɛ nɔ lɛ nɔ. (Mateo 13:22) Odaseyeli tsɔɔ faŋŋ akɛ nɛkɛ jeŋ nɛɛ yɛ enaagbee gbii amli kwraa. Etsɛŋ ni abaajie kɛjɛ shihilɛ mli kwraa kɛya naanɔ koni akɛsaa gbɛ aha jalɛ jeŋ hee lɛ.—2 Petro 3:13.
23. Mɛɛ gbɛ nɔ Yehowa baaye abua wɔ yɛ, ni mɛɛ jɔɔmɔ baajɛ mli aba?
23 No hewɔ lɛ, bɔ fɛɛ bɔ ni fee lɛ, nyɛhaa wɔhiɛ atsɛ̃a ni wɔsaraa. Ha ohiɛ ahi ohe nɔ yɛ he ni wɔshɛ yɛ bebuu mli nɛɛ he, fe bei fɛɛ ni eho. Kaimɔ akɛ, Yehowa eyawɔŋ kɔkɔɔkɔ yɛ nɛkɛ sane nɛɛ mli. Shi moŋ, ebaaya nɔ eye ebua wɔ ni wɔhiɛ atsɛ̃ ni wɔya nɔ wɔsara yɛ nɛkɛ naagbee be nɛɛ mli. Nyɔɔŋ lɛ eho eta. Jetsɛremɔ miibɛŋkɛ. No hewɔ lɛ ohiɛ atsɛ̃! Etsɛŋ ni wɔbaana jetsɛremɔ gbi ni yɔɔ fɛo fe gbii fɛɛ, beni Mesia Maŋtsɛyeli lɛ haa Yehowa yiŋtoo yɛ shikpɔŋ lɛ he lɛ baa mli kwraa lɛ!—Kpojiemɔ 21:4, 5.
Mɛni Ji Ohetooi?
◻ Mɛni Yesu tsɔɔ beni ewie akɛ Nyɔŋmɔ mlifu gbi lɛ baaba gbɔmɛi anɔ trukaa “tamɔ tsɔne” lɛ?
◻ Mɛni hewɔ esa akɛ wɔwuu wɔshi nibii ni baagbala wɔjwɛŋmɔ lɛ, ni mɛɛ gbɛ nɔ wɔɔtsɔ wɔfee nakai?
◻ Mɛɛ sɔlemɔ he hiaa bɔni afee ni wɔhiɛ aya nɔ atsɛ̃?
◻ Mɛɛ gbɛjianɔtoo ni wɔkɛaabɔ he hiaa waa?
◻ Mɛni hewɔ esa akɛ wɔka wɔ diɛŋtsɛ wɔmumɔŋ shihilɛ wɔkwɛ lɛ?
◻ Mɛɛ gbɛfaŋnɔ gbalɛi naa yɛ wɔhiɛ ni aaaya nɔ atsɛ ni wɔsara, lɛ mli?