Yitso 112

Yesu Naagbee Hehoo lɛ Ebɛŋkɛ

YƐ BE mli ni Jufɔ, Nisan 11 baa naagbee lɛ, Yesu gbe nɔ ni etsɔɔ bɔfoi lɛ yɛ Mu Gɔŋ lɛ nɔ lɛ naa. Mɛɛ gbi ni etɔ lɛ yɛ mli, ni etsu nii waa eji nɛkɛ! Agbɛnɛ, ekolɛ beni ekuɔ esɛɛ kɛyaa Betania koni eyawɔ jɛmɛ lɛ, ekɛɛ ebɔfoi lɛ akɛ: “Nyɛle akɛ eshwɛ gbii enyɔ ni ayeɔ hehoo lɛ, ni aaajie gbɔmɔ Bi lɛ aha ni asɛŋ lɛ.”

Eka shi faŋŋ akɛ Yesu kɛ ebɔfoi lɛ ye gbi ni nyiɛ sɛɛ, ni ji Shɔ, Nisan 12 lɛ yɛ he ko ni yɔɔ kpoo ni amɛjɔɔ amɛhe. Gbi ni tsɔ hiɛ lɛ mli lɛ, ekã jamɔ mli hiɛnyiɛlɔi lɛ ahiɛ yɛ faŋŋ mli, ni eyoo akɛ amɛmiitao amɛgbe lɛ. No hewɔ lɛ, Shɔ lɛ, ejieee ehe kpo etsɔɔɔ yɛ faŋŋ mli, ejaakɛ etaooo ni nɔ ko nɔ ko agba Hehoo ni ekɛ ebɔfoi lɛ baaye yɛ enɔ jetsɛremɔ gbɛkɛ mli lɛ naa.

Yɛ nɛkɛ be nɛɛ mli lɛ, osɔfonukpai lɛ kɛ maŋbii lɛ ateŋ onukpai lɛ fɛɛ ebua amɛhe naa yɛ osɔfonukpa Kaiafa agbo lɛ naa. Akɛni bɔ ni Yesu tutua amɛ yɛ gbi ni tsɔ hiɛ lɛ mli lɛ miidɔ amɛ lolo hewɔ lɛ, amɛmiikpaŋ eyi nɔ ni amɛmɔ lɛ kɛtsɔ ŋaatsɔɔ nigii nɔ koni amɛgbe lɛ. Kɛlɛ amɛtee nɔ amɛkɛɛ: “Jeee gbijurɔ lɛ nɔ, ni maŋ lɛ akababú.” Amɛmiishe maŋbii lɛ, ni naa Yesu he miishɛɛ lɛ agbeyei.

Beni jamɔ mli hiɛnyiɛlɔi lɛ kɛ yiwalɛ kpaŋɔ ni amɛgbe Yesu lɛ, saralɔ ko ba amɛŋɔɔ. Nɔ ni fee amɛ naakpɛɛ ji, Yesu diɛŋtsɛ bɔfoi lɛ ateŋ mɔ kome ni, Yuda Iskariot, mɔ ni Satan kɛ shishijee jwɛŋmɔ lɛ ewo emli akɛ etsɔɔ e-Nuŋtsɔ lɛ sɛɛ gbɛ lɛ! Kwɛ bɔ ni amɛna miishɛɛ waa amɛha beni Yuda bi akɛ: “Mɛni nyɛaaha mi, ni majie lɛ mawo nyɛdɛŋ?” lɛ. Amɛkɛ miishɛɛ kpɛlɛ nɔ akɛ amɛbaaha lɛ jwiɛtɛii kukuji 30, ni ji jara ni akɛheɔ nyɔŋ yɛ Mose Mla kpaŋmɔ lɛ naa lɛ. Kɛjɛ be nɛɛ mli kɛyaa lɛ, Yuda tao hegbɛ ni hi jogbaŋŋ ni eeetsɔ nɔ etsɔɔ Yesu sɛɛ gbɛ eha amɛ beni gbɔmɛi babaoo bɛ jɛmɛ.

Nisan 13 jeɔ shishi yɛ be mli ni hulu eyanyɔ shi sɛɛ yɛ Shɔ. Yesu jɛ Yeriko ebashɛ shi yɛ Sohaa, no hewɔ lɛ enɛ ji gbi ni ji ekpaa kɛ naagbee gbɛkɛ ni eyeɔ yɛ Betania. Enɔ jetsɛremɔ Soo lɛ, ehe baahia ni atsu naagbee nibii ni he hiaa kɛha Hehoo lɛ, ni jeɔ shishi yɛ be mli ni hulu enyɔ shi sɛɛ lɛ ahe nii. Nakai be mli esa akɛ agbe Hehoo toobi lɛ ni asha lɛ emuu lɛ. Nɛgbɛ amɛbaaye niyenii lɛ yɛ, ni namɔ baasaa nibii ni amɛkɛbaaye lɛ?

Yesu ewieko emli saji otii lɛ ahe, ekolɛ koni Yuda akanu ni eyakɛɛ osɔfonukpai lɛ ni amɛbatutua Yesu yɛ Hehoo gbijurɔyeli lɛ shishi. Shi yɛ nɛkɛ be nɛɛ mli lɛ, ekolɛ Soo shwane mra mli lɛ, Yesu wo Petro kɛ Yohane gbɛ kɛjɛ Betania ni ekɛɛ amɛ akɛ: “Nyɛyaa ni nyɛyasaa hehoo niyenii lɛ nyɛtoa wɔ, koni wɔbaye.”

Ni amɛbi lɛ akɛ: “Nɛgbɛ osumɔɔ ni wɔyasaa wɔto yɛ?”

Ni Yesu tsɔɔ mli akɛ: “Kɛji nyɛbote maŋ lɛŋ lɛ, naa, nuu ko kɛ nyɛ baakpe ni ehiɛ nu kpulu; nyɛnyiɛa esaa kɛyaa shia he ni eeeyabote lɛ, ni nyɛkɛɛ shiatsɛ lɛ akɛ: ‘Tsɔɔlɔ lɛ kɛɛ wɔbakɛɛo akɛ: “Nɛgbɛ gbɔi atsu lɛ ni mikɛ mikaselɔi lɛ baaye hehoo niyenii lɛ yɛ mli lɛ yɔɔ?” ’ Ni eeetsɔɔ nyɛ ŋwɛi asa kpele ko ni awula mli; jɛi nyɛsaa nyɛtoa yɛ.”

Ŋwanejee ko bɛ he akɛ shiatsɛ lɛ ji Yesu kaselɔi lɛ eko ni miikpa gbɛ akɛ Yesu baabi ni amɛkɛ eshia lɛ atsu nii kɛha nɛkɛ nifeemɔ ni he hiaa nɛɛ. Shi bɔ fɛɛ bɔ ni fee lɛ, beni Petro kɛ Yohane yashɛ Yerusalem lɛ, amɛna nɔ fɛɛ nɔ taakɛ bɔ ni Yesu kɛɛ amɛ lɛ pɛpɛɛpɛ. No hewɔ lɛ mɛi enyɔ lɛ kwɛ akɛ toobi lɛ efee klalo ni akɛ amɛto gbɛjianɔ ni he hiaa lɛ hu fɛɛ bɔ ni mɛi 13 ni ji Yesu kɛ ebɔfoi 12 lɛ ni baaye Hehoo lɛ ahiamɔ nii ahe nii. Mateo 26:1-5, 14-19; Marko 14:1, 2, 10-16; Luka 22:1-13; 2 Mose 21:32.

▪ Eka shi faŋŋ akɛ mɛni Yesu fee yɛ Shɔ, ni mɛni hewɔ?

▪ Mɛɛ kpee afee yɛ osɔfonukpa lɛ shia lɛ, ni mɛɛ yiŋtoo hewɔ ni Yuda tee jamɔ mli hiɛnyiɛlɔi lɛ aŋɔɔ lɛ?

▪ Namɛi Yesu tsu kɛtee Yerusalem yɛ Soo lɛ, ni yɛ mɛɛ yiŋtoo hewɔ?

▪ Mɛni mɛi ni atsu nɛɛ yana ni jie Yesu hewalɛ ni yɔɔ naakpɛɛ lɛ kpo ekoŋŋ etsɔɔ amɛ?