Yitso 115

Naataomɔ ko Te Shi

MRA mli yɛ gbɛkɛnaashi lɛ, Yesu fɔ ebɔfoi lɛ anaji ahe ni ekɛtsɔɔ amɛ heshibaa he nikasemɔ fɛfɛo ko. Yɛ no sɛɛ lɛ, eto egbele ni baa lɛ he Kaimɔ lɛ shishi. Amrɔ nɛɛ, yɛ nɔ ni ba yɛ nɛkɛ be nɛɛ mli lɛ titri hewɔ lɛ, naakpɛɛ nifeemɔ ko ba. Ebɔfoi lɛ kɛ amɛhe taa saji anaa waa diɛŋtsɛ yɛ mɔ ni nɔ kwɔ fe fɛɛ yɛ amɛteŋ lɛ he! Etamɔ nɔ ni enɛ ji naataomɔ ko ni miiya nɔ momo yɛ amɛteŋ lɛ nɔtsamɔ.

Kaimɔ akɛ yɛ be mli ni atsake Yesu yɛ gɔŋ lɛ nɔ sɛɛ lɛ, bɔfoi lɛ taa saji anaa yɛ mɔ ni ji onukpa yɛ amɛ fɛɛ amɛteŋ lɛ he. Kɛfata he lɛ, Yakobo kɛ Yohane bi ni aha amɛ hegbɛi wuji yɛ Maŋtsɛyeli lɛ mli, ni enɛ ha bei babaoo ba bɔfoi lɛ ateŋ. Agbɛnɛ, yɛ naagbee gbɛkɛ ni ekɛ amɛ yɔɔ nɛɛ mli lɛ, kwɛ bɔ ni ebaadɔ Yesu waa eha akɛ eeena amɛ ni amɛmiibe lolo! Mɛni ji nɔ ni efee?

Yɛ nɔ najiaŋ ni eeebolɔ ewo ebɔfoi lɛ yɛ amɛjeŋba nɛɛ hewɔ lɛ, Yesu kɛ amɛ susu saji ahe shikome ekoŋŋ kɛ tsuishitoo akɛ: “Jeŋmaji lɛ anɔ maŋtsɛmɛi lɛ yeɔ amɛnɔ odehei asane, ni mɛi ni yɔɔ amɛnɔ hewalɛ lɛ, atsɛɔ amɛ ejurɔfeelɔi. Shi nyɛ lɛ ebɛ nyɛ nakai; . . . Ejaakɛ te mɔ ni fe mɔ hu: mɔ ni taa okpɔlɔ he lɛ, aloo mɔ ni sɔmɔɔ lɛ? Ani jeee mɔ ni taa okpɔlɔ he lɛ?” Kɛkɛ ni yɛ be mli ni ekaiɔ amɛ yɛ lɛ diɛŋtsɛ enɔkwɛmɔ nɔ lɛ he lɛ, ekɛɛ: “Shi mi lɛ, miyɛ nyɛteŋ akɛ mɔ ni sɔmɔɔ.”

Yɛ emuu ni amɛyeee lɛ fɛɛ sɛɛ lɛ, bɔfoi lɛ ekpɛtɛ Yesu he yɛ ekaai lɛ fɛɛ mli. No hewɔ lɛ, ekɛɛ: “Mi hu miito maŋtsɛyeli maha nyɛ taakɛ bɔ ni mi-Tsɛ eto eha mi lɛ.” Nɛkɛ kpaŋmɔ ni ka Yesu kɛ ebɔfoi anɔkwafoi lɛ pɛ ateŋ lɛ haa amɛfataa ehe yɛ odehei ahegbɛ ni eyɔɔ lɛ mli. Yɛ naagbee lɛ, yibɔ fioo ko ni ji 144,000 ji mɛi ni ahalaa awoɔ kpaŋmɔ nɛɛ mli kɛha Maŋtsɛyeli lɛ.

Eyɛ amli akɛ akɛ nɛkɛ naakpɛɛ gbɛkpamɔ ni ji gbɛfaŋnɔ ni amɛkɛ Kristo baana yɛ Maŋtsɛyeli lɛ mli lɛ eha bɔfoi lɛ moŋ, shi amɛgbɔjɔ yɛ mumɔŋ yɛ nɛkɛ be nɛɛ mli. Yesu kɛɛ amɛ akɛ: “Nyɔɔŋ nɛŋ lɛ, mihe sane baaha nyɛ fɛɛ nyɛnane atɔ̃tɔ.” Shi kɛlɛ, Yesu kɛɛ Petro akɛ esɔle yɛ ehewɔ, ni ewo lɛ hewalɛ akɛ: “Ni bo hu, beni okpale lɛ, wo onyɛmimɛi lɛ ahewalɛ.”

Yesu tsɔɔ mli akɛ: “Bii bibii, be fioo kɛkɛ eshwɛ ni mikɛ nyɛ baahi shi; nyɛaatao mi, ni bɔ ni mikɛɛ Yudafoi lɛ akɛ: ‘He ni miyaa lɛ, nyɛ lɛ nyɛnyɛŋ jɛi nyɛba lɛ,’ nakai mikɛɔ nyɛ hu agbɛnɛ nɛɛ. Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”

Ni Petro bi lɛ akɛ: “Nuŋtsɔ, nɛgbɛ oyaa?”

Yesu ha lɛ hetoo akɛ: “He ni miyaa lɛ, onyɛŋ misɛɛ onyiɛ amrɔ nɛɛ, shi ooonyiɛ misɛɛ wɔsɛɛ ko.”

Petro miitao ele, ni ebi lɛ akɛ: “Nuŋtsɔ, mɛɛ hewɔ minyɛŋ osɛɛ manyiɛ amrɔ nɛɛ? Miwala tete, maŋɔŋmɛ shi yɛ ohewɔ.”

Yesu bi lɛ akɛ: “Oooŋɔ owala oŋmɛ shi yɛ mihewɔ? Lɛlɛŋ, miikɛɛo akɛ: Ŋmɛnɛ nyɔɔŋ nɛŋ lɛ wuɔ naŋ agbɛɛ shii enyɔ ni oookpa yɛ misɛɛ shii etɛ.”

Petro wie eshi akɛ: “Kɛji gbo mikɛo aaagbo tete lɛ, mikpaŋ yɛ osɛɛ!” Ni beni bɔfoi krokomɛi lɛ hu fata he ni amɛ fɛɛ amɛkɛɔ nakai nɔŋŋ lɛ, Petro shwã akɛ: “Kɛji mɛi lɛ fɛɛ anane aaatɔ̃tɔ̃ yɛ ohe lɛ, mi lɛ minane etɔ̃tɔ̃ŋ gbi ko gbi ko!”

Beni Yesu wieɔ be mli ni etsu bɔfoi lɛ yɛ shiɛmɔ he gbɛfaa ko hewɔ kɛtee Galilea ni amɛhiɛɛɛ fotro loo niyenii ko hu lɛ he lɛ, ebi amɛ akɛ: “Ani nɔ ko hia nyɛ?”

Amɛha lɛ hetoo akɛ: “Dabi!”

Ni ekɛɛ amɛ akɛ: “Shi agbɛnɛ lɛ, mɔ ni yɔɔ fotro lɛ, ha ni ekɔ, nakai nɔŋŋ mɔ ni yɔɔ kotoku hu; ni mɔ ni bɛ klante lɛ, ha ni ehɔ̃ɔ etade ni ekɛhe eko. Ejaakɛ miikɛɛ nyɛ akɛ nɔ ni aŋma nɛɛ hu, ja eba mli yɛ mihewɔ, akɛ: ‘Ni abu lɛ ashi mlatɔ̃lɔi anɔ;’ ejaakɛ mihe saji lɛ, ja eba mli.”

Yesu miiwie be mli ni abaasɛŋ lɛ afata efɔŋfeelɔi, loo mlakwalɔi ahe lɛ he. Etsɔɔ mli hu akɛ yɛ no sɛɛ lɛ, esɛɛnyiɛlɔi lɛ kɛ yiwaa ni mli wa waa diɛŋtsɛ baakpe. Ni amɛkɛɛ lɛ akɛ: “Nuŋtsɔ, naa, klantei enyɔ nɛ.”

Ni eha amɛ hetoo akɛ: “Efa.” Taakɛ bɔ ni wɔbaana lɛ, klantei ni amɛhiɛ lɛ ha Yesu na hegbɛ etsɔɔ amɛ nikasemɔ kroko ni he hiaa waa. Mateo 26:31-35; Marko 14:27-31; Luka 22:24-38; Yohane 13:31-38; Kpojiemɔ 14:1-3.

▪ Mɛni hewɔ naataomɔ ni ba kaselɔi lɛ ateŋ lɛ yɔɔ naakpɛɛ nakai lɛ?

▪ Te Yesu tsu naataomɔ lɛ he nii eha tɛŋŋ?

▪ Mɛni kpaŋmɔ ni Yesu kɛ ekaselɔi lɛ fee lɛ nyɛ etsu?

▪ Mɛɛ kita hee Yesu kɛha, ni te ehe hiaa ha tɛŋŋ?

▪ Mɛɛ hekɛnɔfɔɔ ni fe nine Petro na yɛ lɛ diɛŋtsɛ emli, ni mɛni Yesu kɛɛ lɛ?

▪ Mɛni hewɔ ni esoro Yesu famɔi ni kɔɔ fotro kɛ niyenii kotoku he lɛ yɛ nɔ ni etsɔ hiɛ ekɛha lɛ he lɛ?