Saji Ni Jɛ Shiwoo Shikpɔŋ Lɛ Nɔ

Yerusalem​—Biblia Mli Saji Ashishijee He

YƐ BE mli ni jeŋmaji pii yɔɔ maŋtiase, maŋ titri ni jɛmɛ nɔyeli lɛ yɔɔ lɛ, Biblia kaselɔi baanyɛ asusu Yerusalem he akɛ maŋtiase kɛha adesai. Nakai enɛ ji ejaakɛ nibii ni yɔɔ naakpɛɛ ni ba yɛ jɛmɛ lɛ he hiaa wɔteŋ mɔ fɛɛ mɔ.

Kɛ okwɛ ŋwɛi gbɛ lɛ, obaanyɛ ona enɛ kɛji akɛ odamɔ he ni kwɔ yɛ Yerusalem wuoyigbɛ.a Jɔɔi enyɔ kpeɔ yɛ he ni tsei lɛ edi yɛ lɛ. Kidron Jɔɔ lɛ baa kɛjɛɔ ninejurɔ gbɛ; yɛ anaigbɛ, aloo abɛku gbɛ lɛ, jɛmɛ ji he ni Hinom Jɔɔ, ni kɛ Biblia mli gbɛi Gehena ba lɛ yɔɔ. (Mateo 10:​28; 23:33) Nɔ ni yɔɔ teŋgbɛ (ni anaa ni hulu kpɛɔ yɛ nɔ yɛ gbogboi lɛ ahiɛ) lɛ ji he ni ama blema David Maŋtiase lɛ yɛ lɛ. Nɔ ni yɔɔ gbogboi lɛ amli hu ji Moslem tsui enyɔ ni amamɔ yɛ he ni fee yinɔsane lɛ. Nɔ ni bɛŋkɛ gbogbo lɛ fioo lɛ ji Moslem sɔlemɔ tsu kokloo ni eyiteŋ kpɛlɛɔ tamɔ bluu lɛ, ni nɔ ni yɔɔ esɛɛ ni da lɛ ji Tɛ Tsu Kokloo Lɛ.

Shi mɛni hewɔ esa akɛ Yerusalem, ni titri lɛ he ni kwɔ ni nɛkɛ tsui koklobii enyɔ nɛɛ yɔɔ lɛ afee he ko ni he hiaa kɛhaa bo? Ojogbaŋŋ, mɛɛ Biblia mli sane too gwaŋtɛŋ ko ni ekoloŋtoi ka tsei ateŋ lɛ kɛbaa ojwɛŋmɔ mli? Ekolɛ Abraham nɔ lɛ. Hɛɛ, lɛ ji mɔ ni kɛ ebinuu Isak fa gbɛ kɛtee Moria Gɔŋ lɛ nɔ, ni eka shi faŋŋ akɛ eji he ni tɛsai nɛɛ yɔɔ loo he ni bɛŋkɛ he ni onaa tsui enyɔ nɛɛ yɛ lɛ. Abraham hemɔkɛyeli hewɔ lɛ. eesumɔ ni ekɛ ebinuu lɛ asha afɔle, shi bɔfo ko tsi lɛ gbɛ. Kɛkɛ ni Abraham “na too agbo ko yɛ esɛɛ gbɛ ni ekoloŋtoi elalaa koo” ni ekɛlɛ sha afɔle “yɛ ebi lɛ najiaŋ.” No hewɔ lɛ Yerusalem kwɛmɔ baanyɛ ni ekɛ sane ni ba nɛɛ aba ojwɛŋmɔ mli.​—1 Mose 22:​1-13.

Abale afɔleshai krokomɛi hu yɛ sɛɛ mli beni Salomo ma sɔlemɔ tsu fɛfɛo ko eha Yehowa yɛ he ni asaa jɛmɛ tɛtrɛɛ yɛ he ni nɛkɛ tsui koklobii enyɔ nɛɛ yɔɔ bianɛ lɛ. (2 Kronika 3:⁠1) Bɔɔ mɔdɛŋ ni osusu Israelbii ni jɛ shikpɔŋ lɛ nɔ he fɛɛ he amɛmiiba biɛ kɛ amɛ kooloi afɔleshai kɛha daa afi gbijurɔyeli lɛ he yɛ ojwɛŋmɔ mli. Nɔ ni yɔɔ hiɛdɔɔ fe fɛɛ ji Kpatamɔ Gbi lɛ. Yɛ nakai gbi lɛ nɔ lɛ, ahalaa too kome ni atsuɔ lɛ akɛ “Azazel too kɛyaa ŋa lɛ nɔ,” ekolɛ kɛbaa Kidron Jɔɔ lɛ mli kɛkɛ lɛ ebote wuoyi-bokagbɛ kɛbote Yudea ŋa lɛ nɔ. Ahalaa too kroko hu kɛ tsina ni agbeɔ amɛ ni akɛ amɛla tsuɔ nii akɛ afɔleshaa nɔ koni akɛkpata aha osɔfoi lɛ kɛ gbɔmɛi lɛ. Akɛ la lɛ eko po tekeɔ muhɔɔ lɛ kɛboteɔ sɔlemɔ we lɛ He Krɔŋkrɔŋ Fe Fɛɛ lɛ. No hewɔ lɛ obaanyɛ okwɛ maŋtiase lɛ ni nakai mfoniri lɛ yɛ ojwɛŋmɔ mli.​—3 Mose 16:​1-34.

Nɛkɛ afɔleshai nɛɛ fɛɛ ni yaa nɔ yɛ Yerusalem lɛ tsɔɔ Yesu Kristo afɔleshaa ni yeɔ emuu lɛ. Yɛ enaagbee gbɛkɛ ni eye yɛ shikpɔŋ nɔ, ni no mli lɛ nyɔŋtsere lɛ eye emuu lɛ, Yesu bua ebɔfoi lɛ anaa koni amɛye enaagbee Hehoo Gbijurɔ ni sa lɛ. Enɛ ba nɔ yɛ ŋwɛitsu ko nɔ ni asusuɔ akɛ nɛkɛ tsu nɛɛ yɛ maŋtiase lɛ he ko ni kwɔ yɛ sɔlemɔ we lɛ abɛku (anaigbɛ) . Beni Yesu to Nuŋtsɔ lɛ Gbɛkɛnaashi Niyenii lɛ he gbɛjianɔ egbe naa sɛɛ lɛ, eŋɔ bɔfoi lɛ kɛtee Mu Gɔŋ lɛ nɔ, ni enɛ yɛ Kidron Jɔɔ lɛ sɛɛ, yɛ sɔlemɔ tsu lɛ boka (ninejurɔ) gbɛ.​—Luka 22:​14-39.

Akɛ nɔ ni baaye abua bo ni osusu enɛ he lɛ, kwɛmɔ mfoniri ni yɔɔ shishi gbɛ lɛ ni asha kɛjɛ Yerusalem bokagbɛ ekolɛ kɛje he ni Yesu ye Nuŋtsɔ lɛ Gbɛkɛnaashi Niyenii lɛ yɛ lɛ. Onyɛɔ ojɛɔ biɛ onaa Moslembii atɛ tsu kokloo (ni kpɛlɛɔ tamɔ bluu beni nyɔŋtsere kpɛɔ nɔ lɛ) yɛ sɔlemɔ we gɔŋ lɛ nɔ. Kɛmiiya shɔŋŋ yɛ bokagbɛ ji Kidron Jɔɔ lɛ (yɛ he ni anaa kɛyashɛɔ lɛ shishigbɛ) kɛ agbɛnɛ Getsemane Abɔɔ mli tsei lɛ. Nɔ ni yɔɔ eŋwɛigbɛ yɛ ninejurɔgbɛ ji Mu Gɔŋ lɛ.

Nyɔŋtsere lɛ hu baaye emuu beni March 22, 1989 aaashɛ, yɛ be mli ni Yehowa Odasefoi asafoi ni yɔɔ jeŋ muu lɛ fɛɛ lɛ baakpe (yɛ hulu shinyɔɔ sɛɛ) koni amɛye Nuŋtsɔ lɛ Gbɛkɛnaashi Niyenii lɛ, ni amɛkɛkai Yesu afɔleshaa gbele lɛ.b Ofainɛ too gbɛjianɔ ni oya enɛ shishi. Yɛ nakai gbi lɛ nɔ lɛ, obaasumɔ ni ojwɛŋ nibii ni eho ni kɔɔ nibii ni tee nɔ yɛ Yerusalem kɛ ehewɔ ni kɔɔ Yesu ni fɔse esusuma ewo gbele mli lɛ he. Yesu kɛ enɛ feemɔ bu Jalɔ ni Yehowa ji lɛ bem ni ekpɔ adesai ni heɔ yeɔ kɛjɛ esha kɛ gbele mli​—1 Korintobii 11:​23-26; Hebribii 9:​11-28

[Shishigbɛ niŋmai]

[Hei ni Mfonirii ni yɔɔ baafa 16 lɛ Jɛ]

Pictorial Archive (Near Eastern History) Est.

Pictorial Archive (Near Eastern History) Est.