Yesu Shihilɛ Akɛ Adesa Lɛ Naagbee Gbi Lɛ

Nisan 14, afi 33 Ŋ.B. Sohaa shwane kɛmiiba gbɛkɛnaashi nɛ. Hii kɛ yei akuu ko baafũ amɛnaanyo ko ni amɛsumɔɔ lɛ waa lɛ. Hii lɛ ateŋ mɔ kome, Nikodemo, kɛ tsofa-kɛ-ŋma eba koni akɛsaa gbonyo lɛ kɛha efũu. Nuu ko ni atsɛɔ lɛ Yosef kɛ klala ni he tse eba koni akɛbala gbonyo ni ayi lɛ apila lɛ lɛ.

NAMƐI ji nɛkɛ gbɔmɛi nɛɛ, ni namɔ amɛfũɔ lɛ lɛ? Ani enɛɛmɛi fɛɛ saa ohe? Bɔni afee ni wɔha sanebimɔi nɛɛ ahetoo lɛ, nyɛhaa wɔkua wɔsɛɛ kɛyaa gbi ni he hiaa waa nɛɛ shishijee.

Soo Gbɛkɛnaashi, Nisan 14

Nyɔɔŋtsere ni miikpɛ ni eye emuu miite shi fiofio yɛ Yerusalem nɔ. Maŋ ni gbɔmɛi eyi mli obɔ lɛ mli hoofeemɔ miiba shi yɛ gbi ni anaaa dekã yɛ mli kwraa lɛ sɛɛ. Too ni ágbe ni aatsukɔ he ŋma eyi kɔɔyɔŋ obɔ gbɛkɛ nɛɛ. Hɛɛ, gbɔmɛi akpei abɔ miisaa amɛhe kɛha nifeemɔ krɛdɛɛ ko—daa afi Hehoo gbi jurɔ lɛ yeli.

Wɔnaa Yesu Kristo kɛ ebɔfoi 12 lɛ yɛ gbɔi atsũ agbo ko ni asaa mli ni amɛtara okpɔlɔ ni ato nibii amamɔ nɔ lɛ sɛɛ. Bo toi! Yesu miiwie. Ekɛɛ: “Taomɔ mitaoɔ akɛ mikɛ nyɛ aye nɛkɛ Hehoo nɛɛ dani mana amanehulu lɛ.” (Luka 22:15) Yesu le akɛ ejamɔ mli henyɛlɔi lɛ etswa amɛfai shi akɛ amɛbaaha agbe lɛ. Shi dani enɛ aaaba lɛ, nɔ ko ni sa kadimɔ waa baaya nɔ gbɛkɛnaashi nɛɛ.

Beni amɛye Hehoo lɛ sɛɛ lɛ, Yesu tswa adafi akɛ: “Nyɛteŋ mɔ kome baatsɔɔ misɛɛgbɛ.” (Mateo 26:21) Enɛ hao bɔfoi lɛ. Namɔ po baanyɛ afee nɛkɛ mɔ nɛɛ? Yɛ sanegbaa ko sɛɛ lɛ, Yesu kɛɛ Yuda Iskariot akɛ: “Nɔ ni ofeɔ lɛ, feemɔ mramra!” (Yohane 13:27) Eyɛ mli akɛ mɛi krokomɛi lɛ yooo sɛɛ moŋ, shi Yuda ji sɛɛgbɛtsɔɔlɔ lɛ. Eshi jɛmɛ koni eyatsu enitsumɔ fɔŋ yɛ Yesu yinɔ apam ni amɛtee lɛ he nii.

Gbi Jurɔ Krɛdɛɛ ko Yeli

Agbɛnɛ Yesu to nɔ ko hee ko kwraa ni abaaye lɛ gbi jurɔ shishi—nɔ ni baakai egbele lɛ. Yesu kɔ aboloo, ni ekɛ shidaa sɔlemɔ ha yɛ he ni ekumɔ mli. Efã amɛ akɛ: “Nyɛhea, nyɛyea. Enɛ ji migbɔmɔtso ni aŋɔha yɛ nyɛ hewɔ lɛ.” Beni amɛteŋ mɔ fɛɛ mɔ eye aboloo lɛ eko lɛ, ewo kpulu ni wein tsuru yɔɔ mli lɛ ni ejɔɔ nɔ. Yesu kɛɛ amɛ ni etsɔɔ mli eha amɛ akɛ: “Nyɛ fɛɛ nyɛnua eko! ejaakɛ enɛ ji milá ni ji kpaŋmɔ hee lɛ nɔ lɛ, ni afɔse ashwie shi yɛ mɛi pii ahewɔ . . . lɛ.” Efã bɔfoi anɔkwafoi 11 ni eshwɛ lɛ akɛ: “Nyɛfea enɛ ni nyɛŋɔkai mi.”—Mateo 26:26-28; Luka 22:19, 20; 1 Korintobii 11:24, 25.

Yesu kɛ mlihilɛ saa ebɔfoi anɔkwafoi lɛ kɛha nɔ ni kã amɛhiɛ lɛ nakai gbɛkɛ lɛ, ni ema suɔmɔ ni mli wa ni eyɔɔ kɛha amɛ lɛ nɔ mi. Etsɔɔ mli akɛ: “Mɔ ko bɛ suɔmɔ ni da fe enɛ, akɛ mɔ aaaŋɔ ewala eŋmɛ shi eha eshieŋtsɛmɛi. Kɛji nyɛfee nii ni miwoɔ nyɛ he kita lɛ, no lɛ mishieŋtsɛmɛi ji nyɛ.” (Yohane 15:13-15) Hɛɛ, bɔfoi 11 lɛ etsɔɔ akɛ amɛji anɔkwa shieŋtsɛmɛi kɛtsɔ amɛhe ni amɛkɛkpɛtɛ Yesu he yɛ ekaai lɛ amli lɛ nɔ.

Beni jenamɔ eshɛ shɔŋŋ—ekolɛ beni nyɔɔŋteŋ eho lɛ—Yesu sɔle sɔlemɔ ni sa kaimɔ, ni yɛ no sɛɛ lɛ amɛlá yijiemɔ lalai amɛha Yehowa. Kɛkɛ ni amɛtsɔ̃ nyɔɔŋtsere ni eye emuu lɛ kpɛ́mɔ lɛ mli amɛshi maŋ lɛ ni amɛfo Kedron Jɔɔ lɛ.—Yohane 17:1–18:1.

Yɛ Getsemane Abɔɔ lɛ Mli

Yɛ sɛɛ mli be fioo lɛ, Yesu kɛ ebɔfoi lɛ yashɛ Getsemane abɔɔ lɛ mli. Yesu shi bɔfoi lɛ ateŋ mɛi kpaanyɔ yɛ abɔɔ lɛ naa, ni eŋɔ Petro, Yakobo, kɛ Yohane efata ehe kɛtee shɔŋŋ yɛ mutsei lɛ ateŋ. Ekɛɛ mɛi etɛ lɛ akɛ: “Misusuma werɛ eho ehe kɛyashi gbele mli po; nyɛhia biɛ ni nyɛshia kpe”—Marko 14:33, 34.

Bɔfoi etɛ lɛ mɛ yɛ be mli ni Yesu yaa abɔɔ lɛ mli shɔŋŋ koni eyasɔle lɛ. Ekɛ bolɔmɔi kɛ yaafonui kpa fai akɛ: “Ataa, kɛji oosumɔ lɛ, jiemɔ kpulu nɛɛ kɛjɛ minɔ!” Gbɛnaa nii ni tsii waa kã Yesu kɔŋ nɔ. Kwɛ bɔ ni ehaoɔ akɛ eeesusu nɔ ni Yehowa henyɛlɔi lɛ baakɛɛ lɛ he beni asɛŋɔ E-Bi koome lɛ tamɔ akɛ eji efɔŋfeelɔ lɛ! Nɔ ni Yesu yeɔ no he hejaramɔ babaoo po ji ahorabɔɔ ni esusuɔ akɛ abaaloo ashwie esuɔmɔ ŋwɛi Tsɛ lɛ nɔ kɛ́ eyeee omanye yɛ nɛkɛ piŋmɔ kaa nɛɛ mli lɛ. Yesu kɛ hiɛdɔɔ babaoo sɔle kɛ hejaramɔ ko ni ha ehe latsaa ni tsereɔ shwieɔ shi lɛ po tsɔ tamɔ lá kulibii.—Luka 22:42, 44.

Yesu egbe sɔlemɔ ni ji shii etɛ naa. Hii ni hiɛ jatɛŋi kɛ kanei bɛŋkɛ amɛ agbɛnɛ. Mɔ ni nyiɛ hiɛ lɛ jeee mɔ ko mɔ ko akɛ Yuda Iskariot, ni eba Yesu ŋɔɔ tɛ̃ɛ. Ekɛɛ lɛ akɛ, “Oshwiee, Rabi!” ni eshɔ Yesu naa blɛoo. Yesu ha hetoo akɛ, “Yuda, okɛ naashɔmɔ miitsɔɔ gbɔmɔ bi lɛ sɛɛgbɛ?”—Mateo 26:49; Luka 22:47, 48; Yohane 18:3.

Trukaa ni bɔfoi lɛ yɔse nɔ ni yaa nɔ lɛ. Aahe amɔ amɛ-Nuntsɔ kɛ shieŋtsɛ ni amɛsumɔɔ lɛ lɛ! No hewɔ lɛ Petro gbala klante ni efo osɔfonukpa lɛ tsulɔ lɛ toi. Kɛkɛ ni Yesu kɛ oyaiyeli bo akɛ, ‘Enɛ fa.’ Etsi kɛtee ehiɛ, ni etsa tsulɔ lɛ, ni efã Petro akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Luka 22:50, 51; Mateo 26:52) Onukpai lɛ kɛ asraafoi lɛ mɔ Yesu ni amɛfimɔ lɛ. Akɛni bɔfoi lɛ miishe gbeyei ni amɛyiŋ efutu hewɔ lɛ, amɛshi Yesu ni amɛjo foi kɛbote duŋ lɛ mli.—Mateo 26:56; Yohane 18:12.

Sohaa Leebi, Nisan 14

Nyɔɔŋteŋ eho kwraa yɛ Sohaa maŋkɛ̃ mli. Klɛŋklɛŋ lɛ anyiɛ Yesu hiɛ kɛtee tsutsu Osɔfonukpa Hana ni yɔɔ bulɛ kɛ hewalɛ waa lolo lɛ shĩa. Hana bibii lɛ saji ni eha akɛ lɛ tee Osɔfonukpa Kaiafa shĩa he ni Akwaashɔŋ lɛ ebua amɛhe naa yɛ lɛ.

Agbɛnɛ jamɔ mli hiɛnyiɛlɔi lɛ bɔ mɔdɛŋ ni amɛtao odasefoi ni baaye amale odase amɛshi Yesu. Shi kɛlɛ, amale odasefoi lɛ odaseyeli lɛ kɛ amɛhe kpãaa gbee. Yesu efee diŋŋ yɛ enɛɛmɛi fɛɛ mli. Amɛtsake amɛ ŋaatsɔɔ lɛ, ni Kaiafa bi akɛ: “Mina Nyɔŋmɔ, hiɛkalɔ lɛ, akɛ, kɛji bo ji Kristo, Nyɔŋmɔ bi lɛ, kɛɛmɔ wɔ!” Enɛ ji anɔkwa sane ni anyɛŋ aje he ŋwane, no hewɔ lɛ, Yesu kɛ ekãa ha hetoo akɛ: “Mi ni; ni nyɛaana gbɔmɔ bi lɛ akɛ eta hewalɛ lɛ ninejurɔ nɔ ni eeba yɛ ŋwɛi atatui lɛ amli.”—Mateo 26:63; Marko 14:60-62.

Kaiafa bolɔ akɛ: “Ebɔ musu! Mɛni wɔsaa wɔtaoɔ odasefoi wɔfee dɔŋŋ?” Mɛi komɛi gbala Yesu hiɛ mãi ni amɛfɛ̃ lajɔ̃ amɛshwie ehe. Mɛi krokomɛi mamɔ lɛ atswɛrɛ ni amɛjɛ lɛ. (Mateo 26:65-68; Marko 14:63-65) Etsɛɛɛ ni Akwaashɔŋ lɛ bua amɛhe naa ekoŋŋ yɛ Sohaa leebi, ekolɛ koni amɛkɛha efee tamɔ nɔ ni mla eŋmɛ gbɛkɛ saneyeli ni mla eŋmɛɛɛ no gbɛ lɛ gbɛ. Yesu kɛ ekãa tsɔɔ ekoŋŋ akɛ lɛ ji Kristo lɛ, Nyɔŋmɔ Bi lɛ.—Luka 22:66-71.

Yɛ no sɛɛ lɛ, osɔfonukpai lɛ kɛ maŋ onukpai lɛ gbala Yesu kɛtee Pontio Pilato, Roma amralo ni kwɛɔ Yudea nɔ lɛ hiɛ koni ekojo lɛ. Amɛfolɔ Yesu naa akɛ eewo maŋ lɛ yiŋ, eegu oniatsumɔ kɛ Kaisare hamɔ, ni “ekɛɔ akɛ lɛ diɛŋtsɛ ji Kristo, maŋtsɛ lɛ.” (Luka 23:2; okɛto Marko 12:17 he.) Beni Pilato ebibii Yesu saji lɛ, etswa adafi akɛ: “Minaaa fɔbuu sane ko yɛ nuu nɛɛ mli.” (Luka 23:4) Beni Pilato nu akɛ Yesu ji Galileanyo lɛ, eha akɛ lɛ tee Herode Antipa, ni ji Galilea nɔyelɔ ní eba Yerusalem kɛha Hehoo lɛ yeli lɛ ŋɔɔ. Herode hiɛ edɔɔɔ yɛ jalɛ kojomɔ ni eeekwɛ ni atsu he nii lɛ he. Eesumɔ ni ena ni Yesu miifee naakpɛɛ nii ko kɛkɛ. Akɛni Yesu efeee nɔ ni etaoɔ nɛɛ ni efooo edaaŋ hewɔ lɛ, Herode kɛ esraafoi lɛ ye ehe fɛo ni eha akɛ lɛ ku sɛɛ kɛtee Pilato ŋɔɔ ekoŋŋ.

Pilato bi ekoŋŋ akɛ: “Minako nɔ ko ni sa gbele yɛ emli; no hewɔ lɛ mibaha ayi lɛ ni maŋmɛɛ ehe.” (Luka 23:22) No hewɔ lɛ eha ayi Yesu kɛ kpelebi kɛ enaa kpãai pii ni folɔ Yesu sɛɛ loo ni waa mɔ he waa yi lɛ. Kɛkɛ ni asraafoi lɛ nyɛ ŋmeei akekre ko nɔ amɛkɛwo eyitso. Amɛye ehe fɛo ni amɛkɛ gãlã ko ni ti waa yi lɛ, ni enɛ tsi ŋmeei akekre lɛ sɛɛ kɛtsurɔ eyiteŋ waa. Yɛ piŋmɔ kɛ niseniianii ni naa wa waa ni afeɔ lɛ nɛɛ fɛɛ mli lɛ, Yesu kɛ bulɛ kɛ hewalɛ damɔ shi yɛ fɛɛ mli.

Pilato—ni ekolɛ ehiɛ ka nɔ akɛ kɛ amɛna bɔ ni ápila Yesu aha lɛ eeeha enii afee amɛ mɔbɔ lɛ—kɛ lɛ badamɔ asafo lɛ hiɛ ekoŋŋ. Pilato bo akɛ: “Naa, mikɛ lɛ eje kpo kɛba nyɛŋɔɔ, koni nyɛna nyɛle akɛ minaaa fɔbuu sane ko yɛ ehe.” Shi osɔfonukpai lɛ bolɔ akɛ: ‘Sɛŋmɔ lɛ! Sɛŋmɔ lɛ!’ (Yohane 19:4-6) Akɛni asafo lɛ miima nɔ mi babaoo hewɔ lɛ, Pilato ŋmɛɛ he, ni ekɛ Yesu ha koni ayasɛŋ lɛ.

Gbele Yɛ Piŋmɔ Mli

Amrɔ nɛɛ je etsɛre kwraa ni hulu miitso kɛmiiya shwane. Akɛ Yesu tee Yerusalem sɛɛ he ko ni atsɛɔ jɛmɛ Golgota. Akala plɛkoobii agboi awo Yesu niji kɛ enaji amli kɛkpɛtɛ sɛŋmɔtso lɛ. Wiemɔi nyɛŋ atsɔɔ piŋmɔ lɛ naawalɛ lɛ mli beni egbɔmɔtso lɛ tsiimɔ tserɛɔ plɛkoobii lɛ pilamɔi lɛ amli beni awó sɛŋmɔtso lɛ nɔ ama shi lɛ. Gbɔmɛi pii bua amɛhe naa koni amɛkwɛ Yesu kɛ efɔŋfeelɔi enyɔ lɛ asɛŋmɔ lɛ. Mɛi pii wie Yesu he efɔŋ. Osɔfonukpai lɛ kɛ mɛi krokomɛi ye ehe fɛo akɛ, “Mɛi krokomɛi ayiwala ehereɔ, shi lɛ diɛŋtsɛ enɔ lɛ enyɛɛɛ ehere.” Asraafoi lɛ kɛ efɔŋfeelɔi enyɔ ni asɛŋ amɛ lɛ po ye Yesu he fɛo.—Mateo 27:41-44.

Trukaa yɛ shwane mli, beni Yesu ehi tso lɛ nɔ be saŋŋ lɛ, duŋ ko ni jɛ ŋwɛi ni woɔ mɔ he gbeyei wo yɛ maŋ lɛ mli ŋmɛlɛtswai etɛ.a Ekolɛ enɛ ji nɔ ni tsirɛ efɔŋfeelɔ kome lɛ koni ekã mɔ kroko lɛ hiɛ lɛ. Kɛkɛ ni beni etsɔɔ ehiɛ ehaa Yesu lɛ, ekpa fai akɛ: “Nuntsɔ, kaimɔ mi, beni oooba yɛ omaŋtsɛyeli lɛ mli lɛ!” Mɛɛ hemɔkɛyeli ni yɔɔ naakpɛɛ nɛ yɛ gbele ni baa lɛ hiɛ! Yesu ha lɛ hetoo akɛ: ‘Lɛɛlɛŋ miikɛɛ bo ŋmɛnɛ akɛ, obaafata mihe yɛ Paradeiso.’ ”—Luka 23:39-43. NW.

Beni atswa aaafee shwane ŋmɛji etɛ lɛ, Yesu nu he akɛ enaagbee ebɛŋkɛ. Ewie akɛ: “Kumai miiye mi.” Kɛkɛ ni ekɛ gbee wulu bo akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” Yesu baanyɛ anu he akɛ, etamɔ nɔ ni e-Tsɛ lɛ ejie ehebuu kɛjɛ enɔ koni aka emuuyeli mli ni ehiɛ lɛ akwɛ kɛyashi enaagbee kwraa, kɛkɛ ni etsɛ́ David wiemɔi lɛ asɛɛ. Mɔ ko kɛ ŋshɔŋ kotsa tsɔ ashiŋ mli ni ekɛto Yesu naa. Beni enu wein lɛ eko sɛɛ lɛ, Yesu kɛ tsui-suu bo akɛ: “Ágbe naa!” Kɛkɛ ni ebo akɛ: “Ataa, odɛŋ mituɔ mimumɔ miwoɔ nɛɛ,” kɛkɛ ni ema eyi shi ni egbo.—Yohane 19:28-30; Mateo 27:46; Luka 23:46; Lala 22:2.

Agbɛnɛ akɛni eji shwane kɛmiiba gbɛkɛnaashi hewɔ lɛ, ato gbɛjianɔ oyayaayai koni afũ Yesu dani Hejɔɔmɔ Gbi (Nisan 15) aje shishi yɛ hulushinyɔɔ mli. Yosef ni jɛ Arimatia, Akwaashɔŋ lɛ mlinyo ni ale lɛ waa ni eji Yesu kaselɔ yɛ teemɔŋ lɛ nine shɛ gbɛŋmɛɛ nɔ koni afũ lɛ. Nikodemo, ni lɛ hu eji Akwaashɔŋ lɛ mlinyo ni ejaje ehemɔkɛyeli yɛ Yesu mli yɛ teemɔŋ lɛ kɛ mire kɛ alɔe ni shɛɔ nsɛni tɛi oha ba. Amɛkɛ Yesu gbonyo lɛ yafɔ kaimɔ bu hee ni bɛŋkɛ jɛmɛ lɛ mli fɛfɛo.

Eba Wala Mli Ekoŋŋ!

Duŋ ewo lolo yɛ Hɔgbaa maŋkɛ̃, beni Maria Magdaleena kɛ yei komɛi ba Yesu gbonyo bu lɛ he. Shi kwɛmɔ! Ákoklo tɛ ni akɛtsĩ gbonyo bu lɛ naa lɛ. Ni naa, mɔ ko mɔ ko bɛ gbonyo bu lɛ mli! Maria Magdaleena sha foi koni eyabɔ Petro kɛ Yohane amaniɛ. (Yohane 20:1, 2) Beni eshi jɛmɛ pɛ kɛkɛ ni ŋwɛibɔfo ko jie ehe kpo etsɔɔ yei krokomɛi lɛ. Ekɛɛ amɛ akɛ: “Nyɛ lɛ nyɛkashea gbeyei.” Ewo amɛ hewalɛ hu akɛ: “Nyɛyaa mramra nyɛyakɛɛa ekaselɔi lɛ akɛ ete shi kɛjɛ gbohii ateŋ.”—Mateo 28:2-7.

Beni amɛshaa amɛhe kɛyaa lɛ, namɔ amɛkɛ lɛ kpe lɛ ákɛ Yesu diɛŋtsɛ! Ekɛɛ amɛ akɛ: “Nyɛyaa ni nyɛyakɛɛa minyɛmimɛi lɛ.” (Mateo 28:8-10) Yɛ sɛɛ mli lɛ, Maria Magdaleena ba gbonyo bu lɛ he ni eefo ni Yesu jie ehe kpo etsɔɔ lɛ. Enyɛɛɛ ehiɛ emiishɛɛnamɔ lɛ mli kɛkɛ ni esha foi koni eyagba miishɛɛ sane lɛ etsɔɔ kaselɔi krokomɛi lɛ. (Yohane 20:11-18) Yɛ anɔkwale mli lɛ, Yesu ní átee lɛ shi kɛjɛ gbohii ateŋ lɛ jie ehe kpo shii enumɔ etsɔɔ kaselɔi srɔtoi yɛ nakai Hɔgbaa ni hiɛ kpaŋ nɔ lɛ nɔ, koni yiŋkɔshikɔshifeemɔ ko akahi eshitee kɛ wala mli ni eba ekoŋŋ lɛɛlɛŋ lɛ he!

Bɔ ni Esaa Ohe Ehaa

Te aaafee tɛŋŋ ni saji ni tee nɔ afii 1,966 ni eho nɛ lɛ aaasa ohe amrɔ nɛɛ yɛ be mli ni wɔmiihe wɔbote afii ohai 21 nɛɛ mli lɛ? Mɔ ni kɛ ehiŋmɛi na saji ni tee nɔ lɛ tsɔɔ mli akɛ: “Enɛ mli Nyɔŋmɔ suɔmɔ ni ekɛsumɔɔ wɔ lɛ je kpo yɛ, akɛ Nyɔŋmɔ tsu lɛ diɛŋtsɛ ebi koome lɛ kɛba je lɛŋ, koni wɔtsɔ enɔ wɔná wala. Enɛ mli suɔmɔ lɛ yɔɔ: jeee akɛ wɔ ni wɔsumɔ Nyɔŋmɔ, shi moŋ akɛ lɛ ni esumɔ wɔ, ni etsu ebi lɛ akɛ ebafee wɔhe eshai lɛ ahe kpatamɔ nɔ̃.”—1 Yohane 4:9, 10.

Kristo gbele lɛ ji ‘afɔleshaa kpatamɔ nɔ̃’ yɛ mɛɛ gbɛ nɔ? Eji kpatamɔ nɔ̃ ejaakɛ ehaa wekukpaa kpakpa bakãa wɔkɛ Nyɔŋmɔ teŋ. Klɛŋklɛŋ gbɔmɔ lɛ, Adam, tse atua eshi Nyɔŋmɔ, ni yɛ enɛ hewɔ lɛ ekɛ esha kɛ gbele ha eshwiei akɛ gboshinii. Shi Yesu kɛ ewala ha akɛ kpɔmɔnɔ koni ewo adesai ahe esha kɛ gbele nyɔmɔ lɛ, koni ekɛ nɔdaamɔ nɔ ni baaha Nyɔŋmɔ akpã mɔbɔnalɛ kɛ duromɔ mli aha wɔ lɛ aha. (1 Timoteo 2:5, 6) Kɛji akɛ ojie hemɔkɛyeli kpo yɛ Yesu afɔleshaa ni kpatãa esha lɛ mli lɛ, abaanyɛ ajie bo kɛjɛ fɔbuu ni oná kɛjɛ eshafeelɔ Adam dɛŋ lɛ mli. (Romabii 5:12; 6:23) Yɛ no sɛɛ lɛ, enɛ gbeleɔ hegbɛ ni yɔɔ naakpɛɛ ni ji wekukpaa ni okɛ oŋwɛi Tsɛ ni yɔɔ suɔmɔ, Yehowa Nyɔŋmɔ, aaaná lɛ mli ŋɔɔmɔ. Yɛ ekukufoo mli lɛ, Yesu afɔleshaa ni fe fɛɛ lɛ baanyɛ atsɔɔ wala ni bɛ naagbee kɛha bo.—Yohane 3:16; 17:3.

Abaasusu enɛ kɛ saji krokomɛi ni kɔɔ he lɛ ahe yɛ Soo gbɛkɛ, April 1, yɛ hei srɔtoi akpei nyɔŋmai abɔ yɛ jeŋ fɛɛ, yɛ be mli ni gbɔmɛi akpekpei abɔ baabua amɛhe naa koni amɛkai Yesu Kristo gbele lɛ. Aafɔ̃ bo nine koni oba jɛmɛ. Yehowa Odasefoi ni yɔɔ he ni oyɔɔ lɛ kɛ miishɛɛ baatsɔɔ bo he ni abaafee yɛ kɛ be ni abaafee lɛ, koni oba shishi. Ŋwanejee ko kwraa bɛ he akɛ jɛmɛ ni oooya lɛ baaha hiɛsɔɔ ni oyɔɔ kɛha nɔ ni wɔsuɔmɔ Nyɔŋmɔ lɛ kɛ esuɔmɔ Bi lɛ fee yɛ Yesu shihilɛ akɛ adesa lɛ naagbee gbi lɛ nɔ lɛ mli akwɔ.

[Shishigbɛ niŋmai]

[Akrabatsa/Mfonirii ni yɔɔ baafa 7]

YESU GBELE KƐ EGBOHIIASHITEE

[Shishigbɛ niŋmaa]