Yitso 120

Kwamɔi yɛ Kpo Te Lɛŋ

YƐ BE mli ni amɛkɛ bɔfoi krokomɛi lɛ eshi Yesu yɛ Getsemane trom lɛ mli ni amɛkɛ gbeyeishemɔ ejo foi lɛ sɛɛ lɛ, Petro kɛ Yohane wa yɛ amɛfoijee lɛ mli. Ekolɛ amɛbanina Yesu be mli ni amɛkɛ lɛ yaa Hana shia lɛ. Beni Hana tsu ni akɛlɛ ayaha Osɔfonukpa Kaiafa lɛ, Petro kɛ Yohane nyiɛ amɛsɛɛ flɛŋŋ, eka shi faŋŋ akɛ amɛmiishe amɛ diɛŋtsɛ amɛwala he gbeyei ni amɛmiisusu nɔ ni baaba amɛ-Nuŋtsɔ lɛ nɔ lɛ hu he waa.

Beni amɛbashɛ Kaiafa shia ni da lɛ mli lɛ, Yohane na hegbɛ ebote kpo te lɛŋ, ejaakɛ osɔfonukpa lɛ le lɛ. Shi ashi Petro ni edamɔ agbonaa yɛ shinaa lɛ sɛɛ. Shi etsɛɛɛ ni Yohane ku esɛɛ ni ebawie etsɔɔ agbonaakwɛlɔ, ni ji tsulɔyoo ko lɛ, ni aŋmɛ Petro gbɛ ni ebote mli.

No mli lɛ fɛ̃i miiye waa, ni shia lɛ mli tsuji lɛ kɛ osɔfonukpa lɛ tsuji lɛ eshɛre la amɛtara he. Petro yafata amɛhe koni eha ehe adɔ ni eemɛ nɔ ni baajɛ Yesu kojomɔ lɛ mli aba. La ni kpɛɔ nɛɛ mli ni tsulɔyoo lɛ ni gbele Petro lɛ yoo lɛ jogbaŋŋ. Ebo akɛ: “Bo hu te okɛ Yesu Galileanyo lɛ nyiɛɔ!”

Akɛni sane lɛ hao Petro akɛ ayoo lɛ hewɔ lɛ, etso yɛ amɛ fɛɛ amɛhiɛ akɛ eleee Yesu. Ekɛɛ: “Mileee lɛ, ni mileee nɔ ni okɛɔ nɛɛ.”

Kɛkɛ ni Petro bɛŋkɛ agbo lɛ naa gbɛ. Kɛkɛ ni gbekɛyoo kroko hu yoo lɛ ni ekɛɛ mɛi ni damɔ jɛmɛ lɛ akɛ: “Mɔ nɛ hu kɛ Yesu, Nazarenyo lɛ yɔɔ.” Petro tso ekoŋŋ kɛ kitakamɔ akɛ: “Mileee gbɔmɔ lɛ!”

Petro hi kpo te lɛŋ ni eebɔ mɔdɛŋ ni akayoo lɛ kwraa. Ekolɛ nɛkɛ be nɛɛ mli wuɔ ko ni gbɛɛ maŋkɛ mra lɛ hɛle Petro shi. No mli lɛ, Yesu kojomɔ lɛ miiya nɔ, ni eka shi faŋŋ akɛ enɛ miiya nɔ yɛ shia lɛ fa ni yɔɔ kpo te lɛŋ yiteŋ lɛ. Ekolɛ Petro kɛ mɛi krokomɛi ni yɔɔ shishigbɛ lɛ miina mɛi ni yaa baa akɛ odasefoi lɛ.

Aaafee ŋmɛlɛtswaa kome eho kɛjɛ be mli ni ayoo Petro akɛ efata Yesu he lɛ. Agbɛnɛ mɛi ni yɔɔ jɛmɛ lɛ ateŋ mɛi pii ba emasɛi ni amɛkɛɛ lɛ akɛ: “Anɔkwale ji akɛ amɛteŋ mɔ kome jio, ejaakɛ owiemɔ tete miikpao shi.” Mɛi ni yɔɔ kuu nɛɛ mli lɛ ateŋ mɔ kome wekunyo ji Malko, ni Petro fo etoi lɛ. Ekɛɛ lɛ akɛ: “Ani minaaa bo kɛ lɛ yɛ trom lɛ mli?”

Petro wie veveeve akɛ: “Mileee gbɔmɔ lɛ!” Yɛ anɔkwale mli lɛ, ebɔ mɔdɛŋ ni eha amɛnu shishi akɛ amɛtɔ kwraa kɛtsɔ loomɔ kɛ kitai ni ekamɔ yɛ sane nɛɛ mli lɛ nɔ, ni ji akɛ eetsɛ efɔŋ kɛmiiba enɔ kɛji akɛ lɛlɛŋ jeee anɔkwale ewieɔ lɛ.

Beni Petro kwa lɛ shii etɛ nɛɛ pɛ kɛkɛ ni wuɔ gbɛɛ. Ni eka shi faŋŋ akɛ beni Yesu ebadamɔ ŋwɛitsu lɛ ablanaa lɛ nɔ lɛ ni etsɔ ehiɛ ekwɛ lɛ. Amrɔ nɔŋŋ pɛ kɛkɛ ni Petro kai nɔ ni Yesu kɛɛ lɛ ŋmɛlɛtswai fioo ni eho yɛ ŋwɛitsu lɛ nɔ lɛ: “Wuɔ naŋ agbɛɛ shii enyɔ, ni oookpa yɛ misɛɛ shii etɛ.” Akɛni ehe esha lɛ tsiimɔ ekumɔ lɛ hewɔ lɛ, Petro je kpo ni eyafo aahu.

Te aaafee tɛŋŋ ni enɛ aaaba hu? Yɛ mɛɛ gbɛ nɔ, yɛ be mli ni ema mumɔŋ hewalɛ ni eyɔɔ lɛ nɔ mi babaoo sɛɛ lɛ, Petro aaakwa e-Nuŋtsɔ lɛ shii etɛ kɛtsara nɔ nakai? Ŋwanejee ko bɛ he akɛ shihilɛ lɛ banina Petro trukaa. Aatsɔmɔ anɔkwale, ni aatsɔɔ akɛ Yesu ji efɔŋfeelɔ ko hi ahiɔ lɛ kwraa. Aaha nɔ ni ja lɛ miitsɔ tamɔ nɔ ko ni ejaaa, mɔ ni yeee fɔ lɛ miitsɔ mɔ ni yeɔ fɔ. No hewɔ lɛ yɛ nɔnyɛɛ ni nakai shihilɛ lɛ kɛba enɔ lɛ hewɔ lɛ, Petro nyɛɛɛ aŋmɛ pɛpɛɛpɛ. Trukaa ni anɔkwayeli henumɔ ni eyɔɔ lɛ fite; eye awerɛho ejaakɛ gbɔmɔ he gbeyeishemɔ ekumɔ lɛ. Ekaba lɛ nakai yɛ wɔnɔ kɔkɔɔkɔ! Mateo 26:57, 58, 69-75; Marko 14:30, 53, 54, 66-72; Luka 22:54-62; Yohane 18:15-18, 25-27.

▪ Te fee tɛŋŋ ni Petro kɛ Yohane na hegbɛ amɛbote osɔfonukpa lɛ kpo te lɛŋ?

▪ Beni Petro kɛ Yohane yɔɔ kpo te lɛŋ lɛ, no mli lɛ mɛni yaa nɔ yɛ shia lɛ mli?

▪ Shii enyiɛ wuɔ gbɛɛɔ, ni shii enyiɛ Petro kwa akɛ eleee Yesu?

▪ Petro loomɔ kɛ ekitakamɔ lɛ tsɔɔ mɛni?

▪ Mɛni ha Petro kpoo akɛ eleee Yesu lɛ?