Ani Kulɛ Obaayoo Mesia Lɛ?

YESU KRISTO kɛ afii etɛ kɛ fã shiɛ Nyɔŋmɔ Wiemɔ lɛ yɛ Israelbii lɛ ateŋ. Shi beni be shɛ ni eshikpɔŋ nɔ sɔɔmɔ nitsumɔ lɛ baa naagbee lɛ, mɛi ni yɔɔ ebeaŋ lɛ ateŋ mɛi ni fa ekpoo lɛ akɛ Mesia loo “Mɔ ni Afɔ Lɛ Mu” ni Nyɔŋmɔ ewo shi yɛ ehe lɛ. Mɛni hewɔ?

Biblia lɛ yeɔ ebuaa wɔ ni wɔnaa yiŋtoi pii ahewɔ ni klɛŋklɛŋ afii oha lɛ mli Yudafoi lɛ ekpɛlɛɛɛ Yesu nɔ akɛ Mesia lɛ. Yiŋtoi nɛɛ ateŋ etɛ etsĩ mɛi pii anaa koni amɛkakpɛlɛ gbɛhe mli ni Yesu yɔɔ ŋmɛnɛ akɛ Mesia Maŋtsɛ ni yeɔ nɔ lɛ nɔ.

‘Wɔmiitao Okadi ko Wɔkwɛ’

Yiŋtoo kome hewɔ ni klɛŋklɛŋ afii oha lɛ mli Yudafoi lɛ yɔseee Mesia lɛ ji Ŋmalɛ mli okadii ni tsɔɔ Mesia ni eji lɛ ni amɛkpoo akɛ amɛaakpɛlɛ nɔ lɛ. Be ko lɛ, mɛi ni boɔ Yesu toi lɛ bi ni efee okadi ko ní ekɛtsɔɔ akɛ ejɛ Nyɔŋmɔ ŋɔɔ. Akɛ nɔkwɛmɔ nɔ lɛ, Mateo 12:38 bɔɔ amaniɛ akɛ, woloŋmalɔi lɛ kɛ Farisifoi lɛ ekomɛi kɛɛ: “Tsɔɔlɔ, wɔmiitao onine naa okadi ko wɔkwɛ.” Ani Yesu etsɔɔko amɛ okadii komɛi momo? Yɛ anɔkwale mli lɛ étsɔɔ amɛ eko.

No mli lɛ Yesu efee naakpɛɛ nibii komɛi momo. Eha nu etsɔ wein, etsa gbekɛ nuu ko ni gboɔ lɛ hela, etsa Petro shaayoo ni he yeɔ lɛ, eha kpitiyelɔ ko he etse, eha nuu ko ni yeɔ kuumɔ hela lɛ enyiɛ, eha nuu ko ni he eye afii 38 sɔŋŋ lɛ he ewa lɛ ekoŋŋ, etsa nuu ko nine ni egbo lɛ, eha mɛi babaoo eye amɛhe kɛjɛ amɛ helai ni mli wawai lɛ amli, etsa asraafonyo nukpa ko nyɔŋ hela, etee yoo okulafo ko binuu ko shi kɛjɛ gbele mli, ni etsa nuu shwilafo ni eji mumui lɛ. Naakpɛɛ nibii nɛɛ ba yɛ Kana, Kapernaum, Yerusalem, kɛ Nain. Kɛfata he lɛ, naakpɛɛ nibii ni tamɔ nɛkɛ lɛ ahe saji gbɛ eshwa kɛtee Yudea fɛɛ kɛ maŋ ni bɛŋkɛ lɛ mli.—Yohane 2:1-12; 4:46-54; Mateo 8:14-17; 8:1-4; 9:1-8; Yohane 5:1-9; Mateo 12:9-14; Marko 3:7-12; Luka 7:1-10; 7:11-17; Mateo 12:22.

Yɛ faŋŋ mli lɛ, asɛ̃ɛɛ okadii ni tsɔɔ akɛ Yesu ji Mesia lɛ he. Eyɛ mli akɛ efee okadii babaoo yɛ gbɔmɛi lɛ ahiɛ moŋ, shi amɛnaaa emli hemɔkɛyeli. Mɛi ni na odaseyeli ni tsɔɔ akɛ Nyɔŋmɔ tsu Yesu kɛba, shi amɛkpɛlɛɛɛ enɔ akɛ Mesia lɛ eshwila yɛ mumɔŋ. Amɛtsuii wala ni anɔkwale lɛ nyɛɛɛ abote mli.—Yohane 12:37-41.

Ni wɔgbii nɛɛ hu? Mɛi komɛi jajeɔ akɛ, “Nɔ ni mikɛ mihiŋmɛi naa pɛ miheɔ miyeɔ.” Shi ani eji nilee gbɛ lɛlɛŋ ni esa akɛ atsɔ nɔ? Biblia gbalɛ tsɔɔ akɛ awo Yesu maŋtsɛ momo akɛ ŋwɛi Maŋtsɛ yɛ Mesia Maŋtsɛyeli lɛ mli. Akɛni anaaa lɛ hewɔ lɛ, okadi he miihia koni eye ebua wɔ ni wɔyoo enɔyeli ni kadiɔ nibii agbɛjianɔtoo fɔŋ nɛɛ naagbee gbii lɛ shishijee lɛ. Ani oyɔseɔ okadi lɛ?—Mateo 24:3.

Taakɛ Biblia lɛ tsɔɔ lɛ, tawuu, shikpɔŋ hosomɔi, hɔmɔ, kɛ tsɛŋemɔ helai baakadi Kristo nɔyeli lɛ shishijee akɛ Mesia Maŋtsɛ lɛ yɛ gbɛ ni ekaaa nɔ. Nɔ ni baakadi adesai ateŋ sharamɔ yɛ “naagbee gbii lɛ” amli ji, pɛsɛmkunya, hiɛjoomɔ, kɛ henɔyeli ni abɛ. (2 Timoteo 3:1-5; Mateo 24:6, 7; Luka 21:10, 11) Yɛ odase ni be-buu kɛhaa lɛ sɛɛ lɛ, naagbee gbii lɛ fãi sɔrɔtoi ni fa fe 20 tsɔɔ Mesia lɛ nɔyeli lɛ shishijee yɛ 1914.—Kwɛmɔ March 1, 1993 Buu-Mɔɔ, baafa 5.

“Shika Suɔlɔi”

Heloonaa nibii asɛɛdii ji nɔ kroko hu ni ha Yudafoi lɛ kpoo Yesu akɛ Mesia lɛ. Ninamɔ ni abuɔ lɛ akɛ ehe hiaa babaoo tsɔ lɛ tsĩ mɛi pii anaa koni amɛkanyiɛ Yesu sɛɛ. Akɛ nɔkwɛmɔ nɔ lɛ, ale Farisifoi lɛ akɛ “shika suɔlɔi.” (Luka 16:14) Susumɔ obalanyo niiatsɛ ko ni ba Yesu ŋɔɔ, ni ebi lɛ bɔ ni eeefee ena naanɔ wala lɛ sane lɛ he okwɛ. Hetoo ni Yesu kɛha ji, “ye kitai lɛ anɔ.” Yɛ be mli ni eyɛ faŋŋ akɛ, obalanyo lɛ miina akɛ nibii babaoo he miihia fe mlai komɛi ni eeeye nɔ lɛ, ebi akɛ, “Enɛɛmɛi fɛɛ lɛ miye nɔ kɛjɛ migbekɛbiiashi; mɛni shwɛɔ mi lolo?” Yesu kɛɛ lɛ akɛ, “Yaa ni oyahɔ̃ɔ nii ni oyɔɔ lɛ, ni oŋɔha ohiafoi, ni ooona jwetri yɛ ŋwɛi; ni oba obanyiɛ misɛɛ.” Mɛɛ hegbɛ nɛ—akɛ aaatsɔ Mesia lɛ kaselɔ! Shi kɛlɛ, edɔ nɔyelɔ lɛ ni eyiŋ etee. Mɛni hewɔ? Ejaakɛ, shikpɔŋ nɔ jwetri he hiaa lɛ babaoo fe jwetri ni yɔɔ ŋwɛi.—Mateo 19:16-22.

Shihilɛ lɛ tsakeko. Mesia Maŋtsɛ lɛ anɔkwa sɛɛnyiɛlɔ ni aaatsɔ lɛ tsɔɔ mumɔŋ nibii ni akɛaaye nɔ fɛɛ nɔ hiɛ, ni shikpɔŋ nɔ nibii ni ayɔɔ fata he. Kɛha mɔ fɛɛ mɔ ni susuɔ heloonaa nibii ahe lɛ, enɛ bafeɔ kaa kɛhaa lɛ. Akɛ nɔkwɛmɔ nɔ lɛ, gbalashihilɛ mli hefatalɔi ni ji maŋsɛɛ sanekpakpa shiɛlɔi ni yɔɔ Bokagbɛ shikpɔji lɛ eko nɔ lɛ kɛ yoo ko wie Biblia lɛ he. Akɛni gbalashihilɛ mli hefatalɔi lɛ he ye akɛ yoo lɛ baasumɔ ni ekase Yehowa Nyɔŋmɔ kɛ e-Bi, Yesu Kristo he nii babaoo hewɔ lɛ, amɛkɛ Buu-Mɔɔ kɛ Awake! ha lɛ. Te efee enii yɛ he eha tɛŋŋ? Yoo nɛɛ bi akɛ, “Ani woji tɛtrɛbii nɛɛ baaye abua mi ní mana shika babaoo?” Yoo lɛ yɛ heloonaa nibii ahe miishɛɛ babaoo fe mumɔŋ nibii.

Nakai gbalashihilɛ mli hefatalɔi lɛ nɔŋŋ kɛ obalanyo ko kase Biblia lɛ, ni ebɔi kpeei yaa yɛ Maŋtsɛyeli Asa lɛ nɔ. Efɔlɔi kɛɛ lɛ akɛ, “Oofite obe. Esa akɛ ona nitsumɔ ni ji enyɔ ni otsu yɛ gbɛkɛ mli, ni ona shika babaoo.” Kwɛ bɔ ni eyɔɔ mɔbɔ ha, akɛ fɔlɔi aaawo amɛbii ahewalɛ ni amɛkɛ heloonaa nii aye Mesia Maŋtsɛ lɛ he nii ni aaakase hiɛ! China abɛbua ko kɛɔ akɛ, “Yɛ nii babaoo ni eyɔɔ lɛ fɛɛ sɛɛ lɛ, nɔyelɔ lɛ nyɛŋ ekɛ shika ahe walasɛɛtsɛlɛ afii akpei nyɔŋma.”

Mɛi babaoo ebayoo akɛ, Mesia Maŋtsɛ lɛ he nikasemɔ kɛ esɛɛnyiɛmɔ kɛ hegbɛ haaa kɛha shika suɔmɔ. Yehowa Odasefonyo ko ni be ko lɛ ehiɛ lɛ diɛŋtsɛ enitsumɔ ni shika babaoo jɛɔ mli baa lɛ kɛɛ: “Shika babaoo námɔ ŋɔɔ waa, shi ehe ehiaaa. Jeee shika haa mɔ naa miishɛɛ.” Amrɔ nɛɛ, eji Betel weku lɛ mli nyo, yɛ Buu Mɔɔ Asafo lɛ nitsumɔ he nine ni yɔɔ Europa lɛ ekome mli.

‘Yudafoi lɛ Ahe Gbeyeishemɔ’

Gbɔmɔ gbeyeishemɔ hu ji yiŋtoo kroko hewɔ ni Yudafoi lɛ ekpɛlɛɛɛ Yesu nɔ akɛ Mesia lɛ. Mesia ni eji ni amɛaakpɛlɛ nɔ yɛ faŋŋ mli lɛ tsɔɔ bulɛ ni amɛyɔɔ lɛ ni amɛkɛwoɔ oshara mli. Yɛ mɛi komɛi agbɛfaŋ lɛ, enɛ ni aaaje amɛdɛŋ lɛ jara wa tsɔ kɛha amɛ. Susumɔ Nikodemo, Yudafoi asaneyeli he wulu ni atsɛɔ no Akuashɔŋ lɛ mli nyo lɛ he okwɛ. Akɛni enya Yesu okadii kɛ nitsɔɔmɔi ahe waa hewɔ lɛ, ekpɛlɛ nɔ akɛ: “Rabi, wɔle akɛ tsɔɔlɔ ni jɛ Nyɔŋmɔ ŋɔɔ ba jio; ejaakɛ mɔ ko nyɛŋ afee okadii ni ofeɔ nɛɛ, akɛ ja Nyɔŋmɔ kɛ mɔ lɛ yɛ.” Ni kɛlɛ, Nikodemo tee Yesu ŋɔɔ beni duŋ ewo, ekolɛ koni ekaha Yudafoi krokomɛi lɛ miiyoo lɛ.—Yohane 3:1, 2.

Yɛ mɛi babaoo ni nu ni Yesu miiwie lɛ agbɛfaŋ lɛ, gbɔmɛi anɔkpɛlɛmɔ he hiaa amɛ fe Nyɔŋmɔ nɔ̃. (Yohane 5:44) Beni Yesu yɔɔ Yerusalem kɛha Asesei Agbijurɔ lɛ yeli yɛ 32 Ŋ.B. lɛ, ‘huhúhuhú wiemɔ pii ba asafoi lɛ ateŋ yɛ ehewɔ.’ Mɔ ko kwraa ewieee Yesu he yɛ faŋŋ mli “yɛ Yudafoi lɛ ashemɔ hewɔ.” (Yohane 7:10-13) Nuu ko ni Yesu tsa eshwilamɔ hela lɛ fɔlɔi po nyɛɛɛ amɛba amɛbakpɛlɛ naakpɛɛ nii lɛ nɔ akɛ ejɛ Nyɔŋmɔ najiaŋdamɔlɔ ko ŋɔɔ. Amɛhu “amɛmiishe Yudafoi lɛ agbeyei.”—Yohane 9:13-23.

Ŋmɛnɛ, mɛi komɛi yɔseɔ akɛ Yesu miiye nɔ amrɔ nɛɛ akɛ Mesia Maŋtsɛ yɛ ŋwɛi, shi amɛmiishe gbeyei akɛ amɛaakpɛlɛ enɛ nɔ yɛ faŋŋ mli. Yɛ amɛ gbɛfaŋ lɛ, gbɛhe ni amɛhiɛ yɛ mɛi ahiɛ ni eeeje amɛdɛŋ lɛ naa wa tsɔ̃. Akɛ nɔkwɛmɔ nɔ lɛ, Yehowa Odasefonyo ko kɛ nuu ko gba Biblia mli sane yɛ Germany, ni ekpɛlɛ nɔ akɛ: “Nɔ ni nyɛ akɛ Odasefoi lɛ shiɛɔ yɛ Biblia lɛ he lɛ yɛ mli anɔkwale. Shi kɛ mibatsɔ Odasefonyo ŋmɛnɛ lɛ, wɔ́ nɔŋŋ pɛ, mɔ fɛɛ mɔ baanu he. Te amɛbaasusu mihe yɛ nitsumɔ he, yɛ akutso lɛ mli, kɛ agbɛnɛ yɛ nanemɛi akuu ni mikɛ miweku lɛ yɔɔ mli lɛ mli amɛha tɛŋŋ? Minyɛŋ madamɔ enɛ naa.”

Mɛni kɛ gbɔmɔ gbeyeishemɔ baa? Henɔwomɔ, bɔ ni asumɔɔ ni ale mɔ waa yɛ weku lɛ mli kɛ nanemɛi ateŋ, gbeyei ni asheɔ akɛ aaaye mɔ he fɛo ni ashwie mɔ hiɛ shi, bɔ ni afeɔ mɔ ni esoro lɛ yɛ mɛi pii ateŋ lɛ he yeyeeye feemɔ. Henumɔi ni tamɔ nɛkɛ bafeɔ kaa, titri lɛ kɛhaa mɛi ni Yehowa Odasefoi kɛ amɛ jeɔ Biblia mli nikasemɔ shishi lɛ. Akɛ nɔkwɛmɔ nɔ lɛ, obalayoo ko na he miishɛɛ waa beni ekase Paradeiso ni Mesia Maŋtsɛyeli lɛ baato ama shikpɔŋ nɔ yɛ Yesu Kristo nɔyeli shishi lɛ he nii lɛ. Shi esumɔɔ disko yaa waa diɛŋtsɛ, ni gbɔmɔ he gbeyeishemɔ tsĩ lɛ gbɛ kɛjɛ mɛi krokomɛi ni ekɛ amɛ aaawie hiɛnɔkamɔ nɛɛ he lɛ he. Yɛ naagbee lɛ, ená ekãa ni ekɛ mɛi wie Biblia lɛ he ni esheee gbeyei. Enanemɛi ni ekɛ amɛ yaa disko lɛ kpoo lɛ, shi ewu kɛ efɔlɔi na he miishɛɛ. Yɛ naagbee lɛ, abaptisi yoo lɛ kɛ enyɛ, ni yoo lɛ wu kɛ etsɛ bɔi Biblia lɛ kasemɔ. Mɛɛ nyɔmɔwoo jɛ gbɔmɔ gbeyeishemɔ ni aye nɔ kunim lɛ mli ba nɛkɛ!

Ani Oyɔseɔ Mesia lɛ Lɛlɛŋ?

Beni Yesu gboɔ yɛ sɛŋmɔtso lɛ nɔ lɛ, no mli lɛ ekaselɔi lɛ ekomɛi yɛ jɛmɛ. Amɛyoo lɛ akɛ Mesia ni agba ehe sane afɔ shi lɛ. Mɛi ni yɔɔ jɛmɛ hu ji Yudafoi nɔyelɔi ni kɛ aaawie lɛ, amɛmiibi lolo akɛ aha amɛ okadi ko lɛ. “Kɛ lɛ ji Kristo [loo Mesia] mɔ ni Nyɔŋmɔ ehala lɛ lɛ, ha ni ehere lɛ diɛŋtsɛ eyiwala.” (Luka 23:35) Ani amɛfɔ̃ŋ bimɔ kwraa akɛ aha amɛ okadi ko? Yesu efee naakpɛɛ nibii babaoo momo. Kɛfata he lɛ, efɔmɔ, sɔɔmɔ nitsumɔ, esaneyeli, egbee, kɛ eshitee lɛ ha Hebri Ŋmalɛ lɛ mli gbalɛi babaoo ba mli.—Kwɛmɔ “All Scripture Is Inspired of God and Beneficial,” ni Watchtower Bible and Tract Society of New York, Inc. fee lɛ baafai 343-4.

Mɛi ni hoɔ lɛ bɔ Yesu ahora, akɛni amɛkpoo odaseyeli ni tsɔɔ akɛ lɛ ji Mesia lɛ hewɔ. (Mateo 27:39, 40) Asraafoi tsɔ heloonaa ninamɔ nɔ amɛja Yesu atade mli amɛhã amɛhe, ni amɛfɔ̃ eflaka lɛ nɔ oshiki. (Yohane 19:23, 24) Gbɔmɔ gbeyeishemɔ tsu gbɛfaŋnɔ ko yɛ shihilɛi lɛ ekomɛi amli. Akɛ nɔkwɛmɔ nɔ lɛ, susumɔ Yosef ni jɛ Arimatia, ni eji Akuashɔŋ lɛ mli nyo lɛ he okwɛ. ‘Yesu kaselɔ ni shi ejieee ehe shi yɛ Yudafoi lɛ agbeyei ni esheɔ hewɔ.’ Yɛ Mesia lɛ gbele sɛɛ lɛ, Yosef kɛ Nikodemo kwɛ Yesu gbonyo lɛ nɔ. No hewɔ lɛ, Yosef ye gbɔmɔ gbeyei ni esheɔ lɛ nɔ.—Yohane 19:38-40.

Eji oyɛ klɛŋklɛŋ afii oha lɛ mli kulɛ, ani obaayoo Yesu akɛ Mesia lɛ? Kulɛ nakai feemɔ baabi ni okpɛlɛ Ŋmalɛ mli odaseyeli lɛ nɔ, ni okpoo ninamɔ he jwɛŋmɔ, ni okaŋmɛɛ ohe oha gbɔmɔ gbeyeishemɔ. Yɛ naagbee gbii nɛɛ amli lɛ, esa akɛ wɔteŋ mɔ fɛɛ mɔ abi ehe akɛ, ‘Ani miyɔseɔ Yesu bianɛ akɛ lɛ ji ŋwɛi Mesia Maŋtsɛ lɛ?’ Etsɛŋ ni ebaabɔi shikpɔŋ lɛ nɔ saji ahe nitsumɔ. Kɛ eba lɛ nakai lɛ, ani obaafata mɛi ni yɔseɔ Yesu Kristo lɛlɛŋ akɛ Mesia ni awo shi yɛ ehe lɛ ahe?

[Mfonirii ni yɔɔ baafa 28]

Kaaje gbɛ oku ohiɛ oshwie odaseyeli ni tsɔɔ akɛ Yesu ji Mesia Maŋtsɛ lɛ nɔ kɔkɔɔkɔ

[Mfoniri ni yɔɔ baafa 31]

Bei pii lɛ, Mesia lɛ he nii ni wɔɔkase tsɔɔ akɛ, esa akɛ wɔye nɔ ni mɛi krokomɛi aaakɛɛ lɛ he gbeyeishemɔ nɔ