Biblia Mli Wolo ni Ji 42—Luka

Mɔ ni Ŋma: Luka

Heni Aŋma Yɛ: Kaisaria

Be ni Aŋma Agbe Naa: Aaafee afi 56–58 Ŋ.B.

Be ni Emli Saji lɛ Tee Nɔ: Afi 3 D.Ŋ.B.–33 Ŋ.B.

NUU ko ní jwɛŋmɔ mli kã shi ni emli jɔ ji mɔ ni ŋma Luka Sanekpakpa lɛ, sui nɛɛ kɛ Nyɔŋmɔ mumɔ lɛ ha enyɛ eŋma saji ni ja ni hedɔɔ kɛ henumɔ eyi mli obɔ lɛ. Yɛ eklɛŋklɛŋ kukuji lɛ amli lɛ, ekɛɛ akɛ: “Esa mihiɛ akɛ mi hu, ní mitao nibii fɛɛ naa fitsofitso kɛjɛ shishijee lɛ, maŋma pɛpɛɛpɛ mahão.” Nibii ní ekɛ henɔkwɛmɔ ŋmala lɛ fitsofitso lɛ maa ewiemɔ nɛɛ nɔ mi.—Luka 1:3.

² Eyɛ mli akɛ Luka gbɛi ejeee kpo yɛ amaniɛbɔɔ lɛ mli moŋ, shi nilelɔi ni hi shi yɛ blema lɛ kpɛlɛ nɔ akɛ lɛ eŋma wolo ni egbɛi kã nɔ lɛ. Awie Luka he yɛ Muratori Wolo (aaafee afi 170 Ŋ.B.) lɛ mli akɛ lɛ ji mɔ ni ŋma Sanekpakpa nɛɛ, ni niŋmalɔi tamɔ Irenaeus kɛ Clement ni jɛ Aleksandria ni hi shi yɛ afi 100 afii lɛ amli fɛɛ kpɛlɛ nɔ. Odaseyeli yɛ ŋmalɛ lɛ mli diɛŋtsɛ akɛ Luka ji mɔ ni ŋma. Yɛ Kolosebii 4:14 lɛ, Paulo wie ehe akɛ “Luka, tsofatsɛ ni asumɔɔ lɛ,” ni bɔ ni eŋma ewolo lɛ eha lɛ tsɔɔ akɛ eji mɔ ko ni le woloŋ waa, tamɔ datrɛfonyo. Wiemɔi ni ŋɔɔ kɛ wiemɔi srɔtoi babaoo ni ekɛtsu nii lɛ fa fe mɛi etɛ ni ŋma Sanekpakpai krokomɛi lɛ anɔ lɛ ni akɛtsa, ni no ha ewolo lɛ bafee nɔ ni akɛ henɔkwɛmɔ tao nibii amli fitsofitso kɛŋma. Mɛi komɛi hu susuɔ akɛ yɛ saji kukuji fɛɛ ni aŋmala lɛ ateŋ lɛ, bi nyenyeŋtswi lɛ he sane ni eŋma lɛ ji nɔ ni fe fɛɛ.

³ Luka kɛ helatsamɔ mli wiemɔi ni fa fe 300 tsu nii, ni kɛ́ Kristofoi a-Hela Ŋmalɛi lɛ ŋmalɔi lɛ ateŋ mɛi komɛi kɛ eko tsu nii po lɛ, amɛkɛtsuuu tamɔ bɔ ni efee lɛ.a Ákɛ nɔkwɛmɔnɔ lɛ, beni Luka wieɔ kpiti he lɛ, jeee be fɛɛ be ekɛ wiemɔi ní mɛi krokomɛi lɛ kɛtsu nii lɛ tsu nii. Yɛ amɛgbɛfaŋ lɛ, kpiti fɛɛ kpiti lɛ kpiti ni, shi kɛha datrɛfonyo lɛ kpiti mli yɛ kpiti, taakɛ bɔ ni Luka wie be ko akɛ “nuu ko ni he eyi obɔ kɛ kpiti” lɛ. Ewie Lazaro he akɛ, “ehe faji obɔ̃.” Yɛ Luka sɛɛ lɛ, Sanekpakpa lɛ ŋmalɔi ateŋ mɔ ko kwraa ewieee he akɛ Petro shaayoo ye ‘fulu ní wa.’ (5:12; 16:20; 4:38) Eyɛ mli akɛ mɛi etɛ lɛ fɛɛ bɔ amaniɛ akɛ Petro fo osɔfonukpa lɛ tsulɔ lɛ toi moŋ, shi Luka pɛ tsĩ tã akɛ Yesu tsa lɛ. (22:51) Datrɛfonyo ni baawie akɛ “yoo ko yɛ ni hela mumɔ yɔɔ emli afii nyɔŋma kɛ kpaanyɔ, ni edɔ kɔmɔɔ, ni enyɛɛɛ emli ekpã kwraa po.” Yɛ “Luka, tsofatsɛ ni asumɔɔ lɛ” sɛɛ lɛ, namɔ baanyɛ atsɔɔ mli fitsofitso akɛ Samarianyo lɛ ye ebua nuu ni epila lɛ ni “eyafĩmɔ epilamɔi lɛ anɔ, ni efɔse mu kɛ wein eshwie nɔ”?—13:11; 10:34.

⁴ Mɛɛ be Luka ŋma e-Sanekpakpa lɛ? Bɔfoi lɛ Asaji 1:1 lɛ tsɔɔ akɛ mɔ ni ŋma Bɔfoi lɛ Asaji (ni ji Luka) lɛ tsɔ hiɛ eŋma ‘klɛŋklɛŋ wolo’ lɛ, ni no ji Sanekpakpa lɛ. Eeenyɛ efee akɛ aŋma Bɔfoi lɛ Asaji lɛ agbe naa yɛ aaafee afi 61 Ŋ.B. beni Luka kɛ Paulo yɔɔ Roma ni Paulo miimɛ ni Kaisare asaa akwɛ esane lɛ mli aha lɛ lɛ. No hewɔ lɛ, eeenyɛ efee akɛ Luka ŋma Sanekpakpa lɛ yɛ Kaisarea aaafee afi 56-58 Ŋ.B., beni ekɛ Paulo ku amɛsɛɛ kɛjɛ Filipi yɛ Paulo maŋsɛɛ sanekpakpa shiɛmɔ nitsumɔ ni ji etɛ lɛ sɛɛ, ní Paulo ye afii enyɔ yɛ tsuŋwoohe ni yɔɔ Kaisarea dani aŋɔ lɛ kɛtee Roma kɛha esaneyeli lɛ. Akɛni beni Paulo yɔɔ tsuŋwoohe nɛɛ mli lɛ Luka yɛ Palestina shikpɔŋ lɛ nɔ hewɔ lɛ, enyɛ ‘etao nibii fɛɛ’ ni kɔɔ Yesu shihilɛ kɛ esɔɔmɔ nitsumɔ lɛ he lɛ “naa fitsofitso kɛjɛ shishijee.” No hewɔ lɛ, etamɔ nɔ ni Luka ŋma e-Sanekpakpa lɛ dani Marko ŋma enɔ lɛ.

⁵ Yɛ anɔkwale mli lɛ, Luka diɛŋtsɛ kɛ ehiŋmɛi enaaa nibii ni ebɔ he amaniɛ yɛ Sanekpakpa lɛ mli lɛ, akɛni ejeee bɔfoi 12 lɛ ateŋ mɔ kome ni ekolɛ Yesu gbele sɛɛ dani ebatsɔ heyelilɔ lɛ hewɔ. Shi kɛlɛ, ekɛ Paulo bɔ gbagbalii yɛ emaŋsɛɛ sanekpakpa shiɛmɔ nitsumɔ lɛ mli. (2 Tim. 4:11; File. 24) No hewɔ lɛ taakɛ abaanyɛ akpa gbɛ lɛ, eniŋmaa lɛ tsɔɔ akɛ Paulo ná enɔ hewalɛ, taakɛ bɔ ni Nuŋtsɔ lɛ Gbɛkɛnaashi Niyenii lɛ he sane ni eŋma yɛ Luka 22:19, 20 kɛ Paulo nɔ ni eŋma yɛ 1 Korintobii 11:23-25 lɛ tsɔɔ lɛ. Yɛ heni Luka ná esaji lɛ kɛjɛ lɛ sɛɛ lɛ, eeenyɛ efee akɛ ekwɛ Mateo Sanekpakpa lɛ hu mli. Akɛni ‘etao nibii fɛɛ naa fitsofitso’ hewɔ lɛ, eeenyɛ efee akɛ ebibii mɛi ni kɛ amɛhiŋmɛi na Yesu shihilɛ mli nifeemɔi lɛ babaoo sane, tamɔ ekaselɔi ni yɔɔ yɛ nakai beaŋ kɛ ekolɛ Yesu nyɛ Maria. Wɔbaanyɛ wɔná nɔmimaa akɛ etao saji ní anyɛɔ akɛ he fɔɔ nɔ lɛ amli fitsofitso ni eŋma.

⁶ Sanekpakpai ejwɛ lɛ amlipɛimɔ haa anaa faŋŋ akɛ, mɛi ni ŋma lɛ ateŋ mɔ ko kwɛɛɛ enaanyo nɔ̃ nɔ ekɛŋmaaa enɔ, ni amɛŋmaaa koni amɛkɛha aná Biblia mli sane ni he hiaa waa nɛɛ he odasei babaoo pɛ kɛkɛ. Esoro Luka amaniɛbɔɔ lɛ kwraa yɛ ekrokomɛi lɛ ahe. Yɛ fɛɛ mli lɛ, e-Sanekpakpa lɛ 100 mlijaa 59 yɛ srɔto. Kɛ́ hooo kwraa lɛ ebɔ naakpɛɛ nibii pɔtɛɛ ekpaa he amaniɛ, ni ewie abɛbuai saŋŋ ahe fe bɔ ni Sanekpakpai krokomɛi lɛ fee lɛ, ni e-Sanekpakpa lɛ mlijaa etɛ mli ekome bɔ nibii ni tee nɔ lɛ ahe amaniɛ, ni emlijaa etɛ mli enyɔ hu tsɛ wiemɔi ayisɛɛ; yɛ Sanekpakpai ejwɛ lɛ ateŋ lɛ enɔ lɛ sɛɛ kɛ fe fɛɛ. Mateo ŋma enɔ lɛ kɛha Yudafoi titri, ni Marko ŋma enɔ lɛ kɛha mɛi ni jeee Yudafoi, titri lɛ Romabii lɛ. Luka ŋma e-Sanekpakpa lɛ kɛyaha “Teofile jũrɔ” ni enɔ tsɔ ni mɛi krokomɛi anine shɛ nɔ, Yudafoi kɛ mɛi ni jeee Yudafoi fɛɛ. (Luka 1:3, 4) Akɛni eetao ni mɛi fɛɛ ni yɔɔ je lɛ mli lɛ akane ewolo lɛ hewɔ lɛ, eja Yesu wekutɔkpãa lɛ sɛɛ mo kɛyashi ‘Adam ni ji Nyɔŋmɔ bi lɛ nɔ,’ shi jeee kɛyashi Abraham nɔ tamɔ bɔ ni eyɔɔ Mateo wolo ni eŋma kɛha Yudafoi lɛ titri mli lɛ. Lɛ pɛ ebɔ Simeon gbalɛ wiemɔ akɛ, Yesu nɔ abaatsɔ ni ‘la atɛje jeŋmaji lɛ ahiɛ’ lɛ he amaniɛ, ni ewie akɛ “heloo fɛɛ aaana Nyɔŋmɔ walaheremɔ lɛ.”—3:38; 2:29-32; 3:6.

⁷ Yɛ Luka niŋmaai lɛ fɛɛ amli lɛ, anaa akɛ eji amaniɛbɔlɔ ni he esa jogbaŋŋ, eto saji lɛ anaa jogbaŋŋ ni amɛja hu. Bɔ ni tɔmɔ bɛ Luka niŋmaai lɛ ahe ni eji anɔkwa hu lɛ haa anaa diɛŋtsɛ akɛ eja. Be ko lɛ mla he sane ŋmalɔ ko kɛɛ akɛ: “Yɛ be mli ni mɛi ni ŋmalaa suɔmɔ he woji, adesãi kɛ mɛi ni kɛ amale odaseyeli haa lɛ etsɔɔɔ be kɛ he pɔtɛɛ ni sane lɛ tee nɔ yɛ, ni amɛkɛ nakai feemɔ kuɔ klɛŋklɛŋ mlai ni wɔ mlalelɔi kaseɔ yɛ saji ni mɛi kɛfãa amɛhe ni tsɔɔ akɛ ‘esa akɛ sanejajemɔ lɛ atsɔɔ be kɛ he ni eba yɛ lɛ’ mli lɛ, Biblia mli saji ni agba lɛ tsɔɔ wɔ be kɛ he ni nibii ni agbaa he sane lɛ ba yɛ lɛ pɛpɛɛpɛ.”b Etsɛ Luka 3:1, 2 lɛ yisɛɛ kɛfi esane lɛ sɛɛ akɛ: “Agbɛnɛ Kaisare Tiberio maŋtsɛyeli afi ni ji nyɔŋma kɛ enumɔ lɛ mli, beni Pontio Pilato yeɔ amralo yɛ Yudea, ni Herode yeɔ tetrarke yɛ Galilea, ni enyɛmi Filipo hu yeɔ tetrarke yɛ Iturea kɛ Trakoniti shikpɔji lɛ anɔ, ni Lisania yeɔ tetrarke yɛ Abileene, ni Hana kɛ Kaiafa yeɔ osɔfonukpai lɛ, Nyɔŋmɔ wiemɔ ba Zakaria bi Yohane nɔ, yɛ ŋã lɛ nɔ.” Nɔ ko bɛ ŋmalɛ nɛɛ mli ni tsɔɔ akɛ Luka etsɔɔɔ be loo he ni sane lɛ tee nɔ yɛ, shi moŋ etsĩ kɛ hooo kwraa lɛ maŋ onukpai kpawo tã koni wɔnyɛ wɔna be mli ni Yohane kɛ agbɛnɛ hu Yesu je amɛshiɛmɔ nitsumɔ lɛ shishi.

⁸ Luka tsɔɔ wɔ nifeemɔi enyɔ hu ni yeɔ ebuaa wɔ koni wɔna be mli ni afɔ Yesu lɛ, beni ewie yɛ Luka 2:1, 2 lɛ akɛ: “Shi no gbii lɛ amli lɛ eba mli akɛ akpɔ ko jɛ Kaisare Augusto ŋɔɔ ba, akɛ akane jeŋ fɛɛ ni aŋma. Ni enɛ ji klɛŋklɛŋ kanemɔ ni akane be mli ni Kirenio yeɔ lumɔ yɛ Siria lɛ.” Be nɛɛ mli ni Yosef kɛ Maria tee Betlehem koni akane amɛ, ni Maria fɔ Yesu beni amɛyɔɔ jɛmɛ lɛ.c Wɔkɛ niŋmalɔ ni wie sane ni nyiɛ sɛɛ nɛɛ kpãa gbee diɛŋtsɛ akɛ: “Eji yinɔsaji ni Luka ŋma lɛ ateŋ ekome ni tsɔɔ akɛ ebɔɔ mɔdɛŋ be fɛɛ be koni eniŋmaa lɛ afee nɔ ni ja kɛmɔ shi.”d Esa akɛ wɔkpɛlɛ Luka wiemɔ ni ewie akɛ “mitao nibii fɛɛ naa fitsofitso kɛjɛ shishijee lɛ” nɔ diɛŋtsɛ.

⁹ Luka tsɔɔ bɔ ni gbalɛi ni yɔɔ Hebri Ŋmalɛi lɛ amli lɛ hu ba mli diɛŋtsɛ yɛ Yesu Kristo nɔ lɛ mli. Etsɛ wiemɔi ni Yesu kɛtsɔɔ ŋmalɛi ni eba mli yɛ enɔ lɛ ayisɛɛ. (24:27, 44) Kɛfata he lɛ, eŋma gbalɛi ni Yesu diɛŋtsɛ gba ni kɔɔ wɔsɛɛ be he lɛ he saji fitsofitso, ni gbalɛi nɛɛ ateŋ babaoo eba mli kɛmɔ shi diɛŋtsɛ. Ákɛ nɔkwɛmɔnɔ lɛ, kawolɔi kɛ tsei kakadaji kɛ amɛnaa piɔpiɔ fo Yerusalem maŋ lɛ he, ni amɛkɛ hiɛkpatamɔ ni yɔɔ gbeyei ba maŋbii lɛ anɔ yɛ afi 70 Ŋ.B. taakɛ Yesu gba lɛ pɛpɛɛpɛ. (Luka 19:43, 44; 21:20-24; Mat. 24:2) Flavius Josephus ni ji je lɛŋ yinɔsaneŋmalɔ ni kɛ ehiŋmɛi na Roma asraafoi lɛ kɛɛ akɛ, afolɔ akrowa ko mli tsei fɛɛ yɛ shikpɔŋ dalɛ aaafee kilomitai 16 nɔ, ni akɛ tsei nɛɛ fo maŋ lɛ he kilomitai 7.2, ni hɔmɔ gbe yei kɛ gbekɛbii, ni Yudafoi ni fa fe 1,000,000 gboi, ni aŋɔ amɛteaŋ mɛi 97,000 nom. Kɛbashi ŋmɛnɛ lɛ, Romabii ni hiɛ nomŋɔɔ nibii ni amɛloo kɛjɛ Yerusalem sɔlemɔwe lɛ mli, ní miishi ako lɛ he mfoniri yɛ Tito Agbó ni yɔɔ Roma lɛ he.e Wɔbaanyɛ wɔná nɔmimaa akɛ gbalɛi krokomɛi ni Luka bɔ he amaniɛ lɛ hu baaba mli kɛmɔ shi.

NƆ HEWƆ NI EHE YƆƆ SƐƐNAMƆ

³⁰ “Luka” sanekpakpa lɛ haa mɔ náa hekɛnɔfɔɔ yɛ Nyɔŋmɔ Wiemɔ lɛ mli, ni ewoɔ mɔ hemɔkɛyeli mli hewalɛ koni enyɛ edamɔ je lɛŋ naagbai lɛ anaa. Luka tsĩ Hebri Ŋmalɛi babaoo ni ba mli kɛmɔ shi lɛ atã. Ebɔ amaniɛ akɛ Yesu kane saji pɔtɛɛi komɛi yɛ Yesaia wolo lɛ mli ni ekɛtsɔɔ nitsumɔ ni agba afɔ shi akɛ ebaatsu lɛ, ni etamɔ nɔ ni Luka kɛ enɛ tsu nii akɛ esaneyitso yɛ ewolo lɛ mli fɛɛ. (Luka 4:17-19; Yes. 61:1, 2) Enɛ ji bei amli ni Yesu tsɛ Gbalɔi lɛ awiemɔi ayisɛɛ lɛ ateŋ ekome. Etsɛ Mla lɛ mli wiemɔi hu ayisɛɛ, taakɛ efee beni ekpoo kaai etɛ ni Abonsam kɛba enɔ lɛ, kɛ Lala wolo lɛ mli wiemɔi hu ayisɛɛ beni ebi ehenyɛlɔi lɛ akɛ, “Te tɛŋŋ ni akɛɔ akɛ Kristo lɛ, David biŋ lɛ?” Luka tsɛ wiemɔi krokomɛi babaoo ayisɛɛ kɛjɛ Hebri Ŋmalɛi lɛ amli.—Luka 4:4, 8, 12; 20:41-44; 5 Mose 8:3; 6:13, 16; Lala 110:1.

³¹ Beni Yesu ta teji bi nɔ kɛtee Yerusalem taakɛ agba afɔ shi yɛ Zakaria 9:9 lɛ, asafo yuu ke kɛba ni amɛkɛ Lala 118:26 lɛ mli wiemɔi tsu nii kɛjie eyi. (Luka 19:35-38) Yɛ Luka wolo lɛ yitso ko mli lɛ, ewie Hebri Ŋmalɛi lɛ amli gbalɛi ekpaa ni kɔɔ Yesu ahorabɔɔ gbele kɛ eshitee lɛ he lɛ he yɛ kukuji enyɔ pɛ mli. (Luka 18:32, 33; Lala 22:7; Yes. 50:6; 53:5-7; Yona 2:1) Naagbee lɛ, beni atee Yesu shi lɛ, eha ekaselɔi lɛ na bɔ ni Hebri Ŋmalɛi tso muu lɛ fɛɛ he hiaa ha lɛ mli faŋŋ. “Ni ekɛɛ amɛ akɛ: Enɛɛmɛi ji miwiemɔi ni mikɛnyɛ wie beni mikɛnyɛ yɔɔ lolo lɛ, akɛ ja nibii fɛɛ ni aŋma yɛ Mose mla lɛ kɛ gbalɔi lɛ kɛ lalai lɛ amli yɛ mihewɔ lɛ ná ba mli. Kɛkɛ lɛ egbele amɛjwɛŋmɔ naa, koni amɛna ŋmalɛi lɛ anaa.” (Luka 24:44, 45) Taakɛ bɔ ni ebalɛ yɛ Yesu Kristo klɛŋklɛŋ kaselɔi lɛ agbɛfaŋ lɛ, kɛ́ wɔbo Hebri Ŋmalɛi lɛ amlibaa ni Luka kɛ Kristofoi a-Hela Ŋmalɛi lɛ aŋmalɔi krokomɛi lɛ tsɔɔ mli fitsofitso lɛ, wɔ hu wɔbaaná nilee kɛ hemɔkɛyeli ni mli wa.

³² Luka tee nɔ egbala jwɛŋmɔ kɛba Nyɔŋmɔ Maŋtsɛyeli lɛ nɔ yɛ ewolo lɛ mli fɛɛ. Kɛjɛ heni ŋwɛibɔfo lɛ wo Maria shi yɛ Luka wolo lɛ shishijee gbɛ akɛ bi ni ebaafɔ lɛ ‘baaye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ’ lɛ nɔ aahu kɛyashi naagbee yitsei ni Yesu wie akɛ ekɛ bɔfoi lɛ miifee kpaŋmɔ lɛ nɔ lɛ, Luka ma Maŋtsɛyeli hiɛnɔkamɔ lɛ nɔ mi. (1:33; 22:28, 29) Etsɔɔ mli akɛ Yesu nyiɛ Maŋtsɛyeli shiɛmɔ nitsumɔ lɛ hiɛ, ni etsu bɔfoi 12 kɛ sɛɛ mli lɛ mɛi 70 koni amɛyatsu nitsumɔ kometoo nɛɛ nɔŋŋ. (4:43; 9:1, 2; 10:1, 8, 9) Yesu ma bɔ ni ehe hiaa akɛ aha jwɛŋmɔ ama nɔ kome nɔ bɔni afee ni anyɛ abote Maŋtsɛyeli lɛ mli lɛ nɔ mi yɛ wiemɔi ni yɔɔ faŋŋ nɛɛ mli akɛ: “Ha ni gbohii afũ amɛgbohii, shi bo lɛ, yaa ni oyashiɛ Nyɔŋmɔ maŋtsɛyeli lɛ,” kɛ “Mɔ ni kɛ enine yamɔɔ tsinakɔi mli ni ekuɔ ekuɛ ekwɛɔ esɛɛ lɛ, esaaa Nyɔŋmɔ maŋtsɛyeli lɛ” mli.—9:60, 62.

³³ Luka ma bɔ ni ehe hiaa akɛ asɔle lɛ nɔ mi. E-Sanekpakpa lɛ sa kadimɔ yɛ enɛ gbɛfaŋ. Ewie asafo babaoo ni miisɔle beni Zakaria yɔɔ sɔlemɔwe lɛ, Yohane Baptisilɔ lɛ ni afɔ lɛ yɛ sɔlemɔ ni asɔle kɛha bi fɔmɔ lɛ hewɔ, kɛ gbalɔyoo Hana ni sɔleɔ nyɔɔŋ kɛ shwane lɛ he. Etsɔɔ mli akɛ Yesu sɔle beni abaptisi lɛ lɛ, esɔle nyɔɔŋ muu fɛɛ dani ehala bɔfoi 12 lɛ, ni eesɔle beni esu tsake lɛ. Yesu wo ekaselɔi lɛ hewalɛ akɛ ‘amɛsɔle daa ni ekaje amɛtsine,’ ni ekɛ yoo okulafo ko ni tee nɔ ebi kojolɔ ko koni efã ehe lɛ fee enɛ he nɔkwɛmɔnɔ. Luka pɛ bɔ amaniɛ akɛ kaselɔi lɛ bi Yesu koni etsɔɔ amɛ bɔ ni asɔleɔ, kɛ ŋwɛibɔfoi ni wo Yesu hewalɛ beni esɔleɔ yɛ Mu Gɔŋ lɛ nɔ lɛ he amaniɛ; ni lɛ pɛ ebɔ Yesu naagbee sɔlemɔ lɛ he amaniɛ akɛ: “Ataa, odɛŋ mituɔ mimumɔ miwoɔ nɛɛ!” (1:10, 13; 2:37; 3:21; 6:12; 9:28, 29; 18:1-8; 11:1; 22:39-46; 23:46) Taakɛ ebalɛ beni Luka ŋma e-Sanekpakpa lɛ, nakai hu ŋmɛnɛ lɛ sɔlemɔ wajeɔ mɛi fɛɛ ni feɔ Nyɔŋmɔ suɔmɔnaa nii lɛ.

³⁴ Luka kɛ woloŋ ni ele, enaatselɛ, kɛ eniiamlitsɔɔmɔ hesaa lɛ tsu nii ni ekɛ hedɔɔ kɛ miishɛɛ bɔ Yesu tsɔɔmɔi lɛ ahe amaniɛ. Suɔmɔ, mlihilɛ, mɔbɔnalɛ, kɛ musuŋtsɔlɛ ni Yesu jie lɛ kpo tsɔɔ gbedelɔi, nɔnalɔi, kɛ mɛi ni yɔɔ nɔnyɛɛ shishi lɛ yɛ srɔto kwraa yɛ yiwalɛ, kpɛŋŋfeemɔ, veveevefeemɔ, kɛ osatofeemɔ ni yaa nɔ yɛ woloŋmalɔi lɛ kɛ Farisifoi lɛ ajamɔ lɛ mli lɛ. (4:18; 18:9) Yesu tee nɔ ewo ohiafoi, nomii, shwilafoi, kɛ mɛi ni tsui ekumɔ lɛ hewalɛ ni eye ebua amɛ, ni ekɛfee nɔkwɛmɔnɔ eha mɛi fɛɛ ni miitao ni ‘amɛnyiɛ enanemaahei lɛ asɛɛ kpaakpa’ lɛ.—1 Pet. 2:21.

³⁵ Taakɛ Yesu ni ji Nyɔŋmɔ Bi ni eye emuu kɛ naakpɛɛ nifeelɔ lɛ jie suɔmɔ kpo etsɔɔ ekaselɔi lɛ kɛ mɛi fɛɛ ni hiɛ tsui ni ja lɛ, esa akɛ wɔ hu wɔbɔ mɔdɛŋ ni wɔkɛ suɔmɔ atsu wɔsɔɔmɔ nitsumɔ lɛ, hɛɛ yɛ “wɔ-Nyɔŋmɔ lɛ mɔbɔnalɛ ní haa emusuŋ tsɔɔ lɛ lɛ naa.” (Luka 1:78) Kɛbashi amrɔ nɛɛ wɔna akɛ “Luka” sanekpakpa lɛ he yɛ sɛɛnamɔ ni eyeɔ ebuaa mɔ diɛŋtsɛ. Esa akɛ wɔda Yehowa shi waa akɛ ekɛ emumɔ lɛ ye bua Luka, “tsofatsɛ ni asumɔɔ lɛ” lɛ ni eŋmala sane ni ja, ni tswaa mɔ emaa shi, ni wajeɔ mɔ, ní haa anaa akɛ Yesu Kristo Maŋtsɛyeli ni ji “Nyɔŋmɔ walaheremɔ lɛ” nɔ abaatsɔ aná yiwalaheremɔ lɛ.—Kol. 4:14; Luka 3:6.

[Shishigbɛ niŋmai]