“Kristo Jwɛŋmɔ” lɛ ni Wɔɔle

“‘Namɔ ebale Yehowa jwɛŋmɔ lɛ, koni etsɔɔ lɛ nii?’ Shi wɔ lɛ wɔhiɛ Kristo jwɛŋmɔ.”—1 KORINTOBII 2:16, NW.

 1, 2. Mɛni Yehowa na akɛ esa akɛ ejie lɛ kpo yɛ e-Wiemɔ lɛ mli yɛ Yesu he?

TE YESU tamɔ tɛŋŋ? Te eyitsɔi? ehewolo? kɛ ehiŋmɛi su yɔɔ ha tɛŋŋ? Te ekwɔlɛ yɔɔ ha tɛŋŋ? Te emlitsiimɔ yɔɔ ha tɛŋŋ? Bɔ ni nitɛŋlɔi etsɔɔ bɔ ni Yesu tamɔ ha yɛ afii ohai abɔ lɛ amli fɛɛ lɛ efee nɔ ni yɔɔ srɔto, kɛjɛ nɔ ni shishinumɔ yɔɔ mli nɔ kɛyashi nɔ ni nyɛŋ atamɔ lɛ kwraa lɛ nɔ. Mɛi komɛi etsɔɔ akɛ etamɔ nuu ni he wa ni yɔɔ miishɛɛ, yɛ be mli ni mɛi krokomɛi efee ehe mfoniri akɛ mɔ ni yɔɔ wudɔɔ ni he waaa.

² Shi kɛlɛ, Biblia lɛ gbalaaa jwɛŋmɔ kɛyaaa bɔ ni Yesu su tamɔ ha lɛ nɔ. Shi moŋ, Yehowa na akɛ esa akɛ ejie nɔ ko ni sa kadimɔ waa kpo: nɔ̃ gbɔmɔ ni Yesu ji. Jeee akɛ Sanekpakpai lɛ amli saji lɛ bɔ nɔ ni Yesu wie kɛ nii ni efee lɛ ahe amaniɛ kɛkɛ, shi amɛjieɔ henumɔ ni mli kwɔ kɛ bɔ ni ejwɛŋɔ saji ahe ehaa ni yɔɔ ewiemɔi kɛ enifeemɔi asɛɛ lɛ hu kpo. Nɛkɛ saji ejwɛ ni jɛ mumɔŋ nɛɛ yeɔ ebuaa wɔ ni wɔpɛiɔ nɔ ni bɔfo Paulo wie he akɛ “Kristo jwɛŋmɔ” lɛ mli. (1 Korintobii 2:16) Ehe miihia ni wɔle Yesu susumɔi, ehenumɔi, kɛ esu kɛ baŋ. Mɛni hewɔ? Kɛ hoo lɛ yɛ yiŋtoi enyɔ hewɔ.

 3. Kristo jwɛŋmɔ lɛ ni wɔɔle lɛ baanyɛ aha wɔ mɛɛ sɛɛyoomɔ?

³ Klɛŋklɛŋ lɛ, Kristo jwɛŋmɔ lɛ haa wɔleɔ Yehowa Nyɔŋmɔ jwɛŋmɔ lɛ mli fioo. Yesu kɛ e-Tsɛ lɛ bɔɔ gbagbalii aahu akɛ enyɛ ekɛɛ akɛ: “Mɔ ko leee mɔ ni ji bi lɛ, ja tsɛ lɛ kɛkɛ, kɛ mɔ ni ji tsɛ lɛ hu, ja bi lɛ kɛ mɔ ni bi lɛ sumɔɔ akɛ ejie lɛ kpo etsɔɔ lɛ.” (Luka 10:22) Etamɔ nɔ ni Yesu miikɛɛ akɛ, ‘Kɛ́ nyɛmiisumɔ ni nyɛle bɔ ni Yehowa tamɔ ha lɛ, no lɛ nyɛkwɛa mi.’ (Yohane 14:9) No hewɔ lɛ, kɛji akɛ wɔkase nɔ ni Sanekpakpai lɛ jieɔ lɛ kpo yɛ bɔ ni Yesu susu saji ahe eha kɛ bɔ ni enu nibii ahe eha lɛ, belɛ wɔmiikase bɔ ni Yehowa jwɛŋɔ kɛ bɔ ni enuɔ nii ahe ehaa. Nilee ni tamɔ nɛkɛ haa wɔnyɛɔ wɔbɛŋkɛɔ wɔ-Nyɔŋmɔ lɛ he kpaakpa.—Yakobo 4:8.

 4. Kɛji akɛ wɔbaafee wɔnii tamɔ Kristo lɛɛlɛŋ lɛ, klɛŋklɛŋ lɛ mɛni esa akɛ wɔkase, ni mɛni hewɔ?

⁴ Nɔ ni ji enyɔ lɛ, Kristo jwɛŋmɔ lɛ ni wɔleɔ lɛ yeɔ ebuaa wɔ koni ‘wɔnyiɛ enanemaahei lɛ asɛɛ kpaakpa.’ (1 Petro 2:21) Yesu sɛɛnyiɛmɔ jeee ewiemɔi lɛ amlitii kɛ enifeemɔi lɛ akasemɔ kɛkɛ. Akɛni susumɔi kɛ henumɔi náa wiemɔ kɛ nifeemɔi anɔ hewalɛ hewɔ lɛ, Kristo sɛɛnyiɛmɔ biɔ ni wɔná ‘jwɛŋmɔŋ su’ ni ená lɛ nɔŋŋ eko. (Filipibii 2:5) Yɛ gbɛ kroko nɔ lɛ, kɛji akɛ wɔɔfee wɔnii tamɔ Kristo lɛɛlɛŋ lɛ, no lɛ klɛŋklɛŋ lɛ, esa akɛ wɔkase bɔ ni wɔɔjwɛŋ ni wɔnu nii ahe tamɔ lɛ, ni ji akɛ, kɛyashɛ he ni hi fe fɛɛ ni wɔɔnyɛ ákɛ adesai ni yeee emuu. Belɛ, nyɛhaa wɔkɛ Sanekpakpa lɛ ŋmalɔi lɛ ayelikɛbuamɔ apɛia Kristo jwɛŋmɔ lɛ mli. Klɛŋklɛŋ lɛ, wɔbaasusu saji ni ná Yesu susumɔ kɛ bɔ ni enu saji ahe eha lɛ nɔ hewalɛ lɛ ahe.

Eshihilɛ Dani Ebatsɔ Gbɔmɔ

 5, 6. (a) Mɛɛ hewalɛ wɔnanemɛi baanyɛ aná yɛ wɔnɔ? (b) Mɛɛ naanyobɔɔ Nyɔŋmɔ kromɔ Bi lɛ ná yɛ ŋwɛi dani eba shikpɔŋ nɔ, ni mɛɛ hewalɛ enɛ ná yɛ enɔ?

⁵ Gbɔmɛi ni wɔkɛ amɛ bɔɔ kpaakpa lɛ baanyɛ asa wɔhe, amɛbaaná wɔsusumɔi, henumɔi, kɛ nifeemɔi anɔ hewalɛ kpakpa loo efɔŋ.a (Abɛi 13:20) Susumɔ naanyobɔɔ ni Yesu ná yɛ ŋwɛi dani eba shikpɔŋ nɔ lɛ he. Yohane Sanekpakpa lɛ gbalaa jwɛŋmɔ kɛyaa Yesu shihilɛ akɛ “Wiemɔ lɛ,” loo Nyɔŋmɔ Naawielɔ dani ebatsɔ gbɔmɔ lɛ nɔ. Yohane kɛɔ akɛ: “Shishijee mli lɛ Wiemɔ lɛ yɛ, ni Wiemɔ lɛ kɛ Nyɔŋmɔ yɔɔ, ni Wiemɔ lɛ ji nyɔŋmɔ ko. Mɔ nɛɛ kɛ Nyɔŋmɔ yɔɔ yɛ shishijee lɛ mli.” (Yohane 1:1, 2, NW) Akɛni Yehowa bɛ shishijee hewɔ lɛ, Wiemɔ lɛ ni kɛ Nyɔŋmɔ yɔɔ “yɛ shishijee mli” lɛ baanyɛ afee Nyɔŋmɔ nibɔɔ nitsumɔi lɛ ashishijee. (Lala 90:2) Yesu ji “bɔɔ nii fɛɛ ateŋ kromɔ bi.” No hewɔ lɛ, eyɛ shihilɛ mli dani abɔ mumɔŋ bɔɔ nii krokomɛi lɛ kɛ jeŋ muu fɛɛ ni anaa lɛ.—Kolosebii 1:15; Kpojiemɔ 3:14.

⁶ Taakɛ jeŋ nilee mli akɔntaabui komɛi tsɔɔ lɛ, jeŋ muu fɛɛ ni anaa nɛɛ ehi shi kɛ hoo lɛ afii akpekpei toi akpei 12. Kɛji akɛ nakai akɔntaabui lɛ baanyɛ afee anɔkwale lɛ, belɛ Nyɔŋmɔ kromɔ Bi lɛ kɛ e-Tsɛ lɛ ená naanyobɔɔ ni bɛŋkɛ kpaakpa mli ŋɔɔmɔ afii babaoo ni aleee dani abɔ Adam. (Okɛto Mika 5:1 he.) No hewɔ lɛ mlijɔlɛ kɛ ekomefeemɔ ni mli wa waa tee nɔ yɛ mɛi enyɔ lɛ ateŋ. Ákɛ nilee ni ejie ehe kpo yɛ gbɔmɔtso mli lɛ, awie kromɔ Bi nɛɛ he beni ebatsɔko gbɔmɔ lɛ he akɛ ekɛɛ: “No mli lɛ miyɛ [Yehowa] masɛi . . . ; ni mimii shɛɔ mihe daa, mishwɛɔ yɛ ehiɛ be fɛɛ be.” (Abɛi 8:30) Yɛ anɔkwale mli lɛ, afii babaoo ni anyɛŋ akane ni ekɛ suɔmɔ Jɛɛhe lɛ ená yɛ naanyobɔɔ ni bɛŋkɛ kpaakpa mli lɛ ná Nyɔŋmɔ Bi lɛ nɔ hewalɛ waa! (1 Yohane 4:8) Nɛkɛ Bi nɛɛ bale e-Tsɛ lɛ susumɔi, henumɔi, kɛ egbɛ̀i ni ejie amɛ kpo etsɔɔ yɛ gbɛ ni mɔ ko mɔ ko kwraa nyɛŋ afee nakai lɛ nɔ.—Mateo 11:27.

Eshikpɔŋ nɔ Shihilɛ kɛ Nibii ni Ná Enɔ Hewalɛ

 7. Mɛni ji yiŋtoi ni ha ehe bahia ni Nyɔŋmɔ kromɔ Bi lɛ aba shikpɔŋ nɔ lɛ ateŋ ekome?

⁷ Nyɔŋmɔ Bi lɛ yɛ nibii babaoo ni ebaakase, ejaakɛ Yehowa yiŋtoo ji ni ewula e-Bi lɛ koni efee Osɔfonukpa ni naa mɔ mɔbɔ, ‘mɔ ni nuɔ wɔgbedemɔi ahe ehaa wɔ.’ (Hebribii 4:15) Yiŋtoi ni ha Bi lɛ ba shikpɔŋ nɔ akɛ gbɔmɔ lɛ ateŋ ekome ji ni ana taomɔ nii kɛha nitsumɔ nɛɛ yɛ ehe. Biɛ ji he ni ákɛ heloo kɛ lá lɛ, Yesu kɛ shihilɛi kɛ nibii ni náa mɔ nɔ hewalɛ ni tsutsu lɛ enaa kɛjɛɔ ŋwɛi pɛ lɛ bakpe yɛ. Kpaako enyɛ ekpa adesa henumɔi kɛ kanyamɔi ashi klɛŋklɛŋ kwraa. Yɛ bei komɛi amli lɛ enuɔ tɔlɛ he, kumai yeɔ lɛ, ni hɔmɔ yeɔ lɛ. (Mateo 4:2; Yohane 4:6, 7) Nɔ ni fe nakai po lɛ, eŋmɛ etsui shi yɛ tɔlɛi kɛ amanehului srɔtoi fɛɛ mli. No hewɔ lɛ, “ekase toiboo” ni ebatsɔ mɔ ni he esa kwraa kɛha enitsumɔ akɛ Osɔfonukpa lɛ.—Hebribii 5:8-10.

 8. Mɛni wɔle yɛ Yesu gbekɛbiiashi shihilɛ yɛ shikpɔŋ nɔ lɛ he?

⁸ Ni Yesu niiashikpamɔi yɛ eshikpɔŋ nɔ shihilɛ shishijee be lɛ mli lɛ hu? Saji ni aŋmala ashwie shi ní kɔɔ egbekɛbiiashi he lɛ yɛ kuku kwraa. Yɛ anɔkwale mli lɛ, Mateo kɛ Luka pɛ gba saji ni kɔɔ efɔmɔ he. Sanekpakpa ŋmalalɔi lɛ le akɛ Yesu ehi shi yɛ ŋwɛi pɛŋ dani eba shikpɔŋ nɔ. Eshihilɛ dani ebatsɔ gbɔmɔ lɛ tsɔɔ nɔ gbɔmɔ ni ebatsɔ lɛ mli fe nɔ fɛɛ nɔ. Fɛɛ sɛɛ lɛ, Yesu ji gbɔmɔ adesa diɛŋtsɛ. Eyɛ mli akɛ eyeɔ emuu moŋ, shi kɛlɛ esa akɛ eda kɛjɛ ebifabiiaŋ kɛtsɔ egbekɛbiiashi kɛ eblahiiaŋ kɛyashi eeetsɔ onukpa, ní eekase nii yɛ nɛkɛ bei nɛɛ fɛɛ mli. (Luka 2:51, 52) Biblia lɛ jieɔ nibii komɛi ni kɔɔ Yesu gbekɛbiiashi shihilɛ he lɛ kpo, ni ŋwanejee ko bɛ he akɛ amɛná enɔ hewalɛ waa.

 9. (a) Mɛni yɔɔ ni tsɔɔ akɛ afɔ́ Yesu awo ohiafoi aweku mli? (b) Mɛɛ shihilɛi ashishi nɛkɛ eeenyɛ efee akɛ Yesu da yɛ?

⁹ Eyɛ faŋŋ akɛ, afɔ́ Yesu awo ohiafoi aweku mli. Nɔ ni tsɔɔ enɛ ji afɔleshaa nii ni Yosef kɛ Maria kɛba sɔlemɔwe lɛ aaafee efɔmɔ sɛɛ gbii 40 lɛ. Yɛ nɔ najiaŋ ni amɛkɛ toobi aaaba akɛ shãa afɔle, kɛ okpo loo kosɛɛ okpo ni edako akɛ esha he afɔleshaa nii lɛ, amɛkɛ “kosɛɛ okpoi enyɔ aloo shĩa okpoi bibii enyɔ” ba. (Luka 2:24) Taakɛ Mose Mla lɛ tsɔɔ lɛ, nɛkɛ afɔleshaa nɛɛ ji gbɛjianɔtoo kɛha ohiafoi. (3 Mose 12:6-8) Beni be shwieɔ mli lɛ, nɛkɛ ohiafoi aweku nɛɛ ayi bafa. Kɛ hoo lɛ, Yosef kɛ Maria baná bii krokomɛi ekpaa kɛtsɔ adebɔɔ naa fɔmɔ nɔ yɛ Yesu naakpɛɛ fɔmɔ lɛ sɛɛ. (Mateo 13:55, 56) No hewɔ lɛ, Yesu da yɛ weku ni da mli, ekolɛ yɛ shihilɛi ni baa shi mli.

10. Mɛni tsɔɔ akɛ Maria kɛ Yosef ji aŋkroaŋkroi ni sheɔ Nyɔŋmɔ gbeyei?

¹⁰ Fɔlɔi ni sheɔ Nyɔŋmɔ gbeyei tsɔse Yesu ni amɛlɛ lɛ. Enyɛ, Maria, ji yoo ni ekaaa. Kaimɔ akɛ, beni bɔfo Gabriel ŋaa lɛ lɛ, ekɛɛ akɛ: “Hejɔlɛ ahao, bo mɔ ni aduro bo, Nuntsɔ lɛ kɛo yɛ.” (Luka 1:28) Yosef hu ji nuu ni sɔmɔɔ Nyɔŋmɔ. Daa afi lɛ, ekɛ anɔkwayeli fãa gbɛ shitoi 90 kɛyaa Yerusalem kɛyayeɔ Hehoo lɛ. Maria hu yaa, eyɛ mli akɛ hii pɛ abiɔ ni amɛfee nakai. (2 Mose 23:17; Luka 2:41) Nɛkɛ be nɛɛ eko mli ni beni Yosef kɛ Maria etao Yesu ni eye afii 12 lɛ aahu lɛ, amɛyana lɛ yɛ sɔlemɔwe lɛ ni eta tsɔɔlɔi lɛ ateŋ lɛ. Yesu kɛɛ efɔlɔi ni amɛhao lɛ akɛ: “Ani nyɛleee akɛ esa mi akɛ mihiɔ shi yɛ nii ni ji mitsɛ nɔ lɛ mli?” (Luka 2:49) ‘Tsɛ,’—nakai wiemɔ lɛ baanyɛ atsɔɔ nɔ ko ni yɔɔ miishɛɛ kɛ nɔ kpakpa kɛha Yesu ni edako lɛ. Nɔ kome ji akɛ, eyɛ faŋŋ akɛ ákɛɛ lɛ akɛ Yehowa ji e-Tsɛ diɛŋtsɛ. Kɛfata he lɛ, Yosef baanyɛ afee tsɛ kpakpa ni ŋɔ Yesu fee ebi. Yɛ anɔkwale mli lɛ, kulɛ Yehowa halaŋ nuu ni yɔɔ keketee loo yiwalɔ koni etsɔse E-suɔmɔ Bi lɛ!

11. Mɛɛ ŋaa nitsumɔ Yesu kase, ni mɛni nitsumɔ nɛɛ biɔ yɛ Biblia bei amli?

¹¹ Yesu kase kapintɛ nitsumɔ, ekolɛ kɛjɛ Yosef ni ŋɔ lɛ efee ebi lɛ ŋɔɔ, yɛ afii ni ekɛhi Nazaret lɛ mli. Yesu kase nɛkɛ ŋaa nitsumɔ nɛɛ jogbaŋŋ akɛ abatsɛ lɛ akɛ “ŋaalɔ lɛ.” (Marko 6:3) Yɛ Biblia bei amli lɛ, akɛ nitsumɔ haa kapintɛfoi koni amɛmamɔ shiai, amɛkpɛ tsũi amli nibii (ni okpɔlɔi, sɛii, kɛ maaŋoi kakadaji fata he), ni amɛfeɔ ŋmɔshi nitsumɔ nibii. Justin Martyr ni hi shi yɛ Ŋ.B. afii ohai enyɔ lɛ mli lɛ ŋma yɛ Yesu he yɛ ewolo ni ji Dialogue With Trypho lɛ mli akɛ: “Nɔ ni efɔɔ feemɔ beni eyɔɔ gbɔmɛi ateŋ lɛ ji nii ni etsuɔ akɛ kapintɛ, ni efeɔ tsinakɔi kɛ kooloi apã.” Nitsumɔ ni tamɔ nɛkɛ bɛ mlɛo, ejaakɛ ekolɛ blema kapintɛfonyo lɛ nyɛŋ ahe etsei lɛ. Ebaanyɛ efee akɛ eyaa ni eyahalaa tso, ekɛ elema folɔɔ tso lɛ ni etereɔ kɛbaa shia. No hewɔ lɛ Yesu baanyɛ ale bɔ ni afeɔ anáa shihilɛ mli nibii ni ataoɔ, bɔ ni akɛ nihelɔi yeɔ haa, kɛ bɔ ni afeɔ ahiɔ shi yɛ shihilɛ mli nibii ni ayɔɔ lɛ anaa.

12. Mɛni tsɔɔ akɛ eyɛ faŋŋ akɛ Yosef gbo dani Yesu gbo, ni mɛni enɛ baatsɔɔ kɛha Yesu?

¹² Ákɛ bi nukpa lɛ, ekolɛ Yesu ye ebua ni akɛkwɛ weku lɛ, titri lɛ akɛni etamɔ nɔ ni Yosef gbó dani Yesu gbó lɛ hewɔ.b January 1, 1900 Zion’s Watch Tower lɛ kɛɛ akɛ: “Blemasane kɛɔ akɛ Yosef gbó beni Yesu edako, ni akɛ ekɛ ehe wo kapintɛ nitsumɔ lɛ mli ni ebaafee mɔ ni yeɔ buaa weku lɛ. Anaa Ŋmalɛ naa sɛɛfimɔ ko kɛhaa enɛ beni atsɛ Yesu diɛŋtsɛ akɛ ŋaalɔ lɛ, ni atsĩ enyɛ kɛ enyɛmimɛi atã, shi atsĩii Yosef tã lɛ. (Marko 6:3) . . . Belɛ ebaanyɛ eba akɛ, wɔ-Nuntsɔ lɛ kɛ be kakadaŋŋ ni feɔ afii nyɔŋma kɛ kpaanyɔ, kɛjɛ be mli ni sane ni [aŋma afɔ̃ shi yɛ Luka 2:41-49 lɛ ba lɛ] kɛyashi ebaptisimɔ be lɛ mli lɛ tsu wala shihilɛ mli nitsumɔi ahe nii.” Eyɛ faŋŋ akɛ Maria kɛ ebii lɛ, ni Yesu fata he lɛ le piŋmɔ ni baa beni wu kɛ tsɛ ni yɔɔ suɔmɔ egbó lɛ.

13. Mɛni hewɔ beni Yesu je esɔɔmɔ nitsumɔ lɛ shishi lɛ, ekɛ nilee, sɛɛyoomɔ, kɛ henumɔ ni mli wa ni gbɔmɔ ko bɛ ni baanyɛ aná je shishi lɛ?

¹³ Eyɛ faŋŋ akɛ afɔ́ɔɔ Yesu awooo ogbɔjɔ shihilɛ mli. Shi moŋ lɛ diɛŋtsɛ ená gbɔmɛi foji lɛ ashihilɛ mli niiashikpamɔ. Kɛkɛ ni yɛ afi 29 Ŋ.B. lɛ, be bashɛ kɛha Yesu akɛ etsu ŋwɛi nitsumɔ ni mɛɔ lɛ lɛ he nii. Abaptisi lɛ yɛ nu mli ni afɔ́ lɛ akɛ Nyɔŋmɔ mumɔŋ Bi yɛ nakai afi lɛ gbo be mli. ‘Agbele ŋwɛi naa aha lɛ,’ ni tsɔɔ yɛ faŋŋ mli akɛ ebaanyɛ ekai shihilɛ ni eyɔɔ mli yɛ ŋwɛi dani ebatsɔ gbɔmɔ, kɛ susumɔi kɛ henumɔi ni fata he lɛ. (Luka 3:21, 22) No hewɔ lɛ, Yesu kɛ nilee, sɛɛyoomɔ, kɛ henumɔ ni mli wa diɛŋtsɛ ni adesa ko nyɛŋ aná je esɔɔmɔ nitsumɔ lɛ shishi. Belɛ yiŋtoo kpakpa hewɔ ni Sanekpakpa lɛ ŋmalalɔi lɛ tuu amɛniŋmaai lɛ amli nɔ ni fa amɛha Yesu sɔɔmɔ nitsumɔ lɛ mli saji lɛ. Enɛ fɛɛ sɛɛ po lɛ, amɛnyɛɛɛ amɛŋmala saji ni ewie lɛ kɛ nibii ni efee lɛ fɛɛ po. (Yohane 21:25) Shi nɔ ni akɛ mumɔ tsirɛ amɛ ni amɛŋmala amɛshwie shi lɛ yeɔ ebuaa wɔ ni wɔpɛiɔ gbɔmɔ ni fe mɔ fɛɛ mɔ ni ehi shi pɛŋ lɛ jwɛŋmɔ lɛ mli.

Bɔ ni Yesu Tamɔ Ha ákɛ Gbɔmɔ

14. Te Sanekpakpai lɛ jieɔ Yesu kpo akɛ gbɔmɔ ni yɔɔ mlijɔlɛ kɛ miishɛɛ kɛ henumɔ ni mli wa ehaa tɛŋŋ?

¹⁴ Bɔ ni Yesu su kɛ baŋ ji taakɛ anaa kɛjɛɔ Sanekpakpai lɛ amli lɛ ji nuu ni mli jɔ ni yɔɔ miishɛɛ kɛ henumɔ ni mli wa babaoo. Ejie ehenumɔi akpo yɛ gbɛ̀i srɔtoi babaoo nɔ: ena kpitiyelɔ ko mɔbɔ (Marko 1:40, 41); eye awerɛho yɛ gbɔmɛi ni nuuu nɔ he lɛ ahe (Luka 19:41, 42); ejie jalɛ mlifu kpo yɛ shika tsakelɔi hiɛjoolɔi ahe. (Yohane 2:13-17) Akɛni Yesu nuɔ nii ahe ehaa mɔ hewɔ lɛ, sane baanyɛ atsirɛ lɛ koni efó, ni ekɛ ehenumɔi eteee. Beni eshieŋtsɛ Lazaro ni esumɔɔ esane lɛ gbó, ni ena Maria, ni ji Lazaro nyɛmi yoo lɛ ni miifo lɛ, esa Yesu he waa akɛ lɛ hu ebɔi yaafo, efo yɛ gbɔmɛi lɛ fɛɛ ahiɛ.—Yohane 11:32-36.

15. Mɛɛ gbɛ nɔ Yesu mlijɔlɛ henumɔi lɛ je kpo yɛ gbɛ ni esusu mɛi ahe ni ekɛ amɛ ye ha lɛ nɔ?

¹⁵ Yesu mlijɔlɛ kɛ henumɔ lɛ je kpo titri yɛ gbɛ ni esusuɔ mɛi krokomɛi ahe ni ekɛ amɛ yeɔ haa lɛ mli. Ebɛŋkɛ ohiafoi kɛ mɛi ni anyɛɔ amɛnɔ lɛ, ni eye ebua amɛ koni ‘amɛná hejɔɔmɔ amɛha amɛsusumai.’ (Mateo 11:4, 5, 28-30) Ejeee mɔ ni bɛ dekã tsɔ akɛ eeetsu mɛi ni ehao lɛ ahiamɔ nii ahe nii, kɛji akɛ mɔ lɛ ji yoo ni lá miiho lɛ ni ta etade he nigii aloo shwilafo ni baa nii ni anyɛɛɛ akũ enaa. (Mateo 9:20-22; Marko 10:46-52) Yesu tao nɔ kpakpa ni yɔɔ mɛi krokomɛi amli lɛ ni ejie amɛyi; ni kɛlɛ, eesumɔ hu ni ekɛ kãmɔ aha kɛ ehe miihia. (Mateo 16:23; Yohane 1:47; 8:44) Yesu kɛ yei ye yɛ woo kɛ bulɛ ni ŋmɛɔ pɛpɛɛpɛ mli yɛ be ni hegbɛi fioo ko pɛ yei náa mli ŋɔɔmɔ yɛ nakai beaŋ lɛ mli. (Yohane 4:9, 27) Belɛ shishinumɔ yɛ he akɛ enɛ hewɔ ni yei akuu ko jɛ amɛsuɔmɔ mli amɛkɛ amɛ nibii sɔmɔ lɛ lɛ.—Luka 8:3.

16. Mɛni tsɔɔ akɛ Yesu yɛ shihilɛ kɛ heloo gbɛfaŋ nibii ahe jwɛŋmɔ ni ŋmɛɔ pɛpɛɛpɛ?

¹⁶ Yesu kɛ jwɛŋmɔ ni ŋmɛɔ pɛpɛɛpɛ kwɛ shihilɛ lɛ. Heloo gbɛfaŋ nibii jeee nii ni he hiaa lɛ titri. Etamɔ mɔ ko ni heloo gbɛfaŋ nibii fioo ko pɛ eyɔɔ. Ekɛɛ “ebɛ he ni ekɛ eyitso tsɔleɔ.” (Mateo 8:20) Yɛ nakai beaŋ nɔŋŋ lɛ, Yesu kɛ nɔ ko fata miishɛɛ ni mɛi krokomɛi yɔɔ lɛ he. Beni etee yookpeemɔ okpɔlɔŋmɛɛ ko shishi—ni akɛ saŋku lalai, lalai ni alaa kɛ mlifilimɔ kadiɔ enɛ lɛ—eyɛ faŋŋ akɛ eyaaa jɛmɛ akɛ eyaagbe be ni tamɔ nɛkɛ he guɔ. Yɛ anɔkwale mli lɛ, Yesu fee eklɛŋklɛŋ naakpɛɛ nii lɛ yɛ jɛmɛ. Beni wein lɛ tã lɛ, eha nu tsɔ wein ni ŋɔɔ, wein ni “haa adesa tsui nyɔɔ emli.” (Lala 104:15; Yohane 2:1-11) Okpɔlɔŋmɛɛ lɛ tee nɔ, ni ŋwanejee ko bɛ he akɛ enɛ haaa ayɛmforo lɛ kɛ ayɛmforowu lɛ hiɛ agbo. Bɔ ni eŋmɛɔ pɛpɛɛpɛ ha lɛ hu jeɔ kpo yɛ bɔ ni atsĩ Yesu tã bei pii akɛ ekɛ be kakadaŋŋ tsu nii waa yɛ esɔɔmɔ nitsumɔ lɛ mli lɛ.—Yohane 4:34.

17. Mɛni hewɔ ebɛ naakpɛɛ akɛ Yesu ji Tsɔɔlɔ Kpele lɛ, ni etsɔɔmɔi lɛ jie mɛni kpo?

¹⁷ Yesu ji Tsɔɔlɔ Kpele. Etsɔɔmɔ lɛ kɔɔ saji ni akɛkpeɔ yɛ daa gbi shihilɛ mli, ni ele nomɛi jogbaŋŋ lɛ ahe titri. (Mateo 13:33; Luka 15:8) Mɔ ko bɛ ni kɛ lɛ yeɔ egbɔ yɛ gbɛ ni etsɔɔ nɔ etsɔɔ nii lɛ mli—emli ka shi faŋŋ, eyɛ mlɛo, ni anyɛɔ atsuɔ he nii be fɛɛ be. Nɔ ni sa kadimɔ jogbaŋŋ po ji nii ni etsɔɔ lɛ. Etsɔɔmɔi lɛ jieɔ bɔ ni eshweɔ akɛ ejɛ etsui mli ni eha etoibolɔi lɛ ale Yehowa susumɔi, ehenumɔi, kɛ egbɛ̀i lɛ akpo.—Yohane 17:6-8.

18, 19. (a) Mɛɛ wiemɔi ni jeɔ kpo yɛ mfoniri feemɔi amli Yesu kɛtsɔɔ bɔ ni e-Tsɛ lɛ ji? (b) Mɛni abaasusu he yɛ nikasemɔ ni nyiɛ sɛɛ lɛ mli?

¹⁸ Bei pii lɛ Yesu kɛ nɔkwɛmɔnii tsuɔ nii ni ekɛjieɔ e-Tsɛ lɛ kpo yɛ wiemɔi ni akɛ mfonirifeemɔ tsɔɔ mli ni hiɛ kpaŋ nɔ oya lɛ amli. Ákɛ aaawie Nyɔŋmɔ mɔbɔnalɛ he yɛ gbɛ ni mli lɛɛ nɔ lɛ ji nɔ kome. Ni ákɛ akɛ Yehowa aaato tsɛ ni kɛ tɔmɔ keɔ ni emusuŋ tsɔɔ lɛ waa beni ena ni ebinuu eku esɛɛ kɛmiiba shia ni ‘eshaa foi eyagbeeɔ ebi lɛ kuɛ nɔ ni ekɛ mlihilɛ shɔɔ enaa’ lɛ he lɛ hu ji nɔ kroko kwraa. (Luka 15:11-24) Beni ekpoɔ kusum nifeemɔ ko ni yɔɔ keketee ni emli lɛ jamɔ mli hiɛnyiɛlɔi kwɛɔ gbɔmɛi foji lɛ yɛ shikpɔŋ lɛ, Yesu tsɔɔ mli akɛ e-Tsɛ lɛ ji Nyɔŋmɔ ni anyɛɔ abɛŋkɛɔ lɛ ni sumɔɔ toohelɔ heshibalɔ faikpamɔi fe Farisifonyo hepupuulɔ sɔlemɔ ni ekɛtsɔɔ mɛi. (Luka 18:9-14) Yesu ha ale Yehowa akɛ Nyɔŋmɔ ni susuɔ mɔ he ni le be ni afilimata bibioo gbeeɔ shikpɔŋ. Yesu ma nɔ mi kɛha ekaselɔi lɛ akɛ: “Nyɛkashea gbeyei; nyɛjara wa aahu fe afilimatai babaoo.” (Mateo 10:29, 31) Anuɔ shishi akɛ no hewɔ ni gbɔmɛi lɛ ahe jɔ̃ amɛhe yɛ Yesu “nitsɔɔmɔ lɛ hewɔ” ni amɛba eŋɔɔ lɛ. (Mateo 7:28, 29) Ejaakɛ be ko lɛ “mɛi pii” kɛ lɛ hi shi gbii etɛ sɔŋŋ, ni amɛyeee nii po!—Marko 8:1, 2.

¹⁹ Wɔbaanyɛ wɔda shi akɛ Yehowa ejie Kristo jwɛŋmɔ lɛ kpo yɛ e-Wiemɔ lɛ mli eha wɔ! Shi te wɔɔfee tɛŋŋ wɔná ni wɔjie Kristo jwɛŋmɔ lɛ kpo yɛ bɔ ni wɔkɛ mɛi krokomɛi yeɔ haa lɛ mli? Abaasusu enɛ he yɛ nikasemɔ ni nyiɛ sɛɛ lɛ mli.

[Shishigbɛ niŋmai]

Ani Okaiɔ?

• Mɛni hewɔ ehe hiaa ni wɔle “Kristo jwɛŋmɔ” lɛ jogbaŋŋ lɛ?

• Mɛɛ naanyobɔɔ Yesu ná dani ebatsɔ gbɔmɔ?

• Mɛɛ shihilɛi kɛ hewalɛi Yesu diɛŋtsɛ ná mli niiashikpamɔ yɛ eshikpɔŋ nɔ shihilɛ be lɛ mli?

• Mɛni Sanekpakpai lɛ jieɔ lɛ kpo yɛ Yesu su kɛ baŋ he?

[Mfoniri ni yɔɔ baafa 10]

Yesu da yɛ weku ni amɛyi fa mli, ekolɛ yɛ shihilɛi ni baa shi mli

[Mfonirii ni yɔɔ baafa 12]

Tsɔɔlɔi lɛ anaa kpɛ amɛhe yɛ Yesu ni eye afii 12 lɛ shishinumɔ kɛ hetooi lɛ ahe