Yitso 12

Yesu Baptisimɔ

BENI Yohane bɔi shiɛmɔ lɛ sɛɛ aaafee nyɔji ekpaa lɛ, Yesu, ni eye afii 30 yɛ nakai beaŋ lɛ ba eŋɔɔ yɛ Yordan faa lɛ naa. Yɛ mɛɛ yiŋtoo hewɔ? Ni eeba ebasara lɛ kɛkɛ? Ani Yesu yɛ bɔ ni Yohane nitsumɔ lɛ yaa nɔ lɛ he miishɛɛ kɛkɛ? Dabi, Yesu bi ni Yohane abaptisi lɛ.

Amrɔ nɔŋŋ ni Yohane te shi ewo enɛ ni ekɛɛ: “Mi moŋ ni ehia mi akɛ bo obaptisiɔ mi lɛ, ni bo obaa miŋɔɔ nɛɛ?” Yohane le akɛ enyɛkwɛ bi Yesu ji Nyɔŋmɔ Bi krɛdɛɛ ko. Ojogbaŋŋ, Yohane tumɔ kɛ miishɛɛ yɛ enyɛ musuŋ beni Maria, ni ehiɛ Yesu musu lɛ ba ebasara amɛ lɛ! Ŋwanejee ko bɛ he akɛ, yɛ sɛɛ mli lɛ, Yohane nyɛ Elizabet gba lɛ enɛ he sane. Ni ebaakɛɛ lɛ adafitswaa ni ŋwɛibɔfo lɛ kɛba ni kɔɔ Yesu fɔmɔ he kɛ bɔ ni ŋwɛibɔfoi jie amɛhe kpo amɛtsɔɔ tookwɛlɔi yɛ gbi gbɛkɛ ni afɔ Yesu lɛ.

No hewɔ lɛ Yesu jeee mɔ ko ni Yohane leee lɛ. Ni Yohane le akɛ ebaptisimɔ lɛ esaaa Yesu. Esa kɛha mɛi ni tsakeɔ amɛtsuii yɛ amɛhe eshai lɛ ahe lɛ, shi eshai bɛ Yesu he. Ni kɛlɛ, Yohane shitee-kɛ-woo lɛ fɛɛ sɛɛ lɛ, Yesu ma nɔ ni ha lɛ akɛ: “Kpɛlɛmɔ kɛkɛ, shi nɛkɛ sa akɛ wɔgbeɔ jalɛ fɛɛ naa.”

Mɛni hewɔ ni eja gbɛ akɛ abaptisi Yesu lɛ? Ejaakɛ Yesu baptisimɔ lɛ ji okadi, jeee kɛha eshai ahe tsuitsakemɔ, shi moŋ ehe ni ekɛhaa akɛ ebaafee e-Tsɛ lɛ suɔmɔnaa nii lɛ he okadi. Yesu ji kapintɛfonyo, shi agbɛnɛ be eshɛ kɛha lɛ akɛ eje sɔɔmɔ nitsumɔ ni Yehowa Nyɔŋmɔ tsu lɛ kɛba shikpɔŋ nɔ ni ebatsu lɛ shishi. Ani osusuɔ akɛ Yohane miikpa gbɛ akɛ naakpɛɛ nɔ ko baaba yɛ be mli ni ebaptisiɔ Yesu lɛ?

Ojogbaŋŋ, sɛɛ mli lɛ, Yohane bɔ amaniɛ akɛ: “Mɔ ni tsu mi akɛ mibabaptisi yɛ nu mli lɛ, Lɛ nɔŋŋ ekɛɛ mi akɛ: ‘Mɔ nɔ ni ooona akɛ mumɔ lɛ yiɔ ni ehiɔ enɔ lɛ, lɛ ji mɔ ni baptisiɔ yɛ mumɔ krɔŋkrɔŋ lɛ mli lɛ.’ ” No hewɔ lɛ Yohane miikpa gbɛ akɛ Nyɔŋmɔ mumɔ lɛ baaba mɛi ni ebaptisiɔ lɛ ekome nɔ. No hewɔ lɛ, ekolɛ enaa ekpɛɛɛ ehe yɛ be mli ni, beni Yesu woɔ ehe nɔ kɛjɛɔ nu lɛ mli lɛ, Yohane na “Nyɔŋmɔ mumɔ miikpeleke shi tamɔ okpo kɛmiiba enɔ” lɛ.

Shi nɔ ni fe nakai ba mli beni abaptisiɔ Yesu lɛ. ‘Ŋwɛi naa gbele’ eha lɛ. Mɛni enɛ tsɔɔ? Eka shi faŋŋ akɛ etsɔɔ akɛ beni abaptisiɔ lɛ lɛ, eshihilɛ yɛ ŋwɛi dani ebatsɔ adesa lɛ he kaimɔ ku sɛɛ be eyiŋ ekoŋŋ. Enɛ hewɔ lɛ, Yesu kai eshihilɛ akɛ Yehowa Nyɔŋmɔ mumɔŋ bi lɛ jogbaŋŋ kɛmɔ shi, kɛ nibii ni Nyɔŋmɔ kɛ lɛ wie yɛ ŋwɛi beni eyɔɔ jɛmɛ ni ebatsɔko adesa lɛ hu fɛɛ.

Kɛfata he lɛ, yɛ ebaptisimɔ be lɛ mli lɛ, gbee ko jaje kɛjɛ ŋwɛi akɛ: “Mɔ nɛ ji misuɔmɔ Bi ni mina ehe tsui lɛ.” Namɔ gbee nɛ? Ani Yesu diɛŋtsɛ gbee ni? Eji anɔkwale akɛ jeee lɛ ni! Nyɔŋmɔ gbee ni. Eyɛ faŋŋ akɛ, Yesu ji Nyɔŋmɔ Bi, jeee Nyɔŋmɔ diɛŋtsɛ, taakɛ bɔ ni mɛi komɛi kɛɔ lɛ.

Shi kɛlɛ, Yesu ji Nyɔŋmɔ Bi ni ji adesa, taakɛ bɔ ni klɛŋklɛŋ gbɔmɔ ni ji Adam ji lɛ pɛpɛɛpɛ. Kaselɔ Luka ŋma, yɛ be mli ni etsɔɔ Yesu baptisimɔ lɛ mli lɛ akɛ: “Ni beni Yesu diɛŋtsɛ bɔi lɛ, eye afii nyɔŋmai etɛ, ni bɔ ni asusuɔ lɛ, eji Yosef bi, Heli bi, . . . David bi, . . . Abraham bi, . . . Noa bi, . . . Adam bi, Nyɔŋmɔ bi.”

Taakɛ bɔ ni Adam ji “Nyɔŋmɔ bi” ni ji gbɔmɔ lɛ, nakai nɔŋŋ Yesu hu ji. Yesu ji gbɔmɔ ni fe mɔ fɛɛ mɔ ni ehi shi pɛŋ, ni kɛ wɔkwɛ Yesu shihilɛ mli saji amli lɛ enɛ bafeɔ faŋŋ. Shi kɛlɛ, yɛ ebaptisimɔ be lɛ mli lɛ, Yesu kɛ Nyɔŋmɔ bote wekukpaa hee ko mli, ni ebatsɔ Nyɔŋmɔ mumɔŋ Bi hu. Ni kɛ wɔɔkɛɛ lɛ, Nyɔŋmɔ saa etsɛ lɛ kɛtee ŋwɛi ekoŋŋ, kɛtsɔ shihilɛ gbɛ ni ekɛ lɛ yi nɔ ni baagbe naa kɛ ewala akɛ adesa ni ekɛbaafɔ shi kɛya naanɔ akɛ afɔleshaa nɔ yɛ adesai ni abu amɛ gbele fɔ lɛ anajiaŋ lɛ nɔ. Mateo 3:13-17; Luka 3:21-38; 1:34-36, 44; 2:10-14; Yohane 1:32-34; Hebribii 10:5-9.

▪ Mɛni hewɔ Yesu jeee mɔ ko ni Yohane leee lɛ lɛ?

▪ Akɛni Yesu efeko esha ko hewɔ lɛ, mɛni hewɔ abaptisi lɛ lɛ?

▪ Yɛ nɔ ni Yohane le yɛ Yesu he lɛ hewɔ lɛ, mɛni hewɔ ni efeŋ lɛ naakpɛɛ beni Nyɔŋmɔ mumɔ lɛ bayi Yesu nɔ lɛ?