Wɔ Jwetri Lɛ, Ŋmɛnɛŋmɛnɛ Beaŋ Anunyam Sɔɔmɔ
“Wɔhiɛ nɛkɛ jwetri nɛɛ yɛ su nii amli—koni hewalɛ ni fa kɛteke nɔ lɛ afee Nyɔŋmɔ nɔ, shi jeee wɔ nɔ.”—2 KORINTOBII 4:7.
1. (a) Mɛɛ anunyam jwetri wɔbaanyɛ wɔna, ni mɛni hewɔ? (b) Te Biblia lɛ tsɔɔ gbɛ ni atsɔ nɔ akɛ Mose Mla lɛ ha mli ehaa tɛŋŋ?
SƆƆMƆ ni ji “maŋtsɛyeli lɛ he sanekpakpa” lɛ shiɛmɔ yɛ nibii agbɛjianɔtoo nɛɛ naagbee lɛ mli lɛ ji jwetri ko diɛŋtsɛ, nii ni jara wa waa ni mɔ ko aaana. Akɛni Yehowa ji anunyam Nyɔŋmɔ hewɔ lɛ, Nyɔŋmɔ sɔɔmɔ lɛ ji anunyam sɔɔmɔ, no hewɔ lɛ eji jwetri. (Mateo 24:14; 2 Korintobii 3:18–4:1) Yɛ Mose Mla lɛ ni akɛha yɛ anunyam mli lɛ he lɛ, aŋma yɛ 2 Mose 34:29, 30 akɛ: “Ni eba mli akɛ, beni Mose jɛ Sinai Gɔŋ lɛ nɔ ekpeleke shi lɛ, ehiɛ odaseyeli tɛi lɛ yɛ edɛŋ; shi Mose leee akɛ ni ekɛ lɛ [Yehowa] wie hewɔ lɛ, eha ehiɛ ekpɛ. Ni beni Aaron kɛ Israelbii lɛ fɛɛ na Mose lɛ, naa, ehiɛ miikpɛ; ni amɛshe gbeyei akɛ amɛaabɛŋkɛ lɛ.”
2. Mose Mla lɛ sɔɔmɔ lɛ fee mɛni he mfoniri, ni mɛni hewɔ sɛɛkpee sɔɔmɔ lɛ hiɛ anunyam babaoo lɛ?
2 Kukuji 32 kɛyashi 34 kɛfataa he akɛ: “Ni fee sɛɛ lɛ Israelbii lɛ fɛɛ tsi ba; ni ewo amɛ kitai fɛɛ ni Yehowa kɛba lɛ yɛ Sinai Gɔŋ lɛ nɔ lɛ. Ni beni Mose kɛ amɛ wie egbe naa lɛ, eŋɔ hiɛhaa nɔ eha ehiɛ. Shi kɛ Mose miiya Yehowa hiɛ ni ekɛ lɛ ayawie lɛ, ejieɔ hiɛhaa nɔ lɛ kɛyashi beyinɔ ni eeeje kpo.” Nakai Mose Mla lɛ sɔɔmɔ lɛ fee kpaŋmɔ hee lɛ he sɔɔmɔ ni Yesu Kristo ji Teŋdamɔlɔ lɛ he mfoniri. No hewɔ lɛ, kɛji akɛ tsutsu sɔɔmɔ lɛ ji anunyam nɔ lɛ, enyiɛ nɔŋŋ ni sɛɛkpee nɔ lɛ, “nɔ ni atsɔ mumɔ lɛ nɔ akɛha lɛ” hiɛ baŋ nyam babaoo! (2 Korintobii 3:7-11) Eyɛ nyam babaoo ejaakɛ eyɛ anunyam ko ni hiɔ shi daa, ni Yesu Kristo sɛɛnyiɛlɔi lɛ naa mli gbɛfaŋnɔ.—Romabii 12:11.
3. (a) Mɛni baanyɛ afee anɔkwale yɛ Yehowa Odasefoi asɔɔmɔ lɛ he, shi mɛni hewɔ mɛi pii enaaa enɛ lɛ? (b) Mɛni ye he odase akɛ Mose tee Yehowa anunyam lɛ hiɛ?
3 No hewɔ lɛ anyɛɔ anaa faŋŋ akɛ Yehowa Odasefoi asɔɔmɔ nitsumɔ lɛ ji anunyam nɔ. Shi, mɛi ni apasa jamɔ eshwila amɛhiŋmɛi lɛ ateŋ mɛi pii enaaa enɛ. Eyɛ mli akɛ mɛi pii yɛ Biblia lɛ ni amɛbaanyɛ amɛkane moŋ, shi, amɛbɛ ‘hiŋmɛi ni naa nii.’ (2 Petro 1:5-9) Kɛ aaanyɛ ajie hiɛhaa nɔ ni ha amɛhiŋmɛii anɔ lɛ, belɛ esa akɛ amɛtsɔ amɛhe kɛya Yehowa Nyɔŋmɔ he yɛ hemɔkɛyeli mli, ejaakɛ beni Mose tee Yehowa hiɛ lɛ, ejie hiɛhaa nɔ ni eha ehiɛ ni Yudafoi lɛ nyɛɛɛ akwɛ lɛ lɛ. (2 Korintobii 3:16) Israelbii lɛ she gbeyei akɛ amɛaakwɛ Nyɔŋmɔ anunyam ni kpɛlɛɔ yɛ amɛteŋdamɔlɔ lɛ hiɛ lɛ, ni amɛbi ni aha hiɛ koni amɛkana. Taakɛ bɔ ni ojarawa tɛ ni la ekpɛ eshwie nɔ kpɛlɛɔ yɛ duŋ mli yɛ beni ajie la lɛ kɛtee lɛ sɛɛ lɛ, nakai nɔŋŋ hu Mose, amɛteŋdamɔlɔ lɛ, jie Yehowa anunyam lɛ kpɛmɔ lɛ kpo, ni ekɛye odase akɛ etee Yehowa hiɛ lɛlɛŋ.
4. Ŋmɛnɛ mɛi ni heee yeee lɛ kaseɔ blema Yudafoi lɛ yɛ mɛɛ gbɛ nɔ, shi mɛni Mose Kpeteŋkpele lɛ sɛɛnyiɛlɔi lɛ sheee no gbeyei lɛ?
4 Mose fee Nyɔŋmɔ Gbalɔ kpeteŋkple, Yesu Kristo he mfoniri. Taakɛ bɔ ni mɔ ni akɛ lɛ fee ehe mfoniri lɛ ji lɛ, nɛkɛ Mose Kpeteŋkple nɛɛ sheee gbeyei akɛ eeena loo eeekwɛ Yehowa anunyam lɛ tɛɛ. Kɛbashi ŋmɛnɛ gbi nɛɛ, gbɔmɛi ni heee yeee ni Abonsam kɛ e-Babilon jamɔ lɛ shwilaa amɛhiŋmɛi lɛ kaseɔ nakai blema Yudafoi lɛ ni amɛsumɔɔɔ ni amɛnaa loo amɛyɔseɔ Mose Kpeteŋkple, Yesu Kristo anunyam lɛ. (2 Korintobii 3:12-15) Ni kɛlɛ, enɔkwa sɛɛnyiɛlɔi lɛ sheee gbeyei akɛ amɛaakwɛ Yehowa anunyam kpɛmɔ lɛ ni kpɛlɛɔ kɛjɛɔ Yesu Kristo hiɛ lɛ. Akɛni amɛye amɛhe kɛjɛ Babilon hewalɛ shishi hewɔ lɛ, awo amɛ ekaa ni amɛjie Nyɔŋmɔ anunyam lɛ kpo amɛtsɔɔ. Paulo ŋma akɛ: “Agbɛnɛ akɛni wɔyɔɔ nɛkɛ hiɛnɔkamɔ nɛɛ hewɔ lɛ, wɔkɛ wiemɔ mli heyeli babaoo miitsu nii.”—2 Korintobii 3:12, New World Translation.
Mɛi ni Jieɔ Nyɔŋmɔ Anunyam lɛ Kpo Amɛtsɔɔ
5. Te wɔɔfee tɛŋŋ wɔjie Nyɔŋmɔ anunyam lɛ kpo ni wɔtamɔ Mose ni yɔɔ gɔŋ lɛ nɔ yɛ Yehowa hiɛ lɛ?
5 Yesu Kristo ejie hiɛhaa nɔ lɛ kɛtsɔ Yehowa Nyɔŋmɔ ni ejie lɛ kpo ni eshiɛ lɛ etsɔɔ wɔ lɛ nɔ. (Yohane 1:14, 17, 18) No hewɔ lɛ esa akɛ wɔkpɛ, koni eha Nyɔŋmɔ anunyam lɛ akpɛ kɛtsɔ “Kristo ni ji Nyɔŋmɔ subaŋ lɛ anunyam sanekpakpa lɛ la ni tsoɔ” ni esa akɛ wɔjaje wɔtsɔɔ lɛ nɔ. Ekpɛmɔ lɛ ji “Nyɔŋmɔ anunyam he nilee . . . yɛ Yesu Kristo hiɛ.” Esa akɛ wɔha nɛkɛ anunyam nɛɛ akpɛ kɛtsɔ Yehowa anunyam lɛ kɛ e-Maŋtsɛyeli kɛtsɔ e-Bi lɛ anunyam lɛ nɔ lɛ he wiemɔ nɔ. (2 Korintobii 4:4-6) Taakɛ Mose ji yɛ gɔŋ lɛ nɔ yɛ Yehowa hiɛ lɛ, E-Dasefoi ni yɔɔ shikpɔŋ lɛ nɔ lɛ ehaaa amɛtsuii ahiɛ kɛjɛɛɛ Yehowa anunyam lɛ hiɛ. Amɛnyaa yɛ anunyam ni kpɛlɛɔ yɛ Yehowa Bi kɛ Maŋtsɛ Yesu Kristo hiɛ lɛ he. No hewɔ lɛ, esa akɛ amɛ hu amɛha nakai la ni kɔɔ Nyɔŋmɔ anunyam lɛ he lɛ hu akpɛ aha mɛi krokomɛi.
6. Te Paulo tsɔɔ wɔ anunyam sɔɔmɔ lɛ mli yɛ 2 Korintobii 3:18 eha tɛŋŋ, ni mɛɛ gbɛi anɔ nɛkɛ “atsakeɔ” wɔ yɛ?
6 Bɔfo Paulo tsɔɔ Yehowa anunyam lɛ mli eha enanemɛi odasefoi lɛ fɛɛ yɛ nɛkɛ wiemɔi nɛɛ amli: “Shi wɔ fɛɛ ni wɔkɛ hiɛ kpetekpelee kwɛɔ Nuŋtsɔ lɛ anunyam lɛ tamɔ akwɛɔ ashwishwɛ mli lɛ, wɔmiitsake wɔmiitsɔmɔ nakai subaŋ lɛ nɔŋŋ kɛmiijɛ anunyam mli kɛmiiya anunyam mli, taakɛ bɔ ni ejɛɔ Nuŋtsɔ [Yehowa] ni ji Mumɔ lɛ ŋɔɔ lɛ.” (2 Korintobii 3:18) Babaoo ni wɔnine shɛɔ ela lɛ anunyam lɛ nɔ lɛ, babaoo hu esa akɛ wɔha akpɛ kɛya, kɛkɛ lɛ babaoo ni atsakeɔ wɔ ji no. Ahaa jwɛŋmɔi tsɔɔ ehee ni atsakeɔ lɛ, eyɛ mli akɛ anaŋ tsakemɔ ko yɛ gbɔmɔtsoŋ loo yɛ hiɛaŋ. Anunyam sanekpakpa lɛ la lɛ ni wɔhaa ekpɛɔ lɛ ji nɔ ni kɛ sɔrɔtofeemɔ lɛ baa wɔmli lɛ. Etsakeɔ wɔshihilɛ koni wɔtamɔ Kristo, yɛ be mli ni wɔtoɔ gbɛjianɔ koni wɔtsu sɔɔmɔ hegbɛ ni ji anunyam la lɛ gbɛɛ-kɛ-shwamɔ kɛmiiha mɛi fɛɛ yɛ he fɛɛ he lɛ he nii lɛ.—Hebribii 13:15.
7. Anunyam diɛŋtsɛ lɛ jɛɛhe jɛ mɛni mli, ni te wɔɔfee tɛŋŋ wɔjie nɛkɛ anunyam nɛɛ kpo wɔtsɔɔ?
7 Nɛkɛ tsakemɔi nɛɛ fɛɛ jɛ mumɔ lɛ, aloo Nyɔŋmɔ nifeemɔ hewalɛ lɛ. Kristendom osɔfoi lɛ ejieee Yehowa Nyɔŋmɔ anunyam kpɛmɔ lɛ kpo, shi moŋ amɛkwaa amɛfeɔ nɔ ko kɛkɛ amɛtsɔɔ koni mɛi akwɛ amɛ. Anunyam lɛ jeee wɔ anunyam, ni ehe ehiaaa ni wɔwula wɔhe kpɛŋshɛŋŋ kɛ osɔfoi atadei ni akɛ sriki, shika kɛ jwetrii ni kpɛlɛɔ ekpɛ. Anunyam diɛŋtsɛ lɛ baa kɛjɛɔ Nyɔŋmɔ mumɔ lɛ ŋɔɔ, ni ajieɔ enɛ kpo kɛtsɔɔ anunyam odaseyeli ni kɔɔ Yehowa ni ji Mumɔ lɛ he lɛ ni wɔjajeɔ wɔtsɔɔ lɛ nɔ.
Mɛi Fɛɛ ni Ena Hegbɛ akɛ Amɛaahiɛ Kanei Lɛ
8, 9. Mɛɛ hewalɛwoo Paulo kɛhaa wɔ yɛ 2 Korintobii 4:1, 2, ni enɛ biɔ mɛɛ faishitswaa yɛ wɔgbɛfaŋ?
8 Wɔkaneɔ yɛ 2 Korintobii 4:1, 2 akɛ: “No hewɔ lɛ, akɛ nɔ ni wɔhiɛ nɛkɛ sɔɔmɔ nɛɛ hewɔ lɛ, taakɛ bɔ ni ana wɔ mɔbɔ lɛ, wɔtsui efaaa, shi wɔgu hiɛgbejianii ni aŋɔtee lɛ, ni wɔbaaa wɔjeŋ yɛ kutumpɔo mli, ni asaŋ wɔfutuuu Nyɔŋmɔ wiemɔ lɛ, shi moŋ wɔkɛ anɔkwale lɛ kpojiemɔ lɛ jieɔ wɔhe wɔtsɔɔ gbɔmɛi ahenilee fɛɛ yɛ Nyɔŋmɔ hiɛ.” Nyɔŋmɔ ena wɔ mɔbɔ akɛ ekɛ sɔɔmɔ nɛɛ ewo wɔdɛŋ. Enɛ ji ŋaawoo ni akɛha wɔ koni ewo wɔ hewalɛ ni wɔya nɔ yɛ ekaa naa, ni enɛ ji nɔ ni wɔbaafee! Akɛni akɛ la ni jɛ Nyɔŋmɔ Wiemɔ lɛ mli lɛ eduro wɔ hewɔ lɛ, gbɛnaa nii ka wɔnɔ akɛ wɔha ekpɛ kɛha mɛi krokomɛi.—Okɛto Mateo 5:14-16 he.
9 Nibii ni gbɔmɛi ahiɛ gboɔ yɛ he, tamɔ ojotswaa lɛ, amɛtsɔɔ shishiumɔ kɛ lakamɔ nɔ amɛkɛteeɔ. Shi wɔ lɛ wɔbɛ nɔ ni aaaha wɔhiɛ agbo, ejaakɛ wɔ shɛɛsane Iɛ kɛ nitsumɔ lɛ jeee ojotswaa nɔ, shi moŋ eji nɔ ni ja kɛ anɔkwale hu. No hewɔ lɛ wɔbaanyɛ wɔha anunyam la lɛ hewalɛ fɛɛ akpɛ kɛya. Wɔkɛ shishiumɔ tsuuu Nyɔŋmɔ Wiemɔ lɛ he nii. Nakai feemɔ baatsɔɔ akɛ wɔmiitsu he nii yɛ pɛsɛmkunya gbɛ nɔ kɛha wɔ diɛŋtsɛ wɔsɛɛnamɔ, anunyam, kɛ hegbɛ kɛ je lɛŋ hewalɛ koni wɔjo shitee kɛ woo kɛ yiwaa ni jɛ je lɛŋ lɛ naa foi. Mɛi ni sheee gbeyei akɛ amɛaaba Yehowa ŋɔɔ kɛ hiɛ ni ahako nɔ koni amɛbakwɛ anunyam anɔkwale lɛ la lɛ hu sheŋ gbeyei akɛ amɛaaŋɔ amɛgbɛnaa nii lɛ amɛfɔ amɛnɔ. Amɛbaaha la lɛ akpɛ kɛjɛ amɛŋɔɔ.
10. Mɛni hewɔ ejeee Yehowa Odasefoi atɔmɔ akɛ aha Maŋtsɛyeli lɛ he sanekpakpa lɛ hiɛ yɛ mɛi pii ahiɛ lɛ?
10 Kɛji akɛ mɛi komɛi yɛ ni aha amɛhiɛ yɛ Maŋtsɛyeli lɛ he sanekpakpa lɛ he lɛ, jeee Yehowa Odasefoi atɔmɔ ni, shi moŋ amɛ diɛŋtsɛ amɛtɔmɔ ni. Akɛ Maŋtsɛyeli lɛ he sanekpakpa lɛ eteee. Yehowa Odasefoi ashiɛmɔ yɛ jeŋ fɛɛ lɛ ji nɔ ni ale jogbaŋŋ. No hewɔ lɛ amɛbaanyɛ amɛkɛɛ taakɛ bɔfo Paulo kɛɛ lɛ: “Ejaakɛ jeee nififiaŋ he ko afee enɛ yɛ.” Yɛ anɔkwale mli lɛ, taakɛ eŋma lɛ, “ashiɛɔ [sanekpakpa lɛ] atsɔɔ bɔɔnii fɛɛ ni yɔɔ ŋwɛi shishi lɛ.”—Bɔfoi lɛ Asaji 26:26; Kolosebii 1:23.
11. Mɛni hewɔ aha anunyam sanekpakpa lɛ hiɛ yɛ adesai ateŋ mɛi pii ahiɛ nakai lɛ?
11 Mɛi ni akɛ Nyɔŋmɔ Maŋtsɛyeli lɛ he sanekpakpa lɛ etee amɛ lɛ ji shitee-kɛ-wolɔi ni Abonsam eshwila amɛhiŋmɛi lɛ. (Okɛto Mateo 12:30 he.) Kɛji akɛ amɛtsiii amɛhe kɛjɛɛɛ apasa jamɔ kɛ Abonsam ŋaatsɔɔi lɛ ahe lɛ, belɛ hiɛkpatamɔ ji nɔ ni baaba amɛnɔ. Nɛkɛ gbɔmɛi nɛɛ kɛ hiɛhaa nɔ haa amɛ diɛŋtsɛ amɛhiɛ yɛ daimonioi lɛ ahewalɛ shishi, ejaakɛ bɔfo Paulo kɛɔ yɛ 2 Korintobii 4:3-5 akɛ: “Shi kɛ ha aha wɔ sanekpakpa lɛ nɔ tete lɛ, mɛi ni laajeɔ lɛ amli kɛkɛ aha nɔ yɛ, mɛi amli ni je nɛŋ nyɔŋmɔ lɛ eshwila mɛi ni heee yeee lɛ ajwɛŋmɔi lɛ yɛ, koni Kristo ni ji Nyɔŋmɔ subaŋ lɛ anunyam sanekpakpa lɛ la ni tsoɔ lɛ akakpɛ miiha amɛ. Ejaakɛ jeee wɔ diɛŋtsɛ wɔhe wɔshiɛɔ, shi moŋ Kristo Yesu, akɛ lɛ ji Nuŋtsɔ, shi wɔ lɛ, nyɛtsuji ji wɔ, yɛ Yesu hewɔ.”
12. Nɔ ni tamɔɔɔ mɛi ni eshwila yɛ jwɛŋmɔ mli lɛ, te Yehowa webii hereɔ wiemɔi ni yɔɔ 2 Korintobii 4:6 lɛ anɔ amɛhaa tɛŋŋ?
12 Mɛi ni eshwila yɛ jwɛŋmɔ mli lɛ sumɔɔɔ ni amɛheɔ amɛyeɔ. He ni amɛheee amɛyeee lɛ haa daimonioi lɛ tutuaa amɛjwɛŋmɔi. (1 Timoteo 4:1) Amɛnyɛŋ amɛna Yehowa anunyam lɛ loo ekpɛmɔ lɛ ni jɛ Yesu, Mose Kpeteŋkple lɛ hiɛ lɛ. Yehowa webii mɔɔ anunyam kpɛmɔ lɛ ni jɛ Biblia lɛ mli lɛ mli, ni amɛkpɛɔ enɛ amɛshwieɔ mɛi krokomɛi anɔ. No hewɔ lɛ Nyɔŋmɔ tsuji lɛ fɛɛ ji mɛi ni hiɛ kanei ni kpɛɔ, ni Nyɔŋmɔ faa ni la lɛ akpɛ. Esa akɛ la lɛ akpɛ kɛjɛ Nyɔŋmɔ webii aŋɔɔ ni ekpɛ eshwie mɛi krokomɛi ni yɔɔ duŋ mli ni hiɛkpatamɔ he oshara ka amɛnɔ lɛ anɔ. Enɛ tamɔ bɔ pɛ ni 2 Korintobii 4:6 wieɔ he lɛ: “Ejaakɛ Nyɔŋmɔ ni kɛɛ akɛ la ajɛ duŋ mli akpɛ lɛ, lɛ nɔŋŋ ekpɛ yɛ wɔtsuii amli hu, koni Nyɔŋmɔ anunyam he nilee lɛ akpɛ yɛ Yesu Kristo hiɛ.” Yɛ enɛ hewɔ lɛ, Yehowa Odasefoi boɔ ŋwɛi famɔ lɛ toi ni amɛhaa amɛla lɛ kpɛɔ shwieɔ mɛi krokomɛi anɔ, ni ewoɔ Nyɔŋmɔ hiɛ nyam.
Anunyam Jwetrii ni Yɔɔ Nii ni Waaa Mli
13. Mɛni jɛɔ sɔɔmɔ hegbɛi ni jɔɔmɔ yɔɔ mli ni akɛhaa la hiɛlɔi ni ji adesai yɛ heloo mli lɛ mli baa?
13 Yɛ nɛkɛ sɔɔmɔ hegbɛ kpeteŋkple ni ekaaa nɛɛ mli lɛ, ehe miihia waa ni mɛi ni hiɛ la lɛ atsɔɔ akɛ amɛsa akɛ amɛhiɛɔ la lɛ kɛtsɔ emuuyeli mli ni amɛaahiɛ amɛha Nyɔŋmɔ lɛ nɔ. Bɔni afee ni atsu sɔɔmɔ hegbɛ ni yɔɔ naakpɛɛ nɛɛ he nii lɛ, Nyɔŋmɔ kɛ ŋwɛibɔfoi krɔŋkrɔŋi lɛ ni sumɔɔ ni amɛkwɛ nɛkɛ nibii nɛɛ amli lɛ tsuuu nii, shi moŋ ekɛ nɛkɛ sɔɔmɔ ni jɔɔmɔ yɔɔ mli nɛɛ eha bɔɔnii ni hiɛ heloo. (1 Petro 1:12) Efee enɛ ni eha ehewalɛ lɛ eje agbo yɛ adesai agbɔjɔmɔi amli. Taakɛ 2 Korintobii 4:7 jajeɔ lɛ: “Shi wɔhiɛ nɛkɛ jwetrii nɛɛ yɛ su nii amli—koni hewalɛ ni fa kɛteke nɔ lɛ afee Nyɔŋmɔ nɔ, ni jeee wɔ nɔ.”
14. (a) Mɛni ji “nɛkɛ jwetri yɛ su nii amli” nɛɛ? (b) Mɛni hewɔ Mose kɛ Yesu Kristo ji nɔkwɛmɔ nii ni nilee yɔɔ mli kɛha wɔ yɛ jwetrii ahe lɛ?
14 Yɛ blema lɛ akɛ nibii ni jara wawai toɔ su nii amli. Mɛni ji nɛkɛ anunyam jwetri ni Yehowa Odasefoi hiɛ yɛ su nii ni waaa mli—amɛ diɛŋtsɛ amɛhe, akɛ shikpɔŋ nɔ bɔɔnii ni he waaa ni jɛ shikpɔŋ nɔ su mli nɛɛ? Nɛkɛ jwetri nɛɛ jeee la ni ekpɛ kɛbote amɛtsuii amli pɛ kɛkɛ. Eji nakai sɔɔmɔ Iɛ he la lɛ, sɔɔmɔ ni esa akɛ amɛkɛ amɛshikpɔŋ nɔ gbɔmɔtsei atsu lɛ. Sɔɔmɔ lɛ ji la ni Nyɔŋmɔ ekpɛ eshwie amɛtsuii anɔ lɛ. Nɛkɛ sɔɔmɔ nɛɛ ji jwetri kpakpa ko akɛni eji sɔɔmɔ hegbɛ ni sɛɛnamɔ babaoo yɔɔ he ni jeee shwɛɛnii ni afɔ amɛ mu lɛ ni ji “asafoku bibioo” lɛ pɛ naa mli gbɛfaŋnɔ, shi moŋ, Tookwɛlɔ Kpakpa, Yesu Kristo “asafo babaoo” ni ji “tooi krokomɛi” lɛ hu lɛ. (Luka 12:32; Yohane 10:14-16; Kpojiemɔ 7:9) Mose kɛ mɔ ni akɛ lɛ fee ehe mfoniri lɛ ji nɔkwɛmɔ nii ni nilee yɔɔ mli kɛha wɔ, koni wɔkɛ wɔtsuii amamɔ nɛkɛ ŋwɛi sɔɔmɔ ni ji jwetri nɛɛ nɔ, ejaakɛ “he ni nyɛjwetri yɔɔ lɛ, jɛi nyɛtsuii aaahi.”—Mateo 6:19-21; Hebribii 11:26.
15, 16. (a) Yɛ mɛɛ gbɛ nɔ atsɔɔ anaa akɛ hewalɛ ni tekeɔ nɔ lɛ baa kɛjɛɔ Nyɔŋmɔ ŋɔɔ shi jeee nɔ ni jɛɔ wɔ diɛŋtsɛ wɔŋɔɔ? (b) Mɛni hewɔ shitee-kɛ-woo ni jɛɔ je lɛŋ fɛɛ baa lɛ nyɛŋ akumɔ Nyɔŋmɔ shikpɔŋ nɔ su nii lɛ?
15 Belɛ te afeɔ tɛŋŋ anaa akɛ hewalɛ ni tekeɔ nɔ lɛ jɛ Nyɔŋmɔ ŋɔɔ shi jeee nɔ ni jɛ wɔ diɛŋtsɛ wɔŋɔɔ? Yɛ nɛkɛ gbɛ nɔ: Wɔ shikpɔŋ nɔ su nii ni he waaa ni tere nɛkɛ sɔɔmɔ ni ji jwetri nɛɛ kɛ nitsumɔ nɛɛ esaaa ni wɔnyɛŋ wɔhiɛ woo ni tamɔ nɛkɛ wɔ diɛŋtsɛ. Agbɛnɛ, henyɛlɔ lɛ kɛ nɔnyɛɛ sɔrɔtoi baa Yehowa Odasefoi lɛ anɔ koni ekɛbɔ mɔdɛŋ ni ekɛjwara wɔ ni wɔfɛlɛ ni wɔtsɔmɔ mɛi ni esaaa akɛ amɛhiɛɔ nitsumɔ ni jɛ Nyɔŋmɔ ŋɔɔ nɛɛ. No hewɔ lɛ, Nitsumɔ Halɔ Kpeteŋkpele lɛ hewalɛ ji nɔ ni yeɔ buaa ni wɔnyɛɔ wɔdamɔɔ basabasa babaoo ni je nɛɛ feɔ wɔ lɛ naa ni wɔnyɛɔ wɔmɔɔ nitsumɔ lɛ mli kpɛŋŋ ni wɔjieɔ wɔhe kpo akɛ mɛi ni sa akɛ ehaa wɔhiɔ esɔɔmɔ mli. No hewɔ lɛ shitee-kɛ-woo ni jɛ je lɛŋ baa lɛ fɛɛ nyɛŋ akumɔ Nyɔŋmɔ shikpɔŋ nɔ su nii lɛ koni eha amɛjwetri ni jara wa lɛ aje amɛdɛŋ ejaakɛ aŋma yɛ 2 Korintobii 4:8-12 akɛ:
16 “Afifiaa wɔ yɛ he fɛɛ he, shi kɛlɛ wɔtsui esuuu; wɔfeɔ yeyeeye, shi kɛlɛ wɔnijiaŋ ejeko wui; awaa wɔ yi, shi kɛlɛ akwako wɔ; atswiaa wɔ shi, shi kɛlɛ wɔpleneeko; daa nɛɛ wɔhiɛ Nuŋtsɔ Yesu gbele lɛ yɛ wɔgbɔmɔtso lɛ mli kɛnyiɛ, koni Yesu wala lɛ hu aje kpo yɛ wɔgbɔmɔtso lɛ mli. Ejaakɛ wɔ ni wɔhiɛ kamɔ nɛɛ, daa nɛɛ atu wɔ awo gbele dɛŋ yɛ Yesu hewɔ, koni Yesu wala lɛ hu aje kpo yɛ wɔheloo ni baagbo lɛ mli. No hewɔ lɛ agbɛnɛ gbele tsuɔ nii yɛ wɔmli, shi nyɛ lɛ, wala [kɛtsɔ Maŋtsɛyeli lɛ he sanekpakpa lɛ shiɛmɔ nɔ] tsuɔ nii yɛ nyɛmli.”
Asafo Babaoo lɛ Buɔ Nɛkɛ “Jwetri Nɛɛ” Waa
17. Te asafo babaoo lɛ buɔ “nɛkɛ jwetri” nɛɛ ni ji anunyam sɔɔmɔ lɛ amɛhaa tɛŋŋ?
17 “Gbele tsuɔ nii yɛ wɔmli, shi nyɛ lɛ wala tsuɔ nii yɛ nyɛmli.” Nɛkɛ wiemɔ nɛɛ kɔɔ Kristofoi ni akɛ mumɔ efɔ amɛ mu lɛ ahe. Ni kɛlɛ, ebaanyɛ eha wɔsusu wekukpaa ni ka shwɛɛnii ni Nyɔŋmɔ efɔ amɛ mu lɛ kɛ asafo babaoo lɛ ni ji tooi krokomɛi lɛ ateŋ lɛ he. Shwɛɛnii lɛ le akɛ yɛ naagbee lɛ amɛbaagbe amɛshikpɔŋ nɔ nitsumɔ lɛ naa yɛ gbele mli taakɛ Yesu fee lɛ, shi amɛyɛ amɛnanemɛi ni amɛkɛ amɛ baaja anunyam sɔɔmɔ ni ji jwetri lɛ, koni amɛye amɛbua amɛ ni amɛtsu Maŋtsɛyeli lɛ he sanekpakpa lɛ he nitsumɔ ni da lɛ. Taakɛ shwɛɛnii ni afɔ amɛ mu lɛ ji lɛ, asafo babaoo lɛ ni ji tooi krokomɛi ni yɔɔ ŋmɛnɛ lɛ le akɛ jwetri pɛ ni baaje Harmagedon ta ni naa wa lɛ mli ni eya nɔ ehi shi ni nɔ ko nɔ ko esaaa he ni afiteee lɛ yɛ jeŋ hee lɛ mli ji nɛkɛ jɔɔmɔ sɔɔmɔ jwetri nɛɛ, sɔɔmɔ ni akɛhaa Yehowa Nyɔŋmɔ kɛ enunyam Maŋtsɛ, Yesu Kristo lɛ. Asafo babaoo lɛ baamɔ mli kpɛŋŋ, ni “amɛkɛ sɔɔmɔ krɔŋŋ haa lɛ [Nyɔŋmɔ] nyɔɔŋ kɛ shwane yɛ esɔlemɔtsu lɛ mli.”—Kpojiemɔ 7:16, New World Translation.
18. (a) Mɛni etsɛŋ ni ebaaba je nɛɛ apasa anunyam lɛ nɔ? (b) Mɛɛ “anunyam” Yesu kpoo lɛ, ni mɛni ni efee ha enine shɛ anunyam ni kwɔ nɔ lɛ?
18 Etsɛŋ, ni Nyɔŋmɔ kɛ ŋmɛnɛŋmɛnɛ yiwalɛ nibii agbɛjianɔtoo nɛɛ apasa anunyam lɛ baaba enaagbee—“anunyam” ni etee nɔ kɛjɛ be mli ni Satan Abonsam ŋɔ Yesu kɛtee gɔŋ lɛ nɔ ni etsɔɔ lɛ je lɛ maŋtsɛyeli hei fɛɛ kɛ “amɛ anunyam” lɛ. (Luka 4:5, 6) Yesu kpoo akɛ eeehe anunyam ni jɛ jɛɛhe ni tamɔ nɛkɛ ni etee nɔ enyiɛ nifeemɔ gbɛ ni Nyɔŋmɔ kpɛlɛɔ nɔ yɛ shikpɔŋ nɔ lɛ sɛɛ. Yɛ enɛ ni efee lɛ hewɔ lɛ, akɛ anunyam akekre baawo ehiɛ nyam, nɔ ni nɔ kwɔ fe anunyam ni Nyɔŋmɔ bi koome lɛ yɔɔ yɛ ŋwɛi dani eba shikpɔŋ nɔ ekɛ ehe bawo nitsumɔ ni Yehowa kɛfɔ shi eha lɛ lɛ mli lɛ.—Yohane 5:36; 17:6; Filipibii 2:9-11.
19. Mɛɛ anunyam sɔɔmɔ hegbɛ ko bɛŋkɛɔ enaagbee kwraa lɛ, ni mɛni ji wɔfaishitswaa yɛ enɛ gbɛfaŋ?
19 Daimonioi ayiwalɛ nibii agbɛjianɔtoo nɛɛ naagbee ni agba afɔ shi lɛ baŋ ja agbe Maŋtsɛyeli odaseyeli lɛ naa yɛ shikpɔŋ lɛ fɛɛ nɔ akɛ Yesu Kristo sɛɛnyiɛlɔi, Yehowa Odasefoi lɛ anitsumɔ lɛ naagbee kwraa. (Matɛo 24:14) Maŋtsɛyeli lɛ he odaseyeli lɛ etee nɔ aaafee afii nyɔŋmai kpawo kɛ enumɔ nɛ, ni taakɛ nibii ni yaa nɔ yɛ je lɛ mli yɛ wɔbei nɛɛ amli lɛ tsɔɔ lɛ, nakai naagbee ni agba afɔ shi lɛ ebɛŋkɛ. No hewɔ lɛ, hegbɛ ni yɔɔ nyam ni ji odehei a-Maŋtsɛyeli krɔŋkrɔŋ lɛ sɔɔmɔ nitsumɔ ni akɛ he woɔ mli lɛ hu naagbee kwraa miibɛŋkɛ. (Mateo, yitsei 24, 26; Marko, yitso 13; Luka, yitso 21) Hegbɛ ni wɔna akɛ wɔkɛ wɔhe aaawo jeŋ muu fɛɛ odaseyeli ni kɔɔ Maŋtsɛyeli ni ato ama shi lɛ he lɛ mli lɛ ji anunyam jwetri lɛlɛŋ ni Yehowa Odasefoi, akɛ e-Bi ni ewo lɛ maŋtsɛ lɛ sɛɛnyiɛlɔi lɛ buɔ akɛ eji jwetri ni jara wa. Amɛkɛ anɔkwayeli fɛɛ miibɔ mɔdɛŋ ni amɛmɔ mli kɛyashi be mli ni Maŋtsɛyeli odaseyeli nitsumɔ lɛ aaaba naagbee kwraa ni Nyɔŋmɔ Ofe lɛ, Yehowa, kɛ jeŋ muu fɛɛ Maŋtsɛyeli lɛ aaafi jeŋ muu fɛɛ shihilɛ lɛ akekre.—Zefania 3:8.
Mɛni Ji Ohetooi?
◻ Mɛni hewɔ ni Yehowa Odasefoi asɔɔmɔ lɛ ji anunyam nɔ lɛ?
◻ Mɛni hewɔ ni sanekpakpa Iɛ hiɛ eha yɛ mɛi pii ahiɛ ŋmɛnɛ nakai Iɛ?
◻ Mɛni ji “nɛkɛ jwetri nɛɛ yɛ su nii amli” lɛ?
◻ Mɛni hewɔ ni Nyɔŋmɔ kɛ shikpɔŋ nɔ su nii ni waaa etsu nii kɛha nɛkɛ sɔɔmɔ ni ji jwetri nɛɛ?
◻ Te Yehowa webii buɔ “nɛkɛ jwetri” nɛɛ amɛhaa tɛŋŋ, ni mɛni hewɔ?
[Mfoniri ni yɔɔ baafa 17]
Nyɔŋmɔ anunyam lɛ kpɛlɛɔ Yesu Kristo, Mose Kpeteŋkpele lɛ hiɛ. Yehowa Odasefoi naa hegbɛ akɛ amɛaamɔ Nyɔŋmɔ anunyam la ni kpɛɔ kɛjɛɔ Biblia lɛ mli lɛ mli ni amɛhaa enɛ kpɛɔ kɛhaa mɛi krokomɛi