Yitso 21

Yɛ Yesu Maŋ Kpee He lɛ Mli

ANYƐŊ aje miishɛɛ babaoo ni ana yɛ Nazaret beni Yesu ku esɛɛ kɛba emaŋ lɛ he ŋwane. Beni eshi kɛtee Yohane ŋɔɔ koni ebaptisi lɛ yɛ nɔ ni fa fioo fe afi ni eho lɛ mli lɛ, no mli lɛ ale Yesu akɛ kapintɛfonyo. Shi amrɔ nɛɛ ale lɛ yɛ maŋsɛɛ hei babaoo akɛ mɔ ko ni feɔ naakpɛɛ nii. Emaŋbii lɛ ahe miitswa shi ni amɛna lɛ ni eefee naakpɛɛ nibii nɛɛ ekomɛi yɛ amɛteŋ.

Bɔ ni amɛkpaa lɛ gbɛ amɛhaa lɛ mli bawa waa, beni Yesu tee amɛmaŋ kpee he lɛ mli, taakɛ efɔɔ feemɔ lɛ. Beni jamɔ he kpee lɛ yaa nɔ lɛ, ete shi koni ekane nii, ni akɛ gbalɔ Yesaia wolokpo lɛ ha lɛ. Kɛkɛ ni etao he ni wieɔ Mɔ ni Yehowa mumɔ lɛ efɔ lɛ mu lɛ he sane, ni ŋmɛnɛ eyɔɔ wɔ Biblia lɛ mli yɛ yitso 61 lɛ.

Yɛ be mli ni ekane bɔ ni nɛkɛ Mɔ nɛɛ baashiɛ heyeli eha nomii lɛ, kɛ hiŋmɛigbelemɔ eha shwilafoi, kɛ afi ko ni sa Yehowa hiɛ lɛ he sane lɛ sɛɛ lɛ, Yesu kɛ wolokpo lɛ ku sɛɛ eha sɔɔlɔ lɛ ni eta shi. Agbɛnɛ mɔ fɛɛ mɔ hiŋmɛi jwere enɔ ni amɛmiikwɛ lɛ. Kɛkɛ ni ewie, ekolɛ yɛ be kakadaŋŋ mli, ni etsɔɔ mli akɛ: “Ŋmɛnɛ, ŋmalɛ nɛɛ eba mli yɛ nyɛtoiiaŋ.”

Gbɔmɛi lɛ anaa kpɛ amɛhe yɛ “duromɔ-wiemɔi” ni jɛ enaa nɛɛ hewɔ ni amɛkɛɛkɛɛ amɛhe akɛ: “Ani jeee Yosef bi lɛ nɛ?” Shi akɛni Yesu le akɛ amɛmiikpa lɛ gbɛ ni efee naakpɛɛ nii hewɔ lɛ, etee nɔ akɛ: “Be fiaa be ni fee lɛ nyɛaaŋɔ nɛkɛ abɛ nɛɛ nyɛbu mi akɛ: ‘Tsofatsɛ, tsa bo diɛŋtsɛ ohe! Nii abɔ ni wɔnu akɛ ofee yɛ Kapernaum lɛ, feemɔ yɛ biɛ ni ji omaŋ lɛŋ hu.’ ” Ŋwanejee ko bɛ he akɛ, Yesu tsutsu nanemɛi lɛ nuɔ he akɛ esa akɛ tsamɔ lɛ aje shishi yɛ emaŋ, koni lɛ diɛŋtsɛ emaŋbii lɛ tsutsu ana he sɛɛ. No hewɔ lɛ amɛnuɔ he akɛ Yesu eshishiu amɛ.

Ni Yesu na bɔ ni amɛsusuɔ nii ahe amɛhaa nɛɛ, egba amɛ blema sane ko ni kɔɔ enɛ he. Ekɛɛ amɛ akɛ, Elia bei amli lɛ, no mli lɛ yei okulafoi pii yɛ Israel, shi ahaaa Elia aya mɛnɛɛmɛi ateŋ mɔ ko ŋɔɔ. Shi moŋ, etee yoo okulafo ko ni jeee Israel yoo ko ŋɔɔ yɛ Sidon, ni jɛmɛ ni eyatsu naakpɛɛ yiwalaheremɔ nitsumɔ ko yɛ. Ni yɛ Elisha gbii lɛ amli hu lɛ, no mli lɛ kpitiyelɔi pii yɛ, shi Elisha ha Naeman ni jɛ Siria lɛ pɛ he tse.

Akɛni nɛkɛ yinɔsane mli saji ni eŋɔɔɔ amɛnaa ni ekɛto he nɛɛ ha amɛ hiɛjoomɔ kɛ hemɔkɛyeli ni amɛbɛ lɛ je kpo ni edɔ amɛ waa hewɔ lɛ, mɛi ni yɔɔ kpee he lɛ te shi ni amɛtsirɛ lɛ kɛjɛ maŋ lɛ mli kɛje kpo. Beni amɛkɛ lɛ shɛ gɔŋ ni Nazaret maŋ lɛ yɔɔ nɔ lɛ naabu lɛ, amɛbɔ mɔdɛŋ ni amɛtsi eyisɛɛ kɛwo jɔɔ lɛ mli. Shi Yesu je amɛdɛŋ ni eshi amɛ etee shweshweeshwe. Luka 4:16-30; 1 Maŋtsɛmɛi 17:8-16; 2 Maŋtsɛmɛi 5:8-14.

▪ Mɛni hewɔ mɛi lɛ na miishɛɛ waa yɛ Nazaret lɛ?

▪ Mɛni gbɔmɛi lɛ susu yɛ Yesu wiemɔ lɛ he, shi kɛlɛ mɛni ha amɛmli fu waa nakai lɛ?

▪ Mɛni gbɔmɛi lɛ bɔ mɔdɛŋ ni amɛfee Yesu?