Yitso Nyɔŋmai Enyɔ Kɛ Enyɔ
Jalɛ Nifeemɔ Miifrɔke yɛ Zion
1, 2. Mɛɛ tsakemɔ ko etsɛŋ ni Israel baaná, ni namɔ baaha enɛ aba?
HA ASHIƐ heyeli! Yehowa ekpɛ eyiŋ akɛ ebaaha ewebii aye amɛhe ní ekɛ amɛ aku sɛɛ kɛba amɛblematsɛmɛi ashikpɔŋ lɛ nɔ ekoŋŋ. Bɔ ni dumɔwu kwɛ̃ɔ kɛji nugbɔ nɛ fioo eshwie nɔ lɛ, nakai anɔkwa jamɔ hu baapue shikome ekoŋŋ. Kɛ́ nakai gbi lɛ shɛ lɛ, yijiemɔ kɛ miishɛɛ baaye nijiaŋwujee najiaŋ, ni yitsei ní tsutsu ko lɛ akɛ awerɛhoyeli lamulu eshwie nɔ lɛ baabumɔ akekerei ni ji ŋwɛi nɔkpɛlɛmɔ.
2 Namɔ baaha tsakemɔ ni yɔɔ naakpɛɛ nɛɛ aba? Yehowa pɛ baanyɛ afee nɔ ko ní tamɔ nɛkɛ. (Lala 9:20, 21; Yesaia 40:25) Gbalɔ Zefania kɛ famɔ ha yɛ gbalɛ wiemɔ mli akɛ: “Lá nyamɔ lala, Zion biyoo! Bɔɔ oshe, Israel! Nya ni omli afilio kɛ otsui fɛɛ, Yerusalem biyoo! Yehowa ejie okojomɔi lɛ kɛtee.” (Zefania 3:14, 15) Mɛɛ miishɛɛ be po eeeji nɛkɛ! Kɛ́ Yehowa bua shwɛɛnii ní jɛ Babilon lɛ anaa ní ekɛ amɛ ku sɛɛ kɛba amɛshikpɔŋ nɔ ekoŋŋ yɛ afi 537 D.Ŋ.B. lɛ, ebaafee tamɔ lamɔ ko ní eba mli.—Lala 126:1.
3. Mɛɛ mlibaai Yesaia yitso 61 lɛ mli wiemɔi lɛ yɔɔ?
3 Agba nɛkɛ sɛɛkuu nɛɛ he sane afɔ̃ shi yɛ Yesaia yitso 61 lɛ. Ni kɛlɛ, eyɛ faŋŋ akɛ nakai gbalɛ lɛ ba mli yɛ afi 537 D.Ŋ.B. moŋ, shi eba mli yɛ gbɛ ní da nɔ yɛ sɛɛ mli. Emlibaa ní mli lɛɛ lɛ kɔɔ Yesu kɛ esɛɛnyiɛlɔi lɛ ahe yɛ klɛŋklɛŋ afii oha lɛ mli, kɛ Yehowa webii ahe yɛ ŋmɛnɛŋmɛnɛ beaŋ. Belɛ, kwɛ bɔ ni shishinumɔ yɔɔ wiemɔi ní jɛ mumɔŋ nɛɛ amli!
“Duromɔ Afi”
4. Namɔ akɛ nitsumɔ wo edɛŋ akɛ eshiɛ sanekpakpa lɛ yɛ Yesaia 61:1 lɛ klɛŋklɛŋ mlibaa lɛ mli, ni namɔ tsu enɛ yɛ nɔ ni ji enyɔ lɛ mli?
4 Yesaia ŋma akɛ: “Nuntsɔ Yehowa Mumɔ lɛ yɛ minɔ, ejaakɛ Yehowa efɔ mi mu, koni mishiɛ sanekpakpa lɛ mitsɔɔ ohiafoi; etsu mi koni mibatsá mɛi ni amɛtsuii ekumɔ lɛ, ní mijaje heyeli mitsɔɔ nomi lɛ, ní mijaje gbelemɔ mitsɔɔ mɛi ní awo amɛ tsuŋ lɛ.” (Yesaia 61:1) Namɔ ji mɔ ni akɛ nitsumɔ ewo edɛŋ ní eshiɛ sanekpakpa lɛ? Eeenyɛ efee akɛ, klɛŋklɛŋ kwraa lɛ, lɛ ji Yesaia, mɔ ni Nyɔŋmɔ kɛ mumɔ tsirɛ lɛ ní eŋma sanekpakpa eha nomii ni yɔɔ Babilon lɛ. Shi kɛlɛ, Yesu gbala jwɛŋmɔ kɛtee emlibaa ní he hiaa fe fɛɛ lɛ nɔ beni ekɛ Yesaia wiemɔi lɛ to lɛ diɛŋtsɛ ehe lɛ. (Luka 4:16-21) Hɛɛ, atsu Yesu kɛba koni ebashiɛ sanekpakpa etsɔɔ heshibalɔi lɛ, ni enɛ hewɔ lɛ akɛ mumɔ krɔŋkrɔŋ lɛ fɔ lɛ mu yɛ ebaptisimɔ be lɛ mli.—Mateo 3:16, 17.
5. Namɛi etee nɔ amɛshiɛ sanekpakpa lɛ aaafee afii 2,000 sɔŋŋ nɛ lɛ?
5 Kɛfata he lɛ, Yesu tsɔɔ esɛɛnyiɛlɔi lɛ ní amɛfee sanekpakpa jajelɔi, loo sanekpakpa lɛ shiɛlɔi. Yɛ Pentekoste afi 33 Ŋ.B. lɛ, akɛ mumɔ krɔŋkrɔŋ fɔ mɛnɛɛmɛi ateŋ mɛi aaafee 120 mu ni amɛbatsɔmɔ Nyɔŋmɔ mumɔŋ bii. (Bɔfoi lɛ Asaji 2:1-4, 14-42; Romabii 8:14-16) Amɛ hu akɛ nitsumɔ wo amɛdɛŋ akɛ amɛshiɛ sanekpakpa lɛ amɛtsɔɔ heshibalɔi lɛ kɛ mɛi ní amɛtsuii ekumɔ lɛ. Nakai mɛi 120 lɛ ji 144,000 lɛ ateŋ mɛi ní afɔ amɛ mu klɛŋklɛŋ yɛ nɛkɛ gbɛ nɔ. Kuu nɛɛ mli shwɛɛnii lɛ kɛ ekãa miitsu nii yɛ shikpɔŋ nɔ lolo ŋmɛnɛ. No hewɔ lɛ, aaafee afii 2,000 sɔŋŋ nɛ ní Yesu sɛɛnyiɛlɔi ní afɔ amɛ mu lɛ etee nɔ amɛye “tsuitsakemɔ kɛ Nyɔŋmɔ hamɔ kɛ wɔ-Nuntsɔ Yesu Kristo nɔ hemɔkɛyeli lɛ he odase.”—Bɔfoi lɛ Asaji 20:21.
6. Namɛi ná hejɔɔmɔ kɛjɛ sanekpakpa ní ashiɛ yɛ blema beaŋ ní amɛnu lɛ mli, ni namɛi náa nakai hejɔɔmɔ lɛ ŋmɛnɛ?
6 Yesaia shɛɛ sane ní jɛ mumɔŋ lɛ ha Yudafoi ní etsake amɛtsui, ní amɛyɔɔ Babilon lɛ ná hejɔɔmɔ. Yɛ Yesu kɛ ekaselɔi lɛ agbii lɛ amli lɛ, eha Yudafoi ní amɛtsuii ekumɔ yɛ nibii fɔji ní afeɔ yɛ Israel lɛ ahewɔ, ní amɛyɔɔ klɛŋklɛŋ afii oha lɛ mli Yudafoi lɛ apasa jamɔ mli blema saji lɛ anomŋɔɔ mli lɛ ná hejɔɔmɔ. (Mateo 15:3-6) Ŋmɛnɛ, gbɔmɛi akpekpei abɔ ní Kristendom wɔŋjamɔ kusumii kɛ blema saji ní gbeɔ Nyɔŋmɔ he guɔ lɛ edũ amɛ lɛ ‘miidɔmɔ ŋtsɔi ni amɛmiiye ŋkɔmɔ’ yɛ nihii nii ní afeɔ yɛ nakai jamɔ gbɛjianɔtoo lɛ mli lɛ hewɔ. (Ezekiel 9:4) Akpɔ̃ɔ mɛi ní boɔ sanekpakpa lɛ toi lɛ kɛjɛɔ nakai shihilɛ ní yɔɔ mɔbɔ lɛ mli. (Mateo 9:35-38) Kɛ́ amɛbale bɔ ni ajáa Yehowa “yɛ mumɔ kɛ anɔkwale mli” lɛ, ehaa amɛ niiashishinumɔ hiŋmɛii gbeleɔ ni amɛnaa nii jogbaŋŋ.—Yohane 4:24.
7, 8. (a) Mɛni ji “duromɔ afi” lɛ mlibaai enyɔ lɛ? (b) Mɛni ji Yehowa “oweletɔɔ gbi” lɛ mlibaai enyɔ lɛ?
7 Be he gbɛjianɔtoo yɛ kɛha sanekpakpa lɛ shiɛmɔ. Akɛ nitsumɔ wo Yesu kɛ esɛɛnyiɛlɔi lɛ adɛŋ akɛ: “[Amɛshiɛ] Yehowa duromɔ afi kɛ wɔ-Nyɔŋmɔ lɛ oweletɔɔ gbi, ni [amɛshɛje] ŋkɔmɔyelɔi fɛɛ amii.” (Yesaia 61:2) Afi sɛɛ kɛ, shi eyɛ shishijee kɛ naagbee. Yehowa “duromɔ afi” lɛ ji be ní ehaa heshibalɔi lɛ hegbɛ ní amɛkɛhere esane jajemɔ ní kɔɔ heyeli he lɛ nɔ.
8 Yɛ klɛŋklɛŋ afii oha lɛ mli lɛ, duromɔ afi kɛha Yudafoi amaŋ lɛ je shishi yɛ afi 29 Ŋ.B. beni Yesu je eshikpɔŋ nɔ sɔɔmɔ nitsumɔ lɛ shishi lɛ. Ekɛɛ Yudafoi lɛ akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ!” (Mateo 4:17) Nakai duromɔ afi lɛ sɛɛ tsɛ aahu kɛyashi Yehowa “oweletɔɔ gbi,” ní ba naagbee kwraa yɛ afi 70 Ŋ.B. beni Yehowa ŋmɛ Roma asraafoi lɛ gbɛ ní amɛbakpata Yerusalem kɛ esɔlemɔtsu lɛ hiɛ lɛ. (Mateo 24:3-22) Wɔ ní wɔyɔɔ ŋmɛnɛ lɛ hu yɛ duromɔ afi kroko mli, nɔ ni je shishi beni ato Nyɔŋmɔ Maŋtsɛyeli lɛ ama shi yɛ ŋwɛi yɛ afi 1914 lɛ. Nɛkɛ duromɔ afi nɛɛ baaba naagbee kɛ oweletɔɔ gbi kroko ní mli baalɛɛ kɛya hei babaoo beni Yehowa kɛ jeŋ nibii agbɛjianɔtoo nɛɛ fɛɛ hiɛkpatamɔ baaba yɛ ‘amanehulu kpeteŋkpele lɛ’ mli lɛ.—Mateo 24:21.
9. Namɛi náa Yehowa duromɔ afi lɛ he sɛɛ ŋmɛnɛ?
9 Namɛi náa Nyɔŋmɔ duromɔ afi lɛ he sɛɛ ŋmɛnɛ? Mɛi ní kpɛlɛɔ shɛɛ sane lɛ nɔ, ní amɛjieɔ heshibaa kpo, ní amɛkɛ ekãa fiɔ Nyɔŋmɔ Maŋtsɛyeli shiɛmɔ lɛ sɛɛ yɛ “jeŋmaji fɛɛ” mli lɛ. (Marko 13:10) Mɛnɛɛmɛi naa akɛ sanekpakpa lɛ kɛ miishɛjemɔ diɛŋtsɛ baa. Shi, etsɛŋ ni mɛi ní kpooɔ shɛɛ sane lɛ, ní amɛsumɔɔɔ ní amɛkɛ hegbɛ ní Yehowa duromɔ afi lɛ kɛha lɛ atsu nii lɛ, kɛ shihilɛ ni ji eweletɔɔ gbi lɛ baakpe diɛŋtsɛ.—2 Tesalonikabii 1:6-9.
Mumɔŋ Yibiiwoo ní Woɔ Nyɔŋmɔ Hiɛ Nyam
10. Te nitsumɔ wulu ní Yehowa tsu eha Yudafoi ní ku amɛsɛɛ kɛjɛ Babilon lɛ sa amɛhe eha tɛŋŋ?
10 Yudafoi ní ku amɛsɛɛ kɛjɛ Babilon lɛ yɔse akɛ Yehowa etsu nitsumɔ wulu diɛŋtsɛ eha amɛ. Awerɛho ní amɛyeɔ ákɛ nomii lɛ etsɔ mlifilimɔ kɛ yijiemɔ ejaakɛ amɛye amɛhe kwraa agbɛnɛ. Enɛ hewɔ lɛ, Yesaia tsu gbalɛ mli nitsumɔ ní akɛha lɛ lɛ, ni ji akɛ, “ní [eto] ní aha Zion ŋkɔmɔyelɔi lɛ wulamɔ nɔ̃ yɛ lamlu najiaŋ, kɛ mlifilimɔ mu yɛ ŋkɔmɔyeli najiaŋ, kɛ yijiemɔ atade yɛ mumɔ ni efee vii lɛ najiaŋ, koni atsɛ amɛ akɛ jalɛ tsei kɛ Yehowa ŋmɔ ni akɛaawo ehiɛ nyam.”—Yesaia 61:3.
11. Namɛi ná yiŋtoo kpakpa ní amɛaadamɔ nɔ amɛjie Yehowa yi yɛ klɛŋklɛŋ afii oha lɛ mli, yɛ nitsumɔ wulu ní etsu lɛ hewɔ?
11 Yɛ klɛŋklɛŋ afii oha lɛ mli lɛ, Yudafoi ní kpɛlɛ ní akpɔ̃ amɛ kɛjɛ apasa jamɔ nyɔŋyeli mli lɛ hu jie Nyɔŋmɔ yi yɛ nitsumɔ wulu ní etsu eha amɛ lɛ hewɔ. Akɛ “yijiemɔ atade” ye amɛmumɔ ní ekumɔ lɛ najiaŋ beni akpɔ̃ amɛ kɛjɛ maŋ ní egbo yɛ mumɔŋ lɛ mli lɛ. Yesu kaselɔi lɛ ji mɛi ní ná tsakemɔ ní tamɔ nɛkɛ mli niiashikpamɔ klɛŋklɛŋ, beni awerɛho ní amɛyeɔ yɛ egbele lɛ hewɔ lɛ tsake kɛbatsɔ mlifilimɔ beni amɛ-Nuntsɔ ní atee lɛ shi lɛ kɛ mumɔ krɔŋkrɔŋ fɔ amɛ mu lɛ. Yɛ no sɛɛ nɔŋŋ lɛ, heshibalɔi aŋkroaŋkroi 3,000 ní here nakai Kristofoi ní afɔ amɛ mu ehee lɛ ashiɛmɔ lɛ nɔ lɛ, ná tsakemɔ ko ní tamɔ nakai mli niiashikpamɔ, ni abaptisi amɛ yɛ Pentekoste afi 33 Ŋ.B. (Bɔfoi lɛ Asaji 2:41) Kwɛ bɔ ni ehi jogbaŋŋ akɛ amɛná Yehowa jɔɔmɔ mli hekɛnɔfɔɔ! Yɛ nɔ najiaŋ ní ‘amɛaaye Zion he ŋkɔmɔ’ lɛ, amɛná mumɔ krɔŋkrɔŋ, ni “mlifilimɔ mu,” ní feɔ bɔ ni mɛi ní Yehowa ejɔɔ amɛ lɛ amli filiɔ amɛ haa lɛ he mfoniri lɛ, ha amɛ hewalɛ hee.—Hebribii 1:9.
12, 13. (a) Namɛi ji “jalɛ tsei” wuji lɛ yɛ Yudafoi ní ku amɛsɛɛ yɛ afi 537 D.Ŋ.B. lɛ ateŋ? (b) Namɛi efee “jalɛ tsei” wuji lɛ kɛjɛ Pentekoste afi 33 Ŋ.B. kɛbaa?
12 Yehowa kɛ “jalɛ tsei” wuji jɔɔ ewebii lɛ. Namɛi ji nɛkɛ tsei wuji nɛɛ? Yɛ afii ní nyiɛ afi 537 D.Ŋ.B. sɛɛ lɛ amli lɛ, no mli lɛ amɛji aŋkroaŋkroi ní kase Nyɔŋmɔ Wiemɔ lɛ ní amɛjwɛŋ nɔ, ní amɛná Yehowa jalɛ tɛi ní efolɔ eshwie shi lɛ yɛ amɛshihilɛ mli lɛ. (Lala 1:1-3; Yesaia 44:2-4; Yeremia 17:7, 8) Hii tamɔ Ezra, Hagai, Zakaria, kɛ Osɔfonukpa Yoshua jie amɛhe kpo akɛ “tsei” wuji ní sa kadimɔ—mɛi ní damɔ shi shiŋŋ kɛha anɔkwale, ní amɛteɔ shi amɛwoɔ mumɔŋ fitemɔ yɛ maŋ lɛ mli.
13 Kɛjɛ Pentekoste afi 33 Ŋ.B. kɛbaa lɛ, Nyɔŋmɔ dũ “jalɛ tsei” wuji ní tamɔ nakai nɔŋŋ—ni ji Kristofoi ní afɔ amɛ mu ni amɛyɔɔ ekãa—yɛ emaŋ hee, ni ji “Nyɔŋmɔ Israel lɛ” mumɔŋ shihilɛ lɛ mli. (Galatabii 6:16) Beni afii ohai abɔ lɛ hoɔ lɛ, nɛkɛ “tsei” nɛɛ ayifalɛ bashɛ 144,000, ni amɛwoɔ jalɛ yibii ní woɔ Yehowa Nyɔŋmɔ hiɛ nyam, loo ekɛ anunyam haa lɛ. (Kpojiemɔ 14:3) Nɛkɛ “tsei” wuji fɛfɛji nɛɛ ateŋ naagbee bii lɛ shwere yɛ afii ní nyiɛ afi 1919 sɛɛ lɛ amli, beni Yehowa kanya Nyɔŋmɔ Israel lɛ ateŋ shwɛɛnii lɛ kɛjɛ shihilɛ be kukuoo ní amɛtsuuu nii lɛ mli lɛ. Yɛ mumɔŋ nui ní Yehowa eha amɛná babaoo lɛ hewɔ lɛ, eha amɛtsɔ tamɔ koo ní jalɛ tsei ní woɔ yibii babaoo kwɛ̃ɔ yɛ mli.—Yesaia 27:6.
14, 15. Mɛɛ nitsumɔi Yehowa jálɔi ní aŋmɛɛ amɛhe lɛ kɛ amɛhe wo mli kɛjɛ afi (a) 537 D.Ŋ.B.? (b) 33 Ŋ.B.? (d) 1919 kɛbaa?
14 Beni Yesaia maa “tsei” nɛɛ anitsumɔ lɛ nɔ mi lɛ, etee nɔ akɛ: “Amɛaatswa blema tsũ koi lɛ, ni amɛaasaa tsutsu bii lɛ amaŋfɔi lɛ, ni amɛaato maji ni efite lɛ ehee ekoŋŋ, ni ji yinɔi pii anɔ amaŋfɔi lɛ.” (Yesaia 61:4) Yɛ akpɔ ní Persia Maŋtsɛ Koresh wo lɛ naa lɛ, Yudafoi anɔkwafoi ní ku amɛsɛɛ kɛjɛ Babilon lɛ yasaa amɛtswa Yerusalem kɛ esɔlemɔtsu ní ashi afɔ̃ shi amaŋfɔ yɛ be kakadaŋŋ mli lɛ ekoŋŋ. Nibii asaamɔ nitsumɔi hu baakadi afii ní nyiɛ afi 33 Ŋ.B. kɛ afi 1919 sɛɛ lɛ.
15 Yɛ afi 33 Ŋ.B. lɛ, Yesu mɔmɔ, kɛ ekojomɔ, kɛ egbele lɛ ha ekaselɔi lɛ ye awerɛho waa. (Mateo 26:31) Shi, amɛshihilɛ nɛɛ tsake beni ejie ehe kpo etsɔɔ amɛ yɛ eshitee lɛ sɛɛ lɛ. Ni beni afɔse mumɔ krɔŋkrɔŋ lɛ ashwie amɛnɔ sɛɛ lɛ, amɛkɛ ekãa wo sanekpakpa shiɛmɔ nitsumɔ lɛ mli kɛ amɛdekã fɛɛ, “yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.” (Bɔfoi lɛ Asaji 1:8) Enɛ hewɔ lɛ amɛbɔi jamɔ krɔŋŋ tswaa kɛ shimaa ekoŋŋ. Yɛ nakai gbɛ nɔ nɔŋŋ lɛ, kɛjɛ afi 1919 kɛbaa lɛ, Yesu Kristo ha enyɛmimɛi ní afɔ amɛ mu lɛ ateŋ shwɛɛnii lɛ saa amɛtswa “yinɔi pii anɔ amaŋfɔi lɛ.” Afii ohai abɔ eho ní Kristendom osɔfoi lɛ nyɛko amɛha aná Yehowa he nilee, ni amɛkɛ adesai ablema saji kɛ tsɔɔmɔi ni damɔɔɔ ŋmalɛ nɔ moŋ eye najiaŋ. Kristofoi ni afɔ amɛ mu lɛ jie nifeemɔi ní anaa apasa jamɔ he okadii yɛ mli lɛ fɛɛ kɛjɛ amɛ asafoi lɛ amli bɔni afee ní anɔkwa jamɔ ní atoɔ amaa shi ekoŋŋ lɛ anyɛ aya hiɛ. Ni amɛje nɔ ni bafee odaseyeli he tafãa kpeteŋkpele fe fɛɛ ní je lɛ ena dã lɛ shishi.—Marko 13:10.
16. Namɛi etee nɔ amɛye amɛbua Kristofoi ní afɔ amɛ mu lɛ yɛ amɛ saamɔ nitsumɔ lɛ mli, ni mɛɛ nitsumɔi akɛwo amɛdɛŋ?
16 Enɛ fee nitsumɔ kpele diɛŋtsɛ. Te Nyɔŋmɔ Israel lɛ ateŋ shwɛɛnii fioo ni yɔɔ lɛ aaafee tɛŋŋ amɛtsu nitsumɔ ní tamɔ nɛkɛ hu? Yehowa kɛ mumɔ tsirɛ Yesaia ni ejaje akɛ: “Maŋsɛɛbii aaadamɔ shi ni amɛaalɛ̀ nyɛtooi lɛ, ni mɛikpɔ̃ji aaatsɔmɔ nyɛhulɔi kɛ nyɛweintromsaalɔi.” (Yesaia 61:5) Mfonirifeemɔŋ maŋsɛɛbii kɛ mɛikpɔ̃ji lɛ ebajie amɛhe kpo faŋŋ akɛ “asafo babaoo” ni ji Yesu “tooi krokomɛi” lɛ.a (Kpojiemɔ 7:9; Yohane 10:11, 16) Akɛ mumɔ krɔŋkrɔŋ efɔko amɛ mu kɛha ŋwɛi gboshinii namɔ. Shi moŋ, amɛyɛ hiɛnɔkamɔ akɛ amɛbaaná naanɔ wala yɛ paradeiso shikpɔŋ nɔ. (Kpojiemɔ 21:3, 4) Shi kɛlɛ, amɛsumɔɔ Yehowa, ni akɛ mumɔŋ tooi alɛ̀ɛ, kɛ humɔ, kɛ weintrom saamɔ nitsumɔi ewo amɛdɛŋ. Nɛkɛ nitsumɔi nɛɛ jeee nitsumɔi ní baa shi. Nɛkɛ nitsulɔi nɛɛ yeɔ buaa yɛ Nyɔŋmɔ Israel lɛ ateŋ shwɛɛnii ní yɔɔ lɛ agbɛtsɔɔmɔ shishi, yɛ gbɔmɛi anɔkwɛmɔ, amɛtsɔsemɔ, kɛ amɛnaabuamɔ mli.—Luka 10:2; Bɔfoi lɛ Asaji 20:28; 1 Petro 5:2; Kpojiemɔ 14:15, 16.
17. (a) Te abaatsɛ Nyɔŋmɔ Israel mli bii lɛ aha tɛŋŋ? (b) Mɛni ji afɔleshaa pɛ ní he hiaa kɛha eshaifaa?
17 Ni Nyɔŋmɔ Israel lɛ hu? Yehowa tsɔ Yesaia nɔ ekɛɛ amɛ akɛ: “Nyɛ lɛ, aaatsɛ́ nyɛ Yehowa osɔfoi, ni aaakɛɛ nyɛ akɛ: Wɔ-Nyɔŋmɔ lɛ sɔɔlɔi ji nyɛ; nyɛaaye jeŋmaji lɛ anii, ni amɛnunyam lɛ aaatsɔ nyɛnɔ̃.” (Yesaia 61:6) Yɛ blema Israel lɛ, Yehowa kɛ Levibii osɔfoyeli gbɛjianɔtoo lɛ ha koni amɛshã afɔlei amɛha osɔfoi lɛ diɛŋtsɛ kɛ amɛnanemɛi Israelbii lɛ hu. Shi, yɛ afi 33 Ŋ.B. lɛ, Yehowa kɛ Levibii osɔfoyeli gbɛjianɔtoo lɛ kpa nitsumɔ ni eje gbɛjianɔtoo ko ní hi fe no shishi. Ekpɛlɛ Yesu wala ní eye emuu lɛ nɔ ákɛ afɔleshaa kɛha adesai ahe eshai. Kɛjɛ no nɔ kɛbaa nɛɛ, afɔleshaa kroko he ehiaaa dɔŋŋ. Yesu afɔleshaa lɛ yɛ hewalɛ kɛmiiya naanɔ.—Yohane 14:6; Kolosebii 2:13, 14; Hebribii 9:11-14, 24.
18. Mɛɛ osɔfoyeli gbɛjianɔtoo Nyɔŋmɔ Israel lɛ feɔ, ni mɛɛ nitsumɔ akɛwo amɛdɛŋ akɛ amɛtsu?
18 Belɛ, Nyɔŋmɔ Israel mli bii lɛ ji “Yehowa osɔfoi” yɛ mɛɛ gbɛ nɔ mɔ? Beni bɔfo Petro ŋmaa wolo eyaha enanemɛi Kristofoi ní afɔ amɛ mu lɛ, ekɛɛ akɛ: “Nyɛ lɛ, weku ní ahala ji nyɛ, maŋtsɛmɛi ní yeɔ osɔfoi, jeŋmaŋ krɔŋkrɔŋ, maŋ ní eŋɔfee enɔ̃, koni nyɛjaje mɔ ni tsɛ́ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.” (1 Petro 2:9) No hewɔ lɛ, ákɛ kuu lɛ, Kristofoi ní afɔ amɛ mu lɛ feɔ osɔfoyeli gbɛjianɔtoo ní akɛ nitsumɔ pɔtɛɛ ko ewo amɛdɛŋ: no ji, ní amɛwie Yehowa anunyam lɛ he amɛtsɔɔ jeŋmaji lɛ. Esa akɛ amɛfee edasefoi. (Yesaia 43:10-12) Kristofoi ní afɔ amɛ mu lɛ kɛ anɔkwayeli etsu nitsumɔ ní he hiaa waa nɛɛ, yɛ naagbee gbii lɛ amli fɛɛ. Nɔ ni ejɛ mli eba ji akɛ, amrɔ nɛɛ gbɔmɛi akpekpei abɔ fataa amɛhe yɛ Yehowa Maŋtsɛyeli lɛ he odaseyeli nitsumɔ lɛ mli.
19. Mɛɛ sɔɔmɔ Kristofoi ní afɔ amɛ mu lɛ baaná hegbɛ akɛ amɛkɛaaha?
19 Kɛfata he lɛ, Nyɔŋmɔ Israel mli bii lɛ yɛ gbɛkpamɔ akɛ amɛaasɔmɔ akɛ osɔfoi yɛ gbɛ kroko hu nɔ. Yɛ amɛgbele sɛɛ lɛ, ateeɔ amɛ shi kɛyaa mumɔŋ wala ní gbele bɛ mli lɛ mli yɛ ŋwɛi. Amɛsɔmɔɔ yɛ jɛmɛ, jeee akɛ Yesu hefatalɔi nɔyelɔi yɛ e-Maŋtsɛyeli lɛ mli kɛkɛ, shi moŋ ákɛ Nyɔŋmɔ osɔfoi hu. (Kpojiemɔ 5:10; 20:6) No hewɔ lɛ, amɛbaaná hegbɛ akɛ amɛkɛ Yesu kpɔmɔ afɔleshaa lɛ mli sɛɛnamɔi lɛ baatsu adesai anɔkwafoi lɛ ahe nii yɛ shikpɔŋ nɔ. Awie amɛhe yɛ bɔfo Yohane ninaa ní aŋma yɛ Kpojiemɔ yitso 22 lɛ mli lɛ hu akɛ “tsei.” Ana “tsei” 144,000 lɛ fɛɛ yɛ ŋwɛi, ni amɛwoɔ “yibii shii nyɔŋma kɛ enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibaai lɛ akɛtsaa jeŋmaji lɛ.” (Kpojiemɔ 22:1, 2) Mɛɛ osɔfoyeli gbɛjianɔtoo ní yɔɔ naakpɛɛ po nɛ!
Hiɛgbele kɛ Hiɛshishwiemɔ, No Sɛɛ lɛ Mlifilimɔ
20. Yɛ shitee-kɛ-woo fɛɛ sɛɛ lɛ, mɛɛ jɔɔmɔ maŋtsɛmɛi ní yeɔ osɔfoi lɛ mɛɔ?
20 Kɛjɛ afi 1914 beni Yehowa duromɔ afi lɛ je shishi lɛ kɛbaa nɛɛ, maŋtsɛmɛi ní yeɔ osɔfoi lɛ etee nɔ amɛkɛ shitee-kɛ-woo ní jɛ Kristendom osɔfoi lɛ aŋɔɔ ekpe aahu. (Kpojiemɔ 12:17) Shi kɛlɛ, mɔdɛŋ fɛɛ ní amɛbɔɔ ní amɛtsĩ sanekpakpa shiɛmɔ nitsumɔ lɛ naa lɛ yeee omanye. Yesaia gbalɛ lɛ gba enɛ efɔ̃ shi, ni ekɛɛ: “Nyɛ hiɛgbele lɛ najiaŋ lɛ aaaku abɔ he toi enyɔ aha nyɛ, ni hiɛshishwiemɔ lɛ najiaŋ lɛ amɛaalá nyamɔ lala yɛ amɛgbɛfaŋnɔ lɛ hewɔ; no hewɔ lɛ amɛaaná toi enyɔ yɛ amɛshikpɔŋ lɛ nɔ, ni naanɔ miishɛɛ aaaŋɔha amɛ.”—Yesaia 61:7.
21. Kristofoi ní afɔ amɛ mu lɛ baná jɔɔmɔi toi enyɔ mli ŋɔɔmɔ yɛ mɛɛ gbɛ nɔ?
21 Yɛ Jeŋ Ta 1 mli lɛ, Kristendom ní sumɔɔ maŋhedɔɔ lɛ kɛ hiɛgbele kɛ hiɛshishwiemɔ ba shwɛɛnii ní afɔ amɛ mu lɛ anɔ. Osɔfoi lɛ ateŋ mɛi komɛi fata mɛi ni kɛ maŋjwaa he amale naafolɔmɔi shi nyɛmimɛi hii anɔkwafoi kpaanyɔ ní jɛ nitsumɔhe yitso lɛ yɛ Brooklyn lɛ ahe. Awo nyɛmimɛi hii nɛɛ atsuŋ nyɔji nɛɛhu yɛ gbɛ ní ejaaa nɔ. Yɛ naagbee lɛ, yɛ afi 1919 agbiɛnaa be mli lɛ, aŋmɛɛ amɛhe, ni sɛɛ mli lɛ ajie naafolɔmɔi ní akɛshi amɛ lɛ fɛɛ kwraa. Enɛ hewɔ lɛ, ŋaa ní atsɔ koni akɛtsĩ shiɛmɔ nitsumɔ lɛ naa lɛ fite. Yɛ nɔ najiaŋ ní Yehowa aaaŋmɛ gbɛ ní hiɛgbele ní sɛɛ tsɛɔ aba ejálɔi lɛ anɔ lɛ, ekpɔ̃ amɛ ni ekɛ amɛ ku sɛɛ kɛba amɛmumɔŋ shihilɛ, ni ji “amɛshikpɔŋ” lɛ nɔ ekoŋŋ. Amɛbaná jɔɔmɔi toi enyɔ yɛ jɛmɛ. Yehowa jɔɔmɔi ní amɛbaná lɛ bafee najiaŋtoo nɔ̃ babaoo kɛha amanehului fɛɛ ní eba amɛnɔ lɛ. Lɛɛlɛŋ, amɛyɛ nɔ ni amɛaadamɔ nɔ amɛlá nyamɔ lala!
22, 23. Kristofoi ní afɔ amɛ mu lɛ ekase Yehowa yɛ mɛɛ gbɛ nɔ, ni mɛɛ nyɔmɔwoo ekɛha amɛ?
22 Nɔ ni Yehowa wie kɛnyiɛ sɛɛ lɛ haa Kristofoi náa yiŋtoo kroko ní amɛaadamɔ nɔ amɛmli afili amɛ ŋmɛnɛ, akɛ: “Mi, Yehowa lɛ, misumɔɔ jalɛsaneyeli, minyɛɔ ojotswaa kɛ nɔshafeemɔ, ni mawo amɛ nyɔmɔ yɛ anɔkwale mli, ni mikɛ amɛ aaakpaŋ naanɔ kpaŋmɔ.” (Yesaia 61:8) Kɛtsɔ amɛ Biblia kasemɔ nɔ lɛ, shwɛɛnii ní afɔ amɛ mu lɛ baná suɔmɔ kɛha jalɛsaneyeli ni amɛnyɛ nɔshafeemɔ. (Abɛi 6:12-19; 11:20) Amɛbakase bɔ ni “amɛkɛ amɛklantei aaasɔ̃ kɔii,” ni amɛhi shi akɛ mɛi ní kɛ amɛhe wooo adesai atai kɛ maŋkwramɔŋ basabasafeemɔi amli. (Yesaia 2:4) Amɛ kpa nifeemɔi ní gbeɔ Nyɔŋmɔ he guɔ, tamɔ oshekuyeli, gbalafitemɔ, juu, kɛ dãatɔɔ hu fɛɛ kwraa.—Galatabii 5:19-21.
23 Akɛni Kristofoi ní afɔ amɛ mu lɛ kɛ suɔmɔ ní amɛ-Bɔlɔ lɛ yɔɔ kɛha jalɛsaneyeli lɛ kpãa gbee hewɔ lɛ, Yehowa ewo “amɛ nyɔmɔ yɛ anɔkwale mli.” ‘Nyɔmɔwoi’ nɛɛ ateŋ ekome ji naanɔ kpaŋmɔ ko—ni ji kpaŋmɔ hee—ní Yesu tswa he adafi etsɔɔ esɛɛnyiɛlɔi lɛ gbi gbɛkɛ ní tsɔ egbele lɛ hiɛ lɛ. Kpaŋmɔ nɛɛ ji nɔdaamɔ nɔ ní ha amɛbatsɔmɔ mumɔŋ maŋ, ni ji Nyɔŋmɔ webii krɛdɛɛ lɛ. (Yeremia 31:31-34; Luka 22:20) Yehowa kɛ Yesu kpɔmɔ afɔleshaa lɛ mli sɛɛnamɔi fɛɛ, ní eshaifaa ní mɛi ní afɔ amɛ mu lɛ kɛ adesai ateŋ anɔkwafoi krokomɛi fɛɛ náa lɛ fata he lɛ, baatsu nii yɛ nakai kpaŋmɔ lɛ shishi.
Nyamɔ yɛ Yehowa Dɛŋ Jɔɔmɔi Amli
24. Namɛi ní jɛ jeŋmaji lɛ ateŋ ji “seshi” ní ebaná jɔɔmɔ lɛ, ni amɛbatsɔmɔ “seshi” yɛ mɛɛ gbɛ nɔ?
24 Jeŋmaji lɛ amli bii lɛ ekomɛi eyɔse Yehowa jɔɔmɔi ní yɔɔ ewebii anɔ lɛ. Agba enɛ afɔ̃ shi kɛtsɔ Yehowa shiwoo nɛɛ nɔ akɛ: “Aaale amɛseshibii lɛ yɛ jeŋmaji lɛ ateŋ kɛ amɛshwieii hu yɛ majimaji lɛ ateŋ; mɛi fɛɛ ní aaana amɛ lɛ aaayoo amɛ akɛ amɛji seshi ní Yehowa ejɔɔ.” (Yesaia 61:9) Nyɔŋmɔ Israel lɛ mli bii, ni ji Kristofoi ní afɔ amɛ mu lɛ, kɛ ekãa etee nɔ etsu nii yɛ jeŋmaji lɛ ateŋ yɛ Yehowa duromɔ afi lɛ mli. Ŋmɛnɛ, mɛi ní ehere amɛ sɔɔmɔ nitsumɔ lɛ nɔ lɛ ayifalɛ shɛɔ akpekpei abɔ. Akɛni amɛkɛ Nyɔŋmɔ Israel lɛ feɔ ekome kɛtsuɔ nii hewɔ lɛ, gbɔmɛi ní jɛ jeŋmaji lɛ amli lɛ yɛ hegbɛ akɛ amɛaatsɔmɔ “seshi ní Yehowa ejɔɔ.” Adesai fɛɛ naa amɛshihilɛ ní miishɛɛ yɔɔ mli lɛ.
25, 26. Kristofoi fɛɛ jieɔ henumɔi ní atsɔɔ yɛ Yesaia 61:10 lɛ kpo yɛ mɛɛ gbɛ nɔ?
25 Kristofoi fɛɛ, ni ji mɛi ní afɔ amɛ mu lɛ kɛ tooi krokomɛi lɛ fɛɛ miikpa gbɛ akɛ amɛaajie Yehowa yi kɛya naanɔ. Amɛjɛɔ amɛtsui muu fɛɛ mli amɛkɛ gbalɔ Yesaia, mɔ ni wie enɛ yɛ mumɔ lɛ tsirɛmɔ naa lɛ kpãa gbee, akɛ: “Manya yɛ Yehowa mli, ni misusuma mli aaafili lɛ yɛ mi-Nyɔŋmɔ lɛ mli; ejaakɛ ewo mi yiwalaheremɔ atadei, ni ekɛ jalɛ mama ehà mi, tamɔ bɔ ni ayemforowu wulaa ehe kɛ osɔfo fai, loo bɔ ni ayemforo woɔ jwinei lɛ.”—Yesaia 61:10.
26 Akɛni akɛ “jalɛ mama” ehà amɛ hewɔ lɛ, Kristofoi ní afɔ amɛ mu lɛ etswa amɛfai shi akɛ amɛaahi krɔŋŋfeemɔ kɛ hetsemɔ mli yɛ Yehowa hiɛ. (2 Korintobii 11:1, 2) Akɛni Yehowa ebu amɛ jalɔi kɛ yiŋtoo akɛ amɛnine baashɛ ŋwɛi wala nɔ hewɔ lɛ, amɛkuŋ amɛsɛɛ kɛyaŋ Babilon Kpeteŋkpele lɛ shikpɔŋ ní etsɔ amaŋfɔ, ní akpɔ̃ amɛ kɛjɛ mli lɛ mli dɔŋŋ kɔkɔɔkɔ. (Romabii 5:9; 8:30) Yiwalaheremɔ atadei lɛ ajara wa waa kɛha amɛ. Amɛhefatalɔi ní ji tooi krokomɛi lɛ hu etswa amɛfai shi nakai nɔŋŋ akɛ amɛ hu amɛbaanyiɛ yɛ Yehowa Nyɔŋmɔ jamɔ krɔŋŋ he tɛi ní nɔ kwɔlɔ lɛ anaa. Akɛni “amɛfɔ́ amɛtadei lɛ ahe, ni amɛha eyɛ futaa yɛ toobi lɛ lá lɛ mli” hewɔ lɛ, abuɔ amɛ jalɔi, ni amɛbaaná yiwalaheremɔ kɛfo “amanehulu kpeteŋkpele lɛ.” (Kpojiemɔ 7:14; Yakobo 2:23, 25) Kɛyashi nakai be lɛ baashɛ lɛ, amɛkaseɔ amɛhefatalɔi ní afɔ amɛ mu lɛ, ni amɛtsiɔ amɛhe kɛjɛɔ Babilon Kpeteŋkpele lɛ he kwraa koni ekawo amɛhe muji.
27. (a) Yɛ Afii Akpe Nɔyeli lɛ mli lɛ, mɛɛ ‘nikwɛ̃ɛ’ ko ní sa kadimɔ waa baaba mli? (b) Jalɛ nifeemɔ miikwɛ̃ momo yɛ adesai ateŋ yɛ mɛɛ gbɛ nɔ?
27 Ŋmɛnɛ, Yehowa jálɔi amli filiɔ amɛ akɛ amɛyɛ mumɔŋ paradeiso mli. Etsɛŋ ni amɛbaaná Paradeiso diɛŋtsɛ hu mli ŋɔɔmɔ. Wɔkɛ wɔtsui muu fɛɛ miikpa nakai be, ní atsɔɔ mli fitsofitso diɛŋtsɛ yɛ Yesaia yitso 61 lɛ naagbee wiemɔi lɛ amli lɛ gbɛ waa, akɛ: “Taakɛ bɔ ni shikpɔŋ lɛ baa enii ní kwɛ̃ɔ lɛ, ní trom haa nii ní adũ yɛ mli lɛ kwɛ̃ɔ lɛ: nakai Nuntsɔ Yehowa aaaha jalɛ kɛ yijiemɔ akwɛ̃ yɛ jeŋmaji lɛ fɛɛ ahiɛ.” (Yesaia 61:11) Yɛ Kristo Afii Akpe Nɔyeli lɛ mli lɛ, shikpɔŋ lɛ baaná ‘jalɛ ní aaakwɛ̃’ lɛ mli niiashikpamɔ. Adesai aaabɔ oshe kɛ nyamɔ, ni jalɛ nifeemɔ mli baalɛɛ kɛyashi shikpɔŋ lɛ naagbeehei lɛ fɛɛ. (Yesaia 26:9) Shi kɛlɛ, ehe ehiaaa ní wɔmɛ nakai gbi ní yɔɔ nyam lɛ dani wɔkɛ yijiemɔ aha yɛ jeŋmaji lɛ fɛɛ ahiɛ. Amrɔ nɛɛ, jalɛ nifeemɔ miikwɛ̃ momo yɛ gbɔmɛi akpekpei abɔ ní kɛ anunyam haa ŋwɛi Nyɔŋmɔ lɛ, ní amɛshiɛɔ e-Maŋtsɛyeli lɛ he sanekpakpa lɛ amɛtsɔɔ lɛ ateŋ. Ni amrɔ nɛɛ po lɛ, wɔhemɔkɛyeli kɛ wɔhiɛnɔkamɔ lɛ haa wɔ yiŋtoo ní wɔɔdamɔ nɔ wɔnya yɛ wɔ-Nyɔŋmɔ lɛ dɛŋ jɔɔmɔi lɛ amli.
[Shishigbɛ niŋmaa]
a Yesaia 61:5 lɛ baanyɛ aná emlibaa yɛ blema beaŋ, akɛni mɛi ni amɛjeee Yudafoi lɛ fata heloonaa Yudafoi lɛ ahe kɛku amɛsɛɛ kɛtee Yerusalem ní ekolɛ amɛye amɛbua ní akɛsaa shikpɔŋ lɛ nɔ ekoŋŋ lɛ hewɔ. (Ezra 2:43-58) Shi, kɛjɛ kuku 6 lɛ kɛyaa lɛ, etamɔ nɔ ni gbalɛ lɛ kɔɔ Nyɔŋmɔ Israel lɛ pɛ he.
[Mfoniri ni yɔɔ baafa 323]
Yesaia hiɛ sanekpakpa ní ebaajaje etsɔɔ Yudafoi nomii lɛ
[Mfoniri ni yɔɔ baafa 331]
Kɛjɛ afi 33 Ŋ.B. kɛbaa nɛɛ, Yehowa edũ “jalɛ tsei” wuji 144,000
[Mfoniri ni yɔɔ baafa 334]
Jalɛ nifeemɔ baakwɛ̃ yɛ shikpɔŋ lɛ nɔ