Mɛni Hewɔ Yesu Kaselɔi lɛ Ehiii Ŋmaa Lɛ?

Be ni Yesu yaye afi 30 Ŋ.B. Hehoo lɛ sɛɛ lɛ, awo Yohane Baptisilɔ lɛ tsuŋ, ni ekã he eyɛ jɛmɛ. Yohane miitao ni ekaselɔi lɛ atsɔmɔ Yesu sɛɛnyiɛlɔi, shi jeee amɛ fɛɛ amɛfee nakai kɛjɛ be ni awo Yohane tsuŋ nyɔji komɛi nɛ lɛ.

Agbɛnɛ, be ni afi 31 Ŋ.B. Hehoo lɛ shɛɔ lɛ, Yohane kaselɔi lɛ ekomɛi ba Yesu ŋɔɔ amɛbabi lɛ akɛ: “Mɛni hewɔ wɔ kɛ Farisifoi lɛ fɔɔ ŋmaahilɛ shi okaselɔi lɛ ehiii ŋmaa lɛ?” (Mateo 9:14) Farisifoi lɛ hiɔ ŋmaa akɛni amɛjamɔ lɛ biɔ ni afee nakai lɛ hewɔ. Sɛɛ mli lɛ, Yesu gba nɔkwɛmɔnɔ ko ni tsɔɔ Farisifonyo ko ni buɔ ehe jalɔ ni sɔle akɛ: “Oo Nyɔŋmɔ, miida bo shi akɛ mitamɔɔɔ mɛi krokomɛi lɛ . . . Mihiɔ ŋmaa shii enyɔ daa otsi.” (Luka 18:11, 12) Eeenyɛ efee akɛ, Yohane kaselɔi lɛ hu hiɔ ŋmaa akɛni eji nɔ ko ni afɔɔ feemɔ lɛ hewɔ. Aloo ekolɛ, amɛhi ŋmaa akɛni amɛwerɛ eho amɛhe yɛ tsuŋ ni awo Yohane lɛ hewɔ. Agbɛnɛ hu, mɛi enaaa nɔ hewɔ ni Yesu kaselɔi lɛ ehiii ŋmaa lɛ, ekolɛ koni amɛfata Yohane kaselɔi lɛ ahe kɛye awerɛho yɛ nɔ ni eba Yohane nɔ lɛ hewɔ.

Yesu kɛ nɔkwɛmɔnɔ tsu nii kɛhã amɛ hetoo akɛ: “Ayemforo wu lɛ nanemɛi lɛ bɛ yiŋtoo hewɔ ni amɛaaye awerɛho, gbii abɔ ni ayemforo wu lɛ kɛ amɛ yɔɔ lɛ, aloo jeee nakai? Shi gbii baaba ni abaaŋɔ ayemforo wu lɛ kɛaaje amɛteŋ kɛya, ni no lɛ amɛbaahi ŋmaa.”​—Mateo 9:15.

Yohane diɛŋtsɛ wie Yesu he akɛ ayemforo wu. (Yohane 3:28, 29) Enɛ hewɔ lɛ, be mli ni Yesu yɔɔ shikpɔŋ lɛ nɔ lɛ, Yesu kaselɔi lɛ ehiii ŋmaa. Sɛɛ mli kɛ́ Yesu gbo lɛ, ekaselɔi lɛ baaye awerɛho ni efeŋ amɛ niyeli. Shi kwɛ bɔ ni shihilɛ lɛ baatsake kwraa kɛ́ atee lɛ shi lɛ! No lɛ, ehe ebahiaŋ ni amɛye awerɛho ni amɛhi ŋmaa dɔŋŋ.

No sɛɛ lɛ, Yesu kɛ nɔkwɛmɔnii enyɔ nɛɛ hã: “Mɔ ko mɔ ko kɛ mama hee taaa mama momo, ejaakɛ mama hee lɛ baatse kɛje mama momo lɛ he, ni no baahã egba fe tsutsu lɛ. Asaŋ aŋɔɔɔ wein hee awooo wein kotokui memeji amli. Kɛ́ afee nakai lɛ, wein kotokui lɛ baafɛlɛ ni wein lɛ baashwie shi, ni wein kotokui lɛ baafite. Shi akɛ wein hee woɔ wein kotokui hei amli.” (Mateo 9:16, 17) Mɛni Yesu tsɔɔ lɛ?

Yesu miiye eebua Yohane Baptisilɔ lɛ kaselɔi lɛ ni amɛna akɛ, esaaa akɛ mɔ ko kpaa gbɛ akɛ Yesu sɛɛnyiɛlɔi lɛ kɛ amɛhe baawo Yudafoi lɛ ajamɔŋ blema nifeemɔi amli, tamɔ ŋmaa ni ahiɔ yɛ kusum naa lɛ nɛkɛ. Yesu baaa ni ebasaa jamɔ momo ko, ní ehã ehi shi be kplaŋŋ, ejaakɛ etsɛŋ ni akɛ nakai gbɛjianɔtoo lɛ fɛɛ baakpa nitsumɔ. Jeee Yudafoi lɛ ajamɔ ni damɔ gbɔmɛi akusumii anɔ lɛ Yesu woɔ mɛi hewalɛ ni amɛkɛ amɛhe awo mli lɛ. Dabi, ekaaa akɛ ekɛ mama hee baata mama momo, ni asaŋ eŋɔɔɔ wein hee ewooo wein kotokui memeji ni eshɔ̃ keketee lɛ amli.