Yitso 34

Ebɔfoi lɛ Halamɔ

KƐJƐ be mli ni Yohane Baptisilɔ lɛ tsɛ Yesu akɛ Nyɔŋmɔ Toobi lɛ ni Yesu je emaŋ sɔɔmɔ nitsumɔ lɛ shishi lɛ eye afi kɛ fa. Yɛ nakai be lɛ mli lɛ, Andrea, Simon Petro, Yohane, kɛ ekolɛ Yakobo (Yohane nyɛminuu lɛ), kɛ Filipo kɛ Nathanael (ni atsɛɔ lɛ Bartolomeo hu) lɛ ji mɛi ni ebatsɔmɔ eklɛŋklɛŋ kaselɔi. Yɛ be ni sa mli lɛ, mɛi krokomɛi babaoo bafata amɛhe kɛnyiɛ Kristo sɛɛ.

Agbɛnɛ Yesu efee klalo akɛ ebaahala ebɔfoi lɛ. Mɛnɛɛmɛi baafee ehefatalɔi ni bɛŋkɛ lɛ kpaakpa ni ebaaha amɛ tsɔsemɔ krɛdɛɛ ko. Shi dani Yesu baahala amɛ lɛ, ekwɔ kɛtee gɔŋ ko nɔ ni eye jenamɔ muu fɛɛ yɛ jɛmɛ ni esɔle, eka shi faŋŋ akɛ eebi nilee kɛ Nyɔŋmɔ jɔɔmɔ. Beni je tsɛre lɛ, etsɛ ekaselɔi lɛ kɛba ni ehalɛ mɛi 12 kɛjɛ mli. Shi kɛlɛ, akɛni Yesu miitsɔɔ amɛ nii lolo hewɔ lɛ, atee nɔ atsɛ amɛ hu akɛ kaselɔi.

Mɛi ekpaa ni Yesu hala, ni atsi amɛgbɛii ata yɛ yiteŋ gbɛ lɛ ji mɛi ni bafee eklɛŋklɛŋ kaselɔi lɛ. Ahala Mateo, mɔ ni Yesu tsɛ lɛ kɛjɛ etoohemɔ nitsumɔ he lɛ hu. Mɛi enumɔ ni eshwɛ ni ahala amɛ lɛ ji Yuda (ni atsɛɔ lɛ Tadeo hu lɛ), Yuda Iskariot, Simon, Kananyo lɛ, Toma, kɛ Yakobo, Alfeo bi lɛ. Atsɛɔ Yakobo nɛɛ hu akɛ Yakobo Bibioo lɛ, ekolɛ akɛni edaaa yɛ gbɔmɔtsoŋ aloo ekolɛ akɛni kaselɔ Yakobo mɔ kroko lɛ ye lɛ onukpa yɛ afii amli lɛ hewɔ.

Kɛbaa nɛkɛ be nɛɛ mli lɛ, no mli lɛ mɛi 12 nɛɛ kɛ Yesu ehi shi be kpalaŋŋ ko, ni ele amɛ jogbaŋŋ. Yɛ anɔkwale mli lɛ, amɛteŋ mɛi pii ji lɛ diɛŋtsɛ ewekumɛi. Eka shi faŋŋ akɛ Yakobo kɛ enyɛmi Yohane ji Yesu nyɛkwɛ bii diɛŋtsɛ. Ni etamɔ nɔ ni Alfeo nyɛminuu ji Yosef, Yesu tsɛ ni kwɛ lɛ lɛ. No hewɔ lɛ, Alfeo binuu, ni ji bɔfo Yakobo hu baafee Yesu tsɛkwɛ bi.

Eji anɔkwale akɛ Yesu naaa naagba ko yɛ ebɔfoi lɛ agbɛi ni eeekai lɛ mli. Shi ani obaanyɛ okai amɛgbɛi? Ojogbaŋŋ, bo lɛ kaimɔ akɛ mɛi enyɔ yɛ mli ni atsɛɔ amɛ Simon, mɛi enyɔ kroko hu ni atsɛɔ amɛ Yakobo, kɛ mɛi enyɔ hu ni atsɛɔ amɛ Yuda, ni akɛ Simon yɛ nyɛminuu ni atsɛɔ lɛ Andrea, ni Yakobo hu yɛ nyɛminuu ni atsɛɔ lɛ Yohane. Nɛkɛ ji gbɛ ni oootsɔ nɔ okai bɔfoi lɛ ateŋ mɛi kpaanyɔ agbɛi. Mɛi ejwɛ ni eshwɛ lɛ ateŋ mɔ komɛ ji toohelɔ lɛ (Mateo), kɛ mɔ ni je ŋwane yɛ sɛɛ mli lɛ (Toma), mɔ ni atsɛ lɛ kɛjɛ tso ko shishi lɛ (Nathanael), kɛ enaanyo Filipo.

Kaselɔi lɛ ateŋ mɛi nyɔŋma-kɛ-ekome jɛ Galilea, ni ji kpokpaa ni Yesu jɛ mli lɛ. Nathanael jɛ Kana. Kɛjɛ shishijee mli lɛ, Filipo, Petro, kɛ Andrea jɛ Betsaida, shi sɛɛ mli lɛ Petro kɛ Andrea fa kɛtee Kapernaum, yɛ he ni etamɔ nɔ ni jɛmɛ Mateo hi lɛ. Yakobo kɛ Yohane yaa wuo no hewɔ lɛ etamɔ nɔ ni amɛ hu amɛyɛ Kapernaum nɔŋŋ aloo yɛ emasɛi. Etamɔ nɔ ni Yuda Iskariot, mɔ ni tsɔɔ Yesu sɛɛ gbɛ yɛ sɛɛ mli lɛ, ji bɔfo pɛ ni jɛ Yudea. Marko 3:13-19; Luka 6:12-16.

▪ Mɛɛ bɔfoi ebaanyɛ efee akɛ amɛji Yesu wekumɛi lɛ?

▪ Namɛi ji Yesu bɔfoi lɛ, ni te ooofee tɛŋŋ okai amɛgbɛi lɛ?

▪ Mɛɛ kpokpai anɔ bɔfoi lɛ jɛ?