Yitso 35

Shiɛmɔ ni Ehe Gbɛi Fe Fɛɛ Eko ni Akɛha Pɛŋ

NIFEEMƆ lɛ ji Biblia yinɔsane mli nii ni akaiɔ fe fɛɛ: Yesu ta gɔŋ ko masɛi, eeha e-Gɔŋ nɔ Shiɛmɔ ni ehe gbɛi waa lɛ. Nɛkɛ he nɛɛ bɛŋkɛ Galilea Ŋshɔ lɛ, ekolɛ ebɛŋkɛ Kapernaum. Yɛ be mli ni Yesu kɛ jenamɔ muu fɛɛ esɔle sɛɛ lɛ, ehala ekaselɔi lɛ ateŋ mɛi 12 koni amɛfee bɔfoi. Kɛkɛ ni ekɛ amɛ fɛɛ kpeleke shi kɛba nɛkɛ he tɛtrɛɛ nɛɛ yɛ gɔŋ lɛ nɔ.

Ekolɛ, obaasusu akɛ amrɔ nɛɛ etɔ Yesu waa, ni no hewɔ lɛ ebaasumɔ ni ewɔ fioo. Shi mɛi babaoo ko eba jɛmɛ, ni amɛteŋ mɛi komɛi po jɛ Yudea kɛ Yersualem tɔɔ, aaafee shitoi 60 kɛmiiya 70 jɛkɛmɔ. Mɛi krokomɛi hu jɛ ŋshɔnaa maji ni ji Tiro kɛ Sidon ni yɔɔ kooyigbɛ lɛ hu amli. Amɛba koni amɛbabo Yesu toi koni atsa amɛhelai lɛ hu. Mɛi komɛi yɛ amɛteŋ po ni daimonioi, ni ji Satan bɔfoi yiwalɔi lɛ miigba amɛnaa.

Beni Yesu kpelekeɔ shi kɛbaa lɛ, helatsɛmɛi lɛ tsi bɛŋkɛ lɛ koni amɛta ehe, ni etsa amɛ fɛɛ. Yɛ sɛɛ mli lɛ, etamɔ nɔ ni Yesu kwɔ kɛtee he ni kwɔ fioo yɛ gɔŋ lɛ nɔ. Eyata shi yɛ jɛmɛ ni ebɔi mɛi babaoo ni bua shi yɛ ehiɛ yɛ he tɛtrɛɛ lɛ nitsɔɔmɔ. Ni susumɔ he okwɛ! Agbɛnɛ mɔ kome folo po bɛ mɛi ni boɔ lɛ toi nɛɛ fɛɛ ateŋ ni miina nɔ yɛ gbɔmɔtsoŋ gbɔjɔmɔ ko hewɔ!

Gbɔmɛi lɛ efee klalo akɛ amɛbaabo tsɔɔlɔ ni nyɛɔ efeɔ naakpɛɛ nii ni yɔɔ gbeyei nɛɛ toi. Shi kɛlɛ, Yesu kɛ eshiɛmɔ lɛ ha yɛ ekaselɔi lɛ, ni ekolɛ amɛbɛŋkɛ lɛ kpaakpa fe fɛɛ lɛ asɛɛnamɔ hewɔ titri. Shi bɔni afee ni ehe aba sɛɛnamɔ aha wɔ hu lɛ, Mateo kɛ Luka fɛɛ ŋma amɛfɔ shi.

Nɔ ni Mateo ŋma yɛ shiɛmɔ lɛ he lɛ sɛɛ kɛlɛ aaafee Luka nɔ lɛ kɛlɛ toi ejwɛ. Kɛfata he lɛ, yɛ nɔ ni Mateo ŋma lɛ ekomɛi amli lɛ, Luka wie he akɛ Yesu wie nakai wiemɔi lɛ yɛ esɔɔmɔ nitsumɔ lɛ mli be kroko mli, taakɛ bɔ ni wɔnaa kɛ wɔkɛ Mateo 6:9-13 to Luka 11:1-4 he, ni wɔkɛ Mateo 6:25-34 hu to Luka 12:22-31 he lɛ. Shi kɛlɛ esaaa ni enɛ feɔ wɔ naakpɛɛ. Eka shi faŋŋ akɛ Yesu tsɔɔ nɔ kome lɛ fe shikome, ni Luka hala akɛ eeeŋma etsɔɔmɔi nɛɛ ekomɛi yɛ shihilɛ sɔrɔto ko ashishi.

Jeee mumɔŋ nibii ni yɔɔ Yesu shiɛmɔ lɛ mli lɛ mlikwɔlɛ kɛkɛ ji nɔ ni haa sɛɛnamɔ babaoo yɔɔ he nakai lɛ, shi moŋ bɔ ni ekɛ nɛkɛ anɔkwalei nɛɛ ha yɛ gbɛ ni yɔɔ mlɛo nɔ ni emli ka shi faŋŋ hu lɛ. Ekɛ niiashikpamɔi ni mɛi fɛɛ kɛkpeɔ, kɛ nibii ni gbɔmɛi lɛ le jogbaŋŋ lɛ tsuɔ nii, ni no hewɔ lɛ ehaa mɛi fɛɛ ni taoɔ shihilɛ kpakpa yɛ Nyɔŋmɔ gbɛ nɔ lɛ nuɔ esusumɔi lɛ ashishi yɛ gbɛ ni yɔɔ mlɛo nɔ.

Namɛi Yɔɔ Miishɛɛ Diɛŋtsɛ?

Mɔ fɛɛ mɔ miisumɔ ni ena miishɛɛ. Ni Yesu yoo enɛ lɛ, eje e-Gɔŋ nɔ Shiɛmɔ lɛ shishi kɛtsɔ tsɔɔmɔ ni etsɔɔ bɔ ni mɛi ni yɔɔ miishɛɛ diɛŋtsɛ lɛ ji lɛ mli lɛ nɔ. Taakɛ bɔ ni wɔbaana lɛ, enɛ mɔ etoibolɔi babaoo nɛɛ ajwɛŋmɔ amrɔ nɔŋŋ. Shi kɛlɛ, yɛ mɛi babaoo ajwɛŋmɔ naa lɛ, etamɔ nɔ ni eshishijee wiemɔi lɛ teɔ shi woɔ amɛhe.

Beni ewieɔ etsɔɔ ekaselɔi lɛ, Yesu je shishi akɛ: “Miishɛɛ ji nyɛ ohiafoi lɛ, ejaakɛ nyɛnɔ ji Nyɔŋmɔ maŋtsɛyeli lɛ. Miishɛɛ ji nyɛ mɛi ni hɔmɔ yeɔ nyɛ agbɛnɛ nɛɛ, ejaakɛ aaaha nyɛtɔrɔ. Miishɛɛ ji nyɛ mɛi ni nyɛfoɔ agbɛnɛ nɛɛ, ejaakɛ nyɛaaŋmɔ. Miishɛɛ ji nyɛ, kɛji mɛi aaanyɛ nyɛ, . . . Nyɛnyaa yɛ nakai gbi lɛ nɔ ni nyɛtumɔa, ejaakɛ naa, nyɛnyɔmɔwoo lɛ fa yɛ ŋwɛi.”

Nɛkɛ ji bɔ ni Luka ŋma Yesu shiɛmɔ lɛ shishijee wiemɔi lɛ. Shi taakɛ bɔ ni Mateo ŋma lɛ tsɔɔ lɛ, Yesu kɛɛ hu akɛ mɛi ni he jɔ, mɛi ni naa mɔbɔ, mɛi ni tsuii amli tse, kɛ mɛi ni kpataa lɛ hu yɛ miishɛɛ. Yesu tsɔɔ mli akɛ, mɛnɛɛmɛi yɛ miishɛɛ, ejaakɛ amɛnine baashɛ shikpɔŋ lɛ nɔ, aaana amɛ mɔbɔ, amɛaana Nyɔŋmɔ, ni aaatsɛ amɛ akɛ Nyɔŋmɔ bii.

Shi kɛlɛ, nɔ ni Yesu tsɔɔ akɛ amɛaana miishɛɛ lɛ jeee amɛhe ni aaafee mɛi miishɛɛ aloo ŋmɔlɔ, tamɔ yɛ be mli ni amɛjieɔ amɛhiɛtserɛ lɛ. Anɔkwa miishɛɛ mli kwɔ fe nakai, ni eshishinumɔ tsɔɔ tsui ni enyɔ mɔ mli, kɛ miishɛɛnamɔ ni jɛɔ shihilɛ mli nii ni atsu hewɔ lɛ mli.

No hewɔ lɛ, Yesu tsɔɔ akɛ, mɛi ni yɔɔ miishɛɛ diɛŋtsɛ lɛ ji mɛi ni yɔseɔ amɛmumɔŋ hiamɔ nii, ni amɛ esha shihilɛ lɛ haa amɛwerɛ hoɔ amɛhe, ni amɛbaleɔ Nyɔŋmɔ ni amɛsɔmɔɔ lɛ lɛ. Kɛkɛ lɛ, kɛji anyɛ amɛ aloo awa amɛ yi yɛ Nyɔŋmɔ suɔmɔnaa nii ni amɛfeɔ lɛ hewɔ lɛ, amɛnaa miishɛɛ ejaakɛ amɛle akɛ amɛmiisa Nyɔŋmɔ hiɛ ni amɛnine baashɛ enyɔmɔwoo ni ji naanɔ wala lɛ nɔ.

Shi kɛlɛ, Yesu toibolɔi lɛ ateŋ mɛi pii heɔ yeɔ akɛ nii babaoo ni aaana ni ana mli miishɛɛ lɛ ji nɔ ni haa mɔ naa miishɛɛ diɛŋtsɛ, tamɔ bɔ ni mɛi komɛi susuɔ ŋmɛnɛ lɛ. Yesu le akɛ jeee nakai ni. Beni etsɔɔ mli yɛ gbɛ ni yɔɔ sɔrɔto nɔ ni ekolɛ ebaaha etoibolɔi lɛ ateŋ mɛi pii anaa akpɛ amɛhe lɛ, ekɛɛ:

“Shi nyɛ niiatsɛmɛi lɛ, kpoo ha nyɛ, ejaakɛ nyɛna nyɛmiishɛjemɔ momo. Kpoo ha nyɛ, mɛi ni nyɛtɔrɔ lɛ, ejaakɛ hɔmɔ aaaye nyɛ. Kpoo ha nyɛ, mɛi ni nyɛŋmɔɔ agbɛnɛ nɛɛ, ejaakɛ nyɛaaye ŋkɔmɔ ni nyɛaafofoi. Kpoo ha nyɛ, kɛji mɛi fɛɛ aaawie nyɛhe ekpakpa lɛ, ejaakɛ nakai nɔŋŋ amɛtsɛmɛi lɛ fee amale gbalɔi lɛ.”

Mɛni Yesu tsɔɔ lɛ? Mɛni hewɔ ni ninamɔ ni mɔ ko yɔɔ, ni ekɛ ŋmɔlɔ aaatuu miishɛɛnamɔ sɛɛ, ni amɛna gbɔmɛi anɔkpɛlɛmɔ lɛ kɛ kpoo baa lɛ? Nɔ hewɔ ji akɛ, kɛji mɔ ko yɛ nibii nɛɛ ni ebuɔ nomɛi waa lɛ, no lɛ sɔɔmɔ ni akɛhaa Nyɔŋmɔ, ni ji nɔ pɛ ni kɛ anɔkwa miishɛɛ baa lɛ bɛ eshihilɛ mli. Yɛ nakai beaŋ nɔŋŋ lɛ, Yesu etsɔɔɔ hu akɛ ohiafo ni mɔ ko ji, aloo ni hɔmɔ miiye lɛ, aloo fo ni eeefo lɛ baaha ena miishɛɛ. Shi kɛlɛ, yɛ bei babaoo mli lɛ, nɛkɛ mɛi ni bɛ shihilɛ kpakpa mli nɛɛ boɔ Yesu tsɔɔmɔi lɛ toi, ni kɛtsɔ enɛ nɔ lɛ, akɛ anɔkwa miishɛɛ jɔɔ amɛ.

Yɛ no sɛɛ, beni Yesu kɛ ekaselɔi lɛ wieɔ lɛ, ekɛɛ: “Shikpɔŋ lɛ nɔ ŋoo ji nyɛ.” Eji anɔkwale akɛ enɛ etsɔɔɔ akɛ ŋoo diɛŋtsɛ ji amɛ. Shi moŋ, akɛ ŋoo baa nii ayi. Abua babaoo ko naa yɛ afɔleshaa latɛ lɛ masɛi yɛ Yehowa sɔlemɔ tsu lɛ mli, ni osɔfoi ni sɔmɔɔ yɛ jɛmɛ lɛ kɛwoɔ afɔlei ni abashãa lɛ.

Yesu kaselɔi lɛ ji “shikpɔŋ lɛ nɔ ŋoo,” ejaakɛ amɛnaa hewalɛ ko ni baa mɔ yi yɛ gbɔmɛi lɛ anɔ. Yɛ anɔkwale mli lɛ, shɛɛ sane ni amɛhiɛ lɛ baahere mɛi fɛɛ ni nuɔ lɛ ayiwala! Ebaaha sui ni hiɔ shi daa ahi nɛkɛ gbɔmɛi nɛɛ ashihilɛ mli akɛ anɔkwafoi, yɛ anɔkwayeli mli, ni ebaatsi mumɔŋ kɛ jeŋba mli fitemɔ ni aaaba amɛmli lɛ naa.

Yesu kɛɛ ekaselɔi lɛ akɛ: “Nyɛ ji je lɛŋ la lɛ.” Yesu kɛɛ amɛ akɛ, asuuu kane amaaa tsese shishi, shi moŋ akɛmaa kanetso nɔ, no hewɔ lɛ ekɛɛ: “Nakai nyɛhaa nyɛla atsoa yɛ gbɔmɛi ahiɛ.” Yesu kaselɔi lɛ baafee enɛ kɛtsɔ amɛmaŋ shiɛmɔ lɛ kɛ agbɛnɛ kpɛmɔ ni amɛaakpɛ akɛ jeŋba ni kɛ Biblia shishitoo mlai kpaa gbee lɛ ahe nɔkwɛmɔ nii lɛ anɔ.

Shishitoo Mla ni nɔ Kwɔ Kɛha Esɛɛnyiɛlɔi Lɛ

Jamɔ mli hiɛnyiɛlɔi lɛ buɔ Yesu akɛ Nyɔŋmɔ Mla lɛ nɔtɔlɔ, ni etsɛko tsɔ po ni amɛkpaŋ akɛ amɛbaagbe lɛ. No hewɔ lɛ, beni Yesu yaa nɔ yɛ e-Gɔŋ nɔ Shiɛmɔ lɛ mli lɛ, etsɔɔ mli akɛ: “Nyɛkasusua akɛ miba Mla lɛ kɛ Gbalɔi lɛ aguu; mibaaa guu, shi moŋ naagbee miba.”

Yesu yɛ bulɛ ni nɔ kwɔ waa kɛha Nyɔŋmɔ Mla lɛ, ni ewoɔ mɛi krokomɛi hewalɛ ni amɛna bulɛ ni tamɔ nakai nɔŋŋ. Yɛ anɔkwale mli lɛ, ekɛɛ: “No hewɔ lɛ mɔ fɛɛ mɔ ni aaagoi kitai bibii nɛɛ ateŋ ekome ni eeetsɔɔ mɛi nakai lɛ, aaatsɛ lɛ ‘bibioo fe fɛɛ’ yɛ ŋwɛi maŋtsɛyeli lɛ mli,” ni tsɔɔ akɛ mɔ ni tamɔ nɛkɛ boteŋ Maŋtsɛyeli lɛ mli kwraa.

Yesu jeee mɔ ni kuɔ Nyɔŋmɔ Mla lɛ mli kwraa, shi moŋ ebuɔ sui ni haa mɔ ko kuɔ mla lɛ mli lɛ po fɔ. Yɛ be mli ni etsɔɔ mli akɛ Mla lɛ kɛɔ akɛ, “Kaagbe gbɔmɔ!” lɛ sɛɛ lɛ, Yesu kɛfata he akɛ: “Shi mi lɛ miikɛɛ nyɛ akɛ mɔ fɛɛ mɔ ni mli fuɔ enyɛmi yaka lɛ, eeeye kojomɔ lɛŋ fɔ.”

Akɛni mɔ ni mli aaaya nɔ afu enyɛmi lɛ ji hiɛdɔɔ sane, ni ekolɛ ebaanyɛ ekɛ gbɔmɔgbee po aba hewɔ lɛ, Yesu fee bɔ ni esa akɛ mɔ ko afee babaoo koni ekɛha toiŋjɔlɛ ahi shi lɛ he nɔkwɛmɔ nɔ. Efa akɛ: “No hewɔ lɛ kɛji okɛ onɔkeenɔ [ni okɛbaashã afɔle] lɛ baŋmɛ afɔleshaa latɛ lɛ nɔ, ni okai akɛ onyɛmi kɛo teŋ yɛ sane ko lɛ, shi onɔkeenɔ lɛ yɛ jɛi yɛ afɔleshaa latɛ lɛ hiɛ, ni oya okɛ onyɛmi lɛ ayakpata da, koni oba ni okɛ onɔkeenɔ lɛ abaha.”

Beni egbalaa jwɛŋmɔ kɛbaa Kitai Nyɔŋma lɛ mli nɔ ni ji kpawo lɛ nɔ lɛ, Yesu tee nɔ akɛ: “Nyɛnu akɛ akɛɛ blemabii lɛ akɛ: ‘Kaafite gbala.’ ” Shi kɛlɛ, Yesu bu su ni tsɔɔ gbalafitemɔ hiɛ lɛ po fɔ. “Shi mi lɛ, miikɛɛ nyɛ akɛ: Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.”

Jeee jeŋba shara mli susumɔ ni anaa yɛ be kukuoo ko mli lɛ he Yesu wieɔ yɛ biɛ lɛ, shi moŋ, ‘ni aaaya nɔ akwɛ.’ Nii ni akwɛɔ kɛyaa nɔ yɛ nɛkɛ gbɛ nɔ lɛ teeɔ akɔnɔ loo henumɔi ashi, ni kɛ hegbɛi aaaba lɛ, eeeyagbe naa yɛ gbalafitemɔ mli. Mɛɛ gbɛ nɔ mɔ ko aaatsɔ atsi enɛ naa koni ekaba? Yesu tsɔɔ bɔ ni ehe hiaa ni akɔ gbɛ ni mli wa waa lɛ mli, ni ekɛɛ: “Shi kɛji ohiŋmɛi jurɔ miitɔtɔ onane lɛ, faa, ni oshɛ ofɔ; . . . Ni kɛji oninejurɔ miitɔtɔ onane lɛ, foo, ni oshɛ ofɔ.”

Yɛ bei babaoo mli lɛ gbɔmɛi sumɔɔ ni afo amɛgbɔmɔtso lɛ he nɔ ko ni hela yɔɔ mli lɛ bɔni afee ni amɛkɛhere amɛyiwala. Shi taakɛ Yesu tsɔɔ lɛ, ehe miihia waa po ni ‘wɔshɛrɛ’ nɔ fɛɛ nɔ ‘wɔshwie,’ kɛ nibii ni jara wa po tete, tamɔ hiŋmɛi aloo nine, bɔni afee ni wɔtsi wɔhe kɛjɛ jeŋba shara mli susumɔi kɛ nifeemɔi ahe. Yesu tsɔɔ mli akɛ, kɛ jeee nakai lɛ, abaashɛrɛ gbɔmɛi ni tamɔ nɛkɛ lɛ awo Gehena (he ko ni abuaa tumu naa ni ashaa yɛ yɛ Yerusalem masɛi), ni damɔ shi kɛha naanɔ hiɛkpatamɔ lɛ.

Yesu tsɔɔ bɔ ni esa akɛ wɔkɛ mɛi ni yeɔ wɔ awui loo amɛtɔɔ wɔnɔ lɛ hu aye aha. Ewo ŋaa akɛ: “Nyɛkakua mɔ fɔŋ lɛ naa. Shi moŋ, mɔ fɛɛ mɔ ni aaagba oninejurɔ toiŋ lɛ, tsɔ afa kroko lɛ hu oha lɛ.” Yesu etsɔɔɔ yɛ biɛ akɛ kɛji abatutua mɔ loo eweku lɛ, ekafa ehe. Agbaaa mɔ toiŋ ni akɛpiŋ mɔ lɛ yɛ heloo gbɛfaŋ, shi moŋ koni akɛjɛ mɔ lɛ. No hewɔ lɛ, nɔ ni Yesu tsɔɔ lɛ ji akɛ, kɛji mɔ ko miibɔ mɔdɛŋ ni etee bei loo naataomɔ shi, ekolɛ kɛtsɔ enine diɛŋtsɛ ni ekɛaagba toiŋ aloo kɛtsɔ wiemɔi ni tsurɔɔ mɔ nɔ lɛ, ebafeŋ nɔ ni ja akɛ aaato mɔ lɛ najiaŋ.

Yɛ be mli ni egbala jwɛŋmɔ kɛtee Nyɔŋmɔ Mla ni biɔ ni asumɔ he lɛ nɔ sɛɛ lɛ, Yesu jaje akɛ: “Shi mi lɛ, miikɛɛ nyɛ akɛ: ‘Nyɛsumɔa nyɛhenyɛlɔi, ni nyɛsɔlea nyɛhaa mɛi ni waa nyɛ yi lɛ.’ ” Yɛ be mli ni etsɔɔ yiŋtoo ni mli wa hewɔ ni esa akɛ afee nakai lɛ, ekafata he akɛ: “Koni [kɛtsɔ no nɔ lɛ], nyɛtsɔmɔ nyɛ-Tsɛ ni yɔɔ ŋwɛi lɛ bii; ejaakɛ ehaa ehulu teɔ shi yɛ mɛi fɔji kɛ mɛi kpakpai anɔ.”

Yesu mu eshiɛmɔ lɛ fa nɛɛ naa kɛtsɔ ŋaawoo nɛɛ nɔ akɛ: “No hewɔ lɛ nyɛhia kɛwulaa shi, tamɔ bɔ ni nyɛ-Tsɛ ni yɔɔ ŋwɛi lɛ hi kɛwula shi lɛ.” Yesu etsɔɔɔ akɛ gbɔmɛi baanyɛ aye emuu kwraa kɛwula shi. Shi moŋ, yɛ be mli ni amɛkaseɔ Nyɔŋmɔ lɛ, amɛbaanyɛ amɛkpa amɛsuɔmɔ lɛ mli ni eyashɛ amɛhenyɛlɔi po nɔ. Luka nɔ lɛ ŋma Yesu wiemɔi lɛ akɛ: “No hewɔ lɛ nyɛnaa mɔbɔ tamɔ bɔ ni nyɛ-Tsɛ lɛ hu naa mɔbɔ lɛ.”

Sɔlemɔ, kɛ Nyɔŋmɔ Mli Hekɛnɔfɔɔ

Beni Yesu yaa nɔ yɛ eshiɛmɔ lɛ mli lɛ, ebu mɛi ni kwaa amɛfeɔ amɛhe tamɔ mɛi ni jaa Nyɔŋmɔ lɛ osatofeemɔ lɛ fɔ. Ekɛɛ: “No hewɔ lɛ, kɛ oofee ejurɔ lɛ, kaakpa tɛtrɛmantɛrɛ yɛ ohiɛ, taakɛ bɔ ni osatofoi lɛ feɔ lɛ.”

Yesu tee nɔ akɛ: “Ni kɛ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpeehei lɛ kɛ gbɛjegbɛi akoji lɛ anaa amɛsɔle, koni mɛi ana amɛ.” Shi moŋ, efa akɛ: “Shi bo lɛ, kɛ oosɔle lɛ, botemɔ opia mli, ni oŋa oshinaa lɛ, ni osɔle oha o-Tsɛ ni naa teemɔ mli nii lɛ.” Yesu diɛŋtsɛ sɔle yɛ mɛi ahiɛ, no hewɔ lɛ ebuuu nakai feemɔ fɔ. Nɔ ni ewieɔ eshiɔ lɛ ji sɔlemɔi ni akɛɔ koni esa toibolɔi ahiɛ koni eha amɛwie wiemɔi ni tsɔɔ akɛ eŋɔɔ amɛnaa lɛ.

Yesu tee nɔ ewo ŋaa akɛ: “Shi kɛ nyɛmiisɔle lɛ, nyɛkakɛa wiemɔ kometoo lɛ nɔŋŋ babaoo, tamɔ jeŋmajiaŋbii lɛ feɔ lɛ.” Yesu etsɔɔɔ akɛ sane mlitii ejaaa. Be ko lɛ, lɛ diɛŋtsɛ eti “wiemɔ kometoo” lɛ nɔŋŋ mli yɛ esɔlemɔ mli. Shi nɔ ni ekpɛlɛɛɛ nɔ lɛ ji wiemɔi ni akaseɔ awoɔ yitsoŋ ni akɛɔ no “babaoo,” tamɔ mɛi ni kaneɔ ashinɔi feɔ yɛ amɛwaonaa yɛ be mli ni amɛkɛɔ amɛsɔlemɔi lɛ ni amɛsusuuu emli wiemɔi lɛ ahe lɛ.

Bɔni afee ni eye ebua etoibolɔi lɛ ni amɛsɔle lɛ, Yesu kɛ sɔlemɔ he nɔkwɛmɔ nɔ ko ni faikpamɔi kpawo yɔɔ mli ha. Emli klɛŋklɛŋ nibii etɛ lɛ yɔseɔ jeŋ muu fɛɛ maŋtsɛ ni Nyɔŋmɔ ji lɛ kɛ eyiŋtoi yɛ gbɛ ni ja nɔ. Nomɛi ji nii ni wɔbiɔ koni atse Nyɔŋmɔ gbɛi lɛ he, ni e-Matsɛyeli lɛ aba, koni afee esuɔmɔnaa nii lɛ. Ejwɛ ni eshwɛ lɛ ji mɔ lɛ diɛŋtsɛ hiamɔ nibii ni ebiɔ, kɛha daa ŋmaa, kɛha eshaifaa, koni akaka mɔ ko fe bɔ ni eeenyɛ edamɔ naa, kɛ agbɛnɛ koni ajie lɛ kɛjɛ mɔ fɔŋ lɛ dɛŋ.

Beni Yesu yaa nɔ lolo lɛ, etsɔɔ bɔ ni heloonaa nii ni hiɛ aaahi nɔ fe nine lɛ baanyɛ alaka mɔ aha. Ewo hewalɛ akɛ: “Nyɛkabɔa jwetri nyɛhaa nyɛhe yɛ shikpɔŋ lɛ nɔ, he ni omlɛgɛ kɛ ŋkanale fiteɔ nii ni julɔi gbaa bajuɔ yɛ lɛ.” Jeee akɛ nɛkɛ jwetrii nɛɛ ahiɛ kpataa kɛkɛ, shi moŋ amɛhaaa mɔ ana shidaamɔ kpakpa yɛ Nyɔŋmɔ hiɛ.

No hewɔ lɛ, Yesu kɛɛ: “Nyɛbɔa jwetri nyɛhaa nyɛhe yɛ ŋwɛi.” Obaanyɛ ofee enɛ kɛtsɔ Nyɔŋmɔ sɔɔmɔ ni okɛaaye klɛŋklɛŋ gbɛhe yɛ oshihilɛ mli lɛ nɔ. Mɔ ko mɔ ko nyɛŋ ajie shidaamɔ kpakpa ni onaa yɛ Nyɔŋmɔ hiɛ loo nyɔmɔwoo kpele ni ehaa mɔ lɛ kɛya. Kɛkɛ ni Yesu kɛfata he akɛ: “Shi he ni nyɛjwetri yɔɔ lɛ, jɛi nyɛtsui aaahi.”

Yɛ be mli ni Yesu yaa nɔ ewieɔ bɔ ni heloonaa ninamɔ baanyɛ alaka mɔ lɛ he lolo lɛ, ebu amɛ abɛ nɛɛ akɛ: “Gbɔmɔtso lɛ kane ji hiŋmɛi. No hewɔ lɛ, kɛji ohiŋmɛi nɔ tse lɛ, ogbɔmɔtso muu lɛ aaayi kɛ la; shi kɛji ohiŋmɛi nɔ tseee lɛ, ogbɔmɔtso muu lɛ aaawo duŋ.” Hiŋmɛi ni naa nii jogbaŋŋ lɛ tamɔ kane ni asu yɛ he ko ni ewo duŋ kɛha gbɔmɔtso lɛ. Shi dani mɔ aaana nii jogbaŋŋ lɛ, esa akɛ hiŋmɛi lɛ nɔ atse, ni ji akɛ esa akɛ ema nɔ pɔtɛɛ ko nɔ. Hiŋmɛi ni emaaa nɔ pɔtɛɛ ko nɔ lɛ haa mɔ naa nibii yɛ gbɛi krokomɛi anɔ, ni ekɛ heloonaa nibii asɛɛdii yeɔ Nyɔŋmɔ sɔɔmɔ hiɛ, ni nɔ ni jɛɔ mli baa ji akɛ “gbɔmɔtso muu lɛ” woɔ duŋ.

Yesu mu sane nɛɛ naa kɛ abɛbua ko ni mli wa waa: “Mɔ ko nyɛŋ nuŋtsɔmɛi enyɔ asɔmɔ; ejaakɛ ekolɛ eeenyɛ mɔ kome ni eeesumɔ mɔ kroko lɛ; aloo eeekpɛtɛ mɔ kome he, ni eeegbe mɔ kroko lɛ he guɔ. Nyɛnyɛŋ Nyɔŋmɔ kɛ Mamona [Niifalɛ] nyɛsɔmɔ.”

Yɛ be mli ni ekɛ ŋaawoo nɛɛ eha sɛɛ lɛ, Yesu ma nɔ mi eha etoibolɔi lɛ akɛ kɛ amɛkɛ Nyɔŋmɔ sɔɔmɔ ye klɛŋklɛŋ gbɛhe lɛ, ehe ehiaŋ ni amɛfee yeyeeye yɛ amɛ heloonaa hiamɔ nii ahe. Ekɛɛ: “Nyɛkwɛa ŋwɛi loofɔji lɛ, amɛduuu nii ni asaŋ amɛkuuu, asaŋ amɛbuaaa naa amɛwooo aboŋoi amli; shi nyɛ-Tsɛ ni yɔɔ ŋwɛi lɛ lɛɔ amɛ kɛ̃.” Kɛkɛ ni ebi akɛ: “Ani nyɛhiii aahu fe amɛ?”

No sɛɛ lɛ, Yesu wie ŋa nɔ fɔfɔi lɛ ahe ni ekɛɛ akɛ “Salomo kɛ enunyam lɛ fɛɛ tete ewulaaa tamɔ enɛɛmɛi ateŋ ekome.” Ni etee nɔ akɛ: “Shi kɛji ŋa nɔ jwɛi . . . lɛ ni Nyɔŋmɔ wulaa nɛkɛ lɛ, ani efeŋ nɔ ni fe enɛ ehaŋ nyɛ ni nyɛhemɔkɛyeli faaa lɛ lo?” No hewɔ lɛ Yesu mu naa akɛ: “Nyɛkahaoa nyɛhe nyɛkɛa akɛ, ‘Mɛni wɔɔye, aloo mɛni wɔɔnu, aloo mɛni wɔɔŋɔha wɔhe?’ . . . Shi nyɛ-Tsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ. Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”

Gbɛ ni kɛ Mɔ Yaa Wala Mli

Gbɛ ni kɛ mɔ yaa wala mli ji ni anyiɛ Yesu tsɔɔmɔi lɛ asɛɛ. Shi enɛ feemɔ bɛ mlɛo. Akɛ nɔkwɛmɔ nɔ lɛ, Farisifoi lɛ kojoɔ mɛi krokomɛi ni amɛbuɔ amɛ fɔ, ni etamɔ nɔ ni mɛi krokomɛi kaseɔ amɛ. No hewɔ lɛ beni Yesu yaa nɔ lolo yɛ e-Gɔŋ nɔ Shiɛmɔ lɛ mli lɛ, ekɛ nɛkɛ ŋaawoo nɛɛ ha: “Nyɛkakojoa, koni akakojo nyɛ. Shi nɔ kojomɔ ni nyɛŋɔkojoɔ lɛ, aaaŋɔkojo nyɛ.”

Oshara yɛ he waa akɛ aaanyiɛ Farisifoi ni wieɔ shiɔ nii nyanyaanya lɛ asɛɛ. Taakɛ Luka sane lɛ tsɔɔ lɛ, Yesu fee oshara nɛɛ he mfoniri ni ekɛɛ: “Ani shwilafo aaanyɛ atsɔɔ shwilafo gbɛ? Ani jeee bu mli amɛyi enyɔ lɛ fɛɛ amɛaayagbee?”

Ni wɔɔwie nyanyaanya wɔshi mɛi krokomɛi koni amɛtɔmɔi aje kpo faŋŋ ni ana, ni eha amɛmli afu lɛ ji tɔmɔ ni hiɛdɔɔ yɔɔ he. No hewɔ lɛ Yesu bi akɛ: “Te ooofee tɛŋŋ ni ooonyɛ okɛɛ onyɛmi akɛ: ‘Anyɛmi, ha majie kuli ni ka ohiŋmɛi nɔ lɛ,’ beni onaaa mplaŋ ni yɔɔ bo diɛŋtsɛ ohiŋmɛi mli lɛ? Osatofo! Jiemɔ mplaŋ lɛ yɛ bo diɛŋtsɛ ohiŋmɛiŋ tsutsu, ni no dani ooona faŋŋ ni ojie kuli lɛ yɛ onyɛmi lɛ hiŋmɛiŋ!”

Enɛ etsɔɔɔ akɛ esaaa akɛ Yesu kaselɔi lɛ kɛ ŋaalee tsuɔ ni yɛ mɛi krokomɛi agbɛfaŋ, ejaakɛ etee nɔ ekɛɛ: “Nyɛkaŋɔa nɔ ni ji krɔŋkrɔŋ lɛ nyɛhaa shifɔji lɛ; ni asaŋ nyɛkashɛrɛa nyɛjwinei nyɛshwiea kpolotoi ahiɛ.” Anɔkwalei ni jɛɔ Nyɔŋmɔ Wiemɔ lɛ mli lɛ yɛ krɔŋkrɔŋ. Amɛtamɔ mfonirifeemɔŋ jwinei. Shi kɛ mɛi aŋkroaŋkroi komɛi, ni tamɔ gbeei loo kpolotoi lɛ ejieee hiɛsɔɔ kpo amɛtsɔɔɔ nɛkɛ anɔkwalei ni jara wa waa nɛɛ, belɛ esa akɛ Yesu kaselɔi lɛ ashi gbɔmɛi nɛɛ ni amɛtao mɛi ni baakpɛlɛ nɔ lɛ moŋ.

Eyɛ mli akɛ Yesu etsɔ hiɛ ewie sɔlemɔ he yɛ e-Gɔŋ nɔ Shiɛmɔ lɛ mli momo moŋ, shi agbɛnɛ ema bɔ ni ehe hiaa ni aya nɔ ni akpaaa lɛ nɔ mi. Ewo hewalɛ akɛ: “Nyɛbia, ni aaaha nyɛ.” Bɔni afee ni ekɛfee bɔ ni Nyɔŋmɔ efee klalo akɛ eeeha sɔlemɔi ahetoo lɛ he mfoniri lɛ, Yesu bi akɛ: “Aloo nyɛteŋ namɔ ni, kɛji ebi bi lɛ aboloo, ni eeeha lɛ tɛ? . . . Agbɛnɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ nyɛŋɔɔ nii kpakpai nyɛhaa nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ nii kpakpai ehaŋ mɛi ni biɔ lɛ lɛ?”

No sɛɛ lɛ, Yesu kɛ nɔ ni ebatsɔ jeŋba he mla ni ehe gbɛi jogbaŋŋ, ni afɔɔ lɛ tsɛmɔ akɛ Mla Kpakpa lɛ ha. Ekɛɛ: “No hewɔ lɛ, nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.” Ni ooohi shi yɛ nɛkɛ mla nɛɛ naa lɛ biɔ ni ofee nibii kpakpai oha mɛi krokomɛi, ni okɛ amɛ aye taakɛ obaasumɔ ni mɛi kɛ bo aye lɛ nɔŋŋ.

Famɔ ni Yesu kɛha nɛɛ tsɔɔ akɛ wala gbɛ lɛ nɔ nyiɛmɔ bɛ mlɛo: “Nyɛbotea agbo fintɔŋŋ lɛ mli, ejaakɛ agbo ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ni boteɔ mli lɛ fa pii. Shi agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”

Oshara ni yɔɔ he akɛ abaanyɛ alaka mɔ ko lɛ da, no hewɔ lɛ Yesu bɔ kɔkɔ akɛ: “Shi nyɛhaa nyɛhiɛ ahiaa nyɛhe nɔ yɛ osato gbalɔi ahe, ejaakɛ amɛŋɔɔ too wolo amɛhaa amɛhe kɛbaa nyɛŋɔɔ, shi amɛmli gbɛ lɛ klaji fulɔi ji amɛ.” Ni taakɛ bɔ ni akɛ tsei ayibii yooɔ nɔ ni ji tsei kpakpai kɛ nɔ ni ji tsei fɔji lɛ, Yesu wie akɛ, abaanyɛ ana amale gbalɔi lɛ hu kɛtsɔ amɛjeŋba kɛ amɛtsɔɔmɔi anɔ.

Beni Yesu yaa nɔ lɛ, etsɔɔ mli akɛ jeee nɔ ni mɔ ko kɛɔ lɛ kɛkɛ haa etsɔɔ E-kaselɔ, shi moŋ nɔ ni efeɔ. Mɛi komɛi kɛɔ akɛ Yesu ji amɛ-Nuŋtsɔ, shi kɛ amɛfeee e-Tsɛ lɛ suɔmɔnaa nii lɛ, ekɛɛ: “No lɛ magba mli makɛɛ amɛ akɛ: Mileee nyɛ kwraa! Nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ.”

Yɛ naagbee lɛ, Yesu kɛ eshiɛmɔ lɛ ba naagbee kɛ naamuamɔ ni akaiɔ nɛɛ. Ekɛɛ: “No hewɔ lɛ, mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, maŋɔ lɛ mato ŋaalɔ ni ma etsu eto tɛsaa nɔ lɛ he. Ni nugbɔ tue, ni fai ba, ni kɔɔyɔɔ tswa, ni amɛshimɔ tsu lɛ, shi ewuleee; ejaakɛ ato shishi yɛ tɛsaa nɔ.”

Shi yɛ gbɛ kroko nɔ lɛ, Yesu jaje akɛ: “Ni mɔ fɛɛ mɔ ni nuɔ miwiemɔi nɛɛ ni eyeee nɔ lɛ, aaaŋɔ lɛ ato nuu kwashia ni ma etsu yɛ shia nɔ lɛ he. Ni nugbɔ tue, ni fai ba, ni kɔɔyɔɔ tswa, ni amɛshimɔ tsu lɛ, ni ewule, ni ewulemɔ lɛ da.”

Beni Yesu gbe eshiɛmɔ lɛ naa lɛ, gbɔmɛi asafo babaoo lɛ naa kpɛ amɛhe yɛ enitsɔɔmɔ lɛ hewɔ, ejaakɛ etsɔɔ amɛ nii akɛ mɔ ko ni yɔɔ nɔ hewalɛ ni jeee tamɔ amɛ jamɔ mli hiɛnyiɛlɔi lɛ. Luka 6:12-23; Mateo 5:1-12; Luka 6:24-26; Mateo 5:13-48; 6:1-34; 26:36-45; 7:1-29; Luka 6:27-49.

▪ Nɛgbɛ Yesu yɔɔ beni ekɛ shiɛmɔ ni akaiɔ jogbaŋŋ lɛ ha lɛ, namɛi yɔɔ jɛmɛ, ni mɛni ba etsɛɛɛ ni ekɛ shiɛmɔ lɛ ha lɛ?

▪ Mɛni hewɔ ni ebɛ naakpɛɛ akɛ Luka ŋma shiɛmɔ lɛ mli tsɔɔmɔi lɛ ekomɛi yɛ shihilɛ kroko shishi lɛ?

▪ Mɛni haa sɛɛnamɔ baa Yesu shiɛmɔ lɛ he waa nakai lɛ?

▪ Namɛi yɔɔ miishɛɛ diɛŋtsɛ, ni mɛni hewɔ?

▪ Namɛi ahaa amɛ kpoo lɛ, ni mɛni hewɔ?

▪ Mɛɛ gbɛ nɔ Yesu kaselɔi lɛ ji “shikpɔŋ lɛ nɔ ŋoo” kɛ “je lɛŋ la lɛ” yɛ?

▪ Mɛɛ gbɛ nɔ Yesu tsɔɔ bulɛ ni mli kwɔ waa kɛha Nyɔŋmɔ Mla lɛ yɛ?

▪ Mɛɛ famɔ Yesu kɛha ni ekɛjie nibii ni kɛ gbɔmɔgbee kɛ gbalafitemɔ baa lɛ ashishifã?

▪ Mɛni Yesu tsɔɔ beni ewie akɛ atsɔ toi kroko lɛ hu aha lɛ?

▪ Mɛɛ gbɛ nɔ wɔɔye emuu tamɔ bɔ ni Nyɔŋmɔ eye emuu lɛ yɛ?

▪ Mɛɛ sɔlemɔ he gbɛtsɔɔmɔi Yesu kɛha?

▪ Mɛni hewɔ ni ŋwɛi jwetrii ajara wa fe nii fɛɛ lɛ, ni te afeɔ tɛŋŋ ni anaa?

▪ Mɛɛ abɛbuai akɛha koni eye ebua mɔ ko koni etsi ehe kɛjɛ heloonaa ninamɔ he?

▪ Mɛni hewɔ ni Yesu kɛɛ akɛ ehe ehiaaa ni wɔfee yeyeeye lɛ?

▪ Mɛni Yesu kɛɛ yɛ mɛi krokomɛi ni wɔɔkojo amɛ lɛ he; ni kɛlɛ, mɛɛ gbɛ nɔ etsɔɔ yɛ akɛ ehe miihia ni ekaselɔi lɛ kɛ ŋaalee atsu nii yɛ mɛi krokomɛi agbɛfaŋ?

▪ Mɛni Yesu tee nɔ ewie lolo yɛ sɔlemɔ he, ni mɛɛ jeŋba he mla ekɛha?

▪ Mɛɛ gbɛ nɔ Yesu tsɔɔ yɛ akɛ wala gbɛ lɛ nɔ nyiɛmɔ efeŋ mlɛo ni oshara yɛ he akɛ aaanyɛ alaka mɔ ko?

▪ Te Yesu gbe eshiɛmɔ lɛ naa eha tɛŋŋ, ni mɛɛ hewalɛ enaa yɛ mɛi anɔ?