Naanɔ Miishɛɛ Miimɛ Mɛi Ni Kɛ Nyɔŋmɔ Gbeyeishemɔ Haa Nii
“Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—YOHANE 3:16.
1, 2. (a) Namɔ ji Nihalɔ kpele fe fɛɛ, ni mɛni ji enikee nii ni da fe fɛɛ kɛha adesai? (b) Mɛɛ su Nyɔŋmɔ jie lɛ kpo yɛ nikee nii ni da fe fɛɛ ni ekɛha lɛ hewɔ?
YEHOWA NYƆŊMƆ ji Nihalɔ kpele fe fɛɛ. Lɛ, ni ji ŋwɛi kɛ shikpɔŋ Bɔlɔ lɛ hewɔ ni Kristofonyo kaselɔ Yakobo ŋma akɛ: “Duromɔ nii kpakpai fɛɛ kɛ nikee nii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ lai a-Tsɛ lɛ ŋɔɔ, mɔ mli ni su tsakemɔ kɛ tsɔɔmɔ susuma ko bɛ lɛ.” (Yakobo 1:17) Yehowa hu ji nikee nii ni da fe fɛɛ eko ni akɛha pɛŋ lɛ Halɔ. Awie yɛ nikee nii ni da fe fɛɛ ni akɛha adesai nɛɛ he akɛ: “Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.”—Yohane 3:16.
2 Mɔ ni wie nakai wiemɔi lɛ jeee mɔ ko mɔ ko fe Nyɔŋmɔ diɛŋtsɛ Bi koome lɛ. Nɔ ni tsɛ ko bi koome baanyɛ afee nɔŋŋ ji ni ehiɛ asɔ ni esumɔ tsɛ ni tamɔ nɛkɛ akɛ ewala kɛ nibii kpakpai fɛɛ ni ekɛha koni ena shihilɛ mli ŋɔɔmɔ lɛ jɛɛhe. Shi jeee nɛkɛ Bi koome nɛɛ pɛ Nyɔŋmɔ sumɔɔ. Nɛkɛ nikee nii nɛɛ ni eeekpa mli eha ebɔɔnii krokomɛi lɛ baajie suɔmɔ ni Nyɔŋmɔ kɛtsuɔ nii kɛyashɛɔ he ko ni yɔɔ naakpɛɛ waa lɛ kpo. (Okɛto Romabii 5:8-10 he.) Enɛ jeɔ kpo waa kɛ wɔpɛi nɔ ni wiemɔ “eha” lɛ tsɔɔ diɛŋtsɛ yɛ nɛkɛ kukuji nɛɛ amli lɛ mli.
Nyɔŋmɔ Nikee Nii ni Ji “E-Suɔmɔ Bi Lɛ”
3. Yɛ “esuɔmɔ bi” lɛ sɛɛ lɛ, namɛi hu na ŋwɛi Tsɛ lɛ suɔmɔ mli ŋɔɔmɔ?
3 Nyɔŋmɔ kɛ e-Bi koome lɛ—“esuɔmɔ Bi lɛ”—ena naanyobɔɔ ni bɛŋkɛ kpaakpa mli ŋɔɔmɔ yɛ be kpalaŋŋ ni aleee mli yɛ ŋwɛi nɔyeli he lɛ. (Kolosebii 1:13) Yɛ nakai be lɛ mli fɛɛ lɛ, Tsɛ lɛ kɛ Bi suɔmɔ kɛ hedɔɔ ni amɛyɔɔ kɛha amɛhe lɛ eda babaoo akɛ mɛi enyɔ teŋ suɔmɔ ko bɛ ni tamɔ amɛnɔ lɛ. Asumɔɔ bɔɔ nii krokomɛi ni Nyɔŋmɔ tsɔ e-Bi koome lɛ nɔ ekɛ amɛ ba shihilɛ mli akɛ Yehowa weku krɔŋkrɔŋ lɛ mlibii lɛ hu. No hewɔ lɛ, suɔmɔ ji nɔ ni ye Nyɔŋmɔ weku muu lɛ fɛɛ nɔ. Awieɔ yɛ gbɛ ni ja nɔ yɛ Ŋmalɛi krɔŋkrɔŋi lɛ amli akɛ “Nyɔŋmɔ lɛ, suɔmɔ ji lɛ.” (1 Yohane 4:8) No hewɔ lɛ, mɛi ni Tsɛ lɛ, Yehowa Nyɔŋmɔ sumɔɔ amɛ lɛ fɛɛ feɔ weku krɔŋkrɔŋ lɛ.
4. Yɛ mɛɛ gbɛ nɔ ha ni Nyɔŋmɔ kɛ e-Bi lɛ ha lɛ kɔɔ nibii babaoo he fe naanyobɔɔ ni elaaje loo eŋmɛɛ he, ni yɛ namɛi ahewɔ?
4 Bɔ ni tsakpaa ni ka Yehowa kɛ ekromɔ Bi lɛ teŋ lɛ mli wa ha sɔŋŋ hewɔ lɛ naanyobɔɔ ni bɛŋkɛ kpaakpa nɛkɛ ni amɛaaŋmɛɛ he lɛ baaha amɛlaaje nɔ ko kpele. (Kolosebii 1:15) Shi nɛkɛ Bi koome nɛɛ ni ‘akɛ lɛ ha’ lɛ tsɔɔ babaoo fe naanyobɔɔ ni bɛŋkɛ kpaakpa ni Nyɔŋmɔ kɛ “esuɔmɔ Bi” lɛ naa lɛ ni eŋmɛɛ he. Etee nɔ kɛyashɛ he ni Yehowa ŋmɛ e-Bi lɛ gbɛ ni eje shihilɛ mli akɛ Nyɔŋmɔ jeŋ muu fɛɛ weku lɛ mlinyo yɛ be kuku mli kɛtsɔ gbele nɔ. Enɛ ji gbele ko ni egbo kɛha mɛi ni amɛfeko Nyɔŋmɔ weku lɛ mlibii da po. Nikee nii ko bɛ ni da fe e-Bi koome lɛ, ni Ŋmalɛi lɛ hu tsɛɔ lɛ akɛ “Nyɔŋmɔ nibɔɔ lɛ shishijee” ni Yehowa kɛaaha adesai ni ehia amɛ lɛ.—Kpojiemɔ 3:14.
5. (a) Mɛɛ awerɛho shihilɛ Adam shwiei yɔɔ mli, ni mɛni Nyɔŋmɔ jalɛsaneyeli bi yɛ E-bii anɔkwafoi lɛ ateŋ mɔ kome gbɛfaŋ? (b) Mɛni Nyɔŋmɔ nikee nii ni da fe fɛɛ lɛ baabi yɛ lɛ diɛŋtsɛ egbɛfaŋ?
5 Klɛŋklɛŋ adesai enyɔ lɛ, Adam kɛ Hawa, nyɛɛɛ ahiɛ amɛgbɛhe mli akɛ Nyɔŋmɔ weku lɛ mlibii. No ji shihilɛ mli ni amɛna amɛhe yɛ, yɛ be mli ni ashwie amɛ kɛjɛ Eden abɔɔ lɛ mli yɛ esha ni amɛfee amɛshi Nyɔŋmɔ lɛ hewɔ. Jeee akɛ amɛjeee Nyɔŋmɔ weku lɛ mlibii dɔŋŋ kɛkɛ, shi moŋ amɛyɛ gbele fɔbuu hu shishi. No hewɔ lɛ, naagba lɛ jeee amɛseshibii lɛ ni aaaku sɛɛ akɛ amɛ aba Nyɔŋmɔ duromɔ mli akɛ eweku lɛ mlibii kɛkɛ, shi moŋ ŋwɛi gbele fɔbuu lɛ hu ni aaajie kɛjɛ amɛnɔ. Yɛ bɔ ni ŋwɛi jalɛsaneyeli tsuɔ nii haa lɛ naa lɛ, enɛ baabi ni Yehowa Nyɔŋmɔ bii anɔkwafoi lɛ ateŋ mɔ ko abagbo yɛ amɛnajiaŋ, loo akɛ kpɔmɔ nɔ. No hewɔ lɛ, sanebimɔ ni da lɛ ji: Ani mɔ ni abaahala lɛ lɛ baasumɔ ni etsɔ gbele mli akɛ mɔ ni akɛ lɛ toɔ adesai eshafeelɔi anajiaŋ? Agbɛnɛ hu, enɛ feemɔ baabi naakpɛɛ nii ni jɛ Nyɔŋmɔ Ofe lɛ ŋɔɔ. Ebaabi ŋwɛi suɔmɔ kpojiemɔ kɛmiishɛ he ni yaa shɔŋŋ fe fɛɛ.—Romabii 8:32.
6. Te fee tɛŋŋ ni Nyɔŋmɔ Bi lɛ nyɛ etsu shihilɛ ni adesai eshafeelɔi yɔɔ mli lɛ he nii, ni mɛni ekɛɛ yɛ enɛ gbɛfaŋ?
6 Yehowa kromɔ Bi lɛ pɛ baanyɛ ashɛ hiamɔ nii krɛdɛɛ ni kɔɔ shihilɛ mli ni adesai eshafeelɔi yɔɔ lɛ he lɛ he. Eji eŋwɛi Tsɛ lɛ henɔ diɛŋtsɛ yɛ hedɔɔ ni ajieɔ lɛ kpo atsɔɔ weku ni abɔ amɛ yɛ ŋwɛi lɛ mli akɛ mɔ ko bɛ ni kɛ lɛ yeɔ egbɔ yɛ Nyɔŋmɔ bii lɛ ateŋ. Akɛni lɛ enɔ atsɔ akɛ bɔɔ nii krokomɛi fɛɛ ni yɔɔ jwɛŋmɔ lɛ ba shihilɛ mli hewɔ lɛ, amɛhe ni edɔɔ lɛ hu baafa babaoo. Kɛfata he lɛ, suɔmɔ ji Yehowa Bi koome, Yesu Kristo su titri, ejaakɛ eji “[Nyɔŋmɔ] anunyam lɛ kpɛmɔ kɛ esu lɛ henɔ” diɛŋtsɛ. (Hebribii 1:3) Beni etsɔɔ bɔ ni esumɔɔ akɛ ejie suɔmɔ nɛɛ kpo kɛyashɛ naagbee kɛtsɔ ewala ni ekɛha yɛ adesai eshafeelɔi ahewɔ lɛ nɔ lɛ, Yesu kɛɛ ebɔfoi 12 lɛ akɛ: “Gbɔmɔ Bi lɛ hu baaa koni asɔmɔ lɛ, shi sɔɔmɔ moŋ eba, koni eŋɔ esusuma eha yɛ mɛi pii akpɔmɔ hewɔ.”—Marko 10:45; kwɛmɔ Yohane 15:13 hu.
7, 8. (a) Mɛɛ yiŋtoo ha Yehowa tsu Yesu Kristo kɛba adesai aje lɛ mli lɛ? (b) Mɛɛ nitsumɔ Nyɔŋmɔ kɛtsu e-Bi koome lɛ?
7 Yehowa Nyɔŋmɔ yɛ yiŋtoo krɛdɛɛ ko hewɔ ni etsu Yesu kɛba adesai ajeŋ ni efee shwɛm nɛɛ mli lɛ. Ŋwɛi suɔmɔ ji nɔ ni kanya enɛ, ejaakɛ Yesu diɛŋtsɛ kɛɛ: “Nyɔŋmɔ sumɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala. Ejaakɛ Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala.”—Yohane 3:16, 17.
8 Yehowa jɛ esuɔmɔ mli ekɛ yiwalaheremɔ nitsumɔ ko tsu e-Bi koome lɛ. Nyɔŋmɔ tsuuu e-Bi lɛ kɛbaaa biɛ koni ebakojo je lɛ. Eji akɛ kojomɔ nitsumɔ ni tamɔ nɛkɛ wo Nyɔŋmɔ Bi lɛ dɛŋ kulɛ, hiɛnɔkamɔ ko jɛŋ mli baŋ kɛhaŋ adesai fɛɛ. Kojomɔ ni ehiii ni Yesu Kristo baajaje ashwie adesa weku lɛ nɔ lɛ baafee gbele fɔbuu. (Romabii 5:12) No hewɔ lɛ, yɛ ŋwɛi suɔmɔ ni ekaaa ni ajie lɛ kpo nɛɛ hewɔ lɛ, Nyɔŋmɔ ku gbele fɔbuu ni jalɛsaneyeli baabi lɛ naa aloo eha eŋmɛ pɛpɛɛpɛ.
9. Te lalatsɛ David nu bɔ ni Yehowa haa nii lɛ he eha tɛŋŋ?
9 Yehowa Nyɔŋmɔ jieɔ suɔmɔ kpo ni efeɔ he nɔkwɛmɔ nɔ akɛ esu kɛ baŋ lɛ mli nɔ ní fe fɛɛ yɛ nɔ fɛɛ nɔ mli. Ni abaanyɛ awie yɛ gbɛ ni ja nɔ akɛ Nyɔŋmɔ jɛɔ esuɔmɔ mli ekɛ nibii kpakpai ni fa kɛteke nɔ haa etsuji anɔkwafoi ni yɔɔ shikpɔŋ nɔ lɛ. Lalatsɛ David nu sane lɛ he nakai beni ekɛɛ Nyɔŋmɔ akɛ: “Kwɛ bɔ ni omlihilɛ ni okɛto oha mɛi ni sheɔo gbeyei lɛ da ha, no ojieɔ otsɔɔ mɛi ni baao abo lɛ yɛ gbɔmɛi ahiɛ.” (Lala 31:20) Beni David yeɔ Israel maŋ lɛ nɔ maŋtsɛ lɛ—hɛɛ, yɛ eshihilɛ be akɛ maŋ krɛdɛɛ ni Nyɔŋmɔ ehala lɛ mlinyo lɛ mli fɛɛ lɛ—enine shɛɔ Yehowa mlihilɛ loo ejurɔfeemɔ nɔ shii abɔ. Ni David na akɛ efa babaoo.
Nɔkee Nɔ Wulu ni Jɛ Nyɔŋmɔ Ŋɔɔ ni Israel Laaje Lɛ
10. Mɛni hewɔ maŋ ko bɛ shikpɔŋ nɔ ni tamɔ blema Israel lɛ?
10 Maŋ ko bɛ shikpɔŋ nɔ ni tamɔ blema Israel yɛ Yehowa ni eyɔɔ akɛ e-Nyɔŋmɔ lɛ hewɔ. Yehowa tsɔ gbalɔ Mose nɔ akɛ teŋdamɔlɔ ni ekɛ Abraham, Isak kɛ Yakob seshibii lɛ bote kpaŋmɔ wekukpaa ko mli. Ekɛ maŋ ko tsuko nii yɛ nɛkɛ gbɛ nɔ da. No hewɔ lɛ lalatsɛ ní mumɔ yɔɔ enɔ lɛ baanyɛ akɛɛ akɛ: “Ejajeɔ ewiemɔ lɛ etsɔɔ Yakob, egbɛnaai kɛ ekojomɔi lɛ etsɔɔ Israel. Efeko nakai ehako maŋ ko maŋ ko da, ni ekojomɔi lɛ hu, amɛleee. Haleluya!”—Lala 147:19, 20.
11. Israel na egbɛhe ni duromɔ yɔɔ mli yɛ Nyɔŋmɔ hiɛ lɛ mli ŋɔɔmɔ kɛyashi mɛɛ be, ni te Yesu wie tsakemɔ ni ba amɛ wekukpaa lɛ mli lɛ he eha tɛŋŋ?
11 Heloo naa Israel maŋ lɛ tee nɔ ehi Nyɔŋmɔ hiɛ duromɔ shihilɛ nɛɛ mli aahu kɛyashi be mli ni ekpoo Yesu Kristo akɛ Mesia lɛ yɛ wɔ Ŋmɛnɛŋmɛnɛ Beaŋ afi 33. Eji awerɛho gbi diɛŋtsɛ kɛha Israel, beni Yesu jaje nɛkɛ awerɛho wiemɔi nɛɛ lɛ: “Yerusalem, Yerusalem, bo mɔ ni ogbeɔ gbalɔi lɛ, ni otswiaa mɛi ni atsuɔ amɛ oŋɔɔ lɛ atɛi—shii enyiɛ mitao akɛ kulɛ mibuaa obii anaa, tamɔ bɔ ni wuɔ buaa ebii anaa ewoɔ efiji ashishi lɛ, shi nyɛkpɛlɛɛɛ. Naa! Ashi nyɛwe lɛ amaŋfɔ aha nyɛ.” (Mateo 23:37, 38, New World Translation) Yesu wiemɔi lɛ tsɔɔ akɛ, eyɛ mli akɛ tsutsu lɛ Israel maŋ lɛ yɛ Yehowa duromɔ shishi moŋ, shi amɛlaaje nikee nii krɛdɛɛ ni jɛ Nyɔŋmɔ ŋɔɔ nɛɛ. Yɛ mɛɛ gbɛ nɔ?
12. Namɛi ji ‘Yerusalem bii’ lɛ, ni kulɛ amɛnaa ni Yesu aaabua lɛ baatsɔɔ mɛni?
12 Wiemɔ “bii,” ni Yesu kɛtsu nii lɛ tsɔɔ akɛ eetsɔɔ heloonaa Yudafoi ni afo amɛ ketia ni hi Yerusalem ni damɔ shi kɛha Yuda maŋ muu lɛ fɛɛ lɛ. Ní Yesu aaabua ‘Yerusalem bii’ anaa lɛ baatsɔɔ akɛ ekɛ nɛkɛ “bii” nɛɛ miiba kpaŋmɔ hee ni amɛkɛ Nyɔŋmɔ aaafee, ni lɛ diɛŋtsɛ eesɔmɔ akɛ Teŋdamɔlɔ yɛ Yehowa kɛ nɛkɛ heloonaa Yudafoi nɛɛ ateŋ lɛ mli. (Yeremia 31:31-34) Nɔ ni baajɛ enɛ mli aba ji eshaifaa, ejaakɛ he ni Nyɔŋmɔ suɔmɔ lɛ tsuɔ nii kɛyashɛɔ nɛ. (Okɛto Maleaki 1:2 he.) Kulɛ enɛ baafee nikee nii agbo diɛŋtsɛ.
13. Mɛni Israel laaje yɛ kpoomɔ ni ekpoo Nyɔŋmɔ Bi lɛ hewɔ, shi mɛni hewɔ Yehowa miishɛɛ lɛ naa baaa shi lɛ?
13 Yɛ egbalɛ Wiemɔ lɛ kɛ gbeekpamɔ naa lɛ, Yehowa mɛ yɛ be kakadaŋŋ mli bɔ ni sa dani ekpã nikee nii ni ji kpaŋmɔ hee lɛ mlibii ni mɛi ni jeee Yudafoi aaatsɔmɔ lɛ mli eha amɛ. Shi akɛni amɛkpoo Nyɔŋmɔ diɛŋtsɛ Bi, Mesia lɛ hewɔ lɛ, heloonaa Israel maŋ lɛ laaje nikee nii ni da waa nɛɛ. No hewɔ lɛ Yehowa ku e-Bi lɛ ni akpoo lɛ lɛ naa aloo eha eŋmɛ pɛpɛɛpɛ kɛtsɔ nikee nii nɛɛ ni ekpa mli eha gbɔmɛi ni yɔɔ Yudafoi amaŋ lɛ sɛɛ lɛ nɔ. Yehowa miishɛɛ akɛ Nihalɔ Kpeteŋkpele lɛ tee nɔ yɛ nɛkɛ gbɛ nɔ ni ebaaa shi.
Miishɛɛ ni Yɔɔ Nihamɔ Mli
14. Mɛni hewɔ Yesu Kristo ji bɔɔ nɔ ní yɔɔ miishɛɛ fe fɛɛ yɛ jeŋ muu fɛɛ lɛ?
14 Yehowa ji “miishɛɛ Nyɔŋmɔ lɛ.” (1 Timoteo 1:11, NW) Nii ni ekɛhaa mɛi krokomɛi lɛ ji nɔ kome ni haa enaa miishɛɛ. Ni e-Bi koome lɛ kɛɛ yɛ Ŋ.B. klɛŋklɛŋ afii oha lɛ mli akɛ: “Nɔ hamɔ mli yɛ jɔɔmɔ fe hemɔ.” (Bɔfoi lɛ Asaji 20:35) Yɛ shishitoo mla nɛɛ kɛ gbeekpamɔ naa lɛ, Yesu ebatsɔ jeŋ muu fɛɛ Bɔlɔ lɛ bɔɔ nɔ ni yɔɔ miishɛɛ fe fɛɛ. Yɛ mɛɛ gbɛ nɔ? Ojogbaŋŋ, yɛ Yehowa Nyɔŋmɔ diɛŋtsɛ sɛɛ lɛ, Yesu Kristo kɛ nikee nii ni fe fɛɛ ha kɛtsɔ ewala ni ekɛfɔ shi yɛ adesai asɛɛnamɔ hewɔ lɛ nɔ. Yɛ anɔkwale mli lɛ, lɛ ji ‘Hewalɛ-Nɔyelɔ kome ni yɔɔ miishɛɛ lɛ.’ (1 Timoteo 6:15) No hewɔ lɛ Yesu feɔ nɔ ni ewie yɛ nihamɔ mli miishɛɛ babaoo namɔ he lɛ he nɔkwɛmɔ nɔ.
15. Mɛɛ nɔkwɛmɔ nɔ Yehowa baaya nɔ afee daa, ni te ebɔɔ nii ni yɔɔ jwɛŋmɔ lɛ aaafee tɛŋŋ ana emiishɛɛ lɛ eko?
15 Kɛtsɔ Yesu Kristo nɔ lɛ, Yehowa Nyɔŋmɔ nine enyɛŋ shi yɛ ebɔɔ nii ni yɔɔ jwɛŋmɔ lɛ a-Nihalɔ kpeteŋkpele ni eji lɛ mli, ni ebaafee amɛ nɔkwɛmɔ nɔ ni fe fɛɛ yɛ nihamɔ mli. Taakɛ bɔ ni Nyɔŋmɔ naa miishɛɛ yɛ nikee nii kpakpai ni ekɛhaa mɛi krokomɛi lɛ mli lɛ, nakai nɔŋŋ hu ekɛ ejurɔfeemɔ ewo ebɔɔ nii ni yɔɔ jwɛŋmɔ yɛ shikpɔŋ nɔ lɛ amli. Amɛtsɔɔ nɛkɛ gbɛ nɔ amɛjieɔ esu kɛ baŋ kpo ni amɛkaseɔ lɛ ni amɛnine shɛɔ emiishɛɛ lɛ eko nɔ. (1 Mose 1:26; Efesobii 5:1) Nɔ ni Yesu kɛɛ esɛɛnyiɛlɔi lɛ sa jogbaŋŋ mɔ: “Nyɛhaa, ni aaaha nyɛ; susumɔ nɔ kpakpa ni anyɛ nɔ ni ahoso ni eyi eteke nɔ mɛi aaaŋɔshaka nyɛtsitsi; ejaakɛ nɔ susumɔ nɔ ni nyɛkɛsusuɔ lɛ, no nɔŋŋ aaaku sɛɛ aŋɔsusu aha nyɛ.”—Luka 6:38.
16. Mɛɛ nihamɔ Yesu wie he yɛ Luka 6:38 lɛ?
16 Yesu to okadi kpakpa efɔ shi yɛ gbɛ ni esa akɛ ekaselɔi lɛ atsɔ nɔ ni efɔɔ feemɔ lɛ mli. Ekɛɛ gbɔmɛi ni nine shɛɔ nikee nii nɛɛ anɔ lɛ baahere nɔ jogbaŋŋ. Jeee heloonaa nikee nii ahe pɛ Yesu wieɔ yɛ Luka 6:38 lɛ. Ekɛɛɛ ekaselɔi lɛ akɛ amɛdi gbɛ ni baaha amɛkɛ amɛheloonaa nibii fɛɛ ake ni amɛfee shwɛm lɛ sɛɛ. Shi moŋ, eekudɔ amɛ kɛmiiya gbɛ ni baaha amɛnu he akɛ amɛtsu nɔ ko yɛ mumɔŋ lɛ nɔ.
Ama Naanɔ Miishɛɛ nɔ Mi
17. Mɛɛ nikee nii ni yɔɔ naakpɛɛ Nyɔŋmɔ kɛha e-Dasefoi lɛ yɛ naagbee gbii nɛɛ amli?
17 Mɛɛ naakpɛɛ nikee nii Yehowa, bɔɔ nii fɛɛ a-Yitso lɛ, kɛha e-Dasefoi lɛ yɛ naagbee gbii nɛɛ amli nɛkɛ! Ekɛ e-Maŋtsɛyeli lɛ he sanekpakpa lɛ eha wɔ. Wɔna hegbɛ kpele akɛ wɔɔfee Nyɔŋmɔ Maŋtsɛyeli ni ato ama shi yɛ e-Bi ni yeɔ nɔ, Yesu Kristo dɛŋ lɛ he shiɛlɔi. (Mateo 24:14; Marko 13:10) Ni aaafee wɔ Ŋwɛi Flooflo Nyɔŋmɔ lɛ Odasefoi ni shiɛɔ lɛ ji nikee nii ni anyɛŋ akɛ nɔ ko ato he, ni gbɛ ní hi fe fɛɛ ni wɔɔtsɔ nɔ wɔkase nikee ni wɔkɛkase Nyɔŋmɔ ji ni wɔgba Maŋtsɛyeli lɛ he sane lɛ wɔtsɔɔ mɛi krokomɛi dani yiwalɛ nibii agbɛjianɔtoo nɛɛ naagbee lɛ aba.
18. Akɛ Yehowa Odasefoi lɛ, mɛni esa akɛ wɔkɛha mɛi krokomɛi?
18 Bɔfo Paulo wie shihilɛi ni mli wawai ni esa akɛ etsɔ mli beni eshiɛɔ Maŋtsɛyeli lɛ he sane lɛ etsɔɔ mɛi krokomɛi lɛ he. (2 Korintobii 11:23-27) Esa akɛ Yehowa ŋmɛnɛŋmɛnɛ beaŋ Odasefoi lɛ hu atsɔ shihilɛi ni mli wawai amli ni amɛkɛ nibii ni amɛ diɛŋtsɛ amɛsumɔɔ lɛ ama afa yɛ mɔdɛŋ ni amɛbɔɔ koni amɛkɛ Maŋtsɛyeli lɛ he hiɛnɔkamɔ lɛ aha mɛi krokomɛi lɛ mli. Ekolɛ wɔjeee mɛi ni sumɔɔ akɛ wɔɔya mɛi ashiai amli, titri lɛ kɛ wɔhiɛ gboɔ. Shi akɛ Kristo sɛɛnyiɛlɔi lɛ, wɔnyɛŋ wɔkwa, aloo wɔtsi wɔhe kɛjɛ hegbɛ ni wɔna akɛ wɔkɛ mumɔŋ nibii aaaha mɛi krokomɛi kɛtsɔ “maŋtsɛyeli lɛ he sanekpakpa nɛɛ” shiɛmɔ nɔ lɛ he. (Mateo 24:14) Ehe miihia ni wɔna su ni Yesu na lɛ nɔŋŋ eko. Beni gbele ka ehiɛ lɛ, esɔle akɛ: “Mi-Tsɛ, . . . jeee bɔ ni mi misumɔɔ, shi moŋ bɔ ni bo osumɔɔ.” (Mateo 26:39) Esa akɛ Yehowa tsuji afee Nyɔŋmɔ suɔmɔnaa nii yɛ Maŋtsɛyeli lɛ he sanekpakpa lɛ ni akɛhaa mɛi krokomɛi lɛ mli, jeee amɛ diɛŋtsɛ amɛnɔ—nɔ ni lɛ esumɔɔ, jeee nɔ ni amɛsumɔɔ.
19. Namɛi ji Mɛi ni Yɔɔ” naanɔ buui lɛ,” ni te wɔɔfee tɛŋŋ ni wɔkɛ amɛ aaabɔ naanyo hu?
19 Nihamɔ ni tamɔ nɛkɛ baahe wɔbe kɛ shika, shi akɛni wɔji nihalɔi ni sheɔ Nyɔŋmɔ gbeyei hewɔ lɛ, wɔkwɛɔ koni wɔmiishɛɛ lɛ afee nɔ ni hiɔ shi daa. Mɛni hewɔ? Ejaakɛ Yesu kɛɛ: “Nyɛŋɔa kutumpɔo mamona [“jeŋ ninamɔ,” New International Version] lɛ eko nyɛfea shieŋtsɛmɛi nyɛhaa nyɛhe, koni beni nyɛbɛ nɔ ko dɔŋŋ lɛ, ni amɛhere nyɛ yɛ naanɔ buui lɛ amli.” (Luka 16:9) Esa akɛ efee wɔyiŋtoo akɛ wɔkɛ “kutumpɔo mamona” lɛ aaatsu nii ni wɔkɛna Mɛi ni Yɔɔ “naanɔ buui” lɛ akɛ wɔ shieŋtsɛmɛi. Akɛ Bɔlɔ lɛ, Yehowa nii ji nibii fɛɛ ni yɔɔ lɛ, ni ekromɔ Bi lɛ naa nɔtsɛ-feemɔ lɛ mli gbɛfaŋnɔ akɛ nibii fɛɛ a-Gboshiniyelɔ. (Lala 50:10-12; Hebribii 1:1, 2) Kɛji amɛaatsɔmɔ wɔ shieŋtsɛmɛi lɛ, belɛ esa akɛ wɔkɛ ninamɔ atsu nii yɛ gbɛ ni kɛ amɛ nɔkpɛlɛmɔ aaaba lɛ nɔ. Nɔ ni fata enɛ he ji subaŋ kpakpa ni aaana yɛ heloonaa nii ni akɛaatsu nii koni ehe aba sɛɛnamɔ aha mɛi krokomɛi lɛ he. (Okɛto Mateo 6:3, 4; 2 Korintobii 9:7 he.) Wɔbaanyɛ wɔkɛ shika atsu nii yɛ gbɛ ni ja nɔ ni wɔkɛwaje naanyobɔɔ ni ka wɔkɛ Yehowa Nyɔŋmɔ kɛ Yesu Kristo teŋ lɛ. Akɛ nɔkwɛmɔ nɔ lɛ, wɔfeɔ enɛ kɛtsɔɔ nɔ ni wɔyɔɔ lɛ ni wɔkɛtsuɔ nii yɛ miishɛɛ mli wɔkɛyeɔ wɔbuaa gbɔmɛi ni ehia amɛ lɛlɛŋ lɛ kɛ nibii ni wɔyɔɔ lɛ ni wɔkɛtsuɔ nii koni Maŋtsɛyeli lɛ he nibii aya hiɛ lɛ nɔ.—Abɛi 19:17; Mateo 6:33.
20. (a) Mɛni hewɔ Yehowa kɛ Yesu baanyɛ amɛkɛ wɔ aya “naanɔ buui amli” lɛ, ni nɛgbɛ nɛkɛ hei nɛɛ yɔɔ? (b) Mɛɛ hegbɛ baafee wɔ nɔ yɛ yinɔi fɛɛ mli?
20 Akɛni amɛyɔɔ shihilɛ ni gbele bɛ mli hewɔ lɛ, Yehowa Nyɔŋmɔ kɛ Yesu Kristo baanyɛ afee wɔ Shieŋtsɛmɛi kɛya naanɔ ni amɛbaahere wɔ kɛya “naanɔ buui lɛ amli.” Nakai enɛ ji kɛji akɛ mɛnɛɛmɛi baahi ŋwɛi kɛ ŋwɛibɔfoi krɔŋkrɔŋi lɛ fɛɛ aloo yɛ shikpɔŋ nɛɛ nɔ yɛ Paradeiso ni aku sɛɛ akɛba lɛ mli. (Luka 23:43) Nyɔŋmɔ suɔmɔ nikee nii ni ji Yesu Kristo lɛ ha enɛɛmɛi fɛɛ ba mli. (Yohane 3:16) Ni Yehowa Nyɔŋmɔ kɛ Yesu baatsu nii koni eya nɔ ekɛ nii aha bɔɔ nii fɛɛ, kɛha Lɛ diɛŋtsɛ emiishɛɛ ni nɔ bɛ lɛ. Yɛ anɔkwale mli lɛ, wɔ diɛŋtsɛ wɔbaana hegbɛ ni wɔkɛ nii aha yɛ Yehowa Nyɔŋmɔ jeŋ muu fɛɛ maŋtsɛyeli lɛ kɛ e-Bi koome, wɔ-Nuŋtsɔ kɛ Yiwalaherelɔ Yesu Kristo nɔyeli lɛ shishi kɛya yinɔi fɛɛ mli. Nɔ ni baajɛ mli aba ji naanɔ miishɛɛ kɛha mɛi ni kɛ Nyɔŋmɔ gbeyeishemɔ haa nii lɛ fɛɛ.
Ani Okai?
Mɛni Nyɔŋmɔ nikee nii kpele fe fɛɛ lɛ baabi yɛ egbɛfaŋ?
Nyɔŋmɔ tsu e-Bi lɛ koni ebatsu mɛni?
Namɔ ji bɔɔ nɔ ni yɔɔ miishɛ fe fɛɛ yɛ jeŋ muu fɛɛ, ni mɛni hewɔ?
Yɛ mɛɛ gbɛ nɔ mɛi ni kɛ Nyɔŋmɔ gbeyeishemɔ haa nii lɛ baana naanɔ miishɛɛ?
[Nikasemɔ lɛ he Sanebimɔi]
[Mfoniri ni yɔɔ baafa 10]
Ani ohiɛ sɔɔ Nyɔŋmɔ nikee nii ni ji e-Bi ni ekɛha akɛ kpɔmɔ afɔleshaa nɔ Iɛ?
[Mfonirii ni yɔɔ baafa 12]
Ani otaoɔ Nyɔŋmɔ Maŋtsɛyeli lɛ tsutsu kɛtsɔ sanekpakpa lɛ shiɛmɔ kɛ nakai nitsumɔ lɛ sɛɛfimɔ kɛ nibii fɛɛ ni oyɔɔ lɛ nɔ?