Ani Abaanyɛ Aye Gbele Nɔ Kunim?

ANI osusu hewalɛ ni Yesu Kristo na yɛ adesai ayinɔsane nɔ lɛ he? Kalenda ni mɛi pii kɛtsuɔ nii yɛ Anaigbɛ je lɛ mli lɛ damɔ afi nɔ ni asusuɔ akɛ afɔ lɛ lɛ nɔ. Taakɛ The World Book Encyclopedia lɛ kɛɔ lɛ: “Atsɛɔ be ni ba dani nakai afi lɛ ba lɛ akɛ B.C., aloo before Christ (dani Kristo ba) . Atsɛɔ be ni nyiɛ no sɛɛ ba lɛ akɛ A.D., aloo anno Domini (yɛ wɔ Nuŋtsɔ lɛ be lɛ mli) .”

Mɛni hewɔ Yesu he gbɛi nakai? Nɔkome ji akɛ, yɛ naakpɛɛ nii ni efee yɛ Galilea niiaŋ lɛ hewɔ. Nɛkɛ shikpɔŋ nɛɛ yɛ nɔ ni ale ŋmɛnɛ akɛ Republic of Israel lɛ kooyigbɛ. Klɛŋklɛŋ afii oha lɛ mli Yudanyo yinɔsaneŋmalɔ Flavius Josephus ŋma yɛ nɛkɛ kpokpaa nɛɛ he akɛ: “Nakai shikpɔŋ lɛ hi ni ehaa nii babaoo ni tsei sɔrɔtoi kɛ maji sɔrɔtoi babaoo yɛ nɔ . . . Ni agbɛnɛ maji lɛ babaoo yɛ biɛ.” Yɛ anɔkwale mli lɛ ewie akɛ, “maji wuji kɛ akrowai ohai enyɔ kɛ nyɔŋmai ejwɛ yɛ Galilea.”a

Nɛkɛ maji wuji kɛ akrowai nɛɛ amli be ko lɛ Yesu Kristo shiɛ ni efee naakpɛɛ nibii pii ni anako da yɛ lɛ. Eyɛ mli akɛ Biblia mli niŋmaai tsiɔ maji nɛɛ ateŋ fioo ko pɛ ata moŋ, shi Yesu tee babaoo mli, ejaakɛ nɔ ni aŋma afɔ shi lɛ wie yɛ shiɛmɔ nitsumɔ ni tee nɔ yɛ jɛmɛ lɛ he akɛ: “Ni Yesu kpa maji lɛ kɛ akrowai lɛ fɛɛ nɔ ni etsɔɔ nii yɛ amɛkpeehei lɛ ni eshiɛɔ maŋtsɛyeli lɛ he sanekpakpa lɛ, ni etsa hela fɛɛ hela kɛ hejaramɔ fɛɛ hejaramɔ yɛ mã lɛŋ.”​—Mat. 9:⁠35.

Galileabii pii ni Yesu shiɛ etsɔɔ amɛ lɛ le lɛ, ejaakɛ alɛ lɛ yɛ amɛteŋ diɛŋtsɛ​—yɛ Nazaret akrowa bibioo ni yɔɔ gɔji lɛ ateŋ aaafee shitooi 18 yɛ Galilea Ŋshɔ lɛ wuoyi-anaigbɛ lɛ.

YESU SARAMƆ YƐ NAIN

Afi 31 Ŋ.B., yɛ sɔɔmɔ afi ni ji enyɔ lɛ mli ni yoo okulafo lɛ binuu lɛ gbo yɛ Nain maŋ lɛ mli. Nɛkɛ maŋ nɛɛ kɛ Nazaret wuoyi-bokagbɛ, ni ji akrowa ni Yesu hi jɛmɛ lɛ teŋ jɛkɛmɔ aaafee shitooi enumɔ loo ekpaa. Beni obalanyo lɛ gbo lɛ no mli lɛ Yesu miishiɛ yɛ Galilea Ŋshɔ lɛ wuoyigbɛ ŋshɔ lɛ naa, yɛ he ni ekɛ e-Gɔŋ nɔ Shiɛmɔ ni ehe gbɛi waa lɛ ha yɛ lɛ.

Biblia lɛ kɛɔ akɛ beni Yesu gbe eshiɛmɔ nɛɛ naa lɛ kɛkɛ ni “ebote Kapernaum.” Beni eyɔɔ nakai ŋshɔ naa maŋ lɛ mli lɛ etsa asraafoi-oha-atsɛ ko tsulɔ ni he miiye. “Yɛ enɛ sɛɛ kpaakpa [aloo taakɛ blema niŋmaai komɛi kɛɔ lɛ, “Ni jetsɛremɔ lɛ] eba mli akɛ eyiŋ kɛtee maŋ ko ni atsɛɔ lɛ Nain lɛ mli ni ekaselɔi lɛ ateŋ mɛi pii kɛ asafo babaoo ko kɛ lɛ nyiɛ.”​—Luka 7:​1-11.

Gbɛfaa ni kɛ mɔ yaa wuoyi-anaigbɛ kɛjɛ Kapernaum kɛmiiya Nain lɛ aaafee shitooi 20, gbi muu nyiɛmɔ kɛha gbɔmɛi ni nyiɛɔ shikpɔŋ Yesu kɛ mɛi ni nyiɛ esɛɛ lɛ tsɔ jɔɔ lɛ mli kɛkɛ ni amɛbɛŋkɛ nɛkɛ maŋ nɛɛ agbo lɛ naa. Kɛkɛ lɛ taakɛ sane lɛ kɛɔ wɔ lɛ, “shi beni eshɛ maŋ lɛ agbo lɛ naa eta lɛ, naa, awo gbonyo ko kɛmiije kpo, ni enyɛ bi kome ji lɛ, ni okulafo ji yoo lɛ; ni maŋ lɛŋ bii pii fata ehe. Ni beni Nuŋtsɔ lɛ na lɛ lɛ, emusuŋ tsɔ lɛ yɛ ehewɔ.”​—Luka 7:​12, 13.

Yɛ nɛkɛ kpe ni amɛkpe nɛɛ he lɛ, Arthur P. Stanley ni yasara nɛkɛ he nɛɛ yɛ nyɛsɛɛ afii oha ni ho lɛ mli lɛ ŋma yɛ ewolo Sinai and Palestine lɛ mli akɛ: “Kooyigbɛ shikpelekemɔ lɛ nɔ . . . onaa Nain akrowa ni etsɔ amaŋfɔ lɛ yɛ. . . Agbo loo gbɛ kome pɛ ni ebaanyɛ ena ji nɔ ni ka gɔji lɛ masɛi ni kpelekeɔ shi kɛyaa ŋa lɛ nɔ lɛ. Ebaanyɛ efee akɛ nɛkɛ shikpelekemɔ yɛ gɔŋ nɛɛ nɔ taakɛ blema kusum ji lɛ nɔ ‘amɛtere gbonyo lɛ,’ ni akrowa nɛɛ ‘masɛi ni bɛŋkɛ agbo lɛ naa’ awa gbonyo lɛ yɛ. . . . Eji he ko ni anyɛŋ akɛ nɔ ko pɔtɛɛ akadi yɛ kaimɔ mli; shi akɛ nɔ ni tee nɔ lɛ ji anɔkwale, ni gbɛ fintɔŋŋ ni atsɔɔ nɔ ni sane nɛɛ ba yɛ nɔ lɛ ji anɔkwale hewɔ lɛ, ebaanyɛ efee Sanekpakpa lɛ mli saji ni kɔɔ yinɔsane he lɛ mli nibii ni anaa ni yɔɔ miishɛɛ lɛ ateŋ ekome.”

Mɔ kroko ni yasara nɛkɛ he nɛɛ yɛ afii ohai 19 lɛ mli ji J. W. McGarvey, ni eŋma yɛ ewolo ni ji Lands of the Bible lɛ mli akɛ: “Nain sɔ̃ gɔŋ ko yiteŋ, ni gɔŋ lɛ shikpelekemɔ kɛbaa ŋa lɛ nɔ yɛ wuoyigbɛ lɛ aaafee ninetalɔi 60. Gbɛ ni jɛ wuoyigbɛ lɛ boteɔ mli kɛtsɔɔ jɔɔ bibioo ko mli yɛ maŋ lɛ anaigbɛ, ni nɔ ni onaa yɛ enɛɛmɛi asɛɛ ji gbohii abui ni atsa yɛ tesaai amli. Beni Yesu bɛŋkɛɔ nakai maŋ lɛ agbo lɛ naa, ni ejɛ Kapernaum ni ji he ni eyɔɔ dani je tsɛre lɛ ehaa lɛ, no mli Iɛ mɛi ni tere yoo okulafo lɛ binuu lɛ miije kpo kɛmiiya he ni abaafu lɛ yɛ lɛ, no hewɔ lɛ amɛkɛ amɛ kpe.”

NAAKPƐƐ NII NI HAA MƆ HE JƆƆ LƐ

Beni ekɛ asafo babaoo lɛ ni foɔ lɛ kɛ yoo ni yeɔ awerɛho lɛ kpe lɛ, Yesu musuŋ tsɔ lɛ yɛ yoo nɛɛ hewɔ. Awerɛho babaoo ni eyeɔ lɛ ha edɔ lɛ yɛ etsui mli eha lɛ. No hewɔ lɛ ekɛ mlihilɛ kɛ shiŋŋfeemɔ ni haa hekɛnɔfɔɔ kɛɛ yoo lɛ akɛ: “Kaafo!” Enifeemɔ kɛ wiemɔ lɛ gbala asafo lɛ jwɛŋmɔ, no hewɔ lɛ beni ebata nii ni gbonyo lɛ ka nɔ lɛ he lɛ, mɛi ni tere lɛ lɛ wa damɔ shi.’ Amɛfɛɛ amɛbaa susu nɔ ni Yesu baafee lɛ he.

Eji anɔkwale akɛ, nɔ ni fe afi yɛ nakai be lɛ mli, yɛ Kana akrowa lɛ mli, aaafee shitooi komɛi kɛmiiya kooyigbɛ lɛ, no mli lɛ Yesu eha nu etsɔ wein yɛ yookpeemɔ ko shishi. Ni eji anɔkwale hu, taakɛ ekolɛ mɛi ni foɔ lɛ ateŋ mɛi komɛi enu akɛ abɔ he amaniɛ lɛ, akɛ Yesu etsa helai sɔrɔtoi yɛ maji kɛ akrowai ni jɛkɛɛɛ tsɔ lɛ amli. Shi yɛ Biblia ni aŋma yɛ Nyɔŋmɔ mumɔ naa lɛ mli saji agbɛfaŋ lɛ, Yesu eteko gbonyo ko shi da. Ani obaanyɛ efee nii ni tamɔ nɛkɛ?

Beni ewieɔ etsɔɔ gbonyo lɛ, Yesu fa akɛ: “Obalanyo, miikɛɛo akɛ: Tee shi!” Naakpɛɛ nii amli naakpɛɛ nii! “Ni mɔ ni egbo lɛ te shi eta shi, ni ebɔi wiemɔ; ni eŋɔ lɛ eha enyɛ.”

Mɛɛ naakpɛɛ nii nɛ! Bo lɛ susumɔ bɔ ni nakai yoo lɛ baanu he eha lɛ he. Kɛ bo lɛ te obaanu he oha tɛŋŋ? Mɛni ji nɔ ni mɔ ko kɛɔ yɛ shihilɛi ni tamɔ nɛkɛ shishi? ‘Miidao shi akɛ otee mibi lɛ shi’? Wiemɔi kpakpai bɛ ni baanyɛ atsɔɔ shidaa ni sa kɛha nifeemɔ ni tamɔ nɛkɛ lɛ mli. Eji naakpɛɛ nii lɛlɛŋ!

“Shi gbeyei mɔmɔ amɛfɛɛ, ni amɛwo Nyɔŋmɔ hiɛ nyam amɛkɛɛ: Gbalɔ kpeteŋkpele ete shi yɛ wɔteŋ, ni Nyɔŋmɔ ebasara emaŋ lɛ. Ni ehe sane nɛɛ jije yɛ Yudea fɛɛ kɛ jɛi niiaŋ fɛɛ.” Eka shi faŋŋ akɛ Yesu ji gbalɔ kpeteŋkpele ni jɛ Nyɔŋmɔ ŋɔɔ lɛlɛŋ.​—Luka 7:​13-17.

NAAKPƐƐ NITSULƆ NI AWO SHI YƐ EHE LƐ?

Afii ohai nyɔŋma kɛ enumɔ dani enɛ aaaba lɛ, no mli lɛ gbalɔ Mose etsɔ hiɛ efee naakpɛɛ nii kɛtsɔ Nyɔŋmɔ hewalɛ nɔ, ni eha Ŋshɔ Tsuru lɛ mli gba koni Israel maŋ muu lɛ fɛɛ atsɔ mli kɛtsɔ shikpɔŋ gbiŋ nɔ. Shi agba akɛ gbalɔ ko ni feɔ naakpɛɛ nii wuji baaba. Mose wie yɛ Nyɔŋmɔ mumɔ lɛ hewalɛ shishi akɛ: “Yehowa, o-Nyɔŋmɔ lɛ baatee gbalɔ ko ni tamɔ mi shi yɛ nyɛteŋ kɛjɛ onyɛmimɛi lɛ ateŋ ahao; lɛ toi nyɛboa.” (5 Mose 18:15) No hewɔ lɛ sanebimɔ ni yɔɔ klɛŋklɛŋ afii oha lɛ mli ji akɛ: ‘Ani nɛkɛ Yesu ni jɛ Nazaret nɛɛ ji Nyɔŋmɔ gbalɔ ni awie ehe akɛ ebaaba lɛ?’

Yohane Baptisilɔ lɛ he ye akɛ Yesu ji nɛkɛ Mɔ nɛɛ. Ena ni Nyɔŋmɔ mumɔ lɛ miikpeleke shi kɛmiiba Yesu nɔ beni ebaptisi lɛ yɛ Yordan Faa lɛ mli nɔ ni miihe ashɛ afii enyɔ lɛ. (Yoh. 1:​32-34) Agbɛnɛ áwo Yohane tsuŋ, Herode Antipa, wo lɛ tsuŋ aaafee afi dani enɛ ba yɛ ehe mama ni ekpa yɛ gbalafitemɔ wekukpaa ni ka ekɛ enyɛminuu lɛ ŋa lɛ teŋ lɛ hewɔ.

No hewɔ lɛ beni eyɔɔ tsuŋwoo lɛ mli ni “Yohane kaselɔi lɛ yagba lɛ nii nɛɛ fɛɛ,” titri lɛ, nɔ ni kɔɔ okulafo lɛ binuu lɛ ni etee lɛ shi lɛ he lɛ. Beni enu nɛkɛ amaniɛbɔɔ nɛɛ lɛ, “Yohane tsɛ ekaselɔi lɛ ateŋ mɛi enyɔ, ni etsu amɛ Yesu ŋɔɔ, ni ekɛɛ: Ani bo ji mɔ ni baa lɛ, aloo wɔkwɛ mɔ kroko gbɛ?”​—Luka 7:​18, 19; Mat. 11:​2, 3.

Jeee akɛ Yohane heee yeee akɛ Yesu ji shiwoo gbalɔ lɛ. Shi yɛ be mli ni enu naakpɛɛ sane ni kɔɔ okulafo lɛ binuu ni akɛ lɛ eba wala mli lɛ he lɛ, agbɛnɛ eesumɔ ni enu sane diɛŋtsɛ ni jɛ Yesu ŋɔɔ yɛ Mesia ni eji lɛ he. Yohane susu kɛji akɛ mɔ kroko yɛ ni baaba, mɔ ni baaye esɛɛ ni baaha nibii fɛɛ ni agba ni kɔɔ Nyɔŋmɔ Mesia lɛ he lɛ aba mli

No hewɔ lɛ beni Yohane kaselɔi enyɔ lɛ yashɛ Yesu ŋɔɔ ni amɛkɛ Yohane sanebimɔ lɛ fɔ ehiɛ lɛ, sane lɛ tee nɔ ekɛɛ akɛ: “Shi nakai ŋmlɛtswaa lɛ nɔ nɔŋŋ lɛ, [Yesu] etsa mɛi pii ahelai kɛ amɛhejaramɔi kɛ mumɔi fɔji, ni mɛi pii hu ni eshwila lɛ, eha amɛna nii. Ni Yesu to he ni ekɛɛ amɛ akɛ: Nyɛyaa ni nyɛyagbaa Yohane nibii ni nyɛna ni nyɛnu lɛ, akɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, aajaje sanekpakpa lɛ aatsɔɔ ohiafoi; ni ajɔɔ mɔ ni mihe sane etɔtɔɔɔ enane.”​—Luka 7:​20-23.

Eka shi faŋŋ akɛ nɛkɛ amaniɛbɔɔ nɛɛ wo Yohane hewalɛ. Eji odaseyeli ni maa nɔ mi akɛ Yesu miitsu naakpɛɛ nitsumɔi ni baaha ale gbalɔ ni Mose gba ehe sane efɔ shi lɛ. Mɔ ko eteko shi ni efee naakpɛɛ nii ni tamɔ nɛkɛ da! No hewɔ lɛ yɛ tsuŋ ni awo Yohane lɛ fɛɛ sɛɛ lɛ, ena nɔmimaa akɛ Yesu ji gbalɔ kome pɛ ni ha nɔ ni Mose gba fɔ shi lɛ ba mli.

Sanebimɔ ko kwraa bɛ he. Abaanyɛ aye gbele po nɔ kunim, taakɛ eji yɛ Nain okulafo lɛ binuu ni gbo lɛ gbɛfaŋ lɛ!

[Shishigbɛ niŋmai]