Sanebimɔi Ni Jɛ Kanelɔi Adɛŋ

Ani aha Zakaria, ni ji Yohane Baptisilɔ lɛ tsɛ mu toi ni etɔ mu hu, taakɛ Luka 1:62 taoɔ atsɔɔ lɛ?

Mɛi komɛi emu sane naa akɛ Zakaria mu toi hu. Wɔkaneɔ yɛ Biblia mli sane lɛ mli akɛ: “Ni amɛŋɔ [gbekɛ lɛ] tsɛ gbɛi Zakaria amɛwo lɛ. Ni enyɛ here nɔ ekɛɛ: ‘Dabida! Shi awo lɛ Yohane moŋ.’ Ni amɛkɛɛ lɛ akɛ: ‘Mɔ ko bɛ oweku lɛ mli ni atsɛɔ lɛ nakai.’ Ni amɛkɛ amɛnine fee okadi bi etsɛ bɔ ni esumɔɔ ni atsɛ lɛ. Ni ebi tao fioo ko, ni eŋma akɛ: ‘Yohane ji egbɛi.’”​—Luka 1:​59-63.

Shi, nɔ ko bɛ sane nɛɛ mli ni tsɔɔ pɔtɛɛ akɛ Zakaria nyɛɛɛ anu wiemɔ loo emu toi yɛ be kpalaŋŋ ko mli.

Ŋwɛibɔfo Gabriel etsɔ hiɛ mra mli etswa Zakaria adafi yɛ bi nuu ni abaafɔ ni abaatsɛ lɛ Yohane lɛ he momo. Zakaria ni egbɔ lɛ nyɛɛɛ enɛ ehe eye. Kɛkɛ ni ŋwɛibɔfo lɛ to he ha lɛ akɛ: “Ni naa! oootɔ mu ni onyɛŋ owie kɛyashi gbi nɔ ni nii nɛɛ aaaba mli, ejaakɛ oheee miwiemɔi lɛ ni baaba mli yɛ amɛbe naa lɛ oyeee.” (Luka 1:​13, 18-20) Ŋwɛibɔfo lɛ wie akɛ enɛ baasa Zakaria wiemɔ he, jeee etoi loo sanenumɔ he.

Sane lɛ yaa nɔ lolo akɛ: “Shi beni eje kpo [kɛjɛ sɔlemɔ tsu lɛ mli] lɛ, enyɛɛɛ ekɛ [gbɔmɛi ni mɛɔ lɛ] awie, ni amɛyoo sɛɛ akɛ eyana nii yɛ sɔlemɔ tsu lɛŋ; ni lɛ diɛŋtsɛ hu efɔ̃ amɛ nine, ni eka he etɔ mu.” (Luka 1:22) Hela wiemɔ ni atsɔɔ shishi yɛ biɛ akɛ “etɔ mu” lɛ hiɛ shishinumɔ ko ni tsɔɔ gbɔjɔmɔ ni mɔ gbɔjɔɔ, yɛ wiemɔ, sanenumɔ, loo enyɔ lɛ fɛɛ mli. (Luka 7:22) Shi Zakaria hu? Ojogbaŋŋ, susumɔ nɔ ni ba beni atsa lɛ lɛ he okwɛ. “Ni amrɔ lɛ nɔŋŋ lɛ enaabu gbele ni elilɛi fɛne, ni ewie ejie Nyɔŋmɔ yi.” (Luka 1:64) Enɛ haa wɔ shishinumɔ ni wɔkɛaakɛɛ akɛ Zakaria nyɛmɔ ni ekɛwieɔ lɛ pɛ ji nɔ ni sane ba he.

Belɛ, mɛni hewɔ mɔ ni mɛi krokomɛi lɛ ‘kɛ amɛnine fee okadi ni amɛbi Zakaria bɔ ni esumɔɔ ni atsɛ [gbekɛ] lɛ? Shishitsɔɔlɔi komɛi tsɔɔ enɛ shishi “yɛ okadi wiemɔ amli” aloo “ekɛ wiemɔ okadii tsu nii.”

Ebabi ni Zakaria, ni etɔ mu kɛjɛ be mli ni ŋwɛibɔfo lɛ tswa lɛ adafi lɛ tɔŋŋ lɛ kɛ ninefɔɔ, ni ji okadi wiemɔ gbɛi lɛ ekome lɛ atsu nii yɛ be kɛ bei amli ni ekɛwie. Akɛ nɔkwɛmɔ nɔ lɛ, etee nɔ “efɔ̃ amɛ nine,” ni ji mɛi ni yɔɔ sɔlemɔ we lɛ. (Luka 1:​21, 22) Beni ebiɔ ni aha lɛ tao yɛ sɛɛ mli lɛ, no mli lɛ ekolɛ ekɛ okadii loo ninefɔɔ tsu nii. (Luka 1:63) No hewɔ lɛ, eeenyɛ ebalɛ akɛ, ehe bahia ni mɛi ni fata ehe yɛ nakai be ni etɔ mu lɛ mli lɛ hu kɛ ninefɔɔ atsu nii.

Shi, shishitsɔɔmɔ ko yɛ ni eeenyɛ efee akɛ no hewɔ atsi okadii ata yɛ Luka 1:62 lɛ. Elizabet wie ni etsɔɔ ebinuu lɛ gbɛi ni akɛbaatsɛ lɛ etsɛko tsɔ. No hewɔ Iɛ, ehe bahia ni amɛtsa nɔ amɛfee nɔ ni he hiaa ni ji bimɔ ni amɛaabi ewu hu, nɔ ni ji eyiŋkpɛɛ, ni enɛ eteee shi ewooo yoo lɛ. Amɛbaanyɛ amɛtsɔ yitsofɔ̃ɔ loo ninefɔɔ kɛkɛ nɔ. Anɔkwale ni eji akɛ amɛŋmaaa sane ni amɛbi lɛ ni Zakaria akane lɛ po baanyɛ afee odaseyeli ni tsɔɔ akɛ enu wiemɔi ni eŋa lɛ wie lɛ. Enɛ hewɔ lɛ, yitsofɔɔ kɛkɛ aloo okadi ko ni tamɔ nakai ni amɛaafee amɛtsɔɔ lɛ lɛ baanyɛ eha enu shishi akɛ, ‘Ojogbaŋŋ, wɔ fɛɛ (kɛ bo, Zakaria hu) wɔnu gbɛi ni etaoɔ akɛtsɛ lɛ lɛ, shi mɛni ji onaagbee yiŋkpɛɛ yɛ gbɛi ni akɛbaatsɛ gbekɛ lɛ he?’

Ni no sɛɛ nɔŋŋ pɛ kɛkɛ ni naakpɛɛ nii kroko hu ba, ni etsake shihilɛ lɛ kwraa. “Ni amrɔ lɛ nɔŋŋ lɛ enaabu gbele ni elilɛi fɛne, ni ewie.” (Luka 1:64) Ehe ehiaaa ni atsi esanenumɔ ta kɛji naagba ko kwraa bako no he.