Yitso 38

Ani Yohane Hemɔkɛyeli Eta?

AGBƐNƐ abagba Yohane Baptisilɔ lɛ, ni ehi tsuŋ aaafee afi sɔŋŋ nɛ lɛ Nain yoo okulafo lɛ binuu lɛ shitee lɛ he sane. Shi Yohane miisumɔ ni enu bɔ ni enɛ he hiaa lɛ tɛ̃ɛ kɛjɛ Yesu diɛŋtsɛ ŋɔɔ, no hewɔ lɛ etsu ekaselɔi lɛ ateŋ mɛi enyɔ koni amɛyabi lɛ akɛ: “Ani bo ji Mɔ ni Baa lɛ, aloo wɔkwɛ mɔ kroko gbɛ?”

Enɛ tamɔ sanebimɔ ko ni yɔɔ naakpɛɛ, titri lɛ akɛni Yohane na Nyɔŋmɔ mumɔ lɛ kpeleke shi kɛba Yesu nɔ ni enu Nyɔŋmɔ gbee ni ekɛkpɛlɛ enɔ yɛ be mli ni ebaptisiɔ Yesu aaafee afii enyɔ ni etsɔ hiɛ lɛ mli lɛ hewɔ. Yohane sanebimɔ lɛ baaha mɛi komɛi amu sane naa akɛ ehemɔkɛyeli egbɔjɔ. Shi jeee nakai enɛ eji. Eji Yohane yiŋ ebɔi lɛ kɔshikɔshifeemɔ kulɛ, Yesu ewieŋ Yohane he ekpakpa nɛkɛ, tamɔ bɔ ni efee yɛ nɛkɛ be nɛɛ mli lɛ. Belɛ, mɛni hewɔ mɔ ni Yohane bi nɛkɛ sane nɛɛ?

Ekolɛ Yohane miitao ni Yesu ama nɔ mi kɛkɛ aha lɛ akɛ lɛ ji Mesia lɛ. Enɛ baawo Yohane hewalɛ waa yɛ be mli ni eyɔɔ tsuŋwoo mli lɛ. Shi etamɔ nɔ ni Yohane sanebimɔ lɛ yaa shɔŋŋ po fe nakai. Eka shi faŋŋ akɛ eetao ele kɛji mɔ kroko baanyiɛ sɛɛ aba lolo, aloo kɛ aaakɛɛ lɛ, sɛɛyelɔ, mɔ ni baagbe nibii fɛɛ ni agba afɔ shi akɛ Mesia lɛ baatsu lɛ mlibaa lɛ naa.

Taakɛ Biblia gbalɛi ni Yohane le jogbaŋŋ lɛ tsɔɔ lɛ, Mɔ ni Nyɔŋmɔ Efɔ lɛ Mu lɛ baaye Maŋtsɛ, ebaafee kpɔlɔ. Shi kɛlɛ, awo Yohane tsuŋ lolo, yɛ Yesu baptisimɔ lɛ sɛɛ nyɔji babaoo po. No hewɔ lɛ eka shi faŋŋ akɛ, Yohane miibi Yesu akɛ: ‘Ani bo ji mɔ ni baato Nyɔŋmɔ Maŋtsɛyeli lɛ ama shi yɛ hewalɛ ni anaa faŋŋ mli lɛ, aloo mɔ kroko ko yɛ lolo, ni ji sɛɛyelɔ ni esa akɛ wɔmɛ lɛ ni ebawo naakpɛɛ gbalɛi ni kɔɔ Mesia lɛ anunyam lɛ he lɛ obɔ?’

Yɛ nɔ najiaŋ ni eeekɛɛ Yohane kaselɔi lɛ akɛ, ‘Hɛɛ, mi ji mɔ ni baaba lɛ!’ Yesu tsa mɛi babaoo yɛ nakai ŋmɛlɛtswaa lɛ nɔ nɔŋŋ, ni etsa amɛ helai sɔrɔtoi lɛ fɛɛ, ni ekɛfee okadi ko ni sa kadimɔ waa. Kɛkɛ ni ekɛɛ kaselɔi lɛ akɛ: “Nyɛyaa ni nyɛyagbaa Yohane nibii ni nyɛna ni nyɛnu lɛ, akɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, aajaje sanekpakpa lɛ aatsɔɔ ohiafoi.”

Yɛ wiemɔ kroko mli lɛ, ekolɛ Yohane sanebimɔ lɛ baanyɛ atsɔɔ akɛ eekpa gbɛ akɛ Yesu baafee nibii pii fe bɔ ni efeɔ nɛɛ ni ekolɛ ebaajie lɛ Yohane hu kɛjɛ etsuŋwoo lɛ mli. Shi, Yesu miikɛɛ Yohane ni ekakpa naakpɛɛ nibii ni fe nɔ ni Yesu feɔ lɛ gbɛ.

Beni Yohane kaselɔi lɛ shi amɛtee lɛ, Yesu tsɔ ehe ni ekɛɛ asafo babaoo lɛ akɛ Yohane ji Yehowa “bɔfo” ni agba ehe sane afɔ shi yɛ Maleaki 3:1 lɛ ni lɛ nɔŋŋ hu ji gbalɔ Elia ni agba ehe sane afɔ shi yɛ Maleaki 4:5, 6 lɛ. Enɛ hewɔ lɛ ejie Yohane yi akɛ ekɛ gbalɔi krokomɛi ni hi shi kɛtsɔ ehiɛ lɛ yeɔ egbɔ, ni etsɔɔ mli akɛ: “Lɛlɛŋ miikɛɛ nyɛ akɛ: Mɛi ni yei fɔ amɛ lɛ ateŋ mɔ ko eteko shi ni fe Yohane Baptisilɔ lɛ; tsɛbelɛ mɔ ni ji bibioo kwraa yɛ ŋwɛi maŋtsɛyeli lɛ mli lɛ fe lɛ. Shi kɛjɛ Yohane Baptisilɔ lɛ yinɔ kɛbaa nɛɛ, hewalɛ naa aŋɔɔ ŋwɛi maŋtsɛyeli lɛ.”

Yesu miitsɔɔ yɛ biɛ akɛ Yohane ehiŋ ŋwɛi Maŋtsɛyeli lɛ mli, akɛni mɔ bibioo kwraa ni yɔɔ mli lɛ nɔ kwɔ fe Yohane lɛ hewɔ. Yohane saa gbɛ eto Yesu, shi egbo dani Kristo sɔo kpaŋmɔ, loo gbeekpamɔ ni ekɛ ekaselɔi lɛ fee, koni amɛfata ehe akɛ nanemɛi nɔyelɔi yɛ e-Maŋtsɛyeli lɛ mli lɛ naa. No hewɔ ni Yesu kɛɛ akɛ Yohane ehiŋ ŋwɛi Maŋtsɛyeli lɛ mli lɛ. Yɛ no najiaŋ lɛ, Yohane baafee Nyɔŋmɔ Maŋtsɛyeli lɛ shishibii lɛ ateŋ mɔ ko. Luka 7:18-30; Mateo 11:2-15.

▪ Mɛni hewɔ ni Yohane bi kɛji akɛ Yesu ji Mɔ ni Baa lɛ aloo kɛji akɛ esa akɛ akpa mɔ kroko gbɛ lɛ?

▪ Mɛɛ gbalɛi Yesu kɛɛ akɛ Yohane ha amɛba mli lɛ?

▪ Mɛni hewɔ Yohane Baptisilɔ lɛ kɛ Yesu ehiŋ ŋwɛi lɛ?