Yitso 40

Mɔbɔnalɛ He Nikasemɔ

EKOLƐ Yesu yɛ Nain lolo, yɛ he ni etee yoo okulafo lɛ binuu lɛ shi yɛ etsɛko lɛ, aloo ekolɛ eyaasara maŋ ko ni bɛŋkɛ jɛmɛ lɛ. Farisifonyo ko ni atsɛɔ lɛ Simon lɛ miitao ni ena mɔ ni tsuɔ nɛkɛ naakpɛɛ nitsumɔi nɛɛ jogbaŋŋ. No hewɔ lɛ efɔ Yesu nine ni ekɛlɛ abaye nii.

Akɛni Yesu bu nakai nifeemɔ lɛ akɛ hegbɛ ni ena ni ekɛaasɔmɔ mɛi krokomɛi hewɔ lɛ, ekpɛlɛ ninefɔɔ lɛ nɔ, taakɛ bɔ ni ekpɛlɛ nine ni toohelɔi kɛ eshafeelɔi fɔ lɛ ni ekɛ amɛ abaye nii lɛ anɔ lɛ. Shi kɛlɛ, beni Yesu bote Simon shia lɛ mli lɛ, ahereee lɛ hiɛmɛɛ tamɔ bɔ ni afɔɔ gbɔi aheremɔ lɛ.

Kɛji mɔ ko wo tokota kɛfa gbɛ kɛnyiɛ gbɛ ni mulu yɔɔ nɔ nɔ lɛ, ehaa mɔ lɛ naji ahe dɔɔ ni ewoɔ muji, ni eji gbɔfeemɔ su ko ni afɔɔ feemɔ akɛ afɔɔ gbɔ ni eba lɛ naji ahe kɛ nu hɔlɔ. Shi afɔɔɔ Yesu naji ahe beni ebashɛ shi lɛ. Ni nakai nɔŋŋ hu ashɔɔɔ enaa akɛhereee lɛ atuu, taakɛ akɛ bulɛ feɔ daa lɛ. Ni ahaaa lɛ gbɔfeemɔ mu ni afɔɔ hamɔ lɛ ni ekɛwo eyiteŋ.

Beni ayeɔ nii lɛ, ni gbɔi lɛ tara niyenii okpɔlɔ lɛ he lɛ, yoo ko ni afɔko lɛ nine babote tsu lɛ mli blɛoo. Ale lɛ yɛ maŋ lɛ mli akɛ mɔ ko ni bɔɔ ahoshwi. Ekolɛ enu Yesu tsɔɔmɔi lɛ ahe, kɛ eninefɔɔ kɛha ‘mɛi fɛɛ ni etɔ amɛ lɛ koni amɛba eŋɔɔ kɛha hejɔɔmɔ lɛ.’ Ni akɛni nɔ ni ena kɛ nɔ ni enu lɛ tsirɛ lɛ waa hewɔ lɛ, agbɛnɛ eetao Yesu sɛɛ gbɛ.

Yoo lɛ ba Yesu sɛɛ gbɛ yɛ okpɔlɔ lɛ he ni ekula shi yɛ enaji anaa. Beni ehiŋmɛiaŋ yaafonui lɛ shwieɔ Yesu naji ahe lɛ, belɛ ekɛ eyiteŋ tsɔi miitsumɔ. Kɛkɛ ni ejie mu ni jeɔ ŋma kɛjɛ etɔ lɛ mli, ni yɛ be mli ni eshɔɔ enaji anaa blɛoo lɛ, belɛ eefɔse mu lɛ eeshwie enaji ahe hu. Simon kwɛ nɔ ni yaa nɔ lɛ ni enaaa he miishɛɛ. Esusu eyiŋ akɛ: “Gbɔmɔ nɛɛ, gbalɔ ji lɛ jikulɛ, eeele nɔ mɔ kɛ nɔ yoo ni taa ehe nɛɛ akɛ eshafeelɔ ji lɛ.”

Ni Yesu na akɛ eejwɛŋ nakai lɛ, ekɛɛ: “Simon, miyɛ sane ko ni makɛɛo.”

Ehere nɔ akɛ: “Tsɔɔlɔ, kɛɛmɔ!”

Yesu je shishi akɛ: “Nifililɔ ko yɛ ni yɔɔ nyɔjiatsɛmɛi enyɔ; mɔ kome hiɛ lɛ denarioi ohai enumɔ, ni mɔ kome hu nyɔŋmai enumɔ. Shi akɛni amɛbɛ nɔ ko ni amɛkɛaawo lɛ, eŋɔke amɛyi enyɔ lɛ fɛɛ. No hewɔ lɛ tsɔɔmɔ amɛteŋ mɔ ni aaasumɔ lɛ titri?”

Ekolɛ Simon ha hetoo kɛ hewoo su, yɛ bɔ ni esusuɔ akɛ sanebimɔ lɛ he ehiaaa lɛ hewɔ akɛ: “Misusuɔ akɛ mɔ ni eŋɔ pii eke lɛ.”

Yesu kɛɛ lɛ akɛ, “obu atɛŋ jogbaŋŋ.” Kɛkɛ ni beni etsɔ ehe ekwɛ yoo lɛ, ekɛɛ Simon akɛ: “Ona nɛkɛ yoo nɛɛ? Mibabote owe nɛɛ, ohaaa mi nu ni mikɛfɔ minaji ahe; shi yoo nɛɛ kɛ yaafonui efɔ minaji ahe, ni ekɛ eyitsɔi etsumɔ. Minaa hu oshɔɔɔ; shi nɛkɛ yoo nɛɛ, kɛjɛ be mli ni miba nɛɛ fɛɛ lɛ, efɔko minaji ahe shɔmɔ. Mu hu, okɛkpaaa miyiŋ; shi nɛkɛ yoo nɛɛ, eŋɔ tsofa-kɛ-ŋma ekpa minaji ahe.”

No hewɔ lɛ yoo lɛ eye ehe odase akɛ ejɛ etsui mli etsake kɛjɛ ejeŋba shara gbɛ lɛ nɔ. No hewɔ lɛ Yesu mu esane lɛ naa ni ekɛɛ: “No hewɔ lɛ miikɛɛo akɛ: Ehe eshai ni fa lɛ, aŋɔfa lɛ, ejaakɛ esumɔɔ babaoo; shi mɔ ni aŋɔ fioo afa lɛ, esumɔɔ fioo.”

Yesu etsɔɔɔ akɛ ekpɛlɛɔ nɔ loo efiɔ jeŋba shara sɛɛ yɛ gbɛ ko gbɛ ko nɔ. Shi moŋ, nii ni ba nɛɛ tsɔɔ bɔ ni ejɛɔ mlihilɛ mli enuɔ nii ahe ehaa mɛi ni tɔɔ yɛ shihilɛi mli shi amɛjieɔ lɛ kpo faŋŋ akɛ nakai feemɔ edɔ amɛ ni no hewɔ lɛ amɛbaa Kristo ŋɔɔ kɛha hejɔɔmɔ lɛ. Yɛ be mli ni Yesu eha yoo lɛ anɔkwa hejɔɔmɔ sɛɛ lɛ, ekɛɛ: “Aŋɔ ohe eshai afao. . . . Ohemɔkɛyeli lɛ ehere oyiwala, yaa yɛ hejɔlɛ mli!” Luka 7:36-50; Mateo 11:28-30.

▪ Te Simon ni fɔ Yesu nine lɛ here lɛ hiɛmɛɛ eha tɛŋŋ?

▪ Namɔ taoɔ Yesu sɛɛ gbɛ lɛ, ni mɛni hewɔ?

▪ Mɛɛ abɛbua ko Yesu kɛtsu nii, ni mɛɛ gbɛ nɔ etsɔɔ bɔ ni ekɔɔ amɛhe yɛ?