Sɛɛnamɔi Ni Jɛɔ Nyɔŋmɔ Wiemɔ Ni Asumɔɔ Lɛ Mli baa
“Suɔmɔ [nilee], ni eeebu ohe. . . . Kɛ oloo lɛ atuu lɛ, eeewo ohiɛ nyam.”—ABƐI 4:6, 8.
1. Mɛni fata Nyɔŋmɔ Wiemɔ ni aaasumɔ yɛ anɔkwale mli lɛ he?
EHE miihia ni Kristofonyo akane Biblia lɛ. Shi kɛlɛ, ekanemɔ kɛkɛ etsɔɔɔ akɛ ayɛ suɔmɔ kɛha Nyɔŋmɔ Wiemɔ lɛ. Ni kɛ mɔ ko kaneɔ Biblia lɛ, shi efeɔ nibii ni Biblia lɛ teɔ shi ewoɔ lɛ hu? Eka shi faŋŋ akɛ, esumɔɔɔ Nyɔŋmɔ Wiemɔ lɛ taakɛ bɔ ni mɔ ni ŋma Lala 119 lɛ sumɔ lɛ. Nyɔŋmɔ Wiemɔ ni esumɔ lɛ ha ehi shi yɛ etaomɔ nii lɛ kɛ gbeekpãmɔ naa.—Lala 119:97, 101, 105.
2. Mɛɛ sɛɛnamɔi jɛɔ nilee ni damɔ Nyɔŋmɔ Wiemɔ lɛ nɔ lɛ mli baa?
2 Mɔ ko shihilɛ ni eeeha ekɛ Nyɔŋmɔ Wiemɔ lɛ akpã gbee lɛ biɔ ni efee tsakemɔi yɛ esusumɔi kɛ eshihilɛ mli be fɛɛ be. Shihilɛ gbɛ ni tamɔ nɛkɛ jieɔ Nyɔŋmɔ nilee, ni ji nilee kɛ saneshishinumɔ ni anáa kɛjɛɔ Biblia lɛ kasemɔ mli, ní akɛtsuɔ nii diɛŋtsɛ lɛ kpo. “Suɔmɔ [nilee], ni eeebu ohe. Buu lɛ, ni eeewo onɔ; kɛ oloo lɛ atuu lɛ, eeewo ohiɛ nyam. Ekɛ anunyam yifii nɔ̃ aaafi oyitso, eeekeo akekre fɛfɛo.” (Abɛi 4:6, 8, 9) Kwɛ bɔ ni eji hewalɛwoo akɛ oooná suɔmɔ oha Nyɔŋmɔ Wiemɔ lɛ ni oha ekudɔ bo! Namɔ sumɔɔɔ ni abu ehe, awo enɔ, ni awo ehiɛ nyam?
Ebaabu Ohe Kɛjɛ Fitemɔ Kwraa Mli
3. Mɛni hewɔ hebuu he hiaa Kristofoi fe bei fɛɛ ní eho lɛ, ni kɛmiijɛ namɔ he?
3 Mɛɛ gbɛ nɔ nilee ni mɔ ko náa kɛjɛɔ Nyɔŋmɔ Wiemɔ lɛ kasemɔ kɛ ekɛ nitsumɔ mli lɛ buɔ ehe yɛ? Nɔ kome ji akɛ, ebuɔ ehe kɛjɛɔ Satan Abonsam he. Yesu tsɔɔ esɛɛnyiɛlɔi lɛ ni amɛsɔle ni ajie amɛ kɛjɛ mɔ fɔŋ lɛ, ni ji Satan dɛŋ. (Mateo 6:13) Ŋmɛnɛ, ehe miihia waa diɛŋtsɛ akɛ wɔkɛ nɛkɛ nibimɔ nɛɛ afata wɔsɔlemɔi ahe. Ashwie Satan kɛ edaimonioi lɛ kɛjɛ ŋwɛi yɛ afi 1914 sɛɛ, ni no hewɔ lɛ, Satan “egiri naakpa, ni ele akɛ be fioo kɛkɛ eyɔɔ.” (Kpojiemɔ 12:9, 10, 12) Yɛ nɛkɛ be nɛɛ mli lɛ, etamɔ nɔ ni emlifu lɛ mli ewo wu waa akɛni eyeee omanye yɛ ta ni ewuɔ eshiɔ mɛi ni “yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ” hewɔ.—Kpojiemɔ 12:17.
4. Abuɔ Kristofoi ahe kɛjɛɔ Satan nɔnyɛɛi kɛ tsɔnei ahe yɛ mɛɛ gbɛ nɔ?
4 Satan ni mli efu lɛ yaa nɔ ekɛ naagbai baa nɛkɛ Kristofoi sɔɔlɔi nɛɛ anɔ, ni ekɛ yiwaa ni naa wa loo gbɛtsii nii krokomɛi baa amɛnitsumɔ lɛ nɔ. Eesumɔ hu ni elaka Maŋtsɛyeli jajelɔi lɛ koni amɛgbala amɛjwɛŋmɔ kɛya nibii tamɔ gbɛi ni amɛbaahe yɛ je lɛ mli, suɔmɔ ni amɛaaná kɛha ogbɔjɔ shihilɛ, heloonaa ninamɔi ataomɔ, kɛ ŋɔɔmɔyeli sɛɛtiumɔ nɔ moŋ fe Maŋtsɛyeli shiɛmɔ nitsumɔ lɛ. Mɛni buɔ Nyɔŋmɔ tsuji anɔkwafoi ahe kɛjɛɔ amɛhe ni amɛaaŋmɛɛ amɛha Satan nɔnyɛɛ loo etsɔne ni aaadu amɛ lɛ he? Eji anɔkwale akɛ, sɔlemɔ, mɔ kɛ Yehowa teŋ wekukpaa ní mli wa, kɛ hemɔkɛyeli ni aaaná akɛ eshiwoi baaba mli anɔkwale lɛ he miihia. Shi nilee ni jɛ Nyɔŋmɔ Wiemɔ lɛ mli kɛ fai shi ni atswaa akɛ aaabo ekaimɔi lɛ atoi lɛ ji nɔ ni kɛ enɛɛmɛi fɛɛ baa. Nɛkɛ kaimɔi nɛɛ tsɔɔ Biblia lɛ kɛ Biblia kasemɔ he woji akanemɔ, Kristofoi akpeei yaa, Ŋmalɛ mli ŋaawoo ni naanyo heyelilɔ kɛhaa lɛ toiboo, loo sɔlemɔ ni akɛjwɛŋɔ Biblia shishitoo mlai ni Nyɔŋmɔ mumɔ lɛ haa wɔkaiɔ lɛ anɔ lɛ nɔ kɛbaa.—Yesaia 30:21; Yohane 14:26; 1 Yohane 2:15-17.
5. Mɛi gbɛ̀i anɔ nilee ni damɔ Nyɔŋmɔ Wiemɔ lɛ nɔ lɛ buɔ wɔhe yɛ?
5 Abuɔ mɛi ni sumɔɔ Nyɔŋmɔ Wiemɔ lɛ ahe yɛ gbɛ̀i krokomɛi anɔ. Ákɛ nɔkwɛmɔnɔ lɛ, amɛtsiɔ amɛhe kɛjɛɔ henumɔŋ nɔnyɛɛ kɛ gbɔmɔtsoŋ helai ni jɛɔ nibii tamɔ tsofai fɔji kɛ nitsumɔ, tawa shɛremɔ, kɛ bɔlɛnamɔ mli jeŋba shara mli kɛbaa lɛ ahe. (1 Korintobii 5:11; 2 Korintobii 7:1) Amɛtsɔɔɔ oshekuyeli loo heguɔgbee wiemɔ nɔ amɛfiteee amɛkɛ mɛi krokomɛi ateŋ naanyobɔɔ. (Efesobii 4:31) Nakai nɔŋŋ amɛpɛiii jeŋ nileei amli nilee ni lakaa mɔ lɛ mli koni eha amɛyiŋ afee amɛ kɔshikɔshi. (1 Korintobii 3:19) Akɛni amɛsumɔɔ Nyɔŋmɔ Wiemɔ lɛ hewɔ lɛ, abuɔ amɛhe kɛjɛɔ nibii ni baanyɛ afite amɛkɛ Nyɔŋmɔ teŋ wekukpaa lɛ, kɛ naanɔ wala he hiɛnɔkamɔ ni amɛyɔɔ lɛ ahe. Amɛbɔɔ mɔdɛŋ amɛyeɔ amɛbuaa amɛkutsoŋbii lɛ ni amɛná Biblia mli shiwoi ni yɔɔ miishɛɛ lɛ amli hemɔkɛyeli, ejaakɛ amɛle akɛ kɛtsɔ no nɔ lɛ, ‘amɛbaahere amɛ kɛ mɛi ni boɔ amɛ toi lɛ fɛɛ yiwala.’—1 Timoteo 4:16.
6. Nilee ní damɔ Nyɔŋmɔ Wiemɔ lɛ nɔ lɛ baanyɛ abu wɔhe yɛ shihilɛi ni mli wawai ashishi po yɛ mɛɛ gbɛ nɔ?
6 Eji anɔkwale akɛ, ‘be kɛ nibii ni aleee ni baa trukaa’ lɛ ninaa mɔ fɛɛ mɔ—ni mɛi ni sumɔɔ Nyɔŋmɔ Wiemɔ lɛ po—fata he. (Jajelɔ 9:11) Adebɔɔ mli osharai, helai ni mli wawai, osharai, loo kpatu gbele baanyɛ aba wɔteŋ mɛi komɛi anɔ. Shi kɛlɛ, abuɔ wɔhe. Oshara ko bɛ ni baanyɛ aye mɔ ko ni sumɔɔ Nyɔŋmɔ Wiemɔ lɛ yɛ anɔkwale mli lɛ awui daa. No hewɔ lɛ, esaaa akɛ wɔfeɔ yeyeeye fe nine yɛ nɔ ni baanyɛ aba wɔnɔ wɔsɛɛ lɛ he. Kɛ́ wɔfee nɔ fɛɛ nɔ ni wɔɔnyɛ koni wɔkɛkwɛ wɔhe nɔ jogbaŋŋ lɛ, ebaahi akɛ wɔshi sane lɛ wɔwo Yehowa dɛŋ, ni wɔkaŋmɛ gbɛ ni shweshweeshwe shihilɛ ni bɛ ŋmɛnɛ lɛ miifite wɔtoiŋjɔlɛ. (Mateo 6:33, 34; Filipibii 4:6, 7) Ha gbohiiashitee he hiɛnɔkamɔ ni yɔɔ diɛŋtsɛ lɛ kɛ shihilɛ kpakpa ni baaba beni Nyɔŋmɔ ‘feɔ nibii fɛɛ ehee’ lɛ ahi ojwɛŋmɔ mli.—Kpojiemɔ 21:5; Yohane 11:25.
Jiemɔ Ohe Kpo akɛ “Sũ Kpakpa”
7. Mɛɛ abɛ Yesu bu asafo babaoo ni ba ni amɛbabo lɛ toi lɛ?
7 Ama bɔ ni ehe hiaa ní wɔná Nyɔŋmɔ Wiemɔ lɛ he jwɛŋmɔ kpakpa lɛ nɔ mi yɛ Yesu abɛbuai lɛ ateŋ ekome mli. Beni Yesu jajeɔ sanekpakpa lɛ yɛ Palestina fɛɛ lɛ, gbɔmɛi asafo babaoo ko bua amɛhe naa ni amɛbo lɛ toi. (Luka 8:1, 4) Shi kɛlɛ, jeee mɛi fɛɛ sumɔ Nyɔŋmɔ Wiemɔ lɛ diɛŋtsɛ. Ŋwanejee ko bɛ he akɛ, mɛi babaoo ba ni amɛbabo lɛ toi ejaakɛ amɛmiisumɔ ni amɛna naakpɛɛ nii, loo akɛni amɛnáa gbɛ ni yɔɔ miishɛɛ ni etsɔɔ nɔ etsɔɔ nii lɛ he miishɛɛ lɛ hewɔ. No hewɔ lɛ, Yesu bu asafo babaoo lɛ abɛ ko akɛ: “Nidulɔ yiŋ etee ewui shwamɔ. Ni beni eshwãa lɛ, eko yanyɔ gbɛ toi, ni anaanaa nɔ, ni ŋwɛi loofɔji ba bakɔlɔ. Ni eko yanyɔ tɛsaa nɔ, ni amrɔ pɛ ni ekwɛ̃ lɛ, eŋala, ejaakɛ enaaa shikpɔŋ jɔlɛ. Ni eko yanyɔ ŋmeii ateŋ, ni ŋmeii lɛ kɛ lɛ kwɛ̃ ni amɛgbe lɛ. Ni eko hu yanyɔ shikpɔŋ kpakpa nɔ, ni ekwɛ̃, ni ewo yibii toi oha.”—Luka 8:5-8.
8. Yɛ Yesu abɛbua lɛ mli lɛ, mɛni ji wui lɛ?
8 Yesu abɛbua lɛ tsɔɔ akɛ, gbɔmɛi baabo sanekpakpa lɛ toi yɛ gbɛ̀i srɔtoi anɔ, ni ebaadamɔ bɔ ni toibolɔ lɛ tsui yɔɔ lɛ nɔ. Wui ni aduɔ lɛ ji “Nyɔŋmɔ wiemɔ lɛ.” (Luka 8:11) Aloo taakɛ abɛbua lɛ he sane kroko ni aŋma afɔ̃ shi lɛ kɛɔ lɛ, wui lɛ ji “maŋtsɛyeli lɛ he wiemɔ lɛ.” (Mateo 13:19) Yesu baanyɛ ekɛ wiemɔi nɛɛ ateŋ eko fɛɛ eko atsu nii, ejaakɛ Nyɔŋmɔ Wiemɔ lɛ saneyitso ji ŋwɛi Maŋtsɛyeli ni yɔɔ Yesu Kristo shishi ákɛ Maŋtsɛ ni Yehowa baatsɔ nɔ abu maŋtsɛ ni eji lɛ bem ni etse egbɛi lɛ he lɛ. (Mateo 6:9, 10)[1] Kɛ nakai ni lɛ, belɛ wui lɛ ji sanekpakpa lɛ he shɛɛ sane ni yɔɔ Nyɔŋmɔ Wiemɔ, Biblia lɛ mli lɛ.[2] Yehowa Odasefoi maa Maŋtsɛyeli shɛɛ sane nɛɛ nɔ mi beni amɛshwãa wui lɛ yɛ Nidulɔ lɛ diɛŋtsɛ, ni ji Yesu Kristo kasemɔ mli lɛ. Te gbɔmɛi hereɔ amɛnɔ amɛhaa tɛŋŋ?
9. Mɛni he mfoniri wui ni yashwieɔ (a) gbɛ toi lɛ feɔ? (b) tɛsaa nɔ lɛ feɔ? (d) ŋmeii ateŋ lɛ feɔ?
9 Yesu kɛɛ akɛ, wui lɛ ekomɛi yashwie gbɛ toi, ni anaanaa nɔ. Enɛ kɔɔ mɛi ni naaa dekã kwraa amɛhaaa Maŋtsɛyeli wui lɛ koni ekwɛ̃ yɛ amɛtsuii amli lɛ ahe. Dani amɛbaanyɛ amɛná suɔmɔ amɛha Nyɔŋmɔ Wiemɔ lɛ, “Abonsam baa ni abashaa wiemɔ lɛ yɛ amɛtsuiiaŋ, koni amɛkahe amɛye ni ahere amɛyiwala.” (Luka 8:12) Wui lɛ ekomɛi yashwie tɛsaa nɔ. Enɛ kɔɔ mɛi ni náa Biblia mli shɛɛ sane lɛ he miishɛɛ, shi amɛhaaa ená amɛtsuii anɔ hewalɛ lɛ ahe. Kɛ shitee-kɛ-woo ba, loo kɛ amɛna akɛ ewa akɛ amɛkɛ Biblia ŋaawoo aaatsu nii lɛ, “amɛkwaa” ejaakɛ amɛbɛ shishifã. (Luka 8:13) Agbɛnɛ hu mɛi ni nuɔ sane lɛ, shi ‘shihilɛ lɛ mli yeyeeyefeemɔi kɛ ninámɔi kɛ ŋɔɔmɔyelii’ lɛ yeɔ amɛnɔ lɛ hu yɛ. Naagbee mli lɛ, taakɛ ŋmeii tsurɔɔ kwɛ̃ɛnii lɛ, ‘etsurɔɔ amɛ.’—Luka 8:14.
10, 11. (a) Namɛi shikpɔŋ kpakpa lɛ feɔ amɛhe mfoniri? (b) Mɛni esa akɛ wɔfee koni ‘wɔhiɛ’ Nyɔŋmɔ Wiemɔ lɛ yɛ wɔtsuii amli?
10 Naagbee kwraa lɛ, wui ni yashwie sũ kpakpa nɔ lɛ hu yɛ. Enɛ kɔɔ mɛi ni kɛ “tsui krɔŋŋ ni hi” kpɛlɛɔ shɛɛ sane lɛ nɔ lɛ ahe. Taakɛ bɔ ni eji lɛ, wɔteŋ mɔ fɛɛ mɔ baasumɔ ni efata kuu nɛɛ he. Shi kɛlɛ, yɛ naagbee lɛ, Nyɔŋmɔ susumɔi ji nɔ ni he hiaa. (Abɛi 17:3; 1 Korintobii 4:4, 5) E-Wiemɔ lɛ kɛɔ akɛ, wɔkɛ nibii ni wɔfeɔ kɛjɛ ŋmɛnɛ nɔ kɛyashi wɔgbele mli loo kɛyashi Nyɔŋmɔ kɛ nibii agbɛjianɔtoo fɔŋ nɛɛ baaba naagbee lɛ baatsɔɔ akɛ wɔyɛ “tsui krɔŋŋ ni hi.” Kɛji wɔkɛ jwɛŋmɔ kpakpa here Maŋtsɛyeli shɛɛ sane lɛ nɔ klɛŋklɛŋ lɛ, ehi. Shi kɛlɛ, mɛi ni yɔɔ tsui krɔŋŋ ni hi lɛ kpɛlɛɔ Nyɔŋmɔ Wiemɔ lɛ nɔ ni “amɛkɛ tsuishiŋmɛɛ woɔ yibii.”—Luka 8:15.
11 Gbɛ kome pɛ ni hi jogbaŋŋ ni wɔɔtsɔ nɔ wɔhiɛ Nyɔŋmɔ Wiemɔ lɛ mli yɛ wɔtsui mli lɛ ji ni wɔkane ni wɔkase yɛ teemɔŋ ni wɔkɛ wɔnanemɛi heyelilɔi afee ekome kɛkase. Nɔ ni fata enɛ he ji mumɔŋ niyenii ni atsɔɔ gbɛjianɔtoo ni ahala akɛ ekwɛ ni etsu Yesu sɛɛnyiɛlɔi anɔkwafoi lɛ amumɔŋ hiamɔ nii ahe nii lɛ nɔ akɛhaa lɛ ni wɔkɛaatsu nii jogbaŋŋ kɛmɔ shi. (Mateo 24:45-47) Kɛtsɔ nakai gbɛ nɔ lɛ, suɔmɔ kanyaa mɛi ni hiɛɔ Nyɔŋmɔ Wiemɔ lɛ yɛ amɛtsuii amli lɛ ni “amɛkɛ tsuishiŋmɛɛ woɔ yibii.”
12. Mɛni ji yibii ni esa akɛ wɔkɛ tsuishiŋmɛɛ awo lɛ?
12 Mɛni yibii shikpɔŋ kpakpa lɛ woɔ? Yɛ adebɔɔ mli lɛ, wui kwɛ̃ɔ ni amɛtsɔmɔɔ tsei ni woɔ yibii ní wui kome too lɛ nɔŋŋ yɔɔ mli, ni baanyɛ agbɛ ashwã ni ewo yibii kroko. Nakai nɔŋŋ yɛ mɛi ni yɔɔ tsui krɔŋŋ ni hi lɛ agbɛfaŋ lɛ, wiemɔ lɛ he wui lɛ kwɛ̃ɔ yɛ amɛmli, ni ehaa amɛnáa mumɔŋ hiɛyaa kɛyashi be mli ni amɛ hu amɛbaanyɛ amɛdu wui lɛ yɛ mɛi krokomɛi atsuii amli. (Mateo 28:19, 20) Ni amɛkɛ tsuishiŋmɛɛ tsuɔ amɛnidumɔ lɛ he nii. Yesu tsɔɔ bɔ ni tsuishiŋmɛɛ he hiaa yɛ nidumɔ mli beni ekɛɛ akɛ: “Mɔ ni hiɛɔ mli kɛwulaa shi lɛ, lɛ aaahere eyiwala. Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:13, 14.
‘Yibii ní Wɔɔwo yɛ Nitsumɔ Kpakpa Fɛɛ Nitsumɔ Kpakpa Mli’
13. Mɛɛ sɔlemɔ Paulo sɔle ni kɛ yibiiwoo kɛ Nyɔŋmɔ Wiemɔ lɛ he nilee tsaa?
13 Bɔfo Paulo hu wie bɔ ni ehe ehia akɛ wɔwo yibii lɛ he, ni ekɛ yibii ni wɔɔwo lɛ tsa Nyɔŋmɔ Wiemɔ lɛ. Esɔle akɛ enanemɛi heyelilɔi lɛ ‘ayimɔ obɔ̃bɔ̃ kɛ Nyɔŋmɔ suɔmɔnaa nii alee yɛ mumɔŋ nilee kɛ shishinamɔ fɛɛ mli; koni nyɛnyiɛ bɔ ni sa Yehowa lɛ ni asa ehiɛ kwraa, ni nyɛwo yibii yɛ nitsumɔ kpakpa fɛɛ nitsumɔ kpakpa mli.’—Kolosebii 1:9, 10; Filipibii 1:9-11.
14-16. Yɛ Paulo sɔlemɔ lɛ kɛ gbeekpamɔ naa lɛ, mɛɛ yibii mɛi ni sumɔɔ Nyɔŋmɔ Wiemɔ lɛ woɔ?
14 No hewɔ lɛ, Paulo tsɔɔ akɛ Biblia mli nilee ni aaaná kɛkɛ lɛ diɛŋtsɛ faaa. Shi moŋ, kɛ wɔsumɔɔ Nyɔŋmɔ Wiemɔ lɛ, ebaakanya wɔ koni ‘wɔnyiɛ bɔ ni sa Yehowa hiɛ’ kɛtsɔ ‘nitsumɔ kpakpa fɛɛ nitsumɔ kpakpa mli yibii ni wɔɔwo’ lɛ nɔ. Mɛɛ nitsumɔ kpakpa? Maŋtsɛyeli lɛ he sanekpakpa lɛ ni wɔshiɛɔ lɛ ji Kristofoi anitsumɔ ni ekaaa yɛ naagbee gbii nɛɛ amli. (Marko 13:10) Kɛfata he lɛ, mɛi ni sumɔɔ Nyɔŋmɔ Wiemɔ lɛ feɔ nɔ fɛɛ nɔ ni amɛaanyɛ koni amɛtsu onia daa ni amɛkɛfi nitsumɔ nɛɛ sɛɛ. Amɛnyaa nɛkɛ hegbɛ nɛɛ he, ejaakɛ amɛle akɛ “tsuijurɔ naa halɔ Nyɔŋmɔ sumɔɔ.” (2 Korintobii 9:7) Amɛtooyelii lɛ ji nɔ ni akɛwoɔ Betel tsũi ni fa fe oha ni yɔɔ, ni ajɛɔ jɛmɛ akudɔɔ Maŋtsɛyeli shiɛmɔ nitsumɔ lɛ, ni yɛ ekomɛi amli lɛ akalaa Bibliai kɛ Biblia kasemɔ he woji lɛ ahe nyɔji. Amɛtooyelii lɛ hu yeɔ ebuaa ni akɛwoɔ Kristofoi akpeei wuji kɛ nɔkwɛlɔi gbɛfalɔi, maŋsɛɛ sanekpakpa jajelɔi, kɛ mɛi krokomɛi ni yɔɔ be-fɛɛ sanekpakpa jajemɔ lɛ mli ni atsuɔ amɛ lɛ ahe nyɔji.
15 Nɔ ni fata nitsumɔi kpakpai ahe hu ji anɔkwa jamɔhei amaamɔ kɛ ekramɔ. Nyɔŋmɔ Wiemɔ lɛ he suɔmɔ kanyaa ejálɔi lɛ koni amɛkwɛ ni akaku hiɛ afɔ̃ Kpeei Asai kɛ Maŋtsɛyeli Asai anɔ. (Okɛto Nehemia 10:39 he.) Akɛni aŋmaa Nyɔŋmɔ gbɛi yɛ tsũi ni tamɔ nɛkɛ hiɛ hewɔ lɛ, ehe miihia ni aha emligbɛ ni ekponɔgbɛ fɛɛ atse ni efee fɛo koni mɛi ni jáa yɛ asai ni tamɔ nɛkɛ mli lɛ akwɛ ni heguɔgbee ko akaba amɛjeŋba he. (2 Korintobii 6:3) Kristofoi komɛi nyɛɔ amɛfeɔ babaoo. Nyɔŋmɔ Wiemɔ lɛ he suɔmɔ tsirɛɔ amɛ ni amɛfãa gbɛ kɛyaa hei ni yɔɔ shɔŋŋ bɔni afee ni amɛyaye amɛbua kɛmamɔ jamɔhei heei yɛ je lɛŋ hei ni yelikɛbuamɔ ehia amɛ yɛ ohia loo tsumaa he ŋaai ni amɛbɛ lɛ hewɔ lɛ.—2 Korintobii 8:14.
16 Nɔ ni fata ‘nitsumɔ kpakpa fɛɛ nitsumɔ kpakpa mli yibii ni aaawo’ lɛ he hu ji weku gbɛnaa nii ahe nii ni wɔɔtsu kɛ nanemɛi Kristofoi ahe ni wɔɔsusu. Nyɔŋmɔ Wiemɔ lɛ he suɔmɔ kanyaa wɔ koni wɔsusu mɛi ni ji “hemɔkɛyeli lɛ webii lɛ” ahiamɔ nii ahe ni ‘wɔkase Nyɔŋmɔ jamɔ hetuu-kɛhamɔ yɛ wɔ diɛŋtsɛ wɔshia mli.’ (Galatabii 6:10; 1 Timoteo 5:4, 8) Yɛ enɛ mli lɛ, eji nitsumɔ kpakpa akɛ wɔɔsara mɛi ni he yeɔ lɛ, ni wɔshɛje mɛi ni yeɔ awerɛho lɛ amii. Ni kwɛ nitsumɔ kpakpa ni asafoŋ onukpai kɛ Hospital Liaison Committee lɛ tsuɔ kɛyeɔ buaa aŋkroaŋkroi ni kɛ tsofafeemɔ mli naagbai kpeɔ lɛ! (Bɔfoi lɛ Asaji 5:29) Agbɛnɛ osharai babaoo ni yaa nɔ—ni ekomɛi ji adebɔɔ mli nɔ̃, ni ekrokomɛi lɛ jɛ adesai abuuluufeemɔ mli lɛ hu yɛ. Kɛtsɔ Nyɔŋmɔ mumɔ lɛ yelikɛbuamɔ nɔ lɛ, Yehowa Odasefoi ená gbɛi kpakpa yɛ shikpɔŋ lɛ nɔ hei babaoo, yɛ yelikɛbuamɔ ni amɛfeɔ oya ni amɛkɛyahaa nanemɛi heyelilɔi kɛ mɛi krokomɛi ni osharai eshara amɛ lɛ hewɔ. Enɛɛmɛi fɛɛ ji yibii kpakpai ni mɛi ni sumɔɔ Nyɔŋmɔ Wiemɔ lɛ jieɔ lɛ kpo.
Wɔsɛɛ Be Sɛɛnamɔi ni Yɔɔ Nyam
17, 18. (a) Mɛni ji nɔ ni atsɔ Maŋtsɛyeli wui adumɔ lɛ nɔ atsu? (b) Mɛɛ nibii ni he hiaa waa diɛŋtsɛ etsɛŋ ni mɛi ni sumɔɔ Nyɔŋmɔ Wiemɔ lɛ baana?
17 Maŋtsɛyeli wui ni aduɔ lɛ miiya nɔ ekɛ sɛɛnamɔi babaoo miiha adesai. Yɛ nyɛsɛɛ afii fioo lɛ mli lɛ, daa afi lɛ, gbɔmɛi ni fa fe 300,000[3] ŋmɛɔ gbɛ ni Biblia mli shɛɛ sane lɛ heɔ shi yɛ amɛtsuii amli aahu akɛ amɛ́jɔɔ amɛwala nɔ amɛha Yehowa ni amɛkɛ nu mli baptisimɔ efee he okadi. Mɛɛ wɔsɛɛ be ni yɔɔ miishɛɛ mɛɔ amɛ nɛkɛ!
18 Mɛi ni sumɔɔ Nyɔŋmɔ Wiemɔ lɛ le akɛ etsɛŋ ni Yehowa Nyɔŋmɔ baate shi koni ewo egbɛi lɛ hiɛ nyam. Abaakpata “Babilon kpeteŋkpele lɛ,” ni ji jeŋ apasa jamɔ maŋtsɛyeli lɛ hiɛ. (Kpojiemɔ 18:2, 8) Kɛkɛ lɛ, Maŋtsɛ Yesu Kristo baakpata mɛi ni kpoɔ akɛ amɛaahi shi yɛ Nyɔŋmɔ Wiemɔ lɛ kɛ gbeekpamɔ naa lɛ ahiɛ. (Lala 2:9-11; Daniel 2:44) No sɛɛ lɛ, Nyɔŋmɔ Maŋtsɛyeli lɛ baaha wɔye wɔhe kɛjɛ awuiyeli, ta, kɛ osharai krokomɛi ahe daa. Ehe ebahiaŋ ni wɔshɛje mɛi krokomɛi amii yɛ piŋmɔ, hela, kɛ gbele hewɔ dɔŋŋ.—Kpojiemɔ 21:3, 4.
19, 20. Mɛɛ wɔsɛɛ ni yɔɔ nyam mɛɔ mɛi ni sumɔɔ Nyɔŋmɔ Wiemɔ lɛ yɛ anɔkwale mli lɛ?
19 Kwɛ nitsumɔi kpakpai ni yɔɔ nyam ni mɛi ni sumɔɔ Nyɔŋmɔ Wiemɔ lɛ baatsu yɛ nakai beaŋ! Mɛi ni baafo Harmagedon lɛ baaje shishi kɛ nitsumɔ ni yɔɔ miishɛɛ, akɛ amɛaatsake shikpɔŋ nɛɛ ni amɛfee lɛ paradeiso. Amɛbaaná hegbɛ ni yɔɔ nyam akɛ amɛaasaa amɛhe kɛtsu adesai ni egboi ni amrɔ nɛɛ amɛjɔɔ amɛhe yɛ gbonyobu lɛ mli yɛ Nyɔŋmɔ kaimɔ mli kɛ gbɛkpamɔ akɛ, amɛaaná gbohiiashitee lɛ mli gbɛfaŋ nɔ lɛ hiamɔ nii ahe nii. (Yohane 5:28, 29) Yɛ nakai be lɛ mli lɛ, Jeŋ Muu Fɛɛ Nuntsɔ Maŋtsɛ Yehowa kɛ gbɛtsɔɔmɔ baatsɔ e-Bi ni ewo enɔ, Yesu Kristo nɔ eha shikpɔŋ lɛ nɔ bii. ‘Abaagbele wolokpoi anaa,’ ni ebaajie famɔi ni Yehowa kɛbaaha yɛ shihilɛ yɛ jeŋ hee lɛ mli lɛ kpo.—Kpojiemɔ 20:12.
20 Yɛ Yehowa be ni sa mli lɛ, ebaahole Kristofoi anɔkwafoi akuu ni afɔ amɛ mu lɛ fɛɛ anɔ kɛya amɛŋwɛi nyɔmɔwoo akɛ “Kristo nanemɛi niyelɔi” lɛ mli. (Romabii 8:17) Abaahole adesai fɛɛ ni yɔɔ shikpɔŋ lɛ nɔ, ni sumɔɔ Nyɔŋmɔ Wiemɔ lɛ anɔ kɛya gbɔmɔtsoŋ kɛ jwɛŋmɔŋ emuuyeli mli yɛ Kristo Afi Akpe Nɔyeli lɛ mli. Kɛ́ amɛye anɔkwa yɛ naagbee kaa lɛ mli lɛ, akɛ naanɔ wala baawo amɛ nyɔmɔ ni amɛbaaná “Nyɔŋmɔ bii lɛ anunyam heyeli lɛ” mli ŋɔɔmɔ. (Romabii 8:21; Kpojiemɔ 20:1-3, 7-10) Mɛɛ be ni yɔɔ miishɛɛ eeeji nɛkɛ! Eji anɔkwale akɛ, kɛji Yehowa kɛ ŋwɛi loo shikpɔŋ nɔ hiɛnɔkamɔ eha wɔ jio, suɔmɔ kɛha e-Wiemɔ lɛ kɛ faishitswaa akɛ wɔɔhi shi kɛ nilee ni Nyɔŋmɔ gbeyeishemɔ yɔɔ mli lɛ baabu wɔhe. Ni yɛ wɔsɛɛ be mli lɛ, ‘eeewo wɔhiɛ nyam ejaakɛ wɔloo lɛ atuu.’—Abɛi 4:6, 8.
Ani Obaanyɛ Otsɔɔ Mli?
◻ Suɔmɔ kɛha Nyɔŋmɔ Wiemɔ lɛ baanyɛ abu wɔhe yɛ mɛɛ gbɛ nɔ?
◻ Mɛni ji wu ni yɔɔ Yesu abɛbua lɛ mli lɛ, ni te aduɔ lɛ ahaa tɛŋŋ?
◻ Te wɔɔfee tɛŋŋ wɔtsɔɔ akɛ “shikpɔŋ kpakpa” ji wɔ?
◻ Mɛɛ sɛɛnamɔi mɛi ni sumɔɔ Nyɔŋmɔ Wiemɔ lɛ baanyɛ akpa gbɛ?
[Mfoniri ni yɔɔ baafa 16]
Wui ni yɔɔ Yesu abɛbua lɛ mli lɛ feɔ sanekpakpa shɛɛ sane ni yɔɔ Nyɔŋmɔ Wiemɔ lɛ mli lɛ he mfoniri
[He ni Sane lɛ Jɛ]
Garo Nalbandian
[Mfoniri ni yɔɔ baafa 17]
Yehowa Odasefoi kaseɔ Nidulɔ Kpeteŋkpele lɛ
[Mfonirii ni yɔɔ baafa 18]
Mɛi ni baafo Harmagedon lɛ baaye shikpɔŋ nɔ yibii lɛ mli ŋɔɔmɔ