Dii Nyɔŋmɔ Toiŋjɔlɛ Sɛɛ yɛ Weku Shihilɛ Mli
“Nyɛ maji lɛ amli akutsei lɛ, nyɛkɛhaa Yehowa, nyɛkɛ anunyam kɛ hewalɛ ahaa Yehowa.”—LALA 96:7.
1. Mɛɛ shishijee Yehowa kɛha weku shihilɛ?
YEHOWA je weku shihilɛ shishi yɛ toiŋjɔlɛ kɛ miishɛɛ mli beni efee klɛŋklɛŋ nuu kɛ klɛŋklɛŋ yoo lɛ ekome yɛ gbalashihilɛ mli lɛ. Yɛ anɔkwale mli lɛ, Adam na miishɛɛ aahu akɛ ejie enyamɔ lɛ kpo yɛ klɛŋklɛŋ lalafoo wiemɔ ni aŋma afɔ̃ shi lɛ mli: “Agbɛnɛ enɛ ji wu ni jɛ miwui lɛ amli kɛ loo ni jɛ miheloo lɛ mli; aaatsɛ mɔnɛ yoo, ejaakɛ nuu mli ajie lɛ kɛjɛ.”—1 Mose 2:23.
2. Mɛni yɔɔ Nyɔŋmɔ jwɛŋmɔ mli kɛha gbalashihilɛ, kɛfata miishɛɛ ni eeeha ebii ni ji adesai aná lɛ he?
2 Beni Nyɔŋmɔ to gbalashihilɛ kɛ weku gbɛjianɔtoo lɛ shishi lɛ, no mli lɛ nibii babaoo yɛ ejwɛŋmɔ mli fe miishɛɛ kɛkɛ ni eeeha ebii ni ji adesai lɛ aná. Eesumɔ ni amɛfee esuɔmɔnaa nii. Nyɔŋmɔ kɛɛ klɛŋklɛŋ hefatalɔi enyɔ lɛ akɛ: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋ looi, kɛ ŋwɛi loofɔji, kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” (1 Mose 1:28) Eji nitsumɔ ni nyɔmɔwoo yɔɔ mli diɛŋtsɛ. Kwɛ miishɛɛ ni kulɛ Adam, Hawa, kɛ amɛ wɔsɛɛ be mli bii lɛ baaná, eji klɛŋklɛŋ gbalashihilɛ mli hefatalɔi lɛ fee Yehowa suɔmɔnaa nii yɛ toiboo mli kulɛ!
3. Mɛni ataoɔ koni wekui anyɛ amɛkɛ Nyɔŋmɔ jamɔ hetuu-kɛhamɔ ahi shi?
3 Shi ŋmɛnɛ po, wekui naa miishɛɛ ni fe fɛɛ, kɛ amɛtsu nii yɛ ekomefeemɔ mli amɛkɛfee Nyɔŋmɔ suɔmɔnaa nii. Ni mɛɛ gbɛkpamɔi ni nɔ bɛ wekui ni feɔ toiboo nɛɛ yɔɔ nɛkɛ! Bɔfo Paulo ŋma akɛ: “Nyɔŋmɔ jamɔ he yɛ sɛɛnamɔ yɛ nii fiaa mli, ni eyɛ wala ni yɔɔ agbɛnɛ nɛɛ, kɛ nɔ ni baaba lɛ he shiwoo.” (1 Timoteo 4:8) Wekui ni kɛ anɔkwa Nyɔŋmɔ jamɔ hetuu-kɛhamɔ hiɔ shi lɛ nyiɛɔ Yehowa Wiemɔ lɛ mli shishitoo mlai asɛɛ, ni amɛfeɔ esuɔmɔnaa nii. Amɛdiɔ Nyɔŋmɔ toiŋjɔlɛ sɛɛ, ni amɛnaa miishɛɛ yɛ “wala ni yɔɔ agbɛnɛ nɛɛ” mli.
Weku Shihilɛ Ebaje Oshara Mli
4, 5. Mɛni hewɔ abaanyɛ akɛɛ akɛ, weku shihilɛ yɛ oshara mli yɛ jeŋ fɛɛ bianɛ lɛ?
4 Eyɛ faŋŋ akɛ wɔnaaa toiŋjɔlɛ kɛ miishɛɛ yɛ weku fɛɛ weku mli. Beni etsɛɔ wiemɔ kɛjɛɔ nikasemɔ ko ni gbɔmɛi ayifalɛ he nikasemɔ kuu ko ni atsɛɔ amɛ Population Council lɛ fee lɛ mli lɛ, The New York Times lɛ kɛɛ: “Weku shihilɛ he gbɛjianɔtoo lɛ miitsɔ tsakemɔi wuji amli yɛ maji ni yeɔ ohia kɛ maji ni yɔɔ shika lɛ fɛɛ mli.” Abɔ amaniɛ akɛ, mɔ ko ni kase enɛ he nii lɛ kɛɛ: “Jwɛŋmɔ ni ahiɛ akɛ weku lɛ ji ekomefeemɔ kuu ko ni yɔɔ shiŋŋ, ni yɔɔ tswãa, ni tsɛ lɛ sɔmɔɔ akɛ nihãlɔ, ni nyɛ lɛ sɔmɔɔ akɛ mɔ ni kwɛɔ henumɔ nɔ ni ekɛhaa lɛ ji adesã. Anɔkwale lɛ ji akɛ, nii ni yaa nɔ bianɛ, tamɔ nyɛmɛi ni boteko gbalashihilɛ mli, gbalamlitsemɔ ni yaa hiɛ, [kɛ] wekui bibii . . . miiya nɔ yɛ jeŋ fɛɛ.” Yɛ nɔ ni yaa nɔ nɛɛ hewɔ lɛ, wekui akpekpei abɔ damɔɔɔ shi shiŋŋ, ni amɛbɛ toiŋjɔlɛ kɛ miishɛɛ, ni pii miifite hu. Gbalamlitsemɔ ni yaa nɔ yɛ Spain lɛ tee hiɛ kɛyashɛ 1 yɛ gbalashihilɛi 8 mli, yɛ afii ohai 20 lɛ naagbee afii nyɔŋma lɛ mli—etũ kɛjɛ 1 yɛ 100 mli, yɛ afii 25 ni ba kɛtsɔ hiɛ lɛ mli. Abɔ amaniɛ akɛ Britania ji he ni atseɔ gbala mli fe fɛɛ yɛ Europa lɛ ateŋ ekome—gbalashihilɛi 10 mli 4 fiteɔ. Fɔlɔ-kome wekui hu efa yɛ nakai maŋ lɛ mli.
5 Etamɔ nɔ ni ewa kɛha mɛi komɛi akɛ amɛaamɛ ni atse gbala mli dã. Mɛi pii hoɔ yuu kɛyaa ‘Tsakpãa Mlitsemɔ Gbatsu’ ni bɛŋkɛ Tokyo, yɛ Japan lɛ he. Nɛkɛ Shinto sɔlemɔtsu nɛɛ kpɛlɛɔ faikpamɔ kɛha gbalamlitsemɔ kɛ wekukpaai krokomɛi ni asumɔɔɔ lɛ fitemɔ nɔ. Jálɔ fɛɛ jálɔ ŋmãa efaikpamɔ lɛ yɛ tso tao fɛtɛfɛtɛ ko nɔ, ni ekɛtsotsoroɔ shi yɛ he ni gbatsu lɛ yɔɔ lɛ, ni esɔleɔ kɛhaa hetoo. Tokyo adafitswaa wolo ko kɛɛ akɛ, beni ato gbatsu lɛ shishi aaafee afii oha ni eho nɛ lɛ, “maŋ lɛ mli jarayelɔi niiatsɛmɛi lɛ aŋamɛi ŋmalaa sɔlemɔi ni amɛmiibi ni amɛ wumɛi lɛ ashi amɛ hemɛi lɛ ni amɛku amɛsɛɛ kɛba amɛŋɔɔ.” Shi ŋmɛnɛ, faikpamɔi lɛ pii ji nɔ ni akɛmiitse gbala mli, jeee kɛha esaamɔ. Ŋwanejee ko bɛ he akɛ, weku shihilɛ ebaje oshara mli yɛ jeŋ fɛɛ. Ani esa akɛ Kristofoi anaa akpɛ amɛhe yɛ enɛ he? Dabi, ejaakɛ Biblia lɛ hãa wɔnaa nɔ̃ hewɔ ni ŋmɛnɛŋmɛnɛ gbii nɛɛ amli weku lɛ yɔɔ oshara mli lɛ mli.
Mɛni Hewɔ Weku lɛ Yɔɔ Oshara Mli?
6. Yɛ mɛɛ gbɛ nɔ 1 Yohane 5:19 kɔɔ oshara ni weku lɛ yɔɔ mli ŋmɛnɛ lɛ he?
6 Yiŋtoo lɛ ekome ni eha weku lɛ ebaje oshara mli ŋmɛnɛ lɛ ji enɛ: “Jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Mɛni wɔbaanyɛ wɔkpa gbɛ kɛjɛ mɔ fɔŋ, Satan Abonsam ŋɔɔ? Eji efɔŋfeelɔ, amalelɔ ni bɛ jeŋba. (Yohane 8:44) Ebɛ naakpɛɛ mɔ akɛ no hewɔ ni eje lɛ kɛ ehe woɔ shishiumɔ kɛ jeŋba shara, ni kpataa weku shihilɛ hiɛ lɛ mli nakai lɛ! Satan hewalɛ miitao akpata gbalashihilɛ ni Yehowa to he gbɛjianɔ, ni yɔɔ Nyɔŋmɔ gbɛjianɔtoo lɛ sɛɛ lɛ hiɛ, koni ekɛ weku shihilɛ ni toiŋjɔlɛ yɔɔ mli lɛ aba naagbee.
7. Subaŋi ni mɛi pii jieɔ lɛ kpo yɛ naagbee gbii nɛɛ amli lɛ baanyɛ asa wekui ahe yɛ mɛɛ gbɛ nɔ?
7 Yiŋtoo kroko ni kɛ weku naagbai baa, ni haoɔ adesai bianɛ ji nɔ ni atsɔɔ yɛ 2 Timoteo 3:1-5 lɛ. Paulo gbalɛ wiemɔi ni aŋma yɛ jɛmɛ lɛ tsɔɔ akɛ, “naagbee gbii” lɛ amli wɔyɔɔ lɛ. Wekui nyɛŋ ana toiŋjɔlɛ kɛ miishɛɛ, kɛ amɛmli bii lɛ ji “hesuɔlɔi, shika-suɔlɔi, shwãlɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ.” Weku ko nyɛŋ ana miishɛɛ diɛŋtsɛ kɛji akɛ emli bii lɛ ateŋ mɔ kome po edɔɔɔ mɔ he loo eyeee anɔkwa. Mɛɛ toiŋjɔlɛ baanyɛ ahi weku shihilɛ ko mli kɛ́ shiabii lɛ ateŋ mɔ ko hiɛ yɛ la ni eji kpaŋmɔ mlikulɔ? Nɔ ni ehiii kwraa lɛ, te aaafee tɛŋŋ ni toiŋjɔlɛ kɛ miishɛɛ aaahi shi beni weku lɛ mli bii ji mɛi ni sumɔɔ shwɛmɔ kɛ ŋɔɔmɔ fe Nyɔŋmɔ? Enɛɛmɛi ji gbɔmɛi ni yɔɔ jeŋ ni Satan yeɔ nɔ nɛɛ mli lɛ asubaŋi. Ŋwanejee ko bɛ he akɛ, no hewɔ ni weku miishɛɛ efee nɔ ni anaaa yɛ naagbee gbii nɛɛ amli lɛ!
8, 9. Gbekɛbii asubaŋ baanyɛ asa weku miishɛɛnamɔ he yɛ mɛɛ gbɛ nɔ?
8 Agbɛnɛ hu yiŋtoo kroko hewɔ ni toiŋjɔlɛ kɛ miishɛɛ bɛ wekui pii amli lɛ jɛ gbekɛbii ajeŋba gbonyo. Beni Paulo gba bɔ ni shihilɛ baaji yɛ naagbee gbii lɛ amli lɛ, egba akɛ gbekɛbii pii baafee fɔlɔi anɔ toigbolɔi. Kɛ oji gbekɛ lɛ, ani osubaŋ yeɔ buaa ni ehãa oweku lɛ naa toiŋjɔlɛ kɛ miishɛɛ?
9 Gbekɛbii komɛi baaa amɛjeŋ yɛ gbɛ kpakpa nɔ. Akɛ nɔkwɛmɔ nɔ lɛ, gbekɛ nuu fioo ko ŋma wolo gbonyo nɛɛ eyaha etsɛ: “Kɛ okɛ mi eyaaa Alexandria lɛ, miŋmaŋ bo wolo, ni mikɛ bo ewieŋ, loo ni makɛɛ bo akɛ yaaba, ni kɛji akɛ oshi mi otee Alexandria lɛ, mimɔŋ onine mli ni miŋaŋ bo kwraa dɔŋŋ. Nɔ ni baaba nɛ, kɛ okɛ mi eyaaa . . . Shi okɛ [saŋku] abaha mi, miikpao fai. Kɛ okɛbaaa lɛ, miyeŋ nii ni minuŋ nu. Bo oyɔɔ jɛmɛ lɛ!” Ani enɛ tamɔ ŋmɛnɛŋmɛnɛ beaŋ wolo? Ojogbaŋŋ, aŋma nakai wolo ni gbekɛ nuu ko ŋma eha etsɛ lɛ yɛ blema Mizraim, nɔ ni fe afii 2,000 ni eho nɛ.
10. Mɛɛ gbɛ nɔ gbekɛbii baanyɛ aye abua amɛ wekui ni amɛdi toiŋjɔlɛ ni Nyɔŋmɔ gbeyeishemɔ yɔɔ mli sɛɛ?
10 Nakai Mizraim gbekɛ nuu lɛ subaŋ haaa weku toiŋjɔlɛ aya hiɛ. Shi, nibii ni hiɛdɔɔ yɔɔ mli kwraa fe enɛ yaa nɔ yɛ wekui amli yɛ naagbee gbii nɛɛ amli. Kɛlɛ, nyɛ mɛi ni nyɛji gbekɛbii lɛ baanyɛ aye abua nyɛ weku, koni amɛdi toiŋjɔlɛ ni Nyɔŋmɔ gbeyeishemɔ yɔɔ mli sɛɛ. Yɛ mɛɛ gbɛ nɔ? Kɛtsɔ Biblia mli ŋaawoo nɛɛ toiboo nɔ: “Nyɛ bii lɛ, nyɛboa nyɛfɔlɔi atoi yɛ nibii fɛɛ gbɛfaŋ; ejaakɛ no sa Nuntsɔ lɛ hiɛ jogbaŋŋ.”—Kolosebii 3:20.
11. Te fɔlɔi aaafee tɛŋŋ amɛye amɛbua amɛbii ni amɛtsɔmɔ Yehowa tsuji anɔkwafoi?
11 Ni nyɛ fɔlɔi lɛ hu? Nyɛjɛa suɔmɔ mli nyɛyea nyɛbuaa nyɛbii lɛ ni amɛtsɔmɔ Yehowa tsuji anɔkwafoi. Abɛi 22:6 kɛɔ akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.” Ŋmalɛ mli nitsɔɔmɔ ni hi kɛ fɔlɔi anɔkwɛmɔ nɔ kpakpa hewɔ lɛ, gbekɛbii hii kɛ yei babaoo ejeee gbɛ ni ja lɛ nɔ kɛ amɛdara. Shi, babaoo damɔ Biblia mli tsɔsemɔ lɛ hilɛ kɛ he ni eyashɛɔ kɛ gbekɛ lɛ tsui nɔ.
12. Mɛni hewɔ esa akɛ Kristofoi ashia afee he ni toiŋjɔlɛ yɔɔ lɛ?
12 Kɛ wɔ weku lɛ mli bii fɛɛ miibɔ mɔdɛŋ ni amɛfee Yehowa suɔmɔnaa nii lɛ, esa akɛ wɔna toiŋjɔlɛ ni Nyɔŋmɔ gbeyeishemɔ yɔɔ mli lɛ mli ŋɔɔmɔ. Esa akɛ ‘toiŋjɔlɛ nanemɛi’ ayimɔ Kristofoi ashia lɛ mli obɔ. Luka 10:1-6 (NW) tsɔɔ akɛ, Yesu yɛ gbɔmɛi ni tamɔ nɛkɛ yɛ ejwɛŋmɔ mli beni etsu kaselɔi 70 akɛ sɔɔlɔi, ni ekɛɛ amɛ nɛkɛ lɛ: “Shia fɛɛ shia ni nyɛaabote lɛ, klɛŋklɛŋ lɛ nyɛkɛɛa akɛ, ‘Toiŋjɔlɛ aba shia nɛɛ!’ Ni kɛji akɛ toiŋjɔlɛ naanyo ko yɛ jɛmɛ lɛ, nyɛ toiŋjɔlɛ lɛ aaahi enɔ.” Yɛ be mli ni Yehowa tsuji kɛ “toiŋjɔlɛ sanekpakpa” lɛ yaa shia kɛ shia yɛ toiŋjɔlɛ mli lɛ, amɛtaoɔ toiŋjɔlɛ nanemɛi. (Bɔfoi lɛ Asaji 10:34-36; Efesobii 2:13-18) Yɛ anɔkwale mli lɛ, esa akɛ Kristofoi ashia ni ‘toiŋjɔlɛ nanemɛi’ yɔɔ mli lɛ afee nɔ ni toiŋjɔlɛ yɔɔ jɛmɛ.
13, 14. (a) Mɛni Naomi tao ni Rut kɛ Orpa aná? (b) Mɛɛ hejɔɔmɔhe nɛkɛ esa akɛ Kristofoi ashia afee?
13 Esa akɛ shia afee he ni toiŋjɔlɛ kɛ hejɔɔmɔ yɔɔ. Naomi, okulafo ni egbɔ lɛ hiɛ kã nɔ akɛ, Nyɔŋmɔ baaha eshaayei, Rut kɛ Orpa, obalayei okulafoi lɛ aná hejɔɔmɔ kɛ miishɛjemɔ ni baa kɛjɛɔ wu kɛ shia kpakpa mli baa lɛ eko. Naomi kɛɛ: “Yehowa aha nyɛteŋ mɔ fɛɛ mɔ aná he ko ata yɛ ewu we.” (Rut 1:9) Woloŋlelɔ ko ŋma yɛ Naomi suɔmɔnaa nii nɛɛ he akɛ, Rut kɛ Orpa “baaná haomɔ kɛ yeyeeyefeemɔ mli heyeli. Amɛbaaná hejɔɔmɔ. Ebaafee he ko ni amɛbaahi shi kwraa yɛ, kɛ he ni amɛ henumɔi amli ŋɔɔmɔ kɛ akɔnɔi ni woo yɔɔ mli fe fɛɛ lɛ atsui baanyɔ amɛmli ni amɛfee shweshweeshwe yɛ. Ajie hewalɛ ni yɔɔ Hebri wiemɔ . . . lɛ mli lɛ kpo fɛfɛo kɛtsɔ wiemɔi ni fata he ni jeɔ kpo yɛ [Yesaia 32:17, 18] lɛ nɔ.”
14 Ofainɛ kadimɔ wiemɔi ni yɔɔ Yesaia 32:17, 18 lɛ. Wɔkaneɔ yɛ jɛmɛ akɛ: “Nii ni jalɛ lɛ aaatsu ji hejɔlɛ, ni jalɛ mli sɛɛnamɔ ji hejɔɔmɔ kɛ toiŋjɔlɛ kɛaatee naanɔ; ni mimaŋ lɛ aaahi shi yɛ hejɔlɛ shia, kɛ shihilɛ he ni yɔɔ shweshweeshwe, kɛ hejɔɔmɔ he ni yɔɔ kpoo.” Esa akɛ Kristofonyo shia afee hejɔɔmɔ he ni jalɛ, kpoofeemɔ, shweshweeshwe shihilɛ, kɛ toiŋjɔlɛ ni Nyɔŋmɔ gbeyeishemɔ yɔɔ mli lɛ yɔɔ. Shi kɛji akɛ kaai, sɔrɔtofeemɔi loo naagbai krokomɛi te shi hu? No lɛ ehe baahia titri ni wɔle nɔ diɛŋtsɛ ni kɛ weku miishɛɛ baa.
Shishitoo Mlai Titrii Ejwɛ
15. Te oootsɔɔ nɔ diɛŋtsɛ ni kɛ weku miishɛɛnamɔ baa lɛ mli oha tɛŋŋ?
15 Weku fɛɛ weku ná egbɛi kɛjɛ Yehowa Nyɔŋmɔ, wekui a-Bɔlɔ lɛ ŋɔɔ. (Efesobii 3:14, 15) No hewɔ lɛ, esa akɛ mɛi ni taoɔ weku miishɛɛ lɛ atao egbɛtsɔɔmɔ, ni amɛjie eyi taakɛ lalatsɛ lɛ fee lɛ: “Nyɛ maji lɛ amli akutsei lɛ, nyɛkɛhaa Yehowa, nyɛkɛ anunyam kɛ hewalɛ ahaa Yehowa.” (Lala 96:7) Nɔ diɛŋtsɛ ni kɛ weku miishɛɛ baa lɛ yɛ Nyɔŋmɔ Wiemɔ ni ji Biblia lɛ baafãi amli, kɛ agbɛnɛ eshishitoo mlai lɛ kɛ nitsumɔ mli. Weku ni kɛ shishitoo mlai nɛɛ tsuɔ nii lɛ baana miishɛɛ, ni ebaana toiŋjɔlɛ ni Nyɔŋmɔ gbeyeishemɔ yɔɔ mli lɛ mli ŋɔɔmɔ. Belɛ nyɛhaa wɔkwɛa shishitoo mlai ni he hiaa nɛɛ ateŋ ejwɛ mli.
16. Mɛni esa akɛ henɔyeli atsu yɛ weku shihilɛ mli?
16 Shishitoo mlai nɛɛ ateŋ ekome damɔ enɛ nɔ: Henɔyeli he miihia kɛha toiŋjɔlɛ ni Nyɔŋmɔ gbeyeishemɔ yɔɔ mli yɛ weku shihilɛ mli. Maŋtsɛ Salomo kɛɛ: “Mɔ ni nyɛɛɛ emumɔ nɔ aye lɛ, etamɔ maŋ ni akumɔ ni gbogbo bɛ he.” (Abɛi 25:28) Wɔmumɔ ni wɔɔye nɔ—henɔyeli kɛ nitsumɔ—he miihia kɛ wɔmiisumɔ ni wɔná toiŋjɔlɛ kɛ miishɛɛ weku. Eyɛ mli akɛ wɔyeee emuu moŋ, shi ehe miihia ni wɔkɛ henɔyeli, ni ji Nyɔŋmɔ mumɔ krɔŋkrɔŋ lɛ yibii lɛ eko lɛ atsu nii. (Romabii 7:21, 22; Galatabii 5:22, 23) Kɛ wɔsɔle wɔbi su ni tamɔ nɛkɛ, ni wɔkɛ Biblia mli ŋaawoo ni kɔɔ he lɛ tsu nii, ni wɔkɛ mɛi ni jieɔ su nɛɛ kpo lɛ bɔ lɛ, mumɔ lɛ baawo henɔyeli akɛ eyibii yɛ wɔmli. Gbɛ ni tamɔ nɛkɛ baaye abua wɔ ni ‘wɔjo ajwamaŋbɔɔ naa foi.’ (1 Korintobii 6:18) Henɔyeli baaye abua wɔ hu koni wɔkpoo basabasafeemɔ, wɔkwa loo wɔye dãa ni wa numɔ nɔ kunim, ni wɔkɛ kpoofeemɔ babaoo atsu shihilɛi ni mli wawai ahe nii.
17, 18. (a) Te 1 Korintobii 11:3 kɔɔ Kristofoi aweku shihilɛ he ehaa tɛŋŋ? (b) Yitsoyeli nɔkpɛlɛmɔ hãa toiŋjɔlɛ ni Nyɔŋmɔ gbeyeishemɔ yɔɔ mli hiɔ weku mli yɛ mɛɛ gbɛ nɔ?
17 Abaanyɛ awie shishitoo mla kroko ni he hiaa lɛ he yɛ nɛkɛ gbɛ nɔ: Yitsoyeli ni wɔɔkpɛlɛ nɔ lɛ baaye abua wɔ ni wɔdi toiŋjɔlɛ ni Nyɔŋmɔ gbeyeishemɔ yɔɔ mli sɛɛ yɛ wɔ wekui amli. Paulo ŋma akɛ: “Shi miisumɔ akɛ nyɛle akɛ, nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Korintobii 11:3) Enɛ tsɔɔ akɛ nuu lɛ nyiɛɔ eweku lɛ hiɛ, eŋa fiɔ esɛɛ yɛ anɔkwayeli mli, ni bii lɛ boɔ amɛ fɔlɔi atoi. (Efesobii 5:22-25, 28-33; 6:1-4) Subaŋ ni tamɔ nɛkɛ baaha toiŋjɔlɛ ni Nyɔŋmɔ gbeyeishemɔ yɔɔ mli ashwere yɛ weku shihilɛ mli.
18 Ehe miihia ni Kristofonyo wu lɛ akai akɛ, Ŋmalɛ naa yitsoyeli jeee yiwalɛ nɔyeli. Esa akɛ ekase Yesu, e-Yitso lɛ. Eyɛ mli akɛ ebaafee “nibii fɛɛ yitso” moŋ, shi Yesu “baaa ni asɔmɔ lɛ, shi eba sɔɔmɔ moŋ.” (Efesobii 1:22; Mateo 20:28) Yɛ nakai gbɛ nɔ nɔŋŋ Kristofonyo nuu kɛ yitsoyeli tsuɔ nii yɛ gbɛ ni suɔmɔ yɔɔ mli ni hãa enyɛɔ ekwɛɔ eweku lɛ nibii fɛɛ nɔ jogbaŋŋ lɛ nɔ. Ni yɛ anɔkwale mli lɛ, Kristofonyo ŋa lɛ miisumɔ ni ekɛ ewu afee ekome. Ákɛ “yelikɛbualɔ,” kɛ “hefatalɔ ni sa” lɛ, ekɛ sui ni anaaa yɛ ewu he lɛ hãa, ni ekɛ sɛɛfimɔ hãa lɛ yɛ nɛkɛ gbɛ nɔ. (1 Mose 2:20; Abɛi 31:10-31) Yitsoyeli he nitsumɔ yɛ gbɛ kpakpa nɔ yeɔ ebuaa wumɛi kɛ ŋamɛi koni amɛkɛ amɛhe aye yɛ bulɛ mli, ni ekanyaa gbekɛbii lɛ ni amɛfeɔ toiboo. Hɛɛ, yitsoyeli nɔkpɛlɛmɔ hãa toiŋjɔlɛ ni Nyɔŋmɔ gbeyeishemɔ yɔɔ mli yaa hiɛ yɛ weku shihilɛ mli.
19. Mɛni hewɔ sanegbaa kpakpa he hiaa kɛha weku toiŋjɔlɛ kɛ miishɛɛnamɔ lɛ?
19 Abaanyɛ awie shishitoo mla ni ji etɛ ni he hiaa lɛ he yɛ nɛkɛ wiemɔi nɛɛ amli: Sanegbaa kpakpa he hiaa kɛha weku toiŋjɔlɛ kɛ miishɛɛnamɔ. Yakobo 1:19 kɛɔ wɔ akɛ: “Mɔ fɛɛ mɔ he afee oya kɛ ninumɔ, ehumi shi kɛ wiemɔ, ehumi shi kɛ mlifu.” Ehe miihia ni weku lɛ mli bii abo sane toi beni amɛteŋ mɔ ko wieɔ lɛ, ni amɛkɛ amɛhe agba sane, ejaakɛ weku sanegbaa yaa nɔ yɛ mɛi enyɔ teŋ. Kɛji akɛ nɔ ni wɔkɛɔ lɛ ji anɔkwale po lɛ, ebaanyɛ eye awui babaoo fe ekpakpa ni eeefee, kɛji akɛ awie yɛ gbɛ ni tsɔɔ yiwalɛ, henɔwomɔ, loo nu ni anuuu nii ahe ahaaa mɔ lɛ nɔ. Esa akɛ wɔ wiemɔ aŋɔɔ, “ni ŋoo ahi mli.” (Kolosebii 4:6) Wekui ni nyiɛɔ Ŋmalɛ mli shishitoo mlai asɛɛ, ni amɛgbaa sane jogbaŋŋ lɛ miitiu toiŋjɔlɛ ni Nyɔŋmɔ gbeyeishemɔ yɔɔ mli lɛ sɛɛ.
20. Mɛni hewɔ obaakɛɛ akɛ suɔmɔ he hiaa kɛha weku toiŋjɔlɛ?
20 Shishitoo mla ni ji ejwɛ ji enɛ: Suɔmɔ he hiaa kɛha weku toiŋjɔlɛ kɛ miishɛɛnamɔ. Eji anɔkwale akɛ nuu kɛ yoo teŋ suɔmɔ tsuɔ gbɛfaŋnɔ ni he hiaa yɛ gbalashihilɛ mli, ni hedɔɔ ni mli wa baanyɛ ate shi yɛ weku mli bii ateŋ. Shi, nɔ ni he hiaa waa ji suɔmɔ ni akɛ Hela wiemɔ a·gaʹpe damɔ shi kɛhã no lɛ. Enɛ ji suɔmɔ ni wɔnáa kɛhãa Yehowa, kɛhãa Yesu, ni agbɛnɛ kɛhaa wɔnaanyo. (Mateo 22:37-39) Nyɔŋmɔ jie suɔmɔ nɛɛ kpo etsɔɔ adesai kɛtsɔ ‘e-Bi koome lɛ ni ekɛ lɛ ha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala’ lɛ nɔ. (Yohane 3:16) Kwɛ miishɛɛ ni eji akɛ wɔɔnyɛ wɔjie nakai suɔmɔ lɛ nɔŋŋ eko kpo wɔha wɔ weku lɛ mli bii! Nɛkɛ suɔmɔ ni nɔ bɛ nɛɛ ji “ekomefeemɔ kpãa ni yeɔ emuu” lɛ. (Kolosebii 3:14) Efimɔɔ gbalashihilɛ mli hefatalɔi efeɔ amɛ ekome, ni ekanyaa amɛ koni amɛfee nɔ ni hi fe fɛɛ amɛha amɛhe kɛ amɛbii. Kɛ shihilɛi ni mli wawai te shi lɛ, suɔmɔ yeɔ ebuaa amɛ ni amɛtsuɔ saji ahe nii yɛ ekomefeemɔ mli. Wɔbaanyɛ wɔna nɔmimaa yɛ enɛ he, ejaakɛ “suɔmɔ . . . epeleee lɛ diɛŋtsɛ enɔ̃ . . . Emiɔ ŋɔɔ yɛ nii fɛɛ mli, eheɔ nii fɛɛ eyeɔ, ehiɛ kãa nii fɛɛ nɔ, etoɔ etsui shi yɛ nii fɛɛ mli. Suɔmɔ sɛɛ efooo gbi ko gbi ko.” (1 Korintobii 13:4-8) Miishɛɛ diɛŋtsɛ ji wekui ni suɔmɔ kɛha Yehowa eha suɔmɔ kɛha amɛhe lɛ mli ewa kpɛŋŋ lɛ!
Yaa nɔ Otiu Toiŋjɔlɛ ni Nyɔŋmɔ Gbeyeishemɔ Yɔɔ Mli
21. Mɛni baanyɛ ahã oweku lɛ toiŋjɔlɛ kɛ miishɛɛ afa?
21 Átsɔɔ shishitoo mlai ni atsɔ hiɛ atsi tã lɛ kɛ ekrokomɛi ni aná kɛjɛ Biblia lɛ mli lɛ mli yɛ woji ni Yehowa ejɛ mlihilɛ mli etsɔ “tsulɔ anɔkwafo kɛ nilelɔ” lɛ nɔ ekɛha lɛ amli. (Mateo 24:45) Akɛ nɔkwɛmɔ nɔ lɛ, anaa saji ni tamɔ nɛkɛ yɛ Nɔ Diɛŋtsɛ ni Kɛ Weku Miishɛɛ Baa wolo ni hiɛ baafai 192, ni ajie lɛ kpo yɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpeei ni Yehowa Odasefoi fee kɛbɔle jeŋ muu fɛɛ yɛ 1996/97 mli lɛ mli. Ŋmalɛi lɛ ni akɛ wolo nɛɛ aaakase yɛ teemɔŋ, ni agbɛnɛ kɛ weku lɛ kɛ sɛɛnamɔi babaoo baaba. (Yesaia 48:17, 18) Hɛɛ, Ŋmalɛ mli ŋaawoo kɛ nitsumɔ baanyɛ aha toiŋjɔlɛ kɛ miishɛɛ ni yɔɔ oweku lɛ mli lɛ afa.
22. Esa akɛ wɔkɛ wɔ weku shihilɛ abɔle mɛni he?
22 Yehowa yɛ nibii ni yɔɔ naakpɛɛ ni esaa eto kɛha wekui ni feɔ esuɔmɔnaa nii, ni esa wɔ yijiemɔ kɛ sɔɔmɔ. (Kpojiemɔ 21:1-4) No hewɔ lɛ, eba akɛ oweku lɛ aaatswa eshihilɛ edamɔ anɔkwa Nyɔŋmɔ lɛ jamɔ nɔ. Ni eba akɛ, Yehowa, wɔ ŋwɛi Tsɛ ni yɔɔ suɔmɔ lɛ kɛ miishɛɛ aaajɔɔ bo, yɛ be mli ni odiɔ toiŋjɔlɛ ni Nyɔŋmɔ gbeyeishemɔ yɔɔ mli lɛ sɛɛ yɛ oweku shihilɛ mli lɛ!
Te Obaaha Hetoo Oha Tɛŋŋ?
◻ Mɛni ataoɔ kɛ́ wekui kɛ Nyɔŋmɔ jamɔ hetuu-kɛhamɔ aaahi shi?
◻ Mɛni hewɔ weku lɛ yɔɔ oshara mli ŋmɛnɛ lɛ?
◻ Mɛni ji nɔ̃ diɛŋtsɛ ni kɛ weku miishɛɛnamɔ baa?
◻ Mɛni ji shishitoo mlai komɛi ni baaye abua wɔ ni wɔha toiŋjɔlɛ kɛ miishɛɛ ahi weku shihilɛ mli?
[Mfoniri ni yɔɔ baafa 24]
Sanegbaa kpakpa yeɔ buaa wɔ koni wɔdi toiŋjɔlɛ ni Nyɔŋmɔ gbeyeishemɔ yɔɔ mli sɛɛ yɛ weku shihilɛ mli