Yesu Tsu Kaselɔi 70 Koni Amɛyashiɛ

Amrɔ nɛɛ, ayɛ afi 32 Ŋ.B. lɛ naagbee gbɛ, ni aaafee afii etɛ nɛ ni abaptisi Yesu. Etsɛko tsɔ nɛ ni ekɛ ekaselɔi lɛ yaye Agbai Agbi Jurɔ lɛ yɛ Yerusalem. Eeenyɛ efee akɛ, amɛyɛ jɛmɛ niiaŋ lolo. (Luka 10:38; Yohane 11:1) Anɔkwa, Yesu ye nyɔji ekpaa ni eshwɛ ni ekɛtsu esɔɔmɔ nitsumɔ lɛ mli fã kpotoo yɛ Yudea loo Yordan Faa lɛ sɛɛ, yɛ Perea kpokpaa lɛ nɔ. Ehe miihia ni ashiɛ yɛ hei nɛɛ hu.

Be ni tsɔ be nɛɛ hiɛ, ni ji be ni aye afi 30 Ŋ.B. Hehoo lɛ sɛɛ lɛ, Yesu kɛ nyɔji komɛi shiɛ yɛ Yudea ni efã gbɛ kɛyatsɔ Samaria. No sɛɛ lɛ, aaafee afi 31 Ŋ.B. Hehoo be lɛ mli lɛ, Yudafoi ni yɔɔ Yerusalem lɛ ka akɛ amɛbaagbe lɛ. Yɛ afi kome kɛfã ni nyiɛ sɛɛ lɛ mli lɛ, Yesu tsɔɔ nii titri yɛ kooyigbɛ, yɛ Galilea. Mɛi babaoo batsɔmɔ esɛɛnyiɛlɔi yɛ be nɛɛ mli. Be ni Yesu yɔɔ Galilea lɛ, etsɔse ebɔfoi lɛ ni no sɛɛ lɛ, etsu amɛ kɛ gbɛtsɔɔmɔ nɛɛ akɛ: “Nyɛshiɛa akɛ: ‘Ŋwɛi Maŋtsɛyeli lɛ ebɛŋkɛ nyɛ.’” (Mateo 10:5-7) Amrɔ nɛɛ, eto gbɛjianɔ koni ashiɛ waa yɛ Yudea.

Yesu hala kaselɔi 70 ni etsu amɛ enyɔnyɔɔnyɔ koni amɛyaje shiɛmɔ nɛɛ shishi. Enɛ hã aná Maŋtsɛyeli shiɛlɔi akui 35 yɛ shikpɔŋkuku lɛ mli. “Nikpamɔ lɛ fa” yɛ jɛmɛ, “shi nitsulɔi lɛ faaa.” (Luka 10:2) Esa akɛ amɛtsɔ hiɛ amɛya hei ni sɛɛ mli lɛ Yesu baaya lɛ. Akɛɛ mɛi 70 nɛɛ akɛ amɛtsa helai, ní amɛshiɛ sane kome too ni Yesu shiɛɔ lɛ nɔŋŋ.

Jeee kpeehei lɛ ji hei titri ni esa akɛ kaselɔi nɛɛ ayatsɔɔ nii yɛ. Yesu kɛɛ amɛya mɛi ashĩai amli. Ekɛ gbɛtsɔɔmɔ hã amɛ akɛ: “He fɛɛ he ni nyɛbaabote shĩa ko mli yɛ lɛ, klɛŋklɛŋ lɛ nyɛkɛa akɛ: ‘Toiŋjɔlɛ aba shĩa nɛɛ.’ Ni kɛ́ toiŋjɔlɛ bi ko yɛ jɛmɛ lɛ, nyɛtoiŋjɔlɛ lɛ baahi enɔ.” Mɛɛ sane amɛbaashiɛ lɛ? Yesu kɛɛ: “Nyɛkɛa amɛ akɛ: ‘Nyɔŋmɔ Maŋtsɛyeli lɛ ebɛŋkɛ nyɛ.’”​—Luka 10:5-9.

Gbɛtsɔɔmɔi ni Yesu kɛhã kaselɔi 70 lɛ tamɔ nɔ ni ekɛhã bɔfoi 12 lɛ be ni etsu amɛ aaafee afi ni eho nɛ lɛ nɔŋŋ. Ebɔ amɛ kɔkɔ akɛ, jeee mɔ fɛɛ mɔ baahere amɛ jogbaŋŋ. Shi amɛnitsumɔ lɛ baasaa mɛi ni baabo amɛ toi lɛ atsui, koni no sɛɛ nɔŋŋ kɛ́ Yesu ba lɛ, mɛi babaoo aná he miishɛɛ akɛ amɛbaaba Nuŋtsɔ lɛ ŋɔɔ ní etsɔɔ amɛ nii.

Etsɛɛɛ ni Maŋtsɛyeli shiɛlɔi akui 35 lɛ ku amɛsɛɛ kɛba Yesu ŋɔɔ. Amɛkɛ miishɛɛ kɛɛ lɛ akɛ: “Nuŋtsɔ, ogbɛ́i lɛ ni wɔkɛtsuɔ nii lɛ hewɔ lɛ, aŋɔɔ daimonioi lɛ po awoɔ wɔshishi.” Ekã shi faŋŋ akɛ, amaniɛbɔɔ kpakpa nɛɛ hã Yesu ná miishɛɛ waa, ejaakɛ ekɛɛ amɛ akɛ: “Miina Satan ni ejɛ ŋwɛi ebagbee shi momo tamɔ sarawa. Naa! mihã nyɛ hegbɛ koni nyɛkɛnaanaa onufui kɛ nyɔŋmɔŋkrakroi anɔ.”​—Luka 10:17-19.

No hewɔ lɛ, Yesu ma nɔ mi ehã esɛɛnyiɛlɔi lɛ akɛ, amɛbaanyɛ amɛdamɔ nibii ni yeɔ mɔ awui lɛ anaa, yɛ mfonirifeemɔŋ lɛ, amɛbaanaanaa onufui kɛ nyɔŋmɔŋkrakroi anɔ. Kɛfata he lɛ, amɛbaanyɛ amɛná nɔmimaa akɛ wɔsɛɛ lɛ, Satan baajɛ ŋwɛi ebagbee shi. Yesu ye ebua kaselɔi 70 lɛ koni amɛna nɔ ni he hiaa diɛŋtsɛ lɛ hu. Ekɛɛ akɛ: “Nyɛkanyaa akɛni aŋɔɔ mumɔi lɛ awoɔ nyɛshishi lɛ hewɔ, moŋ lɛ nyɛnyaa akɛni aŋmala nyɛgbɛ́ii yɛ ŋwɛi lɛ hewɔ.”​—Luka 10:20.

Yesu ná miishɛɛ babaoo ni ejie e-Tsɛ lɛ yi yɛ faŋŋ, ejaakɛ e-Tsɛ lɛ kɛ tsuji ni baa shi nɛɛ miitsu hewalɛ nitsumɔi ni tamɔ nɛkɛ. Yesu tsɔ ehe ehã ekaselɔi lɛ ni ekɛɛ amɛ akɛ: “Hiŋmɛii ni naa nibii ni nyɛnaa nɛɛ yɛ miishɛɛ. Ejaakɛ miikɛɛ nyɛ akɛ, gbalɔi kɛ maŋtsɛmɛi babaoo shwe akɛ amɛna nibii ni nyɛnaa nɛɛ shi amɛyanaaa, asaŋ amɛshwe akɛ amɛnu nibii ni nyɛnuɔ nɛɛ, shi amɛyanuuu.”​—Luka 10:23, 24.