Sanekpakpajajemɔ—Egbɛhe yɛ Anɔkwale Jamɔ Mli
“Nyɛhemɔkɛyeli Iɛ akadamɔ gbɔmɛi anilee nɔ, shi moŋ edamɔ
1. (a) Mɛɛ nitsumɔ akɛle Yehowa Odasefoi yɛ jeŋ fɛɛ? (b) Te nitsumɔ nɛɛ he hiaa ha tɛŋŋ?
1 Nyɔŋmɔ hewalɛ nɔ.”—1 KORINTOBII 2:5, THE JERUSALEM BIBLE.
ALE YEHOWA ODASEFOI yɛ majimaji ateŋ akɛ sanekpakpajajelɔi, ni ji akɛ sanekpakpa he bɔfoi. Ŋleshi shihilɛ he nilelɔ J. A. Beckford wie enɛ yɛ wolo ni ji Social Compass ni aŋma yɛ January 1977 lɛ mli: “Odasefoi lɛ fata sanekpakpajajelɔi ni kɛ hekamɔ kɛ hiɛdɔɔ tsakeɔ mɛi fe fɛɛ yɛ ŋmɛnɛŋmɛnɛ je nɛɛ mli lɛ ahe.” Ekɛfata he akɛ: “Eka shi faŋŋ akɛ enɛ ji yiŋtoo hewɔ ni Buu Mɔɔ kuu lɛ shwereɔ babaoo, ni akuɔ hiɛ ashwieɔ nɔ yɛ be babaoo mli lɛ.” Shi ani Maŋtsɛyeli shiɛmɔ kɛ kaselɔi afeemɔ nitsumɔ lɛ saa Yehowa hiɛ? Yinɔsane kɛ ŋmɛnɛŋmɛnɛ gbii nɛɛ amli anɔkwalei haa hetoo akɛ Hɛɛ! Sanekpakpajajemɔ, Nyɔŋmɔ Maŋtsɛyeli lɛ he sanekpakpa lɛ shiɛmɔ ji Kristojamɔ shishitoo. Eji Nyɔŋmɔ webii akadimɔ nii, kɛjɛ blema kɛ ŋmɛnɛŋmɛnɛ.
2. Mɛni Maŋtsɛyeli shiɛmɔ lɛ tsuɔ?
2 Mɛni Maŋtsɛyeli shiɛmɔ lɛ tsuɔ? Nɔ kome ji akɛ, ehaa mɔ ko jieɔ suɔmɔ kɛ hiɛsɔɔ kpo ehaa Nyɔŋmɔ Ofe lɛ kɛ E-bɔɔ nii ni ji adesai lɛ yɛ faŋŋ mli. (Mateo 22:37-39) Ni nɔ ni he hiaa fe fɛɛ lɛ, ahaa mɛi krokomɛi leɔ Yehowa nilee ni eko kɛ lɛ yeee egbɔ kɛ hewalɛ kpele lɛ kɛtsɔɔ sanekpakpajajemɔ lɛ nɔ.—Bɔfoi lɛ Asaji 1:8; 4:33; Efesobii 3:10.
Sanekpakpa Lɛ He Gbɛnaa Nii Ka Yehowa Nɔ
3. (a) Mɛni hewɔ abaanyɛ atsɔɔ mli akɛ Yehowa ji sanekpakpajajelɔ lɛ? (b) Namɔ nɔ atsɔ ni anu sanekpakpa lɛ he, ni mɛni ji enitsumɔ?
3 Yehowa ji klɛŋklɛŋ Sanekpakpajajelɔ, aloo mɔ ni kɛ sanekpakpa baa. E-klɛŋklɛŋ gbalɛ lɛ jaje kpɔmɔ he sanekpakpa kɛha adesai ni yeee emuu lɛ kɛtsɔ shiwoo “seshi” ko nɔ. (1 Mose 3:15) Yɛ sɛɛ mli lɛ, beni Yesaia ji egbalɔ ni wieɔ haa Iɛ lɛ, Nyɔŋmɔ gba fɔ shi akɛ Mesia lɛ, Yesu Kristo, ákɛ “seshi” lɛ mli Mɔ titri lɛ, ‘baashiɛ sanekpakpa lɛ etsɔɔ ohiafoi.’ (Yesaia 61:1) No hewɔ lɛ Yehowa to ni Kristo afee sanekpakpa lɛ he shiɛlɔ—sanekpakpajajelɔ.
4, 5. Yɛ mɛɛ gbɛ nɔ ŋwɛibɔfoi etsu nii akɛ sanekpakpajajelɔi?
4 “Yehowa kɛ nitsumɔ ewo mɛi krokomɛi adɛŋ ni amɛgba sanekpakpa lɛ amɛtsɔɔ. Mumɔŋ bɔɔ nii ni he wa, ŋwɛibɔfoi, ena nɛkɛ nitsumɔ ni ŋwɛi kpɛlɛɔ nɔ nɛɛ mli gbɛfaŋnɔ. Nɔ ni yɔɔ miishɛɛ ji akɛ, yɛ Hebri kɛ Hela wiemɔ mli fɛɛ Iɛ, “ŋwɛibɔfo” shishi diɛŋtsɛ ji “bɔfo” loo tsulɔ, ni wiemɔ “sanekpakpajajelɔ” lɛ jɛ Hela wiemɔi enyɔ ni eshishi ji “ekpakpa” kɛ “ŋwɛibɔfo” (aloo, “bɔfo” loo tsulɔ) mli. Akɛ nɔkwɛmɔ nɔ lɛ, Nyɔŋmɔ ŋwɛibɔfo “jaje sanekpakpa lɛ etsɔɔ Abraham eto.” (Galatabii 3:8; 1 Mose 22:15-18) Nɔ ni yɔɔ sanekpakpa lɛ mli ji akɛ shiwoo “seshi” lɛ baaba kɛtsɔ Abraham wekukpaa mli, ni akɛ jeŋmaji Iɛ fɛɛ baatsɔ nakai “seshi” lɛ nɔ ana jɔɔmɔ kɛha amɛ diɛŋtsɛ amɛhe. (1 Mose 12:2, 3) Afii akpei enyɔ sɛɛ lɛ ŋwɛibɔfo Gabriel, ni tsu nii akɛ sanekpakpajajelɔ lɛ tswa Yohane Baptisilɔ lɛ fɔmɔ ni baa lɛ he adafi etsɔɔ Zakaria akɛ: “Atsu mi akɛ mikɛo abawie ni migbao sanekpakpa nɛɛ.” Yohane Baptisilɔ lɛ saa gbɛ kɛha Yesu Kristo, ni ji Abraham “seshi” lɛ mli mɔ titri lɛ.—Luka 1:19.
5 Beni etsuɔ nii lolo akɛ sanekpakpajajelɔ lɛ, Gabriel jie ehe kpo etsɔɔ Maria koni ekɛ miishɛɛ saji ni kɔɔ Yesu fɔmɔ he abaha lɛ. (Luka 1:26-38) Nyɔji komɛi asɛɛ lɛ, tookwɛlɔi komɛi anaa kpɛ amɛhe kɛtsɔ ŋwɛibɔfo sanekpakpajajelɔ ko adafitswaa nɔ: “Nyɛkashea gbeyei; ejaakɛ naa, mibagbanyɛ miishɛɛ sane kpele ni ji maŋ fɛɛ nɔ.” Kɛkɛ ni mumɔŋ bɔɔ nii krokomɛi ni amɛyi fa bafata nɛkɛ ŋwɛibɔfo nɛɛ he amɛkɛma nɛkɛ sanekpakpa nɛɛ nɔ mi. (Luka 2:8-14) Naakpɛɛ odaseyeli ni kɔɔ Nyɔŋmɔ hewalɛ he akɛ lɛ ji mɔ ni sanekpakpa kɛtsɔ ŋwɛibɔfoi anɔ nɛɛ jɛ lɛ lɛ waaa jɛmɛ kɛ e-Bi lɛ fɔmɔ pɛ, shi moŋ etee nɔ kɛtsɔ klɛŋklɛŋ afii oha lɛ mli yinɔsane ni kɔɔ Kristofoi asafo lɛ he lɛ mli. Ŋwɛibɔfo ko jie bɔfoi lɛ ni awo amɛ tsuŋ lɛ ni efa amɛ akɛ: “Nyɛjajea nɛkɛ wala nɛɛ wiemɔi lɛ fɛɛ nyɛtsɔɔa maŋ lɛ!” (Bɔfoi lɛ Asaji 5:20) Atsɔ ŋwɛibɔfoi agbɛtsɔɔmɔ nɔ ana mɛi ni yɔɔ wiemɔ lɛ he miishɛɛ ni aye abua Nyɔŋmɔ tsuji. (Bɔfoi lɛ Asaji 8:26; 10:3; 12:7-11) Ni bɔfo Yohane, ni tsɔ mumɔ nɔ etsɔɔ nibii ni ba yɛ “Nuŋtsɔ lɛ gbi lɛ nɔ” lɛ mli lɛ na ‘ŋwɛibɔfo ko ni miifiliki yɛ ŋwɛiteŋ ni ehiɛ naanɔ sanekpakpa ni eyaajaje etsɔɔ’ lɛ yɛ ninaa mli—ni tsɔɔ akɛ, belɛ ekwɛɔ jeŋ muu fɛɛ Maŋtsɛyeli lɛ he sane lɛ ni Yehowa tsuji ni yɔɔ shikpɔŋ nɔ lɛ gbɛɔ shwaa lɛ nɔ.—Kpojiemɔ 1:10; 14:6.
Kristo Nitsumɔ Lɛ: Nyɛjajea Sanekpakpa Lɛ!
6. (a) Mɛɛ Shishitoo Yesu kɛfɔ shi kɛha sanekpakpa lɛ jajemɔ? (b) Mɛɛ gbɛ nɔ Yesu tsɔ eto gbɛjianɔ koni sanekpakpajajemɔ nitsumɔ lɛ aya nɔ yɛ egbele sɛɛ?
6 Mɛni hewɔ klɛŋklɛŋ Kristofoi asafo lɛ yɔɔ ekaa kɛ nyɛmɔ babaoo yɛ edaseyeli nitsumɔ lɛ mli lɛ? Ejaakɛ Kristo, akɛ Shishitolɔ lɛ, kɛ Nyɔŋmɔ nilee kɛ hewalɛ tsu nii ni ekɛtswa sanekpakpajajelɔi agbɛjianɔtoo ko ni kpeɔ naagbai anaa ema lɛ diɛŋtsɛ enɔ. Kristo fee enɛ yɛ gbɛi sɔrɔtoi enyɔ nɔ. Klɛŋklɛŋ lɛ, etsu lɛ diɛŋtsɛ enitsumɔ “koni mishiɛ sanekpakpa lɛ mitsɔɔ ohiafoi” Iɛ he nii. (Yesaia 61:1) Nɔ ni ji enyɔ lɛ, lɛ diɛŋtsɛ etsɔse ehefatalɔi 12 ni bɛŋkɛ lɛ kpaakpa lɛ ni amɛshiɛ ni etsɔse 70 krokomɛi hu. No hewɔ lɛ Kristo to shiɛlɔi ashishijee ko ni wa ema shi koni amɛtsu sanekpakpajajemɔ nitsumɔ lɛ yɛ egbele sɛɛ.—Mateo 10:5-42; Luka 10:1-16.
7. Yɛ mɛɛ gbɛ nɔ esoro Nyɔŋmɔ nilee yɛ adesa nilee he yɛ sanekpakpa lɛ mli lɛ ni akɛbahaa gbɔmɛi?
7 Yesu ji mɔ ni kɛ ekaa tsuɔ Maŋtsɛyeli shiɛmɔ lɛ he nii. Ekɛ ehe wo sanekpakpajajemɔ nitsumɔ lɛ mli waa ejaakɛ ele akɛ ehe miihia ni gbɔmɛi anu Nyɔŋmɔ Maŋtsɛyeli lɛ he sanekpakpa lɛ—ŋwɛi nɔyeli hee ni kɛ naanɔ toiŋjɔlɛ baaba shikpɔŋ nɔ ni ejie nɔ ni kɛ naagbai fɛɛ baa lɛ kɛya lɛ. No hewɔ lɛ yɛ be mli ni eyakpa maji kɛ akrowai lɛ amli eba ni ena mumɔŋ shihilɛ ni yɔɔ mɔbɔ ni gbɔmɛi lɛ yɔɔ mli lɛ, ekɛɛ ekaselɔi lɛ akɛ: “Nikpamɔ lɛ fa moŋ, shi nitsulɔi lɛ faaa. No hewɔ lɛ nyɛkpaa nikpamɔ Nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!” (Mateo 9:37, 38) Amrɔ nɔŋŋ pɛ kɛkɛ ni Yesu je shishi koni eha nibimɔ nɛɛ aba mli. Eklɛŋklɛŋ famɔi ni ekɛha ebɔfoi lɛ ateŋ ekome ji akɛ: “Shi ni nyɛyaa nɛɛ, nyɛshiɛa nyɛkɛɛa akɛ: Ŋwɛi maŋtsɛyeli lɛ eshɛ shi eta.” Ebolɔmɔ lɛ ji akɛ, nyɛshiɛa nyɛtsɔɔa gbɔmɛi lɛ. Bɔni afee ni amɛjɔɔ adesai ni ehao lɛ ahe lɛ, ekolɛ adesa nilee baafã ni ato kwasafo maŋ sɔɔlɔi anɔyeli gbɛjianɔtoo ko aloo maŋ atuatsemɔ kuu ko ni tsuɔ nii yɛ dujiaŋ koni amɛkɛtsu nitsumɔ nɛɛ he nii; shi Kristo tsɔɔ Nyɔŋmɔ nilee. No kɛkɛ ji akɛ: “Nyɛyaa, nyɛshiɛa.”—Mateo 10:7, NW.
8. Te Kristo nu he eha tɛŋŋ yɛ be mli ni ekaselɔi lɛ ku amɛsɛɛ kɛjɛ shiɛmɔ nitsumɔ lɛ nɔ lɛ, ni mɛni hewɔ?
8 Yɛ be mli ni ekɛ nakai famɔi lɛ eha lɛ, Yesu wie etsɔɔ mɛi krokomɛi ni ekɛɛ amɛ ni amɛ hu amɛjaje sanekpakpa lɛ. Beni nɛkɛ shiɛlɔi nɛɛ ku amɛsɛɛ kɛ amaniɛbɔɔ kpakpa lɛ, Yesu mii shɛ ehe tsɔ ni ekɛɛ: “Miijie oyi, Ataa, ŋwɛi kɛ shikpɔŋ Nuŋtsɔ, ákɛ oŋɔ nii nɛɛ otee nilelɔi kɛ ŋaalelɔi, ni ojie otsɔɔ abifabii.” (Luka 10:21) Nakai “abifabii” lɛ ji Kristo kaselɔi ni amɛdara, ni sanekpakpajajemɔ ji amɛdɛŋdade, koni amɛkɛjie Nyɔŋmɔ anɔkwale lɛ kpo amɛtsɔɔ mɛi krokomɛi. No hewɔ lɛ, jeee adesa nilee aloo hewalɛ ji nɔ ni to anɔkwale Kristojamɔ ema shi shiŋŋ lɛ, shi moŋ, ŋwɛi nilee kɛ hewalɛ ni ajie lɛ kpo kɛtsɔ Maŋtsɛyeli shiɛmɔ mli lɛ.
Kaselɔi Fɛɛ Jaje Sanekpakpa Lɛ
9. Okɛ nɔkwɛmɔ nii aha ni tsɔɔ bɔ ni yinɔsane ŋmalɔi tsɔɔ akɛ klɛŋklɛŋ Kristojamɔ shishitoo ji Maŋtsɛyeli shiɛmɔ.
9 Kɛ Maŋtsɛyeli lɛ he sanekpakpa lɛ shiɛmɔ ji Kristojamɔ shishitoo lɛ belɛ esa akɛ klɛŋklɛŋ Kristofoi lɛ fɛɛ afee sanekpakpajajelɔi. Ani nakai amɛji? Yinɔsane haa hetoo akɛ, Hɛɛ! Kadimɔ nɔ ni nɛkɛ woji nɛɛ wieɔ yɛ klɛŋklɛŋ afii oha lɛ mli Kristofoi lɛ ahe:
“Kristofonyo fɛɛ Kristofonyo kɛ Kristofoi fɛɛ ji ‘maŋsɛɛ sanekpakpashiɛlɔi’ yɛ nakai gbii lɛ amli.”—History of Western Civilization.
“Nɛkɛ klɛŋklɛŋ sanekpakpa nitsumɔ nɛɛ tsɔɔ akɛ klɛŋklɛŋ sanekpakpa nitsumɔ nɛɛ jeee nɔ ni atuu awo Bofoi lɛ pɛ adɛŋ. Shi moŋ, Kristofoi akuu muu lɛ fɛɛ kɛ amɛhe wo mli.”—New Catholic Encyclopedia.
“Akɛ aashwe loo aasumɔ ni aye hemɔkɛyeli kɛ shihilɛ gbɛ he odase ji su ni akpaa gbɛ yɛ Kristofonyo fɛɛ Kristofonyo dɛŋ.”—Encyclopedia Americana.
10. (a) Mɛɛ be mli Kristofoi asafo lɛ batsɔ sanekpakpajajemɔ gbɛjianɔtoo? (b) Mɛɛ naakpɛɛ nikeenii Nyɔŋmɔ kɛha klɛŋklɛŋ Kristofoi lɛ, ni kɛha mɛɛ yiŋtoo?
10 Kɛjɛ be mli ni Kristofoi asafo lɛ ba shihilɛ mli yɛ afi 83 Ŋ.B. nɔŋŋ lɛ, no mli lɛ eji sanekpakpajajelɔi agbɛjianɔtoo. Eklɛŋklɛŋ bii ni ji kaselɔi 120 lɛ fiteee be kwraa yɛ Maŋtsɛyeli shiɛlɔi ni amɛtsɔmɔ lɛ mli. Yinɔsane ni yɔɔ krɔŋkrɔŋ lɛ ŋma fɔ shi akɛ “ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi awiemɔ.” Ofainɛ kadimɔ akɛ amɛ fɛɛ, jeee mɛi komɛi pɛ je shishi amɛwie “Nyɔŋmɔ niwuji lɛ.” (Bɔfoi lɛ Asaji 2:4, 11) Naa Nyɔŋmɔ hewalɛ kɛ nilee ni kɛ nyɛmɔ ni yɔɔ naakpɛɛ ni akɛaaye odase yɛ wiemɔi ni amɛkaseko dã yɛ skul lɛ miiwo jálɔi ni kpɛlɛɔ nɔ lɛ anaa lɛ he odaseyeli. Atsɔ naakpɛɛ nii anɔ ato Kristofoi asafo lɛ ama sanekpakpa shiɛmɔ shishitoo nɔ.
11. Mɛɛ gbɛ nɔ Petro ma nɔ mi yɛ akɛ esa akɛ Kristofoi fɛɛ afee shiɛlɔi?
11 Yɛ sɛɛ mli yɛ nakai gbi lɛ nɔŋŋ lɛ, Petro kɛ Yoel gbalɛ lɛ to Kristofoi asafo ni ato shishi ehee lɛ he: “Nyɔŋmɔ kɛɛ: Ni aaaba mli yɛ naagbee gbii lɛ anɔ, akɛ mafɔse mimumɔ lɛ eko mashwie heloo fɛɛ nɔ, ni nyɛbihii kɛ nyɛbiyei lɛ aaagba, ni nyɛbalahii lɛ aaana ninaai, ni nyɛnukpai lɛ aaala lamɔi; ni asaŋ mitsuji hii kɛ mitsuji yei lɛ anɔ hu mafɔse mimumɔ lɛ eko mashwie yɛ nakai gbii lɛ anɔ, ni amɛaagba.” (Bɔfoi lɛ Asaji 2:17, 18; Yoel 3:1, 2) Mɔ fɛɛ mɔ, Kristofoi fɛɛ baafee sanekpakpajajelɔi. Hii, yei kɛ gbekɛbii po baana gbɛfaŋnɔ yɛ gbalɛ loo Nyɔŋmɔ shɛɛ sane ni ji sanekpakpa lɛ jajemɔ, ewiemɔ lɛ mli gbɛfaŋnɔ.
Kɔkɔbɔɔ Fata Sanekpakpa Ni Ajajeo Lɛ He
12. Mɛni hewɔ Nyɔŋmɔ Maŋtsɛyeli lɛ he sane lɛ jeee sanekpakpa kɛha mɔ fɛɛ mɔ Iɛ?
12 Nyɔŋmɔ Maŋtsɛyeli lɛ he sane lɛ jeee sanekpakpa kɛha mɔ fɛɛ mɔ, ejaakɛ hiɛkpatamɔ he kɔkɔbɔɔ fata he. Kɛji akɛ sanekpakpa lɛ he aaaba sɛɛnamɔ kɛya naanɔ lɛ, belɛ esa akɛ ŋmɛnɛŋmɛnɛ gbɛjianɔtoo ni ekpɔtɔ lɛ kɛ mɛi ni fiɔ sɛɛ lɛ fɛɛ aho aya. (Abɛi 21:18) Yehowa jalɔi ni tsui ja lɛ nyɛŋ atsake shikpɔŋ lɛ afee lɛ paradeiso kɛji akɛ efɔŋfeemɔ mli nibii komɛi hi shi ni baafite bɔ ni efɛo yɔɔ lɛ. Jeee akɛ sanekpakpa lɛ Shishijelɔ lɛ fã akɛ ‘ashiɛ Yehowa duromɔ afi’ lɛ pɛ kɛkɛ, shi moŋ, ajaje “wɔ-Nyɔŋmɔ lɛ oweletɔɔ gbi” lɛ hu. (Yesaia 61:2) Nakai nɔŋŋ hu ŋwɛibɔfoi lɛ ni atsi amɛ ta yɛ Kpojiemɔ lɛ ateŋ mɔ kome shɛɛ sane lɛ hiɛ nɛkɛ wiemɔi nɛɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmlɛtswaa lɛ eshɛ.”—Kpojiemɔ 14:7.
13. (a) Mɛɛ su ni kɔɔ sanekpakpajajemɔ he klɛŋklɛŋ Kristofoi lɛ yɔɔ? (b) Okɛ ŋmalɛ ko atsu nii ni okɛtsɔɔ bɔ ni mra be mli Kristofoi lɛ buɔ bɔ ni be lɛ he hiaa waa ha lɛ mli.
13 Klɛŋklɛŋ afii oha lɛ mli Kristofoi lɛ gbɛ sanekpakpa lɛ amɛshwa kɛ oyaiyeli bɔ ni amɛaanyɛ kɛ hehiamɔ. Atsɔ su ni kɔɔ sanekpakpa lɛ he nɛɛ nɔ ayoo klɛŋklɛŋ Kristofoi lɛ hu. Encyclopaedia Britannica lɛ wie akɛ, “nɔ ni Kristofoi lɛ kpaa no gbɛ yɛ naagbee be lɛ he lɛ jeee Nyɔŋmɔ Maŋtsɛyeli lɛ baa ni amɛshweɔ no pɛ kɛkɛ ni miishɛɛ ko bɛ mli,” shi moŋ “amɛkɛ nitsumɔ babaoo kɛ oyaiyeli jie enɛ kpo yɛ gbɛ ni yɔɔ naakpɛɛ nɔ koni amɛkɛbɔ mɔdɛŋ ni amɛkɛsaa je lɛ kɛha Kristo sɛɛkuu kɛ Maŋtsɛyeli lɛ baa.” Atee nɔ abɔ asafoi lɛ kɔkɔ yɛ bɔ ni naagbee lɛ ebɛŋkɛ eha lɛ kɛ bɔ ni esa akɛ amɛfee klalo lɛ he. Bofoi lɛ yoo akɛ sanekpakpa lɛ ni amɛkɛ oyaiyeli aaajaje lɛ ji Kristojamɔ lɛ fa ni he hiaa kɛ́ nine aaashɛ gbɔmɛi fɛɛ nɔ dani Nyɔŋmɔ oweletɔɔ gbi lɛ ashɛ. Nɔ ni jɛ mli ba ji akɛ, Kristojamɔ bafa babaoo.—Romabii 10:13, 14; 1 Tesalonikabii 5:2, 6; 2 Petro 3:11-14.
14, 15. Yɛ mɛɛ gbɛ nɔ sanekpakpajajemɔ gbɛɛ kɛ shwamɔ lɛ ena yinɔsane nɔ hewalɛ eha?
14 Eyɛ mli akɛ atsi Maŋtsɛyeli lɛ he sane lɛ ni jijeɔ yɛ faŋŋ mli lɛ naa ni atsake eshishinumɔ lɛ yɛ klɛŋklɛŋ afii oha lɛ sɛɛ moŋ, shi naagbee ni akpaa lɛ gbɛ lɛ hi shi akɛ hewalɛ ko ni mli wa. Akɛ nɔkwɛmɔ nɔ lɛ, taakɛ yinɔsane ŋmalɔi komɛi tsɔɔ lɛ, gbɛ ni Kolumbus fa yɛ afii ohai 15 lɛ mli kɛtee anaigbɛ je lɛ mli lɛ fã ko jɛ hemɔkɛyeli ni ayɔɔ akɛ esa ákɛ akɛ sanekpakpa lɛ ashɛ India mra dani Kristo aku esɛɛ hewɔ. Yɛ sɛɛ mli lɛ gbɔmɛi babaoo ni fãa kɛjɛɔ maŋ kome nɔ kɛyaa ekroko nɔ tamɔ Puritan jamɔ lɛ mlibii agbɛfaa yɛ afii ohai 17 lɛ mli, Baptist jamɔ lɛ gbɛfaa, Quaker kɛ Methodistbii agbɛfaa kɛmiiya Amerika yɛ afii ohai 18 lɛ mli, kɛ Germanbii ni fa gbɛ kɛtee Rusia kɛ Palestina yɛ afii ohai 18 kɛ 19 lɛ mli lɛ fɛɛ jɛ nɛkɛ jwɛŋmɔ ni ahiɛ nɛɛ hewɔ.
15 No hewɔ lɛ, ani abaanyɛ akɛɛ akɛ sanekpakpajajemɔ nitsumɔ lɛ ni Yesu Kristo je shishi lɛ ena gbɔmɛi anɔ hewalɛ kɛjɛ blema kɛyashɛ shɔŋŋ? Yinɔsane haa hetoo akɛ Hɛɛ. Eyɛ mli akɛ sanekpakpajajemɔ he tafaa lɛ baaa yɛ gbɛ ni Kristo fa lɛ nɔ yɛ be fɛɛ be moŋ, shi hewalɛ ni ena yɛ je lɛ nɔ lɛ da naakpa. Encyclopaedia Britannica lɛ kɛ “Kristojamɔ” he sane lɛ ba naagbee kɛ nɛkɛ wiemɔ nɛɛ: “Kristojamɔ ji mumɔŋ hewalɛ ni ena adesa yinɔsane nɔ hewalɛ waa ni etsake lɛ kɛtee shɔŋŋ fe nɔ fɛɛ nɔ.”
Ŋmɛnɛŋmɛnɛ Gbii Nɛɛ Amli Sanekpakpajajemɔ
16. (a) Mɛɛ sane naa abaamu yɛ klɛŋklɛŋ afii oha lɛ mli Kristofoi lɛ ahe? (b) Mɛɛ sane abaanyɛ abi yɛ ŋmɛnɛŋmɛnɛ gbii nɛɛ amli odaseyeli lɛ he?
16 Nɛkɛ ŋwɛi kɛ jeŋ yinɔsaji amlitaomɔ nɛɛ kɛ sane naamuamɔ ko ni he hiaa waa eba: Klɛŋklɛŋ afii oha lɛ mli Kristofoi lɛ fɛɛ ji sanekpakpajajelɔi. Dani mɔ ko aaafee ni eya nɔ efee Kristofonyo lɛ, esa akɛ mɔ lɛ ashiɛ daa. Belɛ ani ŋmɛnɛ, enɛ ebatsɔ jamɔ gbɛ ni nilee bɛ mli ni eŋɔɔɔ, ni ejeee nɔ ni mɛi sumɔɔ yɛ ŋmɛnɛŋmɛnɛ beaŋ? Ekolɛ nakai eji yɛ gbɔmɔ susumɔ naa, shi jeee yɛ Nyɔŋmɔ nɔ̃ naa.—Abɛi 16:25; Yeremia 8:9.
17. Yɛ mɛɛ gbɛ nɔ Yahowa Odasefoi eto sanekpakpajajemɔ kadimɔ nii diɛŋtsɛ lɛ amɛma shi ekoŋŋ?
17 Ŋmɛnɛŋmɛnɛ beaŋ Yehowa Odasefoi ayinɔsane tsɔɔ akɛ amɛsaa amɛto shɛɛ sane ni kɔɔ Maŋtsɛyeli lɛ he sanekpakpa lɛ ni ji anɔkwale ni mli ka shi faŋŋ lɛ amɛma shi ekoŋŋ. Yɛ toiboo ni amɛfeɔ amɛhaa Kristo famɔ lɛ hewɔ lɛ amɛkɛ amɛhe ewo sanekpakpajajemɔ nitsumɔ ni da fe fɛɛ ni atsu dã lɛ mli ni deka bɛ mli kwraa. Esa akɛ aye odase yɛ je muu fɛɛ dani nibii agbɛjianɔtoo nɛɛ naagbee lɛ aba. (Mateo 24:14) Enɛ efee oti ni ma Yehowa Odasefoi ahiɛ yɛ afii 100 ni eho nɛɛ mli. Klɛŋklɛŋ Buu-Mɔɔ lɛ ni afee, ni no mli Iɛ atsɛɔ lɛ Zion’s Watch Tower and Herald of Christ’s Presence lɛ jaje eyiŋtoo nɛɛ kɛnyiɛ sɛɛ akɛ:
“Enɛ ji Zion Buu-Mɔɔ lɛ klɛŋklɛŋ kpo, ni ekolɛ ákɛ aaajaje wolo nɛɛ yiŋtoo lɛ efeŋ nɔ ni esaaa. Ákɛ ‘naagbee gbii’ lɛ amli wɔyɔɔ nɛɛ . . . ni wɔmiishwe ni ‘hemɔkɛyeli we’ lɛ hiɛ atsɛ̃ kwraa yɛ nɛkɛ anɔkwa sane nɛɛ he.”—July 1879.
Yɛ sɛɛ mli, yɛ 1884 lɛ, Yehowa Odasefoi, akɛ sanekpakpajajelɔi asafo lɛ to gbɛjianɔ koni amɛkɛ amɛ asafo lɛ awo mla shishi. Ajaje eyiŋtoo lɛ atsɔɔ yɛ emla lɛ fa ni ji enyɔ lɛ mli yɛ nɛkɛ wiemɔi nɛɛ amli: “Yiŋtoo hewɔ ni ato mla naa gbɛjianɔtoo nɛɛ ama shi yɛ mla naa ji ni agbɛ Biblia mli anɔkwalei ashwa yɛ wiemɔi sɔrɔtoi amli kɛtsɔ dɛhiɛmɔ woji, woji tɛtrɛbii, woji kɛ jamɔ mli woji krokomɛi agbɛɛ kɛshwamɔ nɔ, kɛ agbɛnɛ kɛtsɔ gbɛ fɛɛ gbɛ ni mla ŋmɛɔ gbɛ lɛ nɔ.”
Ani nɛkɛ dɛŋdadei nɛɛ etsu amɛyiŋtoo ni ajaje Iɛ he nii? Yinɔsane haa hetoo akɛ Hɛɛ.
18. Yehowa webii asanekpakpajajemɔ nitsumɔ lɛ egbala je lɛ jwɛŋmɔ yɛ mɛɛ gbɛ nɔ?
18 Yehowa Odasefoi asanekpakpajajemɔ nitsumɔ lɛ egbala je lɛ jwɛŋmɔ. Akadi enɛ ni aŋma he sane awo adafitswaa woji amli, kojomɔhei ni dara lɛ asaneyelihei kɛ yinɔsane woji amli. Kɛjɛ Buu-Mɔɔ lɛ klɛŋklɛŋ nɔ ni afee yɛ wiemɔ kome mli, yɛ be mli ni akalaa ekomekomei 6,000 daa nyɔŋ nɔ, kɛbashi ŋmɛnɛŋmɛnɛ nɔ ni akalaa ni ji ekomekomei 10,050,000 yɛ wiemɔi 102 amli nɛɛ, abɔ ni akalaa lɛ ebafee wolo ni akalaa babaoo fe jamɔ he woji fɛɛ. Shweremɔ lɛ etee nɔ yɛ naakpɛɛ gbɛ nɔ kɛjɛ ŋmlɛtswaai akpei fioo ko ni sanekpakpajajelɔi lɛ kɛtsuɔ nii yɛ afii ohai 19 lɛ mli. Yɛ 1982 mli lɛ akɛ ŋmlɛtswaai fe akpekpei 384 wo shiɛmɔ nitsumɔ lɛ mli, akɛ woji komekomei akpekpei 286 ha, ni shiai fe akpekpe kome kɛ fa nine shɛ Biblia mli nikasemɔ ni afeɔ lɛ yaka lɛ anɔ yɛ maji kɛ shikpɔŋkukuji 205 mli. Kɛ akɛaato he lɛ gbɔmɛi akuu fioo ko pɛ tsu enɛɛmɛi fɛɛ—2,477,608 yɛ 1982.
19. (a) Yehowa Odasefoi kɛ omanye ni amɛye yɛ jeŋ fɛɛ sanekpakpajajemɔ nitsumɔ lɛ mli lɛ he yijiemɔ lɛ haa namɔ? (b) Kɛ oji sanekpakpajajelɔ lɛ, mɛni esa akɛ ofee, taakɛ Mateo 10:7 tsɔɔ lɛ?
19 Ani Yehowa Odasefoi kɛ naakpɛɛ nii ni amɛtsu nɛɛ he yijiemɔ haa amɛ diɛŋtsɛ amɛŋaalee kɛ hewalɛ? Dabi. Yijiemɔ lɛ fɛɛ yaawɔnilee kɛ hewalɛ fɛɛ Nyɔŋmɔ, Yehowa, klɛŋklɛŋ Sanekpakpajajelɔ lɛ ŋɔɔ. No hewɔ lɛ mɛni obaafee? Kɛji akɛ ona sanekpakpajajemɔ gbɛhe yɛ anɔkwale jamɔ mli ni oosumɔ ni osa Yehowa hiɛ yɛ anɔkwayeli mli lɛ, belɛ jajemɔ sanekpakpa lɛ, daa, otsi fɛɛ otsi, aloo taakɛ Yesu kɛɛ lɛ: “NYƐYAA, NYƐSHIƐA”!—Mateo 10:7, NW.a
Ani Obaanyɛ Oha Sanebimɔi Nɛɛ Ahetoo
□ Mɛɛ gbɛ nɔ Yehowa etsɔ ni efi sanekpakpajajemɔ lɛ sɛɛ?
□ Mɛɛ gbɛfaŋnɔ ŋwɛibɔfoi lɛ ena yɛ sanekpakpa lɛ jajemɔ mli?
□ Mɛɛ nitsumɔ Yesu Kristo kɛ ehe wo efeemɔ mli?
□ Mɛni hewɔ obaanyɛ okɛɛ akɛ dani mɔ ko aaanyɛ afee anɔkwale □ Kristofonyo lɛ esa akɛ mɔ lɛ afee sanekpakpajajelɔ lɛ?
□ Mɛɛ gbɛkpamɔ ji nɔ ni mli wa waa yɛ mɛi ni kɛɔ akɛ amɛnyiɛ Kristo sɛɛ lɛ amli?
□ Yɛ mɛɛ gbɛ nɔ Yehowa Odasefoi ejie amɛhe kpo ŋmɛnɛ akɛ anɔkwale sanekpakpajajelɔi?
[Shishigbɛ niŋmai]
a Ajie kɛjɛ February 1, 1983 Blɔfo Buu-Mɔɔ lɛ mli.
[Mfoniri ni yɔɔ baafa 9]
Ŋwɛi kɛ shikpɔŋ nɔ sanekpakpajajelɔi feɔ ekome kɛshiɛɔ sanekpakpa Iɛ