Amɛfee Yehowa Suɔmɔnaa Nii

Samarianyo ko Tsɔɔ akɛ Eji Naanyo Kpakpa

YƐ YESU gbii lɛ amli lɛ, béi ni anaa yɛ faŋŋ mli kã Yudafoi kɛ Jeŋmajiaŋbii lɛ ateŋ. Yɛ be ko mli lɛ, Yudafoi a-Mishnah lɛ po kɛ mla ko ha, ni akɛtsi Israelyei anaa koni amɛkaye amɛbua mɛi ni jeee Yudafoi kɛ́ amɛmiifɔ, ejaakɛ enɛ baaha aná Jeŋnyo ekoŋŋ yɛ je lɛŋ.—Abodah Zarah 2:1.

Samariabii lɛ bɛŋkɛ Yudafoi lɛ kpaakpa yɛ jamɔ kɛ weku fɛɛ gbɛfaŋ, fe Jeŋmajiaŋbii lɛ. Kɛlɛ, abuuu amɛ hu. Bɔfo Yohane ŋma akɛ: “Yudafoi kɛ Samariabii yeee.” (Yohane 4:9) Lɛɛlɛŋ, Talmud lɛ tsɔɔ akɛ “kpolotoo he tse kwraa fe bodobodo fioo ko ni Samarianyo ko kɛaaha Yudafonyo.” Yudafoi komɛi po kɛ wiemɔ “Samarianyo” lɛ tsuɔ nii kɛtsɔɔ nyaŋemɔ nɔ ko, aloo jɛmɔ.—Yohane 8:48.

Yesu tee nɔ ekɛɛ akɛ: “Samarianyo ko ni nyiɛ gbɛ bashɛ he ni eyɔɔ lɛ.” Ŋwanejee ko bɛ he akɛ Samarianyo tã ni atsĩ lɛ baahɛle mlalelɔ lɛ shi koni etao babaoo ele. Ani Yesu baakpɛlɛ jwɛŋmɔ ni ejaaa ni kã maŋbii nɛɛ ateŋ lɛ nɔ? Nɔ ni tamɔɔɔ nakai lɛ, Samarianyo lɛ ‘musuŋ tsɔ lɛ,’ beni ena gbɛfãlɔ ni oshara enina lɛ nɛɛ lɛ. Yesu kɛɛ akɛ: “Etee eŋɔɔ eyafimɔ epilamɔi lɛ anɔ, ni efɔse mu kɛ wein eshwie nɔ, ni esaa ewo lɛ eta lɛ diɛŋtsɛ ekooloo lɛ nɔ, ni ekɛ lɛ tee gbɔiatoohe ni eyakwɛ lɛ.b Ni jetsɛrenɔ beni eyaa lɛ, ejie denarioi enyɔ eha gbɔiatoohetsɛ lɛ, ni ekɛɛ lɛ akɛ: Kwɛmɔ lɛ jogbaŋŋ, ni nɔ fɛɛ nɔ ni ooosaa ofite lɛ, kɛ miku misɛɛ miba lɛ, mawoo nyɔmɔ.”—Luka 10:33-35.