Yitso 75

Miishɛɛ Jɛɛhe Lɛ

BENI Yesu tsuɔ esɔɔmɔ nitsumɔ lɛ yɛ Galilea lɛ, efee naakpɛɛ nibii, ni agbɛnɛ eeti nibii nɛɛ amli ekoŋŋ yɛ Yudea hu. Akɛ nɔkwɛmɔ nɔ lɛ, efa daimonio ko ni yɔɔ nuu ko mli ni haaa enyɛ ewie lɛ kɛjɛ emli. Mɛi babaoo lɛ naa kpɛ amɛhe, shi mɛi ni wieɔ shiɔ lɛ lɛ te shi wo lɛ tamɔ amɛfee yɛ Galilea lɛ nɔŋŋ. Amɛkɛɛ: “Beelzebul, daimonioi alumɔ lɛ hewalɛ naa efaa daimonioi lɛ.” Mɛi krokomɛi hu miitao odaseyeli wulu kɛjɛ Yesu ŋɔɔ yɛ mɔ ni eji he, ni amɛbɔ mɔdɛŋ koni amɛka lɛ kɛtsɔ ŋwɛi okadi ni amɛbiɔ lɛ ni efee lɛ nɔ.

Shi akɛni Yesu le nɔ ni amɛjwɛŋɔ lɛ hewɔ lɛ, ekɛ hetoo ni eha mɛi ni wie shi lɛ yɛ Galilea lɛ nɔŋŋ ha mɛi ni wieɔ shiɔ lɛ yɛ Yudea lɛ. Ekɛɛ akɛ maŋtsɛyeli fɛɛ maŋtsɛyeli ni mli gbaa woɔ ehe lɛ damɔɔɔ shi. Ebi akɛ: “Ni kɛji Satan hu gbaa woɔ lɛ diɛŋtsɛ ehe lɛ, te aaafee tɛŋŋ ni emaŋtsɛyeli lɛ aaadamɔ shiŋ?” Etsɔɔ oshara shihilɛ ni mɛi ni wieɔ shiɔ lɛ lɛ yɔɔ mli lɛ ni ekɛɛ: “Shi kɛji Nyɔŋmɔ wao mikɛfaa daimonioi lɛ, no lɛ Nyɔŋmɔ maŋtsɛyeli lɛ eshɛ nyɛŋɔɔ.”

Esa akɛ mɛi ni naa naakpɛɛ nibii ni Yesu feɔ lɛ akpɛlɛ nɔ taakɛ mɛi lɛ fee afii ohai abɔ ni eho nɛ beni amɛna ni Mose fee naakpɛɛ nii lɛ. Amɛkɛɛ akɛ: “Enɛ lɛ Nyɔŋmɔ wao nɛ.” “Nyɔŋmɔ wao” hu ji nɔ ni ŋma Kitai Nyɔŋma lɛ yɛ tɛ tao lɛ nɔ lɛ. Ni “Nyɔŋmɔ wao”—emumɔ krɔŋkrɔŋ, loo nitsumɔ hewalɛ lɛ—ji nɔ ni yeɔ buaa Yesu ni efamɔɔ daimonioi ni etsaa helatsɛmɛi lɛ. No hewɔ lɛ, yɛ anɔkwale mli lɛ Nyɔŋmɔ Maŋtsɛyeli lɛ ebashɛ mɛi ni wieɔ shiɔ lɛ nɛɛ aŋɔɔ, akɛni Yesu, ni ji Maŋtsɛyeli lɛ nɔ Maŋtsɛ ni awo lɛ yɔɔ amɛteŋ yɛ jɛmɛ lɛ.

Kɛkɛ ni Yesu fee he mfoniri akɛ hewalɛ ni ekɛfamɔɔ daimonioi lɛ ji odaseyeli ni tsɔɔ akɛ eyɛ hewalɛ yɛ Satan nɔ, taakɛ bɔ ni nuu ni he wa nyɛɔ ebaa ni ebayeɔ nuu ni ewula ehe jogbaŋŋ ni buɔ eshia he lɛ nɔ kunim lɛ. Agbɛnɛ hu esaa eti abɛbua ni egba amɛ yɛ Galilea ni kɔɔ mumɔ ko ni he tseee lɛ he lɛ mli ekoŋŋ. Mumɔ lɛ shi nuu lɛ mli, shi akɛni nuu lɛ kɛ nibii kpakpai wooo emli he ni ebaka shi efolo lɛ hewɔ lɛ, mumɔ lɛ kɛ kpawo krokomɛi ku amɛsɛɛ, ni nuu lɛ shihilɛ bafee awerɛho fe tsutsu lɛ.

Beni amɛboɔ tsɔɔmɔi nɛɛ atoi lɛ, nɔ ko tsirɛ yoo ko yɛ mɛi lɛ ateŋ ni ebo waa ni ekɛɛ: “Ajɔɔ musu ni hiɛo kɛ fufɔ ni oye lɛ!” Akɛni nɔ ni Yudayoo fɛɛ Yudayoo shweɔ ji ni efee gbalɔ ko aloo titri lɛ Mesia lɛ nyɛ hewɔ lɛ, shishinumɔ yɛ he akɛ yoo nɛɛ aaawie nɛkɛ. Ekolɛ esusu akɛ Maria baana miishɛɛ waa akɛni lɛ ji Yesu nyɛ lɛ hewɔ.

Shi kɛlɛ, Yesu jaje yoo lɛ yɛ anɔkwa miishɛɛ jɛɛhe lɛ he. Ehere nɔ akɛ: “Eyɛ mli moŋ, shi ajɔɔ [miishɛɛ ji] mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!” Yesu etsɔɔɔ kɔkɔɔkɔ akɛ esa akɛ akɛ woo krɛdɛɛ ko aha enyɛ Maria. Yɛ no najiaŋ lɛ, etsɔɔ akɛ Nyɔŋmɔ tsulɔ anɔkwafo ni mɔ ko aaafee lɛ haa anaa anɔkwa miishɛɛ, ni jeee heloonaa tsakpaa ko loo nibii ni mɔ enyɛ efee.

Taakɛ Yesu fee yɛ Galilea lɛ, etee nɔ ekã gbɔmɛi lɛ ahiɛ yɛ Yudea hu yɛ okadi ni amɛbi ni efee lɛ hewɔ. Ekɛɛ amɛ akɛ ahaŋ amɛ okadi ko ja Yona okadi lɛ. Yona batsɔ okadi kɛtsɔ gbii etɛ ni eye yɛ ŋshɔŋloo lɛ musuŋ lɛ kɛ shiɛmɔ ni eshiɛ kɛ ekaa, ni nɔ ni jɛ mli ba ji Ninivebii ni tsake amɛtsui lɛ nɔ. Yesu kɛɛ: “Ni naa, mɔ ni fe Yona yɛ biɛ.” Nakai nɔŋŋ hu, Sheba maŋnyɛ lɛ naa kpɛ ehe yɛ Salomo nilee lɛ hewɔ. Ni Yesu wie no hu he akɛ: “Ni naa, mɔ ni fe Salomo yɛ biɛ.”

Yesu tsɔɔ mli akɛ, kɛ mɔ ko su kane lɛ, ekɛmaaa kpokplobiiaŋ aloo tsese shishi, shi moŋ ekɛmaa kanetso nɔ koni gbɔmɛi ana la lɛ. Ekolɛ eetsɔɔ akɛ enitsɔɔmɔ kɛ naakpɛɛ nii ni efeɔ yɛ nɛkɛ kwashiai ni yɔɔ etoibolɔi lɛ ateŋ lɛ ahiɛ nɛɛ tamɔ nɔ ni ekɛ kane la lɛ miito. Mɛi ni naa nibii ni efeɔ nɛɛ ahiŋmɛii anɔ tseee, aloo enaaa nii jogbaŋŋ, no hewɔ lɛ yiŋtoo ni yɔɔ enaakpɛɛ nii lɛ asɛɛ lɛ baaa mli.

Etsɛko tsɔ ni Yesu fa daimonio ko ni eha nuu ni etsɔ mumui lɛ wie. Esa akɛ enɛ atsirɛ gbɔmɛi ni amɛhiŋmɛii anɔ tse, loo amɛnaa nii jogbaŋŋ lɛ ni amɛjie nɛkɛ naakpɛɛ nitsumɔ nɛɛ yi ni amɛjaje sanekpakpa lɛ! Kɛlɛ, yɛ mɛi ni wieɔ shiɔ lɛ nɛɛ agbɛfaŋ lɛ, jeee nakai eba lɛ. No hewɔ lɛ Yesu mu naa akɛ: “No hewɔ lɛ, kwɛ ni ahi, koni la ni yɔɔ omli lɛ akatsɔ duŋ. No hewɔ lɛ kɛji ogbɔmɔtso muu lɛ mli tse ni he ko he ko woko duŋ lɛ, tse nɔŋŋ emuu lɛ fɛɛ mli aaatse taakɛ bɔ ni kane kɛ ekpɛmɔ tsoɔ haao lɛ.” Luka 11:14-36; 2 Mose 8:18, 19; 31:18; Mateo 12:22, 28.

▪ Te ahere tsamɔ ni Yesu tsa nuu lɛ nɔ aha tɛŋŋ?

▪ Mɛni ji “Nyɔŋmɔ wao” lɛ, ni mɛɛ gbɛ nɔ Nyɔŋmɔ Maŋtsɛyeli lɛ ebanina Yesu toibolɔi lɛ yɛ?

▪ Nɛgbɛ ji anɔkwa miishɛɛ jɛɛhe?

▪ Mɛɛ gbɛ nɔ mɔ ko aaatsɔ ana hiŋmɛii ni nɔ tse yɛ?