‘Hiɛ Gbooo Sanekpakpa Lɛ He’

“Mihiɛ gbooo Kristo sanekpakpa lɛ he, ejaakɛ eji Nyɔŋmɔ hewalɛ ni aŋɔhereɔ mɔ fɛɛ mɔ ni heɔ yeɔ lɛ yiwala.”​—ROMABII 1:⁠16.

 1. Te afɔɔ sanekpakpa nɔheremɔ ahaa tɛŋŋ, shi te mɛi ni bɛ hemɔkɛyeli ni yɔɔ je lɛŋ lɛ baabu Nyɔŋmɔ Maŋtsɛyeli lɛ he sanekpakpa lɛ amɛha tɛŋŋ?

NƆ NI tamɔ sanekpakpa kɛha mɔ ko lɛ baafee nɔ ni mɔ kroko ebuŋ lɛ akɛ sanekpakpa. Nɔ ni afɔɔ feemɔ ji akɛ, akɛ miishɛɛ hereɔ mɔ ni hiɛ sanekpakpa lɛ, ni abaatsɔ toi ni sumɔɔ ni ebo sane lɛ toi aha lɛ. Shi, Biblia lɛ gba fɔ shi akɛ gbɔmɛi ni bɛ hemɔkɛyeli ni yɔɔ je lɛŋ lɛ ebuŋ Nyɔŋmɔ Maŋtsɛyeli lɛ he sanekpakpa lɛ kɛ eyiwalaheremɔ sane lɛ akɛ miishɛɛ nɔ.​—Okɛto 2 Korintobii 2:​15, 16 he.

 2. Mɛni bɔfo Paulo wie yɛ sanekpakpa ni ejaje lɛ he, ni mɛni hewɔ sane lɛ ni ejaje lɛ ka he eji sanekpakpa lolo yɛ ŋmɛnɛ lɛ?

² Bɔfo Paulo ji mɔ ko ni atsu lɛ koni ekɛ sanekpakpa lɛ ayaha jeŋmajiaŋbii lɛ. Te enu enitsumɔ nɛɛ he eha tɛŋŋ? Ekɛɛ: “No hewɔ lɛ kɛ ka mi kome mi hewɔ lɛ miisumɔ akɛ nyɛ mɛi ni nyɛyɔɔ Roma lɛ hu, mabajaje sanekpakpa lɛ matsɔɔ nyɛ. Ejaakɛ mihiɛ gbooo Kristo sanekpakpa lɛ he.” (Romabii 1:​15, 16) Kɛ sane ko baafee sanekpakpa lolo yɛ ŋmɛnɛ, yɛ nɔ ni fe afii 2,000 ni bɔfo Paulo ŋma wolo eyaha Kristofoi ni yɔɔ Roma lɛ sɛɛ nɛɛ, belɛ esa akɛ efee sanekpakpa ni sɛɛ tsɛɔ diɛŋtsɛ. Yɛ anɔkwale mli lɛ, eji “naanɔ sanekpakpa.”​—Kpojiemɔ 14:⁠6.

 3, 4. Mɛni hewɔ bɔfo Paulo kɛɛ ehiɛ gbooo yɛ sanekpakpa lɛ he lɛ?

³ Mɛni hewɔ bɔfo Paulo kɛɛ ehiɛ gbooo sanekpakpa lɛ he lɛ? Mɛni baaha ehiɛ agbo yɛ he? Ejaakɛ ejeee sane ni ehe gbɛi, ejaakɛ ekɔɔ nuu ko ni asɛŋ lɛ yɛ sɛŋmɔtso nɔ tamɔ efɔŋfeelɔ ko ni he guɔ egbo, ni haaa awie ehe ekpakpa yɛ gbɛ ko kwraa nɔ lɛ diɛŋtsɛ he. Nɛkɛ nuu nɛɛ kɛ afii etɛ kɛ fa ekpa Palestina fɛɛ kɛ sanekpakpa lɛ ni ekɛ shitee-kɛ-woo ni mli wa ni jɛ Yudafoi lɛ aŋɔɔ ekpe, titri lɛ jamɔ mli hiɛnyiɛlɔi lɛ. Ni agbɛnɛ, Paulo, ni nakai nuu ni agbeɔ ehe guɔ lɛ gbɛi ka enɔ lɛ kɛ shitee-kɛ-woo ni tamɔ nakai nɔŋŋ miikpe.​—Mateo 9:​35; Yohane 11:​46-48, 53; Bɔfoi lɛ Asaji 9:​15, 20, 23.

⁴ Yɛ shitee-kɛ-woo nɛɛ hewɔ lɛ, abaasusu Paulo kɛ enanemɛi Yesu Kristo kaselɔi lɛ ahe akɛ amɛhiɛ nɔ ko ni esa akɛ amɛhiɛ agbo yɛ he. Yɛ anɔkwale mli lɛ, agbɛnɛ Paulo kɛ ehe ekpɛtɛ nɔ ko ni lɛ diɛŋtsɛ lɛ tsutsu lɛ ebu nii ni tamɔ nɛkɛ akɛ eji hiɛgbele nii lɛ he. Lɛ diɛŋtsɛ lɛ ekɛ ehe ewo ahorabɔɔ ni akɛba Yesu Kristo sɛɛnyiɛlɔi lɛ anɔ lɛ mli. (Bɔfoi lɛ Asaji 26:​9-11) Agbɛnɛ ekpa nakai nifeemɔ lɛ. Nɔ ni ejɛ mli eba ji akɛ, lɛ, kɛ mɛi krokomɛi ni etsɔmɔ Kristofoi lɛ miina yiwaa ni mli wa mli amanehulu.​—Bɔfoi lɛ Asaji 11:⁠26.

 5. Te Paulo tsɔɔ esane akɛ ehiɛ gbooo sanekpakpa lɛ he lɛ mli eha tɛŋŋ?

⁵ Kɛji akɛ mɔ ko ŋmɛ gbɛ koni ehiɛ agbo yɛ Yesu Kristo sɛɛnyiɛlɔ ni eji lɛ hewɔ lɛ, belɛ bɔ ni adesa susuɔ nii ahe ehaa lɛ, nakai nɔŋŋ lɛ hu efeɔ lɛ. Bɔfo Paulo tamɔɔɔ nakai. Shi moŋ, yɛ be mli ni etsɔɔ akɛ ehiɛ gbooo sanekpakpa lɛ ni eshiɛ lɛ he lɛ mli lɛ, ekɛɛ: “Ejaakɛ eji Nyɔŋmɔ hewalɛ, ni aŋɔhereɔ mɔ fɛɛ mɔ ni heɔ yeɔ lɛ yiwala.” (Romabii 1:16) Nyɔŋmɔ hewalɛ lɛ jeee nɔ ni hiɛ gboɔ yɛ he kɛji akɛ eetsu nii kɛmiitsɔ Yesu kaselɔ ko nɔ koni akɛtsu anunyam Nyɔŋmɔ lɛ ni Yesu Kristo diɛŋtsɛ ji ejalɔ kɛ eyijielɔ lɛ yiŋtoo ni sa yijiemɔ lɛ he nii lɛ.​—Okɛto 1 Korintobii 1:​18; 9:​22, 23 he.

Ajaje Sanekpakpa lɛ yɛ Jeŋ Fɛɛ

 6, 7. (a) Mɛɛ gbɛnaa nii ni kɔɔ sanekpakpa lɛ he Yehowa Odasefoi bɔɔ mɔdɛŋ ni amɛhi shi yɛ naa, ni mɛni ejɛ mli eba? (b) Eyɛ mli akɛ wɔsumɔŋ ni wɔha gbeyeishemɔ atsi wɔnaa koni wɔkaye odase moŋ, shi mɛni he baahia yɛ bei komɛi amli? (Kwɛmɔ shishigbɛ niŋmaa lɛ.)

⁶ Taakɛ Paulo ji lɛ, Yehowa Odasefoi ni yɔɔ ŋmɛnɛ lɛ ji E-nunyam Bi, Yesu Kristo kaselɔi. Nɛkɛ e-Dasefoi nɛɛ ji mɛi ni Yehowa kɛ “anunyam sanekpakpa” lɛ ni tamɔ jwetri lɛ ewo amɛdɛŋ. (1 Timoteo 1:11) Yehowa Odasefoi lɛ edamɔ nɛkɛ gbɛnaa nii ni tsii nɛɛ naa ni aawo amɛ hewalɛ koni amɛhiɛ akagbo enɛ he. (2 Timoteo 1:⁠8) Ehe miihia ni wɔkaŋmɛ gbɛ koni gbeyeishemɔ loo tsuifaa miitsi wɔ gbɛ koni wɔkaye odase ni wɔjie wɔhe kpo akɛ Yehowa Odasefoi.a

⁷ Nɔ ni ejɛ nɛkɛ odaseyeli kɛ ekaa ni gbeyeishemɔ bɛ mli nɛɛ mli eba ji Ŋwɛi Floflo Nyɔŋmɔ lɛ gbɛi ni ajajeɔ yɛ shikpɔŋ muu lɛ fɛɛ nɔ kɛ e-Maŋtsɛyeli lɛ he sanekpakpa lɛ ni ajajeɔ yɛ jeŋ fɛɛ lɛ. Nyɔŋmɔ Bi lɛ kɛɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba,” ni aŋmɛŋ gbɛ koni nɛkɛ gbalɛ nɛɛ afee yaka. (Mateo 24:14) Aashiɛ sanekpakpa lɛ bianɛ yɛ shikpɔji fe 210 nɔ ni ashɛko nɛkɛ shiɛmɔ nitsumɔ nɛɛ naagbee. Akɛni wɔhiɛ gbooo sanekpakpa lɛ he ni agbɛnɛ wɔkɛ ekaa miikwɛ wɔsɛɛ be gbɛ hewɔ lɛ, wɔsɔleɔ taakɛ bɔ ni mra be mli Yesu kaselɔi lɛ sɔle lɛ: “Ni agbɛnɛ hu, Nuŋtsɔ [Yehowa], . . . oha otsuji lɛ kɛ ekaa pii ajaje owiemɔ lɛ.”​—Bɔfoi lɛ Asaji 4:⁠29.

 8. Mɛni hewɔ esaaa akɛ shitee-kɛ-woo ni baa yɛ shikpɔŋ lɛ nɔ jeŋmaji fɛɛ mli lɛ haa Yehowa Odasefoi anijiaŋ jeɔ wui lɛ?

⁸ Yɛ be mli ni eji anɔkwale akɛ anyɛɔ Yehowa Odasefoi ni ateɔ shi awoɔ amɛ yɛ shikpɔŋ muu lɛ fɛɛ nɔ lɛ, enɛ efee nakai koni eha nɔ ni agba afɔ shi akɛ ebaakadi anɔkwa Nyɔŋmɔ hiɛkalɔ lɛ jalɔi lɛ aba mli. (Yohane 15:​20, 21; 2 Timoteo 3:12) No hewɔ lɛ ni enɛ aaaha wɔnijiaŋ aje wui ni eha wɔhe ajɔ lɛ, mɛi ni jajeɔ sanekpakpa lɛ naa nɔmimaa akɛ amɛyɛ ŋwɛi nɔkpɛlɛmɔ ni amɛfata gbɛjianɔtoo loo asafo ni Jeŋ Muu Fɛɛ Maŋtsɛ lɛ ekpɛlɛ nɔ lɛ he.

 9. Mɛni hewɔ jeŋ muu lɛ fɛɛ ni teɔ shi woɔ wɔ lɛ kɔɔɔ he eko lɛ?

⁹ Nyɛhiɛ akakpaa enɛ nɔ: Ŋwɛi Flooflo Nyɔŋmɔ ni ji jeŋ muu fɛɛ maŋtsɛ lɛ fiɔ wɔsɛɛ. No hewɔ lɛ, mɛni kɛji akɛ jeŋ muu lɛ kɛ ejamɔi kɛ maŋkwramɔŋ kui sɔrɔtoi lɛ fɛɛ te shi wo wɔ? Jeŋ muu lɛ fɛɛ te shi wo Nyɔŋmɔ Bi koome lɛ, ni efeee wɔ hiɛgbele akɛ aaana wɔ yɛ shihilɛ ni tamɔ nakai nɔŋŋ mli. Taakɛ ekɛɛ ebɔfoi lɛ: “Kɛji je lɛ miinyɛ nyɛ lɛ, nyɛnaa nyɛlea akɛ mi tsutsu enyɛ. Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.”​—Yohane 15:​18, 19.

10. Odasefoi lɛ ayiwaa lɛ baa kɛjɛɔ nɛgbɛ titri, ni mɛni hewɔ amɛhiɛ gbooo yɛ enɛ he lɛ?

¹⁰ Yehowa Odasefoi ena nɔ yɛ yiwaa mli yɛ jeŋ muu fɛɛ titri lɛ yɛ maji ni tsɛɔ amɛhe Kristendom maji lɛ amli. Yiwaa ni Kristendom kɛbaa Odasefoi lɛ anɔ lɛ etsɔɔɔ akɛ amɛjeee Kristofoi. Shi moŋ, emaa kɛɛmɔ ni amɛkɛɔ akɛ amɛji anɔkwa Kristofoi, Yesu Kristo Nyɔŋmɔ kɛ e-Tsɛ ni ji Yehowa lɛ Odasefoi lɛ nɔ mi moŋ. Akɛni amɛji Nyɔŋmɔ Odasefoi hewɔ lɛ, efeee amɛ hiɛgbele akɛ amɛaana amanehulu yɛ jamɔ hewɔ. No hewɔ lɛ, ŋaa ni bɔfo Paulo wo klɛŋklɛŋ afii oha lɛ mli Kristofoi lɛ akɛ amɛhiɛ akagbo lɛ kɔɔ Yehowa Odasefoi ni yɔɔ ŋmɛnɛ lɛ ahe jogbaŋŋ.​—Kwɛmɔ Filipibii 1:​27-29.

Sanekpakpa ni fe Fɛɛ ni Abaanya Ajaje Atsɔɔ

11. Mɛni hewɔ gbɛi ni ji Yehowa Odasefoi ni wɔkɔ lɛ etsɔɔɔ akɛ belɛ wɔjeee Yesu Kristo sɛɛnyiɛlɔi dɔŋŋ lɛ?

¹¹ Yehowa Odasefoi kɛ ekaa ekpɛlɛ amɛgbɛi lɛ nɔ koni eha shi ni Yehowa wo ewebii ni ekɛ amɛ efee kpaŋmɔ yɛ Yesaia 43:10 lɛ aba mli. Shi enɛ etsɔɔɔ akɛ amɛnyiɛɛɛ Yesu Kristo sɛɛ dɔŋŋ. Yesu ji amɛhiɛnyiɛlɔ, mɔ ni amɛnyiɛɔ enɔkwɛmɔ nɔ lɛ sɛɛ. Lɛ diɛŋtsɛ lɛ eji Yehowa odasefoi lɛ ateŋ mɔ kome. Yɛ anɔkwale mli lɛ, lɛ ji Yehowa Odasefonyo titri.​—1 Timoteo 6:​13; Kpojiemɔ 1:⁠5.

12. Mɛɛ sane nɛkɛ Yehowa Odasefoi shiɛɔ yɛ jeŋ fɛɛ, ni mɛni hewɔ?

¹² Shɛɛ sane ni nɛkɛ Yehowa Odasefoi nɛɛ shiɛɔ yɛ jeŋ muu fɛɛ lɛ ji sane ni hi fe fɛɛ ni abaanyɛ ajaje atsɔɔ. Nɔyeli ko bɛ ni baanyɛ afee nɔyeli kpakpa aha adesai fe Mesia Maŋtsɛyeli lɛ ni Yehowa eto koni eye adesai aje lɛ nɔ, ni e-Bi koome lɛ ba koni ebakpɔ amɛ lɛ. (Yesaia 9:​6, 7) Akɛ hegbɛ miiha shikpɔŋ lɛ nɔ bii ni ashiɛɔ Maŋtsɛyeli lɛ he sanekpakpa lɛ atsɔɔ amɛ lɛ koni amɛkpɛlɛ nɔ ni amɛtsɔɔ akɛ amɛji mɛi ni naanɔ wala yɛ adesa emuuyeli mli yɛ paradeiso shikpɔŋ nɔ he nikee nii lɛ sa amɛ.

13. Mɛni hewɔ wɔbaanyɛ wɔna nɔmimaa akɛ Mesia Maŋtsɛyeli nɔyeli lɛ baafee nɔ ni hi fɛ fɛɛ lɛ, ni Odasefoi lɛ jieɔ mɛni ni amɛhiɛ gbooo yɛ he lɛ yi.

¹³ Yɛ anɔkwale mli lɛ, kɛji akɛ Yesu miisumɔ ni etsɔ yiwalɛ gbele mli bɔni afee ni ekpɔ mɛi ni baatsɔ eshishibii lɛ, belɛ eka shi faŋŋ akɛ ehaŋ amɛ nɔyeli ko ni jeee nɔ ni hi fe fɛɛ. No hewɔ lɛ nɔ ni wɔjieɔ yi wɔhaa adesa bɔɔ nɔ fɛɛ bɔɔ nɔ ni yɔɔ shikpɔŋ lɛ nɔ ji akɛ: Baatsɔ nakai nɔyeli lɛ shishinyo toibolɔ anɔkwafo. Wɔhiɛ gbooo nɔyeli ni wɔkɛ anɔkwayeli fɛɛ jieɔ yi wɔtsɔɔ adesai lɛ he. Wɔyaaa sɛɛsɛɛ ni wɔmiijo foi kɛmiijɛ Maŋtsɛyeli lɛ shiɛmɔ he, eyɛ mli akɛ gbɛ ni tamɔ nɛkɛ kɛ yiwaa baaba wɔnɔ. Wɔteŋ mɔ fɛɛ mɔ kɛɔ, taakɛ bɔ ni Paulo kɛɛ lɛ, akɛ: “Mihiɛ gbooo Kristo sanekpakpa lɛ he.”

14. Yesu gba akɛ Maŋtsɛyeli shiɛmɔ lɛ baaya ayashɛ nɛgbɛ yɛ wɔgbii nɛɛ amli?

¹⁴ Yesu gba fɔ shi akɛ Maŋtsɛyeli lɛ he sanekpakpa lɛ shiɛmɔ baaya nɔ yɛ jeŋ fɛɛ, ni nɛkɛ gbalɛ ni lɛɛ nɛɛ sa sanekpakpa ni tamɔ nɛkɛ. (Marko 13:10) Eshashaoo shi akɛ eeegba Yehowa Maŋtsɛyeli lɛ shiɛmɔ kɛmiishɛ shɔŋŋ lɛ efɔ shi​—hɛɛ, kɛmiishɛ shikpɔŋ lɛ naagbee hei lɛ. (Bɔfoi lɛ Asaji 1:⁠8) Yesu le akɛ he fɛɛ he ni aaana gbɔmɛi yɛ lɛ, esɛɛnyiɛlɔi anɔkwafoi lɛ baabɔ mɔdɛŋ diɛŋtsɛ ni amɛkɛ Maŋtsɛyeli lɛ he sanekpakpa lɛ ayaha amɛ.

15, 16. (a) Namɛi esa akɛ akɛ sanekpakpa lɛ yaa amɛŋɔɔ? (b) Mɛni hewɔ abaatsu shiɛmɔ nitsumɔ lɛ agbe naa yɛ shitee-kɛ-woo ni Abonsam gbɛjianɔtoo lɛ kɛbaa lɛ fɛɛ sɛɛ lɛ?

¹⁵ Shikpɔŋ lɛ nɔ bii ayibɔ shɛɔ akpekpei akpei abɔ ŋmɛnɛ ni amɛgbɛ amɛshwa shikpɔŋ wuji kɛ ŋshɔkpɔi titrii anɔ. Ni kɛlɛ, shikpɔŋ ni gbɔmɛi yɔɔ nɔ lɛ he ko bɛ ni yɔɔ shɔŋŋ ni Yehowa Odasefoi nyɛɛɛ amɛkɛ sanekpakpa lɛ aya jɛmɛ. Shikpɔŋ ni ayɔɔ nɔ lɛ fɛɛ ji Yehowa Nyɔŋmɔ okadi naneshi maaŋoo lɛ. (Yesaia 66:⁠1) Esa akɛ akɛ yiwalaheremɔ he sane nɛɛ ayaha adesai ni ji bɔɔ nii ni yɔɔ enaneshi maaŋoo nɛɛ nɔ he fɛɛ he lɛ.

¹⁶ Ŋmɛnɛ sanekpakpa lɛ ji odehei anɔyeli ko ni ato ama shi momo yɛ Mesia lɛ dɛŋ lɛ he sane ni haa mɔ naa miishɛɛ. Yesu le akɛ yɛ yiwaa ni mli wa fe fɛɛ ni Abonsam gbɛjianɔtoo lɛ kɛaaba lɛ fɛɛ sɛɛ lɛ, Nyɔŋmɔ mumɔ lɛ baakanya Mesia lɛ sɛɛnyiɛlɔi anɔkwafoi lɛ ni amɛya shɔŋŋ kɛyashɛ he fɛɛ he ni amɛaanyɛ bɔni afee ni “ashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ” akɛ anɔkwa sane ni ma shi shiŋŋ.​—Mateo 24:⁠14.

Wɔhiɛ Gbooo Yesu Kristo kɛ Yehowa He

17. (a) Anɔkwa jalɔi hiɛ gbooo yɛ mɛni he? (b) Mɛɛ mla loo taomɔ nii Yesu kɛfɔ shi yɛ Marko 8:​38, ni mɛni ji nɔ ni enɛ tsɔɔ?

¹⁷ Ŋwɛi Flooflo Nyɔŋmɔ lɛ shashaoo shi akɛ ekɛ lɛ diɛŋtsɛ egbɛi ni ji Yehowa lɛ aaatsɛ ehe; ni asaŋ esaaa akɛ ejalɔi anɔkwafoi lɛ hu hiɛ gboɔ nakai gbɛi lɛ he. Anɔkwa jalɔi yɛ miishɛɛ akɛ aaale amɛ akɛ mɛi ni kɛ jamɔ kɛ toiboo ni anyɛɛɛ agbala mli haa lɛ. Yesu kɛ mla loo shishitoo taomɔ nii ni kɔɔ ehe lɛ ma shi yɛ Marko 8:38: “Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbalafitelɔi kɛ eshafeelɔi nɛɛ ateŋ lɛ, lɛ hu ehe aaafee gbɔmɔbi lɛ hiɛgbele beni eeeba yɛ etsɛ anunyam lɛ mli kɛ ebɔfoi krɔŋkrɔŋi lɛ.” Nakai nɔŋŋ hu mɔ fɛɛ mɔ ni hiɛ baagbo Nuŋtsɔ Yesu Kristo Nyɔŋmɔ kɛ Tsɛ lɛ he lɛ, Yehowa hu hiɛ baagbo yɛ mɔ ni tamɔ nɛkɛ he. Ni bɔɔ nɔ fɛɛ bɔɔ nɔ ni Yehowa hiɛ baagbo yɛ ehe yɛ enifeemɔ gbɛ ni tsɔɔ anɔkwa ni ayeee nɛɛ he lɛ baafee mɔ ni esaŋ akɛ eeehi shi yɛ Nyɔŋmɔ nɔyeli he ni yɔɔ ŋwɛi loo shikpɔŋ nɛɛ nɔ lɛ mli.​—Luka 9:⁠26.

18. (a) Mɛni hewɔ esa akɛ wɔha Yesu wiemɔi ni yɔɔ Mateo 10:​32, 33 lɛ aka wɔtsui kɛ wɔjwɛŋmɔi amli lɛ? (b) Mɛni baa mɛi ni kwaa Yesu kɛ Yehowa yɛ gbɔmɛi ahe gbeyeishemɔ hewɔ lɛ anɔ? (Okɛ nɔkwɛmɔ nii ni damɔ shishigbɛ niŋmaa lɛ nɔ aha.)

¹⁸ Nyɛhaa Yesu Kristo wiemɔi ni nyiɛ sɛɛ nɛɛ akaa wɔtsuii kɛ wɔjwɛŋmɔi amli: “No hewɔ lɛ mɔ fɛɛ mɔ ni gbaa mli tsiɔ mita yɛ gbɔmɛi ahiɛ lɛ, mi hu magba mli matsi eta yɛ mitsɛ ni yɔɔ ŋwɛi lɛ hiɛ. Shi mɔ fɛɛ mɔ ni kwaa mi yɛ gbɔmɛi ahiɛ lɛ, mi hu makwa lɛ yɛ mitsɛ ni yɔɔ ŋwɛi lɛ hiɛ.” (Mateo 10:​32, 33; Luka 12:​8, 9) Yɛ nakai gbɛ nɔ nɔŋŋ lɛ, mɔ fɛɛ mɔ ni baakwa Nuŋtsɔ Yesu Kristo Nyɔŋmɔ kɛ Tsɛ lɛ, Lɛ hu eeekwa nakai mɔ lɛ. Abuŋ lɛ akɛ mɔ ni sa akɛ efeɔ weku ni Yesu Kristo ji Bi Nukpa yɛ jɛmɛ lɛ mlinyo. No hewɔ lɛ abaakpata ehiɛ yɛ Nyɔŋmɔ be ni sa mli.b

19, 20. (a) Mɛni hewɔ mɛi ni esɔle koni atse Yehowa gbɛi lɛ he lɛ bɛ nɔ ko ni amɛhiɛ baagboi yɛ he lɛ? (b) Mɛni ji nɔ ni Maŋtsɛyeli shiɛlɔi ni sheee gbeyei lɛ etsu, ni kɛ mɛɛ sɛɛfimɔ?

¹⁹ Abaaha sɔlemɔ he nɔkwɛmɔ nɔ ni Yesu tsɔɔ ekaselɔi lɛ hetoo: “Wɔ Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ.” (Mateo 6:​9, 10, New World Translation) Kɛ enɛ ba mli lɛ, Yesu kaselɔi ni yɔɔ suɔmɔ lɛ bɛ nɔ ko ni amɛhiɛ baagbo yɛ he. No mli lɛ abu Yehowa gbɛi lɛ krɔŋkrɔŋ, atsuu he, jeee kɛtsɔ akpekpei abɔ ni yɔɔ wala mli bianɛ ni ehe ehiaaa ni amɛgboi lɛ pɛ nɔ, shi moŋ kɛtsɔ adesai akpekpei toi akpei abɔ ni ebaatsɛ amɛ kɛaajɛ amɛgbohii abui amli yɛ e-Maŋtsɛyeli nɔyeli ni baahe afi akpe lɛ mli lɛ hu nɔ.

Amɛbaana hegbɛ ni amɛhi paradeiso shikpɔŋ nɔ kɛya naanɔ.

²⁰ Nɛkɛ Maŋtsɛyeli lɛ he sanekpakpa lɛ shiɛlɔi ni sheee gbeyei nɛɛ enyɛ eye odase yɛ jeŋ muu fɛɛ yɛ shitee-kɛ-woo ni jɛɔ jeŋ muu fɛɛ baa amɛnɔ lɛ fɛɛ sɛɛ ni amɛhiɛ gbooo, ejaakɛ amɛyɛ hewalɛ ni fe adesa nɔ lɛ akɛ amɛsɛɛfilɔ​—ŋwɛi bɔfoi lɛ asɛɛfimɔ. No hewɔ lɛ, Yehowa Odasefoi “sheɔ Nyɔŋmɔ gbeyei ni amɛkɛ anunyam haa lɛ.”​—Kpojiemɔ 14:​6, 7.

Wɔhiɛ Gbooo Akɛ Wɔɔshe Nyɔŋmɔ Gbeyei ni Wɔkɛ Anunyam Aha Lɛ

21. Yehowa Odasefoi efee mɛni ni amɛhiɛ gbooo, ni mɛni ejɛ mli eba?

²¹ Yehowa Odasefoi ejie amɛhe kpo akɛ amɛhiɛ gbooo akɛ amɛaashe Nyɔŋmɔ gbeyei ni amɛkɛ anunyam aha lɛ, ni amɛkɛ lɛ diɛŋtsɛ egbɛi ni ji Yehowa lɛ tsuɔ nii. Nɔ ni ejɛ enɛ mli eba amɛnɔ ji jɔɔmɔi babaoo. Nɛkɛ jɔɔmɔi nɛɛ eba amɛnɔ akɛ Ŋwɛi Flooflo Nyɔŋmɔ lɛ shiwoi lɛ amlibaa yɛ anɔkwayeli mli. Kwɛ bɔ ni enɛ ebu anɔkwa Nyɔŋmɔ hiɛkalɔ kome ni eji lɛ bem eha, kɛ agbɛnɛ akɛ jeŋ muu fɛɛ Maŋtsɛ!

22. Mɛni hewɔ Yehowa Odasefoi kɛ yiwaa ni naa wa baakpe lɛ, ni mɛɛ miishɛɛ baaji amɛnɔ?

²² Yɛ wɔsɛɛ be ni baa lɛ mli lɛ, je lɛŋ nɔyelii lɛ baate shi awo jamɔŋ gbɛjianɔtoo fɛɛ ni amɛkpata amɛ fɛɛ amɛhiɛ​—ni Kristendom fata he​—kɛjɛ shihilɛ mli kwraa. (Kpojiemɔ 17:​16, 17) No hewɔ lɛ, Yehowa Odasefoi kɛ yiwaa ni mli wa ni je lɛŋ bii kɛaaba amɛnɔ lɛ baakpe. Eji naanɔ Nyɔŋmɔ lɛ bɛ amɛsɛɛ kulɛ, amɛnyɛŋ amɛdamɔ naa ni amɛje mli. Shi eyɛ amɛsɛɛ, no hewɔ lɛ amɛbaana miishɛɛ beni amɛaana ni akpata nɛkɛ mɛi ni teɔ shi woɔ Kristo, mɛi ni teɔ shi woɔ Yehowa akɛ henyɛlɔi nɛɛ fɛɛ ahiɛ kɛjɛ shihilɛ mli, ni Nyɔŋmɔ ni Odasefoi ja lɛ ni amɛgbaaa afa yɛ mli lɛ baafee enɛ. Amɛnaŋ hiɛgbele mli amanehulu ko akɛ akpa amɛhe mama ni akpata amɛhiɛ akɛ anɔkwa teokrase lɛ henyɛlɔi, shi moŋ miishɛɛ ni nɔ bɛ ji nɔ ni amɛbaana yɛ be mli ni amɛlaa amɛhaa Yehowa akɛ: “Bo ji Mawu kɛjɛ naanɔ kɛyaa naanɔ” lɛ.​—Lala 90:⁠2.

23. Mɛni hewɔ Yehowa Odasefoi bɛ nɔ ko ni amɛhiɛ baagbo yɛ he lɛ, ni mɛni baajɛ mli aba?

²³ Abaawo amɛhiɛ nyam yɛ Nyɔŋmɔ, ni ji Yesu Kristo Tsɛ lɛ mli, mɔ ni atsɔɔ enɔ ahereɔ adesa weku lɛ yiwala koni amɛna naanɔ wala yɛ adesa emuuyeli mli kɛ miishɛɛ yɛ paradeiso shikpɔŋ nɔ lɛ. Kwɛ bɔ ni Yehowa Nyɔŋmɔ ejie lɛ diɛŋtsɛ ehe kpo kɛtsɔ Kristo Yesu nɔ akɛ Nyɔŋmɔ ni yɔɔ hewalɛ! Kwɛ bɔ ni Yehowa ejie ehe kpo fɛfɛo akɛ mɔ ni kɛ ehewalɛ kpeteŋkpele lɛ tsuɔ nii yɛ nilee kɛ suɔmɔ mli, jeee akɛ mɔ ni kɛfiteɔ nii yɛ gbɛ ni ejaaa nɔ! No hewɔ lɛ, wɔbɛ nɔ ko ni wɔhiɛ baagbo yɛ he yɛ lɛ loo e-Bi koome Yesu Kristo he. Wɔhiɛ gbooo akɛ wɔɔfee anunyam sanekpakpa lɛ ni tsɔɔ Yehowa Nyɔŋmɔ hewalɛ ni yeɔ nɔ fɛɛ nɔ nɔ kɛtsɔ Kristo Yesu, ni jaje nɛkɛ sane nɛɛ yɛ eshikpɔŋ nɔ shihilɛ lɛ naagbee ŋmɛlɛtswaa mli lɛ akɛ: “Nyɛtsui anyɔa nyɛmli: miye je lɛ kunim” lɛ shiɛlɔi. (Yohane 16:33) Yɛ be mli ni wɔtsɔɔ gbɛ ni tamɔ nɛkɛ nɔ lɛ, nyɛhaa wɔnyiɛa bɔfo Paulo, ni hiɛ gbooo sanekpakpa lɛ he lɛ nɔkwɛmɔ nɔ lɛ sɛɛ yɛ be fɛɛ mli. Kɛ wɔfee nakai lɛ, Nyɔŋmɔ Ofe lɛ hiɛ gboŋ yɛ wɔhe.

[Shishigbɛ niŋmai]

Sanebimɔi Ni Akɛtiɔ Mli

◻ Taakɛ bɔfo Paulo ji lɛ, mɛɛ su esa akɛ wɔna yɛ sanekpakpa lɛ jajemɔ he, ni mɛni hewɔ?

◻ Mɛni hewɔ sane ni Yehowa Odasefoi jajeɔ Iɛ ji nɔ ni hi fe fɛɛ Iɛ?

◻ Mɛɛ kɔkɔ Yesu bɔ yɛ mɔ fɛɛ mɔ ni hiɛ baagbo yɛ ehe yɛ be mli ni eba Maŋtsɛyeli anunyam mli lɛ he?

◻ Mɛni baa mɛi ni kwaa Yesu kɛ Yehowa lɛ anɔ?

◻ Mɛni sanekpakpa Iɛ jajelɔi enyɛ etsu ni hiɛgbele bɛ mli, ni mɛni hewɔ?