Yitso 77

Gboshiniyeli He Sane Lɛ

EKA shi faŋŋ akɛ gbɔmɛi lɛ le akɛ Yesu miiye nii yɛ Farisifonyo lɛ shia lɛ. No hewɔ lɛ amɛbua amɛhe naa, akpei abɔ yɛ shia lɛ masɛi ni amɛmiimɛ ni Yesu aje kpo. Amɛfeee tamɔ Farisifoi ni te shi wo Yesu ni amɛbɔ mɔdɛŋ ni amɛmɔ lɛ yɛ nɔ ko ni eeewie ni ejaaa hewɔ lɛ, shi moŋ gbɔmɛi lɛ kɛ hiɛsɔɔ bo lɛ toi jogbaŋŋ.

Ni Yesu kɛ ekaselɔi lɛ tsutsu wie, ni ekɛɛ amɛ akɛ: “Klɛŋklɛŋ lɛ nyɛhiɛ ahia nyɛhe nɔ yɛ Farisifoi lɛ amãsha ni ji osatofeemɔ lɛ hewɔ.” Taakɛ afee he mfoniri yɛ niyeli lɛ shishi lɛ, Farisifoi ajamɔ lɛ fɛɛ eyi obɔ kɛ osatofeemɔ. Shi eyɛ mli akɛ ekpakpa ni Farisifoi lɛ kwaa amɛfeɔ lɛ tsimɔɔ amɛ nɔfɔŋ feemɔ lɛ nɔ moŋ, shi yɛ naagbee lɛ ebaaje kpo. Yesu kɛɛ: “Shi nɔ ko bɛ ni atsimɔ nɔ ni ajieŋ lɛ kpo, aloo ni aŋɔtee ni aleŋ.”

Yesu tee nɔ ni eti ekaawoo wiemɔ ni ekɛha mɛi 12 lɛ yɛ be mli ni etsu amɛ kɛha shiɛmɔ nitsumɔ lɛ yɛ Galilea lɛ mli ekoŋŋ. Ekɛɛ: “Nyɛkashea mɛi ni gbeɔ gbɔmɔtso lɛ ni no sɛɛ lɛ amɛbɛ nɔ ko ni amɛaanyɛ amɛfee dɔŋŋ lɛ.” Akɛni Nyɔŋmɔ hiɛ kpaaa aflimata kome po nɔ hewɔ lɛ, Yesu ma nɔ mi eha esɛɛnyiɛlɔi lɛ akɛ Nyɔŋmɔ hiɛ kpaŋ amɛnɔ. Ejaje akɛ: “Shi kɛ amɛkpala nyɛ kɛtee kpeehei lɛ kɛ lumɛi kɛ ogai ahiɛ lɛ, . . . nɔ ni sa akɛ nyɛkɛɛ lɛ, mumɔ krɔŋkrɔŋ lɛ aaatsɔɔ nyɛ yɛ nakai ŋmɛlɛtswaa lɛ nɔ nɔŋŋ.”

Nuu ko wie kɛjɛ mɛi lɛ ateŋ. Ekpa lɛ fai akɛ: “Tsɔɔlɔ, kɛɛmɔ minyɛmi lɛ ni ekɛ mi aja gboshinii lɛ.” Mose Mla lɛ tsɔɔ faŋŋ akɛ esa akɛ kromɔ bi lɛ ana gboshinii lɛ mlijaa enyɔ, no hewɔ lɛ yiŋtoo ko bɛ ni eeedamɔ nɔ ewo bei. Shi eka shi faŋŋ akɛ nuu lɛ miitao ni ena gboshinii lɛ babaoo fe bɔ ni ji egbɛfaŋnɔ yɛ mla naa.

Yesu kpoo yɛ gbɛ ni ja nɔ akɛ ekɛ ehe woŋ mli. Ebi lɛ akɛ: “Nuu, namɔ wo mi kojolɔ loo nijalɔ yɛ nyɛnɔ?” Kɛkɛ ni ekɛ nɛkɛ ŋaawoo ni he hiaa nɛɛ ha asafo babaoo ni bua shi lɛ: “Nyɛhiɛ ahia nyɛhe nɔ jogbaŋŋ yɛ hiɛjoomɔ hewɔ; ejaakɛ jeee gbɔmɔ nii ni ena kɛteke nɔ lɛ mli ewala yɔɔ.” Hɛɛ, bɔ fɛɛ bɔ ni mɔ ko yɔɔ nii babaoo ha lɛ, efɔɔ kaa akɛ ebaagbo ni ebaashi enɛɛmɛi fɛɛ yɛ esɛɛ. Yesu bu amɛ abɛ ko, bɔni afee ni ekɛma oti nɛɛ nɔ mi, koni ekɛtsɔɔ hu akɛ gbɛi kpakpa ni mɔ ko naŋ yɛ Nyɔŋmɔ hiɛ lɛ jeee nilee gbɛ. Etsɔɔ mli akɛ:

“Nuu niiatsɛ ko shikpɔŋ baa nii babaoo; ni esusu eyiŋ akɛ: ‘Te mafee tɛŋŋ, akɛni mibɛ he ni mikɛ minibaanii baato nɛɛ?’ Ni ekɛɛ: ‘Nɔ ni mafee nɛ: mibakumɔ miboŋoi lɛ mashwie shi, ni mamamɔ ewuji, ni mato minibaanii kɛ minii lɛ fɛɛ yɛ jɛi; ni makɛɛ misusuma akɛ: “Susuma, oyɛ nii babaoo ni aŋɔto afii pii; jɔɔmɔ ohe, ye ni onu, ni otsui anyɔ omli!” Shi Nyɔŋmɔ kɛɛ lɛ akɛ: ‘Kwashia, nyɔɔŋ nɛɛŋ nɔŋŋ lɛ abaabi osusuma shi yɛ odɛŋ; ni nibii ni osaa oto lɛ, namɔ nɔ aaatsɔ?’ ”

Yɛ naagbee lɛ, Yesu wie akɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.” Eyɛ mli akɛ ninamɔ ni abuaa naa pii ni nilee bɛ mli lɛ lakaŋ kaselɔi lɛ moŋ, shi ekolɛ daa gbi shihilɛ mli hiamɔ nibii ahewɔ lɛ, ebaanyɛ egbala amɛ kɛjɛ susuma muu fɛɛ sɔɔmɔ ni amɛkɛaaha Yehowa lɛ he. No hewɔ lɛ Yesu kɛ nakai be lɛ tsu nii ni ekɛti ŋaawoo fɛfɛo ni etsɔ hiɛ ekɛha aaafee afi kɛ fa ni etsɔ hiɛ yɛ Gɔŋ nɔ Shiɛmɔ lɛ mli lɛ mli ekoŋŋ. Kɛkɛ ni ekɛ ekaselɔi lɛ wie ni ekɛɛ:

“No hewɔ lɛ, nyɛ lɛ, miikɛɛ nyɛ akɛ: Nyɛkahaoa nyɛhe yɛ nyɛsusuma lɛ he, nɔ ni nyɛaaye, aloo nyɛgbɔmɔtso lɛ he, nɔ ni nyɛaawo. . . . Nyɛjwɛŋa kwaakwaalabitei lɛ ahe; ejaakɛ amɛdũuu nii, asaŋ amɛkpaaa, ni amɛbɛ nitoo hei loo aboŋo po, shi Nyɔŋmɔ lɛɔ amɛ; . . . Nyɛjwɛŋa fɔfɔii lɛ ahe, bɔ ni amɛkwɛ̃ɔ! Amɛtsuuu nii, asaŋ amɛtsɛ̃ɛɛ kpaa; shi miikɛɛ nyɛ akɛ, Salomo kɛ enunyam lɛ fɛɛ tete ewulaaa tamɔ enɛɛmɛi ateŋ ekome. . . .

“Shi nyɛ lɛ nyɛkabia nɔ ni nyɛaaye aloo nɔ ni nyɛaanu, ni asaŋ nyɛyiŋ akafea nyɛ kɔshikɔshi. Ejaakɛ nɛkɛ nibii nɛɛ fɛɛ sɛɛ je nɛŋ maji anɔ bii diɔ; shi nyɛ-Tsɛ lɛ le akɛ nii nɛɛ ahe miihia nyɛ. Moŋ, nyɛtaoa Nyɔŋmɔ maŋtsɛyeli lɛ sɛɛ gbɛ, ni aaaŋɔ nii nɛɛ fɛɛ afata he aha nyɛ.”

Shika gbɛfaŋ jaramɔ bei amli titri ni ebaa akɛ esa akɛ asusu Yesu wiemɔi nɛɛ ahe jogbaŋŋ. Gbɔmɔ ni feɔ yeyeeye babaoo yɛ eheloonaa hiamɔ nii ahe, ni no hewɔ lɛ eyaa sɛɛsɛɛ yɛ mumɔŋ nibii asɛɛdii mli lɛ, miitsɔɔ akɛ ebɛ hemɔkɛyeli akɛ Nyɔŋmɔ yɛ hewalɛ ni ekɛaaha E-tsuji amɛ hiamɔ nii. Luka 12:1-31; 5 Mose 21:17.

▪ Ekolɛ, mɛni hewɔ ni nuu ko babi lɛ gboshiniyeli he sane lɛ, ni mɛɛ ŋaawoo Yesu kɛha?

▪ Mɛɛ abɛbua ko Yesu kɛtsu nii, ni mɛni ji oti ni yɔɔ mli?

▪ Mɛɛ ŋaawoo Yesu ti mli ekoŋŋ, ni mɛni hewɔ ni esa nakai lɛ?