Nyɔŋmɔ kɛ Nyiɛmɔ—Yɛ Naanɔ Wala Hewɔ
“Wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!”—MIKA 4:5.
1. Mɛni hewɔ abaanyɛ atsɛ Yehowa akɛ “naanɔ Maŋtsɛ” lɛ?
YEHOWA NYƆŊMƆ bɛ shishijee. Atsɛɔ lɛ yɛ gbɛ ni ja nɔ akɛ “Mɔ ni Eye Gbii Pii,” ejaakɛ eshihilɛ yaa sɛɛ shɔŋŋ ni bɛ naagbee. (Daniel 7:9, 13, NW) Yehowa baaná naanɔ wɔsɛɛ be hu mli ŋɔɔmɔ. Lɛ pɛ ji “naanɔ Maŋtsɛ” lɛ. (Kpojiemɔ 10:6; 15:3, NW) Ni yɛ ehiɛ lɛ, afii akpe tamɔ “nyɛ, kpaakpa nyɛ, kɛ nyɔɔŋ buu be pɛ.”—Lala 90:4.
2. (a) Mɛni ji Nyɔŋmɔ yiŋtoo kɛha adesai ni feɔ toiboo? (b) Esa akɛ wɔkɛ wɔhiɛnɔkamɔi kɛ gbɛjianɔtoo ama mɛni nɔ?
2 Akɛni wala Halɔ lɛ hiɔ shi kɛyaa naanɔ hewɔ lɛ, ebaanyɛ ni ekɛ naanɔ wala yɛ Paradeiso he gbɛkpamɔ ama klɛŋklɛŋ adesai enyɔ, Adam kɛ Hawa hiɛ. Shi, yɛ toigbele hewɔ lɛ, Adam laaje naanɔ wala hegbɛ lɛ, ni ekɛ esha kɛ gbele ha eseshibii. (Romabii 5:12) Ni kɛlɛ, Adam atuatsemɔ lɛ fiteee Nyɔŋmɔ shishijee yiŋtoo lɛ. Eji Yehowa suɔmɔnaa nii akɛ adesai toibolɔi ahi shi kɛya naanɔ, ni ebaatsu eyiŋtoo lɛ he nii ni efeŋ efolo. (Yesaia 55:11) Belɛ kwɛ bɔ ni esa jogbaŋŋ ha akɛ, wɔɔgbala wɔhiɛnɔkamɔi kɛ gbɛjianɔtoi kɛaama Yehowa ni wɔɔsɔmɔ lɛ lɛ nɔ yɛ naanɔ wala hewɔ. Yɛ be mli ni wɔsumɔɔ ni wɔha “Yehowa gbi” lɛ ahi wɔjwɛŋmɔ mli lɛ, ehe miihia ni wɔkai akɛ oti ni ma wɔhiɛ ji ni wɔkɛ Nyɔŋmɔ anyiɛ kɛya naanɔ.—2 Petro 3:12.
Yehowa Feɔ Nii yɛ Ebe ni Eto lɛ Mli
3. Te wɔfeɔ tɛŋŋ wɔleɔ akɛ Yehowa yɛ ‘be ni eto’ ni ekɛaaha eyiŋtoi aba mli?
3 Ákɛ mɛi ni kɛ Nyɔŋmɔ nyiɛɔ lɛ, wɔyɛ esuɔmɔnaa nii ni eeeha eba mli lɛ he miishɛɛ waa. Wɔle akɛ Yehowa ji Be Bulɔ Kpeteŋkpele lɛ, ni wɔyɛ hekɛnɔfɔɔ akɛ etsuɔ eyiŋtoi ahe nii yɛ be ni eto lɛ mli pɛpɛɛpɛ. Ákɛ nɔkwɛmɔnɔ lɛ, “beni be falɛ lɛ shɛ lɛ, Nyɔŋmɔ tsu lɛ diɛŋtsɛ ebi lɛ kɛba.” (Galatabii 4:4) Akɛɛ bɔfo Yohane akɛ ayɛ “be ni ato” kɛha gbalɛ mli nibii ni ena yɛ okadii amli lɛ amlibaa. (Kpojiemɔ 1:1-3, NW) “Be ni akɛbaakojo gbohii lɛ” yɛ. (Kpojiemɔ 11:18) Nɔ ni fe afii 1,900 ni eho nɛ, ni akɛ mumɔ tsirɛ bɔfo Paulo koni ekɛɛ akɛ Nyɔŋmɔ ‘eto gbi ko, nɔ̃ nɔ ni ebaakojo jeŋ muu lɛ fɛɛ yɛ jalɛ naa.’—Bɔfoi lɛ Asaji 17:31.
4. Te wɔfeɔ tɛŋŋ wɔleɔ akɛ Yehowa miisumɔ ni ekɛ yiwalɛ nibii agbɛjianɔtoo nɛɛ aba naagbee?
4 Yehowa kɛ yiwalɛ nibii agbɛjianɔtoo nɛɛ baaba naagbee, ejaakɛ aagbe egbɛi lɛ he guɔ yɛ ŋmɛnɛŋmɛnɛ je nɛɛ mli. Mɛi fɔji lɛ miifrɔke. (Lala 92:8) Amɛtsɔɔ amɛwiemɔi kɛ nifeemɔi anɔ amɛjɛ́ɔ Nyɔŋmɔ, ni edɔɔ lɛ akɛ eeena ni aajɛ́ etsuji ni aawa amɛyi. (Zakaria 2:12) Ebɛ naakpɛɛ akɛ no hewɔ ni Yehowa efã akɛ, etsɛŋ ni akɛ Satan gbɛjianɔtoo muu lɛ fɛɛ baaba naagbee lɛ! Nyɔŋmɔ ekpɛ mli pɛpɛɛpɛ yɛ be ni enɛ baaba lɛ mli, ni Biblia gbalɛi ni baa mli anɔkwale lɛ feɔ lɛ faŋŋ akɛ “naagbee be” lɛ mli wɔyɔɔ bianɛ lɛ. (Daniel 12:4) Etsɛŋ ni ebaafee nii ni ekɛjɔɔ mɛi ni sumɔɔ lɛ lɛ fɛɛ.
5. Te Lot kɛ Habakuk susu shihilɛi ni ebɔle amɛhe lɛ ahe amɛha tɛŋŋ?
5 Yehowa tsuji ni hi shi yɛ blema lɛ shwe ni amɛna efɔŋfeemɔ naagbee. Lot jalɔ lɛ “hao yɛ nɔtɔ̃lɔi lɛ anyenyeŋtswibɔɔ jeŋba lɛ he.” (2 Petro 2:7) Akɛni shihilɛi ni ebɔle ehe lɛ ha eye awerɛho hewɔ lɛ, Habakuk kpa fai akɛ: “Yehowa, mɛɛ beyinɔ nɔŋŋ mabolɔ kɛyashi, ni oboŋ toi? ni mabo matsɛo yɛ yiwalɛ hewɔ, ni ohereŋ miyiwala? Mɛɛ hewɔ ni ohaa minaa nishaianii, ni okwɛɔ haomɔ nɛɛ? Ejaakɛ hiɛkpatamɔ kɛ yiwalɛ yɛ mihiɛ; béi baa ni naataamɔ teɔ shi.”—Habakuk 1:2, 3.
6. Mɛni Yehowa wie akɛ ehetoo kɛha Habakuk sɔlemɔ lɛ, ni mɛni wɔbaanyɛ wɔkase kɛjɛ enɛ mli?
6 Yehowa ha Habakuk hetoo yɛ gbɛ ko nɔ yɛ nɛkɛ wiemɔi nɛɛ amli: “Ninaa lɛ yɛ ha be ni ato lɛ kɛ̃, ni eeye oyai ni eshɛ naagbee, ni emaleŋ; kɛ eshashao shi hu jiŋŋ, mɛɛ lɛ kɛ̃; ejaakɛ ebaaba lɛɛlɛŋ, ekpeŋ sɛɛ!” (Habakuk 2:3) No hewɔ lɛ, Nyɔŋmɔ ha ale akɛ ebaafee he nɔ̃ ko yɛ “be ni ato lɛ” mli. Eyɛ mli akɛ ekolɛ eeefee tamɔ nɔ ni shishashaomɔ yɛ mli moŋ, shi Yehowa baaha eyiŋtoo aba mli—efeŋ efolo!—2 Petro 3:9.
Ekãa ni Naa Baaa Shi ni Akɛaasɔmɔ
7. Eyɛ mli akɛ Yesu leee be pɔtɛɛ mli ni Yehowa gbi lɛ baaba moŋ, shi te etsu enitsumɔi lɛ ahe nii eha tɛŋŋ?
7 Ani be ni Yehowa eto kɛha saji ahe nitsumɔ ni wɔɔle pɛpɛɛpɛ lɛ ji taomɔ nii kɛha Nyɔŋmɔ kɛ nyiɛmɔ yɛ ekãa naa? Dabi, jeee nakai eji. Susumɔ nɔkwɛmɔnii komɛi ahe okwɛ. Yesu yɛ be ni aaafee Nyɔŋmɔ suɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ he miishɛɛ waa. Yɛ anɔkwale mli lɛ, Kristo tsɔɔ esɛɛnyiɛlɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” (Mateo 6:9, 10, NW) Eyɛ mli akɛ Yesu le akɛ abaaha nibimɔ nɛɛ hetoo moŋ, shi eleee be pɔtɛɛ ni ato aha enɛ feemɔ. Yɛ egbalɛ kpeteŋkpele ni kɔɔ nibii agbɛjianɔtoo nɛɛ naagbee lɛ he lɛ, ekɛɛ akɛ: “Shi no gbi lɛ kɛ no ŋmlɛtswaa lɛ mɔ ko mɔ ko leee he eko, bɔfoi ni yɔɔ ŋwɛi lɛ tete leee, [ni bi lɛ tete leee,] ja mitsɛ kome kɛkɛ.” (Mateo 24:36) Akɛni Yesu Kristo he hiaa titri yɛ Nyɔŋmɔ yiŋtoi ahe nitsumɔ mli hewɔ lɛ, ekɛ ehe baawo eŋwɛi Tsɛ lɛ henyɛlɔi lɛ ahiɛkpatamɔ lɛ mli. Beni Yesu yɔɔ shikpɔŋ nɔ lɛ, no mli lɛ eleee be po ni Nyɔŋmɔ baatsu enɛ he nii. Ani enɛ fee lɛ mɔ ni naaa ekãa yɛ Yehowa sɔɔmɔ mli? Dabi kwraa! Beni amɛna ekãa ni Yesu kɛbɛɛ nibii gbohii lɛ kɛjɛ sɔlemɔwe lɛ, “ekaselɔi lɛ kai akɛ aŋma akɛ: ‘Owe lɛ he hiɛdɔɔ lɛ eye mi.’ ” (Yohane 2:17; Lala 69:10) Yesu kɛ ehe wo nitsumɔ ni atsu lɛ akɛ ebatsu lɛ mli vii, ni etsu enɛ kɛ ekãa ni naa baaa shi. Esɔmɔ Nyɔŋmɔ hu yɛ naanɔ wala hewɔ.
8, 9. Beni kaselɔi lɛ bi be mli ni aaato Maŋtsɛyeli lɛ ama shi lɛ he sane lɛ, mɛni akɛɛ amɛ, ni te amɛfee amɛnii yɛ he amɛha tɛŋŋ?
8 Enɛ ji anɔkwale yɛ Kristo kaselɔi lɛ hu agbɛfaŋ. Yesu kɛ amɛ kpe dani ekwɔ kɛtee ŋwɛi. Sane lɛ kɛɔ akɛ: “Agbɛnɛ mɛi ni naa ebakpe shi lɛ bi lɛ akɛ: Nuntsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” Taakɛ amɛ-Nuntsɔ lɛ ji lɛ, amɛmiishwe ni Maŋtsɛyeli lɛ aba. Ni kɛlɛ, Yesu ha hetoo akɛ: “Jeee nyɛhe sane ko ji akɛ nyɛaale bei loo yinɔi lɛ ni tsɛ lɛ eto yɛ lɛ diɛŋtsɛ ehewalɛ mli lɛ; shi moŋ kɛ Mumɔ krɔŋkrɔŋ lɛ na ba nyɛnɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.”—Bɔfoi lɛ Asaji 1:6-8.
9 Nɔ ko bɛ ni tsɔɔ akɛ kaselɔi lɛ anijiaŋ je wui yɛ hetoo nɛɛ hewɔ. Yɛ no najiaŋ lɛ, amɛkɛ amɛhe wo shiɛmɔ nitsumɔ lɛ mli yɛ ekãa naa. Amɛha amɛtsɔɔmɔ lɛ yi Yerusalem fɛɛ yɛ otsii fioo pɛ mli. (Bɔfoi lɛ Asaji 5:28) Ni amɛlɛɛ amɛshiɛmɔ nitsumɔ lɛ mli yɛ afii 30 pɛ mli kɛyashɛ he ni Paulo baanyɛ akɛɛ akɛ ashiɛ sanekpakpa lɛ atsɔɔ “bɔɔ nii fɛɛ ni yɔɔ ŋwɛi shishi lɛ.” (Kolosebii 1:23) Eyɛ mli akɛ ‘ateee Maŋtsɛyeli lɛ shi amaaa shi ahaaa Israel’ taakɛ kaselɔi lɛ kpa gbɛ yɛ gbɛ ni ejaaa nɔ lɛ, ni atooo amaaa shi yɛ ŋwɛi yɛ amɛshihilɛ be mli moŋ, shi amɛtee nɔ amɛsɔmɔ Yehowa yɛ ekãa naa yɛ naanɔ wala hewɔ.
Wɔyiŋtoi Amlipɛimɔ
10. Le ni wɔleee be mli ni Nyɔŋmɔ baakpata Satan gbɛjianɔtoo lɛ hiɛ lɛ ŋmɛɔ wɔ gbɛ koni wɔfee mɛni?
10 Ŋmɛnɛŋmɛnɛ beaŋ Yehowa tsuji hu miishwe ni amɛna nibii agbɛjianɔtoo fɔŋ nɛɛ naagbee. Shi, nɔ ni wɔsusuɔ he titri lɛ jeee wɔyiwalaheremɔ kɛmiiya jeŋ hee ni Nyɔŋmɔ ewo shi yɛ he lɛ mli. Wɔmiisumɔ ni wɔna ni átse Yehowa gbɛi lɛ he ni ábu maŋtsɛ ni eji lɛ bem. Yɛ enɛ hewɔ lɛ, wɔbaanyɛ wɔná miishɛɛ akɛ Nyɔŋmɔ ekɛko wɔ ‘gbi loo ŋmlɛtswaa’ ni eto kɛha Satan gbɛjianɔtoo lɛ hiɛkpatamɔ. Enɛ ŋmɛɔ wɔ gbɛ koni wɔkɛ odaseyeli ko atsɔɔ akɛ wɔtswa wɔfai shi akɛ wɔkɛ Nyɔŋmɔ baanyiɛ kɛya naanɔ, ejaakɛ wɔsumɔɔ lɛ, shi jeee akɛ wɔyɛ be kukuoo mli pɛsɛmkunya otii komɛi.
11, 12. Atswa Hiob emuuyeli mlihiɛmɔ lɛ mpoa yɛ mɛɛ gbɛ nɔ, ni nakai mpoatswaa lɛ kɔɔ wɔhe yɛ mɛɛ gbɛ nɔ?
11 Emuuyeli mli ni wɔɔhiɛ wɔha Nyɔŋmɔ lɛ hu yeɔ ebuaa kɛyeɔ odase akɛ Abonsam tɔ̃ yɛ be mli ni ekɛ naafolɔmɔ lɛ ba akɛ Hiob ni ja lɛ—kɛ adesai ni tamɔ lɛ—sɔmɔɔ Nyɔŋmɔ yɛ nibii ni amɛbaaná hewɔ. Yɛ be mli ni Yehowa etsɔɔ akɛ kpa ko bɛ etsulɔ Hiob he, eja, ni esheɔ Nyɔŋmɔ gbeyei lɛ, Satan kɛ yiwalɛ kɛɛ akɛ: “Ani yaka Hiob sheɔ Nyɔŋmɔ gbeyei lɛ? Ani jeee afabaŋ ofo owo ekɛ ewe kɛ nɔ fɛɛ nɔ ni eyɔɔ lɛ he kɛkpe? Ojɔɔ eninenaa nitsumɔ nɔ, ni ekooloi eshwere yɛ shikpɔŋ lɛ nɔ. Shi agbɛnɛ kpã onine mli ni ota enii ni eyɔɔ lɛ fɛɛ he; akɛ ekwaŋo yɛ ohiɛ lo!” (Hiob 1:8-11) Emuuyeli mli ni ehiɛ yɛ kaa shishi hewɔ lɛ, Hiob ha ana akɛ nɛkɛ hetsɛ̃ wiemɔ nɛɛ ji amale.
12 Kɛ wɔ hu wɔnyiɛ emuuyeli gbɛ lɛ nɔ nakai nɔŋŋ lɛ, wɔbaaha ana Satan naafolɔmɔ fɛɛ naafolɔmɔ akɛ wɔsɔmɔɔ Nyɔŋmɔ akɛni wɔle akɛ nyɔmɔwoo ko ebɛŋkɛ hewɔ lɛ, akɛ eji amale. Akɛni wɔleee be pɔtɛɛ ni Nyɔŋmɔ kɛbaatsu eweletɔɔ lɛ he nii yɛ efɔŋfeelɔi lɛ anɔ lɛ haa wɔnaa hegbɛ ni wɔkɛaatsɔɔ akɛ wɔsumɔɔ Yehowa lɛɛlɛŋ, ni wɔmiisumɔ ni wɔnyiɛ yɛ egbɛ̀i anɔ kɛya naanɔ. Etsɔɔ akɛ wɔyeɔ Nyɔŋmɔ anɔkwa ni wɔkɛ wɔhe fɔ̃ɔ gbɛ ni etsɔɔ nɔ etsuɔ saji ahe nii lɛ nɔ. Agbɛnɛ hu, gbi lɛ kɛ ŋmlɛtswaa lɛ ni wɔleee lɛ yeɔ ebuaa wɔ ni ehaa wɔhiɛ hiɔ wɔhe nɔ, ni wɔhiɛ kãa yɛ mumɔŋ, ejaakɛ wɔyɔseɔ akɛ naagbee lɛ baanyɛ aba be fɛɛ be, tamɔ julɔ baa nyɔɔŋ lɛ. (Mateo 24:42-44) Kɛ wɔkɛ Yehowa nyiɛ daa gbi lɛ, wɔhaa etsui nyãa ni enáa hetoo kɛhaa Abonsam ni bɔɔ lɛ ahora lɛ.—Abɛi 27:11.
Too Gbɛjianɔ Kɛha Naanɔ Wala Namɔ!
13. Mɛni Biblia lɛ tsɔɔ yɛ gbɛjianɔ ni atoɔ kɛhaa wɔsɛɛ be lɛ he?
13 Mɛi ni kɛ Nyɔŋmɔ nyiɛɔ lɛ le akɛ nilee yɛ mli akɛ aaato gbɛjianɔi ni jwɛŋmɔ yɔɔ mli kɛha wɔsɛɛ be. Akɛni gbɔmɛi pii le haomɔi kɛ fatɔɔi ni yɔɔ gbɔlɛ be mli hewɔ lɛ, amɛbɔɔ mɔdɛŋ ni amɛkɛ amɛblahiiaŋ hewalɛ lɛ atsu nii bɔni afee ni amɛ sɛɛ mli afii lɛ afee nɔ ni yɔɔ shweshweeshwe yɛ shika gbɛfaŋ. Shi, wɔmumɔŋ wɔsɛɛ be ni he hiaa babaoo lɛ hu? Abɛi 21:5 kɛɔ akɛ: “Mɔdɛŋbɔlɔ jwɛŋmɔi lɛ, nifalɛ sɔŋŋ ekɛbaa; shi mɔ fɛɛ mɔ ni feɔ shɛii lɛ, enɔ̃ lɛ ohia kɛkɛ ni.” Gbɛjianɔ ni atsɔɔ hiɛ atoɔ yɛ naanɔ wala hewɔ lɛ he yɛ sɛɛnamɔ diɛŋtsɛ. Akɛni wɔleee be pɔtɛɛ ni gbɛjianɔtoo nɛɛ naagbee baaba hewɔ lɛ, ehe miihia ni wɔsusu wɔ wɔsɛɛ be hiamɔ nii ahe. Shi nyɛhaa wɔŋmɛa pɛpɛɛpɛ ni wɔkɛ ŋwɛi nibii aye klɛŋklɛŋ gbɛhe yɛ shihilɛ mli. Ekolɛ gbɔmɛi ni bɛ hemɔkɛyeli lɛ baanyɛ amu sane naa akɛ nibii ni mɔ ko nyaa he lɛ fɛɛ ni ekɛaawo Nyɔŋmɔ suɔmɔnaa nifeemɔ mli lɛ tsɔɔ nii ni akwɛɛɛ kɛyaaa shɔŋŋ. Shi ani nakai eji?
14, 15. (a) Mɛɛ nɔkwɛmɔnɔ ko Yesu wie he ni kɔɔ gbɛjianɔ ni atoɔ kɛhaa wɔsɛɛ be he lɛ he? (b) Mɛni hewɔ niiatsɛ lɛ ni yɔɔ Yesu nɔkwɛmɔnɔ lɛ mli lɛ kwɛɛɛ nii kɛyaaa shɔŋŋ lɛ?
14 Yesu fee nɔkwɛmɔnɔ ko ni haa anuɔ enɛ shishi. Ekɛɛ: “Nuu niiatsɛ ko shikpɔŋ ba nii babaoo; ni esusu eyiŋ akɛ: Te mafee tɛŋŋ, akɛni mibɛ he ni mikɛ minibaanii baato nɛɛ? Ni ekɛɛ: Nɔ ni mafee nɛ: mibakumɔ miboŋoi lɛ mashwie shi, ni mamamɔ ewuji, ni mato minibaanii kɛ minii lɛ fɛɛ yɛ jɛi; ni makɛɛ misusuma akɛ: Susuma, oyɛ nii babaoo ni aŋɔtoo afii pii; jɔɔmɔ ohe, ye ni onu, ni otsui anyɔ omli! Shi Nyɔŋmɔ kɛɛ lɛ akɛ: Kwashia, nyɔɔŋ nɛŋ nɔŋŋ lɛ abaabi osusuma shi yɛ odɛŋ; ni nibii ni osaa oto lɛ, namɔ nɔ̃ aaatsɔ? Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.”—Luka 12:16-21.
15 Ani Yesu miitsɔɔ akɛ esaaa akɛ niiatsɛ lɛ tsuɔ nii koni ebɔ mɔdɛŋ ni efee shweshweeshwe yɛ shika gbɛfaŋ yɛ wɔsɛɛ be mli? Dabi, ejaakɛ Ŋmalɛi lɛ woɔ hewalɛ ni atsu nitsumɔ ni wa. (2 Tesalonikabii 3:10) Niiatsɛ lɛ tɔ̃mɔ ji akɛ efeee nɔ ni he hiaa ni baaha etsɔ “niiatsɛ yɛ Nyɔŋmɔ gbɛfaŋ.” Eji enyɛ ená eheloo gbɛfaŋ nibii lɛ amli ŋɔɔmɔ yɛ afii babaoo mli po kulɛ, yɛ naagbee lɛ ebaagbo kɛ̃. Ekwɛɛɛ nii kɛyaaa shɔŋŋ, esusuuu naanɔ wala he.
16. Mɛni hewɔ wɔbaanyɛ ni wɔkɛ wɔhe afɔ̃ Yehowa nɔ kɛha wɔsɛɛ be ni yɔɔ shweshweeshwe lɛ?
16 Yehowa ni akɛ lɛ nyiɛɔ yɛ naanɔ wala hewɔ lɛ hiɔ feemɔ ni etsɔɔ nii ni akwɛɔ kɛyaa shɔŋŋ. No ji gbɛ ni hi fe fɛɛ ni akɛaato gbɛjianɔ aha wɔsɛɛ be. Yɛ be mli ni nilee yɔɔ mli akɛ aaato gbɛjianɔ aha skulyaa, nitsumɔ, kɛ weku mli gbɛnaa nii lɛ, esa akɛ wɔkai yɛ bei fɛɛ mli akɛ Yehowa kwaaa etsuji anɔkwafoi lɛ. Maŋtsɛ David fo lala akɛ: “Sa lɛ gbekɛ ji mi, ni agbɛnɛ mitsɔ̃ nuumo, shi minako jalɔ ko ni akwa lɛ, loo ni eseshibii miisisɛ̃ aboloo pɛŋ.” (Lala 37:25) Yesu hu kɛ nɔmimaa ha akɛ Nyɔŋmɔ baato gbɛjianɔ aha mɛi fɛɛ ni taoɔ Maŋtsɛyeli lɛ tsutsu ni amɛnyiɛɔ yɛ Yehowa jalɛ gbɛ̀i anɔ lɛ.—Mateo 6:33.
17. Te wɔfeɔ tɛŋŋ wɔleɔ akɛ naagbee lɛ ebɛŋkɛ?
17 Eyɛ mli akɛ wɔsɔmɔɔ Nyɔŋmɔ yɛ naanɔ wala hewɔ moŋ, shi wɔyaa nɔ wɔhaa Yehowa gbi lɛ hiɔ wɔjwɛŋmɔ mli. Biblia gbalɛ mlibaa yeɔ bɔ ni nakai gbi lɛ ebɛŋkɛ eha lɛ he odase yɛ faŋŋ mli. Nɔ ni ekadi wɔ afii oha nɛɛ ji tai, tsɛŋemɔ helai, shikpɔŋhosomɔi, kɛ hɔmɔ, kɛ anɔkwa Kristofoi ayiwaa kɛ Nyɔŋmɔ Maŋtsɛyeli lɛ he sanekpakpa lɛ ni ashiɛɔ yɛ jeŋ muu fɛɛ. Enɛɛmɛi fɛɛ ji yiwalɛ nibii agbɛjianɔtoo nɛɛ naagbee lɛ he okadii. (Mateo 24:7-14; Luka 21:11) Je lɛ eyi obɔ kɛ “hesuɔlɔi, shikasuɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” (2 Timoteo 3:1-5) Shihilɛ wa kɛha wɔ ákɛ Yehowa tsuji yɛ naagbee gbii ni ji jaramɔ bei nɛɛ amli. Kwɛ bɔ ni wɔshweɔ gbi ni Yehowa Maŋtsɛyeli lɛ baajie efɔŋfeemɔ fɛɛ kɛya lɛ! Dani enɛ aaaba lɛ, nyɛhaa wɔtswaa wɔfai shi akɛ wɔkɛ Nyɔŋmɔ baanyiɛ yɛ naanɔ wala hewɔ.
Ní Aaasɔmɔ Yɛ Naanɔ Wala Hewɔ
18, 19. Mɛni tsɔɔ akɛ blema anɔkwafoi lɛ sɔmɔ Nyɔŋmɔ yɛ naanɔ wala hewɔ?
18 Yɛ be mli ni wɔkɛ Yehowa nyiɛɔ lɛ, nyɛhaa Habel, Henok, Noa, Abraham, kɛ Sara hemɔkɛyeli lɛ ahia wɔjwɛŋmɔ mli. Beni Paulo tsi amɛ tã lɛ sɛɛ lɛ, eŋma akɛ: “Hemɔkɛyeli mli mɛnɛɛmɛi fɛɛ gboi yɛ, tsɛ amɛnine shɛko nii ni awo shi lɛ anɔ, shi moŋ shɔŋŋ kɛkɛ amɛna yɛ, ni amɛkɛshɛje amɛmii, ni amɛnya he, ni amɛjaje akɛ gbɔi kɛ mɛi kpɔji ji amɛ yɛ shikpɔŋ lɛ nɔ.” (Hebribii 11:13) Nakai anɔkwafoi lɛ “miitao maŋ ni hi fe no, ni ji ŋwɛi nɔ̃ lɛ.” (Hebribii 11:16) Amɛkɛ hemɔkɛyeli kwɛ he ko ni hi yɛ Nyɔŋmɔ Mesia Maŋtsɛyeli lɛ nɔyeli shishi lɛ gbɛ. Wɔbaanyɛ wɔná nɔmimaa akɛ Nyɔŋmɔ kɛ naanɔ wala baawo amɛ nyɔmɔ yɛ nakai he ko ni hi lɛ—shikpɔŋ nɔ Paradeiso yɛ Maŋtsɛyeli nɔyeli shishi.—Hebribii 11:39, 40.
19 Gbalɔ Mika jie Yehowa webii afaishitswaa akɛ amɛaaja Nyɔŋmɔ kɛya naanɔ lɛ kpo. Eŋma akɛ: “Majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛi amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!” (Mika 4:5) Mika sɔmɔ Yehowa yɛ anɔkwayeli mli kɛyashi egbele mli. Kɛ́ atee lɛ shi yɛ jeŋ hee lɛ mli lɛ, ŋwanejee ko bɛ he akɛ nakai gbalɔ lɛ baaya nɔ ekɛ Nyɔŋmɔ anyiɛ kɛya naanɔ. Mɛɛ nɔkwɛmɔnɔ kpakpa po enɛ ji kɛha wɔ mɛi ni wɔyɔɔ wala mli ni wɔshɛ shɔŋŋ yɛ naagbee be lɛ mli lɛ nɛkɛ!
20. Mɛni esa akɛ efee wɔyiŋkpɛɛ?
20 Yehowa hiɛ sɔɔ suɔmɔ ni wɔjieɔ lɛ kpo wɔtsɔɔ egbɛi lɛ. (Hebribii 6:10) Ele akɛ ewa akɛ wɔɔhiɛ wɔ emuuyeli mli wɔha lɛ yɛ jeŋ ni Abonsam yeɔ nɔ nɛɛ mli. Yɛ be mli ni “je lɛ hoɔ eyaa” lɛ, kɛlɛ, “mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17; 5:19) Belɛ nyɛhaa wɔkpɛa wɔyiŋ akɛ wɔɔŋmɛ wɔtsui shi yɛ kaai ni wɔkɛkpeɔ daa gbi lɛ mli yɛ Yehowa yelikɛbuamɔ naa. Eba akɛ wɔkɛ wɔsusumɔ kɛ wɔshihilɛ gbɛ aaama jɔɔmɔi ni yɔɔ naakpɛɛ ni wɔŋwɛi Tsɛ ni yɔɔ suɔmɔ lɛ ewo shi yɛ he lɛ anɔ. Enɛɛmɛi baanyɛ atsɔ wɔ nɔ̃ kɛ wɔtee nɔ wɔkɛ Nyɔŋmɔ nyiɛ daa yɛ naanɔ wala hewɔ.—Yuda 20, 21.
Te Obaaha Hetoo Oha Tɛŋŋ?
◻ Mɛni ji Nyɔŋmɔ yiŋtoo kɛha adesai ni feɔ toiboo lɛ?
◻ Mɛni hewɔ Yehowa efeko nɔ̃ ko lolo koni ekɛ jeŋ ni leee Nyɔŋmɔ lɛ aba naagbee lɛ?
◻ Mɛni hewɔ esaaa akɛ be pɔtɛɛ ni Nyɔŋmɔ baafee nii ni wɔleee lɛ haa ekãa ni wɔyɔɔ lɛ naa baa shi lɛ?
◻ Mɛni ji sɛɛnamɔi ni jɛɔ Nyɔŋmɔ ni wɔkɛ lɛ nyiɛɔ yɛ naanɔ wala hewɔ lɛ mli baa lɛ ekomɛi?
[Mfoniri ni yɔɔ baafa 17]
Nyɔŋmɔ ni wɔkɛ lɛ nyiɛɔ lɛ biɔ ni wɔsɔmɔ lɛ yɛ ekãa naa taakɛ mra be mli Kristo kaselɔi lɛ fee lɛ