Nɔ Hewɔ ni Abaakpãtã Yudafoi ni Heee Yeee lɛ Ahiɛ Lɛ

Yesu ebɔ mɔdɛŋ akɛ ebaaye ebua mɛi lɛ koni amɛsusu wekukpaa ni kã amɛ kɛ Nyɔŋmɔ teŋ lɛ he, ni etsɔ gbɛi srɔtoi anɔ efee nakai. Be ni eje kpo yɛ Farisifonyo lɛ shĩa lɛ mli, ní ekɛ mɛi lɛ bagba sane yɛ agbó lɛ naa egbe naa lɛ, ená hegbɛ kroko hu ni ekɛbaaye ebua amɛ.

Mɛi ni yɔɔ jɛmɛ lɛ ateŋ mɛi komɛi yawo sane ko ni kɔɔ oshara ko ni ba lɛ he lɛ nɔ. Amɛbɔ lɛ “Galileabii ni [Roma Amralo Pontio] Pilato kɛ amɛlá futu amɛfɔlei amli lɛ” he amaniɛ. (Luka 13:1) Mɛni amɛtsɔɔ lɛ?

Ekolɛ Galileabii nɛɛ ji mɛi ni agbe be ni mɛi akpei abɔ te shi wo Pilato akɛni ekɔ shika kɛjɛ sɔlemɔwe lɛ fotro mli kɛfee paipi ko ní nu baatsɔ mli kɛya Yerusalem lɛ hewɔ lɛ. Eeenyɛ efee akɛ, sɔlemɔwe lɛ nɔkwɛlɔi lɛ ye amɛbua Pilato ni ekɔ shika nɛɛ. Ekolɛ mɛi ni bɔɔ Yesu sane nɛɛ susuɔ akɛ Galileabii lɛ efee nibii fɔji komɛi, ni no hewɔ amɛna amanehulu nɛɛ. Shi Yesu kɛ amɛ kpãaa gbee.

Ebi amɛ akɛ: “Ani nyɛsusuɔ akɛ nakai Galileabii lɛ ji eshafeelɔi fe Galileabii krokomɛi fɛɛ akɛni amɛna nɔ nɛɛ hewɔ?” Ehã hetoo akɛ, dabi. Shi ekɛ nɔ ni ba lɛ bɔ Yudafoi lɛ kɔkɔ akɛ: “Kɛ́ nyɛtsakeee nyɛtsui lɛ, nyɛ fɛɛ nyɛhiɛ baakpãtã nakai nɔŋŋ.” (Luka 13:2, 3) No sɛɛ lɛ, Yesu wie oshara kroko ni ekolɛ eba etsɛko lɛ he, ni eeenyɛ efee akɛ no hu kɔɔ nakai paipi lɛ ní afee lɛ he. Ebi amɛ akɛ:

“Nyɛsusuɔ akɛ mɛi nyɔŋma kɛ kpaanyɔ lɛ ni mɔɔ ni yɔɔ Siloam lɛ kumɔ shwie amɛnɔ, ni egbe amɛ lɛ yeɔ fɔ fe mɛi krokomɛi fɛɛ ni yɔɔ Yerusalem?” (Luka 13:4) Ekolɛ, asafoku lɛ baasusu akɛ mɛi nɛɛ gboi yɛ efɔŋ ko ni amɛfee lɛ hewɔ. Shi kome ekoŋŋ lɛ, Yesu kɛ amɛ kpãaa gbee. Ele akɛ “be kɛ nibii ni aleee” baa trukaa, ni ekolɛ no hã oshara nɛɛ hu ba lɛ. (Jajelɔ 9:11, NW) Shi fɛɛ sɛɛ lɛ, esa akɛ mɛi lɛ akase nɔ ko kɛjɛ nɔ ni ba lɛ mli. Yesu kɛɛ akɛ: “Kɛ́ nyɛtsakeee nyɛtsui lɛ, nyɛ fɛɛ nyɛhiɛ baakpãtã tamɔ bɔ ni amɛhiɛ kpãtã lɛ.” (Luka 13:5) Shi mɛni hewɔ amrɔ nɛɛ emaa sane nɛɛ nɔ mi lɛ?

Nɔ hewɔ lɛ ji akɛ, eshwɛ lɛ be fioo ni ekɛbaatsu esɔɔmɔ nitsumɔ lɛ, ni ekɛ nɔkwɛmɔnɔ ko tsɔɔ enɛ mli akɛ: “Nuu ko yɛ agbami tso yɛ ewein ŋmɔ mli, ni eba enɔ yibii taomɔ, shi enáaa eko. Kɛkɛ ni ekɛɛ wein ŋmɔsaalɔ lɛ akɛ, ‘Afii etɛ nɛ ni mibɔi yibii taomɔ yɛ agbami tso nɛɛ nɔ, shi mináaa eko. Toomɔ ofɔ̃ shi! Mɛni hewɔ esa akɛ ehã shikpɔŋ lɛ afee yaka?’ Ehere lɛ nɔ akɛ, ‘Nuŋtsɔ, hã ema shi afi kome hu kɛfata he kɛyashi matsa ehewɔ kɛkpe ni mawo eshishi tumo. Kɛ́ ewo yibii wɔsɛɛ lɛ, no lɛ, ehi jogbaŋŋ; shi kɛjeee nakai lɛ, ní otoo ofɔ̃ shi.’”​—Luka 13:6-9.

Yesu kɛ nɔ ni fe afii etɛ ebɔ mɔdɛŋ akɛ ebaaye ebua Yudafoi lɛ, koni amɛná hemɔkɛyeli yɛ emli. Kɛ̃lɛ, amɛteŋ mɛi fioo pɛ ebatsɔmɔ ekaselɔi, ni abaanyɛ awie akɛ, amɛji yibii ní nitsumɔ ni etsu waa lɛ ewo. Amrɔ nɛɛ, ekɛ nɔ ni fe afii etɛ etsu esɔɔmɔ nitsumɔ lɛ, ni eemia enitsumɔ lɛ mli fe tsutsu lɛ. Kɛ́ wɔɔkɛɛ lɛ, etamɔ nɔ ni eetsa agbami tso, ni ji Yudafoi lɛ ahewɔ kɛmiikpe koni ewo shishi tumo, kɛtsɔ shiɛmɔ ni eshiɛɔ yɛ Yudea kɛ Perea lɛ nɔ. Mɛni jɛ mli kɛba? Yudafoi fioo ko pɛ he enɔ ye. Shi kɛ́ wɔɔkɛɛ lɛ, maŋ muu lɛ fɛɛ tsakeee amɛtsui, ni amrɔ nɛɛ abaakpãtã amɛhiɛ.

Enɛ sɛɛ etsɛɛɛ lɛ, hemɔkɛyeli ni Yudafoi lɛ ateŋ mɛi babaoo bɛ lɛ bafee faŋŋ shi kome ekoŋŋ, yɛ Hejɔɔmɔ Gbi ko nɔ. Yesu miitsɔɔ nii yɛ kpeehe ko. Kɛkɛ ni ena yoo ko ni daimonio miihao lɛ, ni edɔ kɔmɔɔ afii 18 sɔŋŋ. Yesu musuŋ tsɔ lɛ yɛ ehewɔ ni ekɛɛ lɛ akɛ: “Yoo, afɛne bo kɛjɛ ogbedemɔ lɛ mli.” (Luka 13:12) Yesu kɛ eniji shwie yoo lɛ nɔ, ni amrɔ lɛ ejaje trɔmɔɔ ni ebɔi Nyɔŋmɔ hiɛnyamwoo.

Enɛ hã onukpa ni kwɛɔ kpeehe lɛ nɔ lɛ mli fu, ni ekɛɛ: “Gbii ekpaa yɔɔ ni sa akɛ atsuɔ nii yɛ mli; no hewɔ lɛ, nakai gbii lɛ anɔ lɛ, nyɛbaa ni atsaa nyɛ, shi jeee yɛ Hejɔɔmɔ Gbi lɛ nɔ.” (Luka 13:14) Nakai onukpa lɛ ejeee he ŋwane akɛ Yesu yɛ hewalɛ ni ekɛaatsa mɛi; moŋ lɛ, eewie eeshi gbɔmɛi lɛ yɛ ba ni amɛba akɛ atsa amɛ yɛ Hejɔɔmɔ Gbi lɛ nɔ lɛ hewɔ! Yesu hã onukpa lɛ hetoo kɛ sane ko ni enyɛŋ eje he ŋwane, akɛ: “Osatofoi, Hejɔɔmɔ Gbi lɛ nɔ lɛ, ani nyɛteŋ mɔ fɛɛ mɔ fɛneee etsinanuu loo eteji yɛ kooloi atsũ lɛ mli ni ekɛ lɛ aya eyahã lɛ nɔ ko enu? Nɛkɛ yoo nɛɛ, ni ji Abraham biyoo ni Satan efi lɛ afii nyɔŋma kɛ kpaanyɔ lɛ, ani esaaa mɔ ni ajieɔ gboklɛ nɛɛ yɛ ehe yɛ Hejɔɔmɔ Gbi lɛ nɔ?”​—Luka 13:15, 16.

Mɛi ni teɔ shi woɔ Yesu lɛ ahiɛ gboi, shi asafoku lɛ ná miishɛɛ waa yɛ anunyam nibii ni amɛna akɛ Yesu miifee lɛ hewɔ. Kɛkɛ ni Yesu saa egba nɔkwɛmɔnii enyɔ ni ji gbalɛi, ní kɔɔ Maŋtsɛyeli lɛ he lɛ yɛ Yudea hu. Etsɔ hiɛ ewie enɛ he momo be ni eta lɛlɛ ko mli yɛ Galilea Ŋshɔ lɛ hiɛ lɛ.​—Mateo 13:31-33; Luka 13:18-21.