Yitso 79
Maŋ ko ni Elaaje, Shi Jeee Amɛ Fɛɛ
BENI Yesu kɛ mɛi ni ebabua amɛhe naa yɛ Farisifonyo lɛ shia lɛ sɛɛ wie etsɛɛɛ pɛ kɛkɛ ni mɛi komɛi ba ni amɛbagba lɛ “Galileabii ni [Roma nɔyelɔ Pontio] Pilato ŋɔ amɛla efutu amɛ afɔlei lɛ amli lɛ ahe sane.” Ekolɛ nɛkɛ Galileabii nɛɛ ji mɛi akpei abɔ ni agbe amɛ beni Yudafoi lɛ wie amɛshi shika ni Pilato yajie kɛjɛ sɔlemɔ we lɛ shikatoo he lɛ koni ekatsa nujɔɔ koni ekɛha nu aba Yesrusalem lɛ hewɔ lɛ. Ekolɛ mɛi ni bagba Yesu nɛkɛ sane nɛɛ miitsɔɔ akɛ awa Galileabii lɛ ayi yɛ amɛ diɛŋtsɛ amɛ yiwalɛ nifeemɔi ahewɔ.
Shi kɛlɛ, Yesu jaje amɛ, ni ebi amɛ akɛ: “Ani nyɛsusuɔ akɛ, nɛkɛ Galileabii nɛɛ, eshafeelɔi ji amɛ fe Galileabii lɛ fɛɛ, hewɔ ni amɛna nɛkɛ amanehulu nɛɛ?” Yesu ha hetoo akɛ: “Dabida.” Kɛkɛ ni ekɛ sane ni ba nɛɛ tsu nii ni ekɛbɔ Yudafoi lɛ kɔkɔ akɛ: “Kɛ nyɛtsakeee nyɛtsuii lɛ, nyɛ fɛɛ nyɛhiɛ baakpata nakai nɔŋŋ.”
Yesu tee nɔ, ni ekai amanehulu kroko ni ba yɛ jɛi nɔŋŋ, ni ekolɛ ekɔɔ nakai nujɔɔ lɛ gbamɔ nɔŋŋ he. Ebi akɛ: “Aloo nyɛsusuɔ akɛ, mɛi nyɔŋma-kɛ-kpaanyɔ lɛ ni Siloa mɔɔ lɛ ku shwie amɛnɔ ni egbe amɛ lɛ, amɛ amɛji nɔtɔlɔi fe gbɔmɛi fɛɛ ni yɔɔ Yerusalem?” Dabi, Yesu kɛɛ akɛ jeee gbɔmɛi nɛɛ anɔ fɔŋ feemɔ hewɔ ni amɛgboi lɛ. Shi moŋ, ‘be kɛ nii ni baninaa mɔ trukaa’ ji nibii ni kɛ amanehului nɛɛ fɔɔ baa. Shi kɛlɛ, Yesu kɛ shihilɛ lɛ tsu nii ni ekɛbɔ amɛ kɔkɔ shikome ekoŋŋ akɛ: “Kɛ nyɛtsakeee nyɛtsuii lɛ, nyɛ fɛɛ nyɛhiɛ baakpata nakai nɔŋŋ.”
Kɛkɛ ni Yesu tee nɔ ni ekɛ abɛbua ko ni sa jogbaŋŋ ha, ni etsɔɔ mli akɛ: “Mɔ ko tɛo agbami tso yɛ ewein trom mli, ni eba enɔ yibii taomɔ lɛ, enaaa eko. Kɛkɛ ni ekɛɛ trom saalɔ lɛ akɛ: ‘Naa, afii etɛ nɛ fɛɛ lɛ mibaa mibatoaɔ yibii yɛ agbami tso nɛɛ nɔ, shi minaaa eko; toomɔ lɛ ofɔ shi; mɛɛba hu ni egbeɔ shikpɔŋ lɛ?’ Shi ehere nɔ ekɛɛ lɛ akɛ: ‘Nuŋtsɔ, ha ni ehi shi afi nɛɛ hu, kɛyashi beyinɔ ni matsa ehewɔ ni mawo eshishi tumu, akɛ aleee nɔ eeewo yibii lo; shi kɛ jeee nakai lɛ, dani otoo lɛ ofɔ shi.’ ”
Yesu kɛ nɔ ni fe afii etɛ ebɔ mɔdɛŋ koni edu hemɔkɛyeli yɛ Yudafoi amaŋ lɛ mli. Shi kaselɔi ohai fioo ko pɛ abaanyɛ akane akɛ yibiiwoo ni jɛ etɔlɛ lɛ mli. Amrɔ nɛɛ, eewo enitsumɔ lɛ mli hewalɛ, yɛ enitsumɔ be lɛ mli afi ni ji ejwɛ nɛɛ mli, ni eetsa mfonirifeemɔŋ Yudafoi agbami tso lɛ he ni ekɛ tumu miiwo shishi kɛtsɔ ekaa ni ekɛshiɛɔ ni ekɛtsɔɔ nii yɛ Yudea kɛ Perea lɛ nɔ. Shi kɛlɛ, nɔ ko jɛɛɛ mli baaa! Maŋ lɛ ekpoo akɛ amɛaatsake amɛtsuii, no hewɔ lɛ amɛbafee mɛi ni sa hiɛkpatamɔ. Maŋ lɛŋ shwɛɛnii fioo ko pɛ kpɛlɛ nɔ.
No sɛɛ etsɛɛɛ lɛ, Yesu yatsɔɔ nii yɛ kpeehe lɛ yɛ Hejɔɔmɔ Gbi lɛ nɔ. Ena yoo ko yɛ jɛmɛ, ni daimonio miigba enaa, ni no hewɔ lɛ eha edɔ kɔmɔɔ afii 18 sɔŋŋ nɛ. Yesu kɛ lɛ wie kɛ mlihilɛ ni ekɛɛ: “Yoo, afɛneo yɛ ohela lɛ mli!” Kɛkɛ ni ekɛ eniji shwie yoo lɛ nɔ, ni amrɔ lɛ nɔŋŋ ekpa emli ni ebɔi Nyɔŋmɔ hiɛ nyam woo.
Shi kɛlɛ, kpeehe lɛ nɔ onukpa lɛ mli wo la. Ewie eshi enɛ ni ekɛɛ: “Gbii ekpaa yɔɔ ni esa akɛ atsuɔ nii yɛ mli; no hewɔ lɛ nyɛbaa yɛ nomɛi amli koni atsa nyɛ, shi jeee hejɔɔmɔ gbi lɛ nɔ!” No hewɔ lɛ onukpa lɛ kpɛlɛ hewalɛ ni Yesu yɔɔ ni ekɛtsaa mɛi lɛ nɔ, shi ebu mɛi ni ba koni atsa amɛ yɛ Hejɔɔmɔ Gbi lɛ nɔ lɛ fɔ!
Yesu ha lɛ hetoo akɛ: “Osatofoi! Ani hejɔɔmɔ gbi lɛ nɔ lɛ nyɛteŋ mɔ fɛɛ mɔ fɛneee etsina loo eteji yɛ niyenii anɔ he ekpalaaa lɛ eyahaaa lɛ nu lo? Shi nɛkɛ yoo nɛɛ ni ji Abraham biyoo ni Satan efi lɛ, naa, nɛkɛ afii nyɔŋma-kɛ-kpaanyɔ nɛɛ lɛ, ani ejaaa akɛ afɛneɔ lɛ yɛ nɛkɛ kpaa nɛɛ mli yɛ hejɔɔmɔ gbi lɛ nɔ?”
Ojogbaŋŋ, beni amɛnu enɛ lɛ, mɛi ni wieɔ shiɔ Yesu lɛ ahiɛ gboi. Shi kɛlɛ, gbɔmɛi asafo babaoo lɛ na miishɛɛ yɛ anunyam nibii fɛɛ ni amɛna ni Yesu fee lɛ hewɔ. Ni Yesu saa ti mfonirifeemɔŋ gbalɛ wiemɔ ni kɔɔ Nyɔŋmɔ Maŋtsɛyeli lɛ he, ni ji wiemɔi ni ewie kɛjɛ lɛlɛ ko mli yɛ Galilea Ŋshɔ lɛ nɔ, aaafee afi ni eho lɛ mli lɛ mli ekoŋŋ. Luka 13:1-21; Jajelɔ 9:11; Mateo 13:31-33.
▪ Mɛɛ amanehului atsi ta yɛ biɛ lɛ, ni mɛɛ nikasemɔi Yesu jie kɛjɛ amɛmli?
▪ Mɛni he abaanyɛ akɛ agbami tso ni wooo yibii lɛ ato, kɛ agbɛnɛ hu mɔdɛŋ ni abɔ koni aha ewo yibii lɛ?
▪ Mɛɛ gbɛ nɔ kpeehe lɛ nɔ onukpa lɛ kpɛlɛ hewalɛ ni Yesu kɛtsaa mɛi lɛ nɔ yɛ, shi kɛlɛ mɛɛ gbɛ nɔ Yesu jie nuu lɛ osatofeemɔ lɛ kpo yɛ faŋŋ mli yɛ?